2008 年 6 月 16 日 星期一 【雨】

點做人阿媽..點教女??!!


今日食飯時間，一個人去左老麥食.....撞正係D
返學放學時間，真係好多人，不過算吧...反正一
個人...只要有個位比我坐響度食已經可以了，
我選了一排卡位...坐一處小位置食，起初身邊
的陌生人是個中學生....佢地食完就走，轉個
頭就坐了兩個幼稚園生，其實是誰坐下來都
冇所謂...公眾地方!!!!只不過..佢地企上卡位上玩
，你撞我.我撞你咁，撞到我幾次都算了，小朋友
唔識...原諒你，但做阿媽既係唔係要稍為阻止
一下呢?個阿媽就由得佢，最尾仲要打翻杯汽水
...整濕我....真係火都黎....但自己著住制服....又唔
可以罵得太過份......最後..我只是故意向佢阿媽黑
臉...我轉身走.....

真係老土....都唔知點教女...冇D家教，連最基本道
歉都冇，攪到我成身"痴立立"，週身唔舒服，好彩
就快放工，如果唔係都知要咁樣子捱到何時...!!!

而家諗起都仲會...又嬲又火呀....

>>June 17, 2008 at 9:49:52 AM GMT+8

2008 年 6 月 15 日 星期日 【綿綿細雨】

執垃圾~


今日為左一個膠袋，差D跌爛部電話，可惡!!!
事情係今日在總站，要吉車走，咁就落車巡
下睇下落哂客未啦，但咁湊巧又比我見到兩車之
間既連結器有隻膠袋勾住左，為左一陣唔好比
個感應器誤發有下墜物警號，咁唯有自己用手整走
佢，一踩落去，再烏低身執時，成部電話跌落去，
好彩未爛，如果唔係又要買個部，就多得個
膠袋唔少喇....!

女友知我買左份生日禮物比個妹....好似就向我
有點暗示大細超....雖然口講話唔好浪費錢去買，
但妳個樣似乎唔係咁講喎......咁係唔係即係要我
買呢...?

>>June 16, 2008 at 1:12:52 PM GMT+8

2008 年 6 月 14 日 星期六 【綿綿細雨】

返工小插曲

今日放工便會同一家人出去食飯，好耐都冇咁一家人出去喇
順便慶祝父親節....好在早兩星期已經訂左位，如果唔係今
日都唔使望有位食飯....不知道呢一餐會如何呢...?同個妹夾
錢食呢餐都唔平啊......希望食物上唔好令我地失望啦.....如果
好似上年咁，食左好似冇食咁，份份都係細細碟..的的色色..
咁..今次真係反檯架..!!

講番返工...響590去600途中，咁590有客運助理去查票，
其實呢D搭霸王車既，間唔中都會有，係常見現象
，但今日600埋站...響我車捉到個婆婆冇買飛...，咁
佢要下個站比同事登記罰錢啦....!! 適逄有少少時間便
刻意攪耐少少，響駕駛室左執右執....其實自己跟本係
想睇野...抱著八掛的心，便打開個車窗...聽到D對話....
記憶中對話大約係咁.....

職員﹕婆婆..你有冇拍...八達通呀
阿婆﹕唔記得左拍呀....
職員﹕婆婆...咁你知唔知你咁會比人罰錢架
阿婆﹕知....(開始大聲)....我次次都有買架...今次唔記得左...而家買返啦...
職員﹕冇得咁架喇....我地要寫罰款比你架喇....
阿婆﹕下.....罰錢..我冇錢喎....要罰幾多呀...
職員﹕290蚊呀要..
阿婆﹕嘩.....坐你兩個站要我買飛..而家又要罰錢..你地咪好發...
職員﹕阿婆婆...咁你有權選擇唔坐架嘛...咁咪唔使比錢囉....咁坐車就要比錢喇..

之後..我都冇聽下去了，因為要去洗手間解決一下~~~
不過又係既....一個婆婆咁比人罰錢..真係幾慘.....但同事們又做得冇錯...
究竟邊個唔著多D..見仁見智吧.....值得一讚，雖然阿婆講到有D扯火，
但同事們都冇因此而對佢態度唔好....真係有耐性呀~

去完洗手間返來已經解決左件事情...月台又再次歸於平靜~~~
婆婆..下次搭車記得買飛啊....

不過呢..係可以寫解釋點解冇買飛架，如果公司接受解釋..就可以唔使罰
，因為.我讀小學時都試過一次，婆婆..你都快D叫仔女、子孫又好..寫解釋
睇下有冇得免你罰款啦.....但..而家唔知仲有冇得咁做..但10幾年前係得的~

>>June 15, 2008 at 8:20:16 AM GMT+8

2008 年 6 月 13 日 星期五 【綿綿細雨】

美食佳餚...正!!!!


今日一放工就約左同事一齊食飯，咁放工時
就搭返自己正話開果架車，其實一開頭開呢架
車時已經覺得有問題，因為我無論點埋站...慢慢
入站又試過，35km/h落brake又試過....剎下停下,剎
下停下咁又試過，始終架車都係好『chop』..開
初仲以為自己問題，所以都係冇理佢，照開.....
到放工交更比下一個『師傅級』司機時..自己同
埋另一個同事親身坐原車出去感受下，自己做乘
客試下...都係一樣......哈哈...咁証明唔係我技術問題
啦~~~咁條氣都順D....

之後同同事落車去左食壽司....哈哈...每人食左一客
三文魚刺身，幾碟壽司...兩客定食，食到飽飽先走
AA制.每人百四蚊，可以接受的價位啦~~由知道有
壽司食開始，就愛上食日本菜的我，真係食極都唔厭
，同上次女友姊妹食果餐比較.....真係差好遠...再比上上上
次佢地生日果餐印尼野...差得仲遠.....!!!!!

原來間野要食夠600蚊以上先有張八拆咭送.....睇黎下次
都要集齊人馬刷夠佢先得喇......。下一個生日係阿湘...
睇來係都係注定要同我地食日本菜吧.....

>>June 14, 2008 at 12:58:26 PM GMT+8

2008 年 6 月 12 日 星期四 【颱風】

不擅長的下雨戰


滂沱大雨返工真係不好受....，是放假放傻了吧，自己還記著今天是放假...
好在昨晚望望個月曆，如果唔係一定比人插上雲霄，總算...有驚無險啦....
整天的工作，雨冇停過一秒鐘，在咁多天氣情況中，我最怕係『下雨戰』，
車身高，雨大睇唔清楚路就最窄洗，最不幸是還要開『孖仔』，尾卡永遠
都係靠估關門，自己為左減少出錯機會，唯有在大站嗌咪...真係講到口都乾...

呢排都係返早多，編更果個一定係傻左一頂...不過返早都有好處吧，時間多一點，
呢d時間可以比我預習一下急救課程考試，雖則係有9成信心，但有時意外呢家野..
係friend都知我係超級黑仔果類人，分分鐘一成機會我都會中招的，那個家族遺
傳病就係好例子啦......唉~~~

講講下今日好似係黑色星期五呢，唔怪得我又差d又返錯工啦......



>>June 24, 2008 at 12:14:41 PM GMT+8

2008 年 6 月 11 日 星期三 【微雨】

給朋友....


今日一清早就起左身，無所事事似的，便上網睇報紙啦，
突然電話有信息....望望電話，原來係阿靜send message
比我，其實，佢找親我次次都為了同一件事，所以未見
message內容，我都估到大概，果然如此...!!
我認識朋友雖然不多，但像她的性格的朋友，我倒是第
一個，為了喜歡的人..無論如何都不會放手，為對方付出
咁多，換來既只係對方一次又一次的"分手提出"...任誰一
個都會感到好無奈...。但，作為朋友，的確係會為佢擔
心，因為知到佢傷心咁多次，我唔知道咩時候佢係極限，
到左極限佢會做出咩事，大家...甚至..她本身都會不知道...
其實我應該點做好呢....每次很想幫助她..但我可以做D咩呢?

有時真係唔明白，如果自己咁易放棄對方的愛情，點解
當初要向個女仔咁認真發誓話會要佢一生一世..還要講未
來會娶佢呢?其實那個女孩子真的不過不失，為什麼要咁
對佢..?怎麼說對方都係一個女仔。遷就她一點真的咁困難嗎...?

呢個時候..不知她在做什麼呢?已經解決好呢件事情嗎..?原本，
很想去看一看她，但她情緒又唔太穩定，所以不敢勉強見她，
但另一方面又好擔心佢會做出咩事..會有咩想法...會有咩行動...

小伊.....有事你要出聲啊，你突然OFFLINE....唔知你發生咩事架會..
如果真係有困難，真係好唔開心，可否告訴我知呢...?如果你唔想
話我知，你都找你D朋友呀.....總會有人企響你身邊的......支持你[的。


-------------------------------------------------------------------------------------------
晚飯 (意大利菜) 〈 傾盆大雨〉


女友的姊妹生日，約了一齊食飯，一食就食左兩個幾鐘，她們講緊
將要結婚的事宜，她們討論著，我地班男仔(即係姊妹的男友)，郤
呆呆地坐著只係聽，但聽到消息中，佢地會影八至九輯相，很巴閉
啊...哈哈。計下計下..原來真係十萬左右冇走雞...真係要好多錢，睇
怕我都要加把勁了....之後大家講開門利是、過大禮、伴娘等等，見
到佢地真係傾到不亦樂乎......到左買單時候，估唔到咁抵，只係380
幾蚊，我地霸住人張枱，咁呢個價位真係非常合理。而且食物都叫
不錯。值得再去幫襯...哈哈。

回程時，傾盆大雨....有遮都唔掂，回到家我同佢都變『落湯雞』....
真係慘情呀....最衰你地啦...傾咁耐，如果早D走咪咩事都冇囉..唉.....

>>June 12, 2008 at 4:14:53 PM GMT+8

2008 年 6 月 10 日 星期二 【綿綿細雨】

回憶小時候〈早上的日誌〉


撞鬼佢丫，今日都唔知點解一早就起左身，可能..
係落雨關係掛...雨水打落屋頂...沙沙聲，嘈住我吧..
但算啦，我呢類人有度好，就係唔使訓好多都會
精神。橫掂都起算身，便做點正經事先，幫阿娟
姨錄15隻CD的MP3...共幾百首歌，話多唔多，話少
都唔少，在咁多隻CD中，其中有一隻係我以前十幾
歲時..阿媽老豆成日都播的CD『陳浩德的老歌』....
以前真係迫住日日聽，真係有點受不了....!!
今日我拿起呢隻CD，竟然自己放上hi-fi聽....人地話人不單
止用腦記憶事情，也可以用鼻嗅覺、耳的聽覺...也可以
牽起回憶....而家我便用聽覺聽緊...想起了好多細過時的回
憶..我諗起當年我還在家住的時候，日日都會一家四口一起
食晚飯的，而家..我又搬了出去住，一個月都唔會有一次，
正正經經同一家人在家食一餐飯..!!!又諗起當年要同我個妹
一早要訓覺...其實係阿媽強迫早睡，又諗起明天要返學校
上課似的..要去拾好書包等等...好多好多兒時...瑣碎的事情....。

轉眼間又過多10幾年了，回想起而家..連我個細妹都二十歲
了響今個月尾，現在問問自己呢D年間做過D咩....有咩得失..
是『得』多..還是『失』多?自己其實不願意知道，也許是
失敗多吧.....唉.........................................!!!!

DAYOFF埋呢幾日，又要投入工作，點解我當年唔比多D心
機讀書呢?如果唔係...今日，呢一刻；呢一篇，的文章就唔係
咁寫喇....

----------------------------------------------------------------------------------
買禮物 〈今個下午的日誌〉 炎熱


晏晝出左去行街，亂咁搭車，總之一見車就上...點知就去左
又一城，果度D野真係貴到...買唔落手咁滯，行行下見有間
agnse 尊賣店，腦海一閃，我個妹6月30日就生日，其實一
早已經諗到買咩比佢，知佢平時好恨有個agnse B袋，成日想
問我借黎用﹐但次次都比我拒絕....妹呀...我唔想架，我得一個
呢D咁既SIZE袋...借比你..咁我用咩呢..係咪?我就入去揀隻比佢，
SALES介紹我呢個袋，不斷推銷...又話係今新年最新的，咁我
望落都幾靚，唔大唔細，幾適合女仔用..而且又係黑色，我諗
佢會鐘意掛....!!!其實自己真係冇咩揀野眼光同天份.....，所以最
尾我都決定買左佢，比佢刷一刷張咭...我又冇左1400幾蚊，唉....
算吧，你生日就由你啦..今日又知你MATHS取到B級的成績，
見妳咁醒目叻女，當係獎勵你啦.....!!不過..我仲未比佢知住...
等生日果天先比佢啦...咁我覺得比較有意思吧....。

衰妹.....唔知到我生日你又會買咩比我呢?上年我買了幾百蚊既
銀包比妳，只不過我生日妳送比我只係一個多啦A夢『O古O臣』
差好遠呀.....不過上年原諒你啦，知妳冇做野，但今年你有工返
喎...可以稍為略略重手點點..只係一點點...可以嗎?

>>June 11, 2008 at 12:53:27 PM GMT+8

2008 年 6 月 9 日 星期一 【晴】

送機


難得一天的假期，女友要返晏，朋友要返工，只剩下
我一個.........!!!!但又想出去，例牌動作....拿起電話往電
話簿向下按『找朋友』，好不容易找到幾個，但礙於
今日係工作天，個個要返工，始終找不到一個，就正
當我打定輸數，自己諗節目之際，Irene比了電話我，
問我有冇幾個小時的空檔，原來佢前一躺飛行，買了
一些手信給我和女友...，今天夜晚又要再飛了...所以約
了間餐廳進個下午茶，順便給我手信，我被問到幾時
會結婚...不要說笑吧，邊有咁多錢丫。我又返問她幾時
再拍拖呀?佢話冇人追..!!!!.我又說，不要說笑吧....!!!!!講下
講下，我們傾返舊生聚餐一事，據她的消息，大家似乎
喜歡到酒樓攪多D..，我諗我都要著手跟進了...。
不經不覺到了6點幾...反正有時間，送她到機場，為左要快
，佢搭機場快線，嘩.....我而家先知咁貴，90蚊一程，唔
怪得機埸快線出名冇繁忙時間，同埋而家先知點解...連家
屬都要比錢坐....但...真係好快好快....一陣間到機場...不過
佢要去『國泰城』一躺先，我照送她一起去，去到訪客止
步我才停止送她。大家說聲拜拜...便各有各走，回程時，我
選搭機場巴士，因為國泰城完全唔順路搭機鐵...計一計時間
真係差好遠.....諗真90蚊都係有佢價值既.....

我諗佢已經在飛機上了....今次佢去札幌....，期待他下一
份手信，不知佢會買咩比我同佢呢?

>>June 10, 2008 at 1:50:21 PM GMT+8

2008 年 6 月 8 日 星期日 【綿綿細雨】

回舊工作地...探班


今日返緊工時，突然有人拍我玻璃窗..嚇了我一大跳....誰呀....?!
原來係阿媽同老豆....頂丫...真係比佢嚇到我半死，原來佢兩個
要出元朗，咁我就載了佢地一程....到站又拍一拍...!!!!阿媽老豆..我
見到你喇...唔使咁吧...。碰到誰都不要繄..但知道左自己碰到屋企人，
開起車上來，硬係特別唔暢順...D燈又唔聽話..架車又唔聽話...連D客都
阻門向我作對....總言之週身唔墜財咁.....唉...!!!

放左工，便返了舊中心，昔逢今日係公眾假期，有一半多的舊同事
都不在，但有D情況永遠都唔會變，就係課託如常開課，想當日我都可
悲呢，紅色假期都要返工......。回到中心見返D小朋友..冇見好一陣子，
個個都長高左..但那一個都係冇變...都係咁懶散，在中心客串一會兒，
再一次派茶點比小朋友..真係有點手勢生疏..但又係值得回味的一幕，
當日覺得討厭煩悶的工作，今日再做一次真係好新鮮，或者是紅色日
子關係啦，都有較多家長早一點接個小朋友返過節吧..這時.我再一次見
返一D熟口熟面的家長，大家都講左幾句，大概都是問我現在的狀況吧了....
真係『有心了』...哈哈。臨離開中心，D中心舊同事都走得七七八八，只係
見返兩個自己認識的，餘下的是我離職後新聘回來的...除了同佢說聲『Hi』
同『Bye』外...真係冇第三句，下次吧....下次唔會好似今日咁....選擇紅色假期
先來.......

>>June 9, 2008 at 4:06:07 PM GMT+8

2008 年 6 月 7 日 星期六 【酷熱】

中心舊同事小聚


今日放工同simon、cynthia一齊去葵芳新都會間
Starbucks飲咖啡,難得約到班舊同事，大家都講
返自己最近的近況，simon原來仲在中心做緊，
我便問問佢..以前託管班的小朋友近況如何，原來
有幾個學生走左，同時又加左D新生，從他口中
得知D小朋友還記得我，講真....有幾個小朋友我
的確好在意，但而家已經唔係佢導師...想知到多
D都唔得，simon提議叫我回中心走一轉，見下佢
地之餘又可以碰返D舊同事....我諗了諗...始終應承
左佢，明天放工我便可以見返D小朋友....真係有點
期待....真係想睇下佢地成長到如何.....cynthia自離開
中心便到幼稚園教書，不過都幾啱佢丫，佢個樣咁
『好蝦』..唔做呢行真係冇咩啱佢做....大家都傾傾
講講左幾個鐘，就一齊搭西鐵回家....在行去搭車途中
個天又熱又焗，真係唔敢相信昨日係黑色暴雨呢....

>>June 8, 2008 at 11:36:00 AM GMT+8