2006 年 3 月 3 日 星期五 【颳風】

Title：體能考試

　　今日晏晝要去體能考試，去到填表，等嗌名跟 Madem 去更衣室換衫．換完衫之後就做陣熱身，跟住去考 "立定跳遠" ．聽完阿 Sir 講 D 留意事項，每人試跳一次，跟住就要考試．我跳到 1.9 米，得兩分，其他十幾個考生都合格，於是成班行過去體育館繼續考試．

　　行到去體育館，考 "穿梯" ，入到去坐低睇帶示範，跟住又有得試一次，原來都唔咪好容易．個架成 4.7 米高，上到去都有少少畏高，但係為左考試唯有頂住上，勁叫自己唔好驚．而試穿個次好重要，因為平時唔會有機會練，個個都應該係第一次，所以要係短短時間內揣摩應該點先穿得快 D ．跟住就開始考試，基本上無咩阻滯，但係都要 43.09 秒先穿完，都係得一分．宣佈完成績之後都有 D 考生要走，因為每項其中得零分就可以即刻離開．

　　跟住過隔離考 " 靜態肌力測試 " ，即係要用唔同 pose 拉個磅．未開始之前，又有阿 Sir 同我地 briefing ，佢一行埋黎，睇佢個樣，突然諗起一個人 --- 就係達哥 --- 劉以達，之後我就由個心笑出黎，而最好笑就係佢講野既 Style 都係超似達哥．聽完佢 Briefing 之後，就逐個上台試做一次，跟住就開始做．本來諗住可以有五分，點知都係得四分，總之用埋 D 力做啦．

　　咁觀眾心水清都計到： 2 + 1 + 4 = 7 分，要 12 分先 Meet 到 Requirement，即係最尾既 800 米跑步要儸 5 分，即係要 2 分 45 秒跑完．而如果大家有睇前兩日既日記，都知我平時練都係得 4 分鐘，即係機會都係差唔多等於零，但係做人要有體育精神，英文叫 Sportsmanship ，所以都係繼續迎戰．

　　我地四個男仔被編埋一組，我係組內排第二．跑既地方唔咪正式既跑道，係個操場黎既，要跑 4 1/3 個圈．阿 Sir 一聲 Go 之後，第一個考生出發．佢跑左三份一個圈就到我，一聲令下我又出發．跟住跑左一個多圈，第三位考生就過左我．跑多差唔多一個圈，第四個考生都過埋我，跟住都係要繼續跑，但係都幾辛苦，腦海中浮現左填表時，"聲明" 內一句：" 本人同意考試中如遇不適可即時終止考試，並非強迫參加． " 心諗：" 不如唔跑啦 " 但係我再重申一次，做人都係要有 Sportsmanship ，如果得既話，點都要繼續，所以都係繼續跑．

　　跑到兩個半圈，好期望阿 Sir 話："仲有一個圈！" 但係無人出聲，即係仲有兩個，真係嗌晒救命．望住第三位考生，佢仲係係咁跑，速度無咩減弱，成個長跑隊隊員咁樣．跟住幾經辛苦之下終於跑完 800 米，對腳累到企又唔咪，坐又唔咪，唯有勁行圈．之後阿 Sir 公佈成績，本來諗住阿 Sir 應該會 Skip 左我唔講，因為如果考生得零分，阿 Sir 就會 Skip 左唔講，避免尷尬．但係竟然有宣佈我成績，唔咪一分，唔咪兩分，係三分（返到屋企睇番 D Standard ，三分代表 3'01" - 3'15" 內跑完，即係比練習快左成分鐘，超開心！！）不過都係得十分，未夠 12 分．即係等於會考 14 分先有得讀中六，但係都叫 Full Pass 丫，都係要換衫離開．

　　不過今次考試既終結，唔代表我既公務員夢想終結．我知道自己既不足，要繼續努力，等緊上主菜．等我！！

　　Next Mission：入境處

>>March 5, 2006 at 3:48:02 PM GMT+8

2006 年 3 月 2 日 星期四 【乍雨乍晴】

Title：唔好喇掛 ?!

　　岩岩八掛走左去曉茹既 Dirary 睇睇，見到有一日既 Diary 令到我有 D 感覺．

　　她是這樣寫的： " 常常認為，自學生年代便認識的小情侶很幸福，因為大家一起經歷很多，大家都抱著最單純的心相交，大家的成長背景又相同．這種伴侶，在工作社會中似乎再找不到．"

　　我對呢句說話抱中性的態度，因為唔知係岩定唔岩．但係，身為還未出黎社會工作，思想都尚算單純既我，只係希望呢樣事情唔會發生，仲相信單純既人有朝一日會搵到一個單純既另一半...

>>March 3, 2006 at 2:59:29 PM GMT+8

2006 年 3 月 1 日 星期三 【颳風】

Title：最後備戰

　　今日特登去左沙田運動場跑步，因為過兩日要考海關體能考試，最驚係跑 800 米，唔咪跑唔到，但係要計時就有 D 難度，要係 3 分 45 秒內跑完喎先得 1 分．

　　一開始跑，心諗住一定跑晒 800 米，跑左頭 100 米都諗住實跑得晒．但係跑到 200 米，就開始覺得有 D 困難．到跑到 300 米，就諗住跑完 400 就算，結果頭兩次跑左 400 米．但係點都要試下跑 800 係點先得架，於是 "的" 起心肝跑一次，原來跑 800 米係好好好好辛苦，仲要 4 分 05 秒先跑完 >< 之後再跑多次，仲慘，要 4 分 18 秒先搞掂．

　　睇黎後日都要 "如有神助" 先得喇...

>>March 4, 2006 at 3:14:34 PM GMT+8

2006 年 3 月 1 日 星期三 【乍雨乍晴】

Title：精選遊覽團

暴殄天物 陳奕迅

燃油被吸管抽乾了　能源盡耗
農田被剷車剷光　食物卻偏要倒
叢林被斧頭斬低了　淪為舊書報
人人什麼都得到　但沒變得更好

好風光　看過了　便互望
原來從來未拍低
好東西　見慣了　沒特別
原來浮華盛世　人人浪費

可以做沙律的菜　為何腐爛成這樣
可以做新衫的布　淪為垃圾
誰又要　來換上
可以做單車的鋼　做了子彈與手槍
天賦是充足不過　完全用錯
成就了　錯對象

明明十箱新衫新褲　如常換季
前日大屋裝修好　後日已經拆毀
全場電燈泡都開了　誰忘掉熄掣
誰人又親身飾演　被浪費的那位

可以做總統的你　做了家中那廳長
可以做畫家的你　才華沒有
誰賣賬　誰賣賬
可以做歌星的你　沒有FANS要簽名
可愛又可親的我　為何沒有
榮獲你　當偶像

[ 歌詞好有 Meaning ]

>>March 2, 2006 at 4:48:11 PM GMT+8

2006 年 2 月 27 日 星期一 【乍雨乍晴】

Title：精選遊覽團

　　今日睇左一齣好感動既戲：劇情不需要出人意表，只有愛便足夠...假如愛有天意...

　　張開耳朵 如果你聽到自己的心跳 你愛的人便在愛著你
　　閉上眼睛 如果你唇邊有一絲微笑 愛你的人也在愛著你

>>February 28, 2006 at 3:39:55 PM GMT+8

2006 年 2 月 26 日 星期日 【颳風】

Title：OL 生活

　　話說因為琴日返工無食早餐同午餐，所以收工買左包勁大包既薯片食．跟住夜晚又因為晚飯食粥而勁肚餓，於是又食左碗意大利粉先訓，於是搞到有 D 食滯左．

　　晏晝 Lunch Time ，唔開胃，唔想食飯，於是諗住去百佳買蛋糕或者餅乾食．但係行到去凍櫃見到 Danone 乳酪個樣幾靚，又好似好有益咁，就買左杯返去食．不過買完之後就記起好似細個個時岩岩有 "乳酪" 出既時候食過一次，好似幾難食．

　　一打開蓋，食左一啖亦都證明我既記憶係無錯，而且 D 味好似某 D 生果既味道，於是腦海中突然浮起我俾阿媽形容為 " 食毒藥都無咁辛苦 " 既樣．但係，我一定要食落去，於是諗起 D OL 不停諗住 " 我要減肥！我要減肥！ " 既樣，就繼續食，食食下又幾好食喎！而且食完之後又唔咪好肚餓喎，唔知係咪因為食滯呢，等我下次再試一次先．如果係就好 Lu ，5 蚊一餐，又有益！

　　ps. 最新更新：上上星期 " 法律激流記 " 同埋新增 " 小圈子開年飯 " & " 寒風下 BBQ " 相片

>>February 27, 2006 at 12:38:54 PM GMT+8

2006 年 2 月 24 日 星期五 【微冷】

Title：Camel (又) 離別記

　　今晚同 Camel Farewell ，因為佢下星期就要返英國繼續讀埋佢個 Master Degree ．都係 King 犀利，約到成 16 , 17 個出黎，有 D 仲係中五畢業之後無見過既同學．最開心就係約到失蹤左兩三年既賢賢同瓊瓊出黎，粒聲唔出佢地已經係埋左一齊，仲要一個係中環，一個係灣仔返工，夾住我呢個金鐘學生...不過呢個都係唔關事既，夾硬拉 D 關係都有既 ?!

　　講番餐飯先，我地去左創興某間酒樓打邊爐，雖然 King 一早 Book 左，但係都要我地成班去到先留檯，結果等左成大半個鐘先有檯．我地人多勢眾，坐左成兩檯．跟住一路食呀食呀，食到成 11 點幾先走．臨走前都記得影張大合照．

　　之後發覺，個幾個中五之後都無見過既同學，今次淨係見，都無講過野...

>>February 27, 2006 at 1:18:05 PM GMT+8

2006 年 2 月 23 日 星期四 【晴】

Title：渴望無限 Ask For More

　　今日上 Dr Li 既堂，上左都唔夠一個鐘就教晒書，跟住就要 Group Discussion ，勁唔想．因為都未溫書，邊有料答佢 D 問題呢? 於是，趁阿 Sir 11 點放 Break 就溜走左去食飯．唔知點解上親 HR 都覺得變左 outsider ，同阿陳，力力個 D 同一個 Level ．

　　食完飯臨走既時候，成記 D 同事就打黎搵我聽日食飯，因為阿珊 3 月頭就走，睇黎佢走之前我都唔會編到返工見佢 "最後一面" ，但係因為約左 D Friends 都係 Farewell ，所以去唔到 ><

　　唔知點解好想快 D 到六月，好想快 D 上完堂，好想快 D 唔返 SPACE ，好想快 D 考完試，好想快 D 搵到工，好想快 D 儲錢買車，因為勁想楂車，好似讀完書等於一切都重新開始...

>>February 24, 2006 at 3:59:05 PM GMT+8

2006 年 2 月 23 日 星期四 【微冷】

Title：英語水平測試

你的測試報告
你的程度: 高-中(46的 60)
你能處理有條件性地處理很多的資料, 你能使用適當的詞彙和與其它人溝通。

文法 75%
你得到 30/40 個正確答案， 成績是平均之上。

聆聽 70%
你得到 7/10 個正確答案， 成績是平均的。

閱讀 90%
你得到 9/10 個正確答案， 成績是平均之上。

你怎樣處理國際英語測驗

你的英語測驗結果如下。
TOEIC 501 - 700
TOEFL 527 - 602
IELTS 較好程度
ALTE 足夠的使用者
BEC 3
UCLES FCE - First Certificate in English
EF測試86% - 90%

http://englishtown.msn.com.hk/home/test/skilltest.asp?Otag=O00385

>>February 24, 2006 at 3:16:52 PM GMT+8

2006 年 2 月 23 日 星期四 【微冷】

Title：從一而終

　　琴日朝一早開電視，聽到新聞報導董驃先生於昨晚去世，跟住我媽咪好驚奇咁話："哦！！董驃死左喎！" 我都聽到，不過無出聲，心情有 D 複雜，亦到有 D 驚奇，因為好耐無聽過董驃先生既消息，一聽就係佢走左．不過，心裡面諗起琴日跑馬，唔知會唔會係尾場開跑先走，令到佢既人生更加傳奇．

　　之後睇番 D 報導知道佢真係尾場跑完，大約十一點離開，唔知點解心情有 D Depress ．對佢印象唔咪好深，記得都只係 "富貴黃金屋"，同埋細細個聽住老豆睇賽馬時有個阿叔講得七情上面，有時仲好激氣添．或者就係咁，感情不知不覺咁建立左，當再開電視時，雖然都仲係：" 呀...一開閘... " 但係始終都係聽唔慣，不過董驃先生既模樣仍然不時會係我眼前浮現．

　　永遠懷念您，也感激得知您與馬兒不可分割的一生，驃叔！

>>February 24, 2006 at 10:42:02 AM GMT+8