2004 年 11 月 20 日 星期六 【晴】

今日下晝1點左右去左suyi幫佢整電腦,都話電腦也流感架啦.. 去到check火牛,果然著唔到腦,跟住拆左好耐先開到機箱,因為佢果部係廠機.. 廠機真係多機關,不過逐步逐步咁解好有成功感.之後裝我帶既火牛既試,郁到喎..果然係火牛問題. 但最慘係隻火牛大得滯,唔岩size..跟住同suyi落去附近d電腦店睇,都係冇佢果隻迷你火牛.所以番上去幫佢砌番機殼就算,等suyi買新火牛先幫佢裝番啦. 之後去搵莎,佢又勁買絨布整公仔,成個下晝睇住佢整,我結果去玩三國志十. 夜晚6點幾7點番屋企食飯,食完做左陣功課打機.

>>November 22, 2004 at 2:49:56 PM GMT+8

2004 年 11 月 19 日 星期五 【晴】

今朝10點半同莎去觀塘補習,補完同莎去九龍灣食lunch,食目黑..幾平又幾好食. 食完o係淘大逛左陣,莎迷上左戟絨手工..之後又同佢去黃大仙同四哥佢地飲茶,飽上加飽. 番到去莎落街買材料整戟絨公仔,我打三國志十. 6點幾佢拎住個好得意既蘿蔔公仔送俾我,原來係佢既第一件製成品,好有板有眼. 之後落去食麥記烤餅crossover kfc炸雞,番到去佢又埋頭苦幹整左隻熊仔.

>>November 21, 2004 at 3:11:02 AM GMT+8

2004 年 11 月 18 日 星期四 【晴】

今日測左兩個驗.. 番到去頭兩堂文學聽住書溫下中史同快手作左片段寫作,之後文化堂都係邊溫中史邊聽書. 小息又溫左陣,跟住果兩堂就測中史,寫到手軟. lunch同莎去喜悅軒食,之後佢番屋企拎野..番到學校1點15分,玩左round uno(兩日前後三連贏=P),跟住去交野俾miss Lui同楊sir. 下晝空堂,頭一堂速成溫書,第二堂同toto去補測.跟住last果堂做文化作文既謄文. 放學去彩虹拎學生地鐵乘車站,其實都幾弱智..中學臨尾果年先黎申請..不過冇計,地鐵好貴. 放學同toto搭1A走,o係坪石村個站落車再行過去,5分鐘左右..拎左新既八達通之後就賣左舊既佢,有d唔捨得..唔知中幾用到而家,都甩晒色lu.. 走果陣搭地鐵去樂富,唔係特登想開齋用下佢,我屋企果邊冇地鐵站,根本用唔著,只不過係因為黎果陣同toto見到啟德大塞車,結果搭地鐵落樂富轉巴士. 結果都有d塞,不過起碼快過啟德果條路好多,原來又係上次宋皇台果頭,又整路..今次好誇張,有15架交通警察電單車,2架警察私家車.成條路都係d交通警指揮,一路落到馬頭角道.. 5點零番到去,夜晚出去搵莎食飯,仲塞緊-__-"..同莎又食喜悅軒=).

>>November 21, 2004 at 3:10:53 AM GMT+8

2004 年 11 月 17 日 星期三 【晴】

今朝起身好涼,搞到我唔願郁遲左出門. 好豪咁搭的番學,點知一係唔搭,一搭遇到怪司機.. 個司機眼神勁恐怖,不過最恐怖係佢左手扶軑盤右手拎住罐生力啤! 今朝呢程車搭得勁驚險,佢無厘神氣咁開,好彩唔快,最頂癮係佢邊飲住罐野邊開車,咁都不特止,跟住仲要o係架的士度"噁"氣,勁臭..又唔敢開佢d窗,可憐既我一朝早就俾人折磨. 之後番到學校第一句就係同莎講差d見佢唔到XD. 今日d堂又癲倒,上左兩堂文學堂,跟住文化堂玩小遊戲,幾歡樂..小息鋤uno.跟住兩堂英文悶到訓著左,呢兩年黎首次上到訓到咁-__-"(中五果年訓到咩咁XD). 下晝中史堂之前阿柴訓到唔識醒,要miss Yim親自行走課室叫佢,跟住場面十分爆笑XD. 最後兩堂空堂做下功課.放學去library做功課做到5點幾走人. 夜晚執jupas d野.部電腦呢兩日都冇咩野,睇黎之前係撞program,不過都係睇定d好..

>>November 18, 2004 at 3:13:48 PM GMT+8

2004 年 11 月 16 日 星期二 【晴】

今朝起身7點幾,發現電腦未熄,裝埋個windows XP之後又訓過. 9點半莎打黎叫醒我,今日約左suyi,rebecca去唱k,於是趁梳洗又裝番d driver同program. 10點45分落樓搵莎,跟住搭van仔去尖咀.就係咁11點15分開始唱k唱k唱k,一路唱到2點正(都未到,差2分鐘)就俾人cut歌趕走,平日都咁早趕,感覺好似俾人搶錢-__-". 之後去我地仙蹤林飲野,坐到3點零.跟住我就同莎搭地鐵去阿正度整電腦,呢排不單止係人類既流感高峰期,亦都係電腦既"流感"高峰..我部腦啦,rebbeca,suyi,阿正,如果真係整晒可以巡迴整九龍(rebbeca--東九龍過d,suyi--中九龍偏南,阿正--西九龍再入)-__-". 玩到阿正度4點20分,阿正永遠都係咁好接待..次次我話識去佢都係會走黎地鐵接我,特登行多來回20分鐘既路.去到見佢部腦中毒中到咩都開唔到就幫佢format再裝過windows,最近因為自己部腦都整得好密,所以今日裝得好順利同快,熟手XD. 5點幾就裝完走得,臨走幫佢裝anti-virus同scan晒d driver.之後同莎搭van出旺角,逛左逛就走.夜晚同莎去九龍城廣場遊走同執野食,試左kfc既冬蔭公雞. 夜晚番到去努力作文.

>>November 18, 2004 at 3:13:41 PM GMT+8

2004 年 11 月 15 日 星期一 【晴】

今日d堂反轉晒,頭三堂空堂做中史功課.之後文化堂做miss Lam準備既聆聽,今次出奇地好成績.. lunch同莎去新世紀大快活食飯,下晝堂oral變空堂,sally同suyi佢地玩野想呃我,不過冇中計,之後落去做中史,落堂由head prefect阿正護送我同suyi番課室XD. 之後兩堂中史就放學,放學同莎去旺角行左陣聯合就走. 部電腦仲有d問題,夜晚我決定format佢再裝過,不過就裝到訓著左..

>>November 18, 2004 at 3:13:31 PM GMT+8

2004 年 11 月 14 日 星期日 【晴】

今朝沖涼沖遲左出門口趕到傻,同莎行番學,以為冇時間上去課室,點知有時間淨.. 空堂嘗試做中史,原來幾難的,寫得少少.小息玩uno,之後文化堂做速讀. lunch同莎搭牛津道van去食喜悅軒,之後漫步行番學校,番到去玩左陣uno. 下晝派中史,一如所料-__-"..文學堂聽書,不過又好眼訓.最後文化oral冇我份,好彩! 放學去中史補課,5點先走得,同莎去食mcdonald,之後番屋企,打左去問人關於部機,果個人啟發左我.. 於是我拆機箱(又拆-__-"..呢幾日拆左5,6次),慢慢將底板同風扇逐件拆出黎抹..勁有心機-__-"..抹左我差唔多2個鐘,之後砌番晒就打三國志9..冇hang冇盛,似乎成功啦,原來d塵玩死我,前幾日我識抹cpu又唔識抹埋display card,勁蠢-__-". 今日明顯涼左.. 冬天冬天,我喜歡你的冰冷!

>>November 15, 2004 at 3:06:38 PM GMT+8

2004 年 11 月 13 日 星期六 【晴】

尋晚整左成晚發現著唔到部腦,今朝食過早餐,12點又搭車去旺角換火牛,果然係個新火牛壞,再換過新既同埋今次測試埋. 番到屋企換落部機度,之後就出左去搵莎去mcdonald食tea,之後去冒險樂園hae左成個下晝.6點幾聽埋抽獎先走,期間又上左九龍城廣場行. 夜晚7點零番屋企食飯,之後開番機上網,點知都係有問題..少左但係都係會restart,百思不得其解..好苦惱!

>>November 15, 2004 at 3:07:10 PM GMT+8

2004 年 11 月 12 日 星期五 【晴】

今日9點幾醒,開左陣電腦發現都仲係成日自己restart,於是決定換火牛. 12點出左去搵莎先,因為約左佢食tea buffet,買左份禮物仔俾佢,之後去田園買左《吶喊》. 3點幾同佢去到尖咀九龍酒店,去食tea buffet,d野食都唔錯,食到好飽. 跟住5點幾走,同莎由尖咀行到去旺角,之後我上旺電買左個火牛. 夜晚同莎食埋飯,之後番到屋企諗住裝,點知一波三折..

>>November 14, 2004 at 6:47:02 AM GMT+8

2004 年 11 月 11 日 星期四 【晴】

Happy Friday! 今日成班人都好high咁-__-". 今日頭果度空堂溫文學,之後兩堂英文,做section C. 跟住文學堂測驗,寫得好流暢,寫到唔捨得停手,同尋日好大對比-__-". lunch非常之驚,我地明明叫左8盒唔同既飯,點知拎到番黎一開,全部都係茄汁吉列豬扒飯!再一睇..連野飲都冇一杯係我地所叫既,非常無奈. 左輪猛話俾人整蠱,我都覺得係-__-".我諗係人地拎錯我地既,我地拎番人地既,因為去到係得呢8盒飯,今次又失策冇check名. 今日個lunch食到我地苦晒臉,因為d茄汁我始終形住係螢光汁-__-".我發誓呢個學期內都唔再食呢間既茄汁吉列豬扒飯! 下晝全班都好high既過晒三堂. 放學番屋企之後就出旺電買風扇,之後同莎去食飯. 食完番屋企拆機同風扇.

>>November 14, 2004 at 6:37:40 AM GMT+8