2008 年 3 月 20 日 星期四 【晴】

香港, 已經走到了終點了嗎? (是香港人一定要看)
=======================
看到了今天的報紙, 我心裏真的想說一句, 香港的司法的所謂制度已經蕩然無存了..
我在說啥? 就是淫照風波第一名被捕的人鍾亦天.. 淫審處最後很奇怪地裁定了那批相片只是不雅, 並不淫穢...
即是代表他沒有發佈淫穢相片, 也即是他不明不白的坐了14天的牢..
其實如果淫審處合作一點, 把相片都當成淫穢的都可以了, 反正這樣社會引起的風波只限於觀點與角度問題, 反正他們都常常錯裁, 司空見慣了.. 可是這次偏偏就對著幹, 真夠糗大..

我今天在想, 會不會某天我在上網看discovery channel中動物們在草原上自由自在的進行生育的同時, 警察已經包圍我的家並且要拉要鎖呢? (奇怪的地方是, 並不是海關因為我非法看電視要抓我..), 接著又是十四天的牢獄之災.. 這時會不會又有正義的網民出來聲援一下?

板主看, 如果相中的人不是陳慣吸或是阿嬌, 警方肯定還在說: 調查當中, 無可奉告..

我跟大家講, 如果大家還有錢, 還有力氣, 都要盡快儲錢移民離開香港.. RUN FOR YOUR LIFE.
我不是不愛香港, 我跟你們說, 我是超愛香港的, 我在世界上都沒有找到一個地方可像香港般, 方便, 快捷, 安全(就快不是了)和自由(也即將沒有了)..
可是就是越愛香港, 眼看香港都變成這樣, 實在不忍再看下去...

香港的輝煌, 我實在不能全部都歸工於英國人和英國政府, 畢竟在70年代之前, 英國對中國人都很不爽, 都是高壓統治, 可是直到七十年代, 衛亦信開始了教育, 房屋等政策, 令香港看見了長遠的未來; 90年代的玫瑰園計劃, 使香港發展成空運的中心, 我真的很自豪的說, 我們的機場是連續多界的全球最佳機場..

到了回歸後呢?
看來大家都只顧地產, 股票可以賺多少錢, 完全都沒有將香港的發展定立一個很好很長遠的目標..
香港作為亞太的金融中心現在都怎麼了? 資金自由行去了哪裏?
至於旅遊業.. 我很想說一句, 香港真的完了..
香港比起其他中國地方的優勝之處就是有一種英國色的風味, 對外國人而言, 香港是很好的踏腳石因為語言不是一個很大的問題, 只要懂英語, 隨街找人問都沒難度.. 即使在比較開放的台灣, 我就是親眼看過有兩名外國人在中正機場的台灣銀行, 想問問題, 因銀行的職員的英語太爛, 結果我看不過眼都幫他們當翻譯.. 因為他都阻了我很多時間, 我還要趕高鐵到台南. 可是這種事件真的絕對不會在香港機場發生, 否則那個職員肯定明天不用上班.. 另外, 對於內地人或台灣人而言, 他們想看的就是西方文化與中國文化結合出來的成果, 大城市, 五光十色的繁華, 很多地方都是沒有的. 可是近年深圳, 廣州等大城市發展非常迅速, 要看大城市, 只要買飛火車票就可以了, 幹嘛一定要香港? 難道香港的蚊型迪迪尼很吸引? 難道是海洋公園的動物都比其他地方的好看多了? 還是維多利亞港都被珠江和黃埔江香? 別發夢了, 香港有很多本土特色都開始被這個爛政府搞抹殺了. 很多很有特色的英色建築物都開始跟我沒說再見, 在香港, 利益遠比保育和長遠發展重要. 還有我們帶一點英式的文化呢? 靠, 都被中國湧下來的文化覆寫掉, 我沒有說這樣很爛, 但可否保留我們的特色? 你可以看看澳門, 我不能否認澳門被葡國統治了四百年, 時間長很多, 文化也深很多, 可是人家很尊重自己的過去... 而且還開拓一些自己沒有的新事物, 例如展覽旅客等都吸引過去了..
大家只要上火車看看, 大批大批的內地人湧進香港, 等一下, 我沒有說我不歡迎.. 有文化的我絕對歡迎, 我在城大就真的看過很多有文化的內地人, 而且他們都很有智慧, 我都叫他們要多點在香港發展, 可是他們很多都視香港為往美國唸博士的踏腳石了; 就算沒有很高學歷也沒差, 我工作的公司很多時都遇到很多內地人, 反正就是有文化水平的, 也很有禮貌(等下我會說蝦米叫沒文化水平), 他們都應該留著, 反正最後結果就是聰明的走了, 沒文化的滿街都是. 當你坐火車的時候, 看到操著內地口音的媽媽只顧自己講電話, 然後他的兒子都自己在火車上跑來包去都撞到你, 你只是很有禮貌的教育一下她的小朋友, 這時候小朋友都一定會哭著, 然後那個媽媽居然突然彈起來, 甚麼三字經都齊來罵你.. 你就會跟我一樣的很不爽看到滿街都是沒文化的內地人.
先別說人, 就是教育, 就是甚麼的馬屁愛國政策, 都拖累了香港學生的英語水平.. 我不是罵人們幹嘛要學國語, 國語是必定要學的, 香港人能比內地人國語說得好嗎? 別傻! 香港人最特別的地位就是英語和國語都說得好(當然國語很爛的人都很多), 做了橋樑的角色, 如今一來, 香港的優勢也抹殺掉..
還有一樣政策也是超不爽的, 就是強醫金.. 靠, 幹嘛香港的醫療體制是, 內地人來香港生小孩不用錢, 現在還對我們這些良民開刀收費了? 那些不用做有一萬一千的家庭, 來香港大吃大喝的就免這個那個了? 怎樣叫有能力工作和貢獻的香港人留在香港了? 看到這一點, 我都想帶著家人立即買機票離開香港了..

沒有了, 香港真的完了..
一邊看到官商勾結, 一邊看到政策在苦了香港的老百姓, 另一邊爛政府正搞爛香港..
我都不能做甚麼, 只有祈求著爛政府的高官們還有一點良知, 不要搞得太爛..

如果香港像直布羅陀一樣.. 你說多好?

>>March 20, 2008 at 8:51:04 PM GMT+8

2008 年 3 月 18 日 星期二 【晴】

我在唱我心內的一首歌

<<你是我心內的一首歌>> 王力宏, Selina



我超愛這首歌, 不知為何這個調就是我很喜歡的味道..
當然我也知道這不是新歌, 不過很久都沒有說出來, 我就是喜歡..

另一件怪事就是上兩次去台灣都會聽到這首歌(當然不是因為電話在播),
上年的就是在飛機上聽到的
二月的, 是在往高雄途中的公車聽到的, 害得大家都以為我電話響了...

也沒差啦, 反正就是喜歡..
P.S. Selina 超可愛.....

>>March 18, 2008 at 5:42:51 PM GMT+8

2008 年 3 月 9 日 星期日 【晴】

今晚終於可以偷得浮生半日閒, 來寫一下日記..
ko 掉Chinese Computing的功課..
說到Chinese Computing, 就是那張Assignment Sheet 看了也會覺得火大了!! 我還想DHL功課給你!!
將Hard Copy 交到Blackboard 系統... 靠妖~~ 你叫我安怎交!?
還有FYP等著我啦... 偶快死掉了...

今晚還改好了一個網頁, 加了php, 可以動態的顯示圖片了..
快點收錢, 自從被城x大學都吸乾了老子的血, 老子變得很窮..
去了台灣之後就更窮了... 不過我是真的想去台灣的, 因為都很想到台灣吃...
這次台灣之旅收獲就更大了! 除了平常到台北都會滿街都是的"蚵仔煎(音:蚵拉煎, 從前就是不知道經常照國語音說) (http://zh.wikipedia.org/w/index.php?title=%E8%9A%B5%E4%BB%94%E7%85%8E&variant=zh-tw), 沙威馬(像熱狗)的, 肉燥飯, 這樣也樣的綠茶, 還有很多不同的冰.. 十一月去工作的時候就吃了麵線, 都很好吃.. 這次到台南可以說是更正點了.
不說其他, 就說棺材板就是夠好吃了.. 做法就是將厚多士(吐司)煎得很脆, 再將中間掏空, 將這部份放進餡料, 再像棺材一樣蓋上原來的板就可以吃.. 吃的時候先將中間的板都切成九份, 在弄點餡料一起吃...
還有鼎邊銼, 這個是米漿在鼎上蒸煮成形後, 加入其他配料成湯的一種湯
http://zh.wikipedia.org/w/index.php?title=%E9%BC%8E%E9%82%8A%E9%8A%BC&variant=zh-tw
都不錯..
還有度小月擔仔麵
http://zh.wikipedia.org/w/index.php?title=%E6%93%94%E4%BB%94%E9%BA%B5&variant=zh-tw
這個很好吃...
還有米糕 (不是玉米糕!!!!!)
http://zh.wikipedia.org/w/index.php?title=%E7%AD%92%E4%BB%94%E7%B1%B3%E7%B3%95&variant=zh-tw
豬肉糕 (這個我覺得很難吃!!)
http://zh.wikipedia.org/w/index.php?title=%E8%B1%AC%E8%A1%80%E7%B3%95&variant=zh-tw
差點忘記了這個碗粿:
http://zh.wikipedia.org/w/index.php?title=%E9%BA%BB%E8%B1%86%E7%A2%97%E7%B2%BF&variant=zh-tw

太多都不能盡錄, 自己去維基看吧!
http://zh.wikipedia.org/w/index.php?title=%E5%8F%B0%E7%81%A3%E5%B0%8F%E5%90%83&variant=zh-tw

都變了飲食日記了.. 歹勢啦.. 我還很想吃...

還有一件事, 台北去基隆一定不可以坐台鐵(火車), 因為實在夠慢, 要花一個多小時才到. 所以都要在台北車站外坐那個國光客運去基隆, 貴一點, 但是不用1小時就到了, 而且台鐵基隆回台北11時就已經關門了, 國光好像十一點十五分是最後一班車..

還有台灣的高鐵, 從北到南, 其實比飛機還要貴, 不過時間上比飛機還要快(加上進出機場的時間)

其他的可以到我或我老婆的facebook 看相..

如果這個月大家有時間可以去台灣, 因為機票真的太便宜了! 一位去台北只是$900(加$426的稅和附加費), 加起來只是$1326.. 太誇張!!!
===========================================================
剛換了電話, 我的老表給了我一支O2 Atom Life 的手機.. 功能很強, 可是一台隨時沒電的手機, 沒電的時候跟磚塊是一樣的.. 結果今天花了二百多才買了一塊電池.. 唉.. Nokia 本來就是不錯嘛....
我14:00起來開始工作, 當晚22:00就已經沒電.. 唉...

===========================================================
昨晚跟多位巴士大哥食飯(就是司機嘛)
發現這個世界奇人奇事真夠多.. 光說其中一位71A 的司機, 有一天他比原定的時間早走了三分鐘(俗稱打大)
之後再回富亨時, 站長修理他一頓.. 問他:"做乜打大? 後車做死啦..." 想不到那個司機居然說:"我係跟我隻錶.. 我隻錶係跟國際時間o既.."站長很氣:"我理得你金撈定膠錶, 總之要跟電子板(註: 富亨總站是有電子板顯示時間和下班車的時間)同八達通機..", 之後那個司機就走了沒理站長了...
還有另一次: 他出富亨總站後沒有停頌雅路的站... 結果被人投訴.. 可是那位司機居然說: "報站機壞左, 我唔知要停".. 當然最後又被站長修理.."報站機壞左就唔停, 咁你不如直飛總站啊!"

三月好像其中一班車是23:37從大埔墟車站開出....

>>March 9, 2008 at 5:53:26 PM GMT+8

2008 年 1 月 30 日 星期三 【晴】

呢排都係做緊縮頭烏龜, 而且有d 病病地, 本來唔想出聲屌人.. 唉.. 無計.. 香港太多人抵屌, 係時候要出黎講下野...

=========================
陳冠A事件...
http://forum2.hkgolden.com/view.asp?message=1114889

真係睇唔過眼班咩偽人話貼圖上網呢樣果樣..
咁清高, 晶哥d 戲你咪拍囉, 俾錢要你露點你咪唔好露囉.. 果陣你就話為藝術呢樣果樣..
好啦, 自拍閃卡仲要俾人擺埋上網, 又呢樣果樣.. 喂, 搞還搞你唔影咪得囉.. 唔影無人理你搞邊個同搞d 乜喎!
你班偽人可唔可以吹少緊水, 用心做好d 戲, 唱好d 歌先?

陳冠A 濫唔濫我唔知.. 阿gill 正唔正我更加唔知... 我只係知做得出唔怕認.... 學莫作棟探員話: "若要人不知, 唔好太低B"...
又要發聲明話移花接木, 又話要搵律師呢樣果樣, 唉.. 無影過咪唔使咁大反應囉...

如果你話擺閃卡上網果個有無錯, 我只可以話我都唔知.. 好難定奪.. 年年都好多周刊報紙影人走光露底但係又無乜人出聲, 但係對我黎講兩件事係一樣嚴重.. 點解d 師奶啊, 咩青光啊唔去屌下報紙雜誌, 反而屌d 上網自我慰藉o既小朋友呢? 定係班友仔掛住j唔記得左?

如果你要講咩道德問題, sorry, 咁應該係陳冠A道德有問題, 因為佢搞完咁多條女(咁濫!!)仲要留影俾自己欣賞, 除左有少少心理變態之外, 仲有真係要講句道德淪亡.... d 小朋友睇左之後學佢咁周圍搵女搞.. 嘩, 容乜易全香港果男人隨時周街俾小朋友叫"爸爸"!?? 話時話, 謝霆鋒都唔知係唔係小朋友個爸爸......

男歡女愛本是平常事, 大家可唔可以除左J之外, 寬容d對班女星? 反正已經係過左去的事實..

陳冠A.. 呢舖你仲唔hihi!!!!!!!!!

P.S. 佢真係好短!

>>January 31, 2008 at 8:37:46 AM GMT+8

2007 年 12 月 13 日 星期四 【晴】

人總會係想做一d 野去逃避考試....
所以我選擇左係呢個時候去寫日記...

話說一個月前同老表前後腳去台灣, 想[目及]台妹...
點知台妹[目及]唔到, 整機同整server 整左差唔多兩晚通宵..
加上去程飛機delay, 回程老婆強烈要求(當然自己都想快d 返香港, 留係台灣無覺好訓...)之下, 變左兩日四夜超值團...
(why 兩日四夜? 因為班機20:55 先去台灣, 去到人地都訓覺啦... 返黎仲搞笑, 上左10:00 班機返香港...)
今次專登揀華航, 時間o岩, 機票又平.. 加上起碼有架新機俾你 (A333)... 連稅先153x, 仲想點!!
雖然做野係辛苦.. 但係係台灣食野真係好正.. 仲要平果下先攞命...
雖然無一餐要自費, 但係一睇價錢牌.. 嘩.. 香港起碼一倍先食到.. 特別係日本菜同中國菜.. 真係難以想像一碗普通份量的麵係唔使十蚊港紙(NT $35)..

結果係台灣真正破財.. 就係買左部Eee PC.. (我仲未開箱... well...)

下年去多次... =)

返到黎香港... 同老婆去影grad 相... 可惜最後果日返到香港超攰, 所以返左屋企訓覺...

=====================================
呢期忙到痴孖根, 但係銀行就越來越少錢.. 我都唔明點解..
自從交左學費之後就即刻窮晒.. 跟住學校FYP 就催到好急.. 唉..
可唔可以出分身?

=====================================
仲有一件大事一定要講..
就係小弟嫲嫲過左身... 雖然同佢感情唔係好深 (我一年先返得一次半次鄉下)
但係始終係親人, 點都會有半點難過.. 我睇住我老豆, 佢又反而無乜野.. 可能係我背後喊我都唔知啦...
不過呢件事, 背後並唔係單純一件事...
係香港, 如果有人過世, 應該會由殯儀館統籌大部份事項...
但係係鄉下, 卻一個人一把口, 話應該咁做定係點做...
結果, 老實講, 我覺得成件事好不論不類...
有乜理由唔係吹d da (鎖鈉).. 搵班著到咁性感(雖然最後都唔係好性感)的樂團去唱流行曲黎哭喪?
無錯, 禮儀係要做足, 但係都唔好過晒火位先得架...

香港就話過頭七尾七.. 佢地.. 一百日都要搞儀式... 係果到死, 真係少個錢都唔得...
結果邊個受苦? 咪我老豆同d 姑姐囉... 唉.. 我真係睇見我老豆就覺得佢慘...
====================================
淫友前果排又返左黎..
不過幾日後咁又走左.. 來去匆匆.. 可能家陣機票平左...
當然, 最主要原因係果訪有錢搵啦..

====================================

>>December 13, 2007 at 7:49:34 PM GMT+8

2007 年 10 月 8 日 星期一 【晴】

呢期得閒少少, 上黎吹下水啦...
不過有幾多人會睇到呢?

呢期好興玩facebook.. 因為真係好多意想不到的收獲 - 好多失散多年的朋友都會搵得返..
例如samuel.. 真係一個好例子...
仲有YY2 班友仔, 因為咁都add 到....

結果尋晚收到有一個post 叫做Facebook song...
http://www.youtube.com/watch?v=2b-fJxzpK7s
15人合唱, 值得留意係無任何樂器伴奏.. 全vocal , 就好似當年去玩校際音樂節唱牧歌咁.. 好難唱但係好好玩..
(我記得另一隊係無出現到...)

==================================
今日想吹下港女食煙呢個問題..
有無發覺係香港好多年輕女性, 行行下街咬住支煙仔, 嘩, 屌.. 好難頂...
今日坐車就係, 條女坐埋黎, 著得好似好性感咁, 屌, 一坐埋黎成陣煙味.. 真係反胃...
望一望條女何方神聖, 嘩, 唔望由至可, 一望... 唔怪得要帶個極大的"烏英鏡"
成面都一達達, 又有雀斑.. 嘩, 唔著衫都唔知有無人會有興趣啦真係...
做幾多facial 就算換埋皮都無用...

講到d 女咁貪靚, 咁點解可以咁大犧牲走去食煙?
前果排終於被我諗到一個合理的解釋 - 可以減肥..
無錯, 食煙係真係可以減肥.. 因為佢嚴重咁阻止你的食慾...
點解我諗到, 因為我表哥一唔停煙就肥返...

估唔到女人可以為左一個"肥"字做埋d 咁唔理性的行為!

肥, 其實又點..
如果真係過肥, 醫生都自然會叫你減仲教埋你減.. (欣宜果種就係肥過龍, 因為傳聞話肥姐自從佢好細個已經俾佢食好多高脂食物)
如果你問我, 作為一個男人觀點, 我會答, 十個正常男人, 九個都鍾意有肉地的女仔..
(如果認同請立即係我日記留言!!)
點解..?? 當你攬實自己條女果陣就明, 成舊排骨咁, 真係驚大力少少都會散...
仲要條女成口煙味, 嘩, 除非個男人自己都食(不過由於物以類聚, 所以都應該係咁), 如果唔係真係十級難頂!
而且過瘦的女仔大多身材都係........ 如果唔係, 老一輩的人都唔會用"馬拉雞"去形容...
最慘係仲要走去加個pad 著bra-top, tube-top, 緊身tee 咁.. 頂.. 唔係嘛...
搞不好, 一個唔該潮流興上圍豐滿果陣又個個走去做"人造人34號"... 咁就真係"我能夠"啦...
不過可能最後又反撲歸真全世界鍾意自然美.. 咁真係........... 我已經諗唔到任何一個詞語去恥笑....

不過反過來又要怪某d 男人太過膚淺啦, 不竟有demand 就有supply..
但係如果某d 女仕又以為咁樣多觀音兵o既話呢,
我只可以學淫友果句: 咁香港遲d 又少班無腦o既 - 食煙都食死佢地啦!

食煙你知唔知有幾多後遺症?
如果食煙o既女士生BB, 個BB係比較大機會會有問題.. 例如發育唔健全..
男士第日你想做賊都難.. 心肺功能差晒.. 就算你外型幾muscular, 我搵日約你走去跑海濱我都隨時放到你影都無..

所以我好強調 - 做人唔好只係睇外表, 要講內涵.. (雖然呢個錯我都犯左好多年..)
外表ok 就得, 內涵先係最重要...
======================================
呢個星期開始, 終於少返d 整機job 做.. 前果排真係做死.. 點解d 人成日中毒...
呢期都係寫下program.. 做下功課(係唔係好少見...)
話你知, 我呢排連10:30 堂都上到啊.. 死未!
其實話就話唔鍾意返學, 但係有時返學係有好多做野無的樂趣.. 就係身邊一班on9同學..
特別要高度點名讚揚"鳴哥".. 無人可以好似佢咁on9...
咩"我能夠(on lun 9)"啊, 咩"一流一等(一樓一等)"啊.. 我真係唔知佢點諗出黎..
只要同佢一齊食飯, 保証無一餐食到野, 因為會俾佢搞到你笑到食唔到飯...

有一次仲要係lab 到大大聲俾佢話"你唔係做左回帶西啊..."
救命.....

>>October 8, 2007 at 7:53:46 PM GMT+8

2007 年 9 月 20 日 星期四 【晴】

回 龍儒
咪話你好耐無睇, 我都好耐無寫.......

==============================
見有人回, 好啦, 又寫下啦..
上一篇已經係新加坡旅行.. 今日講下呢期生活..

老婆已經返緊工, 連試用期都就快過..
但係佢的生活同我一樣, 好忙...
佢係佢公司的工作量似乎仲多過我..
因為我每日都仲可以十二點先起身.. 但佢? 返九點放八點.. 唉.. 睇到都心痛..
無辦法.. 呢個世代.. 每個人都係咁生活先可以係香港生存...

我自己呢? 一二三四五六七, 多勞多得..
日日都要走幾個地方做野.. 而且仲唔記得做功課.. =.='
FYP 進度唔錯.. 已經可以send 到中英文SMS ..
唔記得左講下個FYP tim..
我o既FYP 係, SMS application in QA web system..
簡單d, 就係係Yahoo 知識+ 加一個SMS 的問答.. 例如用戶可以用佢自己手提去問問題, 同埋睇人地reply答案.. 有些去用, 因為有時真係有緊急問題而又無電腦係手就ok 啦...
餘下來就係收SMS 同埋integrate..
無法啦.. 白痴人做白痴project.. 無乜大志, 只係想hea 過大學生活.. 快d 搵真銀..

呢期話說做左單蝕本生意.. 蝕到入肉..
"澤"住萬六蚊貨.. 原因只係自己7左, 買左d 唔o岩果個環境用的hardware (同IP電話有關的)
結果後尾自己攞另一舊錢出黎買過另一d hardware 搞掂..
不過講到尾都係7...

好彩之前有個客要左其中兩隻 IP Gateway (原本買左6隻)..
攞返8000蚊.. 咁先無咁傷..
不過好老實講, 真係賤賣技術... 我玩IP 電話都玩左差唔多兩年, 先做到而家呢個效果..
而且8000-2600*2 = 2800 落袋.. 只係好過無, 因為出面d 價高好多..
算啦, 攞得返錢已經好好.. 好過無左萬六蚊..
就係因為呢單野.. 第一次係番禺試搭地鐵3號線去廣州東站..
又係第一次試CRH1.. 真係夠晒和諧..
以前搭火車來往廣州到深圳, 停一個站至少都搞到要83 分鐘.. 但係CRH1? 停兩個站都只係63 分鐘..
極速201km/h.. 正! 認真和諧..
而且和諧到有餐卡(之前Txxx 特快取消左餐卡).. 結果我只係買左張二等座席飛 (比一等平10蚊) 之後就係餐卡飲飲食食咁度過呢一個鐘.. (p.s. 無乜人知道可以坐餐卡所以好多人買左一等飛)
講起廣深火車食野.. 如果大家有係小時候搭過, 有幾樣野一定係必食: 1) 龜苓膏 2) 牛肉乾 3)雞脾 4) 茶..
好記得以前細個同老豆返廣州.. 因為果陣有屎和諧號, 有屎SS8.. 當然返一返去, 深圳去最少都要兩粒鐘, 邊有而家咁方便.. 如果唔食野係好悶... 所以一定都會搵d 野飲野食..
Txxx 年代(而家係Dxxx年代, D = 動車組, Electric Multiple Unit, 而T 係特快 (Te Kui - 普通話併音, 唔知有無錯)無餐卡.. 咁點呢? 就係推車仔賣野食啦.. 我都試過食佢地20蚊一個飯盒.. 但味道就好一般..

點解我咁記得呢d 野? 原因只係因為 - 我個腦係用黎裝屎..
自己鍾意o既野就乜都記得, 唔想記o既野就乜都唔記得..
全香港路面點行, 有咩巴士去都大約唔多唔少會記得..
但係讀書d 野, sorry.. 我真係唔記得.. =)

=========================
至於搵錢.. 我都係覺得順其自然..
有客就有客, 無都無計.. 多得濟又係唔夠時間做...
少得濟, 又on lun 99..

>>September 20, 2007 at 7:44:34 PM GMT+8

2007 年 6 月 29 日 星期五 【晴】

Back from Singapura...

同老婆去左五日新加坡遊山玩水... 不過無落到水.. 真係可惜..

不過呢次真係有 d 失策... 第一個失策就係揀左Jetstar... 我到而家都覺得應該飛SQ...
無野食就預左, 但係連外面帶d 野都唔食得真係有點那個... 咁都唔係問題, 而且佢成四十蚊一個餐都唔係一個full set, 淨係得個主菜, 加一杯野飲真係...........
結果來回程都好肚餓...

第二個失策就係揀左間酒店.... (啊. 唔係. 應該係度假村)..
成五百蚊一晚, 居然係曹公潭的級數 (有d aspect 無呢種級數)
最慘係離市中心太遠.... 由Pasir Ris (巴西立) 到 CityHall.. 半個幾鐘MRT, 仲未計轉巴士去MRT站...
言則有Shuttle, 但係第一日去已經等唔到.... 迫住要搭的士, 或者SBS 354行入去...
(不過都好, 有得坐下香港無的單層熱狗.. Scania N113.. =) )
不過新加坡d 交通真係...... 你住開香港, 其實全世界無一個地方比香港的公共交通做得好..
夜少少, 你係香港有N線巴士, 日日有, 再唔係搭亡命小巴一樣得(好似尋晚係觀塘返大埔, 俾12蚊就有亡命紅小返大埔..)
係新加坡? 除左星期五六晚有NR巴士之外, 平時你都係坐的士啦!!! (最奇怪就係佢地Night Safari 係晚晚開....)

唔講咁多, 去故事.....
第一日:
果晚跟本訓唔著.. 唔係太開心, 而只係驚訓過龍... 七點就起左身(呢一年都未試過!!!)
去到機場.. 都無乜問題, 但係只係要買支水, 因為Jetstar 無水飲(unless you pay for it...)
咁貴. 我係機場買先6蚊HKD, 但係上到機? 3蚊.. 不過係坡紙... o shit..
原本仲帶左幾個飽去咬... 最仆街係crew 唔俾食... 即場o 晒.... 好啦, 睇下人地食乜跟住叫, 如果8蚊坡紙有一般航空公司full set 咁我都會俾, 因為實在唔貴, 就算係Skychef 成本價都差唔多, 但係如果只係得個hot meal.. 簡直係..............(ps. 回程果個海南雞飯更加要10蚊==50蚊港紙... 頂. 我去新加坡食只係兩蚊坡紙.. == 10 蚊, 而且份量好似差唔多)
結果我地搞到要偷食... 捱足三個幾鐘終於到樟宜機場..仲要delay 左..(慢schedule 20分鐘..)

之後搭車去酒店. 真係仆街... 搭MRT就ok, 但係MRT轉去酒店果程shuttle.. 17:15走左居然要19:00先有車... 結果搞左好耐, 搵巴士站啦, 結果都係搭的士..........
一去到, 嘩... 幾靚喎.. 全部都係一至兩層的度假屋feel.. 中間仲有個泳池...正喎..
點知一入到間房... o..... 真係同麥理浩夫人差唔幾... 其實我expect 好似係峇里島果d, 因為去過真係好q 正! 而且張床硬係好...... 唔知點講..
不過住落都係幾好, 起碼訓果陣, 望住屋果個超高尖頂... 真係好浪漫...

之後果日咁o既鐘數先去到酒店, 出得去都好晚... 幾本上都無野好做...
去到Pasir Ris 巴士總站, 正考慮搭巴士定地鐵...
見到有架518E, E = Express, 即係香港X線咁解, 諗住無死啦呢次.. 點知等左差唔多半個鐘..
上車.. 一d 都唔Express!! 結果個幾鐘先到Orchid Road.. 就咁行左一陣就算數...
之後去果個叫做老巴刹 Lau Po Sat 的地方食野.. 巴刹 = Market in Malay..
個food court 真係好正.. 只可惜海南雞飯的都關了.. 新加坡好奇怪.. 你係大埔, 你幾點都好, 一定有野食.. 新加坡d food court 食肆(因為GST的原因, 所以食店都係集中food court, 如果係酒樓果d 要俾GST同小費, 好貴!!) 到九點半就關得七七八八.. 救命.. 香港十二點都仲有好多未關!!
結果是但食d 野.. 食下沙爹串燒同埋大量刨冰.. 原本我老婆話唔食刨冰... 但係食左第一啖, 唔掂啦.. 同我一樣鍾意左刨冰.. 加上新加坡實在太熱, 加上好多地方都無冷氣, 所以刨冰絕對係必需品!
結果我食左兩碗刨冰同埋串燒同埋mutton naan 加黃薑飯.. 飽到頂住個肺咁返酒店.. 超正!!!

=====================
第二日: Escape + 坤記Kaya Toast + 咖喱魚頭 + Night Safari
一起身就去到非常之近酒店的Escape Theme Park 到玩.. 呢個theme park 最得意之處就係 - 假日先開, 平時係close.. 你話.. 不過即管如此, 事實上都因為Escape 太細, 仲細過香港Disneyland, 所以先搞成咁, 其實入到去玩乜都唔使排隊..
結果我玩左個飛下飛下的.. (唔係好勁).. 我地兩個玩左Haunt House(比以前山頂果個或者海洋公園果到都差.. 以前玩真係驚, 但係呢個真係無驚過.. 我老婆就驚到震...)
仲有Water Log (佢一路玩一路驚..), Go-Kart (玩完佢就鍾意左呢樣野), [手查]船(仲可以互射水.. 好過癮!!)
兩個鐘左右就走左啦...

之後等我堂哥(其實應該係表哥), 不過佢大足我十年有多.....
佢係香港人, 移民左去新加坡都十年囉...
佢同佢老婆同兩個女都有黎一齊去街... 結果...
我地想去一間野到食呢個Kaya Toast (咖央醬多士).. 最初我老婆都唔知呢樣野係乜, 佢見我攞好多Kaya返去, 都問我做乜..
佢地結果睇住個地圖, 繞左好多個圈先搵到間野係邊.. 點知一去到.. 收左... 頂!!!!!! (可想而知新加坡d 交通同道路網有幾好!!)
不過好彩有間更出名的亞坤(http://en.wikipedia.org/wiki/Ya_Kun_Kaya_Toast)就係對面馬路.. 馬上過去食..
一去到食.. 嘩, 正.. 香港唔係無Kaya.. 你去超市一樣買到楊協成出果隻.. 只不過果隻係橙色, 無班蘭葉(pandan leaf)同埋落左色素, 所以無咁香! 所以去新加坡一定要食同買Kaya.. ( http://en.wikipedia.org/wiki/Kaya_(jam) )
(p.s. 點解我會知咁清楚? 因為我阿媽係印尼長大的.. 對東南亞食材我都一定會俾佢灌輸到..)
結果我老婆又係愛上左Kaya.... (佢係口口聲聲話唔食, 結果又係食完就鍾意..)

之後原本諗住去新加坡知新館.. 點知原本搵資料果陣係七點關門, 結果去到發現係六點... 啞晒...

之後就去East Coast Park 到食咖喱魚頭.. 超正.. 雖然我唔係咁食得辣但係真係超正...
仲有呢個柯打(唔係Order, 係Otak http://en.wikipedia.org/wiki/Otak-otak ), 係魚肉包係個蕉葉入面, 烤黎食.. 超好味..

食完之後, 我阿哥車我去Night Safari 就走啦..
我地兩個去到, 呢個地方真係好正.. 有一種好似非洲的感覺.. 首先佢有1 個show 係動物show..
佢個氣氛帶得好好, 仲整d 人做意外出黎.. (例如專登扮到唔見左條蟒蛇.. 真係嚇親...) 同埋好多動物飛黎飛去.. 好過癮...
之後你就可以去坐架車一路入去一路睇動物.. 有d 動物仲會係你身邊咁.. 當然你唔可以伸食手摸佢...
其中有個站落車(其實你係可以行路, 沿住條walking trail 入去)行返walking trail 睇更多動物.. 但係因為太黑, 老婆越行越驚.. 幾次仲驚到叫左出黎.. 算啦.. 無謂嚇親d 動物.. 結果都係搭返tram 返去.... =)

行完成個Safari.. 搭車去最近的MRT 站.. 結果係無車返去Pasir Ris.. 結果.. 搭左成舊水港紙的士返酒店.............................................

第三日 小印度, 新加坡國家博物館, 聖陶沙, 牛車水
好眼訓的一日, 唔知點解今日咁攰.. 成個人超攰.. 行都唔想行... 可能真係訓慣左...
不過仲記得係小印度食左一餐正宗到幾乎要用手食飯的印度餐(當然叫店員俾刀叉我地...), 入去食飯的大部份都係印度人...
入到去見到餐牌, 都唔知係乜, 咁惟有就係睇下人地食乜, 自己又跟住食乜...
結果亂咁指, 都有好野食, 雖然係辣d... 我果個Curry Mutton (羊) 都好正... 但記住係無豬的(有d 係無牛)
所以最穩陣都係叫雞或者羊或者魚..
我老婆叫左個餅, 有d 汁, 都幾好味..
之後行左小印度一陣, 因為太攰, 無乜心機行..
之後行左去一個都ok大的百貨中心, 但係因為係小印度入面, 都係太過印度式, 所以空手而回..

行左一陣, 就搭車去新加坡國家博物館..
講起呢個Museum 就真係激鬼氣! 原本旅遊書就話呢個歷史博物館仲健在..結果搭車去到果個車站, 問人, 佢話執左, 仲話變左唔知乜野... (我聽唔明singlish.. sorry...) 仲叫我地搭去下個站..
去到下個站, 去到出口一睇張街道圖, 咦? 明明仲係到, 但係懶得搵, 所以去左搭的士(當地叫"德士")
同個司機講, 佢都唔知個博物館係邊! 之後去到個類似博物館的建築物到問人, 先知真係執左, 仲同國家博物館合併埋..
結果最後去左國家博物館... 好彩, 有學生飛同埋真係超多野睇, 值回票價!!
博物館都係用Audio Guided System 去做導遊, 由新加坡起源(唔記得邊個蘇丹發現到呢個地方-->英國萊佛士租左佢返黎-->WWII 日本仔佔領-->李光耀)到民間都有講, 我特別鍾意佢對食物史都有講, 連海南雞飯的起源都有專題展覽.. 幾pro.. 香港歷史博物館都應該學下人地咁, 講返d 一盅二件的起源, 點解要食乾炒牛河咁, 咪學星洲d 膠野, 例如GST!!! (聽聞仲要由5% 加到7%)
結果係睇唔晒d 資料, 就走去聖陶沙...

以前去Sentosa 只可以坐Cable Car, 巴士或船, 而家就可以坐Mono-rail LRT入去啦!
由Vivo Centre 入去, 好快就到, SGD$3 包埋入島費... 不過, 每個活動都要收錢的!!
例如呢次為左佢入去Sentosa的4D 影院.. 盛惠每位80蚊港紙.. 短短20分鐘好似好唔值..
但係真係好過癮.. 4D 係3D 再加上實際環境感觀.. 例如有人係你面前噴水真係有d 水噴係你塊面到,
或者有一堆蟹埋黎夾你, 有d 野會整你隻腳咁.. 好過癮.. 不過結果嚇親細路, 搞到佢地係到喊.. 哈哈哈!!!

睇完之後諗住仲有時間去睇果個Song of the Sea 果個show.. 後尾總算剛剛好..
不過記住, 又係要俾錢的.. 哈..
不過非常值回票值.. 因為佢係一個laser show+歌劇, 而且可觀性係比果個咩幻彩咏香江強勁得多.. 咁始終人地要收錢, 同埋真係專登係個海灘外面搭左成個景+laser + projector + 噴水設備 + 噴火設備, 唔係野少...
不過由於去到Sentosa 太晚, 結果最後淨係在Merlion Lion 外面影左一張相就走左... 好多野都無玩到...

最後就係要醫肚... 諗諗下不如去附近(都幾個站地鐵)的牛車水 - Chinatown 到食.. 見旅遊書講到咁多野食咁.. 又話咩18間政府挑選的食肆... 點知.. 執左幾間, 好多收左檔.. 唉...
結果去左Smith Street 出面一間叫做中答魯起骨海南雞食, SGD $2.2.就有交易, 雖然唔多, 但係好正下! 特別在果個海南豉油.. 香港無可能食到呢種味道... 之後試左薏米水.. 點知原來係Cream Soda 味.. 我地兩個都唔鍾意Cream Soda.. 所以...
之後去返Smith Street 食野, 呢個煎蠔餅, 炒蝦麵, 好多都好精彩.. 我地仲試左果個紅豆冰.. 只可惜老婆唔鍾意果種椰糖味... 結果我一個人食晒!

第四日 新加坡空軍博物館, 玩具博物館, 牛車水原貌館, 牛車水, Clark Quay, Merlion Park
第一站係去新加坡空軍博物館, 呢樣野香港一定無.. 不過果個博物館真係無乜人去..
就係展館睇果幾架飛機都已經非常好睇... 雖然係舊野, 但勝在夠真實..
連d 導彈都有得睇!
至於展覽館就講新加坡空軍的歷史同運作. 都值得一去. 不過真係太熱同太晒啦!!

之後去果個玩具博物館, 雖然名叫玩具博物館, 但係都係圍繞1d carton figure同細個時候會玩o既野, 例如mickey mouse, batman, 007 figure etc... 仲有d 細個的太空船玩具啊.. 甚至毛澤東figure..
幾得意..

其間我地仲去左一間食海南雞飯好出名的逸群, 同埋食Kaya Toast 的(我唔記得叫咩名..!)
只不過逸群d 雞. 好似有d "鞋"..

由於尋日無行到牛車水, 所以今日再去多次.. 我地去到幫老婆個阿嫲買果個毛雞油...
之後去左果個牛車水原貌館到睇, 內容大約係華人係新加坡的血淚史..
至於牛車水點解叫牛車水, 係因為當年果到係用牛車去運水供應牛車水的, 所以就叫牛車水..
當然而家過得去的中國人都唔一定會留係牛車水, 亦都無乜血淚史可言...
其實果到60年代都有d 似60年代的香港.. 無論生活, 社會環境... 好熟識的感覺, 當然, 香港唔會有咁多馬拉人..

睇完原貌館, 見仲有時間, 所以左Chinatown 就近的food court 食, 呢餐無乜印象.. 因為無乜特別..
但係之後去Merlion Park 果程車.. 真係印象深刻...
原本諗住快d, 走去搵的士搭.. 點知.. 仆街到係的士都唔停..
香港d 的士見到黃界, 快快趣趣停埋俾你上, 快快趣趣開車走人...
係新加坡? 無人會停俾你.. 唔知係果到好搵得濟, 定係捉得緊得濟.. 定係佢地電召的士文化深得濟..
之後行到去一條橫行諗住有的士, 點知全部都係on call.. 呢舖我真係on9...
結果唔覺意行左去另一個地鐵站.. 結果決定搭巴士去...

其實Clark Quay 就已經係Merlion Park, 果到就係原裝正版, 會噴水果個Merlion (Sentosa 果個只係一個觀光塔).. 不過影唔到相, 因為水花會去閃光燈有反射, 結果乜都影唔到.. 不過絕對值得一去...

晚飯又係萊佛士坊搞掂...


Last Day - 樟宜村
原本諗住唔去其他地方, 不過原來間resort checkout time 係10:30 (過份, 我先o岩o岩起身!!!)
結果就飛去check out.. 唉...
見仲有時間淨, 就去就近的Changi Village 到睇野.. 其實都無乜野睇, 只係一個小邨鎮, 同埋一個海灘..
係果到food court 食左d 野, 之後就去附近Changi Beach 行下... 環境真係一流.. 只不過.. 其實埋藏左一段非常恐怖的歷史 - 當年二戰日軍進行肅清行動, 係果到處決好多中國人..
影左幾張相就走啦...

返酒店攞返行李, 之後就去機場...
我都擺左個大烏龍.. 就係發現新加坡都同香港機場一樣, 只可以帶100mL liquid.. 結果.. check-in左先知.. 仆街啦, 幾乎連d Kaya 都要丟.. 好彩老婆有多一個袋, 結果要當第二件行李..
之後發現班機delay 左... 原本唔夠時間, 變左多左好多時間...

諗住去食Burger King, 結果比想像中貴超多... 無啦, 結果又係Kaya Toast..

又係三個鐘的悶死人機程返香港....

==================================
Photo Album:
http://www.facebook.com/album.php?aid=8255&l=a74c8&id=552362002

>>July 10, 2007 at 7:54:29 PM GMT+8

2007 年 6 月 11 日 星期一 【晴】

真係好耐耐耐耐無寫日記.. it is my fault...
其實唔知點解無乜心機寫... 因為個腦呢期唔夠澎湃... 無乜特別浪潮... 還是每天要想想點先可以賺多d 錢... 其實都幾攰.. 呢排都係三點幾四點先訓.. 當然早上仲係同周公傾計.. 一點左右起身.. 一起身食完野就出去啦...

前果排有同學係email 到話叫我一齊join facebook.. 咁我諗都無諗就join 左.. 咦.. 原來又幾好玩...
之後我就真係搵返以前莫記同YY2 d 相擺上去...
有時搵返d 相.. 咦.. 原來我曾經何時都叫做有d 成績架喎..
好似F.1 果年攞過澳洲新南威爾斯果個學術獎(總算有300落袋, 不過我老婆係唔係都攞過?)
F.2 就勁囉.. 果年HSBC 全靠有班師兄, 所以攞左HSBC IT 常識問題比賽冠軍..
F.5 都參加過當年的全港中學生常識問題比賽.. 都上過下鏡架..
由中三到中六都係電腦學會/ITST 的要員..
中四到中七都係電腦學科獎的得主..

我唔係要晒命.. 只係覺得, 以前的自己原來都有d 成就.. 只不過無同我老婆分享.. (當然, 都無咁o既機會)
但係當我係最梅的時候, 老婆卻係我身邊支持我...
算唔算係天意弄人? 有時我都覺得有d 對唔住佢...

===========================
今日同班大學同學出去食飯..
其中一個同學講返佢以前女友的事.. 我真係心諗, 嘩.. 點解我同我老婆一齊兩年幾, 我真係唔知女人可以咁麻煩? 佢話, 女仔鍾意係人多的時候, 個男仔企係佢後面..嘩, 我真係唔知... 我老婆都話唔知有d 咁o既事...
唉.. 無野啦.. 似乎我地真係無乜點拍拖......... (拍拖呢兩個字有d 難定義...)
當然, 咁我梗係更加明白我老婆有幾好...

仲有就係, 好期待去新加坡... =)

如果各位有facebook, 就add 我啦.. 你可以係個search 到打"Jason Chan".. 應該唔難搵.. =)

>>June 11, 2007 at 7:53:27 PM GMT+8

2007 年 4 月 27 日 星期五 【晴】

Today is a fine clear day..
非常適合考車牌..


經過二十堂, 十五個鐘的訓練之後, 今日... 就係見真章的時候了!!

下午一點:
上左架74A.. 慢慢碌去黃大仙等師傅...

下午二點:
"師傳, 好lun 驚啊!!!"
"驚咩啊.. 唔好諗咁多.. 開車啦!!"

下午三點:
入到去俾身份證, 學神牌, 考車紙..
之後上車等...
(同考牌官講)"我已經作好考第二次的準備...."
(考牌官O左咀...)
(我): "Here we go!"
(考牌官) "出路口轉左..."
(考牌官) "哎啊.. 由於左面左多車, 我地會係左面斜路做掉頭..."
到上斜果陣
(架車): "轟... 轟.... 轟....... (註: 起極力子起得太高)"
(我心想): "仆街啦呢次... 含得利象皮糖啦...."
(考牌官): ".........."
死死地返到試場:
做足晒拉手掣, 空波, 熄匙, 後波後, 佢咁就落左車.. 之後我都跟住落左車...
腳都震埋...... 之後入返去等成績... 簡直係驚.. 雖然都知死梗..

"陳業豐"
好啦.. 受死啦...
"拿" (之後就咁俾晒d 野我)
"成績呢"
"係張紙到囉!"
(我心諗: 仆街啦.. 俾返張學神牌我? 咁咪即係含左糖?)
點知一睇... pass 晒... 唉.. 好彩.. 名乎其實的碌過...
其實中間有一段路, 果班仆街擺晒d 車係條路到, 我係有一個位對面有車過唔到, 又已經返唔到條行車線左邊停.. 我只好原地停車, 預少少位..
結果俾佢tick 左一項輕微錯誤... 不過其實張分紙係滿佈tick.. 全部都係輕微.. 好彩.. 如果唔係tick 多幾tick 就真係要重考啦!

之後有個人(其實係佢地教車師傅工會d 協助員)同我講: 咁你要請師傅飲茶啦!
我都覺得一定要...
之後同師傅一路吹水, 佢話: "屌, 我都話你得架啦.. 你成日驚呢樣驚果樣.. 驚乜啊.. 而家咪搞掂左囉..."
得啦.. 而家就係等五月九日去沙田俾錢攞牌.. 不過考完牌又覺得, 馬路真係幾危險.. 考完真係諗下點先[手查]車...

當然, 其實所有野都係師傅教得好, 我敢講, 如果去HKSM一定唔會有呢種效果, 只係用十五個小時學車就一次ko 佢.. 點解? 因為試場係條街, HKSM 只係有部份時間係條街, 仲有大量不切實際的模擬定講堂.. 老實講, 點都唔夠你[手查]架車出街攞經驗實際.. 你試過學緊車飛龍翔道飛70km/h 未!? 你試過會俾學車導師叫你.."俾多d 油, 行快d.... 轉四波啦.." 呢種快感未? (p.s. 我都試過係太子道飛60km/h.. 好lun 爽!!)

而家就只係差Wong J 啦.. 佢同我跟同一個師傅, 過多幾日就知道佢考成點...

呢期學車總共用左:
$1050 (筆試同路票) + $2000 (頭二十堂學車) + $ 850 (今日又練習左一個半鐘, 同埋考試租車費) = $3900!
我諗呢次都算慳啦...

Wong J.. 加油啊.. 我睇好你!
P.S. 如果想學車, 我絕對誠意推薦呢位師傅俾你!!
=========================================
今日一返到屋企, 見到張咁o既野...




點解會有張城記的支票..
其實係某日我走去搭171 返九龍(p.s. CTB #404)
我明明上左車果陣已經do左八仔... 果條仆街司機又話我無do..
好.. 我死死地氣出去do 返.. 因為照九記慣例, 15分鐘內不可以兩次do八仔..
城記我記得改左, 因為佢地on9 地將A12同S1 group 左同一組, 即係話我如果15分鐘內, S1 上車落車之後搭A12係會唔使俾(應該話俾唔到)錢.. 因為佢以為你俾左, 結果城記將八仔機的timeout set 左3分鐘..
好啦.. 我諗住未過三分鐘.. 點知最震驚係, 居然有扣多次錢... 我O晒...
我唔憤氣.. 我一到紅磡落車轉火車之前, check 卡.. 一睇之下真係扣多左次錢...
第二日一起身即刻打上台同佢講... 之後第二日已經話check 到有問題.. 咁都好d... 好過攞唔返..
大拿拿十個六啊.. 食到一餐飯架啦!!
所以聽日都係入左佢...!!!
其實我仲有一張九巴的三個半支票, 原因係因為我有次74x->98A.. 突然間無左轉乘優惠.. 所以又攞返張...

=============================
哎啊.. 唔記得左祝大魚生日快樂tim!!

>>April 27, 2007 at 6:09:04 PM GMT+8