2005 年 3 月 6 日 星期日 【乍雨乍晴】

今日有舖摷野瘾....
我搵番小學同中學的班相, 成績表同埋獎狀
雖然有d霉味, 邊邊泛黃
但呢d都代表左一d歷史嘅痕跡...

令我最回味的係小學的成績表同埋班相
當年個樣真係勁戇居喔~~

一邊睇一邊回味當年喺學校天井拎住支忌廉飲的日子.
既簡單又美好^^

>>March 6, 2005 at 5:06:10 PM GMT+8

2005 年 2 月 27 日 星期日 【乍雨乍晴】

頭先睇cable, 原來琴晚杰倫去過尖沙咀同觀塘
這麼近, 那麼遠, 我地緣慳一面囉.........

睇左在世界中心呼喚愛啦...
嗯, 的確唔係我想像中咁想喊
可能我就係犯左個毛病, 就係等喊位囉...
結果期望太高之下, 得唔到應有的效果...
我仲要衰到打呵欠...因為...我睇10:00pm場
套戲又慢...我不經意咁打左好幾次呵欠..

哇, 今日做乜鬼咁凍.......
我著埋襪d腳趾都係咁凍嘅.............................

>>February 27, 2005 at 4:52:39 PM GMT+8

2005 年 2 月 26 日 星期六 【颳風】

最近嘅天氣真係玩死人....
明明前日熱到我想著短袖衫,
琴晚喺我冇乜準備之下
又大風又毛毛雨.....好凍.....

最近睇到一個廣告, 好有感覺
有一班好可愛嘅BB, 唔同國籍的
用佢地最純真嘅演技演活左短短分零鐘的片段...
講緊係惠氏奶粉那個廣告
正如旁白林海峰講, 佢地明知故犯, 唔會俾面你
但係當佢地扭計, 你仍然會將你嘅父愛母愛發揮極至
抱佢, tum佢, 只要佢一笑, 你就笑...
BB就係有呢種魔力...
我喺度幻想緊, BB嗰時我係咪都有放任過? 享用過BB嘅特權?
細個時想大個, 大個時想變番細個...
大個真係好煩, 扛好多責任, 面對好多問題...

見到惠氏班BB, 或者堂姐的小新BB, 真係羨慕...
佢地唔駛用SKII, 唔駛抗衰老, D皮膚已經BON BON聲
佢地唔駛早起身返工, 鐘意訓到幾點就幾點...
佢地唔駛驚冇人要, 因為佢個個爭住要...

係囉.... 好似好多感觸

>>February 26, 2005 at 1:11:10 PM GMT+8

2005 年 2 月 20 日 星期日 【乍雨乍晴】

今日下午出左去上蛋糕班..
今堂做tiramisu...
今次輕鬆d啦, 有發蛋機, 唔駛發到手軟...
不過呢, 今次個賣相冇咁good....
個餅邊都係...有d岩岩杉杉囉...
另外, 餅餡可能撈得唔勻循啊...
所以...有d有酒味, 有d冇囉...
anyway, 我會再努力的啦~

唉...死, 岩岩有件事搞錯左...
好唔開心啊, 點解會咁大懞架....
好嬲自己啊.................................................

>>February 20, 2005 at 8:55:29 PM GMT+8

2005 年 2 月 20 日 星期日 【乍雨乍晴】

我個紫色頭變左桃紅色....好MK
(其實岩岩染的時候已經好桃紅色)
琴日都係返去搵師傅補救
YEAH~終於係我喜歡的紫色, 真係開心...
不過咁, 聰明嘅人先會睇到紫色,
XX的人只會見到黑色, 呵呵~~
SORRY SORRY, 講笑者....
其實係我叫師傅較深色D, 紫藍色, 襟D囉, 所以第一眼未必見到紫色者...

呢個禮拜d天氣真係好似玩跳樓機咁
星期四好熱好濕, 星期五dom一聲跌左十度...
今朝聽聞得9度tim...

長假期之後返左成個禮拜工, 今個星期仲要返埋長週
雖然呢個禮拜工作唔算密集, 就當係warm up副"計"
但係個人都係冇乜電, 叉極都係好攰...

上個星期日睇左個好好嘅節目
就係星期日檔案, 嗰晚主題係囍宴
講緊兩對新人點去籌備佢地嘅婚禮
呢兩對新人, 性格好極端, 但偏偏走埋一齊
中間好多片段都好感動的
我明白到,
其實兩個性格咁唔同的人能夠走埋一齊,
"包容"真係好重要的...
能夠搵到個包容自己的人, 真係一件好幸福的事
所以都戥嗰兩對新人開心的

呢排我發覺自己越來越自閉...
我會因為"D fd多數都唔得閒架啦" 而唔打電話俾fd
跟住又會因為...
"條街咁多人, 冇乜衫著, 都係費時寒寒酸酸出去
算啦, 留喺屋企訓覺啦..." 於是, 成日就在屋企望住個鐘虛渡左
姑勿論以上係藉口定係理由, 我就係唔想見人, 唔想出街...
所以覺得自己越來越有病...
我有嘗試去解決, 例如出去行下...
但如果要我自己出去行, 我真係越來越唔想囉...

前日買左忽周, 今期飲食男女介紹台北...
當然唔係講緊西門町, 士林嗰d啦...
好似天母同忠孝嗰兩間cafe
仲有嗰間lounge bar...電影館, 我都好想去...
可能趁easter幾日假期過去囉...
唔知啊, 籌備下先...

>>February 20, 2005 at 12:13:14 PM GMT+8

2005 年 2 月 13 日 星期日 【晴】

講左好多次, 整蛋糕啦, 整蛋糕啦
琴日終於的起心肝lu^^

對上一次整蛋糕, 應該係F.3 cookery啦
嚴格來說, 我都冇真正參與過做蛋糕的過程
當年個partner成日借d e嫌我手腳慢, 點我做d唔等駛的事
例如洗碗咁囉, 連"西"麵粉都唔俾我做...
學咩人講"整蛋糕"啊..:(
所以好多第一次都係來自琴日的蛋糕班

琴日我做的蛋糕係白之戀人朱古力慕士....
由於時間關係, 老師一早幫我地做好餅底
我地只係做個餡, 即係慕士...
首先, 老師幫我地分好晒d蛋+ 奶,
人生第一次整蛋糕的第一個步驟就係發蛋...
"發發發!!!" 隻手起勢咁發~ 個人認為發蛋係幾好玩的
由本來黃色的蛋, 不消2分鐘, 已經發至淡奶色至起泡狀態
(好有滿足感...^^)
然後加入白朱古力, 同埋魚膠粉, 淡忌廉
將呢幾樣野拌勻, 然後倒入個模...
聽好似好簡單, 其實都有橋妙的...
個蛋糕咬感滑唔滑都要睇呢個步驟做得好唔好....
我呢...........因為攪得太開心, 攪得太耐, pat mousse太粘...
倒模時太漿, 唔得均勻囉....
最後要老師出手幫忙囉......

最後呢, 製成品甩模之後, 塗上忌廉
然後鋪上白朱古力碎裝飾, 完成~

當蛋糕放入個盒的時候真係好有滿足感架
比起美心聖安娜d餅, 真係唔輸蝕架^^
"原來我可以, he..........:D" 沾沾自喜的偷笑......

我第一時間捧個蛋糕同佢地分享
佢地都讚good啊~

雖然今次整餅遺憾係參與時間唔係好夠...
但經過今次整餅經驗, 發覺整餅真係好好玩
我諗住遲d再報其他班上...雖然都唔平
但其實出面學或者自己屋企整各有各好囉
出面學就多d工具, d料又ready好, 又有靚package
自己屋企整就多d參與, 經濟d囉...

琴晚我去豐澤睇過d焗爐, 價錢都ok架,
不過唔知買幾多度先夠用
等我下次問老師之後就買啦

>>February 13, 2005 at 5:50:18 PM GMT+8

2005 年 2 月 8 日 星期二 【暴雨】

今日年三十
先拜個早年~
恭喜發財!!
心想事成啊~

我今日都幾充實架, 出左去整頭
諗左好耐, 染唔染紫色...
因為驚返工唔方便...但最後都唔理,
總要放膽去的, 何況今日送舊迎新...
染左有d唔滿意囉...d色唔係好均勻...
有d好桃紅色, 其他就好紫...
唔緊要啦, 靚仔師傅話如果唔滿意
過多兩星期再去補色喎....
我諗我多數要去補的了...

整完個頭, 去左堂家姐屋企食飯
同小新BB一齊過年...呵呵

我諗而家好多人行緊花市啦..
我怕逼, 所以決定留喺屋企平靜地過

好啦....講到呢度

>>February 8, 2005 at 11:09:21 PM GMT+8

2005 年 2 月 6 日 星期日 【陰】

等到啦, 今日開始放假, 放到14號返工...
(阿媽琴日話14號唔利開工, 做乜揀嗰日
下?! 到我揀架咩?!
可以的話, 我都想放多一日得一日啦...)

琴日真係辛苦, 鹵味一聲令下
各地office琴日要大掃除....
雖然平日都有清潔阿姐打掃,
但, 嗰位阿姐都唔係撈的, 樣樣係咁夷....
搞到琴日我同阿so係咁呢度抹嗰度抹
原來個office真係好污濁
真係攰死囉........我喺屋企都冇抹得咁搏殺
當我打掃完好攰想抖一抖之際,
大陸班天王天后又打電話來話好急要落單
頂~講好左星期五要落晒PO架啦,
完全當我講的野冇到.........
最過份係丟晒d野俾我做, 之後佢地即閃,
放工走人, 唔知咩態度
講起佢地真係好勞氣囉...
駛人唔駛本...

唉, 年紀大機器壞啊,
呢排身體真係虧虧地
前一排就大脾關節痛到我行路跛下跛下, 岩岩好番...
而家輪到d手指腳指, 唔知做乜又紅又腫又痕...
琴日至今日起得仲犀利...
我懷疑係咪虹火蟻咬呢....
但屋企, 公司都買年花啊....
而家唔敢拗佢, 但最驚蔓延到塊面囉
所以聽日要嗱嗱聲去睇醫生啦....
可能又要打針....雖然驚, 但冇計啦....

>>February 6, 2005 at 11:17:33 AM GMT+8

2005 年 2 月 1 日 星期二 【乍雨乍晴】

近期我越"辣"越多火頭...
個人又暴躁...所以周圍發炮鬧d同事
有時衰到d客都會鬧...
oh...我每次發炮之前都有盡量克制...
但最後嗰啖氣唔發出來都唔得
於是.......
唉...我真係唔想咁臭脾氣的
快d放假啦, 我心靈上需要調節下

>>February 1, 2005 at 10:19:30 PM GMT+8

2005 年 1 月 24 日 星期一 【微冷】

煩死....
都唔明d大陸人..
乜都嗌急...
急急急, 食屎啦..
妖~

上星期呂同學fax壹週刊一篇報導我睇
原來我有個小學同學, carrie chau鄒蘊盈
佢而家係好紅的illustrator
睇完都有少少以佢為榮.
話晒我地都係同學, 雖然唔熟
身邊又多左位名人朋友啦...
數數手指, 其實身邊都有唔少有為的同學...
但點解我就仲坐係一個一眼睇晒的office?
日日都俾人催都成隻狗咁呢?
真係羨慕有為同學嘅成就,
亦羨慕佢地的敢作敢為...
自己活得咁平庸, 有時都抵自己死的
又冇技能, 又冇膽
有咩搞作都搞唔起啦...

唉...好傷心...唔想講啦

>>January 24, 2005 at 9:32:21 PM GMT+8