2008 年 5 月 28 日 星期三 【颱風】

『涼粉+涼茶+雪糕』等於..瀉藥?


都不知吃了什麼....痾足半天，如果係食物
問題，應該女友也會一齊中招嘛....算一算
自己多吃了咩，只係『涼粉、一杯涼茶、
一杯雪糕』吧......難到足以令我攪到咁嗎?

還以為可以支持到放工，結果又再次樣
衰衰地call OCC，叫人在中途站接車，要
我在肚痛的期間諗『對白』...是多麼艱難
的事...!!!!但始終都係草草地便交代便算...我
諗.....各位老細都會體諒吧....

其實我都唔係第一次了，上次就無情情流
鼻血而Call阿sir..今次又...唉....我覺得自己
真係好倒楣呢!!!睇左醫生..只係患腸胃炎，
打針食藥，現在都好得九九十十了，不過...
回想起今天...真係情況『緊急』呢.....

>>May 29, 2008 at 11:38:59 AM GMT+8

2008 年 5 月 27 日 星期二 【酷熱】

『滾呀..滾呀..』


今日下午已經放工了，無驚無險...真順利呀。
女友今天係放假...講返轉頭，好彩今日係返
晨咁早，如果唔係...一陣佢又跟車...我可多
得佢唔少了，放工回到家...佢仍然在床上..
大概是賴床吧....!!!不過..算吧...妳返工都辛苦
的呢....讓你再訓下去啦......

過左晏少少，佢起身了，大家相討食咩今
晚，大家講了一大堆選擇，始終決定了打
邊爐.....兩條傻人一齊滾.真係爽呀..哈哈。

滾緊途中，大家問到點解會打邊爐，原來
大家都有相同共識..就係『貪方便...唔使煮..
唔使洗獲』自己顧自己.....原來..大家都係
懶人派呀....

>>May 28, 2008 at 3:28:29 PM GMT+8

2008 年 5 月 27 日 星期二 【晴】

準備開工


一陣就要開工了，今夜可以話冇咩點熟睡，
也許是杯奶茶作祟吧.....害我整晚訓下醒下...
而家已經係凌晨3:23分了，如果平日返早
的話就3:30起身.........距離應該起床的時間
還有幾分鐘.......要開始準備喇!!!

一陣沖杯濃濃既o架o非....等我精神下~~
等一陣再落七仔買多兩罐o加o非..小休陣飲...
其實我自小就訓5個鐘...以經覺得好夠的....
我都相信自己今次叫睡夠的~~~

一陣要精神呀!!!

>>May 27, 2008 at 7:47:56 PM GMT+8

2008 年 5 月 26 日 星期一 【酷熱】

嘔心


今日個天氣都不知發什麼神經，昨天還落住大雨，
今日就熱到溶咁滯......，但都叫好彩，返一大清晨，
都叫避左幾個鐘頭暑，返早更..果然係有辣有唔辣....

在返工時，最開心的時間莫過於係小休及食飯時間
吧，但今日，我差點連隔夜飯都嘔出來......!!午飯時間，
我如常去搵食，今天都叫好吧..!!站頭上就有個廣場，
裡面都有茶餐廳等等.....。今日..我隨便找一個地方去食晏，
食完了，時間見都差不多，咁我就順便去洗手間小解去開工，
在尿兜旁有個人，見佢著住白色廚師服，我諗大概都
係做廚房的吧..在洗手間中同我一樣做同一動作....但完事後...
我見佢冇洗手就出去，心想...唔係掛..做廚咁污槽....唔知佢
做邊間呢....?我洗完手....便好奇去睇下佢做邊間，其實我都
係順路落返去站頭....跟呀跟....原來佢係做我正話食果間...
佢仲要係斬叉燒的...而正話我係食叉雞飯...我當堂呆了一呆，
但都冇法啦...唔食都食左了..可以點丫，不過..我之後一路駕
車一路諗件事.....沿途都不敢開咁快...因為怕會嘔嘛..(其實講笑
..邊有咁易嘔丫).......但我話過，我下次就算挨肚餓都不會再去
果間咁既野......

而家回想起..真係嘔心..講到尾，佢隻手在小解時..點都會掂到果度...
不過..好彩的係..我而家仲未肚痛.......

>>May 27, 2008 at 10:36:32 AM GMT+8

2008 年 5 月 25 日 星期日 【颱風】

高級跟車


冇諗到下午間會這麼狂風暴雨..!!更冇諗到妳連遮都不旁身....
男人格仍然冇變，如果比我女友知我遮過妳..我諗我真係會
百辭莫辯....。但講真...咁大個仔真係第一次可以同個空姐咁近.....
就算坐機都難吧，老實講..真係好唔自然.....!

講返轉頭，妳的記性真係好好呢!!竟然可以記得當年的事，
哈....點解妳可以咁好記性呢?妳話我當年同隔離檯同學成日
整估妳，妳唔講開，我諗我唔會記起...可能自己真係冇記性啦...

由中五畢業之後呢段日子，原來大家各自都發生咁多事，在餐廳
內大家講返在做同學仔時的經歷，妳的說話先令我諗番起中學時代
種種往事，原來我同你以前有份做history project...!!都係果句啦..妳唔講
返我一定唔會記得....!!
還以為妳一定有男友啦，誰知妳話我知早幾個月『散』了，我
又估妳..以為妳一定做過三份工作以上，點知..我又估錯，原來妳係
Form Seven一出來就做呢份工，哈哈...真係估妳唔到啊....問到妳何時
變得這麼女性化﹖比我見識到『人靠衣裝...樣靠化妝』的道理，內
裡的妳仍然冇變........!!

其實大家都係，你睇我好,我睇你好....你覺得我份工幾得意，按下按下
D制，架車會行，幾舒服咁....我又話妳..妳都唔差吧，好多女孩子都想
做你呢份工丫......但估唔到妳會咁講...『人地在地上呢，就係叫『做跟車』
我地在飛上天都只不過係『跟車』吧了.....只係人地跟車係跟D貨....我地
跟機係...跟D人...我地份工只係著住套比較好睇既制服的『高級跟車』乍...

那一刻..我真係比你吹漲...講真.....死人男人婆真係冇叫錯妳的...粗粗魯魯
的說話..真係難想像妳在機上點做service.....。大家食下講下都有兩個機鐘了，
又係爭賣單的老土行為....但我始終係真正既男人...妳始終係男人婆....唔夠我
搶單比錢吧......下次啦.....比妳下次請我吧...

最後...多謝妳的手信呀~



>>June 24, 2008 at 12:16:20 PM GMT+8

2008 年 5 月 24 日 星期六 【晴】

遺『筆』記


今日放工，因有要事，出了荃灣.....目的地係如心廣場，
一切都順順利利的.....點知.......唉~~~
當時....我正當諗搭西鐵好丫.定巴士好呢﹖最終我選擇搭
巴士，仲使我有免費車唔搭...而貪舒服的關係，就出事了!!
我在如心廣場等巴士之際....呢條51號巴士線真係好鬼疏，
接近20-25分鐘一班，咁在這咁苦悶的等車時候，我從袋
中取出我部『NDS』遊戲機玩....篤下篤下咁，果然...不經
不覺間玩到有車開了，咁我如常上車..一手拿住部『NDS』及
銀包..亦同時同一隻手夾住之『NDS筆』，一嘟八達通，便
入去找個好位坐.....諗住繼續玩...誰知先發覺冇左支『NDS筆』，
下意識以為跌在原位....向地下望呀望.....點知都係冇....咁即
係跌在巴士站啦.......但此時..架巴士已經開出........

這刻我諗...支筆冇記錯好似係10蚊....但我又好鐘意....我應該
點做好呢..?最後我決定落車...搭回頭車找，我情願唔要果7個6
的車資..都要回頭找....

坐回頭車要4個4....但都不理了...唔找我係會唔甘心..我真係好鐘意支筆..
回到總站..都係找唔到，好失望，這刻我見到有個阿叔在巴士站掃
垃圾的，我就往那個垃圾桶裡望，希望找到...但都係冇，都係唔甘心..
我去問個掃垃圾阿叔有冇見過我支筆....但答案係冇....今次真係冇了...
真係好失望...

最終我都係搭返同一條巴士線再次比多次錢搭車，一路上..我完全冇
覺得自己為了車資而心痛....，我只係諗住支筆...唉...我好喜歡呢支『多
啦A夢NDS筆』..永遠離我而去....灰到爆!!!
!

>>May 25, 2008 at 8:03:06 AM GMT+8

2008 年 5 月 23 日 星期五 【晴】

我作病? 妳無賴!!


今日起身都覺得自己唔係好妥，雖然唔係話係好
唔舒服，總係身子不太精神，但又未致於要訓床
休息吧，最終..我選擇返工，上半場都算是可以
啦....我只係較細左自己駕駛室的冷氣就得，但下
半埸漸漸不妥了，就算我著住風衣再較細d都冇用，
尤其下半埸係駕第一期的列車，駕駛室同乘客冷氣
相通用，我冇可能為左自己而較到好細甚至關掉呢....
尾果幾轉真係難挨呀.....交車時，同事都問我『無事嗎』
...小師妹真係觀察入微呀!!!!!!一眼便看出我有病.......哈

看了醫生....只係感親...吃了藥就訓了，一訓就幾個鐘，
感覺已經冇事了，誰知女友見到我一冇事，見我稍為
精神一點...就話自己好酸痛呢....鬼殺咁嘈，跟官咁耐
我都知官姓咩啦......暗示要我幫佢按摩嘛，唉....唔幫佢
又一陣比面色我睇，最後我都屈服....買佢怕.....真係無奈到極點......

連一個剛好番的病人都唔放過......妳真係到我『好到不得了』....
後天下午佢就落機到香港了，等住妳和我的飯局啊...『男人婆』...

>>May 24, 2008 at 3:16:57 PM GMT+8

2008 年 5 月 22 日 星期四 【酷熱】

想我攪出人命嘛?


今日本身都無風無浪..平平靜靜.....
但今日臨收工果尾二果轉車，差d撞到人..查實，
不是我錯吧，我睇清楚燈先會開車嘛...點知...響樂湖
同天耀的交匯處....開車間，有位外賣大哥，在我面前
『打橫過』，當我死的吧.....我自然反擊啦，響佢咹......但..佢都好
似冇反應咁.....覺得老馮我刹得切嗎?好彩....大家都無事
最後..佢都過得切。哥仔呀，我要份工開飯架，想我冇左份
工嗎?其實今次都唔係第一次..唉....我都唔知下次大家
會唔會再咁好彩。

今日真好熱，世界變質了，天氣真係反常..前幾天我
還要冒雨駕車，今日就曬到暈......。今日我又回到昨天
遇到她的地方，不知道佢現在做緊什麼呢?真係好期待
和她食飯的日子，好想知個『男人婆』點變身成為一
個可人兒呢....真想那天的飯局快D到啊~

**其實真係好唔習慣呢個新日誌....經常要我加加減減..刪刪除除，我何時才會習慣呢?**

>>May 23, 2008 at 9:28:08 AM GMT+8

2008 年 5 月 21 日 星期三 【晴】

重逢..


放工了........回到家總是空蕩蕩似的，心中總是不昧味兒......
今天返工是發生一件事，當我返工時..當時等埋總站...開車前小休時間....
突然有位著上『紅噹噹』的套裝....走來拍我......第一個
反應是...嚇親....，望清楚....原來係空姐..!!! 奇怪的是..佢能
叫出我個名.....莫名其妙呢....我客氣地問佢...
小弟﹕有什麼事呢....?
空姐﹕你是否阿咩咩咩呀......(竟然能叫得出我全名)
小弟﹕係呀...你點知呀.....? (呆了)
空姐﹕不識得我嗎...?(微笑)
小弟﹕在腦中搜尋中.....(好努力諗)
空姐﹕我係irene呀...中三...3B班呀...(都係微笑著)
小弟﹕都係諗呀諗....!!!!!!!!!!!!!!!!!!
空姐﹕坐你後面比你用學生桌子夾我頭髮...再拍醒我果個呀....痛到我叫救命果個呀..!!!!! (懶激氣)
小弟﹕諗諗諗....哦...記得了......
空姐﹕記得吧.....(滿意的樣子)
小弟﹕你係『男人婆』嘛......!!!!!記得喇... (有點大聲)
空姐﹕變臉.....!!!!!!!!! 一手拍落我度.....(很用力)
小弟﹕冷不提防..中招了....雖然..唔痛....
空姐﹕作死你呀....和以前一樣咁口衰.....(扮不滿的樣子)
小弟﹕哈哈大笑....哈哈

大家在這時間裡相認大家，感覺了大家都變大過了，以前的她
粗粗魯魯的...而家竟然係斯斯文文的空姐，Irene..真係冇咩變..
都係咁玩得同埋健談.....之後我問他點會得我名....佢話比你咁夾一次
頭髮..化灰都識得你啦....大家笑了，再者...你制服有自己名嘛..傻人...!!!
她說，你現在在港鐵做呀....?我說..不用問吧....整件制服著在你面前啦......
時間一分一秒過去，轉眼已經傾左成5分鐘......本來我諗住落車去洗手間的...
而家都不用去了...!!!在月台上..大家交換了電話.....約定好下次她落機便去食飯。

我望望時間都到了，要開車走，我問佢去那呀.....?irene要到市中心搭機場巴士，
我就話上車吧..載你一程啦.....

沿途想...估不到當年的男人婆..今日會變成一個算是美麗的女子......從前大家著住
校服日日相見....現在...各有各的工作同生活....。到站了.....大家打個拜拜手勢...
各有各的離開，真的很期待食飯當天，我真係好想知這些日子她道路是怎麼樣呢.......

>>May 23, 2008 at 9:21:03 AM GMT+8

2008 年 5 月 20 日 星期二 【陰】

人懶冇藥醫


人真係好鬼懶吧....尤其係我...
有D事應該每天都要做同埋照住人地比的方式去做...
但....我冇，總係隔一天先做....一句鐘推一句鐘
卒之.....唔使做!!!!
有時同佢地太相熟，都唔係好事，如果唔係，
時間早和晚到我來....跟本唔係問題...總言之..
我在指定時間前出現便可啦......不經不覺，
四年了，有D人見住佢來見住佢走...但自己永遠都好似
走唔出咁.....

算了吧...又讓我懶多一次吧.......

其實返工已經夠辛苦喇...真的辛苦哩

>>May 23, 2008 at 9:21:26 AM GMT+8