2008 年 7 月 16 日 星期三 【酷熱】

婆婆生日~~~


今日婆婆生日，放工就一齊去左酒樓為婆婆
擺大壽，很久冇見個細表妹了，肥左..肥左
好多呀，真係要減肥了，如果身形似我就不
得了喇，而表弟同以往一樣，鐘意痴住我
，因為佢地知跟我出街，我一定會賣野食比
佢地食或者玩，而表弟呢成日問我有關鐵路
既問題，問到我差D都唔識得答，男仔...果然
對交通工具有興趣呀，而表妹佢地，天氣熱，
媽咪都唔肯買雪榚比佢地食，佢地就向我入手，
哈哈....細個小朋友真係可愛，只要雪榚同
汽水就開心滿足，內心世界真係簡單，真
係懷念自己仲係小朋友的階段呀，細個果
陣阿媽話哂事，自己冇得話事..就渴望話事，
好了..而家到大個喇，到有得話事和決定
事情，原來係咁困難.....唉~~~以前真係天真.......

晚上大家人齊了，開始食飯~~~嘩..D菜餚多到
食都食唔哂，到臨尾仲要整個生日蛋糕，食
都不是問題，問題係個蛋糕甜到難哂譜，仲
諗住響富豪酒店買的蛋榚會有水準...頂丫....
普通既西餅店真係好食過你多多聲呀....不過
我點都食左一件當交功課，仲問我要唔要喎..!!!
唉~~~咪喇....多謝了....

明天我要覆診，又要見徐醫生喇，跟了我個
CASE已經十一年，佢由細睇到我大，我就睇
佢由顧問醫生升左做外科總顧問醫生.，而有D
謢士就見佢由EN轉RN..RN轉NO....有D升做APN
有個今年11月還會退休添...諗起之前成日都要
入醫院住真係慘.....唔知個病會不會再復發呢....
其實我真係好擔心..唔係..應該用『驚』形容
先正確....，明天得我一個人去，很孤獨呀，
如果好似上次咁有雪悔姨陪我就好喇，但妳
要返A、NIGHT.....我又點好意思叫妳陪我丫~~~
算吧...明天的事..明天先煩.....不想而家再想了.....!

今年婆婆o既生日蛋糕..甜到漏


>>July 17, 2008 at 3:41:06 PM GMT+8

2008 年 7 月 15 日 星期二 【綿綿細雨】

同雪梅食下午茶


今日可以約到梅姨，真係好難得難得~~打幾次
電話約捱眼訓去都抵既~~。妳就好啦，有大假
放喇，做姑娘果然假期係多D人工又多D，讀得書
多果然係唔同，唔似我D咁...好似一事無成咁~~
每次約親妳食飯都係妳好自然咁比錢，由讀書
時代直到現在都係咁，或許妳還當我係當時的
中學師弟吧，其實呢....我真係有能力賣單架...!!!

同你出左黃金海岸食下午茶，我咁大個人都未試
過去D咁高檔地方食下午茶..雖然果度真係好舒服..
但價錢就....有點兒那個吧....不過，D野真係有點特
色同幾好食既.....。妳同男友咁多年仲唔結婚架...唔
好再迴避我問題喇~~~妳雖知收紅色炸彈要比準備
我架......大家坐到差不多6點先走，幾驚妳話要搭的
士出返去呀!!好彩....妳都識搭巴士既~~哈哈~

回家途中，在村口小路見到幾隻小貓咪，出世不久
吧....果然冇咩反應同意識，正話我架單車差多2呎左
右便車死佢，好彩你郁一郁比我注意到，如果唔係...
你死定了，我險些慘變殺貓兇手啊.....睇下同你仲有冇
緣啦，如果有而你又肯跟我回去的話..做你主人都冇所
謂既....大前題要你願意啊~~~~

今日既下午茶..杯野真係幾好飲架~




>>July 16, 2008 at 2:43:28 PM GMT+8

2008 年 7 月 14 日 星期一 【綿綿細雨】

通頂後.......精神 早上 【炎熱】


果然..我係厲害的..可以咁耐唔訓都咁清醒，睇到
通頂都係好精神，但只不過睇左咁耐都係睇左5份
1左右，仲有大把未睇....明天要返工了，唔可以好
似今日開OT咁睇....返工冇精神就大大獲了，要做
個有責任司機啊~~~其實架車好易駕..但如果唔夠訓
就會變得好難駕..好有難度.....

一陣應承了女友要去佢表姐屋企整電腦，唉..又做義
工，其實做義工都冇所謂，但據我知佢家係冇冷氣，
得兩把風扇仔，我就最怕熱架喇，真係好想唔去，但
如果唔去我真係唔知會變成點...大概要比佢炮製吧...想
死麼..?我還有很多事要做呢!!!所以...答案係一定要去...!
講好話今日會出去食飯，唔知又會食咩呢?我估都係食
日本野多架o拿....今晚返來先開估吧....!!!而家望望個天，
太陽咁勁，死定了~~~只好帶多兩個衫去換吧...唉~~~~
點解我會有個咁既女友架...?【嘆氣】

----------------------------------------------------------------------------
是誰...唔好彩? 【晚上】 【乍雨乍晴】


終於返到屋企喇，幫佢整電腦真係辛苦到丫，冇冷氣果然
我係生存唔到，不過真係估唔到，而家竟然仲有人用P3機
，果部咁既電腦真係掉都冇人要..，但我知道佢地經濟唔好
所以先拾人舊貨...唉...!!!算吧啦，我或者遲D換機時比我部你
用吧...!!佢表姐家有一個兩歲囡囡同埋剛出世的BB，真係好可
愛~~個囡又聰明醒目..掂呀~~~，但心有點擔憂他們，以佢地
經濟狀況，真係可以養得掂兩個囡嗎...?...為他們有點穩憂呢...
好不容易整好佢部腦，架機超慢，我又身水身汗.....好彩有帶
衫換...我太醒目了..哈哈~~

整好部腦就出去同女友食飯，在搭輕鐵時搭中個新女同事，
坐上部車都尚算OK穩定，駕得不錯...馬SIR果然名師出高徒呀
咁梗係包括我在內啦。不過途中唔知邊個唔好彩了，你還是
我呢..?在坑尾村出塘坊材..路軌波口出現問題，我知到要車長
跳車較好路軌方向先可以行，這一刻我係客..當然妳攪掂佢啦..
但見妳咁耐都唔上來，我好奇望望先知你唔夠力『跤』返好個
波口位....唉~~好彩妳咁好彩載中我，我先幫到妳手，妳知嘛..
如果比其他Senior車長見到...妳一定麻煩了...!!!不過又好難怪的..
唔知點解果個波口位特別『實』，因為我都好用力先整到，有
可能係個箱D潤滑油唔夠吧......但無論如何已教你SEND上OCC...
下次醒目點喇~~~~哈~~~講到我好似係好威咁，唔係呀..其實我都
係唔好妳好多，大家同一個"cool"..要互相照顧呀.....~~~

安全到站....叻女~~~!!
之後我和女友去食壽司，找到一間價錢很平的壽司料理舖....
9蚊一碟...仲好多款選擇，兩人食到飽飽都係130幾蚊...下次
一定會再幫襯呀~~

是日晚餐....好抵食呀~





變態哩D芥辣


>>July 15, 2008 at 5:01:43 PM GMT+8

2008 年 7 月 13 日 星期日 【雷雨】

玩‧娛樂......


為左滿足個妹..打遊戲機要求，又要買多對手制，
估唔到部機出左咁耐，個手制仍然冇跌過價，仲
係420蚊....，其實買之前感覺好似好唔值，成400
幾蚊一對，但買左返去同個妹對打遊戲，又好似
覺得好抵咁，冇自己一個玩咁悶....始終兩個玩開
心一D...玩槍GAME終於有人同我一齊作戰了..哈哈
420蚊算吧...大家開心....有了妳幫手，今次過到版了。
下次同妳過另一版...不過等我放工放假得閒先。

臨夜晚先黃雨，奇怪係個天只係閃電，一滴雨都
冇..，想點?..但都好既....起碼我放工都可以唔使濕身
丫，所以我去左超級市場買左兩盒雪榚、8包雪米滋..
幾包零食....諗住今晚一路睇電影一路食，DOWNLOAD
左200幾集...都唔知點睇好，睇開又唔想停，但又怕
返工冇精神......真係難取捨，所以我明天放假...我決定
今晚睇通頂....如果自己頂得順的話.....唉...中了『火影
忍者』毒....點算好?

>>July 14, 2008 at 6:14:09 PM GMT+8

2008 年 7 月 12 日 星期六 【暴雨】

【『Irene Wong姐姐』啊，我要返工呀，似妳般咁爽的工
作咩...!我的跟車比起妳高級跟車辛苦呀，我返到家都凌
晨2:00喇......若下次情況都係一樣，我放呢D時間的話，
而妳又有心睇的話....自己較鬧鐘在凌晨2:00後再睇吧!!
但段估妳都唔會咁傻真係咁做吧...對嗎? =.= 】
**呢段話我笑著打的，不要認真.哈哈.我相信妳係大方的 ^^**

--------------------------------------------------------------------------------------------------------------
期待!!!期待!!!


真係好耐都未試過00:55放工喇，亦都好耐冇試過
回屯門車廠交車，龍門居真係好鬼死靜，有一種好
似就比人打劫老笠的感覺..真係服了果D響屯門交車
的師姐師妹，冇返咁上下大膽都唔敢行果段『靜應
應』的路。我知道有D師妹都幾靚女可人兒啊~~真
係唔甘心呢，天水圍同屯門兩個地區分開，好難可
以大家碰頭.....多麼羡慕屯門D師兄呢....!!!

橫掂都咁夜放工，食埋個宵夜先回去了諗住，最衰
今日冇熟既同事一齊放工，一個人去食..真係好鬼悶
，但冇法啦，點都自己一個人，終於去左B仔涼粉，
食糖水同小食，嘩...原來D價錢都唔平啊...自己一個人
食左個楊枝甘露、10蚊魚旦、5蚊腸粉、1碟芒果糯米慈
共3 件、一碟雞亦尖、最後因為雞亦尖太辣，頂唔順，仲
加左碗豆腐花........自己都嚇了一跳，自己竟然可以食到咁
多，簡直係餓鬼咁，賣單要70幾蚊!!自己又唔係冇食晚飯
，點解仲可以食到咁多.....不敢相信呀我都!!!

今日發現部手機舊叉電開始有問題了，2個鐘內打幾個電話
可以用盡90%電，有冇可能呀?又意味住我又要買過新的.....
錢真係唔見洗，唯有寄望加人工方面會加得好好睇睇啦，據
聞有傳會加嘛......真係期待!期待!!

正話我在YAHOO BID左隻2手CD，1990年出第二版，1979年係
第一版，而且仲係錄音帶的，那餅錄音帶是我讀幼稚園的時候
聽的兒歌，其實很想聽返，每次聽到都會有好多小時候的回憶
，但只係餅錄音帶已經老化...走音..變聲...無以前咁好聽，估唔
到會再找到再版..而且仲係CD，有點志在必得的感覺、非到
我手不可的感覺，希望唔會有人同我爭，如果唔係我諗會係
一埸銀彈戰...講到尾佢都係絕版CD嘛....又多一件事可以期待期待了...。

很倦了....眼也睜不開......用埋最後僅有餘下的精力打呢篇Diary....真
的不行了.............訓...........訓........要訓....真係要訓了......................。


>>July 13, 2008 at 7:00:49 PM GMT+8

2008 年 7 月 11 日 星期五 【微雨】

今日放假同女友出沙田行街，行左幾個鐘...真係倦...
但冇所謂啦，佢鐘意..陪下佢吧。去到廣場買了一些
食物、文具..等等...，今日仲去配副新眼鏡呢，又用左
1500蚊，唉..咁就冇左差不多2000蚊，真係用錢容易賺
錢難呀，真係深深體會到百物騰貴的感覺...錢..好唔見
洗。馬莎、無印良品D用品真係貴到離哂譜....只不過久
唔久一次就算吧。另外..我真係頂唔住要換眼鏡，我帶
緊果副幾百蚊的，真係用得好辛苦、成日都整到對眼
好唔舒服，真係唔換都唔得...話到尾我都係靠對眼開工呢....
行行下..佢又話腳痛，是高跟鞋的問題啦，所以同佢去左
Starbucks坐左成個鐘，又用左我90幾蚊...唉~~~~
我點了一客檸檬撻，滿以為佢係酸酸的，食落先知甜到
漏，因為我最怕係食好甜的食物...但已經買左，只好照食
，亦因為太甜關係，令我飲那杯咖啡覺得完全冇味道....咁飲法
簡直係浪費....真係無奈..!!!

回家返屋企，諗住在轉車站搭的士，會快D，點知搭中架
白痴低能的司機，佢竟然唔識路，在村內兜左個大圈，但
都算了啦，因你唔識路，而浪費我時間，但我搭開都係跳
一次，最多兩次錶，你個白痴竟然收我全數，我比錢你果
陣已經諗住等你找錢，但你好似詐傻咁唔比，頂你個肺丫
，好...我算.....當比你執藥，我相信下次唔會咁好彩撞正
我D『唔出聲的客』，你咁開的士兜路，遲早比人打你一
獲甘....你因住呀~!!!

返工時車上的零食，一啖一個，乾手淨腳，最好不過，
簡直係駕車恩物....正!!!咁開工都開得開心D..一啖在口中
咬住駕車....爽呀~~~~

開工恩物...



檸檬撻


朱古力蛋糕


>>July 12, 2008 at 2:20:21 PM GMT+8

2008 年 7 月 10 日 星期四 【乍寒還暖】

低能中學生


而家D死o靚仔真係好頑皮，咩都玩得一大餐，
做野又唔理後果，香港D教育倒退哂，而家
又話唔打得，又唔鬧得，呢死人專家D教仔
方式真係累死人....講起都火起...。

話說今日返工途中，我沿住路線行，之後離
遠處見到有人好似在路軌唔知做咩，開頭我
以為係工程人員，但諗諗下又唔會係，因為
工程人員會有反光衣嘛，到我架車行近了，
先知係原來係班學生，應該係中學生，真
係冇野好玩，竟然將D石仔放上路軌上，仲係
唔係一粒，係幾粒，佢比我發現，佢地仲係
冇意識整走佢，同離開，咁我就開窗鬧地班
學生，點知仲比佢兇返轉頭，我叫佢即刻整
走佢，佢地不聽之餘，仲擺出好囂張的姿勢
之後拔足就跑．．．。呢班死仔真係丫，攪
到我要落車幫手整走佢，又阻我時間，雖然
我唔知佢係邊個叫咩名，但我認得佢既校服，
呢班死仔，我明天就用市民身份向你間學校
投訴，等你咁得戚丫．．．

如果架車中招真係會出軌，到時就大獲喇，雖
然架車低速行時係絕對有能力，壓碎D石仔，
但如果高速駛過就好危險...我地點會預計到
路軌會有D咁既野呢?到發現就放E-Brake，架
車裡面D客真係會變成點，到時都唔知停好唔
停好.....!!

玩都唔理後果，呢D咁既人都唔知讀咩書.....好彩
有人發現，如果唔係明日真係會上頭版。而家
比佢攪一攪，攪到我行呢段路都有陰影，總係
形住比人放石仔，本身駕車壓力已經好大，而家
仲攪D咁既野，精神壓力百上加斤....真係辛苦呀~~~唉

>>July 11, 2008 at 5:10:34 PM GMT+8

2008 年 7 月 9 日 星期三 【溫暖】

作病了


唉..又係落雨開工，頂丫.....最憎，都唔明點解仲
有咁多雨可以落，究竟幾時先可以好天....就算熱
到溶都冇所謂....唔好落咁多咁大雨已經謝天謝地了....

下雨天，唔覺意在魚眼鏡望到D有趣事....在Paved Track
路面行駛時，由於Paved Track儲有好多雨水，我一經過
就會濺到隔離架D車『一身水』...我當然不顧而去啦，不
過我諗今日駕寶馬既司機一定『媽』到我上天花板，哈
哈，唔怪得我啊....鬼叫我行既路面高過你咩，算你唔好彩啦~
不過今日同上次都係一樣，D雨大到望唔到路面咁滯.....間中
見到人追我車而又比我見到，呢D天氣我都會等你，我都算係
咁啦....有D師兄真係睬你都傻架....。我開工咁耐就落咁耐，到
放工佢先叫停雨喎....真係比個天吹漲....黑仔果然係名副其實...

天氣變了，自己都開始作病，而家已經開始喉嚨痛，放工走去
藥房買了Dequadin食，但都好似冇咩起色咁，睇怕都要去睇醫
生喇，又要比幾廿蚊佢賺，好似連自己都會唔錫住錢用咁..唉....
點算好呢..?

>>July 10, 2008 at 11:31:08 AM GMT+8

2008 年 7 月 8 日 星期二 【乍寒還暖】

過多個星期係阿Coey生日，又要諗送咩比佢喇，
諗黎諗去都唔知買咩送比佢好，Coey妳不如講
我知..妳想要咩啦.....我真係唔想買左妳又唔鐘意
既野......見字好話我知想要咩啦....

昨晚我先執好間屋，攪到乾乾淨淨，妳今日又一
個唔該整到成地頭髮碎.....妳究竟想點呢..?玩作對
嘛...?真係冇妳辦法了。聽到妳今日的理論，我只有
用無奈形容，原來廚房用的抹油紙巾係唔可以放入
馬桶....放左入去會塞...?!!究竟邊個教妳向妳講架??真
係比妳完完全全吹漲了...對住妳真係有點兒無言...又短
多兩年命了...

今日終於都拆開左個禮物盒，原來內面都有公仔圖案，
真係估佢唔到，真係幾靚幾得意，真係唔該irene姐喇~~
唔係妳幫手都唔會買得到....!!

CK鼠盒






>>July 9, 2008 at 12:36:15 PM GMT+8

2008 年 7 月 7 日 星期一 【乍寒還暖】

放血....


好像好耐都冇返過呢D時間了，在天黑人多的時候
駕駛的感覺好似有點陌生，呢陣子，黑色的天空只會
在凌晨見到，人都唔多見，所以今天晚上在響繁鬧的
街道穿梭....有點不慣，但怎樣都好啦，冇驚冇險完成
一天的工作，太好了。在等食飯時間時..在總站上過了
時間都未有人接車，唉...幾驚要走多轉呀，到食完飯.
另一個又遲到交車比我...害我頭一轉又趕時間起來...真係
不得不嘆服....!!放工回家，還有更激的事情來刺激我呢...
一踏入家門，便見到一袋護膚品，噢...........................
當堂跪地，面望地下..隻手掩耳...眼淚都出埋.......心只有
一句『不可以原諒』呀.......!!!!!仲咩又咁重手呀....發Q左達
咩我...!!!!!算了..我不會再出聲的..已經冇眼睇喇....

昨天遺忙妳給我的另一份手信，今日見到我袋裡才記起，
雖然我不喜歡食糖，但呢兩粒糖真係好可愛....講真..冇可
能捨得食左隻貓佢...我諗妳都冇諗過係比我食吧....

等接車時...


今日晚飯前最後一轉


我們發了達麼?


另一份手信...


>>July 8, 2008 at 3:44:24 PM GMT+8