2006 年 4 月 9 日 星期日 【晴】

嘩.. 我都幾乎俾人刪日記..
其實我好多野想講.... 只不過呢一刻我又要返學....

>>April 10, 2006 at 3:50:56 AM GMT+8

2006 年 3 月 25 日 星期六 【晴】

我都知我衰架啦... 咁耐先update 一次...
淫友.. 你都好似同我d update 周期差唔多 - 因為大家都係咁忙..
你忙intern, 我忙讀書同外快..
不過我都知你有咩野事發生緊o既~ 雖然而家真係久唔久先睇下大家d 日記..

至於青蘋果呢.. 我都算係久唔久睇一次...

其實搞掂完個intern 問題, 之後趕兩份功課: 1. PHP; 2. C
其實你聽落會覺得奇怪 - 大學會教PHP? 唔係.. 只係果份project 係模擬軟件開發個實際情況, 包括analysis, design, review etc... 老實講, 幾多人真係跟呢d 程序? 起碼我地group 就係唔到死個一刻都唔使野... ^_^ 鬼叫有我呢種人...
最後都死掂左..

之後就係死人C.... why? 當你寫C果陣你就會覺得C++ 的object-oriented 好好用... 因為C 真係.. 乜都無.. 連pass by reference 都無, 只可以pass 個variable o既address(pointer).. 啞晒..

結果就係為左兩份功課.. 今個月的收入真係.... 唉... 唔怕.. 要來的(錢)總會來的...
原本諗住同老婆大人去台灣玩兩三日, 不過復活節d 機票真係貴到嚇人... 淡季1700一個人就可以包埋酒店(四日三夜), 復活節呢, 淨係機票都1700...
結果決定左我生日果排去澳門... 都好.. 起碼有好野食... =) 你咪睇我咁瘦唔係食好多, 我都可以好大食... 特別咁多好野食.. 仲食得多...
不過我發現我有肚腩... 噢!!! 可能同呢排成日去樹記食飯, 每次都飲可樂有關.. 但係我真係太鍾意飲可樂.. 雖然唔係成日飲, 但係每次俾我揀飲咩我都係揀可樂.. >.<" 特別係樹記果d 玻璃樽裝可樂.. 特別夠氣.. 嗚嗚嗚...

>>March 26, 2006 at 5:54:49 AM GMT+8

2006 年 3 月 9 日 星期四 【晴】

我無唔記得呢個日記o既~
只不過, 其實有幾多人睇緊? 我都唔知... 至少我老婆大人仲會久唔久睇一次~

恆商Interview.. 食左蕉...
我認得濟, 但係當你放係果個時候你都好想串佢..
我一去到in, 個security 問我:"你去邊間房呀?"
"我去408"
"哦.. 你搵王經理...."
"王經理? 唔係wong sir 咩?"
"唔係.. 係王經理.."
心諗, 咁似逃學威龍d 情節o既... 唔係呀嘛...
果個王經理.. 出左條case study.. 我講我o既想法, 佢又話我諗漏野 - 佢講佢諗到o既野, 點知又係全部唔work.. 咁, 我諗漏d 咩呀?
算..

反而醫管我in 得好開心, 三個男人吹晒水; 今日in, 聽日就話請我.....
我話遠得濟, 就assign 我返旺角.... 但係可惜我都無做... 最後我做左lecturer provide 果份"Research Staff"..(吹就係咁大....), 但係人工就少好多, 但係多左好多freedom... 唔係咁密的曠工佢就話無所謂... 唔錯!
似乎個lecturer 對我好有興趣.. 好啦.. 反正係出面打滾左咁多年.. 試下係學校呢d 咁o既 唔commerical環境下做下野... 睇下有咩感覺....
加上我老婆下年會係Year 3. 起碼都可以同佢一齊返屋企...

=================================
呢排居然又鍾意左睇電視, 仲要係無記 - 天幕下的戀人
本來我對無記d 年輕愛情劇真係全無興趣.. 但係呢個反而ok..
描寫阿詩同沈朗果個開始同茅盾都細膩.. 雖然係太過著重男方的想法, 但係都無完全無理到女方同一時間的諗法..
其實我睇呢個劇, 我諗起一年前我同我老婆點樣開始... 都係曖昧之後慢慢就自然一齊....
當然, 我唔會好似沈朗咁為左上位就做咁多令對方唔開心o既野 - 因為佢太過理智, 而我唔係...
反而我會好安樂做一個小人物, 安份守己..
諗返起果日in 恆商果個黃經理講左句:"你o既technical 好夠, 但係你無大公司做野的思維, 如果你有, 你的成就會高好多.. 起碼你會賺到銀行, insurance 公司的錢.."
其實又係唔係咁緊要要賺一生都使唔晒咁多錢呢? 我又覺得未必.. 反而我覺得最幸福係有一個小康之家.. 我諗當一個人好有錢好成功, 到佢有一日得到佢想要的東西, 望返轉頭, 佢可能會覺得一無所有 - 為左金錢地位, 放棄左自己最心愛o既人, 去到最後俾你有一億, 咁又如何呢? 開心咩?
所以我又睇沈朗唔過眼.. 朗豪坊唔得咪去奧海城囉... 一個人有料, 我又唔信得一個地方會容納到你.. 係都要同個太子女一齊, 搞到自己令一半咁樣... 唔值得... (雖然阿詩都要有少少責任, 又真係任性左d...)
雖然, 你可以話飛左阿詩同個葉小姐一齊咪搞掂囉.. 但係, 都係果句, 當你望返轉頭.. 又如何呢?

有d 人會話女人會係男人發展的絆腳石.. 因為有女人係身, 如果想上位, 又要顧多樣野...例如有個女上司賞識你, 又上唔到位.. 我會問, 你做人的最終目標想點先? 你想有好多好多錢, 定係想你愛o既人同你係埋一齊先... 咁你自己揀囉.. 又無話一定o岩一定錯o既.. 係咪先..

如果你問我, 我一定會答你:我還是安安樂樂珍惜我有的一切, 做返一個普通人, 好兒子同埋好老公..

>>March 10, 2006 at 5:34:11 PM GMT+8

2006 年 2 月 25 日 星期六 【晴】

回 淫友
佢中文名好似係梁靖琪.. 我諗google 唔難搵到佢個相..

================================
今年有咩搞作呢...
其實06年真係自閉左少少...
好少上高登(無論係吹水果個forum.hkgolden.com定係真係去高登睇電腦, 都係少左)
唔似得以前一個星期幾次...(有點誇張.. 但我以前F.7 果陣真係一放學見無野做就搭車去行街...)
特別去到而家Yr.2 Sem B.. 時間難免緊張左少少..
加上多左客.. (但係做野o既時間少左喎.. 梗係.. 通常而家會安排一日行晒港九新界做野, 其餘時間梗係陪老婆緊要啦...)

同埋呢.. 呢期 d 同學仔走堂走到離晒罩.. steve.. 我真係久唔久先見到佢一次...(...) raymond 仲誇張.. 成個星期.. 我.. 一d d 堂啦.. 有d 走得都係幾離譜...
講起學校, 我居然有機會教lecture.. 哈哈.. 係咪好搞笑呢..
其實係因為其中一科要做group project, 個project 可以用PHP或ASP.NET 做..
咁我地擇左PHP.. 當時個lecturer 其實淨係識PHP.. 咁佢一起好個project 用server, 根據我多年俾人入侵的經驗, 一睇就發覺有問題.. 咁個lecturer 咁就順理成章咁叫我同d 同學仔講下點用PHP.. 結果俾左四個字lecture time 我講野... 好有滿足感...

其實呢個lecturer 有叫我入佢地個team development 野.. 但係.. 我真係無時間... 或者placement 果年真係可以考慮下..
話時話, placement 已經叫我去見工, 分別係恆商同埋醫管.. 希望順順利利入到恆商啦!
我揀佢只係因為學校網路一向搞慣.. 同埋我諗假期會多過醫管...

======================
講返d 緊要野 - 第一次過唔係單身的情人節.. ^_^
雖然果日要返學, 但都可以浪漫... 佢又要溫書, 所以一切都從簡..
我早在前一個星期六已經買定飛睇戲 - 驚要排隊..
我地睇春田花花同學會.. 其實都幾得意, 好多明星都有幫手, 只係太亂lu 個時間線..
之後我地行左一陣沙田.. 其實睇戲之前我老婆買左份禮物俾我... 就係一條電話繩.. 佢知我鍾意Volvo Super Olympian w/Wright Eillpse Gemini o既cute 版果隻(九巴有得賣架!), 所以就送俾我啦.. 多謝老婆~*
之後行完我地就去大埔萬里食飯.. 幾好食! 只係無飯落肚總係差少少, 雖然都真係飽...

係喎.. 各位有無覺得我有d .. 第一年情人節都唔買花俾老婆.. 好簡單o者.. 佢唔鍾意真花.. 佢鍾意用紙接果d.. 我真係無咁多時間同天份去接呀老婆... 對唔住呀...

之後過多幾日就係我地一周年.. 哈~
正日(2月23)要返學, 所以改為2月24慶祝..
我地去左唱k.. 我都係第一次聽佢唱歌.....
好開心呀~ 之後我地行左一陣朗豪坊.. (其實係因為天幕下的戀人.. 佢先會知道朗豪坊係咩樣)
我就搭地鐵返去上SQL..
返tutorial.. 幾條question 都係我答.. 唉.. 其實係難.. 只不過個tutor有俾tips.. 所以先答到..
同學中有人見左HA.. 佢話都係問差唔多果d 問題.. 反而d 人話飛機工程間野勁變態.. 係咁插d 同學又話呢樣唔得果樣唔得.. 屌.. 你出得6000叫人山長水遠咁入黎, 車費都唔見左一大筆, 喂.. 我地十個有九個都係第一次出黎interview.. 你係咁插人你咩意思先.. 我真係想會下佢.. 等我送個小丑俾佢...

>>February 26, 2006 at 12:25:08 PM GMT+8

2005 年 12 月 30 日 星期五 【晴】

唉.. 超懶呀.. 真係..
寫返上年的日記, 由天冷等到天熱先寫返.. 真係無奈..
06年的事一陣先講啦.. 搞掂左05年先... (真係滴晒汗!!!)
==========================
12月24日
我同老婆先去新蒲崗同佢嫲嫲同佢姑姐飲茶.. why? 詳細情況我都唔係好記得, 但係好似同佢表妹有關.. 事關佢表妹係將軍澳新都城廣場表演, 類似Christmas Carol 之類啦...
所以之後我地都搭車入去將軍澳(93k), 行左一陣, 想話搵下有咩衫.. 但係都無咩...
(p.s. 點解我記得係將軍澳!? 睇返d 相咪知囉!)
我仲記得(其實都係睇返d 相)有個好高, d 燈識閃下閃下o既聖誕樹tim ar..
仲有室內煙花(火)睇tim!!!
睇完佢表妹, 我地就搭返巴士, 入去大角咀, 因為我老豆有個朋友係美國返黎, 咁一大班世叔伯食一餐飯.. 咁我(一廂情願地)帶埋我老婆去.. 食就唔錯, 但係真係俾間酒樓熱死... 加上.. 悶死我老婆.. 搞到佢唔開心tim.. 點算呀?
好彩最後我地去得切倒數, 不過我咁大個仔都係第一次咁數法... 仲要超凍!!! 一條頸巾兩份用..
(哎呀! 差d 唔記得講, 佢送左條溫暖牌俾我~ 多謝老婆~)

12月25日
自從尋日失誤之後, 我都係諗過唔好帶老婆去咁悶o既地方到...
結果今日同佢去左黃金海岸(可惜係香港果個..)
其實講左好耐架啦.. 想倆口子走去海灘漫步.. 但係一直老婆都話好熱.. 所以要等到冬天(...)
事實又真係幾浪漫o既..
加上老婆話想見識下果個咩吹氣嘉年華.. 點知真係得個吉.. 反而出面果d 攤位都仲有少少睇頭..
只係我地都無睇o岩野想買...
之後就搭返車去尖東.. 因為我地尋晚黎唔切影燈飾..
燈就年年都差唔幾.. 只不過.. 重點係同邊個出黎睇架o者..

我地仲睇左果個幻彩唔知咩野耀香港tim.. 唔好睇o既!
跟住諗住入海港城.. 點知好似暴動咁多人.. 算.. 入碼頭..
係碼頭老婆見到有個好得意o既小皇冠有得賣.. 我唔post 相啦.. haha..
我地最後去到中環睇下果棵高到無人有的聖誕樹同都幾靚聖誕村..
我對呢個景點最滿意.. 最有氣氛...
最過癮就係睇人地果d 願望.. 有d 係追女唔成, 有d 係追仔唔成, 有d 真係想屋企人好.. 有d 就記念歌星明星...
最後搭左307返去..

12月26日
今日呢, 走左去奧海城..
奧海城有全港最高戶外聖誕樹.. 可惜我地無買到野, 唔可以搭果個垂直移動機(..)上去影一張..
(唔係.. 其實買左個即食薯蓉返去...)
其實奧海城商場入面都佈置得幾好.. 只係始終唔及新鴻基d 商場咁識佈置同埋搞function..

12月31日
老婆原本係返左大陸, 但係最後佢都趕得切陪我倒數.. 真係好~
多謝老婆~ >3<
雖然近近地大埔中心, 但係一樣咁好玩.. 有rain (不過唔係韓國果個, 只係香港果個李彩樺)...
仲有咩Toby? 我真係好頂唔順呢條友... 唱功真係好麻麻.. 雞仔聲到你唔信... 都唔知點解佢d friends 會咁癲.. 叫到鬼殺咁嘈, 又跟住一齊唱, 結果Toby 已經唱唔起把聲, 結果就.. 俾fans cover 左把聲.. 唉... 垃圾...

>>February 11, 2006 at 3:46:07 PM GMT+8

2005 年 12 月 21 日 星期三 【晴】

其實我22號呢日已經考完試, 只不過我無講o者..

2005年12月20日
其實20號老婆考完試已經同佢出去APM影聖誕燈飾...

APM 其實都幾多野睇, 起碼佢會有24號周杰倫倒數演唱會...

最記得未去到APM之前我地走左入去觀塘d 內街到食飯..
嘩.. 呢幾日我真係咳到死死下... 考試果陣真係由落筆到收筆都係咳同流鼻水...
唉... 同老婆走左去搵間有煲仔飯食的茶餐廳.. 你咪話都成30蚊.. 幾貴!
不過真係一路食一路咳.. 因為.. 食到最後搭枱黎左班睇個樣十成九九行古惑o既.. 係咁煲煙...

之後先走入APM行, 可惜行無一陣就要走, 因為佢要早d 返佢阿嫲嫲到..
我都要早d 返去訓, 預備21號溫書, 之後22號最後的戰役...

2005年12月21日
溫書..溫書..溫書..
好多公式.. 好多公式..

2005年12月22日
考完lu!
其實都唔係好識, 起碼第2條有一part 真係完全啞左, o晒咀..
不過唔緊要啦, 一切已經成為過去, 等著我的只有聖誕假期同恢復少部份工作...
老婆今日係taste 到等我放考試.. 哈..仲諗住佢會係有朱古力的地方等我, 點知佢已經係門口.. 我走返上去..
話就話要返大埔睇醫生, 結果都係落左黃金先.. 老婆之前話上試下"大家食"o既削搖麵同手搞麵, 咁就同佢去左深水埗到食.. 真係好味.. 其實之前我已經食過一次.. 比起其他麵的確係好有特式..
你咪睇呢間野咁大陸茶廳feel.. 人地有網頁架.. http://www.eattogether.com.hk
=.=' 個老闆個樣真係成個省港奇兵咁...

買埋隻VoIP Gateway (老闆已經買到由唔識變記得我名..)
之後返屋企.. 不過都仲係好病...

>>January 7, 2006 at 2:51:42 PM GMT+8

2005 年 12 月 21 日 星期三 【晴】

終於搞掂個Final Exam...
今年可以話係最勤力溫書o既一次大學考試.. 老實講我都唔知點解好有壓力..
不過都只係因為死人壞Mon.. 呢科真係.. 死得人多.... 無一個人話會超過五十分...
至於果班code 神, code 魔... 唔知道lu!

另一樣搞掂就係中港台三地IP電話連線... 總算告一段落..
前果排就係因為DTMF搞到我無得溫書...
DTMF = dual-tone multifrequency.. 即係音頻電話, 打電話果陣d 聲..
就係認呢d DTMF 都搞左我幾日... 總之就係VIP-450個DTMF Relay的錯...

總之就係搞掂晒啦...

===================================
突然間同老婆講起一句: "男人? 正等於邊隻貓唔食魚..."
之後老婆就覺得奇怪.. 似乎我係到自打咀巴.. 好好好...
而家假設有個魚缸, 有一群貓, 其實唔係隻隻貓都會係咁食魚o既...
魚有石斑也有泥鰍, 貓有波斯貓也有大花貓... 以下係possible outcome:
- 有d貓唔識捉魚
- 有d貓捉極都捉唔到魚
- 有d貓捉到一條就會覺得好滿足, 唔會再捉魚
- 有d貓捉到一條魚都好滿足, 但係會望住d 魚流口水, 因為呢d 係貓的天性 - 只不過佢地唔會再捉魚, 因為佢地已經飽飽
- 有d貓捉完一條又一條, 一次過鍾意食幾條魚
- 有d貓呢, 專揀貴價魚食...
- 有d貓呢... 真係... 捉到條魚, 咬左一啖, 覺得唔係咁好食就唔要, 再捉過...

各位男看倌們, 你係邊種呢?

===================================
又到聖誕, 又到聖誕...
今年終於唔使再唱"Lonely Lonely Christmas, Merry Merry Christmas, 在人浪中想真心告白, 但你想聽聽笑話..."
今年有老婆陪我周圍去lu!
今個聖誕我地要去好多好多地方~

===================================
劉年係今年grad, 可惜佢有一科要re-take.. 所以...
retake 完就真係grad lu!

>>December 22, 2005 at 4:18:19 PM GMT+8

2005 年 12 月 10 日 星期六 【晴】

日記遲早變月記...
話說呢個月真係算係多野做, 其實有好多野都好想記低, 無奈生活迫人...
雖然唔係話窮到無錢開飯, 但係當然存多d 安全d...

我睇到大魚個日記又係咁寫, 又係無時間寫日記, 但係呢個日記真係帶俾我好多好多回憶. 呢本日記追溯到兩年幾前, 2003年5月尾, 當我仲係on99果陣.. 為左AL 而努力, 到而家轉眼已經係大學生... 以前的生活, 一個人的無聊, 到而家兩個人的充實... 的確好大變化.. 我的確唔想無左呢個日記...

都係講返而家好d.
呢期其實我都好忍者, 無咩人知道我做緊咩...
其實呢排做左一樣好多人估唔到我會做的事, 就係設計相簿封面.. 如果你地試過晒相的話, 你都會知道d 相舖會送一本相簿俾你 - 無錯啦, 就係有人搵我設計果d...
老婆之後都搵左好多網上的wallpaper, 因為通常果d 相簿o既原材料就係果d 相對未有注冊版權的公仔再加以修改, 再重新堆砌而成.. 當然都要時間去堆砌啦.. 如果下次你係大埔晒相, 或者你會有機會見到我的大作.. (雖然唔係好見得人, 但係以我所知"勁彩"有買到我的設計)

第二件事就係終於有機會真正咁試VoIP 電話, 而且係由0到有, 有時間慢慢試, 唔使再咁趕住implement..
一買買兩隻SIP (Planet VIP-450)的Gateway, 果種感覺真係, 好彩唔使我俾錢...
仲有十三張抽獎卷 (p.s. 係黃金買野滿五百蚊有一張, 但係黃金買黎買去都係油墨同紙, 買成六千幾蚊野真係好少見)
超重.. 好彩返到屋企真係會試到, 雖然屋企個環境唔係咁好, 得一條電話線咁多...

仲有就係就黎考試, 不過我真係唔會咁早溫書果d 人囉.. 我真係prefer 做野多d...
都係要過埋佢架啦... 求求其其攞返B+就算...
而家o既GPA.. 其實得返3.38.. keep 住都幾好呀.. 夠好意頭.. 338..(發唔發唔緊要, 最緊要生返d 頭髮... 嗚嗚嗚.. 我諗我三十之前開始光頭...). 總之唔好低過3.0就ok...

(p.s. 係我打緊呢篇日記的同時, 老婆係我身後訓緊覺.. 佢病左... 嗚嗚嗚... 我總係覺得我傳染佢...)

還有還有, 劉年終於grad lu.. 仲快過我地...

仲有... 十二月二十九日3C 應該會搞活動, 到時記得出黎~

>>December 11, 2005 at 8:52:20 AM GMT+8

2005 年 11 月 24 日 星期四 【微冷】

呢個星期真係太忙. 因為壞mon姐(我地個programme leader...)份野真係太癲...
呢個mon姐.. 簡直係... 同當年Mrs Tsang 有得揮, 係有過之而無不及...

我上星期五開始做, 日日留係學校留到十一點做都做唔晒....
呢份係咩? 一份寫Multi radix Huffman Code的功課!
我只係可以寫到主要部份(Tree Encode)同份report... 但係寫file 同decode 真係做唔晒...
唉.. 算lun 數... 豪俾佢.....

真係點解呢? 只係佔10%的功課, 一個二個都為左佢變得瘋狂...
連我同鳴哥同Steve 都係到講呢句說話 - 只係因為良心過唔去.. 唔做硬係唔知點咁....
但係的確有d 人抄人, 有d 人亂做, 都有人直頭唔交....
有點傷心o既係, 有一個Yr 4 的師兄居然要retake 呢科, 居然都做唔掂...
佢仲要話呢科已經係最難.............

陪我做呢個project 的, 今年好d, 除左孫燕姿, 仲有老婆send 俾我的Rainie (楊丞琳), 古巨基同Jay 周杰倫... 當然仲有十蚊飯同埋係電話邊的老婆大人~*

結果尋晚我係鳴哥間hall room 到成十二點先走... 一切都已經告一段落...
===================================
相片周記:

因為呢份project, 體驗了夜生活 - 自己也成了風雨夜歸人
平日人來人往的街道

到了晚上, 有點冷清...

功課v.s. 一定要出席的Seminar - 你看.. 發生了甚麼事:


當你畢業時收到這張'沙紙'.. 我都唔知點算...


=======================
我諗我受到老婆的影響, 開始會走去睇電視...
其實有時d 劇情都會令到你想睇, 但係往往d 結局都係千篇一律.. 所以唔睇...

唔知我幾時先可以影響到老婆睇下新聞, 留意下時事呢?
話說今日佢去見工... 去Housing Authority見訪問員.. 我陪佢去之前已經話group interview 好可能discuss 有關房署d 新聞.. 同佢講, 一係講領匯, 一係就係減租單官司.. 同佢簡單講一次之後, 佢聽左...
佢in 完同我講, 居然真係出減租單案.... 唉... 政府d 野十年都係問呢類問題架啦.. 仲要咁切身同新鮮....

結果點? 咪我走左成日堂囉.. 今朝又起唔到身, 又想陪老婆多d.. 呢個project 真係嚴重影響我正常生活, 包括陪老婆的時間!!!

=======================
老婆... >3<
=======================
差d 唔記得左講 - 老婆大人生日... 你睇下我幾大懞...

老婆生日, 所以同佢走去食返餐好o既.. 其實都唔係好好, 當我話俾老豆聽我去果到食, 我老豆居然話: 吓.. 唔係呀嘛... 人地生日喎.. 食d 咁o既野?

大埔墟其中一間舖頭名對學生非常不利的上海茶館 - 滿江紅(我讀莫記真係唔敢入去食.. 一陣食完我滿江紅我咪.... (好想講粗口.. 但係會俾老婆話.. 算...~))
老婆今日好靚.... (老婆平時都好靚, 只不過今日特別靚).. 可惜唔可以post 相...

>>November 25, 2005 at 3:28:10 PM GMT+8

2005 年 11 月 12 日 星期六 【晴】

有一部影到相的電話都唔錯.. 開始發現係有好處

例如:
咁o既白汁雞飯, 咁就騙我17蚊..

遲早我會投訴.. 我已經唔係聯福食架啦!!!

仲有... 係唔係有d 面善呢... (其實post出黎會唔會俾人打???)


今日同老婆去行街..
買佢份生日禮物...
同佢去新達.. 佢一早已經揀好買咩... 但係仲係好似個細路女咁見到鍾意o既野仲好雀躍...
好得意~*
最終千揀萬揀, 都係揀到佢的心頭好....

其實係買左對Sunbella 布鞋......

之後我同佢去新街市食野.. 我覺得唔係咁抵食...
同佢係大埔墟菓香林食豆腐花.. 超正...

>>November 13, 2005 at 3:46:44 PM GMT+8