2006 年 10 月 3 日 星期二 【晴】

Title：Secondary Interview ??

　　今晚跑夜馬，返到屋企都已經十二點幾近一點，開電腦 Check Email ，竟然收到琴日 Interview 既公司 Email ，叫我預備定星期五去 Secondary Interview ．今次既內容係預備一個 Presentation 去介紹自己，同埋講下自己未來既期望和抱負．

　　其實要預備內容同埋 PowerPoint Slides 都無咩問題，但係雖然話就話大學畢業，係課堂 Present 既機會就真係一隻手都數得晒，甚至無手都數得晒！所以 Presentation Skill 就真係欠奉，唯有到時鎮定 D ，見步行步啦！

>>October 9, 2006 at 6:16:27 PM GMT+8

2006 年 10 月 2 日 星期一 【晴】

Title：有得 IN 喇

　　等左咁耐，今日終於有得 interview ，本來話係 Group Interview ，點知唔咪我地幾個 Discussion ，而係一個 Interviewer 見我地幾個．Interviewer 話公司都幾等人用，如果岩既話就會請，所以我地幾個 Interviewees 既關係唔咪 Competitors ，希望有機會啦！

>>October 9, 2006 at 6:08:25 PM GMT+8

2006 年 9 月 30 日 星期六 【陰】

Title：我愛詹詹

　　今日係國慶日，好耐之前買左詹瑞文既 "男人之虎" 舞台劇既飛，終於有得睇！我同心心仔兩點十五分就去到演藝學院既大堂，D 人已經入緊去．由於買左最貴既 350 門票，所以都坐得幾前，清楚見到詹瑞文既樣子，睇睇下收到電話，叫我遲兩日去見工（終於有得 Interview ><）．

　　跟住返番去睇，都好搞笑，佢又扮石修，章小慧，長毛，甚至連百佳既黃老太都有，超搞笑．而最好笑就係佢做返王家衛導演既阿飛正傳，係餐廳裡面個一幕，詹瑞文既演技同燈光效果都配合得好好，勁好睇！！

　　最後，詹瑞文高歌一曲男人之虎既主題曲，原來佢唱歌係好好聽，比起好多歌星都好聽．跟住有佢講左 15 分鐘野既謝幕， 5 點半就完場 Lu ！

　　晚上，細佬既公司開放俾職員家屬去 Office 睇煙花，於是我地就係中環某大廈內睇國慶煙花喇！

>>October 9, 2006 at 6:03:55 PM GMT+8

2006 年 9 月 29 日 星期五 【晴】

Title：首度合作

　　今日無啦啦興起，同心心仔，細佬 + "弟婦" Amy and 媽咪，一齊去沙田 Green Box 唱 K ．呢次既組合，可以話係破天荒，因為平時未聽過細佬 and "弟婦" 唱歌，更加未聽過媽咪唱 K ，結果大家都係唱得之人，"王傑" (我) 同 "王豐" （黃蜂?!）更合唱首本名曲 -- 幾分傷心幾分痴，成為今午高潮所在！玩得好開心！

　　跟住又要返投注站，今次好 D ，返大圍個間．雖然話係好近，但係就勁細間， D 人係身邊行來行去．不過，D 人就得意 D ，大家都識得，好市井，好似黎投注站聯誼咁．

>>October 9, 2006 at 5:41:44 PM GMT+8

2006 年 9 月 27 日 星期三 【晴】

Title：無處容身

　　今日俾人編左去灣仔投注站，真係未做先打三十大板，車錢都蝕埋，好彩張八達通仲係收緊 "學生" 價，都無咁傷．

　　咁岩今日係六千萬金多寶攪珠既大日子，去到門口已經堆滿晒人，好辛苦花左成 3-4 分鐘先入到去．報完到出番黎，得自己一個做 Promote ，又無咩地方落到腳，就周圍搵個角落企下．跟住我既工作變左係 Pen Provider ，好多人問我借筆劃飛．之後鬼咁多人，又見無咩人理我，所以就行左出去，兜個圈行下，去左附近既市政大樓去 Toilet ，返番黎都無人知．

　　九點幾鐘開始攪珠，個投注站就無咩人，咁我就去放 Break 食飯．放完返黎企多陣就搭車返屋企 Lu ．

>>October 9, 2006 at 5:28:44 PM GMT+8

2006 年 9 月 26 日 星期二 【晴】

Title：扑田鼠日 Bok Field Mouse Day

　　今日係跑夜馬既日子，由於小弟返 4 點，無咩同事返工，所以平時應該由兩三個人負責既 Check 機任務，交由小弟一力承擔 !! ＞＜ 結果一 Check 就 Check 左個幾鐘，Check 到腰骨都同埋．好彩 Willy 叔叔都算識做，俾多 7 分鐘 Break ，話俾我去洗手食飯喎，如果唔咪我就黑面架喇...

　　跟住 Break 完返黎就幫同事簽到，簽簽下逐漸有 D 新同事返黎，佢地新既程度係連返黎去邊度簽到又唔知，放 Break 有幾耐又唔知，去邊度有飯食都唔知，可以講話係 "極新" ！！我同另一位同事 -- 樂哥，一路簽就一路奇怪，平時呢 D 新同事應該返 4 點，等佢地有多 D 時間去聽下 D 舊同事點做野，但係佢地今日返 6 點，即係佢地 6 點半先 Break 完埋位，而第一場馬開 7 點 15 分，即係佢地要係 9 個字之內，要做晒聽舊同事賣飛，俾舊同事 Mon 住佢地賣飛，同埋自己獨自賣飛．有 D 新同事仲慘，成 6 點半先返到黎，Break 完都 7 點鐘，到時真係 "自生自滅" ，因為無同事得閒理佢．諗到呢到我地都蹬佢地慘．

　　順帶一提，身旁既樂哥，雖然睇落同我差唔多年紀，但係佢原來已經做左 7 年（我就做左 4 年），佢仲話係睇住我入黎，睇住我升職...點解認得我?? 因為我地都係做 En 既台柱！！

　　返番正題先，呢班 "極新" 既新同事，竟然有 10 位黎左我負責既 Batch ，即係交俾我睇住，令我平時已經好手忙腳亂既工作，可以講話係 "百上加百"！ （點解唔用百上加斤?? 因為工作量好似 Double 左，所以一定要用 "百上加百" 先能夠代表到！！）當我抄緊其他同事既 Batch Number ，突然有同事舉手，跟住跑埋去，原來係問 "單T" 點入．當我解決緊其他同事既問題，突然又有同事舉手，跟住又跑埋去，原來問點解入唔到 "孖 T " ，梗係啦，因為佢入錯左 "孖寶" ．而當我處理緊呢一位同事既問題，身旁既ｏ個位同事，同埋遠少少既ｏ個一位同事又舉手，搞到我好似入左拍武俠片既樹林入面咁，又好似去冒險樂園玩 "扑田鼠" 機．因此如果你當時見到我，亦都好難想像到點解我會係有冷氣既地方會流汗．

　　結果呢個運動持續左 5/6 場，終於停止對佢地既考驗（亦都停止對我既考驗），因為佢地要俾個位俾其他同事，佢地要遷徙去其他地方．正如我開頭所講，佢地連去邊食飯都未知，所以好難遙控佢地 "千里長征" ，去佢地要去既地方．因此我都自動請纓，做領隊帶佢地上去，避免佢地會迷路．跟住落返去我自己既 Batch ，做番個得閒既組長，有驚無險咁等完場！

>>September 28, 2006 at 6:18:05 AM GMT+8

2006 年 9 月 25 日 星期一 【晴】

Title：漫長的四個鐘

　　今日係第一日幫電話投注落去投注站 Promote 既日子．未去之前，一路諗住同 D 阿叔阿嬸做問卷，實無人睬都得．戰戰兢兢經過經理的審查，經過銀行式的保安門後，就入左去擺低 D 隨身物件...

　　跟住同個同事出左去出面企，未夠一個鐘就已經後悔，因為企係度無野做，三十分鐘已經好難過，仲要企足四個鐘．點解會無野做 ? 因為呢個 Post 其實話就話係問卷調查，但係其實無人會理我地做咩，所以個個都抱住 Hea 既態度，求其作 D Data 就算．

　　咁借 D 意去下 Toilet ，飲下水又得唔得呢 ? 正如之前所講，入去入面要經過銀行式既保險門，仲要阿 head 係入面禁制先入得出得，所以為免麻煩我地都唔會又出又入．

　　如是者乾蒸左咁耐，好唔容易先企完呢四個鐘，仲有六日，點算 ?

>>October 6, 2006 at 3:47:53 PM GMT+8

2006 年 9 月 25 日 星期一 【晴】

Title：恭喜晒

　　得知陳主任找到新的工作，在此恭祝您前程錦繡 ~~

>>September 28, 2006 at 5:19:36 AM GMT+8

2006 年 9 月 20 日 星期三 【晴】

Title：精選遊覽團

　　今日睇番 D 舊相，搵到兩幅相：

有無 D 似青春劇既畫面呢 ??



似唔似個兩個Mind嘴扮鬼臉唱歌擺上網既男仔呢 ? ~



>>September 21, 2006 at 3:50:00 PM GMT+8

2006 年 9 月 18 日 星期一 【晴】

Title：特別通告

　　好野，又有得上網囉，原來有得上番網都可以咁感動！

>>September 19, 2006 at 1:37:58 PM GMT+8