2006 年 4 月 13 日 星期四 【颳風】

Title：披星戴月上班去

　　今朝返 7 點，因為之前同阿 Bell 調左．琴晚勁驚今朝起唔到身，所以破天荒較左 4 個鬧鐘．結果，第一個鬧鐘響既時候就彈左起身，唔敢再賴係張床，費時又訓番．跟住沖涼食早餐， 6 點鐘出門口．落到街唔知做咩凍到好似冬天咁，真係要打個冷震應下節先得！去到巴士站，等左一陣就有車， 6 點 40 分就落車．見有 D 時間，就去左九龍城圖書館掉左本書落去還書箱．

　　返到去就 6 點 50 分．阿芳已經返左去開左門，跟住就搞埋 D 野開工．之後唔知做咩事勁黑仔對左兩部電腦都壞左，阻住晒我聽電話落 Order ．最尾都落唔晒一疊 Order 紙．跟住又唔記得晒 D 站頭點出 Order ，變番新同事咁，真係失敗．之後 5 點鐘就收工，好彩臨走前都見到 Chaky 同 Eva 兩位夜間 Part-Time 同事既 " 最後一面 " ．跟住就落左去，大心心同細心心已經係樓下等緊我，之後同細心心分別後，就同埋咁岩行開九龍城既媽咪一齊搭車返屋企 Lu ．

　　唔知點解返到屋企就勁頭痛，可能係太耐無返工唔慣，辛苦得滯．

>>April 16, 2006 at 3:19:22 PM GMT+8

2006 年 4 月 11 日 星期二 【炎熱】

Title：有得 Mon 飛喇！

　　今晚跑夜馬，返到去食完飯埋返自己條 Batch ，一見到 Sammy 就同我講：" 今日可以 Mon 飛喇！ " 等左呢日都幾耐，因為之前未可以 Mon 飛，抄完 Seat Plan 就行黎行去，同事叫我幫手都幫唔到，好鬼唔好意思，所以寧願有得 Mon 下同事賣飛．

　　第一場未 Mon 得住，等到第二場可以幫手，跟住隔無幾耐 Sammy 就嗌：" 阿匯，XX位有大飛！ " 跟住就跑埋去，跟住就開始 Mon ，通常 D 大客都買成 10 幾分鐘，所以就要照企足全程．由於我係新 Monitor ，所以每次有 " 大飛 " 黎都叫我去先 (不過其實其他同事之後都要 Mon 其他大飛架喇) ．結果，餘下既 7 場就 Mon 足 7 次 " 大飛 " ，都幾忙下！

　　但係，收工時發現一件事，就係有得做 En 喇，即係可以遲 D 收工，賺多 D 錢．所以下次返工一定要報做 En ，一來賺多 D ，二來可以白逗人工（因為做 En 無咩野做，又有得坐下），哈哈！！

>>April 16, 2006 at 3:01:21 PM GMT+8

2006 年 4 月 10 日 星期一 【炎熱】

Title：連踩 3 場（返學版）

　　今日都算係非常充實，通常我都係因為又要返學又要返工而充實，但係今次係因為返學而充實都算係少有．

　　一朝早 10 點鐘就考 Law 既 Mock ，雖然淨係溫左 5 個 Chapter ，仲要有 3 個 Chapter 係無用既．好彩 8 條問題都揀到 3 條黎答，考試既 Requirement 就係答 4 條，跟住做呀做呀，做到差唔多 12 點半就早走．

　　跟住行過去灣仔食 Lunch ，食完飯見有 D 時間，就同心心仔行過去銅鑼灣捐血．心心仔因為食緊藥無得捐，所以我就單人匹馬捐血．今次有鐘望住，原來捐血 7 分鐘就捐完．中途隻手都有 D 痺痺地，之前都無試過，都幾驚捐唔到，於是勁諗住快 D 快 D ，好彩最尾都捐完．

　　之後抖左一陣就要急急腳搭電車返去上堂，上外國 Professor 既 Finance 堂．佢又照 Powerpoint 黎讀，都唔知佢想點，如果淨係對住 Notes 講就唔駛佢講啦．又或者因為佢講既野，之前 Wing Wing Miss 都講過晒，所以覺得上堂無咩得著．

　　跟住上到 5 點半就上完，去食 Dinner ．食完之後， 7 點半又上外國 Professor 既 Macroeconomics 堂，其實唔咪為左儸返份 Mock 卷都唔諗住上．跟住佢派卷時候叫我地 D 中文譯名，點知因為我同 Stephen 既中文名太相似儸錯佢份卷，跟住到佢真係叫我既時候，就用英文問：" 你咪儸左卷囉！ " 咁我當然用英文講：" 我儸錯份卷！ " 點知條友好似驚我呃佢咁，唔俾番份卷俾我．跟住佢派完之後，問有無人未儸番份卷，我舉手佢又唔理我，好似份卷有寶咁，搞到個人都慶慶地．之後放 Break ，佢行左出去，諗住去佢張檯儸返，點知佢又突然行返黎，叫我唔好拎走，話未登分．我又唔咪寫得難睇，又無寫漏野，點解人人都登左係我份未登分丫?! 真係想同佢講，叫佢拎番去英國啦！跟住佢俾返份卷我，本來諗住撕鬼左佢，不過最尾都 " 好有禮貌 " 咁拎番份卷．

　　之後，好唔容易咁捱完最後一堂 Macro Revision Class ，終於可以同佢 Say Good Bye ！

>>April 16, 2006 at 2:28:52 PM GMT+8

2006 年 4 月 9 日 星期日 【炎熱】

Title：小組首名

距離考試完結仲有兩個月，再經過多日來 Foreign Professors 既洗禮，現時得出考試結果既賠率如下：

小組首名（即考試中最高分）

賽事編號　賽事名稱　　　　　　　　　　現時賠率
LSE 01　　Corporate Finance　　　　　　　　1.50
LSE 02　　Macroeconomics　　　　　　　　 1.90
LSE 03　　Human Resources Management　　 2.75
LSE 04　　Law Of Business Organzations　　　7.00

>>April 16, 2006 at 1:49:50 PM GMT+8

2006 年 4 月 9 日 星期日 【炎熱】

Title：Short Run Target

　　考完試想買部 X - Box ，如果當時有錢既話．

>>April 10, 2006 at 1:00:49 PM GMT+8

2006 年 4 月 7 日 星期五 【炎熱】

Title：連踩三場

　　返完工之後就出左去新城市，因為約左出黎同 KK Poon 補祝生日．出到黎先至 7 點 4 個字，距離 8 點鐘仲有排，所以打俾何亨傾計，跟住 King 打黎，同何亨收線 King 都收埋線，打番俾佢又無人聽．跟住打俾 KK 睇下佢係邊，因為佢通常都早到，估唔到佢原來都係附近．之後就 Join 左佢，佢要去買太陽油，就同佢行左萬寧同屈臣氏，跟住就去明將搵位先，點知勁多人．行左過去 Pizza Hut ，都係好多人，不過就等得過，所以儸左飛就行過去反斗城，跟住 King , 7B 同何亨都相繼到達，等左陣就有位．

　　之後因為何亨有匯豐卡，所以叫左新出既烤腸 Pizza 餐，再加埋張 Pizza 贈券，再叫左個飯．然後就一路食一路講野，都係一貫咁好笑，食到成十點幾就走，仲有人入黎食野，都幾夜下．跟住 King 就話出去飲野，於是同 KK Poon 分別後，我地四個就搭 81 出去尖沙咀．

　　輾轉地去到諾士佛臺，亦即係酒吧林立既地方，好多外國人係度，好似好 High-Class 咁．其中有一間幾 Eye-Catching ，因為食中國菜，連侍應都係著中國服裝，有 D 外國人係度 " 一盅兩件 " ，亦都可以任揀 " 隊啤 " 定 " 隊茶 " ，認真係 Cross Over ．但係既然黎得呢度，梗係唔會去飲茶啦，平時未飲夠咩，所以我地過左隔離個間有個 " Italiano " 字樣既酒吧．

　　入到去，King 諗左無幾耐就諗到飲咩，果然係見慣大場面．我地 3 個睇住個牌，都唔知係 D 咩，於是何亨就叫 Waiter 黎問下有咩好介紹．Waiter 就介紹有杯好似 "思樂冰" 既飲品，咁何亨就揀左，跟住我同 7B 都話要，不過為左多 D 選擇，無理由 3 杯一樣架嘛．我就問仲有無介紹，跟住佢就介紹一杯叫 " Mai Tai " 既飲品，但係個名既讀音就似泰文多 D ，但係明明間吧既名係意大利 Feel 架?! 不過無所謂啦，橫掂咩都唔識，所以無所謂啦，我就揀左．跟住再叫佢介紹多杯，B 仔就有著落喇．

　　等左一陣，4 杯野飲就黎左．我飲下杯 " Mai Tai " 一啖，好彩係檸檬味，如果係其他生果味就咪搞喇！！D 酒味都幾濃下，跟住試左 King 杯 Long Island 一啖，可能係我個杯太勁酒味，所以飲唔到味，再飲多啖先飲到少少味．何亨個杯就係笀果味，所以無試．B 仔個杯就類似紅酒，我就試左一啖，但係個底就好多生果，所以都好慶幸我個杯野岩飲．跟住又傾計，不過由於周圍暗 D ，得檯上面支蠟燭照明，加上播住英文舊歌，所以講既話題都感性 D ．但係個 Feel 就唔錯，感覺好似 30 40 歲收左工之後落去飲野咁，如果第時有咁得閒都幾好．

　　坐到一點幾就走，King 好似意猶未盡，想再落 Pub 飲野，跟住我地去左金巴利道既鸚鵡吧飲野．入到去個 Feel 就截然不同，一來勁大煙味，二來好嘈，所以都係鍾意之前既 Feel 多 D ．之後搵左個角落坐低左，叫左 D 啤酒．佢地係度玩骰仔，我就無玩，因為唔咪好記得點玩．跟住坐坐下我都玩埋一份，都幾好玩，Revise 番點玩大話骰，又學左點玩 Lucky ．

　　玩到四點幾就返屋企，何亨搭的士，就兜埋我地返沙田，順手去埋大圍．於是唔駛轉車返屋企，去到美林落車行返去，5 點鐘就有得訓 Lu ．

>>April 10, 2006 at 12:59:01 PM GMT+8

2006 年 4 月 7 日 星期五 【炎熱】

Title：返工日誌

　　今日又係跑馬既日子，一早返到去又係 Check 電話機，禁下 D 電話機都已經過左半個鐘．跟住就去 Break ， Break 完之後埋番自己條 Batch 又係抄下同事既 Batch Number ．今次搶住黎抄，自己抄晒兩邊既同事．之後因為仲未 Mon 得大額投注，所以都係企下行下，幫下 D 同事開下戶口咁．

　　之後唔知去到邊場，有個客個電話斷左線，Team Leader（即係高級既 Monitor） Sammy就處理緊個條飛（= 注項），咁我諗住個客應該好快會打番上黎，所以記低左個個位既 Number 同埋個客買左 D 咩，因為如果佢打返上黎而斷線呢邊未搞掂，第二個同事就會開唔到個 Account ，會舉手叫我地．

　　估唔到說時遲那時快，身後既同事就舉手，而螢光幕亦都顯示係斷左線個位既 Number ，跟住我就等 Team Leader 搞完條飛，閂左個 Account ．我就係呢邊開番個 Account ，問番個客：" 先生，你之前係咪打黎斷左線呀? " 佢話： " 係呀係呀！ " 我就答番佢：" 先生，你之前條獨贏買左架喇，依家戶口結餘有 xxxx ，仲有無投注? " 跟住就交番俾同事同佢繼續賣飛．而另一方面， Team Leader 已經搞完晒行過黎，聽到我同個客既對話，就話：" 咁樣就岩喇，做得好呀下！ " 跟住成個人都開心晒，因為有人讚 ^^

　　之後過多一陣，差唔多就黎跑完馬，突然隔離個行有位同事舉手，但係其他 D 組長都唔得閒，我諗住去幫手，但係咩都未做得住，諗住應該有其他組長會走去幫佢，所以繼續行來行去．跟住突然之間，身邊 D 同事猛咁拍我，原來個位舉手既同事仲未有人幫到佢，而上面 D 組長叫 D 同事拍我去幫佢，於是我就跑左過去幫手，原來又係斷線，好彩同事話覆晒成條飛先斷線，所以就咁傳送左條飛，再用紙抄低 D 資料就得喇！呢次係第一次做幫同事開 Account 以外既工作，都幾有成功感．

　　跟住跑完馬就去 Trainning ，Train 完之後就出去食飯．

>>April 10, 2006 at 12:58:54 PM GMT+8

2006 年 4 月 5 日 星期三 【炎熱】

Title：很金牛座哦！

　　今天打開銀行存摺，原來個戶口維持呢個低 Balance 已經岩岩一個月．原來只係短短既一個月，但係覺得已經過左好耐咁．無咩錢係戶口既生活，令一個很金牛座既我無咩安全感．而另一方面，錢係唔會係短時間內 "飛" 埋黎既，所以係呢段 "長時間" 裡面，只係能夠同自己講句： "你很金牛座哦！"

>>April 6, 2006 at 1:19:08 PM GMT+8

2006 年 4 月 5 日 星期三 【炎熱】

Title：時間倒數

　　今日上完 Macro 既 Tutorial ，代表住所有科目既 Tutorial 都全部上晒，淨返 D 外國既 Professors 同埋 Local Lecturers 最後兩星期課堂．當係 SPACE 既生活倒數之際，無咩唔捨得既感覺；相反，只係更期待考試既來臨，快 D 讀完呢個 Degree ．或者真係讀書讀得太耐，熱情已經冷卻．或者目前只有工作，先至可以再次燃點起我心中既個道 "火" ．

>>April 6, 2006 at 1:01:47 PM GMT+8

2006 年 4 月 4 日 星期二 【炎熱】

Title：精選遊覽團

細路哥　林海峰

某一年一班剛剛考完會考既同學約埋一齊唱K
流行曲唱到一半既時候
其中一位朋友問左隔離個位一個問題
喂　你估下二十年後既今日　我地會變成一個咩人呢

二十年後
可能已經變成一個西裝骨骨既中環人
手帶勞力士　銀包有好多張信用卡
放工既時候就一齊響酒吧度
一邊望住個煙灰盅
一邊就望住隔離檯個個女仔
睇下佢條裙幾時會走光

二十年後
大概終於會買左個部好想擁有既汽車
但係仲有二十幾期要供
二十年喇　應該轉過好多份工
識做既野越黎越多
但係同時發覺學識越黎越少

響個個時間　間唔中可能會去下 gym
但係做黎做去都係減唔到個肚腩
當然二十年黎你間唔中都會諗起一段
一路都未能放低既感情
女朋友越黎越多　但係愛既越黎越少

細路哥　你得到什麼　你失去什麼
你知道　What are u looking for?

大概響個個時候可能會有身邊既親人離開
而個陣時你會有好多講唔出口既遺憾
同時間你會發覺原來人生已經過左一大半

同年終於結婚喇
用左半生既積蓄俾左一層樓既首期
有車位有泳池會所
娛樂越黎越多　但係快樂越黎越少

兩年後　可能會離婚
回復單身之後既一個晚上　一個人響床上面
查住個搖控不停咁轉台　食左兩粒安眠藥
跟住點起支薄荷煙
然後流左一滴自親人離世之後既眼淚

突然之間你又諗起　響二十年前
你係一個咩人　係個一晚
一大班同學約埋出0黎唱K唱到天光
仲記得係個朝返到屋企既時候
打開門響檯面見到有一碗屋企人留低既湯
碗湯已經凍左喇

細路哥　你得到什麼　你失去什麼
你知道　What are u looking for ?

>>April 6, 2006 at 1:08:56 PM GMT+8