2007 年 4 月 22 日 星期日 【晴】

魚子, 我做人都講信用o既.. 你每次過黎城大(畢業後都計數), 我都請你食頹飯... (或稱10蚊皇家飯)
反正你食幾多飯都係10蚊.... (我見過最誇張係添兩次飯..)
===================================
星期五考車啦.. 仆街啦... 而家先係第十四個鐘.. 肥梗都得...
算啦.. 我唔想諗住.. 鬼叫得閒果陣又無去學, 唔得閒果陣又死期到.. 香港學生通病.. 而家暫plan 星期二、三都去學先, 最後星期四都會.. 而家得唔得真係靠個天啦!

今晚o岩o岩係大陸返黎... 唉.. 內地d 網路.. 真係一個7字.. 有時好難明白點解佢地d 電訊局可以咁野..
好地地一條ADSL線, 點解係街外拉入黎, 要受盡風吹雨打...
結果絕對係意想不到:
Apr 22 13:42:39 SuperLH pppoe[1573]: Invalid PPPoE type (5)
我到而家仲好迷惑....

返到黎同老婆傾電話, 講起話有人唔鍾意返大陸... 其實我又唔見得好鍾意返去.. 通常得幾類人鍾意, 其中兩類就係返去滾同包二奶.. 當然仲有可能係大陸有親戚... 只不過作為一個所謂的生意佬, 邊度有商機就去邊到搵食.. 所以唔好話一定唔會返去搵食.. 因為果到有好多錢等緊你, 遲d 等個市場慢慢定落黎, 到時你想食都無食.. 正所謂時勢造英雄.. 一定要夠亂先有得上位... (不過只代表我的言論, 歡迎提出你的見解...)

其實我唔記得講.. 我生日搞乜...
生日正日反而無乜野.. 因為4月8日已經係我表姐屋企搞左一次BBQ..
原本果日係我約左幾個表哥表姐去錦繡花園BBQ... 就係BBQ咁簡單...
我老婆非常古惑地前一早就訂好蛋糕, 仲叫我老表早d 去到上水攞蛋糕... =)
其實真係好感動.. 估唔到我老婆比我更加浪漫...
人生有個好老婆仲想點!?

考我學車個師傅今年已經將近七十啦... 有一次我話想就時間陪老婆食飯..
之後講起, 原來佢同佢老婆已經結左婚50年.. 真係古來稀.. 佢仲話: 娶個老婆返去錫架.. 唔通返去打佢咩?
唔怪得佢地可以結婚50年... 值得學習...
唔知到我70歲會係咩世界呢? (又或者我有無70 歲...)
到時就知~ 活在當下吧...

>>April 22, 2007 at 6:45:16 PM GMT+8

2007 年 3 月 30 日 星期五 【晴】

好耐無寫曰記啦... 聽日係April Fool's, 希望唔好走黎整估我.. 我唔係好嚇得...
見今日有d 時間又無乜動力做野.. 好眼訓.. 連續幾日都唔夠時間去訓.. 唔夠時間用啊..
不過無論點都好, 星期六日都係留俾老婆的...

===========================
今日又睇到殘酷一叮.. 又係果個變聲王.. 超正..
扮李克勤, 阿麟, 小鳯姐.. 勁變態..
我最多前幾日同老婆去唱K最多都係扮到張信哲... 一個人點扮咁多把聲啊...
講起唱k, 再對上一次已經係老婆生日... 11月16日, 成幾個月都無唱過....
鬼咩.. 忙到hihi...

學校份工已經做完.. 正所謂我會做完呢份工.. 搞掂晒..
不過好似仲忙左.. 因為平時有籍口去推, 話要返學.. 其實返到去都係hea.. 但係家陣無左呢樣野..
走果陣同同房同事走去觀塘果陣外野手到食飯... 佢地請.. 幾正架果餐....
之前果日就同team 同事去城大酒樓食飯.. 一路吹水一路食.. 不過老婆好似有d 悶...

星期三四都上左惠州.. 搞果隻死人無線野.. 好惡搞... 老表無野做果陣又同d 女同事傾計.. 無, 傾計o者, 最多咪係溝通.. 無野o既... 天生一副sales 格...

========================
學車學到第二堂... 終於學到上斜起步... 無想像中咁難...
不過真係好快架.. 一轉三波.. 快到你驚... 不過真係太忙, 無時間去學同練習.. 我真係驚呢次考車會出事...
不過自己渣住架車係馬路行.. 你會發現好多亂過馬路的盲毛.. 好似我學車果陣, 係慈雲山到見到一男一女過馬路, 我行慢線, 原本都無野, 佢已經過左.. 點知快線個仆街的士佬快得濟, 砵9佢地.. 果兩條盲又係o既, 退返轉頭.. 向前行兩步就搞掂啦.. 退返轉黎慢線係唔係想我呢個學仔搞掂你啊... 好彩我反應快.. 停得切.. 如果師傅唔係到.. 我屌到佢7彩啦...
之後有一次搭的士, 剛出紅磡火車站..
一出路口有個7下7下的後生仔, 聽住個耳機, 居然見到架的士黎仲慢慢咁亂過馬路.. 大佬, 果到唔係過路處, 你仲要俾人砵你都呆望個司機慢慢過馬路...你死你事啦, 你想死你跳落去啦, 唔好累人地啦...係我就隊lun正架車係佢前面.. 睇下佢仲識唔識驚... o岩o岩睇電視新聞話又搞掂一件... 我只可講句, 佢係果個位過馬路真係自殺... 今次你唔俾人車死, 下次你都會...

講起自殺.. 樓下有一男一女.. 成日係到嗌交.. 聽阿媽講,男的廿二歲, 女的廿八...
個女人成日話自己好唔開心又話成, 個男人又話想自殺.. 唉.. 快d 死.. 唔好煩... 如果日日咁嘈法我寧願離婚/分手.. 你唔煩, 我聽都聽到煩啦... 呢個世界不少女人都係當另一半係水泡, 之後見到個又似吳彥祖又高大又型又有錢果d... 原本果個? bye 啦.. 即刻唔記得用水照照自己個樣咁飛搏埋去....(陶傑曾經非常型像化咁寫左一個已經讀Year 2 同埋一個讀asso 的男女分手的過程, 個女的將那個男的踩到一文不值地分手...)
當然唔會個個都係咁.. 起碼我老婆唔會... 但係見到d 咁o既女人真係會令人咬牙切齒 - 當然, 如果一個女的又係俾一個男的咁玩法, 我也會一樣咬牙切齒, 而且唔會係我的人事圈中出現...

=============================
好眼訓呀.. 但係Enemy at the gate 實在太好睇.... =)

>>March 31, 2007 at 3:35:54 PM GMT+8

2007 年 3 月 6 日 星期二 【晴】

本個女無寫日記囉.. 我真係好懶...

首先一定要講就係2月23日, 兩年紀念..
兩年前, 係火車到, 我捉住佢隻手, 問佢: "喂, 你做唔做我條女!!?????" <-- 當然無咁變態.. 講下笑o者..
真正的版本係: "阿四, 可唔可以做我女朋友呀?"
=====================================
今年的2月23日, 我地去左食左一餐晚飯...
至於禮物, 我地兩公婆好似都無咩特別去買.... =.='

太耐啦, 我已經唔多記得果日發生左d 咩事.. 對唔住啦老婆..
我記得就係因為我要返工, 之後出左去紅磡做左少少野..
但係就唔記得左去邊度食飯...

跟住就係3月4日, 元宵節..
最衰要係屋企做功課, 搞到之後睇埋"波叔出城".. 落到去大元邨咩都無得玩.. 人地已經肯左場.. =.='

我都知我對我老婆唔住.. 成日都係咁, 一個悶字.. 唔係留係屋企就做野.. 無乜情趣..
望就望老婆唔會介意啦!

===========================
至於做野方面...
你試過為左食"宵夜", 坐左共300公里車, 由香港去到番禺, 食完就返返黎...
唉.. 如果唔係我之前推左個客兩次(其實係我老表的客, 只不過又係玩埋一堆..), 佢呢次又專登叫埋我去...食春茗.. 至於點解無端端變左食宵夜呢.. 呢層.. 其實只係因為我地遲到... 話說我同老表係另一間公司做野做耐左, 個老闆娘太愛我老表, 捉住佢唔放.. 就搞成咁...

結果個客要罰佢飲3 杯... 之後仲想隊佢... 結果我幫佢頂... (一向我酒量都好過佢少少.. 因為老豆果邊家族遺傳...)
我老表因為飲得太急, 所以好快就嘔到九彩..好彩果陣仲未上車, 否則阿漢架車就.........
===================================
今日第一次學車, 人生第一次駕車...
其實都幾得人驚..... 因為架車真係好去, 俾少少油都唔掂... 但係果架只係一架Hiace 貨車..
如果波子, 實搞佢唔掂...
唯一好彩就係個棍波俾我想像中容易好多.. 唔使點俾油, 幾乎一放極力子就會行..
不過我都係搞到架車死左幾次火.. 一次左錯波, 兩次brake 得太盡..
師傅話我已經叫幾醒, 起碼停果d 位好準, 又唔會勁"鐘"頭, 只係唔夠膽 (大佬.. 驚架...)...
好可能一次pass 喎...
至於呢樣野, 就真係要多謝阿德興啦.. 話晒佢都係九巴入面做師博, 教晒路, 一早就教我要印迫力, 唔好下下都咁大力.. 因為我第一腳落個brake 到就發現架車太輕.. 大腳少少就會停得好應... 所以之後都無咁大力....
當然, 呢個師博都好好.. 起碼第一堂唔會同你吹水講廢話, 一黎就叫你自己試下舞唔舞得掂架車.. 不過真係驚左d 小巴佬同的士佬...
安全第一啊!

>>March 6, 2007 at 7:07:01 PM GMT+8

2007 年 2 月 15 日 星期四 【晴】

果然所言非虛, 真係發緊燒..
去到李山河果到一探熱係99.8度.. 醫生話喉嚨發炎, 仲燒到有d on lun 99...
全日都好累, 所以唯一可以做的事就係訓覺..
結果日訓夜訓... (加上有醫生紙, 可以有兩日假)

不過真係好難得有個咁的機會, 乜都唔使諗, 日訓夜訓就得..
呢d 機會真係好少有 - 只要身體正常, 就要走去呢到果到做到無時停...

我老婆真係好錫我, 我病就走黎睇我..
多謝老婆~

>>February 16, 2007 at 12:33:48 PM GMT+8

2007 年 2 月 14 日 星期三 【晴】

哎啊.. 過左情人節tim..
希望大家的情人節都過得愉快啦!

今日我又做左d 乜!?
無啊.. 今朝好早起左身去考車牌筆試.. 尋晚溫書都溫左一陣, 所以今日做果陣都無乜難度,
最大難度就係... 起身...... 唉.. 11:25 分考, 我起碼要9:30起身..
好彩老婆今日morning-call 我, 否則我都起唔到身...

我連早餐都無食就出左門口, 搭271 (其實我眼白白睇住架K12 走人, 之後呢, 諗住去搭72x.. 點知無, 結果上到架271 發現, 架K12 又開多一班.. 頂!!!)
好彩最後去到深水埗都仲有時間淨..
20條MC廿分鐘, 駛鬼, 五分鐘做完, 好彩最後pass 左..
不過路試係4月27日係天光路考.. 驚驚...

至於Wong J.. 佢都pass.. 不過今日先發現.. 原來佢報左私家車.. . =.=' 激灰!!!
佢又唔想俾多510蚊買過張路票... 算啦...

我今日就等到六點, 去BU接老婆.. 至於我地d 活動.. 激囉.. 返屋企食飯...
各位有無睇過高朋滿座果個花花(陳敏芝)? 似足我老婆.. 唔想洗咁多錢.. 老婆話, 今日無乜特別, 日日都好似情人節咁..
係啦...

今晚阿媽餐食好豐富. 有蝦有魚..
之後食蛋糕(唔記得左講, 我阿媽係身份證上果個生日日期就快生日, 所以老婆話買個蛋糕, 唔係好大, 半磅食完就算)

走果陣行左一陣百佳.. 睇下過年買d 送俾對方親朋戚友.. 不過不外乎都係朱古力, 朱古力同朱古力(悶!)
(後面突如其來有把聲: 拜年唔通送蕉啊!?)

返到屋企又開始改programme.. 唉.. javascript 好麻煩...
======================
唉.. 每到過年我又開始病...
今日開始係咁咳, 而家自檢系統發現有少少燒(約100度, 大約都幾準)
剛剛食左兩粒幸福.. 訓啦...

>>February 14, 2007 at 5:57:28 PM GMT+8

2007 年 2 月 11 日 星期日 【晴】

就快農曆新年囉... 先預祝各位新年快樂, 萬事如意, 心想事成, 身體健康, 學業進步, 步步高昇, 財色雙收(!?)
又由於就快新年, 呢期去好多飯局.. 有時仲要返大陸食人地春茗.. 繼續"一路向北" (突然間唱道: 我一路向北...)
呢期電視話, 出得外面食飯太多會好多代謝病, 例如高血壓, 糖尿病.. 慘啦.. 我諗過完年一定要少d 出街食飯啦!
不過上大陸咁多次, 今次真係第一次親眼見到人地叫"三陪"成個過程..
因為大部份K場d 三陪, 都係叫果個人走去一間房到, 揀女..
今次唔同, 係個媽媽生走入黎, 問下: 各位靚仔, 叫唔叫返個小姐啊..
最估唔到係其中一個男仔(我估佢20~25左右)真係有興趣.. 咁佢就同佢媽媽生示意..

過左一陣, 成班女入左黎..
媽媽生: "企齊d! 同各位先生問好.."
小姐們: "各位先生晚安... (之後繼續苦口苦面)"
媽媽生走近果位男士, 果位男士道: "唔好行埋黎啦....", 可是媽媽生沒有理會, 還是繼續坐近他身邊, "呢d都係我最錫架.. 揀個啦.."
當各位路人忍笑忍得非常辛苦, 然而該位男士非常沒趣, 對所有企著的小姐並沒有興趣..
"唔要啊.. 黎過一批啦... 好唔掂啊呢d.."
如是者, 居然去到第四批女士..
其實又難怪.. 因為我同同行路人都覺得唔掂.. 一來苦口苦面, 二來真係唔靚之餘仲要丑(大部份)..
加上果個男士佢自己都話, 去開深圳, 澳門等一線市場..
所以媽媽生亦很不耐:"而家叫你揀老婆咩!? 揀個陪酒ja ma!"
最後男士都揀左一個, 起碼我地幾個都覺得ok 的...

媽媽生臨走居然連我地呢班路人甲都唔放過...
媽媽生: "靚仔, 不如叫返個靚女啦..."
阿漢: "唔要啦.. 唔要啦..."
我: "梗係唔得啦, 難道你想我被老婆五馬分屍嗎!?"
媽媽生: "唔使驚喎.. 你老婆唔係到..."
我: "我係好男人來的.."
媽媽生: "你係好男人!????????"
我: "........................"
耀明: "我唔要啊, 咪搞我... 我香港仲有個女友...(死人都似...)"
結果媽媽生好黑口黑面咁走左...
(其實同行仲有一對情侶, 只不過咁都會問就真係玩野囉!)
==================================
呢期洗左都幾多錢下...
尋日買左對新波鞋, K-swiss 的, 差唔多四舊水..
仲有剪左個7頭.. 估唔到咁快就過年收費, 貴左成廿蚊.. 算啦..

好想快d 新年, 因為有時間可以zzzZZZZZZZZZZ 哈哈哈!

>>February 12, 2007 at 6:42:11 AM GMT+8

2007 年 1 月 30 日 星期二 【晴】

又一個月無寫日記... 唉.. 算啦...
還好我現在寫日記的時間是1:58 (零晨哦!), 比起平時三點多才睡覺還算早.. ^^
其實我都唔知幾時開始搞到咁夜訓, 做左隻夜鬼...

或者之前果排掛住破解"達暈低密碼"破解到唔記得訓覺 (屁啦! 其實只係走去分析一部USB Skype Phone的訊號)
之後又掛住寫program...
結果早上成十二點先起身... 難怪我老豆話: 你返乜鬼工...
無法啦... 要怪就怪學校無端端要我地做一年intern.. 而且唔俾我報Jason Official Computer Complex Service Co........ 喂.. 假假地都係公司Director (可惜真係假的...一人公司, 有分職位架咩!?)
算啦.. 生活就是這樣忙.. 但奇怪的係, 居然今年卻無咩病痛... 聽聞話當一個人處於太忙的生活, 身體會唔記得左病.. 或者等我新年假果幾日停落黎就會病 (啋!)
唯一一日假期, 就係星期日, 訓到唔知點多點, 之後可以全日陪老婆同屋企人...
已經好滿足啦... 好可能黎緊呢廿年都係咁過生活.. 只不過多左買餸煮飯湊仔而已... 原諒我, 我係一個住家男人..

東莞鳯崗鎮可以暫告一段落.. 但係等著我的似乎仲有大朗鎮...
看來我的事業仲有排發展.. 我老婆還有十年可能要陪我挨.. 對唔住啦.. 老婆大人.. 而且最近我改左個日本名 - 左滕右膝... 正所謂嫁雞隨雞, 嫁狗隨狗, 嫁著我就.......................... (自己填啦!)

我外母有一日問我老婆:"阿豐而家做緊d 咩?" 我老婆話:"幫人整電話, 打電話落香港唔使錢..."
我外母居然殺出一句:"犯法架喎"..... 係啊.. 我係經濟罪犯.. 直接令到國家電訊公司蒙受損失, 但係又無一條明文法例可以拉我.. 我只可以講一句: Sorry 囉! 鬼叫你d IDD咁q 貴.. 我唔做, 香港大把公司都會做, 只不過我做出黎個系統down-time 比較少(provided that d hardware 無事..), 同埋技術比較奇怪o者!
當然, VoIP技術唔只係節省IDD錢咁簡單.. 有好多好多Charming 的technology 都可以玩到.. 只不過香港老闆只在乎係錢... 有人問過我可唔可以做recording.. 其實無難度, 只不過要幾多$$$$........

前果排我約William, 達達同志豪兄食飯.. 達達話我d gap ok 好笑.. 只不過問題係我老婆已經唔識笑... (汗!)
果日其實我同佢講: 中國城已經執左, 變左日本城, 不過問題係日本城其實又咪係中國城 - 入面d 貨全部都係made in china...
但係我老婆話: 唔好笑喎! 我諗起我有一個uncle 又係, 一出場勁多gap.. 但係佢老婆居然可以唔笑... 我終於明白點解 - 習慣左....
至於果日講過d 乜... 可以話係天南地北, 乜都吹一餐.. 無計, 始終太耐無見..
如果我叫忙, 我諗William 可以係忙百倍至千倍不等...

情人節 - 唉.. 要去考筆試.. 最終都係同Wong J 去報名學車... 搵家豪果個師傅...
有一日走去搵馮德興, 以前佢係307的車長, 而家已經係九巴訓練學院導師...
佢同我講: 一個精明的駕駛者唔單止要避免自己發生意外, 而係要阻止任何眼見可能的交通意外發生.
高到佢... 唉.. 我一次考到已經好叻仔.. 不過考完又係一個雪藏牌.. 到時先算啦....

至於情人節禮物, 我今日同老婆行旺角果陣, 神神秘秘咁叫我同佢入百老匯...
原來佢話, 叫我送禮物俾佢個quota 攞去買shaver (其實之前果個真係唔想用, 好壞下..)
因為佢知我如果買俾自己會唔捨得, 當我買俾佢... 其實我老婆真係好貼心...
當然, 周年紀念果份.. 我另外送左俾佢啦~ (其實我同我老婆就快兩年lu!)
我仲記得當時點樣追(可能係呃.. 哈哈!)佢返黎..

呢排天氣凍, 唔講咁多肉麻野.. 算啦...

>>January 30, 2007 at 6:30:30 PM GMT+8

2007 年 1 月 8 日 星期一 【晴】

嘩靠!! 我已經一年沒寫日記了...
先祝大家新年快樂, 心想事成, 馬到功成, 龍馬精神, 萬事如意.... (眾人罵道: 屁啦!)

06年bye bye lu..
雖然06年過得還可以... 起碼無穿無爛..
搵錢雖然唔多, 但係總算開心快樂...

同老婆就快一齊兩年~ 時間過得真係好快...
==================================
聖誔節, 其實我悶親我老婆..
諗住帶佢返去一齊大陸一路玩一路做野, 點知得個做字, 無玩過.. 我諗唯一得著就係食左我個frd 一餐日本野... 哈.. 咁我都係幫我個frd 做野o者... 不過係隻死人DG-102S 非常之唔聽話.. 居然WAN同LAN係switch 掉就算.. 大哥.. 你下次不如寫PC 同LAN就好啦.. 耍我嗎?

之後返到黎香港, 同老婆去左旺角, 沙田等地睇商場內的聖誕佈置... 出奇地今年係無去過尖沙咀或者去添馬艦或者中環果個聖誕村到睇... 至於原因.. 老婆要趕Honour Project... 我自己又要忙自己d 野.. 今年又得紅假唔使返intern.. 無計啦... 至於倒數就留返係沙田中央公園到... 不過我就覺得沙田倒數都幾正.. 起碼好多表演睇..

我的intern 都只係仲有三個月就goodbye.. 其實同事同老闆Dr. Liu 都對我好好, 好肯俾機會我試寫code.. 無奈我真係十級憎恨Microsoft 做出來的C# (如果係Sun 整出黎我諗會無咁憎)..
呢幾日只係想改少少野 - 一個網頁的title.. 居然係老鼠拉龜...
第一, 佢無一個好簡單的Control (i.e. Page.Title = "xxxx"); 去咁做, 而.NET 2.0就有... (正hihi!)
第二, 我想改 入面output string 嗎? sorry.. 無法字
第四, 用javascript.. 你想output variable 嗎? 得.. 先建立一個hidden text field 讀果個value... 咁就仆街啦.. 如果我有十個javascript...咁咪十億幾個object 要用?

唉.. 老闆呀老闆.. 點解唔用JSP呢........ 起碼d 野做得簡單好多啊!!!!

========================
淫友, 生日快樂~~~

>>January 9, 2007 at 10:14:28 AM GMT+8

2006 年 12 月 17 日 星期日 【晴】

好耐無寫日記啦...

估唔到咁快又一年... 今年又係徒勞無功的一年...
今年反而多左跑內地.. 不過搵錢好似又唔係多左好多.. 仲係好窮...
=============================
上個月老婆生日, 到而家先講..... 我都知我衰.. 但係真係得今日係公司做冗員, 又唔想寫code...
老婆生日, 所以我特意攞左一日annual leave 去陪佢.. (另一方面我又唔使咁早起身...哈哈!)

第一個目的地就係去旺角唱k.. 我都好耐無係香港唱過k.. 前果排上東莞就唱得多..
但係d 歌又舊.. d 人又唔係旨在唱k... 多數都係飲酒, 有d 甚至係搵三陪... (d 三陪其實就係服務員本身.. 條裙真係短到你唔lun 信.. 不過我真係無興趣... 咁同雞有乜分別?)
曾經我仲親眼見過有個阿叔同個三陪一齊入左廁所........
亦都聽講過有人叫埋三陪上房......

呢樣野唔講...
講返同老婆唱k.. 其實真係發現香港k場太少其他地區的歌曲.. 係我同我老婆比較多數聽台灣歌的情況之下(特別係我已經好耐無聽廣東歌.. 實在太差.. 唔係抄返黎就係一pat 野咁...) 結果都係唱舊歌多...
兩個人唱歌有無好處... 就係想唱乜歌都得.. 成大班人唱, 特別我呢d 老餅唱d 歌.. 無人會聽.. 加上人地唱果d 我又唔識, 人地點果d 我連個歌手名都未聽過... 不過倒過來, 曹格, Makiyo, 羅志祥(呢個多人識, 因為同容祖兒合唱過), 范瑋淇, 哈林又有幾多人識......

之後就同老婆過海去山頂....... 其實都講左好耐話去.. 點知搞咁耐最後先去...
我對上一次去山頂係04年同表妹去... 當時仲有動感影院同埋"信不信由你"展館.. 而家.. 只係得返個蠟像館...
結果買左纜車來回+蠟像館入場套票...
之後我地就同所有蠟像影相.. 哈哈哈!! 其間仲有韓國遊客..

行完蠟像館之後, 唔知行到邊層有EA Games 的booth (兩層樓...).
勁多試玩.. 搞到我流連忘返... 對唔住呀老婆豬~

最後上左去一個新起的山頂觀景台... 好凍...
但係真係好靚.. 只不過.. 香港的空氣污染實在太嚴重啦! (不過深圳仲勁.. 你有無見過係夜晚行高速公路, 能見度居然唔過30米?) 唉.. 點解政府唔好好諗下問題出現係邊到.. 一日到黑個東東淨係識賴好多巴士同搵食車..
你話咩... 巴士公司呢十年來d 車先進左幾多, 黑煙少左幾多.. 的士小巴都俾你搞到用石油氣啦.. 仲有貨車.. 舊車都死晒咁濟啦.. 就算有墨魚都被以前少好多.. 咁點解仲污染過以前呢? 咪就係因為你班仆街淨係睇錢, 地產佬話係海邊起高樓賺錢.. 你就俾佢地係咁起.. 結果咪起左個圍牆囉.. 又無風吹到入馬路.. 加上有d 不法商人(大部份係港人)係大陸係咁非法排放廢氣..
有個的左佬同我講, 話以前起屯門公路都要顧及環保因素, 例如咁起會唔會擋左內陸d 氣流..
唉.. 人地英國佬只係過客, 其實佢大可以搞到你香港七國咁亂左環返俾中國.. 咁點解英國佬無咁做, 到中國人執政又會搞成咁呢? 唉...
大家真係兩個字, 等死..
講起呢樣野.. 天星個鐘樓點解要拆呢? 我見佢拆果陣都係分組件咁搬上船.. 其實大可以係新天星果到擺返原本的東西.. 你知唔知.. 雖然我好少過海, 但係每次聽到鐘樓報時我都覺得有一份親切感..
至於政府咁做有無政治目的(抹殺所有前英國的遺物)咁就......
但係唯一可以知道的就係, 香港政府比起澳門政府, 就係幼稚園生同大學生的對比..
人地澳門係發展緊"文化遺產"旅遊.. 香港? 我諗係發展緊"拆卸文化"旅遊..
係香港無乜工業, 只靠地產同旅遊發展呢個大前提下, 旅遊都搞成咁, 大家都係等死... 只不過多左好多內地人黎攞著數, 唯一分別就係會快d 攬住一齊死...
不過餓死幾個地產佬可能係一件好事........

========================================
講講下又離晒題tim...
不過山頂的夜景係好迷人..
去完山頂, 結果落左去旺角一間專食焗飯的餐廳食.. 超正~~
不過已經好夜lu~

OT 後話:
見到有其他人的日記, 話佢男友點樣準備呢樣果樣神秘禮物...
相比之下.. 我真係未試過自己花心思諗要送咩俾老婆...
唉.. 原來自己係咁唔識情趣...
========================================
無論如何, 特別係有另一半同佢諗住過人世的, 大家記住一月一日上街遊行, 爭取香港大肚婆權益.. 因為訓係醫院等生BB無人理, 又無得做檢查的, 可能就係你的另一半(或者就係妳, 如果你係女讀者)!!!
呢次係我咁大個仔, 第一次咁堅決一定要去遊行, 因為我已經對呢個政府失望..

>>December 18, 2006 at 9:10:26 AM GMT+8

2006 年 11 月 8 日 星期三 【晴】

突然有感而發... 搵野寫下...

今日做野做到好夜.. 超過10點先食飯...
其實我已經好少係Food Court 食野... 本身諗住出去觀塘舊區食野.. 咁o岩丹尼士同學打黎, 我問佢觀塘有乜好食.. 佢話有得食都要廿幾蚊.. 最後都係是但係food court 食d 野..

其實都幾貴.. 是但搵一間睇.. 嘩.. 58蚊.. 一個人食ja wor.. 係唔係食左識飛先?
之後搵到另一間.. 30 蚊.. ok 接受到.. 不過個content.. 其實只係
由於太耐無去Food court 食野(因為貴), 結果7左, 以為去Cashier 到叫野食.. 點知係要去左果間野話左有咩食先.. 超7...

之後等左一段時間先有得攞... 因為太肚餓的關係.. 結果食果陣就二話不說地狼吞虎嚥起來..
一路食, 一路諗... 自己投先果下好似真係鄉下仔出城咁.. 乜都唔識...
見到大城市d 野, "嘩,乜原來咁lun 貴架... o shit.. "

鄉下仔? 係咩!? 我又真係食過1500蚊一餐lunch 喎... 你食過未呀?
雖然唔使我俾錢, 但係起碼都叫做一生總會豪一次...
可能人大左, 價值觀唔同左...

===========================================
我做左一件事, 搞到老婆好唔開心...
其實我諗係因為我, 令到佢同佢一個好好好朋友有d 誤會...
我想係到同佢地兩個講聲, 真的對不起
小弟有咩唔o岩唔著.. 你搵我好了..

>>November 8, 2006 at 5:20:23 PM GMT+8