2006 年 3 月 18 日 星期六 【微冷】

Title：第一日企足一日既 Day Race

　　今日一返到去有得 Break ， Break 完之後落去，俾左個 Headset 我，以後都會有個 "私伙" Headset ， Sammy 話：" （個 Headset ）跟住你做到走（辭職）架喇！ " 都幾開心，因為返左咁耐都無樣野係屬於自己，平時埋位都係儸個個位既 Headset ，個個同事都係戴 Headset ，污糟就難免架喇，戴到隻耳仔都痕埋先慘．

　　不過，有得呢個 Headset ，即係代表係不久既將來，就會 " Mon 大飛 " ，即係聽住 D 同事幫 D 有錢佬買飛．如果閣下個普通戶口既 Account Balance 超過 20 萬，或者大額（投注戶口）有 100 萬 Account Balance ，又或者買 5 萬蚊或以上一注，就會有得享受呢個 Service ．聽落好似好有錢咁，不過都係 Sammy 講得岩：" 車...幾多錢都唔會入我地袋架啦！係多幾個零之嘛！ "

　　講番今日做咩先，一開始就抄 Seat Plan 啦．跟住就要幫手編同事放 Break ，都幾亂下．有時又唔知邊個未 Break ，邊個放完 Break ，邊個替緊人地 Break ，下一個邊個 Break 咁，都好在得個亂，未有錯，如果唔咪都唔知點算 Lu ，呵呵！

　　跟住有場唔夠同事，坐低左一陣，雖然係短短 5 分鐘，但係都已經好感激，因為有得坐下已經好好．之後有個同事成日訓覺 + 被人捉到搞個電話機，被人 Dig 左入 Office ，有得坐低賣飛．雖然有兩個半 Race Day 無賣過飛，但係都幾順暢，保持番一貫 "優質" 既水準，哈哈！

　　放 Break 入 " 水房 " 休息 15 分鐘，入到去檯面有包 " 杏仁卷 " ，上面寫住俾新既 Monitor ，即係我地啦．原來係 Willy 叔叔請既，真係好人！！食左 3 條，一來食唔晒，二來都幾肚餓，因為淨係朝早食左幾塊蘿蔔糕就返工，可以講話係 "飢寒交迫" 之下 "雪中送炭" 呀！

　　完場之後要 "守龍門" ，即係唔俾同事收工之後由上面走落下面，或者由下面走返上面，真既龍門就守得多，無龍門既龍門都係第一次守．又企多左 10 分鐘，寧願遲 D 走，因為唔想同 D 同事一齊 "出閘" ，所以有得 Hea 下又有人工收都幾好！

>>March 25, 2006 at 6:41:30 PM GMT+8

2006 年 3 月 16 日 星期四 【陰】

Title：朋友

　　今晚又睇新借返黎既 < Q版特工 >，見到呢幾句詩幾有意思：

＜治家格言--良朋益友篇＞

朋友相交宜謹慎，狼群狗黨莫相親；

休因酒肉為知己，急難不扶反笑貧．

結交朋友應信實，日久才能知人心；

患難之時相愛顧，萍水相逢難知情．

錦上添花人人有，雪中送炭世間稀；

四海之內皆兄弟，留心擇友益無窮．

朋友不在乎多，只在乎真．

>>March 17, 2006 at 4:26:17 PM GMT+8

2006 年 3 月 14 日 星期二 【微冷】

Title：正式做 Monitor 既第一個 Race Day

　　今晚跑夜馬，返五點半，一報到之後就俾 Team Leader 派左落去．落到去學 Check 電話機，跟住就 Check 左兩行既電話機，Check 左成半個鐘頭，之後就有得 Break ． Break 完之後，落到條 Batch 已經有 D 同事埋左位，於是就儸塊座位板抄同事既職員 Number 同埋返工時間，咁岩有位 Auntie 係識既，佢又問：" 咦！你做左組長呀? " 跟住我應佢："想學下野囉！"

　　抄完之後就學派 D 早走 / 請假表格俾同事，平時儸表就多，派都係第一次．之後就要收番 D 表，如果申請早走就要填返落座位表度，跟住又要睇下同事有無填錯，都幾 "撈較" 下．

　　之後差唔多開第一場，要巡來巡去睇下有無同事要幫手，巡來巡去個 Feel 好似以前做 Prefect 咁．不過我都幫唔到佢地，因為新升既 Monitor 唔准做咁多野住，所以有時佢地要幫手，我都係愛莫能助．其間唔知邊場臨截止之前（簡單黎講係好緊張既時間），突然同時有四隻手伸埋黎叫我幫手，但係我都唔幫得手，真係有 D 尷尬，好似坐視不理咁．不停咁巡呀巡呀，巡到第四場先有得坐 15 分鐘．

　　之後又要再巡，巡到完場，企足全程，搞到對腳超累．不過都好，因為平時坐得太多，企下都好．但係企完咁耐，仲要行返去火炭搭巴士，又要等巴士，又要行返番屋企都幾慘下．

>>March 15, 2006 at 5:19:48 PM GMT+8

2006 年 3 月 13 日 星期一 【颳風】

Title：這就是我 ?!

以下是性向分析說明：

真實生活中你會被什麼性格的人吸引：
羊 － 善體人意有如溫暖的陽光的人最吸引你。

在被追求的過程中，什麼方式讓你最無法抗拒：
長頸鹿 － 有耐心、永遠不放棄。

你最希望留給情人的印象：
狗 － 忠誠、此情不愉。

你最不希望在何種情況下和情人分手：
鱷 － 無情的、冷血。

你希望和你的另一半建立何種關係：
羊 － 好像心靈相通一樣，你們不需要語言，一個眼神或手勢就足夠了。

你對感情世界腳踏兩條船的看法：
人 － 你在乎社會的看法，婚後你不會有越軌的行為。

你對婚姻生活的看法：
北極熊 － 你害怕婚姻，擔心婚姻剝奪你的自由。

你對愛情的看法：
貓 － 你以自我為中心，你認為愛情是消費用品，不用的時候就可以丟掉。

http://home.kimo.com.tw/yihjongchen/p2/311.html

>>March 14, 2006 at 11:09:40 AM GMT+8

2006 年 3 月 11 日 星期六 【暴雨】

Title：終於升職喇！！

　　今日又返馬會，因為遲埋位（因為又偷懶），所以得番 D 多 Call 既位坐，再加上琴日返完工，於是當 Monitor 行過既時候，我就問佢儸張 " 早走紙 " 報早走，想返屋企訓下．

　　跟住當我三點鐘去完 Toilet 返位既時候，有位女士坐左係我個位度，即係我可以走得．跟住入左去間房，等另一位同事幫我填埋 D 野，但係佢問我：" 你係咪之前報左做 Monitor 架？ " 我話： " 係呀！ " 跟住佢話：" 唔走得住喎！ " 原來身旁已經坐左兩位上次同我一齊 Train 既同事，原來叫我入去唔咪有得早走，係開始做 Monitor 喎！

　　於是之後就出番去，被編左去跟 Sammy ．行埋去 Sammy 條 Line ，佢問我做咩事，跟住我答：" 岩岩升做 Monitor！ " 身邊有 D 同事平時認得我，都好似戥我開心咁．之後 Monitor 師兄教下我野，之後佢就跑左去另一條 Line 做野，我就係度行來行去，話係 " 感受下個氣氛 " ．

　　有個之前識開既 Auntie 就問我：" 你升左之後咪要成日企，無得坐係度訓囉? " 我就答番： " 其實我都唔咪真係訓既，不過驚成日對住個 Mon ，所以瞌埋眼之嘛！ " 跟住佢話： " 哦...我仲以為你返完工或者返完學之後好眼訓添！ " 不過其實我又真係成日訓覺既...hehe...

　　之後企多四五場之後就放工 lu ．出左門口，收到媽咪既電話，話要幫佢買 D 野，就行出去新城市買野．黃昏開始翻風，又落雨粉，都既舒服丫！

>>March 12, 2006 at 2:33:46 PM GMT+8

2006 年 3 月 10 日 星期五 【炎熱】

Title：原來你甚麼都不要

　　琴日睇 "天幕下的戀人" ，有一幕係講 Niki 寫信同鄭嘉穎講 Sorry ，但係俾個同事見到，而咁岩鄭嘉穎入黎，個個同事就同鄭嘉穎講：" 嘩！你就好啦，有個到依家都仲會寫信既女朋友，好浪漫哦！ "

　　我也有寫野既習慣，唔談得算係浪漫，但起碼都算坦坦白白．不求你的欣賞，只求你的回覆．可是換來只有一天又一天的等待...

>>March 11, 2006 at 2:08:43 PM GMT+8

2006 年 3 月 9 日 星期四 【炎熱】

Title：OL 生活 2

　　今日 Lunch Time 買左一份三文治同埋一杯 Yogurt ，食完之後都無飽既感覺，好驚以後都感受唔到飽既感覺，原來飽既感覺係好幸福．不過之後，上堂坐下坐下，都唔記得自己肚餓，或者應該話個肚 Feel 到有野落肚就無再扭計啦！

　　之後放學，覺得口痕，就左去肯德基用埋 D Coupon ，食左成個餐．

>>March 11, 2006 at 1:57:29 PM GMT+8

2006 年 3 月 5 日 星期日 【微冷】

Title：忍心離去

　　今日 Lunch 走去大家樂買飯盒食，點知無左平時最喜愛既 " 三鮮肉餅煲仔飯 " ，淨番 " 中湯 " 獨守空房．點解煲仔飯走得咁突然，唔出句聲 ?

　　跟住將價就貨，就買左盒 " 椰汁葡國雞飯 " 頂住當，又係 26 蚊．但係 " 西飯 " 配 " 中湯 " 始終唔係好 Match ＞.＜

>>March 9, 2006 at 2:24:09 PM GMT+8

2006 年 3 月 5 日 星期日 【微冷】

Title：號外

　　To 各位摯友：

　　1980，1981同1982出世既朋友請留意，終於輪到我地換智能身分證喇！預約日期由 3 月 13 日開始，換證期係 3 月 27 日至 5 月 27 日．

　　召集各位小圈子會員一齊換證啦！

>>March 5, 2006 at 4:30:26 PM GMT+8

2006 年 3 月 4 日 星期六 【微冷】

Title：一日滿足晒三個願望

　　今朝一早九點半同左心心仔 & 細心心去 UA 睇 " 傲慢與偏見 " ．初初係抱住睇文藝片既心態去，預左悶到抽筋．但係睇落又唔咪，女主角唔話得係好靚，但係幾吸引；男主角都 OK ，做得出 " 木訥 " 既性格．故事雖然一定唔會跟原著由頭到尾做一次，但係 Cut 到 D 精華出黎，又唔會交待唔到中間發生左咩事．睇得好舒服，Highly Recommend 去睇！

　　跟住去左和民食 Lunch ，食食下 King 打黎話去唱 K ．之後食完行左陣，睇到西田個邊舉行 " BB 爬行大賽 " ，D 爸爸同媽咪咩都拎出黎引 BB 爬前，除左傳統既玩具，食物同公仔之外，有 D 拎住條蕉 ( 一歲都未夠都識食蕉 ?! ) ，而最 High Tech 就有電視遙控同滑鼠．而其中一組既勝出小朋友就係俾隻 " Mouse " 引住，爬得勁快，超可愛！！

　　跟住 3 點去左 Green Box 唱 K ，但係勁多人要等到 4 點 9 先有房，所以搭的士去富豪花園 Neway 唱 K （變左第二最愛）．本來話唱到 6 點半，點知 7 點半都未收房．於是都係走先，行去第一城食飯，去左間叫 " 春田 " 既日本料理（又係日本野，Yeah！！）．D 野食都 OK ，價錢又 OK ，8 片三文魚刺身都係 38 蚊，但係個壽司拼盤就差少少， 98 蚊得 8 件壽司同 3 舊 "蛋蛋" 卷， D 魚切得超薄．跟住傾左陣計就走 lu ．

　　今日好開心滿足到三個願望：
　　1) 睇戲 2)唱K 3)食日本野，仲要食兩餐添

>>March 5, 2006 at 4:23:16 PM GMT+8