2005 年 3 月 7 日 星期一 【乍雨乍晴】


完成三千條 physics MC！

其實點解會決定做三千條 MC呢？
係因為一個好無聊0既原因, 就係前排睇番《男兒當入樽》,
當湘北要代表神奈川縣出戰全國大賽,
櫻木花道做0左個特訓, 就係射二萬球特訓！
當櫻木花道射入第二萬球0個一刻, 佢講0左句..
「原來射球都很有趣呢...」我就是很想體會0個種「有趣」感覺..
的確, 原來做 physics MC都很有趣呢..
越做得多就越發覺, 自己漸漸唔係靠智慧與學識去做 phy MC,
而係靠「感覺」去做, 很難去形容, 應該叫做「經驗」吧,
一條一條的去做, 每做一條, 經驗就一點一滴的累積下來..
直到現在, 以往需要諗好耐0既題目, 依家 0.2秒就知道答案,
不過我相信當年 phy四大高手之一0既北丐溫敬良, 同西毒團長,
連題目都唔洗睇就知道答案...

不過..我喪眼訓, 我阿媽話我對眼本來已經細,
依家對眼仲係「雙目冇神」, 我都唔想 ga大姐 ar...
人家一出世就單眼皮, 對眼梗係細 la, 我阿媽就雙眼皮 gei..
一對眼, 水晶般吸引..
(好懷念上年團長同 dennis成日上堂唱呢隻《今晚..捨得你》..^^)
當我照鏡望望自己對眼時, 我知道咩叫對眼冇0左靈魂...
梗係 la, 每日訓兩個鐘咁大把咋！連我最愛0既 bio堂都頂唔順訓著0左..
(當時係做緊 past paper, bio miss冇講0野, 所以訓0左...)
完全三千條 MC後, 足足訓0左六個鐘, 嘩！爽到丫,
呢六個鐘簡直係上帝0既恩賜！訓醒覺, 沖埋涼,
我就感覺到, 我又充滿力量了, 依家係時候要操 long question 0勒！
訓六個鐘真係奢侈, 有 D內咎, 學團長上年話齋,
「每天想睡多一些...」

記得上年呢個時候, 駐校社工送了每人一支原子筆,
是很 cheap那種 pilot原子筆, 粒珠老蓮咁大粒, 冇 1.0都有 0.8,
當我一收到支筆時, 第一個反應係鄙視, 仲話：
「送支 cheap筆俾我做咩？咁 cheap 0既筆我係唔會用0既..」
正當想丟掉它之際, 溫敬良對我說：「呢 D筆先好用 ar...
跌極都唔斷墨, 仲可以飛咁快咁寫字, 超好用...」
我初時都唔為意, 不過就將支筆放0係筆袋度...
當時我依然鍾愛我的 0.38原子筆, 但係考考下中文文化卷時,
發覺斃傢伙, 我所鍾愛的 0.38原子筆有三大缺點：
「冇速度, 寫得慢, 唔夠快！」寫極都好慢, 但係份中化卷又要你寫好多0野,
當時溫敬良的話立即浮現0係我腦海中, 我即刻拎番這支..
曾經被我遺棄, 唔重視, 甚至鄙視的 pilot 1.0原子筆出0黎...
即刻如有神助, 支筆好似有翼咁, 寫得超快！
現在, 我拎番這支老朋友出0黎, 我只能用..
『眾裡尋他千百度, 驀然回首, 那人卻在燈火闌珊處』去形容它...

今年, 我會用這支 pilot 1.0原子筆出戰我的 2005年 AL,
結他王子劉備話, 每一個人手上都有武器, 而他的武器就是結他,
結他就是他的寶劍, 譚澤銘話過, 佢自己只係玩泥沙, 劉備先係高手..
人一生最光榮的事, 莫過於名留青史, 劉備就做到呢一點,
就算劉備離開0左 st.peter, 但係每年0既陸運會,
都會奏起劉備所作0既《引發火花》, 就算他朝劉備死0左,
而 st.peter仲未執0既話 (我唔擔保 la..),
劉備所作0既《引發火花》依然為世世代代 st.peter仔所誦唱,
人世間最光榮0既事莫過於此, 結他王子之名當之無愧..
可能你會話, 係屋村中學先欣賞劉備0既歌, 用佢0既歌姐,
冇咩大不了, 你咁諗就錯0勒, 因為..
黃柏高0既《金牌經理人》公司對劉備0既歌有興趣！！！！！
仲問劉備賣唔賣！！！！劉備話賣唔賣到已經唔係最重要,
最重要既係有人欣賞佢0既歌, 當然賣到固然好..^^
阿劉生, 俾你再講多次, 你還覺得「結他王子」之名受之有愧嗎？
第時黃柏高簽0左你, 你唔好唔記得個頭銜係我俾你就得0勒..

「只要你肯相信, 你也可以看得到..」《劉備》
(我唔肯定呢句0野係咪尊尼特普0係《小飛俠前傳之魔幻童心》裡面講..
講起小飛俠, 點解依家晚間新聞冇0左林燕玲 ga！！！？)

其名字永存 st.peter的, 唔止結他王子劉備,
仲有區煒輝, 點解？因為..
大家還記得上年 7A同 7B 0係 hall度, 派代表上台做中文 oral嗎？
我地班派出 fion姐同劉建男兩大辯論高手, 論中文 oral,
佢地兩個絕對係頂班馬, 冇人敢話自己勁過佢地..
而另一邊廂, 區煒輝0係台上扮傻仔, 笑到我地丫..
及後區煒輝俾 miss質疑其 oral能力, 出去考 U硬,
問其有何解釋, 區煒輝0係台下解釋自己點解玩0野,
令到兩班拍爛手掌, 有日同區煒輝講開呢件事,
佢問我姚 sir係咪用機錄哂整個 oral過程, 我話係 ar,
區煒輝話今次一定遺臭萬年0勒, 因為佢試過上中化堂,
睇番以前師兄師姐的 oral片段, 佢話今次玩0野玩出火0勒..
最後區煒輝 AL中文 oral有 B, 但係第一年考有 A的劉建男,
上年竟然得 D！fion姐都好似得 B, 反而阿郭竟然 A 0左..
佢一定係符碌！識阿郭0既人都知, 阿郭係唔多出聲,
一出聲就令到全場 dead air, 而劉建男就係講得太多0野, 過火得滯..
至於小弟..上年 AL中文 oral係 F 0左,
識我0既都知我係水怪 ga la, 點解..
今年我將會0係 5月 9日考, 是全香港第一日考, 哈..

劉備手上有佢0既武器結他, 數神阿郭0既戰友,
係同佢並肩作戰0左八年0既 FX3900計數機,
(上年阿郭話佢最想入傳理系, 我就問佢：
「你竟然遺棄同你並肩作戰0左咁耐0既 FX3900計數機？」
阿郭頓時顯得好慚愧, 不過在旁的團長就好無奈咁叫我唔好咁無聊 la..)
而我呢？一支 pilot 1.0原子筆已經足夠了..
拜託你了, 拍擋！

記得上年姚 sir引用大文豪狄更斯在《雙城記》中的名句去形容中七...
「這是最好的時代, 這是最壞的時代」(It's the best of time, it's the worst of time)
上年真係好辛苦, 好大壓力, 讀到喊都有份,
每個人都0係度捱, 捱生捱死, 就是為了捱個大學學位番0黎,
不過, 現在回想番, 那時真的很快樂, 各位入哂大學0既朋友應該更能體會,
當時一大班人一齊, 為0左一樣共同的目標努力,
團長、溫敬良等高手0係我地身邊一齊上堂、吹水、咪書...
dennis話, 總覺得有佢地存在加上當時無憂無慮勇往直前咁應付 AL,
佢會更有鬥志去同佢地一較高下, 依家情況就好似黃藥師同一燈響《神雕俠侶》咁,
乜都睇化, 連爭勝的決心都幾乎冇哂...
團長話, 上年依個時候, 所有時間都擺晒落讀書度,
明年今日, 擺係讀書方面0既時間係零, 沒有時間？也不只是他一個忙,
讀書沒有目標才是最大原因, 從前很喜歡從書本中獲得知識的快感,
忽然一下子消失了, 他也不明所以...

現在 dennis、團長「獨上高樓, 望盡天崖路」後, 就會發覺很空虛...

當每一名高手各自修行時, 其進步極其量只能由零變成一,
但當三名高手互相切磋討論時, 每人的進步唔止係 1+1+1=3咁簡單,
而係 1+1+1=3再 square, 每人各自的進步能由零變成九！
唔記得邊個講過, 一個時代裡不能只得一個高手,
就好似如果沒有了李華度, 施丹係唔會有今時今日的地位,
就是有一個, 甚至幾個與自己實力均等, 甚至比自己強的對手存在,
男人才可以尋回自己, 人生才有點兒意思,
老新常談, 有競爭, 才有進步, 除了進步外, 還很快樂,
我們都是從競勝中獲取快感的, 很難形容這種感覺,
就是要互相競爭、互相幫助、互相超越、互相教導、
互相切磋、互相擊敗對方、互相被對方擊敗, 從中獲取快感,
女人係唔會明白箇中的樂趣, 男人就是這樣的生物...

跟團長、溫敬良、dennis切磋時感覺到, 愈是與高手交戰,
體內那不可思議的力量, 愈會源源不絕的湧出來..
或者我其實是撒亞人, 好戰、從戰鬥中獲得快感、遇強越強的本性..
現在只需要通過這一關, 以後0既路, 就留給以後去尋找..
(http://www.jisubbs.com/vip/stophere/galadb2/Article_Show.asp?ArticleID=307&ArticlePage=1
惡搞龍珠, 好搞笑, 不過要睇過龍珠0既先會覺得好笑,
尤其是打打下跳0左去斯路篇, 笑到噴飯..
故事發展到比達初到地球與孫悟空的第一次戰鬥...)

我仲未知 c.s學生的盧山真面目 law...
連係男係女都唔知, 令我上堂時形住形住俾人望緊..
我想知0係我八點位隔幾個人0既意思...
係左右隔幾個人, 定前後隔幾個人？差好遠 ga wo..
有冇著校服 ga？

dennis知道誰是 calvin sun？
佢上上下堂當住所有學生面前喊..
我初時仲以為佢失戀...=.="

上年七月一日同韓小姐 (audrey姐姐) 去遊行,
遊行前去0左世貿食老麥, 韓小姐 (audrey姐姐) 第一句就同我講,
「做了而後悔, 總好過不做而後悔..」
不過我地唔係講緊七‧一遊行, 而係...哈哈..
audrey姐姐0既教誨我係唔會唔記得 gei, 加上自己唔知點解,
會好清楚記得身邊每個人講過0既每一句說話..(係咪浮誇得滯呢？)
我諗有好多人唔知麥泰萊同佢老豆麥長青係邊個,
麥泰萊就係代表日本奪取世少盃同世青杯0既十一號, 司職中場,
現正效力日本聯賽球隊盤田山葉, 廿歲, 大我一年..
至於佢老豆麥長青係一個畫家, 當年麥長青去0左法國畫巴黎鐵塔,
咁0岩該屆世少杯0係法國舉行, 日本少年隊希望身在法國的麥泰萊能夠加入球隊,
麥泰萊猶豫之際, 佢老豆麥長青就同佢講：
「做了而後悔, 總好過不做而後悔..」
(提起麥長青 (麥包), 原來依家冇0左閃電傳真機0勒 wo！！？
唔係我阿妹講我都唔知, 仲記得以前有個環節係一班老鼠0係個坑渠度,
麥長青 (麥包) 就扮貓, 仲有首歌 ga,
「喵喵喵喵喵喵喵喵喵喵喵喵喵, 是老鼠都要捕捉, 我勤力不偷懶..」哈哈, 超好笑..
唔知譚玉瑛姐姐仲0係咪度呢？呢個世界上, 唯一能令周星馳低聲下氣的,
就只有譚玉瑛姐姐, 呢 D咪叫架勢堂 law..)

《修理陶傑》這本書, 是收集了陶傑一直以來的錯處,
總共有五十多個, 這證明了甚麼？是陶傑太厲害了,
唔知這本書的作者定編輯話, 從陶傑三千多篇文章中,
只能找到五十多個錯處, 就證明陶傑真的太強了..
至於小弟呢..小弟只係識吹吹水, 講下笑, 搞下 gags..
其實我是冇料的, 無可能同陶傑比,「修理陳生」四個字真係太浮誇0勒..
所以我從來都冇怨過懷才不遇, 因為我根本就冇「才」！
黃霑先生同佢徒弟雷頌德講過, 呢個世界係冇懷才不遇,
一定係做得未夠好而令你不受賞識, 或令你成功不了,
所以就要盡力去改善自己, 當你認為自己已經做得最好時,
還得不到賞識, 只是你根本未做到最好, 還有地方需要改善..
看看劉備, 有料的人是不會得不到賞識的..

依家同杯麵為伍, 除0左早餐係白粥炸兩加炒麵外,
午餐係杯麵, 晚餐係杯麵, 宵夜係杯麵...
杯麵真係一種偉大的發明, 第一佢可以令你飽肚,
但係又唔會飯氣攻心, 令你薰薰欲睡0個下勁..
第二係十五分鐘可以由整至到食完, 一個字：快,
對於與時間競賽的高考生來說,
杯麵絕對是考試前溫書衝刺期的最佳良伴..
不過有兩樣0野我係擔心 gei, 第一係可能考完 AL後,
我成個胃都係蠟...=.="
第二就係可能以後我都唔會再食杯麵..
點解？看看以下這篇文章..

「不久前我訪問過一位考生，在她家，
她給我端出咖啡和糖，出於禮貌，
我請她也喝。她卻連連搖手︰「不，不！」她說：
「高考之後，我就沒喝過一點咖啡？」，她告訴我，
她是在書堆中溫了整整一月之後才考過來的，
考試時喝的唯一飲料，是滿滿一壺咖啡。
從此，一切咖啡有關的東西都會使她產生強烈的厭惡感。
咖啡糖、咖啡巧克力、甚至鴛鴦.....
這一切都會使她喚起會考時在書堆讀得幾乎要發瘋的感覺。
「我不能喝咖啡，我受不了」，
高考後，苦澀的滋味一直沒有離開過她，一直沒有...」
節錄自會考課文《我和我的高考》

近排買了一把「玄鐵尺」, 其實之前把鐵尺已經唔見0左成幾個月,
但係用得著0既時候好少, 就算係要劃 graph時,
都係用計數機去劃直線, 不過 AL就快來臨, 要做到萬事俱備..
所以先去買這把傳說中的「玄鐵尺」..
據說這把「玄鐵尺」是當年楊過所用過,
之後郭靖與黃蓉溶0左把「玄鐵尺」, 放0左部「武穆遺書」入去,
再分別鑄造成屠龍刀同倚天劍, 當屠龍刀同倚天劍交鋒時,
曠世軍事鉅著「武穆遺書」就會重現眼前...
(唔好意思, 上腦..=.=")

重讀的第一天, 我買了兩支全新的 0.38原子筆,
這兩支 0.38原子筆, 陪我走過這一年重讀的路,
一年就快過去了, 而這兩支 0.38原子筆, 亦先後用完所有墨,
我會將這兩支 0.38原子筆好好保藏, 因為它們是見證了我這一年的努力,
見證了我重讀的日子, 代表了我重讀的日子, 充滿著怨氣...
我細佬話直情可以用肉眼見到有靈體0係呢兩支筆芯度散發出0黎,
由此可見其怨氣極重！我會帶埋呢兩支,
充滿著我這一年重讀怨氣的 0.38原子筆芯入試場,
每當我見到這兩支冇哂墨, 但係充滿著怨氣的筆芯時,
這一年所經歷過的點點滴滴, 風風雨雨, 都會立即浮現眼前,
見到這兩支陪了我這一年的 0.38筆芯, 我就會話俾自己聽,
我唔可以再輸！

「怎樣才可以去到夢幻島？」
「相信就行了..」《小飛俠前傳之魔幻童心》

離重考 A-level的日子還餘下... 三十二日...

>>November 24, 2005 at 1:24:22 AM GMT+8