2004 年 8 月 11 日 星期三 【晴】

今日訓到11點幾,起身食左brunch(阿媽懶煮兩餐),跟住下晝1點幾出去左梓為度,佢部腦中毒幫佢整,應佢要求都係好簡單既幫佢format同裝番windows,跟住幫佢裝埋ad-aware,pc-cillin同開番firewall,跟住又幫佢update埋個windows,整到4點幾搞掂,梓為要出旺角搵fd,我都去左莎度搵莎. 去到carrie都o係度,原來佢病左..放榜先病,好彩學校收番佢唔駛頻撲. 夜晚online睇forum,睇d關於會考既post,睇左好耐,跟住打埋日記,打打下個icq birthday reminder響,一睇係阿舜..一時唔知點,15號就係佢生日.. 新一期(第39期)《蠟筆小新》出左啦,我今日一見到就買左本黎睇啦.

>>August 14, 2004 at 6:35:10 AM GMT+8

2004 年 8 月 11 日 星期三 【晴】

大家估下幅圖係咩意思? 日本地鐵告示： 答案分別係： 乘客應讓座予手受傷、抱小孩、孕婦、腿受傷的乘客XD,留意幅圖下面有"優先席"既字樣

>>August 12, 2004 at 4:27:20 AM GMT+8

2004 年 8 月 10 日 星期二 【晴】

今日8點起身,跟住勁趕核洗換衫仆番學校,今日阿正佢地放榜,9點左右番到去,好彩仲未派,等埋我=P.. 雖然今年個會考放榜唔關我事,但我都一樣等到咁緊張,去到聽校長話阿正好似有18,9分,搞到我同sally都好緊張..9點零開始派成績,跟住手機響個不停,因為hety,fiona又派成績,都打左俾佢地.之後梓為又打黎問阿正考成點,阿正好勁,考到19分! carrie,阿敦都有13分,夠分升番九記,不過要等聽日先收得..阿正就填晒d表同交錢,佢總算一吐烏氣,吐氣揚眉啦..中六努力!睇完放榜自己都驚出年高考唔掂.. 12點左右離開學校,因為阿正搞掂晒,carrie同阿敦聽日都應該冇問題..跟住同莎去左新世紀食lunch,食lunch果陣見到雨打落頭頂既玻璃度,好靚,莎話好浪漫..年年放榜都落雨-__-". 之後逛左陣,電話傳黎阿甄仲o係觀塘果邊撲緊學校..跟住夜d知道阿甄原校都收番佢,hety亦入到佢想入既莊啟程,太好啦,皆大歡喜..今日都幾開心,冇人愛. 夜晚同二佬,duo,羽仔玩久違了幾日既rainbow six. 各位未搵到既朋友都努力啦..god bless you.

>>August 12, 2004 at 4:12:07 PM GMT+8

2004 年 8 月 9 日 星期一 【晴】

今朝8點幾番到學校,今日又要補課啦,補中史.第一個番竟然係阿柴,佢似乎有d唔開心.9點左右d人番齊,除外sally同toto病左冇番. 今日要測驗,測驗之前miss yim俾左d時間我地溫下書,跟住emily猛笑阿柴"命中註定",emily有所意思話劉浩龍首《舊人》句"男友 是新的好"講得有意思,跟住阿柴..XD. 今日個測驗又夾硬吹,吹到天花亂墜,肯定壓死唔少人..跟住極度眼訓之下聽書聽到12點15分(只怪自己尋晚玩winning 7玩到4點XD).. 下晝搵左莎食飯先,佢似乎好番d.跟住同佢出尖沙咀,佢要拎番工d野.拎完先2點幾,同佢行尖咀行到5點幾6點,去左食oliver super sandwiches.之後再去佐敦間好好食既麵包店買左d芝士球,莎又買左隻擺背脊睇書用既毛公仔. 搭車番去搭左架冇冷氣的,勁熱..又塞車,搭到焗桑拿咁-__-". 聽日會考放榜啦,好緊張我d再戰重讀好友既成績!

>>August 10, 2004 at 4:57:25 PM GMT+8

2004 年 8 月 8 日 星期日 【陰】

今日訓到12點先醒,起身即刻打俾莎,佢果然未醒,今日約左佢去睇戲..但結果俾阿媽屈埋我食飯先再出去,我1點55分到新世紀,莎仲早過我到,齣戲2點開場,岩岩好-__-". 上到6號院門口等左陣,發現有d唔對路,張票寫2點開始,但係過左都未入得..一問之下原來轉左院,因為我地上星期五買落,所以轉左院都唔知,好彩去番2號院果陣套戲仲未播. 坐左幾分鐘套戲就開始,我地去左睇《導盲犬小Q》,套戲都幾忠於本《再見了，可魯》既原著,拍得幾寫實,真係睇緊小Q既一生,想睇戲既就sorry lu,套戲冇咩戲劇既位,平鋪直敘為主,間中引你會心微笑,基本上套戲想你感受佢真實既一面,所以我覺得都幾真摯感人,同埋睇果陣應該代入到個故事,咁就好睇好多喇,完場走果陣見到有好多有愛心既人喊=P. 雖然齣戲冇咩劇情,冇高潮位,又冇咩連貫,有種好鬆散既感覺,但係呢齣戲難得唔商業唔花巧造作,唔特登煽情濫情,原因就係佢想表達呢個係真人真事改編,有d位都幾真摯賺人熱淚,所以我都推薦大家去睇. 睇完同莎逛新世紀,逛到6點走.

>>August 10, 2004 at 4:43:30 PM GMT+8

2004 年 8 月 7 日 星期六 【晴】

今日訓到11點幾起身,跟住食左個好飽既早餐(即係又冇lunch-__-"),下晝同梓為玩左陣cm,跟住佢玩玩下又唔玩,之後就icq同msn,又做下中史既功課. 大約到6點零屋企多左好多人,勁嘈..好虛撼..原來阿婆,仲有阿姨,三姨,三姨丈同佢三個仔女,二舅父舅母同佢兩個仔女都先後黎左,搞到原來好細既屋企又熱又迫,阿媽都先鍾意肯開冷氣招呼人. 到食晚飯果陣,坐左一張大檯都唔夠位,碗同椅又唔夠分,真失禮-__-".食完就番房,做左少少功課,跟住阿妹同d表妹入左房話要玩電腦,開左低b版炸彈人俾佢地玩,最後自己都抵受唔住誘惑玩埋一份=P.

>>August 10, 2004 at 4:10:07 PM GMT+8

2004 年 8 月 6 日 星期五 【陰】

今朝訓到11點幾醒,起身食左個lunch,跟住下晝同梓為玩左陣cm玩到3點幾,跟住一路icq,msn同玩下小遊戲,直到6點鐘落樓買左d小食醫肚,好鬼肚餓.. 跟住搭船過北角,今次懶得行,落地鐵站搭地鐵去太古站,大約7點15分到太古城.跟住等莎同阿甄收工,之後就搭地鐵番去先再搵野食. 點知我地又有白痴野喇,傾計傾到唔記得落車,去左九龍塘站,結果之後要搭番去樂富站. 跟住由樂富行去莎度,上到去睇中國對日本,中國打得唔錯,但最後輸3:1..果球手球成為左賽事既轉折,中國輸得唔抵..不過都有d技不如人既.. 之後同莎去食晚飯,去左元綠食壽司,之後送佢番去就番屋企. 今晚阿妹有白痴野XD.話說佢個fd叫佢出廳睇恐怖電影《陰陽路》,跟住阿妹關左門一出左房冇耐就尖叫,嚇親我.. 跟住見佢衝番入房,原來佢開電視果陣發現飛蟑螂(小強),佢猛話好大隻,跟住唔敢出番去,之後要我出番廳熄電視-__-",番房就上網整個日記. 今晚snoce飛lu..過到去英國(?)努力d啦~

>>August 10, 2004 at 4:16:32 PM GMT+8

2004 年 8 月 5 日 星期四 【雨】

今日中午去左補習,落勁大雨,仲諗住可以紅雨唔駛番.補到1點45分左右走得人,跟住同莎去搵野食,食埋lunch同莎逛左陣就送佢番去.跟住o係佢度玩左陣炸彈人,6點幾又同佢出尖咀,勁塞車,搭左成個鐘咁滯..跟住我去左海運底玩具反斗城隔離間新開既ps 2試玩店玩,莎去左搵佢d小學同學. 果間ps 2店擺左7,8部機出黎俾人玩,每部都promote緊一隻game,例如有奧運,洛克人,打鼓game,魚仔等等,隻魚仔game幾得意,仲要係有中文版,唔驚睇唔明,跟住又過左玩具反斗城玩xbox既賽車,玩到8點幾莎搵番我走,跟住行左去佐敦買野,之後同莎食埋飯就走.夜晚好醒join左rainbow玩,之後同梓為cm,cm到4點幾訓著左-__-".

>>August 7, 2004 at 4:36:17 AM GMT+8

2004 年 8 月 4 日 星期三 【陰】

今日訓到11點幾,跟住打機打到2點幾.之後snoce打黎約我同莎今晚出去食飯,因為佢後日就走.傍晚6點幾同莎搭車出旺角,去到旺地恆就已經見到佢地,有snoce同佢男朋友,阿澄,catherine. 跟住等左陣vivian,之後等極都唔見我地就去四圍行搵野食先.先去左新之城,莎提議食韓燒,跟住就四圍搵,最後去左瓊華樓上既漢陽苑(?)度食,上到去掃定d食物,擺到成檯都係,擺到vivian同佢男友黎埋,跟住就開始食. d野食幾好食,原來我地都幾大食量,食完成檯都仲可以出去再拎過,食左3,4輪野-__-".之後食到飽飽地,坐低傾下計,跟住最後影左ok多相,由8點幾食到11點零,飽到傻..莎臨尾仲好擦得,技驚四座.見夜埋單之後11點幾就走.

>>August 7, 2004 at 4:28:03 AM GMT+8

2004 年 8 月 3 日 星期二 【陰】

今日番學繼續做戲俾班中一睇,10點半左右番到去,排左一半支畫筆道筆壞左,臨急臨忙搵膠紙黎黐.黐完d人都黎晒,好彩無驚無險順利演出,今日都係最後一日,唔駛再番黎排戲lu. 下晝同莎去食飯,食完下晝本來諗住出去行下,不過好眼訓,尋晚玩cm玩到5點先訓,所以下晝用左黎訓晏覺.5點零同莎去百佳買野,之後試左街頭小食,都ok好食. 夜晚番到去食埋飯又同阿妹搶電腦,呢排佢迷上icq同msn,搞到成日同我爭電腦,10點幾先拎到電腦,同梓為玩左陣cm,之後玩rainbow.

>>August 4, 2004 at 6:18:03 PM GMT+8