2006 年 6 月 19 日 星期一 【晴】

Title：生日禮物

　　今天收到公司的生日禮物，很奇怪公司的有關同事會知道小弟看中了黑白豬計數機．結果拆了禮物之後感到很驚喜．多謝晒！



>>June 29, 2006 at 3:04:46 PM GMT+8

2006 年 6 月 18 日 星期日 【晴】

Title：精選遊覽團

廣告 --- 法證先鋒

　　最近睇到個廣告好正，係推銷新劇既．廣告開始係歐陽震華飾演既法醫，係兇案現場蹲低望住一堆玻璃碎，然後根據玻璃破碎之後既分散方向推斷出成個兇案的面貌．

　　畫面用個堆玻璃突然成堆結合起黎，飛到歐陽震華既身後，而當歐陽震華向後望，兇手正手持兇器企係佢既身後．

　　成個廣告從畫面到意念到表達手法都好正，絕對值得欣賞！

>>June 26, 2006 at 1:31:42 PM GMT+8

2006 年 6 月 16 日 星期五 【晴】

Title：獨行俠

　　今日跑日馬，一返到去 Check 完 D 電話機就放 Break ，放完 Break 就俾 Willy 叔叔派左去 3/4B 企．跟住佢就好似 " 機關槍 " 咁交低左 D 野俾我，問我明唔明，講真就唔咪好明，因為未企過，但係 Willy 叔叔太忙，所以走左去．跟住有成十幾二十人行入黎，要安排佢地坐低，但係聽得電話既電話機得十幾個，點樣坐得晒，唯有有位叫佢地坐住先，費事佢地好似排人牆咁啦，好彩過左陣有 D 資深 D 既同事黎救我，而 Richard 又叫我落去，於是一於唔理就落左去．

　　落到去企番 1/2 D ，又係要轉位既行，今次一於聽 Charlotte 姐姐講，抄低晒 D 位，今次一定唔會再出錯，孔子也說過： " 君子不二過 " 嘛！

　　之後好快就抄晒 D Seat Plan 同收埋 D 早走請假紙，無咩好做，成日行來行去．同我一齊行既 Richard 因為大病中，所以佢成日都企係度，於是基本上成條 Line 都係我搞晒．跟住其中一場叫左我上去聽 D 巨額 Account 既電話，好彩咁岩 D Account Balance 都唔駛出動到我地，所以我傻傻更更企左幾分鐘就落返去．

　　如是者時間又係咁過，到左最尾一場，隔離行（即係以前企個行）有位同事唔識賣足球注項，向 Sammy 求救， Sammy 一向都話賣足球唔掂，於是係咁嗌 " 阿匯阿匯 " 叫我過去．跑到過到去插左個耳筒入去，隱約聽到有 D 同事講 " 哦，呢個叫阿匯 " ，但係都無理佢地，跪住係度賣飛．賣左大約幾分鐘，連馬都開埋閘，同事都準備收工．跟住企返起身， Sammy 話： " 賣完飛喇！為呢位同事鼓掌！ " 咁岩又有幾位同事真係聽佢講，係度拍手掌，搞到我都鬼死咁唔好意思．之後就行番去自己條 Line ，搞埋 D 野做大 En ．再企到六點半就收工 lu ．

>>June 22, 2006 at 1:25:39 PM GMT+8

2006 年 6 月 15 日 星期四 【陰】

Title：四日三夜 Camp

　　 今日終於由 Camp 返番出黎，總括黎講都幾好玩，可以好好咁 Relax 一下．可能由於係平日去既關係，加上個度裝修緊，連飯堂都無，所以都無咩人去．


床上吃早餐


終於要叫外賣

　　除左工作人員之外，可以話係 " 見樹多過見人 " ，連玩都無咩人，可以 " 縱橫四海 " ，狂掃所有遊戲．不過由於無咩人，有 D 活動室都唔開，等我地玩先搵人行去開鎖俾我地玩，所以都唔想成日勞煩佢地．於是基本上又係狂打美式桌球，有打過一陣康樂棋，打過一陣網球，打過一個鐘乒乓波．


可愛的桌球小子


我倆的戰場


打桌球的心心

比賽結果：　匯匯 29 : 16 心心

　　另外，由於只有部份時間有得去康樂室玩，其餘時間都要留係宿舍，所以都要諗 D 野玩．我地有帶左 D 啤排入去玩釣魚同鋤 D ，仲有帶骰仔玩大話骰，仲教埋心心仔識玩 Lucky 添．仲好彩有得借棋返營舍玩，先至發現原來 " 妙探尋兇 " 幾好玩．另外好彩部電話有得播收音機，可以令一間無電視既房加番 D 聲音．

　　而間房都幾 OK ，不過敗筆就係浴室同 Toilet 要同其他房共用，好彩無咩人 Book Camp ，所以隔離兩間房都無人住．


房間與懶蟲


從營舍望出去的鯉魚門與九龍東

>>July 2, 2006 at 1:55:07 PM GMT+8

2006 年 6 月 8 日 星期四 【颱風】

Title：點解咁大雨??

　　今日由朝早開始就勁落大雨，落落下變黃雨，再轉紅雨，之後仲勁快黑雨，但係因為今日係 Book Camp 既 Dead Line ，所以唔出去都唔得．結果未開始行到露天既地方已經對腳都濕晒，因為樓下已經水浸．跟住同心心仔輾轉地去到鯉魚門度假村， D 職員都問：" 嘩！咁大雨都黎 ? " 我地諗：" 唔黎都唔得啦！ " 搞完 D 手續之後，想去 Toilet ，但係要經過個球場，落住大雨，又大風，仲行雷閃電，勁驚未去到 Toilet 就俾雷劈．結果去完之後，真係大雨到行唔番出去，諗住打番公司叫車，但係無人聽，諗住黑雨收左工．跟住打去的士台叫車，好彩有車入黎，之後搭左去太古城，成對腳好似浸住水咁．行左陣就返屋企 lu ．

>>June 16, 2006 at 2:21:21 PM GMT+8

2006 年 6 月 7 日 星期三 【暴雨】

Title：賽後報告

　　今日終於考完最後一科，總結番咁多科考試，發現到一個共通點：就係當溫書既時候，梗有 D 課題有信心 D ，有 D 課題無信心．讀到 D 無咩信心既課題，本來諗住係咁意望下就算，就算考都唔會揀．結果，到考試既時候，有信心個 D 就出到鬼咁難，無信心個 D 睇落就有得做．於是，我要以模糊同片面既記憶黎答題目，唔知係咪要懲罰我揀題目讀呢～

最新賠率

賽事編號　賽事名稱　　　　　　　　　　現時賠率
LSE 03　　Human Resources Management　　 1.80
LSE 01　　Corporate Finance　　　　　　　　1.95
LSE 02　　Macroeconomics　　　　　　　　 2.15
LSE 04　　Law Of Business Organzations　　　2.55

>>June 16, 2006 at 2:03:38 PM GMT+8

2006 年 6 月 7 日 星期三 【暴雨】

Title：考試最終回

　　今日考 Macro ，係四科之中既最後一科．琴日本來跑馬既，不過為左溫書無返到（好少有！！），結果成日坐係屋企睇電視同訓覺，都無咩心機溫．早知懶成咁就走去返工好過．結果，琴晚溫左（正確黎講應該話係睇甚至 " 立 " 左）上學期 12 個 Chapter 之中既 10 個 Chapter ，下學期未溫過就訓左．

　　結果較左鐘七點起身溫，懶到七點半先起身， " 好勤力 " 咁溫多 5 課，但係下學期尾既 7 課都未睇過，好難得！

　　之後終於戰戰兢兢等到下晝兩點考試，一打開份卷望下， Section A 六條題目要揀五條，見到第 2 條有個 " Growth " 字，即刻 " 噢 " 左一聲出黎，因為諗住實係考 Growth Model ，係最尾個兩三課，即係剩返個 5 條一定要做，如果出正唔識既 Topic 就即刻死得．跟住睇埋其他題目，第 4 同 6 肯定要答，因為係上學期頭幾課，第 3 條都 OK ，第 5 條問 Solow Growth Model ?? 咁第 2 條問咩? 原來係 Growth in Income ，嚇死人，第 1 條都 OK ，好彩出正我作得到個 D Topic ，揀到 5 條做，真係要偷笑．

　　跟住 Section B 八條題目揀三條，得第 9 同 11 條有把握做下（就算無把握都要做啦！其他題目都唔識），跟住再 " 立 " 下無咩其他識做，咁就做左先啦，輾轉地做左個半鐘，剩番一條未做，緊張地望下 D 未做既題目，第 10 唔識...第 12 唔識......第 13 唔識...........最後一條，突然眼前一亮，第 14 條有得做，好似打牌所講既 " 海底撈月 " ，無時間要即做．

　　結果竟然更神奇既事，就係呢一刻出現，就係 " 要加紙 " ！竟然無咩溫過書都唔夠紙做，估唔到最後一科 " 食尾糊 " ，其他讀左書既科就寫唔到咁多，真係奇怪！不過其實因為要搭 8 條題目，基本上個個都要加紙．

　　終於做到考場主任嗌 " Pens Down ! " ，代表著為期個多月既折磨終於完結，亦都代表考試暫時離開小弟 （如果唔駛重考或者繼續進修既話）．收完卷立即要振臂高呼，終於舒服晒！

>>June 9, 2006 at 2:48:57 PM GMT+8

2006 年 6 月 3 日 星期六 【陰】

Title：匯匯的故事時間

Little Mermaid

　　從前有一條美人魚，相信大家都知道美人魚是利用貝殼作泳衣的，但畢竟美人魚還是少女，身體還在發育中，貝殼慢慢變成了一塊乳貼，是時候需要找一塊更大的貝殼了．美人魚不停的到處找呀找，游呀游，找呀找，但找到的都只是一堆不適用的蜆殼和蠔殼．

　　忽然，她的眼前出現了一個很合尺寸的貝殼，可是似乎裡面有住客的．美人魚游到貝殼的跟前，敲一下門．應門的是一隻蚌，他擁有一粒很美的珍珠．美人魚含蓄的向蚌表明來意．

　　" 不好意思，我想跟你換一個貝殼，可否將你的住處與我交換，因為我的貝殼不夠大！" 美人魚靦腆地說．

　　" 哦！小姐，我也很想幫你，但你的貝殼似乎太細了，不夠容納我！" 蚌真誠的說．

　　美人單眼眨了一下：" 請你試一試吧！如果真的容不下你，我也只好認命... " 她似乎以退為進．

　　" 單以眼來判斷，已經知道不可能了！ " 雖然蚌是這樣嘮叨著，但也捧著他的珍珠搬到小貝殼，畢竟蚌還是一個好人．

　　蚌嘗試把貝殼合上，但似乎有點吃力，甚至連門也關不上．遠看之下，有點像麥當當叔叔的漢堡包，但這是一個海中的漢堡包．

　　" 都說過不行的啦！ " 蚌似乎呼吸有點困難．

　　" 不！這新居很適合你呢！我說可以就可以，你娶了老婆一起住也可以！" 美人魚不甚覺得牽強．

　　" 不是嘛... " 蚌還沒有把話說完，美人魚便使勁，甚至可以說是野蠻的把貝殼合上，情況有點像宜家傢私門外的人，把一個七尺高的衣櫃塞進計程車的車尾箱一樣駭人．

　　" 不就是剛剛好嘛?! " 美人魚邊說邊把新貝殼戴上，似乎很稱身，但又好像欠缺些甚麼．

　　" 喂！放我出去，放我出去！ " 蚌困在貝殼裡面呼喊著．

　　" 噢！哪有聽過蚌被困於殼裡面 ? 這麼蠢的蚌，還是第一次見，要不要找消防員救你出來 ? " 美人魚自言自語道．

　　" 唏！這個貝殼是擁有最新設計，裡面有一個保險制，可以把殼打開的呢！" 美人魚微笑的向裡面的蚌說，畢竟她也只是一位少女．

　　" 噢！真...是...連身...子也...差...點轉...不動..." 蚌辛苦地說，最後貝殼 " 啪 " 的一聲打開了．

　　" 快把殼還給我！ " 蚌面紅耳赤的說，由於蚌是沒有面和耳的，因此全身也發紅了，有點像一顆青口．

　　" 沒介紹錯吧? 大小剛剛好呢！ " 也許美人魚上次到陸上遊覽時，遇過地產經紀，連說話的口吻也有七八成相似．

　　" 你這個 ' 筍盤 ' ，想找人跟你買也困難！ " 蚌也似乎遇過太多被無良經紀欺騙過的業主，口吻也有七八成相似，還忘記了自己是跟美人魚交換貝殼罷了！

　　美人魚似乎沒有理會他，只顧欣賞自己的新衣，但蚌還繼續不停的在她身旁嘮叨著．

　　" 你很煩耶！ " 美人魚對蚌說，說罷便游走了．蚌當然窮追不捨，形成美人魚與漢堡飽追逐的奇觀．

　　美人魚回到家中，一尾巴把門關上．碰巧蚌也趕到，給正在合上的門夾個正著，漢堡包頓成了一個豆沙餅．

　　" 放我出去，放我出去！ " 豆沙餅不斷發出聲響．美人魚煩躁起來，把豆沙餅扔進鑊裡面，把鑊蓋蓋上，再用中火隔水蒸．

　　" 噫！很鮮味呢！ " 美人魚滿足的品嚐著剛蒸好的蚌，突然她咬到一粒很硬的東西，便把它吐出來． " 噢！原來是一粒珍珠呢！ " 美人魚想去自己的新泳衣欠了一些裝飾，而這顆珍珠也正正能夠填補不足，於是她高興的把它掛在胸前，露出燦爛的笑容說： " 唔！很合襯！ "

>>June 5, 2006 at 4:16:00 AM GMT+8

2006 年 6 月 3 日 星期六 【陰】

Title：精選遊覽團 -- 美女廚房

　　今日睇到電視既美女廚房，雖然有 D 覺得個節目有 D 取笑緊女孩子煮飯時手足無措既醜態，而參賽既女嘉賓同做評判既男嘉賓都有 D " 交貨 " 之嫌，但係都幾好笑下．好變態！！

　　加埋先前既近廚得食，越黎越覺得周汶錡幾靚女～

>>June 4, 2006 at 2:34:34 PM GMT+8

2006 年 5 月 31 日 星期三 【乍寒還暖】

Title：最新賠率


賽事編號　賽事名稱　　　　　　　　　　現時賠率
LSE 01　　Corporate Finance　　　　　　　　1.40
LSE 03　　Human Resources Management　　 2.15
LSE 02　　Macroeconomics　　　　　　　　 2.90
LSE 04　　Law Of Business Organzations　　　3.45

>>June 4, 2006 at 2:26:39 PM GMT+8