2003 年 9 月 26 日 星期五 【晴】

星期六，晴。

終於又過左一個星期，今日唔駛番學真係可喜可賀！
朝早八點就起左身，好自然咁開左電腦同ps2。一開個icq，又見到0個幾條慣常away訓覺的人…
見無聊就走鬼左去打CL，打極都係咁上下，d怪都差唔多升爆晒，但仍未搵到0個九粒野…

一打就打到十一點幾，之後重返電腦世界。開始我另一個生活方式。
12點左右，見到佢online，但由於冇咩想講，無lala講d無聊野又覺得無謂…
一路等(唔知0係度等乜)，一路聽歌。在無聊到極點下終於add左佢，吹左陣。

吹吹下見無聊就無聊咁叫下佢出街，點知佢真係肯出，點時我滿心歡喜，
諗住唔駛又一丁友去行街。過左陣，我換好晒衫褲，佢突然的add我，
話因為冇人去而唔去…

真係遺憾，可能係上兩次去街時，大家都唔出聲所以嚇親佢…算啦……衫都換晒，
唯一丁友出街：孤單的旅程又要開始了。

之後去左新港城，去左哈迪斯食野，食完就用緩慢的步伐行商場。行左一個圈，
發現冇咩好行，就一丁友出左新城市。出到去行下老翻店，買左隻drag-on-dragoon。
之後落左機舖，唔知做乜…行到冇野好行要行機舖…可悲。

行到咁上下，一個人可以去的地方都行完，唯有走人啦…

好開心，隻drag on dragon終於玩到，但玩落又唔係咁好玩…灰灰地，今日成日都灰灰地，

！！大獲！！唔通我真係…嘿嘿！！　　控制、掩飾、隱藏 情緒…唔俾你知我想點A_A

>>September 28, 2003 at 10:31:05 PM GMT+8

2003 年 9 月 25 日 星期四 【晴】

星期五，晴。

今日的堂幾好，沒有特別[悶的三堂連堂。

眼訓…唔掂，聽朝再打(日記唔係打機)。

掛住佢…但…佢對我是怎樣呢？
搵日真係要問下佢！

>>September 28, 2003 at 10:31:18 PM GMT+8

2003 年 9 月 24 日 星期三 【晴】

星期四，晴。

今日冇乜特別的事情發生。
平平穩穩地渡過，唯一不同的就是放學後要補課。

近日發現了一件事，發現了某人的行為開始令人髮指…
成日唔出聲，叫又冇乜反應，人地講野自己就彈埋一二面，唔知佢自己知唔知，
其實佢咁做只會令人發覺佢好撚黑人憎…
從個人角度出發，我認為自己有幾冇mood都唔應該咁樣，一係就唔好跟埋0黎，
跟埋0黎就唔該出下聲，這是基本的尊重。
人地問你你又唔講，講又講埋晒d無聊、無謂、無撚謂既仆街答案，
之後又0係度唔出聲、唔應、唔理…唔知你做乜撚野…
此等無聊舉動實在令我不安…
有咩就唔該你up出0黎聽下，唔講就唔好0係我面前唔開心、唔出聲…

我唔係想改變什麼，我只係說出自己的感受，同時希望你有所改變。
也許正如小劉所說「性格是天生的」，但…真不希望你維持呢d不良性格繼續做人，
這不是一件好事！

『 有話就直說，我的日記就是這樣。 』

>>September 25, 2003 at 2:44:46 PM GMT+8

2003 年 9 月 23 日 星期二 【晴】

星期三，晴

今日，如常的上課，
頭兩堂是化學。吳老師的言行舉止令人覺得十分有趣，不知從何時開始，
覺得他講書比以前用心，但我的化學成績依舊沒有改進…大慨是個人的問題。
小息後便是兩堂數學課，彭老師依舊用說話來引我們發笑，但他總是把快樂建築在寸人之上，
這行為不值得鼓勵，上他的課是最多笑聲的，真是有趣。
接下來便是英文的單課。這課裏，老師教了我們一些改錯的技巧，
但我總覺得這不是三言兩語便能教得懂的、更不是只靠做得多就會做得好的。
這是關乎到我們的英語水平，這不是能在一朝一夕能改善的…

接下來的便是午飯時間。

今天又到了7-11食飯…好遺憾，見唔到想見的熟人，但…依舊的見到一些不想見的人。

接下來的便是中文課。今天陳老師教『我和我的唐山』，
得知錢綱先生的背景和作此文章的原因。在陳老師的敘述下，這真是一個感人的故事。
之後便是兩堂的生物課，今課教的是有關排泄system的東西，有點難度…

就這樣，今天的課便上完了，放學後還有化學測試，今次真係一點兒也不懂…遺憾！
測試過後，家傑上了我家打機，到六時左右，他便走了…帶走了我的winning 7…
照常規，我開了電腦，看到了她online，吹水~~

而家九點半，有點眼訓，功課、課本都拋於腦後…想訓

>>September 24, 2003 at 1:33:37 PM GMT+8

2003 年 9 月 22 日 星期一 【晴】

星期二。晴。

昨天放學後與狄到新城市買東西。首先，她到了寵物店買倉鼠用的沖涼炒，
之後便去了無印良品，過了幾分鐘，待她買完筆後，就出發去選購生日禮物，
但在幾番相問之下仍未知誰人生日…

睇左陣，又入左玩具反斗城，她說「rr9vd1rm 6ho1qy3rt1zb1hi7rr9oa8yr 6oj5of2sp 3au3」=.=v，
令我對她有了另一個看法，呵呵。

基本上，整購物過程都是非常平靜的(大家都靜默不語…)，大約五時左右，便出發前往巴士站，
可怕的事情就發生了！行程途中見到了jimmy！我與他四目交投，看得出他眼中帶有驚訝，
我心想：幸好碰到的是Jimmy，問題應該不大。

到了今天，當我回到學校時，jimmy突然轉身，用審判的眼神，加上有陰謀似的微笑來問我：
「昨天的女孩是誰！？」我心想：出事了… 之後我便用雙子座的獨有技巧拉開了話題，
免得他繼續追問，要是他仍窮追不捨地問我，我也不知如何應付才好…
『她…究竟是我的誰呢…』

小息時，得知偉達也知道此事，消息傳播得多麼的強，好比和記10mb寬頻…
lunch time後，最不想發生的事發生了…連我前面的男人都知道此事…好嚴重…

我唔想作出什麼澄清，因為我都唔多清楚，順其自然吧。

>>September 23, 2003 at 11:01:56 AM GMT+8

2003 年 9 月 20 日 星期六 【晴】

星期日

而家九點，心情不佳、心亂如麻。唔知做乜！
好耐未試過咁…身邊的人士全部都有自己的事要做，而我就無無聊聊咁0係電腦前面唔知做乜。
我唔知自己想點，唔知佢想點，唔知你想點…
在一切都不明朗的環境下，心情不佳，心理有問題…
看來雙仔座的三分鐘熱度性格又再出現…又係時間冷靜咁諗下未來要做乜…

唔掂…乜都諗唔到。唔知發生緊咩事、唔知電視做緊乜、唔知自己做緊乜。
光猛的燈光在我頭上直照，照著一個坐在電腦前面，雙手按在鍵盤的的男子，
一個發呆的面孔出現了。男子一腦空白，但其雙手卻好跳舞般地按著灰色的鍵盤，
螢光幕上的字正在不斷增加，多了一些沒有意思的電腦文字，沒有人知我正在做什麼，
我也不知道別人在做什麼。

『………』不詳、、 m﹀︹﹀m

>>September 21, 2003 at 1:11:28 PM GMT+8

2003 年 9 月 20 日 星期六 【晴】

星期日，晴…雨…

今日，平靜地過左，見d頭髮長長地…
所以就去剷左野，一剷又駛左幾廿蚊…好彩唔係我出。

剷一剷，d頭髮又短左，唔知點解…個頭好似剷極都係咁上下，唔多型，又唔多靚…
出幾多錢都係咁上下，灰灰地…好慘…

今日下載了Dido的新碟，但一問之下，原來身邊的人都唔係好知Dido係邊個，
得小虎知，原來小虎鍾意Dido ga！

之後出左新港城，食野、剷頭、行…走人。一日就係咁過去了…而家七點幾。

>>September 21, 2003 at 11:48:21 AM GMT+8

2003 年 9 月 19 日 星期五 【晴】

星期六，晴。

早上九點，俾電話與人整醒左。人都醒左，冇理由唔打機，一開、就開左隻Gundam 0黎玩。
玩左陣就打爆左Story Mode，阿寶最後0個關有過癮野出，就係要用佢本人與馬沙比劍，
幾有趣！就係咁，就爆左機…又要睇字幕，之後0係AEC PILOT度出現左個馬沙，
我再打！一打又爆左，佢再出黑色三連星，我再打！一打！又爆左，之後又出左條友，
唔知叫咩名，睇0黎離完全爆機之期不遠矣！

打到悶，就開部腦攪下…無聊之下，決心換晒容祖兒D歌，要將0係WINMX 下載的，
轉為0係大陸網下載的，好處是大陸網那些是256K的，音質比較好(可能係心理作用)…
攪下又一個鐘攪下又一個鐘…突然！老母叫我拎野出沙田，把我全部計劃弄壞！
出到沙田，攪好晒要攪的事時，已經十二點，唔知點算，又未夠一點…
在無奈的形勢下，我決定搭車出沙田，去到時，十二點十五分…
無聊之下去左機舖…睇人打爆左snk vs campon…用埋晒d低莊招…唔掂…
自己玩左十蚊…打左場gundam dx同灣岸…勁快game over…哈哈=.=

睇到四十五分左右就去優之良品，與女生約會(好似講得嚴重左d…)，只是食lunch而且。
同佢行左陣好運，之後去左玩具反斗城，之後…唔知0係度做乜咁周圍行，去下書店，
去下呢度，去下0個度，行行下就行左去食野。食呀食，好快就食完，但佢一d野都冇食，
叫極佢都唔肯食(減月巴？！)…之後就行，行呀行，不停的行，唔知行左去邊，
唔知想行邊，行左勁耐，成個新城市行晒咁滯，行多過講野，兩條友粒聲唔出咁行…
唔知點解睇佢個樣好似冇乜表情咁，攪到我都冇乜表情，兩條冇乜表情的友仔行新城市…
行到咁上下，冇地方好行…唯有提出「走人」，佢又話「是但」(呢句野今日聽左n次)，
是但就是但啦…就係咁，就搭車走人。

上左架空調85k。在車上，睇佢個樣又係冇乜表情咁，好似好悲衷咁(處女座的特徵？！)
行行下，佢到站，落車…走左(走0個時都冇乜表情=.=)…佢走左之後，我企0係度…
企到眼訓…第一次企0係度都訓得著…之後番屋企，打左陣Gundam，開腦。
見到佢online，冇乜同佢傾計…對左成個下午，仲有乜好講。

一個星期六就係咁過去，好耐未試過寫咁長的日記了，
看來我開始受影響…要什麼做呢…好像有點兒…不詳！

>>September 20, 2003 at 3:12:53 PM GMT+8

2003 年 9 月 18 日 星期四 【清涼】

星期五~晴！

勁熱，中秋都過左啦，做乜仲係咁熱，靜止的空氣給陽光不斷照著，溫度不斷上升，
出汗，令人討厭的生理反應，不斷地出現。有點像在炎熱的暑假之中，令人沒有幹勁，
早會時，太陽像要把我蒸發掉，全身像要溶掉似的，沒有多餘的力氣支持身體(用左好多形容詞)

回正題，頭兩堂math。d人無lala關左兩部冷氣，攪到個課室勁焗，在這個惡劣的環境，
阿sir都好似有點唔妥，0係度係咁鬧人…(我覺得全因為冷氣的問題…)

之後三堂英文堂，0係度講paper 1，有點無聊，但因為訓多左的關係，點都訓唔著，
SYS今堂係咁教我地作complian latter，乜會考會出d咁既野ga咩…r頭，不過佢教得都應該有用。
lunch後便有一堂中文，無無聊聊的就過左。
之後就係一年一度的四社會員大會，又0係度up野，up完野就玩遊戲，年年如是…

放學…

叫左月巴去我家打Gundam。兩人合力打爆左side story、aec ploit中的賈圖同另外兩條友、
成績唔錯，兩個人的力量真係比較勁！第日有咩難game都係叫多d人一齊玩比較好。
六點左右佢就走左，之後玩icq，不停吹水，吹吹下就約左聽日1點出沙田食lunch~

而家就快11點，係時間訓…搵唔到唔訓的由理…
又冇電視打機(有人睇緊)、電腦又冇新歌(冇人出碟)、又冇玩online game、cs又玩到悶…
icq 識講野的人又唔多，有d淨係識online(唔識應人)，0係呢個fucking 處境下，
訓覺係唯一有義意、有益、冇害、有趣、有用的解悶方法…
我個人認為訓覺是晒時間的，但而家又要訓…有d自相矛盾。

我的生活近日開始有新的沖擊，這對我這個典型雙子座人士是一件好事，
不安於現狀，是我的最大特徵A_A

>>September 20, 2003 at 2:38:16 PM GMT+8

2003 年 9 月 17 日 星期三 【晴】

星期四，晴！

今日又係一個學年一度既九分鐘跑日子，冇人想跑咁滯…只有一些勁人想show off自己…
唔值得鼓勵…跑呀跑、努力咁跑、用力咁跑、出力咁跑、盡力咁跑、跑呀跑…
跑左二十個圈，就死、想死、未死、死得、死……在烈日下，汗如堤缺壩，
勁出、狂出、不停出…就死、想死、未死、死得、死……

就係咁，中五第一堂PE就係咁過左。放學後，見到有波，無聊打下，越打越起勁，
第一場羸左之後，全身乏力，唔掂…就死、想死、未死、死得、死……
之後再打多場，冇晒力，輸是正常的事。

番屋企沖涼，打機，打爆左GUNDAM個ACE架駛員mode中的胡力奇，之後出左個賈圖篇，
未得閒打，食飯，攪腦…就死、想死、未死、死得、死……
唔掂…要訓…冇力，唔寫…

>>September 18, 2003 at 1:55:42 PM GMT+8