2008 年 8 月 25 日 星期一 【酷熱】

黑色星期二....! ..『假期到數5天』


前陣子為了幫我女友個妹出住學費先，
又借用了五千蚊，當然...我都不會追佢
還啦，而且我向來都唔會點樣去催人還
錢，因為我深信，對方有心還的，不用
追佢都會還，同埋好早好早已經有一個
諗法，就係我自己願意借出的話，要有
抱住收不到錢的結果，錢係自己的，心
甘命底借出，為什麼要迫人還..?不過...
今日有個好日都唔見既朋友，約左出黎
食飯之餘，還追我還錢，我呆了一呆，
我幾時有問你借錢呢...?佢講到原來當時
食飯比錢我冇散紙，佢幫我比住先，就係
咁我冇左回事，事隔幾年，佢要我還返35個
半比佢...無錯...係35個半....係有毫子尾數的
，其實我一D印像都冇，但既然佢咁講，雖
然係笑笑口向我追錢，但我感覺得到佢好
緊張要收錢咁，直頭係志在必得，非收到
手上不可，咁果幾廿蚊，我當然即刻比返佢
啦，我仲比四十叫佢唔使找添，其實我係有
散紙，但我好想試下咁"數還數..路還路"的他
會唔會找返比我，結果佢係冇錢比我，其實
無錯借左錢的確係要還...但果幾廿蚊，你咁
大個人，又唔係冇野做，仲隔咁多年，你比
我感覺好唔知點，話你寒酸..不可以，因為
我的確借左你錢..所以果刻真係唔知比咩反應
佢，我當果40蚊係"規你向我講得出口而給你的
獎勵"，講真我真係服左佢，堂堂一個男人好
似D格價師奶咁...我真係第一次見.....!!!!

回程搭小巴返來，而家D小巴好鬼方便，
好似巴士咁..按鐘下車，但今日我搭果
架果個位個鐘壞左，咁我自然要大叫下
站有落啦，佢竟然當聽唔到，明明我叫
得好大聲嘛，攪到我要過站落車，臨下
車同佢講，我之前講左有落你冇停車，
佢答我你要按鐘先停，我話你個鐘壞架，
佢話咁你應該按前面位個鐘嘛....!!!!!!!!!!
嘩....當堂比佢吹到啤啤聲，難到你係機
械人嗎?要有指定的指示先會做反應嗎?
唉.......很過份吧...!!!!下左小巴上到巴士，
我坐正兩個學生妹前面，本來想靜靜睇
書的我，真係頂唔順兩個八婆D粗口，真
係好勁，每一句說話都有夾住粗口，仲要
鬼死咁大聲，還不止，我坐正佢前面貼住
窗口位，咁我隔離冇人..是吉位，後面個八
婆竟然可以用隻腳踩住我個吉位側邊，真
係丫...都唔知咩阿媽生架，好彩我唔係坐
好耐，下車後諗諗下...今日究竟發生咩事，
我搭兩程車都咁黑......，到我踩單車返去果
陣我幾驚炒車呀，我兩程都咁倒霉...唔知自
己呢程會發生咩事嘛，好彩..最後都好安全
到步，哈....咁都未算黑到盡....起碼有一程係
"安然無恙"

明天會更好吧...我諗.....

>>August 26, 2008 at 8:27:08 AM GMT+8

2008 年 8 月 24 日 星期日 【酷熱】

認命..『假期到數6天』


唔使開工的日子都係咁鬼死早起身，真係
好想訓耐D，但係唔使點訓既我，若你夾硬
要我訓，跟本冇可能的事，所以我選擇起身
，一起身，女友已經要出門口，返A Duty既佢
，要早上五點起身，對佢黎講真係惡耗.......。

起身無所事事，就上網亂睇，撞下撞下就入
左IVE個網，睇過先知...而家D課程真係多選
擇到丫....真係咩都有得讀，如果當年我都有
呢D就唔會好似而家咁潦倒啦...。不過有一大
半都係自己問題，上到中學真係冇心機讀書，
果時除左中文、中史、聖經課之外，全部都
係用英文教，上當Miss 阿Sir又用英文講，攪
到我真係冇心機讀，呢個亦都係我唯一"抗辯"
的藉口，而家諗返，點解人地其他同學可以
學得到..而自己做唔到丫....!!所以好明顯係藉
口吧....!!!攪到今時今日咁..都算係因果報應，
睇下當年既男人婆，原來佢成績都ok...中中挺
挺，讀得到書，起碼都叫大學生丫..... ，以前
細個果陣幫過三行D師傅做野，有一日，去坐
貨車送貨，好記得個司機同我講，問我咁後生
做呢D工...?我連忙答唔係呀...只係暑期工乍，
跟住佢又話後生仔...讀多D書啦....仲贈多一句，
『細個唔讀書..大個做運輸』...很應驗啊~~
講到尾做司機都叫運輸吧...!!!!其實我都唔明點
解自己永遠想"果樣"就得唔到"果樣"，反而仲要比
我見到我熟悉的朋友做得到"果樣"，好似女友咁
，由細到大佢都想做個護士..做個姑娘仔....，點知
當年咁巧合轉制度，要讀大學先有Nusing讀，政府
將D Nusing School Close哂，攪到佢個護士夢泡湯...
，但到最後佢都可以響醫院做，雖然做唔到姑娘
，但最後都做到個抽血姑娘......，睇得出佢已經
好滿足.....但係自己就做咩都好似事與願遺咁，
頭頭碰著黑，唔通...命格真係天早已定下..無得改
變嗎...?而家只有同自己講，雖然工作唔係太好..但
亦未算最差，要滿足現在，我諗有D事係點變都變
唔到架喇...注定的吧..。

而家我都係將D希望放上個妹度，由細到大，
唔想承認佢叻過我....事實証明冇得唔承認，
而家有個妹都讀得上大學..而且見佢都讀得
好好，希望佢真係可以繼續努力啦。仲有都
想阿媽...出D錢比個女讀書啦.......。下下都幾
皮野...我印錢既咩......!!同一個媽生，公平D好
既....

>>August 25, 2008 at 2:40:14 PM GMT+8

2008 年 8 月 23 日 星期六 【綿綿細雨】

放假無聊日... 『假期到數7天』


今曰星期日，女友唔使返工，同以往一樣，
三點不露(唔到下午三點都唔會起身)，由於
呢方面同佢性格完全唔一樣，我只要訓四至
五個鐘已經好精神的，所以我好早就起身，
無所事事，找下Plilip睇下有咩攪啦，原來一
陣佢要返公司，之後又找Grace.但佢今日有節
目，咁我唔阻人玩啦，之後打比阿芯，問佢出
唔出來食個Lunch，點知連佢都有節目，最後打
埋比Irene，連佢都話今日要開工，過幾過鐘要出
去，而家準備裝身.......唉~~~咩日子個個都係咁
，算啦，唯有自己同自己食啦，正當我諗住一
個人食自己時，Irene打返比我，話可以食，但
一定要去機場食.....要就佢返去CX City Briefing，
咁無所謂啦，反正自己有時間，一口就應承了。
臨收線都要同我講多句，時間好緊...唔會陪到
你好耐，食完坐一陣就要走，我講句ok之後一陣
見就收線.....

同佢食左個Lunch，約一個鐘多少少，大多係講佢
昨日打風點點點，今日就點點點.....一臉好無奈的
樣子，睇佢個樣好似好唔想飛呢班機，問到佢點
解，佢就話呢個國家D人出名麻煩，少少野都好投
訴，佢比我感覺係講到班機好似會『食人』咁....
好嚴重...原來免費週遊歷國都要比代價，佢講到飛
泰國仲驚，最驚係住佢D酒店....因為傳聞好鬼猛嘛....
咁一個人又係的確幾驚既....唔怪得佢~~~就係咁...成
個Lunch就係講D咁既野......時間好快過，佢要返去做
Briefing...，而我都唔阻住佢， 一句Take Care就各有各
行了.....

自己搭機場巴士出去九龍，行到6點幾，打比女友，
仲係一把未訓醒既聲，我問佢肚唔肚餓，不如約個
地方等..出去食，佢話好，就約左8:15分響廣場等，
點知我8:00去到等佢，打比佢去到邊...佢搭我響屋企，
唔係掛，心諗妳飛來嘛，15mins你點到呀，咁問佢咩
事遲啦，竟然答我要睇奧運閉幕，好....冇所謂，妳睇
，但妳係唔係應該打比我同我講聲話會晏D出來呢，電
話又冇..咩都冇，我唔打比妳我就白等啦.....。咁我這時
語氣好不滿啦，佢就反過來鬧我話等多陣都唔得.....。
難道....今次又係我做錯嗎??我都唔知為咩，我次次都要
低聲下氣同妳講野，明明係妳錯，攪到好似我錯咁，坦
白講，我識咁多個女仔中..妳都係最冇時間觀念的一個，
也許女人有..遲到的權利，但都不至於要濫用吧.......

昨晚回娘家訓，仲激死我，由錦田返天水圍，短短的路
程，竟然張D衫、裙、褲、鞋....左襯右襯，由23:00襯到去
23:50分，出到村口就送車尾，如果唔係佢咁拖時間，我
地一定可以坐到呢班車，而家要等尾班車，20Mins一班，
又要呆等，最好笑係佢左襯右襯，最尾襯左條裙，一出
到去等巴士比蚊咬到....哈哈，唉~~~都唔知比咩表情出來
呀.......睇下妳下次仲會唔會咁『知整』.....

>>August 24, 2008 at 3:19:46 PM GMT+8

2008 年 8 月 22 日 星期五 【綿綿細雨】

險些有新電話用...... 『假期到數8天』


今日無所事事，走左去圖書館借書，自問已
經做足準備功夫既我，一早已經響屋企抄好
要找的索書號碼，點知去到找極都冇，以為
短時間比人搶書..??唯有去圖書電腦檯check
下啦，但顯示響架上喎本書，又去找過，都
係冇，頂...又去查電腦，今次用電話影底全
部索書號碼，點知查完一本就hang左機，係
唔係咁倒楣呀?唯有去另一部機啦，就係咁
我就遺下部電話響果部電腦度，就咁走左去
另一部機，唔使一分鐘，已經發覺自己唔見
左部手機，咁即刻去找下正話張檯啦，真係
快手，已經消失左，唔係嘛，用咁耐電話第一
次唔見機，唯有即刻找保安問啦，佢話冇見
過喎，並叫我去行政部登記問下，我照做啦，
一問下，對方話..係唔係呢部呀??.....當堂有如
獲至寶的感覺，最後知原來係個男保安拾到，
真係要多謝人喇..thank you....
講返找書，我找到出哂汗差D唔見機都找唔到﹐
咁我問下個姐姐仔啦，佢話叫人幫我找，我估
我找極個架都冇..睇你點找，十五分鐘後，又比
佢找到，我.....無話可說啦....要練習下點找書先
得喇，或者我去書局睇本書係軟皮書，但圖書
館係用硬皮書，可能我抱住找"軟皮"而唔留意其
他"硬皮"....跟住又要唔該人，去到兩次都係人地
幫我....真係冇鬼用呀.....!!!!!!!

借完書，一出去，今日帶遮諗住擋雨的我，唔
知咩事，突然烈日當空，曬到人都傻，手上把
遮變身用來擋太陽....，講都唔信呀...昨日九號
風，唔使二十四小時又太陽猛照，想取人命咩，
真係頂呢D天氣唔順，再係咁..睇怕我又會病喇....

>>August 23, 2008 at 2:50:55 PM GMT+8

2008 年 8 月 21 日 星期四 【驟雨】

九號風球下的節目...... 『假期到數9天』


打風日，其實早就收到可靠消息話會
打八號以上的風，但又如何，放大假
既我...完全唔關我事，如果有得返工
好喇，DOUBLE PAY喎.....又他條，去
邊度找呢....?無褔消受就係呢隻喇，
而家又係得我響屋企，女友要打風
返工，辛苦佢喇，做醫院係咁架喇，
就係打風都要開工stand by...。
響呢D日子，就係勁多人Online MSN，
包括以前D舊同事同埋朋友，做Crew
既佢，無端端又唔使返工，本來要Over
night既佢，爽死啦....

正話女友打來話9號風會響醫院宿舍訓，
咁即係今日名副其實"食自己"，悶悶地
叫左隔離鄰社過來"四方城"，唉.....今日
都唔知食左咩，叫四圈食得一鋪，仲要
得3番..夾硬做，兩隻正花食打出，cheap
到唔cheap，尾果舖爛牌一堆，全么九牌
加幾隻番子，把心一橫，做十三么啦，
又比我做到喎，單叫九索，講真，做十
三么來講，咁早可以齊章真係勁勁勁勁
難得，兩家仲要唔係做索子，我呢舖食
出八成有多啦，諗住一舖返本啦，食爆
棚你地仲唔死...哈哈，仲有三隻九索未出
，自摸機會仲大，點知...黑開有條路，比
人食我仲要出沖清一色.....頂..!!!!!!!!!!!

心有不甘去睇隻九索去左邊，三隻響尾門，
有冇攪錯.....仲要係好尾好尾果隻....激到當
場暈低，但打咁耐一D都唔心痛..哈哈，一
毫子番，我次次輸都係輸左三蚊七毫，出
沖鋪鋪都大牌，但輸咁少，我諗嬴果個仲
激氣，哈哈.....

放心吧...本人打牌好有牌品既.....羸左唔會得
戚..輸唔會比你睇面色....中場休息，食完飯
一陣再打過....要用心打先得~~~~

食完飯再打過，結果都係輸...哈哈，真係少有
，我呢D打得咁穩陣都會出沖，到有得食又比
人截糊，唉.....輸開有條路，但今日D牌真係爛
得好跨，完全入唔到章，總共輸左我9蚊8毫，
好彩唔係打125，如果唔係一定輸到"扒街"，打
到10點半完場...正所謂..風吹雞蛋殼，財散人安樂
，但無論點，都叫有D野做可以消磨下時間，都
係好既......。

又收到女友電話，佢又話會返來，都唔知邊句係
真，如果返來搭的士又三計，唉....妳咁同我講，
即係要我接妳啦，唯有樣衰衰問人借架車出去，
唉.......借得多人地都嫌我煩啦，但呢D情況，隻身
出去，都唔知會變成點，果然係我的麻煩女友呀...!!!!

見Irene Online MSN，同佢傾左一陣，自己一個人住
既佢，一個女仔面對呢D天氣，真係勁，望住D風
風雨雨打向響窗門度，都咪話唔恐怖，原來做Crew
真係會令人獨立，我女友學到佢一半已經好好了，
唉...都係無謂比較喇.....!!

無所事事，上返去以前個日記睇下有冇奇蹟，當然冇
啦，以前我個diary永遠冇比任何人知道，因為想自己
可以咩都寫底記底，而家..日日都有人睇，反且唔敢
寫得咁"盡"，起碼..有些內心感受唔可以表達出來丫，
而家寫..有一半係為左比人睇，某程度上係失左D意義
，正常講..日記係唔會比人睇架嘛，而家寫完自己要檢
查下出唔出得街咁，不過，點都好啦，既然已經比人
知，自己都盡力記下當日既大小芝麻綠豆事情啦，我
都希望同人分享下自己既趣事既.....其實我係唔係應該
開Yahoo Blog呢?聽講果邊管理都不錯呢，起碼上載相
片都冇咁麻煩，又可以做分類，又有無限回應，而家
我得50個位，之前人留果D會一個一個咁Delete，有D
可惜...，但而家先轉會唔會又小題大做呢...?

朋友們......我轉唔轉blog好呀...?

【題外話....】
兩人要維繫住感情真係唔容易，睇呢首歌歌詞就知喇.........
紙婚

>>August 22, 2008 at 7:23:20 PM GMT+8

2008 年 8 月 20 日 星期三 【酷熱】

瘀到爆... 『假期到數10天』



今日陪"I"姐去政府診所睇報告，原來新界西
聯網真係好多人，有一半仲係果D南亞裔人
士，講都唔信，D仔女多到....眼見佢帶住五
個仔女，咁佢又係排隊買飛睇醫生，但見佢
竟然唔使錢就買到飛，原來係食綜緩...所以
唔使比錢....唉...就係呢D咁既人用我地錢養呢
班人，成家有手有腳...行得走得，四肢健全，
都要食綜緩，如果佢係咁多個仔女取既錢一定過
萬蚊，最谷氣係見佢個仔手度有部PSP，個女
又有部NDS，如果係冇錢，點可能會有呢D野
??我今年仲要收到稅單要我交稅，原來我就
係有份養呢班人，唉.......咁不如我都去申請
喇..唔使做有錢收....!!唉...對呢個社會真係絕望....

之後睇完報告，驚完一大輪，最後都冇事，報
告出左顯示一切正常..鬆口氣就陪左"I"姐去唱K
，而我真係坐同食多過唱，純粹比佢發洩情緒
，因為仲為那件事耿耿於懷，記到而家，咁去
唱K比佢嗌到夠，由於我冇咩天份唱歌，所以我
都無謂出醜吧，只係係咁以點左李克勤幾首歌，
但真的無意點中兩首歌，都觸景傷情令到佢唔
開心.....真係無心的...sorry!!

大家唱到夠鐘後，因為怕打風所以都各自早
點返屋企，所以係咁以食左D野便算，跟手送
埋佢返屋企，不知呢個風打唔打得成呢...?

下午搭巴士發生左件好瘀既事，估不到會發
生在我身上，話說自己坐巴士眼訓，好自然
就訓著左，縱使車程很短，但我都係訓著左
，就係咁，一路訓...訓到去總站都唔知，比
個巴士司機困在車廂中，唉....嘗試打開門出
去，但唔成功，仲要比出面D等車既人見到，
真係尷尬到極點，唯有等個司機返來救我啦，
困在車內呢段時間，冇冷氣，差D焗死我，好
彩有掃巴士車廂既阿姐打開門入來清潔時救我
，眾目睽睽下落車，走到走唔切，好鬼死瘀.......
個死人司機都唔使睇下車有冇人就落哂鬆人，
有冇攪錯，我仲要係坐單層巴士，基本上，一
定會見到我嘛...!!!真係有冇攪鬼錯..離鬼哂譜!!!!!!

其實我係唔係應該要投訴呢...?

唉..女友真係多節目...又同同事出去行街，打
風都要去，自己又食自己，唉..都好既，我有
返D私人時間，可以找我D朋友...蠻不錯吧....




>>August 22, 2008 at 4:12:23 PM GMT+8

2008 年 8 月 19 日 星期二 【清涼】

我的小學時代....最好的朋友


今日走左去幫表弟整電腦，砌電腦，
整左我足足一日，整個假期比哂佢地
咁滯，而家先知自己係幾咁out，電腦新
硬件已經進化到自己都唔識係咩，好
不容易先有返個概念，亦都好不容易
咁先完成部機，真係要謝天謝地，整
上網夾LAN線自己一D都唔識，又要找
返我學同學仔，唉~~~好日都唔找人，
一找人就叫人做野...真係..膽大包天呢
...!!正所謂無事不登三寶殿，我諗佢一
定想絕交喇....哈哈....。

傻啦..人地點會咁小氣丫，當年做班長
成日包庇佢，當還我人情啦~~~~哈~~
小時候真係開心，一齊讀書、罰企(捱義
氣果隻)明明人地好乖嘛......、又一齊種花
很多很多回憶.....真係講起大家都回味呀...
點都好啦，佢今日幫我SET LAN線，真係
要多謝佢喇，約定出來食飯，我諗到時一
定大家都會好開心......哈哈~~

>>August 20, 2008 at 12:52:30 PM GMT+8

2008 年 8 月 18 日 星期一 【酷熱】

269C 同 296C..係唔係好似呢?


今日先發覺自己眼睛係唔係有問題
，我竟然會上錯巴士，真係史無前
例，本來要搭返天水圍，就去左深
水(土步)，一日都係自己衰..去追車
，明知自己最討厭就係追巴士，我
覺得我入錢比你，你仲要我追你車
..?但趕時間，有時都要向原則低頭
，就係咁，我本來要搭269C，因為
無睇車頭路線，只係看車身路線號
碼，我錯上左架296C，其實我應該
留意到價錢有出入先係，就係因為
趕，一手拍咭，望都唔望就上車，
仲要上車訓覺，一開眼..都唔知發
生咩事，點解會去到南昌果邊，唔
通改左線我唔知?落樓下望下路線
紙，先知自己搭錯車，頂...我趕時
間架..!!!不過，佢衰極都有經過南昌
西鐵站，可以轉西鐵，但今次真係
真係要趕去追車，心知由南昌去元
朗快極快盡都要18分鐘....原本搭巴
士可以行去目的地，而家就要西鐵
轉的士，又唔見10幾蚊，雖則最後
都冇遲到，但真係趕到氣都咳.....

唉...要反應一下要求九巴好似城巴
機場快線咁，側牌都可以show中文
目的地，反正大家都係用電子路牌
，城巴做到九巴都應該要做到，撞正
好似我今日呢D大頭蝦，真係去左邊
都唔知....經過今次件事，証明我對巴
士路線係濛糊到不得了....269C 同 296C
竟然可以響同一條路出現...唉....真係玩野.

>>August 19, 2008 at 4:40:18 PM GMT+8

2008 年 8 月 17 日 星期日 【清涼】

『充實的』一天



一朝早，難得可以訓到咁耐，對面屋竟然
響度唔知做咩，鑿牆聲、電鑽聲、風車鋸
聲，工人講野又大大聲，當中清楚地夾集
住好多純正粗口....勁呀..，每一句說話都有
『形容詞』....衰得佢又好似講得好押韻咁
喎，好鬼抵死，但抵死還抵死，你嘈住我訓
就係該死啦....但我又吹佢唔漲，法定時間九
點後兼且係平日開工，唉....我都只有無奈接
受，我的確有努力再訓，但真係唔得，因為
真係好鬼嘈，十萬個不願意都要起身，打開
門望下究竟拆咩樓要咁嘈，原來先知對面屋
要換屋頂....，只見佢屋企已經面目全非，在
他屋內向上望，可以見到個太陽，嘩....效率
好高....，八掛完後...知道此地不宜久留，自己
拿拿淋洗臉，著衫，出街避下風頭，一出到去
先知天氣係咁熱，曬乾個人咁滯，我永遠都係
咁，響呢D時刻等車，永遠都冇車來，就連小巴
都冇一架經過，就算有都係滿客，就係咁，我
響巴士站曬左成十分鐘有多，先有一架巴士到，
但路線目的地唔同，但都算吧，我知道再唔上我一
定會死，就係咁我就原本出元朗就變左去上水，
無關係吧，反正我都係為左出到避難，去那裡
都唔緊要，咁上水最方便就係搭東鐵啦，唔理
三七廿一，去月台等車，突然心血來潮見到有頭
等車卡八達通機，其實腦都未決定搭唔搭頭等好
，手已經拍了卡.....架機do....左一聲，打句『可以
乘坐頭等車卡』，一有車入到去，都係冇咩特別
，D座位軟D就叫頭等，真係有少少厄錢，最少你
都好似機鐵咁，整多幾部LCD，同埋D座位整闊少
少丫，最討厭就係有對頭位，我發誓以後唔會再
坐東鐵既頭等，我發覺另一個頭等賺錢地方係罰款
，我只係坐左7個站已經有職員捉到坐霸王位既客，
佢地全部都係講國語既人，我諗係大陸落黎吧，
要求佢地Check Octopus.....佢地好有趣咁比張磁咭
車票比佢，之後就唔知發生咩事，原來比人捉到
坐冒險號都唔知，於是下一站請哂佢地落車，淨
下的人好明顯係香港人，咁係唔係意味住東鐵班
客運係唔係為左捉呢班人而生存呢....?要打聽下先
知....，不過真係幾慘..唔知頭唔知路..上錯車卡，就
咁罰錢，要罰500蚊喎....輕鐵都係290蚊...而且中招
機會低，唔怪得咁多人咁鐘意坐『冒險號』啦.....

轉轉折折去到沙田，差D迷路，因為行錯單車徑，
幾驚行唔返出去，幾經辛苦先找到個巴士站，仲
要搭車搭中部熱狗，出返去大圍，入返屯門，去找雪
梅姨食飯，難得人地返Night都出來，當然唔可以
遲到啦，食完飯時間差不多，可以接埋佢放工，
又出多去一轉，陪佢去又一城食個飯先一齊返去
，返到去..走廊好似打完仗咁，好彩對方係一個
有品既裝潢師傅，都睇得出佢有幫我地掃過我地
屋門口......果然有手尾..哈....

咁今日比你嘈醒條氣都順D，你識做時我都識做既....

>>August 18, 2008 at 6:06:01 PM GMT+8

2008 年 8 月 16 日 星期六 【酷熱】

再次去Food Expo.....


今日又再去多次『美食博覽會』，估唔到仲
多人過上次，今日簡直係人迫人..人推人咁行
，我同我女友一齊迫到氣都抖唔到，行左兩
個鐘唔夠大家都棄權唔行，雖然行左兩個鐘
，但已經買到想買既野，唯一一樣野係冇諗
住買而又買左既係"藍梅素"...所謂可以"明目"
既飲品，雖然話就話係平，比出面平一半有
多，只不過都係因為個靚女sales係咁落力講，
先至會買....覺得有少少中左美人計，不過算
啦，可以食落肚的..間中一次無所謂啦~~

回程響隧道轉車站搭的士回家，見自己抽住
一袋二袋，都懶得等巴士，都唔明點解我由
屋企去轉車站只係跳兩次錶，但我由轉車站
搭返屋企要跳五次錶，真係唔明，我今次冇
咁笨喇~~~叫佢打張飛比我，抄返個司機姓名
，找天去找人問下究竟咩一回事，比我知佢
偷我雞，我一定唔會就咁算數，次次都比的
士佬厄錢，雖然係幾蚊雞.....但我係我係都要
同你計....奈我何嗎..?

好不容易返到去，成個人好似唔屬於自己咁，
感覺到D手手腳腳係勁酸痛，行咁多年，今年
都算係最辛苦，亦都係我首次去同一活動兩
次的.....今年唔會有第三次喇..乜都夠哂皮喇....

>>August 17, 2008 at 12:52:59 PM GMT+8