2005 年 6 月 11 日 星期六 【酷熱】

今日係 winnie 0係香港既最後一日, 當然, 佢係到今日先發現有好多野都未做, 買漏野、去漏地方、 同埋...最大鑊0個樣 --- 約漏舊同學！為免後悔, 一朝早我就同梁琬婷去左觀塘 APM, 因為一來可以去食蛋糕, 二來近 winnie班舊同學, winnie仲諗住即日約佢地出黎聚一聚, 所以梁琬婷0係袋度拎本小六紀念冊出黎打電話, 笑死我...XD 0係僅有既時間內, winnie打左兩三個電話, 其實當時 winnie都唔係抱好大期望, 因為佢咁急先叫人出黎, 之後我地0係觀塘 APM搵左好耐, 都搵唔到 winnie話有蛋糕食既地方, 兜左好多個圈, 行左好多層, 終於搵到, winnie買左個一磅既雪榚蛋糕, 我地就坐低食左佢, 本來 winnie係諗住前幾日, 六月六日我生日0個日, 帶我黎食, 俾個 surprise我既, 但係點知六月六日0個日唔夠時間由香港仔去觀塘, 再由觀塘返香港仔食晚飯, 所以就冇去到, 到左今日 winnie先帶我去... 結果因為「溜」得滯, 個雪糕蛋糕係食唔哂 ga... 之後我地0係觀塘 APM行左一陣, 因為約左 winnie D小學同學兩點半0係時代大電視下等, 所以我地就逛多一陣商場先, 結果0係書局度逛到一點半就走勒... 兩點三去到銅鑼灣, 兩點半去搵 winnie既舊同學, 原來已經有兩個女仔0係度等緊, 其中一個不停咁叫梁琬婷, 不過 winnie係聽唔到, 但係俾我聽到, 我就望住0個兩個女仔, 我問 winnie係咪佢地 ar？？？winnie就戰戰兢兢咁行上去相認勒.... 其中一個女仔話今日好多人都黎唔到, 梁琬婷梗係失望 la, 不過係佢自己衰先既, 唔到最後一日都唔約人出黎, 朝頭早打電話約人即日出黎, 都約到幾個, 算係咁 la.... 等左一陣, 有名爆笑男子出現, 梁琬婷完全唔知佢係邊個, 但係該名男子又叫得出梁琬婷個名 wo, 仲話自己係路過既, 笑死... 梁琬婷諗左好耐都諗唔到, 佢仲同該名陌生男子打賭, 如果到最後都講唔出該名陌生男子個名, 梁琬婷就要請飲野... 擾攘一會, 便決定去「阿貓地攤」坐, 我地一行五人上左「阿貓地攤」玩住先, 梁琬婷依然估唔到該名陌生男子個名, 之後又一爆笑男子出現, 一黎到就勁搞 gag, 有爛有唔爛, 不過真係笑到好辛苦, 最後有八個人0係「阿貓地攤」度勁玩喪笑, 玩 UNO、擒棉胎、七級豬, 超好笑, 玩擒棉胎時成日陰人, 之後搞到拍錯, 笑死... 玩七級豬時, 爆笑男子屈個女仔有回應佢, 個女仔話：「我冇 ar！」 就係咁, 個女仔由一級瞬間變成六級, 笑到我丫... 最後輸左既爆笑男子同另一個女仔, 要出去台上面跳芭蕾舞自轉, 當時如果其他台既人望過黎, 睇到既情景應該會系甘... 有六條茂利好似蝦米咁笑到肚孿, 仲有兩個就0係台上面自轉一番, 「笑爆」, 係唯一可以形容當時情景既字眼！！！ 之後, 因為0係「阿貓地攤」度其實無乜野食, 再約多兩個舊同學, 我地就上左沙嗲王, 食完野終於要走啦！ 爆笑男子今天好明顯就係黎搞事, hahaha！！！每一句都惹人笑 ar！！！ 最後我地由集合的時候開始就笑個不停！！！好累人 ar....=.=" 有傾偈 (就是不停的搞笑)、有玩 card games, 吵得要人叫我們細聲一點..真尷尬... 今日真係好辛苦, 因為笑足五個鐘, 由下晝兩點半笑到夜晚七點半, non-stop咁喪笑, 個個都係低低地 ga！咁又係既, 梁琬婷既同學仔 wo... 爆笑程度絕不比梁琬婷低, 好彩佢 D同學唔係 D乖乖學生, 唔係實悶死.... 梁琬婷就係0係咁既環境下長大, 唔怪得之佢咁爆笑 la！！ 同我一樣, 係絕頂怪人, 襯到絕！！

>>August 5, 2008 at 4:52:41 AM GMT+8

2005 年 6 月 10 日 星期五 【晴】

今日 winnie要同爸爸媽媽去大嶼山睇大佛, 我自己就0係屋企等佢電話, 四點幾 winnie就返0黎 la, 咁我地就出左銅鑼灣, 我地去左商務睇書, 睇左陣就返香港仔, 上左我屋企一陣, 跟住又返番銅鑼灣, 我地去左仙跡岩食野, 之後再去 HMV買 VCD, 買左幾隻 VCD俾 winnie, 一隻係尊尼特普套《幻海奇緣》(Edward Scissorhands)、 另一隻係中七時, 修女俾我地睇0個套《和你在一起》(個細路拉小提琴0個套), winnie就買左套《big fish》我睇, 講個老竇成日吹水, 話自己以前經歷過好多奇怪事... 個個人都好仰慕佢, 但係偏偏個仔就唔信佢, 仲好憎佢, 之後個仔去返佢老竇個時空, 經歷一次佢老竇所講既野.... 我諗第時我個仔都會好似個主角咁, 因為我都係成日吹水... 攝於仙跡岩....

>>August 5, 2008 at 4:52:55 AM GMT+8

2005 年 6 月 9 日 星期四 【綿綿細雨】

今日同梁琬婷兩口子膽粗粗搭船去澳門玩, 我地朝早0係港澳碼頭一次過買四張船飛, 兩張去, 兩張返, 好貴, 齋係來回就用左成六百銀, 一個鐘船程, 十二點到達澳門, 因為夜船仲貴, 所以我地買左日船最後一班 - 六點鐘船返香港, 落船後, 兩條友就拎住地圖去遊澳門勒！ 講真, 我地真係大膽, 因為兩個都未去過澳門, 第一次去就自己「盲鐘鐘」咁走, 真係大膽, 不過好好玩... 我地先搭巴士去「tum仔」買豬扒包, 但係點知佢話三點先開始賣, 咁我地就逛逛「tum仔」先, 行左陣街, 買左細細個既老婆餅, 一路行一路食, 之後梁琬婷買左支膠, 0個 D好臭, 有好大陣膠味0個 D吹波膠呢, 吹兩吹就吹到個波出黎, 玩兩玩就委縮哂,「巢」哂皮0個 D呢... winnie就0係度玩波, 我就不停叫佢唔好玩 la, 好大陣膠味, 好臭... 不過佢自己不知玩得幾開心, 唔理我, 搞錯！ 之後我地就入左個大涼亭裡面傾偈, 傾傾下有電話搵 winnie, winnie一聽, 原來係身在加拿大既朋友 - 奶媽打長途電話黎, 佢地傾左好耐, 之後俾我聽, 點知奶媽第一句就話： 「點解你把聲咁搞笑 gei？同個樣完全唔 match, 仲以為你把聲都係好斯文 tim...」 winnie都話佢第一次聽我把聲, 都係非常詫異, 點解把聲咁搞笑 gei？ 講起第一次同 winnie傾電話就好笑勒, 佢當時未返香港, 0係加拿大打長途電話黎, 0係我手提電話中留左個 voice mail, 0個次係我第一次聽 winnie把聲, 我笑左十分鐘, 點解？ 因為完全聽唔到佢講咩 law！淨係聽到第一句同最後一句... 「喂, 唔知你知唔知我係邊個呢？咁我係 winnie la, 哎唷哎唷唷, 哎唷哎唷唷, 哎唷哎唷唷, 哎唷哎唷唷, 哎唷哎唷唷, 咁返香港後再傾 la, byebye...」 我重覆聽左十幾廿次, 都係聽到一舊舊, 最慘係聽 voice mail都係計分鐘的, 之後我問返老婆, 問佢當時留言時係咪好緊張？佢仲好驚訝咁問返我：「你點知 ga！？」 等到三點, 我地就去買豬扒包, 買左兩個, 我地就上巴士食, 因為要爭取時間, 去第二個目的地, 搭巴士去澳門旅遊塔... 去到澳門旅遊塔, 原來要入場費, 每位七十銀, 因為我地盤川已經所餘無幾, 大部分用哂0係來回船飛度, 所以 winnie話不如唔好上去 la, 又徙錢又冇野睇, 最重要係我地已經冇哂錢, 不過我話既然一場黎到, 冇理由唔上埋去呱, 咁我地就連碎銀包都「巢」埋, 岩岩好湊夠一百四十銀, 買左入場券後, 我地已經冇哂錢, 連今晚既食飯錢都冇, 不過事後 winnie話, 0個一百四十銀抵到爛, 好彩我地有上到去旅遊塔, 好彩我堅持要上去, 就好似知道會有事發生似的, 點解抵到爛？ 皆因我們看到一些有錢都看不到的景象... 我地首先上左去五十八層, 上到去, 行一個圈, 地下係透明的, 真係腳軟 ga, 不過百壓星梁琬婷0係度跳同大力踏幾下個地下 law, 方死個地下唔穿咁, 仲笑笑口話好好玩, 真係激死！ 之後我地上到更高0既六十一層, 係可以出外既, 好大風, 超舒服！ 如果永遠留0係0個度就好了, 我地行左一個圈, 之後坐0係度玩, 見住其他 D白癡仔, 著住套全身橙色0既「夾拿衣」, 出去空中漫步行一圈, 代價係一千大元行一次, 我地笑到碌地, 套衫超核突, 仲要有個勾勾住上面條鐵管, 好似人地 D火車同電車咁, 上面有條電纜, 班傻仔仲要行兩步就影一影相, 個 post仲要係扮到就黎跌咁, 伸一隻腳出去出面, 笑到我同 winnie爬0係度... 當眾人的目光都注視在那班橙色怪人身上時, 我同 winnie就0係三百米高空依泣, 不過唔知係咪氣流問題, 我地撞牙, 仲撞到 winnie流血, 奀皮鬼梁琬婷兜野打落黎話： 「好痛 ar！」因為佢0個拳打到應一應, 痛到我「典」0係長椅上... 之後我就一路「典」, 一路爬0係長椅上扮《star war前傳III》最後0個幕, 黑武士 darth vader俾 Obi-Wan斬左雙腳時講既野：「I...HATE..YOU...」 仲要扮埋黑武士 darth vader個 tone同姿勢動作, 笑到梁琬婷碌地, 超搞笑... 接著, 左邊開始下著雨來, 但右邊卻看得見太陽, 我同 winnie望出去, 看見了難得一見的彩虹, 這樣的彩虹仲係只有在動畫中見過, 完整無缺的「半圓形」彩虹啊！在 330米的高處望出去, 這條彩虹橫跨整個澳門, 非常非常的幸運與巧合, 剛好與梁琬婷在旅遊塔上, 一起看見了彩虹.. 我們當時只有驚嘆、驚嘆與驚嘆, 真係好大條彩虹啊！ 如果冇同 winnie來澳門, 如果冇同 winnie上來旅遊塔, 如果唔係0係呢個時候上來旅遊塔, 如果唔係同 winnie兩個人一齊上黎旅遊塔, 我地都冇可能一齊見到彩虹.... 當「時間」、「人物」、「地點」都配合得難以置信, 這究竟是偶然的碰見, 還是必然的遇上呢？ 我們各自在不同的彼方, 一起仰望著天空, 你的淚水之所以要結束, 是因為彩虹橋就快要掛起來了, 憑著一顆心, 向你作出承諾, 你內心的痛苦, 所有也變成我的痛苦, 當我們的心變成一顆心時, 美麗的彩虹橋便會在天空中架起... 六點鐘我地就搭船返香港, 今日好好玩, 好開心, 經歷了很多, 同老婆遊歷了很多地方, 返到香港, 我地就去左銅鑼灣商務書店睇書, 再去「些粉」食雪糕, 梁琬婷真係好易滿足, 一支甜筒已經 tum到佢紮紮跳, 今日好開心耶！ 我地搭船過大海 la！要用身份證 ga wo, 算唔算出境呢？ 上到巴士 lu, 兩條友咩都唔識, 自己睇地圖上巴士, 超大膽！ 呢條唔通就係澳門街？唔知見唔見到文初同祝君好呢？好純樸, 好鄉村感覺.... 我：「喂, 唔好玩 la, 過黎影相, 望住個鏡頭...」 winnie：「哦..哦..哦..發生咩事？發生咩事？」 我吹！再吹！三吹！ 超級鍾意 winnie呢個天真瀾漫的笑容, 勁可愛！超得意！喪 kawaii！ 奶媽打長途電話黎之前既合照, 坐0係涼亭度同梁琬婷傾偈, 真係好正啊... 臨離開前影下個涼亭既全貌先！ 三點鐘返回大利咖啡室買新鮮出爐既豬扒包, 拍照留念先！ 睇下, 係遠近馳名既豬扒包啊！又真係幾好食 gei, 搭緊巴士去澳門旅遊塔.... 終於到達第二站 - 澳門旅遊塔！又影返張相先！ 係連接「tum仔」既澳門大橋, 個景好靚啊！我依家電腦幅 wallpaper就係呢張相耶.... 旅遊塔五十八層, 今日係平日, 冇咩人, 可以坐0係度依泣陣.... 旅遊塔五十八層, 睇下下面, 透明 ga個地下！好高啊！百厭星梁琬婷仲0係度「dum」地！ 0係旅遊塔六十一層影0既, 出左戶外, 好大風, 好舒服啊.... 但係...點解...梁琬婷會多左條疤痕 gei？頭髮？真係頭髮？ 因為冇錢食飯, 所以唯有食雪糕算 la, 不過梁琬婷好似仲開心 wo.... 「當我們的心變成一顆心時, 美麗的彩虹橋便會在天空中架起...」 那一條「半圓形」彩虹, 是一個「proof」, 是一個「證據」, 上天已經用這一條「半圓形」彩虹去證實、去證明我與梁琬婷的心, prove我與梁琬婷的心,「已經」變成一顆心了...

>>August 5, 2008 at 4:53:17 AM GMT+8

2005 年 6 月 8 日 星期三 【晴】

今日同 winnie表姐、winnie表弟同 winnie表姐的鬼仔男朋友阿 tim去食 lunch, 呢個表姐同表弟係 winnie姨媽既仔女, 即係 winnie媽媽0個邊既親戚, 之前康寶萊既表姐同表哥, 就係 winnie姑媽既仔女, 即係 winnie爸爸0個邊既親戚, 差唔多見哂 winnie D親戚 lu, 今日 winnie約左佢地三個出黎, 好好玩, 佢地三個都係0係美國留學, 暑假返黎香港玩, 我地去左食粉麵, 因為 winnie表姐的鬼仔男朋友阿 tim鍾意食, 之後去左 McCafe坐, winnie表姐的鬼仔男朋友阿 tim出奇的內向兼唔出聲, 聽唔明我地講咩？ 又唔係丫, winnie表弟成日用英文搞 gags去撩阿 tim, 阿 tim都係齋笑唔多出聲... 之後我地去左世貿影大頭貼, 見到 isabella 0係度拍野, winnie見到時衝口而出爆左句：「乜咁核突 ga！？」笑死我！ 值得一題既係, winnie表弟雖然細 winnie一年, 但係高佢兩個頭, 有 194 cm, 成六尺四高, 0係美國打籃球果然係唔同 D... winnie表弟係一個搞 gags能手, 小弟都自愧不如... 送左 winnie表姐、表弟同阿 tim搭巴士後, 我同梁琬婷就出發去長洲勒！ 我地出去中環, 行左去天星碼頭0個度, 唔知0係邊度搭船去長洲, 咁 winnie就去問報紙攤, 人家心諗, 唔買野就唔好搞搞震 la, winnie又唔忿氣俾人不禮貌對待 wo, 想企0係度等到佢講為止, 係我拉佢走先肯走, 我同佢講：「叫左你咪問 ga la, 香港人係咁 ga la！」 0係港外線碼頭, 我地諗住買腸粉上船食, 點知得番兩分鐘就開船勒, 我地好焦急咁叫佢快 D la, 快 D la, 點知佢仲「之之悠悠」咁落甜醬, 仲話：「定 D la, 一定趕得切 gei...」 最終我地0係最後一秒趕到上船, 0係船上面, 我將我的「回憶」全給了梁琬婷... 因為她說：「愛, 不獨是說出口的, 愛你, 是想溶入你世界, 想你開心, 想同你編織一個未來, 想你咩都話晒俾我知, 想學你, 想行你行過既路, 睇你睇過既書, 吸你吸過的空氣, 在你生活的地方, 我想走一次, 看一次, 你, 是怎樣長大的....」 所以我將我的「回憶」, 具體地給了內子, 她收到最高興的禮物, 大概就是我的回憶了, 不過要還的啊, 因為所有的回憶與五六本的手寫日記, 只得「一個」(不知用甚麼量詞好..=.="), 現在給了內子好好保存, 廿年後、卅年後要還返俾我的！ 一個鐘的船程很快過, 上到岸, 勁多旅店向我倆招手, 兩個人住宿, 我都想.... 我打俾敬, 佢叫我地沿住海岸線行, 行到尾就係張保仔洞, 咁我地行到公園就坐陣依泣, 不過一坐就坐左好耐, 半個鐘後, 再向前行, 行左大概二十分鐘, 終於去到張保仔洞, 我地見到超靚既「水連天」景色, 對於我地呢 D生活於繁華都市中的人, 見到晴天夕陽西下, 水平線連藍天白雲的景色, 我倆讚嘆了不下數百遍, 入張保仔洞前係興奮到極, 因為景色實在太美了, 出張保仔洞後依然興奮, 因為景色更美, 可是... 我地搵來搵去都搵唔到路走, 我就打電話俾長洲之 KING溫敬良, 條友竟然話：「張保仔洞封左...」有冇搞錯！又唔早講 wo, 搞到我地要沿洞返轉頭, 仲要0係出口被蚊咬, 我同 winnie兩個夾埋被蚊咬左廿幾卅粒蚊「難」！ 出返去入口, 我地心情同入去洞時簡直係天淵之別, 口中只有粗口... 之後溫敬良為左陪罪, 帶我地去左秘密地方, 嘩！正到爆, 勁大個海, 天勁藍, 仲有夕陽, 0係懸崖上真係好舒服, 訓0係 D石上面望天, 真係好正... winnie話最衰溫敬良0係度 la, 阻住哂, 跟住溫敬良話佢同女朋友拎個蛋糕上黎慶祝生日... 一邊看夕陽與海, 一邊食蛋糕, 勁浪漫, 溫敬良仲話, 前幾年佢訓0係懸崖石上睇流星雨, 極其壯觀！聽到我同 winnie眉飛色舞！ 夜晚我地行返出碼頭食飯, 食完後溫敬良先話冇帶錢, 叫我地出住先, 0係碼頭等佢, 佢跑返屋企拎, 搞錯！ 左起：小弟、梁琬婷、winnie表姐、表姐男朋友 tim、後面的是 winnie表弟... 萬中無一既小弟露齒笑相片, 加上老婆既可愛姿勢, 真係好可愛耶！ 《The X file》第三輯, 係咪好神秘呢張相？ winnie表弟真係好高, 成六尺四, 194 cm, 唔好玩 la, 顯得我好矮.... 當身為表姐既 winnie拍落佢表弟度, 成個小矮人咁 law, 完全唔覺 winnie係表姐... 其實 winnie表姐男朋友阿 tim都幾 nice, 怕怕羞羞, 最好笑係佢鍾意食河粉.... 終於黎到長洲 la！0係碼頭度影返張相先！ 咩黎 ga呢？好似係....唔知, 要問返長洲之子溫敬良... 好一個漁港, 好靜, 好悠閒, 好多人踩單車, 好正, 老婆好得意.... 行左一陣, 我地就0係涼亭度抖暑, 溫敬良打電話黎問我地依家0係邊, 我話0係個涼亭度, 佢話個涼亭係俾 D阿伯0係度乘涼既.... 沿住海岸線行, 夕陽西下, 映照得個海好靚.... 行到中途了, 又影返張相先, 依家已經見唔到個海, 但係見到座山... 去張保仔洞要行上山, 我地見到咁大個海, 梗係影 la！ 個海真係好大！見到水平線, 一望無際的海洋, 好靚啊！ 入到張保仔洞裡面, 係伸手不見五指, 完全睇唔到野, 好彩我地有兩支電筒... 回程了, 叢森中, 是一個打野戰的好地方....(講笑！) 黃昏了, 太陽都已經下山了, 不過景色很美, 特別鳴謝溫敬良出來替我倆搾機... 溫敬良囉左好耐既景, 藍天, 藍海, 石灘, 石山, 個景真係好靚, 可以做 wallpaper.... 呢張半身照更似 wallpaper, 雖然溫敬良囉呢個景囉左成幾分鐘, 不過真係好靚.... 溫敬良個樣好唔耐煩 wo, 梗係 la, 要應酬我地呢兩隻野.... 呢餐好好味, 好好食, 我同 winnie一坐低就即刻「隊」左支汽水, 真係太口渴 la, 一分鐘飲哂, 之後再叫多兩支, 口渴既時候真係好好飲.... D蜆好好味, 仲係一隻不剩, 真係想食多碟.... 梁琬婷一定好肚餓0勒, 你睇下佢「落手」幾快！仲好狼 tim！ 天下武功皆可破, 唯快不破！ 睇下溫敬良幾雀躍, 梗係 la, 佢講緊自己 D溝女史 wo... 梁琬婷好好奇, 究竟隻狗0係度做緊咩呢？ winnie好累 wo, 你睇下佢個樣, 呢 D係咪叫小鳥「依」人呢？定係小鳥「伊人」？ 抑或係小鳥依「臣」？又或者係小鳥「Eason」？ 溫敬良又0係度影 wallpaper勒, 影得幾好 wo, 不過..... 覺唔覺我同 winnie好似 key上去咁？唔知點解覺得張相好假 law...

>>August 5, 2008 at 4:53:35 AM GMT+8

2005 年 6 月 7 日 星期二 【微雨】

今日一早就同 winnie上0左山頂, 我同 winnie 0係中環搵0左好耐先搵到纜車, 上到山頂, 我地又依泣一番, 諗住平日冇咩人 la, 點知不久就有人0黎觀光, winnie好唔好老皮咁話：「搞錯, 阻住哂！」haha！超好笑！ 仲有就係我地約0左 winnie個加拿大朋友 HP去唱卡啦 OK, 但係 winnie話唔好理佢啦, 難得我地可以0係山頂依泣, 結果 HP狂 call我地, 我地都冇理佢, 勁衰！ 話時話我同 audrey姐姐都覺得 HP幾靚仔, 不過 winnie話唔好玩 la, HP 0係加拿大冇人吼, 所以都未拍過拖, 講真, HP 0係香港應該唔差, 加拿大 D審美眼光果然同香港好唔同.... 之後我地去0左麥記食0野, 我好累想訓一陣姐, 百厭星梁琬婷又唔俾我訓, 又話我有白頭髮, 係咁幫我扯, 又拎 D汽水凍我塊面, 又吹 D氣落汽水度「質」我飲, 好百厭！ 最後我地去0左蠟像館, 裡面最似0既就係劉德華, 不過唔知點解0係入口度, 個職員一定要我地同成龍影相, 咁都算0勒, D人圍哂同劉德華影相, 反而李小龍就冇人吼, 真係有點兒哪個！仲有就係完全唔似樣0既梅艷芳同張國榮, 之後有班係荷里活影星, 仲有一班外國遊客0係度睇, 我地竟然分唔清邊 D係真人, 邊 D係蠟像, 搞到我地唔敢掂 D蠟像, 驚係真人扮 gei, 真搞笑... 之後奀皮鬼梁琬婷又0係度扭計0勒, 佢話要食咕嚕肉 wo, 大佬 ar, 太平山頂點搵咕嚕肉俾你食 ar, 我地由山頂搭返纜車落山, 再搭地鐵去旺角買 eason新碟, 途中 winnie口中淨係識講三個字 -「咕嚕肉」！ 我地0係信和買到陳奕迅新碟 U87, winnie一見到隻碟0既 size即刻大叫, 因為可以放得入 CD架！依家十隻有十隻都係老蓮咁大, 都唔知為咩, 隻隻都大到放唔入 CD架, 咁大托咩, 又送車又送樓, D歌好聽, 自然有人買 ga la.. 就算包裝得幾靚, 唔好聽就係得個「零」, 如果係唱得好 gei, 又點怕 download wo, 睇下 eason隻碟幾多人買, 我0係信和買, 我話唔該陳奕迅新碟丫, 個老闆已經將幾廿隻陳奕迅新碟, 逐隻逐隻放哂入個袋度, 一有人買就立即遞俾佢, 就好似一早知有人買咁, 所以話呢...真金(穎雄)不怕紅(姑)爐火！！！ eason隻新碟回歸原始 size, 正爆！！陳奕迅隻新碟勁正！！ 《葡萄成熟時》、《浮誇》、《大個女》、《不良嚐好》、《三個人的探戈》... 真係正到爆！陳奕迅0既歌聲加上黃偉文0既詞, 呢五首歌真係無與倫比！ winnie話, 陳奕迅唔係新四大天王之一係正常0既, 因為佢已經係歌神級數！ 點解要降落天王級？ 買完 CD後, 梁琬婷又故態復萌, 不停0係度講「咕嚕肉」, 我就諗來諗去, 都係認為得灣仔街市有, 所以我地就長途跋涉去灣仔0勒！ 去到灣仔, 我又唔記得灣仔街市0係邊, 個天又落雨, 我地搵0左成個鐘都搵唔到灣仔街市, 一路0係修頓兜圈, 奀皮鬼梁琬婷依家先話搵唔到唔食都得 gei, 我梗係唔制 la, 都搵0左咁耐 lor, 結果都俾我地搵到灣仔街市, 不過佢話未開市, 激死我地！ 諗住走時, 第二檔又話有咕嚕肉食 wo, 終於, 我地就開開心心咁食咕嚕肉同油菜0勒！ 左起：我、winnie, winnie 0係加拿大識0左八年0既 HP... 都唔明點解 HP未拍過拖, 又高大 (高我兩 cm度), 手長腳長, 又打籃球, 又大隻, audrey姐姐都話覺得 HP幾靚仔, 唔通加拿大同香港0既審美眼光真係唔同？ 我地搭纜車上山頂 lu, 影返張靚相先！ 岩岩上到山頂, 不過影唔到後面個景, 全個香港... 我地0係蠟像館裡面扮《scream》隻0野, 好搞笑！ 左邊0個個係蠟像, 右邊0個個係遊客... 「你有冇腦 ga！？」依家愛因斯坦個「腦」正在美國研究中.... 聽講話世界頂尖的科學家已經放棄了挽救不了的地球, 在美國影子政府的協助下 (布殊只是傀儡), 正在研製「挪亞方舟號」太空船, 唔知幾多年後, 將會攜同全地球所有物種的 DNA上太空船, 尋找新星球定居, 當中包括攜帶埋愛因斯坦個「腦」上船.... 呢張相係咪好懸疑呢..好《X-file》feel, 左邊0既係莫探員, 右邊0既係郭探員... 點解會有道光0既？唔通...王子顯靈！？ 微臣參見女王陛下！ 第二次世界大戰影響世界的三大巨頭, 英國首相 Churchill, 德國獨裁者希魔, 同埋我！！！！ 「有冇頭緒 ar郭丹娜 (Special Agent Dana Scully)？」 「我搵到 D野 wo莫霍斯 (Special Agent Fox Mulder)...」 The truth is out there...《The X-file》 布殊？阿諾舒華新力啤？「x」！ 恐怖大師希治閣 version 1... 恐怖大師希治閣 version 2... 月亮代表我的心...歌后鄧麗君...幾壓韻 wo！ No！NO！NO！ 從力學角度0黎睇, 照計阿貓王咁0既姿勢, 再拎埋支結他, 係冇可能企得穩 ga wo！ 麥當娜約左麥當雄去0左麥當勞道0個間麥當勞食墨魚撈當歸... 回程搭返纜車落山, 老婆好疲累 wo... 終於搵到灣仔街市, 百厭星梁琬婷終於得償所願, 我地0係街市食咕嚕肉同油菜, 仲有叫多杯凍檸水, 我發覺我地好「佬」law, 叫都係四十八銀咋！ 又好味, 又抵食, haha... 就係為0左呢碟咕嚕肉, 而走了很多地方, 搵了很多地方, 睇下我對你幾好...>< 0黎街市食飯又點可以唔叫碟油菜呢？winnie食食下都話好彩我有叫多碟油菜....

>>August 5, 2008 at 4:53:52 AM GMT+8

2005 年 6 月 6 日 星期一 【晴】

今日係我廿歲生日, 梁琬婷一早就俾個 surprise我, 就係晨咁早就捧住個大蛋糕上我屋企, 當時我仲未訓醒, 何況梳洗！？我從來未俾人見過我岩岩訓醒咩都未執個樣, 今次俾梁琬婷見到我個殘樣, 點算！？梁琬婷仲話： 「唔緊要 la, 你已經係我0既人0黎 la, 哈哈哈！」 可惡, 我叫佢玩住電腦先, 我去沖涼... 原來 winnie係唔識由天水圍0黎香港仔 ga！佢話頭先0係金鐘落車, 唔識搭咩車0黎, 又搵唔到巴士總站, 嚇死佢！我都已經叫0左好多次, 叫佢唔好自己一個人搭車0黎搵我 ga la, 佢又唔聽, 一個路癡迷路係正常 gei, 點知佢真係膽粗粗自己搭車0黎搵我, 真係大膽, 萬一迷路, 又或者俾拐子佬拐0左去點算？一個離開0左香港八年0既路癡, 俾人賣豬仔都唔出奇....... 沖完涼, 有生日蛋糕食！食完生日蛋糕後, 我地睇碟, 係一直好想睇0既《love actually》, 好正, 我仲睇到喊, 個細路突破海關, 0係機場追個女仔0個幕真係好深刻, 個細路最終0係個女仔上機前趕到, 但係個細路冇表白到, 因為個女仔認得佢, 仲叫佢個名, 個細路覺得, 已經很足夠了, 呢一刻, 我同 winnie都異口同聲講0左一個人出0黎：「呢個係阿郭！」 睇完《love actually》, winnie本來預備帶我去一個地方0既, 不過佢話好遠, 今日應該唔夠時間, 所以我地落0左去扭蛋, 繼海洋公園之後再次同 winnie扭蛋, 佢仲越扭越興奮, 我話乜今日唔係我生日咩？點解反而我送禮物俾你 gei？ winnie又講佢0既口頭禪：「咩 wo！咩 wo！」 之後我地又去買生日蛋糕食, 今次0既係士多啤梨蛋糕, 我地去0左平台食, 好好味！ 跟住破壞王梁琬婷見到平台有好多蝸牛, 好明顯因為岩岩落完雨所以走出0黎, winnie竟然見到蝸牛就踢, 就算0係牆上面0既都照整落地踢, 仲越踢越興奮 tim！ 佢話：「唔踩爆佢咪叫仁慈 law！」恐怖！ 及後上返屋企, winnie同妹子0係度砌扭蛋, 食完飯送 winnie返屋企, 臨別前佢話仲有0野同我講, 我話生日快樂丫麻！佢話：「你點知 ga！？」 搞到佢勁冇癮, 超好笑, anyway, 多謝 winnie陪我過了一個很難忘的生日, 很久沒有人陪我過生日了, 謝 la！

>>August 5, 2008 at 4:54:07 AM GMT+8

2005 年 6 月 5 日 星期日 【綿綿細雨】

今日同 winnie爸爸媽媽去了赤柱, 我地食完0野後, 就分頭行動了, 等 winnie爸爸媽媽離開了視線範圍後, 我地又開始如常地依泣0勒！我地0係個堤上面坐0係度傾偈, 見到個金髮鬼妹仔行過, 五六歲度 la！聽到佢叫住佢 D家人： 「wait！stop！」我又細細聲跟住佢講：「wait！stop！」 點知咁都俾佢聽到, 個鬼妹仔仲另轉頭望住我, winnie梗係笑不攏咀 la！ 之後我地去0左爬石灘, 好明顯「姐手姐腳」0既我始終都「跣」低0左, 我地坐0係懸崖石上談情, 好舒服, 一望無際的海, 坐0左個幾鐘, 我地之後行0左好耐去赤柱沙灘, 又坐0係度看海, 同埋 winnie幫我個留言信箱錄0左段 intro, 係唔岩音同唔岩 key 0既《離開是為了回來》, 當然 la, 佢都冇聽過首歌, 全部都係靠聽我唱而 get到個音, 所以話呢, 我確是五音不全... 跟住我地就行返原路走, 去搭小巴出銅鑼灣, 途中見到雪糕車, winnie梗係好興奮 la, 成八年未見過, 我地就買0左支軟雪糕兩份食, 及後等等下小巴時落大雨 wo, winnie梗係大呼好彩 la, 雖然等0左好耐架小巴先到, 岩岩到我地時就冇哂位, 但係等多一陣, 下架小巴仲多位, winnie話如果坐0左頭先架小巴, 我地就唔可能一齊坐 lu, haha, 再一次證明, 當你開心時, 甚麼事都變得如意..... 最好笑我地落車時, 我落0左車後諗住遮住後面0既梁琬婷, 因為真係好大雨, 點知 winnie玩0野, 俾第二個落先, 搞到我囉哂, 0個個人都微微咀笑, winnie...梗係笑不攏咀 la！可惡！ 《離開...是為了回來 --- 林一峰》 明天就要飛走　朋友都輕鬆奉上祝福　旅途愉快 留低是個選擇　離開亦未算放開一切壓抑 如愛上一個人　一起上路　才驟覺尚有一些心野 行程未想好　起點經已太遠 人進進出出在我生命　季節更改幻變天地　歲月流過 遺憾若是放不下　仍可學習去感激得到過的 如放棄一個人　孤身上路　才驟覺尚有一些心軟 忙著讓傷口盡快風乾　沿路風光沒心機細看　明明是太軟弱　偏裝作硬朗 倘若結束為了重新開始　乾掉了酒為了重新斟滿 旅途落泊能讓記憶穩固　偶然下雨懷念陽光可愛 歡樂太短為了回憶千次　失掉瑰寶為了尋找安慰 我離別你全為太專心愛　怕忘掉了世間的色彩 離開　是為了回來 從機艙機望向跑道　迅速身處萬尺高空　我留下你 城市跟天空大概一樣　容納著敵友從不知道偏心 曾遇上幾個人　一心靠近　才驟覺尚有一些心癮　離別再上路　不管遠或近 倘若結束為了重新開始　乾掉了酒為了重新斟滿 旅途落泊能讓記憶穩固　偶然下雨懷念陽光可愛 倘若痛哭為了趁早解脫　失掉瑰寶為了尋找安慰 我離別你全為太專心愛　怕忘掉了世間的色彩 離開　是為了回來 明天就要飛走　朋友都輕鬆奉上祝福　旅途愉快

>>August 5, 2008 at 4:54:22 AM GMT+8

2005 年 6 月 4 日 星期六 【晴】

今朝我地約0係銅鑼灣等, 之後就搭車去天水圍, 我地0係巴士上狂搞 gags講笑, 例如話譚詠麟小心身體 la, 因為八十年代紅的歌手差唔多死哂！ 我地又去仙跡岩食0野, 一坐就坐0左成個下晝, 皆因我地一邊食0野一邊畫相, 0係海洋公園影0既相上面寫0野, 好正好舒服啊！點解？因為我地好耐未試過咁輕鬆, 好耐未試過咁悠閒, 咩都唔駛理, 咩都唔駛煩, 所以我地久不久就大嗌：「好輕鬆啊！」 梗係 la！成個禮拜咩地方都冇去, 咩事都冇做, 日日都去康寶萊, 依家無事一身輕, 正到丫！ 我地食0左勁多奶油吐司, 個 waitress見到我地寫緊相, 仲話 D相好靚 tim！ 因為0個陣冇咩人, 如果多人, 睇下仲趕唔趕我地走, 我地結果坐0左成三四個鐘, 好舒服！因為太耐未過過呢 D咁無憂無慮0既日子0勒！ 我地離開仙跡岩後, 就去0左行 VCD鋪, 一行就行0左成粒鐘, 我地揀0左好多碟, 基本上全部都係 eason D戲或者演唱會, 我仲買0左《森美小儀歌劇團 - 早安曼克頓》tim, 正！ 我地行0左好耐先發覺, 原來有好多老夫老妻行 VCD鋪揀碟, 搞到我地都好似老夫老妻咁, 超好笑！ 之後我地去0左公園坐, 見到 D細路仔0係度玩, 我地就好似老夫老妻咁坐0係度乘涼, 我地都有一個共同願望, 如果永遠都係咁就好0勒！雖然好多蚊, 但係0係晴天黃昏, 兩公婆0係公園乘涼, 真係好舒服, 很爽, 好自在, 又有涼風, 咩都唔駛煩, 咩都唔駛諗, 咁0既生活, 乎復何求呢！？ 我地坐到夜晚, 就去買飛睇戲, 一套叫《星際快閃黨》0既笑片, 開場前我地仲去百佳拍拖買生命麵包入場食, 兩公婆去百佳買0野食, 真係好老夫老妻感覺！之前揀位時, winnie話揀後面0既, 但係我就話前 D唔好咩？ 事後先知原來 winnie入場唔係想睇戲！今次我點解 get唔到 ga！？ 真失策, 結果我地入到去都唔係睇戲, 係訓覺, 哈哈！ 咁平凡0既日子, 真係好開心好舒服, 辛苦0左一個禮拜先知, 原來咩都唔理真係輕鬆, 好自在, 好舒服！飲下0野, 行下 VCD鋪, 坐下公園, 行下百佳, 睇下戲, 只要對方係自己最愛的人, 平凡0既事都可以係最幸福最開心0既事...

>>August 5, 2008 at 4:54:38 AM GMT+8

2005 年 6 月 3 日 星期五 【酷熱】

今日上了 winnie婆婆家, 同 winnie婆婆、winnie媽媽食 lunch, winnie婆婆好鐘意我, 仲叫我陳仔, 好搞笑！ 之後我地陪 winnie婆婆去老人院, 由柴灣去到太子, 途中不停搏加分就唔好講0勒, 係做0左好多 winnie諗唔到0既0野姐, 因為 winnie神經實在太大條0勒！ 送完 winnie婆婆去老人院, 我同 winnie就去0左深水步西九龍商場, 過過下馬路, 0係架巴士後面行過,「馮」！！！架巴士0係卅幾度的大熱天氣下向我地噴熱氣！ 我地0既反應一致係...狂笑不停！唔知點解, 就係覺得好好笑, 我地就邊行邊笑, 因為大熱天時下有架巴士向我地噴熱氣呢件事, 實在太好笑0勒, 其實... 係因為彼此有了大家, 甚麼事都變得好事姐... 之後我地去0左匯豐銀行拎錢, 結果要等成粒鐘, 本來 winnie知道要等成粒鐘唔知點好, 但係我話一個鐘好快過 ga姐, 我地就一路聽 eason一路等, 結果我地完全冇理會身邊的人, 聽到《隨意門》、《打得火熱》、《專家話》、《第五個現代化》等歌時, 我地即刻手舞足蹈, 又唱又跳, 雖然我地感覺到俾人怒啤, 但係我地自得其樂！ 一個鐘的確好快過, 我地拎0左七千銀, 跟住就去尖沙咀, 一日利息, 盛惠九個大銀, 結果我地還完 $7009之後, 就搭返車返柴灣... 返到柴灣, 我地去0左仙跡岩食0野, 好舒服！咩都唔駛理, 結果我倆0係仙跡岩攤屍, 咩都唔理, 無事一身輕真係正到爆！ 但係坐0左好耐, 有對吸煙女人走過0黎坐0係隔離台, 搞到我地即刻埋單走人！ 我地0係柴灣商場逛0左好耐, 又入書局買信紙同筆, D筆係買0黎0係 D相上面寫0野0既, 我又無聊買0左個路牌, 仲有我地買0左兩個樽仔, 裡面有張紙仔, 好似 D人0係荒島上寫0左 D 0野, 之後放入個樽度0個 D呢, 我地就買0左兩個, 打算依家寫 D 0野落去, 好似時間囊咁, 埋落地下, 唔知幾多年後, 約定一齊掘番出0黎睇, 諗起都開心, 好好玩, 係咪好浪漫呢？ 臨走前我地經過間時裝連鎖店, 見到有個核突袋賣 $50, 本來已經核突 ga la, 個袋上面仲有個 batman logo, 我指住話簡直係到達核突0既頂峰, 個 batman logo直情係錦上添花！winnie又笑到「痞」0係地, 佢話個袋係核突之最, 個 batman logo有劃龍點晴之效！我話送俾我都唔會要 la個袋, 結果我倆企0係人地鋪頭前, 指住個袋笑0左幾分鐘, hahaha, 兩條友都係傻 ga, 咁真係好笑 ar ma！ 送0左 winnie上樓, 諗住走時, winnie姨媽叫我入去坐, 一坐又坐0左成粒鐘, winnie姨媽不停叫我地食0野, 又汽水又冰多又雞翼, 結果我地一邊食冰多, 一邊睇電視, winnie婆婆仲話：「咦！？陳仔你又0黎0左 la？」

>>August 5, 2008 at 4:55:00 AM GMT+8

2005 年 6 月 2 日 星期四 【微雨】

今日好辛苦, 同梁琬婷去0左好多地方, 做0左好多0野, 經歷0左好多事, 不過幸好, 有梁琬婷在身邊, 加上...這是最後一日了... 今日一朝早就同 winnie去0左尖沙咀, 得一個人0係度, winnie表姐未返, 我要申請紅簿仔, 成廿歲人連戶口都冇真係陰公... 結果同 winnie行0左好多間銀行, 間間都要住址證明, 但係身為人子的我, 又何來電費單、水費單？有都唔係我個名 la, 所以我地就打電話返去 st.peter同 st.gloria, 問下佢地可唔可以證明我個住址, st.peter話唔得, st.gloria話可以幫我整張離校紙, 咁我同 winnie就急急腳由尖沙咀走去灣仔, 行行下 st.gloria條長樓梯時, winnie話七月八日佢已經返0左加拿大, 陪唔到我放榜, 依家當陪我行0左一次, 去到 st.gloria office, 佢話要一個禮拜, 最少都要三個工作天, 但係 winnie求0左佢好耐, 終於由三個工作天縮短為一日, 再由一日縮短為一個鐘, 勁... 及後0係 delifrance俾 winnie鬧0左一餐, 我地就由灣仔返回香港仔匯豐銀行... 等0左一個鐘, 終於到我地, 不過佢地唔接受離校紙0既住址證明, 但係佢話理論上係同父母一齊住, 所以就叫我返屋企拎出世紙同電費單、水費單.. 之後 winnie就幫我搞埋 D手續, 我就返屋企拎0野... 來回折返匯豐銀行, 個職員話我拎錯0左父母張結婚證書, 結果我又要行多一趟.. 最後終於申請0左本紅簿仔, 我同 winnie就起程返尖沙咀... 當時真係好煩, 呢樣又唔係, 0個樣又唔係, 都唔知點辦好, 加上已經做到呢個地步, 究竟我應該怎麼辦？堅持下去？還是浪費過去一星期的時間與辛勞, 劈炮唔撈？ 因為我0既關係, 令我阿媽同 winnie俾人狂鬧, 我個心真係好唔舒服, 點解要咁 wo... 我咁辛苦為咩先？都係0個句 la, 我係大仔, 我老竇又係大仔, 我仲係全家族十個孫中的嫡子, 論平輩, 我係大阿哥, 咁我就要負起責任, 養家、養父母、養妻活兒、供書教學... 到頭來, 咁辛苦都唔知為咩, 為0左邊個？呢個禮拜唔好去拍下拖, 行下街, 睇下戲？ 呢 D咪叫有自唔在, 囉苦0黎辛, 成個禮拜咩地方都冇去到, 咩事都冇做過, 點解要咁辛苦？去玩唔好？仲要俾人鬧, 各方面都受壓, 我真係好辛苦...究竟為0左咩？咁辛苦為咩？又係時候出阿展金句： 「認真, 是一件吃力不討好的事...」 winnie仲成日喊, 佢話佢返香港得一個月時間, 咁就0徙0左一個星期, 咩事都冇做, 咩地方都冇去, 佢話浪費0左四分之一0既時間, 所以好唔開心, 究竟..我應該怎麼辦？ 我同 winnie表姐講, 如果得我一個人俾人鬧, 冇問題, 我會照做, 仲好 tim... 但係因為 winnie同我阿媽支持我, 所以累到佢地都俾人鬧, 我個心好難受, winnie表姐問我, 依家我阿媽仲支唔支持我, 叫 winnie唔好答, 我諗0左一陣, 我話：「唔支持了....」winnie事後同我講返, 佢當時心諗, 我答得0岩, 如果我答：「我阿媽仲支持我...」咁佢表姐就會話： 「人地龍仔冇人支持都做, 何況你仲有你媽媽支持？」所以 winnie覺得我答得好... 不過當我話：「我阿媽唔支持了....」winnie表姐就話：「咁咪做 law！」續說： 「你話 ga ma, 你話冇人支持仲好, 因為唔想阿媽支持自己而俾人鬧, 所以..做 la！」 winnie事後同我講返, 佢話佢打0左個突, 咁即係話, 阿媽支持又要做, 阿媽唔支持都係要做, 所以事後 winnie就同我講, 無毒不丈夫, 既然係咁, 決斷 D, 唔好做0勒！ 因為我同佢講, 我又唔想得失自己屋企人, 搞到反哂面, 事事服從就最好, 但又唔想得失 winnie表姐表哥, 話哂呢個禮拜 winnie表姐表哥推哂 D客, 就係幫我地搞, 依家先話唔做, 玩咩, 0徙哂人家 D時間, 始終都係 winnie表姐表哥, 唔想得失佢地, winnie就話, 我經常都係咁, 唔想得失任何人, 事事都做到好圓滑, 無錯, 凡事留一線, 日後好相見, 但係咁既話, 辛苦0既就只有自己, 凡事都要顧住兩面, 自己又唔想得失任何一方, 成為磨心...所以 winnie就同我講, 無毒不丈夫, 決斷 D, 唔好做0勒！自己開心就夠0勒, 唔好理人家點諗... 我話, 0個兩個係你表姐表哥, 係你0既親戚, 我唔想得失佢地, winnie話：「so？」 其實最大原因, 係 winnie想快 D搞掂康寶萊, 最後一個禮拜咩都唔駛煩, 玩盡佢, 等到佢返0左加拿大之後, 我先開始, 但係 winnie表姐唔俾, 佢問我地... 寧願呢個禮拜玩盡佢, 但係日後辛苦, 定係呢個禮拜唔玩, 日後幸福？ winnie已經為浪費0左一個禮拜, 浪費0左四分之一0既時間而喊過不少次, 所以如果連最後一個星期都冇得去玩, 佢一定接受唔到, 因為佢唔知自己幾時會再返0黎香港, 幾時會再見到我, 一年？三年？十年？十六年？冇人知, 所以佢好想0係最後一個星期, 同我去更多0既地方, 同我做更多0既事, 為了..留下一個美好的回憶...如果只得一星期, 真係唔想白白渡過, 因為咁, 所以 winnie叫我決斷 D, 唔好做0勒！ winnie仲話, 活在當下, 自己開心就夠0勒, 唔駛怕得失任何人... 返了香港仔, 上了姑姐姑丈家, 俾佢地省到一面屁, 真係唔知...咁辛苦為咩.. 真係唔知...呢個禮拜咁辛苦為咩, 早知就咩都唔理, 同梁琬婷拍下拖, 行下街, 睇下戲..開開心心, 輕輕鬆鬆咁仲好, 有自唔在, 囉苦0黎辛, 認真確是一件吃力不討好的事... 夜晚..我終於忍唔住, 爆喊了, 呢個星期真係好辛苦, 受好大壓力, 好煩, 好多0野煩... 最終得個桔, 仲浪費0左一個禮拜, 咩都冇做到, 咩地方都冇去到, 仲累到阿媽同 winnie俾人鬧...下晝0係 delifrance度, 又俾 winnie鬧, winnie問我點解當時唔反搏佢, 唔鬧返佢... 我話..我唔想同心愛0既人噪, 唔想同心愛0既人鬧交, 縱使有點兒委屈, 我都照忍... 愛侶在溝通、相處之上, 最容易出現「恆久忍耐」與否的問題, 要找出一個中間點, 真的不容易... 愛是恆久忍耐, 又有恩慈, 愛是不嫉妒, 愛是不自誇, 不張狂, 不作害羞的事, 不求自己的益處, 不輕易發怒, 不計算人的惡, 不喜歡不義, 只喜歡真理, 凡事包容, 凡事相信, 凡事盼望, 凡事忍耐...

>>August 5, 2008 at 4:55:23 AM GMT+8