2005 年 6 月 18 日 星期六 【陰】

呼~ 返左一個禮拜工...
仲記得第一日, 心情非常緊張, 沉重
因為驚第一天返工遲到不好,
於是早一個鐘頭出門...
"嗯..............."
竟然8:10到...點算...咁早上去好奇怪...
由於附近冇地方可hea, 算吧, 上去吧
之後在reception坐左成個鐘先有人理
簽contract, orientation, 影staff相, 遊花園
差唔多10:30先真正返自己位...

見到當初in我的manager, 心情又緊張起來
不過佢好nice的, 每講完一句說話, 都會向我微笑..
呢個笑的確平伏我唔少不安&緊張 :D

佢俾左d schedule & duties list...
跟住另一位同事俾左d野我做啦
簡單講左d supportings係d咩, 然後就要我做啦
坦白講, 講完同就咁俾一疊野乜都唔講係沒兩樣的
可能佢已太熟練啦, 再想不起當新人那種完全沒概念的陌生感
唔緊要啦, 我盡量抄低重點, 盡量消化, 盡量做, 唔明即問囉
作為新人有時會問一d很有問題的問題
還好, 那同事都幾nice, 會答我的, 算係咁.

總括呢個星期, 可以話輕輕鬆鬆的渡過了
由第一日唔識路去toilet...至今日toilet & pantry都知,
甚至自己走去第二個dept拎野都識啦
(自己去架, 而家想起都有點得意, hehehe)

工作嘛, 會踫到問題, 但唔係d咩大難題, 問一問就行啦
琴日agency打電話俾我問我做成點
我就話ok啦, 只係搵data的事情要熟習, 其他ok
佢就話問左幾個candidate只有我咁輕鬆
我即時愣了一下, 係咪我太低估了?
還是我而家做的未到戲肉?
anyway, 希望事情發展落去係順利的,
凡事盡力而為, 唔明即問囉.
我諗這是我現在能做的吧.......
god bless me~

>>June 18, 2005 at 11:30:40 AM GMT+8

2005 年 6 月 12 日 星期日 【酷熱】

同平時星期日一樣, 呆在家,
收拾心情, 等待明天上班...
不過今日心情比平時更忐忑...
聽日要返工了, 心情好緊張...

聽日著乜衫呢?
會唔會做出好多`b皮的事?
去完toilet, 轉個頭唔識返自己個位?
(我未試過在那麼大的office上班喔...)
d人係點的呢, 會唔會難相處?
會唔會冇人同我食lunch呢?

啊~ 個假期可否extend呢?
好驚啊....................................

>>June 12, 2005 at 5:53:18 PM GMT+8

2005 年 6 月 11 日 星期六 【酷熱】

正所謂"未吃五月粽, 寒衣不入籠"
雖然呢句說話已經唔係好岩數
但今日端午節, 的確係入夏以來最熱的一日...

食左粽未? 我食左兩枚....
被迫食左兩枚囉...
係啊, 本人對粽, 月餅等應節食品唔係咁熱衷的
最後所有應節食品變晒我喜歡的零食~~

每年呢個時候霞姐都會好忙的包粽
包好多好多的粽
跟住我地成個禮拜三餐都係粽~
係啊, d粽好似五餅二魚, 食極都有
天啊~~~~
但願粽's week快d finished.............

>>June 11, 2005 at 2:14:50 PM GMT+8

2005 年 6 月 8 日 星期三 【陰】

返左兩日工, 其實都ok架, 環境, 人事都ok...
可惜琴晚差不多收工時,
突然收到agency的電話, 話canon那邊firm左我啦........
都唔知開心定唔好開心好.......(我真係唔係講風涼話架)

因為新公司對我唔差, 返了兩天又唔做, 玩野咁...
真係好難開口啊...但最後我覺得冇論點,
都係好難開口的, 我諗坦誠係最好的了....
今早本來8:30返到去, 諗住講完即閃...
點知日本manager又遲返, 9:00幾先返...
佢返來之後, 我咪提囉,
唉...佢地真係好好啊....我而家仲係好內疚啊

anyway, 要向前看, 希望將來有機會合作囉...
同埋, 我想安定下來了,
我已一個月內遞兩次信, 我希望可以盡快進入番工作狀態...

>>June 8, 2005 at 12:36:16 PM GMT+8

2005 年 6 月 5 日 星期日 【陰】

聽日返新工啦, 有d緊張...

琴日舊公司同事琴日約食lunch, 其中三位台灣同事好耐冇見啦...
well, 見番感覺怪怪的, 我以為我地會有講唔完的話題,
事實又唔係.........寒暄幾句近況之後, 接不下去了...
我有一種傾得唔夠放的感覺喔...
可能大家都有同感吧,
於是不自覺地我地分開了台灣人 & 香港人兩組...
由搵位食飯至食飯都keep住呢個組合...

後來, 兩位香港人食完飯提早離隊, 剩番我同埋台灣同事...
本來我都想離隊, 但留底的作用係帶路囉,
雖然沿途大家都有傾偈, 但我感覺到, 係因為佢地見我被冷落, 而走來講兩句...

"我唔要施捨..." 心裡想...

大概大家都感覺到尷尬場面升級...
佢地走的時候瞞住我續攤...去左蘭桂芳玩,
點解我知道? 因為佢地打電話俾我問點搭車...
我唔開心係因為佢地唔夠坦白囉.........
我都知要賣甩我都尷尬, 咁點解唔可以瞞到底呢?
而家知道了, 我覺得好奇怪...你估我好想陪玩的嗎?

本來佢地想我今日幫佢地諗節目, 我唔會主動搵佢地架啦, 佢地自己搞掂啦~

>>June 5, 2005 at 4:53:33 PM GMT+8

2005 年 6 月 3 日 星期五 【酷熱】

呼~ 事情終於有了定案了~
我搵到工啦~ yeah~
呢份工我都ok鐘意的, 希望做落都ok啦

嗯...其實, 另一方面我仲希冀緊一個機會
canon那邊, 唉, 本來我得左的了,
但唔好彩殺出個程咬金, 有位內部員工申請internal transfer
而個manager都幾鐘意佢, 但問題個staff的boss唔放人
so, 佢地要多兩三日決定囉...
坦白講, 那位internal staff有絕對優勢, 所以我都預左冇機的了
但過程中我冇遺憾, 反而開心自己原來都唔係1st round就俾人叮走
亦唔係徹底喪跑或陪跑一族...可能就係差那一點運氣...
既然盡了力, 有得入圍已經當中獎了...
(喂喂喂, 當左自己係影后嗎??)

同埋, 好開心呢段灰暗的日子裡面,
我找到朋友聽我吐苦水
而朋友都俾左好多鼓勵同埋意見我
真係好多謝你地啊~~~~~

>>June 3, 2005 at 5:32:36 PM GMT+8

2005 年 5 月 31 日 星期二 【晴】

休息左一星期了...
冇工返的日子一樣充實
其中三日去interview,
聽日都會繼續interview,
其實interview都幾佔時間的...
in親都用左半日...
返到屋企上下網搵工...
不知不覺就過左一日

雖然今次我目標係大公司,
預左用多少少時間去搵, 去等
但, 我係多麼想尋尋覓覓嘅日子早一點完結呢...
真係想快d有一個定案啊...

>>May 31, 2005 at 7:31:44 PM GMT+8

2005 年 5 月 25 日 星期三 【陰】

提出了.........

我最後都頂唔順個阿姐, 琴日提出辭職啦
同佢傾嘅過程, 我覺得佢仍然堅定佢自己個方式
咁係冇問題的, 我都深信,
自己辭職唔係要逼佢改變, 而遷就我囉
我唔能夠改變別人, 但我可以改變自己...

辭左職係放底左一舊石頭,
但同時另一舊石頭又加在身上....
當我冇工揸手就唔撈...阿爸阿媽一定鬧...
所以琴晚我懷住一種沉重 & 戰兢的心情返屋企...
猶豫左一陣, "我辭左職啦..." 好隨便咁交代左件事...
然後我本能地低下頭準備迎接佢地d反應, 訓話等...
點知....
佢地好冷靜, 好似一早知咁...叫我慢慢搵囉...
我個心當堂將那一舊大石都丟掉..................

不過, 我休息的同時, 都要努力搵工了
之前因為心急, 又冇乜準備之下,
求求祈祈有工請就做...最後又搞到那麼樣的田地
我唔想重蹈覆轍了, 希望會搵到一份不賴的工已滿足了~~

>>May 25, 2005 at 4:20:38 PM GMT+8

2005 年 5 月 22 日 星期日 【酷熱】

琴日走去睇星戰III, 其實都幾好架
但自己狀態唔好, 開始冇耐就訓著左...
到後來先識醒....呵呵

過去一個星期為左工作的事煩...
台灣同事嘅舉動, 新公司阿姐的無理,
搵工嘅進度, 下一份工作嘅方向等等...等等
其實我曾經諗, 係咪如果一直留在舊公司,
就冇呢d煩惱呢? 係咪就相安冇事呢?
我係有少少懷疑係咪做錯左決定
無論如何, 事情要向前發展的
揀得轉工, 就要承擔後果...

舊公司的manager打過俾我, 琴日都有同舊老闆通過電話
manager問我而家工作點, 有冇意思返去做...
講真, 我係唔滿意而家份工, 但唔代表我會返去
留人嘅時候, 開嘅條件都係美好架啦....
事情丟淡之後, 又會打回原形....
不是嗎? 我仲會返去嗎?
仲有, 我點努力都唔及台灣同事做的一些些...
只因我唔係台灣人...係唔公平的...
所以我更冇意思食回頭草...
而家幾好啊, 大家留個好印象囉

新工嘛...唉, 其實都冇乜野架啦...
雖然個阿姐un頂, 但我有我嘅方法應付佢囉
佢冇理取鬧時, 我咪駁佢咀囉...
橫掂都唔打算長做, 佢又吹我唔脹的
只係每日d野都好急囉....
做緊野嘅時候脈搏會加速,
成日趕死線, 同時間鬥快...
一個月, 兩個月, 三個月仲可以...
但要我成年都咁過活, 會死人的...
我唔想為左d咁嘅工搞到面容扭曲, 繼而皺紋滿額...
係咪先?! 冇意思架嘛....

唉...我真係冇事業運嗎?
做親都係d騎喱工, 幾時犯完太歲呢?

>>May 22, 2005 at 1:08:36 PM GMT+8

2005 年 5 月 16 日 星期一 【晴】

三日公眾假期, 兩日要返工...返舊公司
個新同事整亂左個stock list
搞到其他野都亂晒.......
總之, 一句講晒, 返去執手尾.......
一執執左兩日.....唉...
但...我覺得唔抵囉...
今日我明明有返工...同個台灣同事一齊返
老闆娘找佢, 佢同老闆娘講喺公司...
但就話只有佢自己一個返.......咁我呢?
仲有, 個stock list亂左, 明明係我搞番好的...
但佢冇提, 搞到好似係佢做的.....
其實, 我盡量唔想向唔好一邊諗.....
但係我覺得我呢兩日返公司好白費功夫囉.......
我係想人地知我有返去, 我有做野架...
於是, 我覺得自己蠢....我點解要幫佢地呢
幫左又冇人知....反而以為係我搞到而家公司咁亂.......
唉.......我好唔開心啊成件事.......

d fd一早不停鬧我
叫我唔好返去.....
我冇聽, 我仲返多左tim.........
而家真係覺得朋友忠告係岩的........
我呢次又蠢左啦....

其實, 我真係唔想諗歪左,
個台灣同事唔講我返左工可能有其他原因.........
我真係唔想諗埋一邊..........

anyway, 我下星期返去的話, 一定會求求祈祈
正如fd話齋, 商業社會, 公司點都會覺得員工做得唔夠......
冇必要滿足佢地.......我真係要認真地將呢句說話袋好

新工作嘛.........上星期中已好多了..
不過我仍然會搵工, 我大概唔會留在新工作吧
只係未有新工前, 我都會做住先

>>May 16, 2005 at 10:24:23 PM GMT+8