2005 年 6 月 25 日 星期六 【酷熱】

連日來的暴雨終於完結, 太陽出來了...
不過...很熱 ar！就0黎熱死....

中午和 audrey姐姐、阿郭在旺角 lunch, audrey姐姐千叮萬囑我,
一定要帶哂所有相出0黎, 有一張係我同 winnie 0係阿貓地攤相0既,
後面有團長不經意攝位, 因為呢幅相係放0係生日相後面,
而生日相係我地兩夫妻同爺爺、麻麻、阿媽影 gei, audrey姐姐就指住團長問我：
「呢個係你爸爸？」我同阿郭當然笑到出唔到聲....

audrey姐姐話0係明週見到劉備！？佢話相中人0係香港仔住,
0係浸大讀, 叫劉備, 肯定係結他王子 la,
估唔到劉備已經向娛樂圈踏出重要的一步, 繼被金牌經理人黃柏高賞識後,
依家仲不斷增加曝光率, 正如阿郭所說, 劉備或者比團長更快簽約英皇...^^

臨走時 audrey姐姐帶了我們去油麻地, 參觀她工作的診所,
我們還特意走到隔壁鞋舖偷拍那個老闆, 因為那個中年鞋舖老闆,
曾經問過 audrey姐姐的同事可不可以約 audrey姐姐出去飲茶...
我同阿郭對那中年老坑 (簡稱中坑) 產生濃厚的興趣,
故在鞋舖前偷拍了那個老闆幾張照片..^^

audrey姐姐走後, 就同阿郭行了信和同電腦商場, 因為自從 winnie回了加拿大後,
兩個禮拜我都冇出過街 lu, 一來落雨 la, 之後同阿郭行女人街, 見到一間運動服裝專門店,
櫥窗掛了一件曼聯 14號史密夫的球衣, 阿郭就同我講：「快 D買兩件 la..」
我問佢點解, 佢話：「送一件俾你女朋友, 上面印上史密妻..」
最後同阿郭搭地鐵去尖沙咀, 完成油尖旺半日遊,
其實係佢想搭天星小輪, 所以特登搭地鐵去尖沙咀...

好, 等我 quote兩段新聞先, 第一段係陳奕迅訪問, 原來陳奕迅的唱功, 來得不易....

「我加入樂壇的源頭是享受唱歌、聽音樂、做音樂的過程，
而錄音這東西的原意也只是想記錄一些東西。
以前還未有錄音的技術，到處也是 live music，好像在美國，
如果有人在酒吧玩live玩得好，最多有人整杯啤酒佢飲，
大家追求的並不是金錢上的滿足。我錄音也是這樣。
我現在回看《我的快樂時代》、《與我常在》，見到當時穿的牛仔褲，
現在已經磨得褪色，那是一個紀念、一個回憶，不是為賺錢。
我理想中的 pop singer是既受歡迎，又可以做到自己喜歡的音樂，
同時又令人享受，就像許冠傑唱的歌，我覺得他一定是身同感受，而又令大眾有共鳴的。

我信一分耕耘，一分收穫。我細細個睇《跳飛機》、《430穿梭機》、《醒目仔時間》，
一邊睇卡通片，一邊跟「一休和尚」學唱歌，當然都有受阿爸影響。
跟住到英國讀書，我明明唔信教，都要個個星期日跟老師返教堂唱Choir，
做音樂劇、舞台劇，全部都係為興趣。
中四開始，我去學唱歌，學足四年，考到八級唱歌資格，最後入大學讀了兩年建築，
就返了香港選新秀。（唱歌都分級？）係呀！好似考琴一樣，
都係考英國皇家音樂學院的專業試。我好慶幸帶著這樣的底子入樂壇，
這是一個優勢，大家睇我唱歌好似好容易，其實我不知不覺已經 train左好耐。」

第二段新聞係...華人永遠第一中鋒告別賽！！！
倫哥告別賽, 飛都賣得貴 D gei....希望倫哥有好表現, 大演帽子戲法告別港隊吧！

歐偉倫戰罷紅魔告別港隊 - 24/06/2005
披上香港隊戰衣十六載的前鋒歐偉倫，將以下月對曼聯一仗作為告別港隊之戰，
他希望屆時大球場爆棚並打足全場，以此結束「港腳」生涯就很完美。
八九年已披上港隊戰衣的歐偉倫，將以七月二十三日迎戰曼聯作為儁力港隊的告別賽，
他說：「代表香港都十幾年，是時候給年輕一輩機會，
過往我曾兩次對曼聯（代表南華會），大球場爆棚，身為球員也感到光榮。」

>>September 23, 2005 at 8:05:31 PM GMT+8

2005 年 6 月 21 日 星期二 【颱風】

李嘉誠捐0左十億俾香港大學, 所以港大醫學院,
將會以李嘉誠的名字命名, 唔知李嘉誠俾0左幾多錢俾恒基兆業主席李兆基,
所以李兆基個細仔就用李家誠個名呢？

本來話 D中三同學去游水加燒0野食 gei, 但係個個都游水, 係阿郭就唔游, 佢又知我唔識游水,
所以打電話0黎叫我去, 點知黃色暴雨, 仲去鬼去馬咩, 好憎香港 D天氣,
又悶熱, 日日都落雨, 又冇風, 潮濕又翳焗的天氣, 成卅幾度, 痴線 ga....

但係應承0左娘子買 web cam, 所以出0左去買, 返0黎時搭巴士, 多人到呢....
我仲要企得前過個司機, 可知幾多人, 不過個 web cam比預期中平, 一百四十銀有交易,
搞0左好耐, 又 install唔到, 又睇唔到, 睇得到時又濛查查, 諗住平野冇好野 ga la,
聽日睇怕都要再出去一趟, 點知搞搞下又搞得掂 wo, 仲好清 tim, focus問題...
之後細佬妹同阿媽走哂過0黎玩, 因為0岩0岩同加拿大多倫多相差十二個鐘,
就係咁, 變0左我阿妹同 winnie玩, 不斷對住個鏡頭扮鬼臉....

《時光倒流二十年 - 陳奕迅》

童年你與誰渡過　聖詩班中唱的歌　再哼一哼可以麼
當時誰與你排著坐　白色恤衫灰褲子　再穿一穿可以麼
遺憾我當時年紀不可親手擁抱你欣賞　童年便相識　餘下日子多閃幾倍光
誰讓我倒流時光一起親身跟你去分享　能留下印象　閱覽你家中每道牆
拿著你歌書　與你合唱

從前你與誰路過　逛的公園有幾多　再走一走可以麼
當時誰對你凝望過　是否真的比我多　再演一演可以麼
遺憾我當時年紀不可親手擁抱你欣賞　童年便相識 餘下日子多閃幾倍光
誰讓我倒流時光一起親身跟你去分享　遺憾印象　沒有你家中那面牆
拿著你相簿　從前拍過的相　多麼妒忌你昨日同過的窗
早些看著你美麗模樣　對你天真的讚賞

遺憾我當時年紀不可親手擁抱你欣賞　童年便相識 餘下日子多閃幾倍光
誰讓我倒流時光一起親身跟你去分享　遺憾印象　沒有你家中那面牆
拿著你相簿　從頭細看　你六歲當天　已是我偶像


四五歲的我, 睇下0個個細路女幾可愛, 不過..點解我完全冇印象 gei？
佢係邊個, 叫咩名, 依家0係邊我都唔知 wo....


仲係四五歲, 估唔到我細個都幾有女人緣 wo, 身邊個個都係女 gei,
但係點解, 大個冇 gei？


人地話三歲定八十, 你睇下我個樣幾...haha, 唔係我自己睇返都唔知,
唔知我點解笑得咁奸呢當時？會唔會係細個用哂 D女人緣, 搞到大個冇？


五六歲時的聖誕節, 你睇下我同郭駿仁個樣幾鬼死老積....


當年第一代三嬸仲未同三叔離婚時, 原來我同佢玩得好癲 ga...
仲記得佢唔准我叫佢三嬸, 要叫佢「姐姐」, 因為唔鍾意人叫到佢老哂....


相信每個細路都一定會...去過老麥做生日, 無錯, 我六歲 la,
我同郭駿仁個樣都大個0左 wo...


winnie好鍾意0既艷照一幅, 難得露點...


嘩！原來我堂妹細個係超得意 ga！對眼超級大！水晶般吸引...


係咪郭駿仁生日呢？定係咩呢？真係唔記得, 總之就係0係郭駿仁屋企 la...


大個仔 lu, 有冇九歲呢？好明顯呢度係海洋公園0既兒童王國,
兒童王國, 我地係主角, 快樂朋友, 與小丑劈友....


小四旅行照, 目的地 - 龜背灣, 呢次係我最好玩0既一次學校秋季大旅行...


呢 D係咪叫無心插柳柳成蔭呢？影影下相有個女同學突然跑出,
相中每人都將注意力集中到該少女身上, 形成一幅很好笑, 但回憶味很濃烈的相片...
其實, 相片是一樣很奇妙的東西, 明明是想抓住想拍攝時的感覺, 但我們卻會在 3、2、1的那一瞬間,
莫明地喬裝自己起來, 看, 這張相正正拍攝了當時的感覺耶！多有趣！


霍翠儀老師教0左一年就走了, 這是臨別的合照, 記得霍翠儀老師係勁好人...
考試時見到所有人都做哂, 佢就收卷, 之後用餘下時間同我地玩遊戲...


我又生日 la！今次應該係十歲生日, 0係屋企搞0既生日會...
睇下其他人, 唔知點解覺得好敷衍地拍手, 好好笑...


左起有郭駿仁, 去了日本留學的郭靖 (真名), 小弟同埋去了澳洲留學的黃俊浩...
四人之中我最渣, 皆因郭靖同黃俊浩都係華仁仔, 無記錯係學校「保送」去0既,
全級頭兩三名先有得保送, 不過最好笑係, 我小六時成日上黃俊浩屋企玩,
每次都會問佢借漫畫返屋企睇, 但係最後一次問佢借0左幾廿本足球小將, 到依家都未還..=.="
仲記得中五會考見返黃俊浩, 佢一見到我就笑住話：「你好似仲爭我 D足球小將未還 wo...」

>>September 23, 2005 at 7:14:22 PM GMT+8

2005 年 6 月 20 日 星期一 【清涼】

已經有六年冇去過聖堂望彌撒了,
(唔計以前返返下學落聖堂0個 D...)
好想跟阿媽返聖堂, 同叔叔伯伯輩一齊唱聖詩...

其實小時候 (五六歲時) 跟阿媽返聖堂, 印像已經係模糊..
當時因為聖堂有其他細路仔, 阿媽話帶我去玩, 咁咪去 law..
之後停0左一排, 到小六中一時, 唔知點解又去過, 好似係想領洗,
阿媽話領洗要讀兩年慕道班, 咁我又去讀, 不過因為老豆係佛教徒,
唔俾我領洗, 我就拖多一年, 結果讀0左三年慕道班, 個導師話, 你好領洗 la wo,
之後萬事俱備, 只欠老豆簽名, 老豆一句唔得, 就將三年光陰化為烏有...

差一步就可以領洗, 老豆反對, 原因何在？因為細佬同細妹已經跟隨阿媽信了天主教,
領0左洗, 老豆唔俾我領洗0既原因, 就係要我繼承佛教, 結果就係咁, 冇領洗到...
今年年初返了一陣子基督教教會, 初初的確很正, 所有都是十幾廿歲的年青人,
個個同聲同氣, 柴娃娃一班人一齊玩, 不過...久了就出問題0勒, 始終不能沒有大人的存在..
與一班叔叔嬸嬸輩一起, 好過與一班年紀相約的年輕人一起, 起碼自己都會定性好多...
(好明顯係我自己問題...)

依家我第三次衝擊宗教信仰, 我問阿媽我依家可唔可以領洗, 阿媽話唔可以,
要再讀過兩年慕道班, 結果我又報0左名, 上次 (即八年前) 係少年組, 依家係成人組,
同一班叔叔嬸嬸輩一齊上堂, 不過最大問題係..星期六夜晚返, 咁0岩係 AL放榜後,
只怕自己沒有心情而已, 說真的, 日子越來越近, 就越來越擔心, 雖則肯定比上年考得好,
但這只因為上年考得太差而已, 其實英文同三科 AL phy chem bio都考得不是太好...
勁多 careless mistake, 足足有一兩個 grade, 四科都比預期考得差, 只怪自己太大意...

阿媽問我萬一今年都係考唔上, 咁我打算點, 我話我真係冇諗過, tri-peat(私校)？tri-peat(自修)？
副學士、HD？婆婆話如果又考唔上, 又俾多三萬銀我再考過, tri-peat..不能想像的壓力..
朋輩、親戚、家人的壓力, um...唔係話副學士同 HD唔好, 而係這只是其他出路,
沒有必升大學 degree的可能, 阿郭話佢有個同學, AL失敗, 入0左佢個系, 讀0左兩年都升唔到大學 degree,
結果又走去考返 AL, 玩咩...雖然讀書好辛苦, 但係比起工作, 又要受上司氣, 又要受客人氣,
日日返到屋企就係訓, 行屍走肉程度絕不下於中七, 有得讀書就好讀 la, 所以..我都係想讀書,
至少唔駛受上司同客人氣, 但係..真係 tri-peat？真的不敢去想來年怎過...
唔知點解依家好懷念上年十月至十二月0既日子, 懷念返聖歌的日子, 懷念做 phy chem bio TAS的日子...
每日搭小巴去灣仔返學, 無王管, 走堂、遲到、缺席冇人理, 可以一路上堂一路食野...
最好笑有次 chem TAS, 0係 chem lab一路聽阿 pk sir講解是次實驗點做,
偉哥、曾魚、大衛保羅等人就0係後面食飯盒, 超搞笑..記住0個度係 chem lab..=.="

如果考得唔太好又唔太差的話, 死死地氣求其搵個 degree讀完佢算好丫？定係 tri-peat(私校)？
tri-peat(自修)？副學士、HD？我真係唔知...如果英文死0左0既話又點呢？
一邊讀副學士、HD, 一邊 tri-take英文？定係全年咩都唔做讀死科英文算？
又或者專心 D讀好個副學士、HD佢算？又或是 tri-peat全科再考過, 再考好 D其他科？
如果係咁, 私校？自修？定係..還有其他辦法？好大壓力啊！救命...

TVB 7 月播放的動畫, 原名：家燕媽媽
中文譯名：同上
播映日期：2005年7月10日起（逢星期日）
播映時間：10：30 - 11：00
播映集數：謎

依家 D細路真係慘, 動畫質素每況愈下已經係不爭0既事實,
但係萬萬想不到差到咁0既地步, 新一代兒童真係悲哀....
唔知《家燕媽媽》套0野會唔會有燙燙燙, 同埋爆衫講名古屋丫燕窩低卡好食又 fit D呢？
唉...點解要做到咁呢？簡直係不堪入目, 我寧願睇《淫龍傳奇》...


有時覺得自己唔曉當男朋友, 當梁琬婷需要我時, 我唔0係身邊, 已經試過好幾次了....
當一個女孩最失落, 最不如意時, 最需要的, 是男朋友在身旁的安慰, 但這麼簡單的事, 我卻做不到...
每次出事時, 我都唔0係身邊, 那種內咎感與自責, 令我感到自己的無能, winnie的無助, 更使我心痛...
曾經以為, 愛情不是你愛我我愛你便足夠嗎？點解世事還有那麼多的制肘？點解唔可以簡簡單單地愛？
為何不能快快樂樂地過著每一天？點解唔可以咩都唔駛煩, 咩都唔駛諗, 開開心心咁拍拖？
如果結局係快快樂樂咁生活下去, 到底我們現在還要經歷多多少呢？
「批評」是人最容易做的事, 但又有誰願意去體諒別人？究竟是那兒出了亂子？是誰的錯？
我們做了甚麼事礙著你們了？我們又冇做傷天害理的事, 為何總要這樣？愛情不是兩個人的事嗎？
不是要和別人一模一樣的戀愛才叫世界所容許的, 但..我們又能夠怎樣？就連最簡單的事,
「在 winnie需要我時, 我在她身邊」我亦做不到, 自己真係...好失敗...

《我這樣愛你 - 黎明/苦榮》

還要將　這雙眼如何俯瞰　然後才可　將猜疑都變信任
還要等　雙手再如何拉緊　不說話也可和你熱吻
還要經　多少放任和寬恕　然後才可　將安全感覺抱住
還要經　多少次和諧相處　不見面也可　學會獨處

用最孤獨的心　換最溫柔的愛　我仍然盼待
何時才發現　就算天涯海角　都可能覆蓋
我們難道沒信心　這樣愛？

還要講　多少對白來撫慰　難道言語　竟比內心更美麗
還要將　多少愛埋藏心底　感覺便會保留到下季


每天的等待, 也就是對明天的期待, 希望你能早日回來,
亦希望沒有我在你身邊的時候, 你會自己照顧自己, 亦會快樂地過著每一天....

終於有時間講番六月二日至六月十二日所發生過0既事...
好明顯因為每日早出晚歸, 疲累不堪以致沒時間打日記,
我同 winnie去了赤柱、山頂、長洲、張保仔洞、澳門...
究竟 winnie在港最後一個禮拜發生何時, 我將一一告訴大家, 請耐心等候....

p.s 頭先...飲飲下汽水..睇到有新留言, 我 click黎睇, 見到阿虫個 gags,
搞到我噴到成個 mon都係..我個 LCD mon仲係新 gei...=.="

>>September 23, 2005 at 7:13:33 PM GMT+8

2005 年 6 月 18 日 星期六 【乍寒還暖】

你覺得自己幸福嗎？如果覺得自己不幸,
請想想, 你已經好好彩, 凡事都是相對的....

其實我覺得點解 D人成日話有女朋友都唔珍惜, 仲成日出去滾...
無他0既, 就好似食飯、飲水同沖涼咁, 你會唔會對住碗飯同水講, 我真係幸福 la,
有白飯食, 有清潔0既水, 真係好幸福, 唔會 ga ma, 點解？
因為我地由細至大, 每一日都有飯食, 有水飲, 容易得到0既0野又點會珍惜？
住0係非洲 D人, 一生人都可能未試過有飽飯食,
有清潔0既水飲, 就好似上學讀書咁, 個個都話好辛苦, 唔想讀,
但係中國山區 D小朋友都唔知幾想番學, 點解？
因為難得到 law, 所以唔好成日話有女朋友都唔珍惜,
仲成日出去滾, 因為容易得到0既0野, 人係唔懂得珍惜,
呢個就係人類0既劣根性, 你想講都得, 不過你應該先感謝同珍惜一下,
你現今所擁有0既一切...

這不是道德問題, 而是人基本的劣根性！

>>September 23, 2005 at 7:04:31 PM GMT+8

2005 年 6 月 17 日 星期五 【乍寒還暖】

《給朋友》
同梁琬婷傾0左六七個鐘,
話題大概圍繞三樣0野：父母、工作、朋友.....

郭駿仁話過我好唔重視朋友, 的確, 我不太 care朋友一倫, 可能是自己冷漠 la,
我覺得男孩子, 應該視朋友為兩翼插刀的兄弟, 而非傾心事的知心友....
所以, 我從來唔會得閒無事找朋友傾心事, 反而聊無聊事, 吹吹水就成日都有....

但係與梁琬婷傾完後, 被梁琬婷點醒0左, 現在我才驚覺, 自己是多麼多麼的幸運,
有一班肯關心自己的「朋友」, 原來自己已經很幸福,
試問有人會為朋友花時間打一段文字嗎？

「其實你自己都只不過是一個平常人, 並不是神, 並唔係所有野都可以自己扛,
如果朋友唔可以傾訴的話, 試試和你的爺爺 or後母傾傾....
我相信你爺爺應該不至只是有講波的話題, 其實他可能會教到你一些做人的道理....
同你傾電話時, 都覺得你後母對你來說都應該可以說是一個傾談的對象....
你要知道你並唔係華倫的艾馬(小丑),
唔應該只是帶給人歡笑, 而獨自一個人收堆....

有人話朋友是用來出賣的, 真正的朋友也許真是「有福同享, 有難同當」, 雖然是很老土,
但是最老土的野永遠是最受落的, 試問有邊個女仔唔想聽到佢喜歡的人,
同佢講我愛你呢三個字？你問下 D女仔有邊個女仔會唔想？

你會否覺得自己患了高考前恐懼？我覺得你唔會,
也許你現在是逃避, 逃避AL, 唔想失去讀書的日子, 對嗎？
你還記得你講過上年史無前例未試好想快 D到 9月 1日返學？
你忘記了嗎？也許你睇返之前的日記, 會對你的心情會有改善....
不如你試下如果電話有留言的話, 你試下搵一晚唔好聽電話,
等你的朋友打電話給你, 讓他們講出他們的說話吧,
第朝一起身聽一聽, 看看感覺如何...」

阿郭是一個不可多得的好朋友, 為了一個無關痛癢的我去花時間打字,
難得我地仲成日笑佢 D gag爛....
『你知唔知點解要通分母呀？其實係有分段古的, 就以 1/2同 1/3為例...
你以為 1/2同 1/3, 這兩個數是無關係的, 你就錯啦,
原來佢地就是失散已久的兄弟, 估唔到呢？
你將 1/2同 1/3通一通分母, 就會變成 3/6同 2/6, 其實佢地都有同一個分母的,
「本是同根生...」明嗎？如果唔好笑, 就再努力下啦...^_^ 「難得無聊...」』
講真...真係幾無聊, 不過梁琬婷話, 阿郭都係想人開心姐....

郭駿仁成日埋怨我唔講心事佢聽, 自己一個收收埋埋, 唔當佢朋友, 我們又常常鬧意見,
成日因為價值觀不同而鬧交, 但其實, 有一個朋友肯求你講心事佢聽,
是一件非常幸福的事, 比起一些想找人傾訴而無人肯聽的人來說, 我已經幸運無比.....

很喜歡 dennis, 因為他是一個與我很投契的朋友, 講波又得,
講女人又得, 吹水又得, 講政治又得, 講金庸又得, 講龍珠星矢又得,
請教他化學又得, 識0既0野又多過我, 睇0既書又多過我,
所以我常常請教他, 所謂酒逢知己千杯少, 話不投機半句多,
還要萬二分感謝莫大先生在我失落時,
對小弟的鼓勵, AL的持久戰, 還記得莫大先生話, 短兵相接之時, 只需顧眼前就可以了...
『呢個時候最緊要保持士氣, 最好隔絕一切做隱蔽青年, 唔好受外界影響太多,
一路 keep住個勢就好大機會, 沉著應戰, 你的優勢係有多一年身處地獄的經驗,
相信到時可以比大部份人表現更為冷靜...我強？我自問連溫敬良一半天份都冇...
而且, AL永遠冇「溫哂」呢回事, 當時我都曾經有過絕望的心情,
意志力低少少就會全盤皆輸, 你依家都一樣, 到大直路階段,
靠的不單是努力, 一日溫十個鐘咁簡單, 而係強韌的耐力同堅持,
尤其係你要再衝多一次, 需要比第一次考的考生更能忍耐,
其實做人可以好簡單,「甚麼都不曉, 淨係識讀書」,
我其實都係同你一樣, 那又如何？
有時太勉強自己去達成一件事, 只會弄巧反拙, 事倍功半,
你同劉備所講的都好0岩, 物極必反,
凡事都有走到死胡同的境地, 倒不如隨心所欲胡為一番, 可能會有柳暗花明的機會...
回想我考AL前十幾日, 已經厭戰到無可再厭的地步,
另一個同我一齊努力的朋友叫我去食野吹下水,
我毫不猶豫答應, 而且一講就講成兩三個鐘,
對當時分秒必爭的高考生來講可以話非常奢侈...
你應該明白我對高考的結果, 執著的程度絕對唔會比小新同溫敬良低的,
當唔少人最後幾日上堂稍為放鬆心情去玩的時候, 我仍然默默響旁邊做緊份中化 paper,
我唔係唔想玩, 而係重視自己所負擔的責任, 多於一切,
但撫心自問當時我最需要的, 唔係溫多幾個鐘頭,
而係心靈上疲乏受到慰籍, 與良朋知己舉杯詳談, 先至係我當時解困的良方...
每個人都有佢忘憂的方法, 希望你可以快點找到自己的方向,
無論喜或愁, 成與敗, 只要你肯同我地分享以上一切,
大家都會支持你....』不過最令我印象深刻的一席話, 是以下這一段....
『做得好, 陳生你升level了, 高考呢(包括於呢個教育制度), 只教曉我同埋好多人一樣0野：
道義放兩旁, A字擺中間, 只要你可以一邊用仁義禮信去答中化卷,
心入面就享受其他考生被自己踩於腳下的快感, 如果做得到呢樣野,
就等於向緊個制度吐一啖濃痰也！A-Level, 是表現自己長期以來的努力,
仲有其他人對你的期望和支持的時候, 唔好令下面所有留言者失望...』
不過莫大先生最好笑之處係...佢會0係我日記找錯處....=.="
(注：小新係胡民新, 即係西毒團長, 溫敬良係北丐, 當年華山論劍,
還有東邪肥波, 南帝山根, 點解咁排已經唔記得0勒, 只記得山根出家為神父,
在《神鵰》末段時已經被封為南僧, 住0係西環0既團長, 故名思義就是「西毒」,
金庸小說中不乏經典場面, 與喬峰斷臂同樣震撼的,
莫過於當年五絕的西毒團長同北丐溫敬良, 0係 04 AL physics打成平手,
同樣拎 B, 之後一笑泯恩仇, 相擁而逝！成為金庸筆下的經典！)
論無聊, 我比阿郭有過之而無不及, 好 gags不妨一搞再搞！

很好人的 audrey姐姐, 當我為重考 AL而努力時, audrey姐姐會時不時打電話0黎問候下我,
問下我溫成點, 鼓勵下我, 最記得 study leave時佢打0黎叫我食蛋, 補充營養, 結果我由當日起,
至到考完 AL, 都係一日食四隻雞蛋, 就連考完哂 AL, 考完最後一科 physics,
audrey姐姐都打0黎恭喜我考哂試, 不過最諷刺的是...
我介紹 audrey姐姐識的黃越富、溫敬良、阿郭, 都比我見得多 audrey姐姐,
無他0既, 同校三分親 ma, 都唔知點解, 十個有八個都係 poly...=.="

遠在加拿大的虫, 經常有越洋的鼓勵, 很喜歡他叫我們一起努力, 下年一齊做大學生,
考 AL時, 腦海中常常有阿虫對我說的鼓勵說話：「上啊！你條路就0係前面！」
(something like that la, 考完就咩都唔記得哂, 我諗阿虫哥唔會怪我 gei...^^)

查實何靄琪同羅少怡都對我不俗, 上年 AL放榜會打電話來問候一下,
羅少怡仲話可以俾我發洩一下, 不過唔係我諗0個 D, 叫我唔好心邪,
放榜前又會叫我帶齊0野, 放榜後返了大陸, 一星期後才返落0黎,
何靄琪就打電話0黎搵我, 我當時今詫異, 點解咁橋一返落0黎就搵我,
原來何靄琪每日一電, 睇下我幾時返落0黎, ha..雖然這兩名女孩給了我不少麻煩,
但其關心小弟亦感覺到, 大恩不言謝, 但點計佢兩個都唔係大恩, 所以都是一聲, 謝 la...

其實還有很多的, 不過有時間先打 la....
謝謝所有鼓勵過我, 幫助過我的人, 真的真的, 容我再說一聲謝謝...

>>September 23, 2005 at 6:24:23 PM GMT+8

2005 年 6 月 16 日 星期四 【晴】

你能在猴子、季候鳥、刺蝟、蜜蜂、蒼蠅、鯊魚、熱帶魚中,
看見自己的影子麻？以下有幾個很好的比喻....

《猴子的執著》
在亞洲，有一種捉猴子的陷阱，他們把椰子挖空，然後用繩子綁起來，接在樹上或固定在地上，
椰子上留了一個小洞，洞裡放了一些食物，洞口大小恰好只能讓猴子空著手伸進去，
而無法握著拳伸出來，於是猴子聞香而來，將牠的手伸進去抓食物，理所當然地，手便伸不出來，
緊握的拳頭伸不出洞口，當獵人來時，猴子驚慌失控，更是逃不掉。
沒有任何人捉著猴子不放，牠是被自己的執著所俘虜，牠只需將手放開就能伸出來。

心中貪的慾念使我們放不下，內心的慾望與執著，使我們一直受縛，我們唯一要做的，
只是將我們的雙手張開，放下無謂的執著，就能逍遙自在了。


《候鳥樹》
候鳥從遠處飛來，找了這棵樹棲身，不久牠又會飛走，到遠方找另一棵樹。
其實人也是一樣，從小到大，我們遇到多少人 ？在不同人生階段，我們有不同的朋友，
與他們認識，相處，然後分開，好像是人生一個定律。也許有人覺得候鳥無情，
曾經朝夕相對，怎麼能說走便走？但其實，能相遇是種緣份；曾經一起過，已經是一種福氣。


《Ｈeｄgｅhｏg 'ｓ　Ｄ iｌe ｍ mａ-----「進退不得的刺蝟」》
這是來自德國哲學家叔本華（ Arthur Schopenhauer, 1788-1860 ）
寓言故事的精神分析用語.....

刺蝟雖然想將自己的溫暖傳給對方, 但當身體靠近時, 身上的刺就會使彼此受傷..
靠得越近, 就會傷得越深, 人也是一樣, 可能因為內心害怕這種痛苦而變得膽小了吧...
不過再過不久後就會發現到...所謂的「成長」, 就是在不斷的聚散之中,
找出讓彼此不再受到傷害的適當距離....


《蜜蜂和蒼蠅》
如果將一隻蜜蜂和一隻蒼蠅放進一個玻璃瓶中，然後將玻璃瓶平放，
瓶底朝向較光的窗口，再打開瓶蓋，你猜會怎樣？何者會逃出生天？

實驗證明，勤勞的蜜蜂會不斷地在瓶底找出口，直至力竭而死；
而蒼蠅卻可以在不到兩分鐘的時間內，從玻璃瓶口逃出。

隨機智慧戰勝傳統教條...

蜜蜂之死，是因為被傳統智慧和邏輯所誤。牠們以為，「密室」的出口必然是在光線最明亮的地方，
因此只管拚命撞向瓶底，重複這種牠們認為合乎邏輯的行動。對牠們來說，
自然界並無玻璃這種不能穿透的透明物體，因此牠們的智力愈高，愈重視邏輯和經驗，
這種奇怪的障礙物就愈發不可理解。

相反，智力較低的蒼蠅對邏輯毫不在意，只管四下亂飛，卻誤打誤撞地找到了出口，
構成了一個智者消亡、頭腦簡單者卻得救的警世故事。

這不單是一個寓言，而是美國一個著名的組織行為學者卡爾偉克的實驗。
他總結這個實驗的教訓時指出，冒險、試錯、即興發揮、隨機應變以及迂迴前進，
都有助應付瞬息萬變的世情。這樣的問題之所以緊迫，是因為模糊和不確定性，
已成為當今企業管理的難題。面對複雜的世界，我們需要的是隨機性的智慧，而不是教條式的智慧。


《鯊魚和熱帶魚》
曾有人做過實驗，將一隻最兇猛的鯊魚和一群熱帶魚放在同一個池子，然後用強化玻璃隔開，
最初，鯊魚每天不斷衝撞那塊看不到的玻璃， 耐何這只是徒勞，它始終不能過到對面去，
而實驗人員每天都有放一些鯽魚在池子裡，所以鯊魚也沒缺少獵物，只是它仍想到對面去，
想嘗試那美麗的滋味，每天仍是不斷的衝撞那塊玻璃，它試了每個角落，每次都是用盡全力，
但每次也總是弄的傷痕累累，有好幾次都渾身破裂出血，持續了好一些日子， 每當玻璃一出現裂痕，
實驗人員馬上加上一塊更厚的玻璃， 後來鯊魚不再衝撞那塊玻璃了，對那些斑斕的熱帶魚也不再在意，
好像他們只是牆上會動的壁畫，它開始等著每天固定會出現的鯽魚， 然後用他敏捷的本能進行狩獵，
好像回到海中不可一世的兇狠霸氣，但這一切只不過是假像罷了，實驗到了最後的階段，
實驗人員將玻璃取走，但鯊魚卻沒有反應，每天仍是在固定的區域游著，它不但對那些熱帶魚視若無睹，
甚至於當那些鯽魚逃到那邊去，他就立刻放棄追逐，說什麼也不願再過去，實驗結束了，
實驗人員譏笑它是海裡最懦弱的魚，可是失戀過的人都知道為什麼，牠怕痛。

>>September 24, 2005 at 3:04:58 PM GMT+8

2005 年 6 月 15 日 星期三 【溫暖】

百佳的真人真事笑話：
咁今日見悶就落樓下行下...
見口渴咪入去間類似超市0既0野買0野飲...
排隊比錢0個陣, 排0係我前面有三四個應該係小學0既學生...
咁我見佢地淨係一人買左一支水 only, 但個收銀員都好禮貌咁問佢要唔要袋...
點知其中一個小學生就話：「唔要袋, 我要套...」
點知個收銀員淨係簡單又禮貌0既一句咁講...
「唔好意思喎弟弟, 我地冇你既 size...」

XDDDDDDDDDDDDDDD
毛都未出就問人拎套, 個收銀員答得又絕 wo, 佩服！

>>September 26, 2006 at 4:04:59 AM GMT+8