2008 年 8 月 14 日 星期四 【酷熱】

十年前的回憶


今日陪梓華一齊去醫院探佢個朋友，據知佢係
做完個大手術，還已經做完左幾日，已經送回
普通病房觀察，我同佢去果個係男外科病房，
政府醫院果然同以前一樣..都係咁多人住，仲要
擺到出走廊訓，咁呢D病人，當然係行得、走得
食得訓得果D啦，去到探佢果陣剛剛見佢比姑娘
打緊針，我估大概是消炎針之類的藥吧，只見姑
娘用熟練手勢，手起針落，一拮、打藥水、拔針
，呢個過程不需要15秒，原來快過打針的說話係
有跟據的.....姑娘離開後，我地問候下佢啦，只見佢
流露出痛苦的表情，問他先知，原來正話果一針
入水大快，令到佢好痛，其實我都理解，因為我
都試過入院，知道如果咁打針真係令人好唔舒服
，不過..政府醫院..你可要點呢?想住得舒服就只有
入私家吧......。問到佢傷口如何，佢話痛得眼水都
標出來，唉.....係咁架啦，話哂都叫比人開左刀，
點會唔痛呢?問佢有冇打止痛針，佢話只有6個鐘
打一次，打完只係止到3個鐘左右，之後又要捱
3個鐘痛苦先又第二針，心想...梗係啦，手術後的
止痛針係嗎啡來的，佢點會比你亂打呢.....我唯有
同佢解釋啦....。我話都未說完佢又喊住口咁講話
之前有止痛機，用佢舒服好多呢....只係佢昨日拆
走左改打針，一臉痛苦的表情，那刻我估佢可能
已經打上癮....話哂都係嗎啡藥，打完一定會好high
，好開心.....點解我會咁講.....因為我自己都試過，
打止痛針真係打完會好舒服好high好開心感覺.....，
但當醫生要停你針的話.你要戎..都真係有少少辛苦
，因為會成日渴望打針，是『病人之常情』.....。
不過見佢似乎又真係好痛，見佢插住幾條喉放血，
又插住另一D喉，基本上，佢只有個口可以講野外
，成身都唔郁得，唉........我便同佢講..我幫你問姑
娘call醫生相量下有冇得轉4個鐘打一針啦，其實..
我知道係冇咩可能，因為呢D要求的確係過份，但
為左做比佢睇，知道有人幫佢問過，等佢心息吧...
。結果..當然話唔得啦...因為怕佢會中毒兼上癮....
是一個『標準答案』.....佢聽到唔得都只有接受現實
，只有安撫佢，過多幾天會冇咁痛架喇...都是離不
開D問候說話，眼見佢咁，我就想起15歲的自己...
都是一個人面到一個做10個鐘的大手術，諗起自己
一入手術室..比人打左一支勁痛勁痛勁痛既麻醉針，
便睡了，到醒時只記得我在手術室被人問咩名呀...
我答完又再訓過，其實原來果陣已經過了10個鐘...
但你而家問我，我只有答『我真係好似訓左一陣
間』.......其實手術奇妙之處係，不是做手術果個辛
苦，而係在外邊等你那個先係最辛苦，因為要等
你消息...那種心情真係點..可以想像到.....。

事隔咁多年，手術的痛..我真係忘記了，只係記得
我係會痛到會訓唔到，那時候我在醫院住了兩個月
，眼見好多人入到來冇耐便死去，我第一次見到別
人遺體的感覺係好深刻，在我隔離床去世的男人佢
個名..我還而家清楚記得，第一次從床簾中間的空隙
望到佢的遺體....嚇得我當晚訓都訓唔著.....怕得要死...
想起自己那個害怕樣..真係有點兒好笑.....其實..我點
解要驚...?但那時我亦學到一樣野就係..『捱窮好過捱
病』.....一個人可以無病無痛，已經係好幸運的了....

最後希望佢早日康復啦~

>>August 16, 2008 at 6:32:52 PM GMT+8

2008 年 8 月 14 日 星期四 【酷熱】

生時.....離後.....



今日同Irene去美食博覽會，響搭車途中講緊
一陣會唔會買乜買乜.....其實我真係冇咩目標
要去買D咩返來，基本上，那裡有的東西，在
超市也會有，只係價格會平少少，但為左平少
少就要抽一二袋返來，我情願當行街咁行就 算
，但佢似乎唔係咁諗，早一天已經做好資料搜
集，知道果度會有乜買要掃D咩貨，最後唔單止
袋二袋，係四袋五袋.....真係服左佢，是女人天
生購物証侯群嗎...?

回程的時候，為左就腳就搭巴士，自知抽咁多
野都懶得上去上層坐，咁唯有同佢迫樓下位啦，
我地坐正巴士個車轆上面D座位，真係一D都唔
好坐，仲要坐正對面的兩個師奶，講野鬼打咁
大聲，不知對方是不是基督教徒，對話不離開
係金句...詩歌，還在討論什麼叫神蹟..什麼叫奇
蹟，佢地妳一句我一句，攪到我地本來想訓一
陣間，都冇機會，我同她對著只有苦笑又無奈
，還要迫住聽佢地既偉論....

師奶A﹕神蹟是....假若一個人斷了隻手，冇左隻
手，但當他第二天起來，突然發現自己
擁有返呢.....就係神蹟喇
師奶B﹕咁同奇蹟有咩分別....
師奶A﹕奇蹟係一個人發現有絕症，必死無疑，
但第二日突然又話你冇事，呢D咪奇蹟
囉.....

師奶B﹕恍然大悟的樣子......

唉....!!!雖然全程她們都係圍住這個說，但留心聽
下又幾得意，她們又講人死後會點點點.....大概
說是得永生之類的說話啦.....之後都冇心機聽佢
講....，好彩佢地響第一個站就下車了，耳朵可以
休息了，我們都有相同的感覺...『得救了』
之後在車上同佢講問佢，你估人死後會去那裡呢...?
又講我地會唔會受到懲罰，又或是要去還D什麼債
等等.....。我又問佢，妳幾時感覺到自己存在響呢
個世界呢...?人總會有記憶，但無論我怎去努力去
想...也記不到自己由出世到3歲前的事，我又向她
講，我感覺到自己存在的時候我穩約記得我做的
第一件事和第一句自己記得的說話...就係『媽媽..
我個名點寫架』呢一句......。其實大家之後講到
好玄....講到不知講咩....，但原來大家有一個共通點
，就係大家都怕死後會做D咩..會去經歷咩事.......，
大家在算著自己點點會點....。越講越驚，唉......都唔
知點解呢程巴士會咁恐怖...早知係咁就搭鐵路啦.....
真係找自己笨實....

其實驚得幾多丫....該死唔使病，點解自己要去估下估
下呢?不如自己好好把握每一天吧...自己也不敢保證自
己下一分鐘會如何....。不過，有人話『開心能延長生
命....』是真的嗎..?

>>August 15, 2008 at 11:28:19 AM GMT+8

2008 年 8 月 13 日 星期三 【酷熱】

兩個人


明天放工約Irene去美食博覽會，其實年年都
有去開，今年唔知有咩做主題呢..?可能是月
餅啦~~~我諗明天去到都係試食到飽先至走，
同往年一樣吧....。諗住叫埋女友一齊去啦，
點知佢已經約左佢D同事去，咁又係既，佢個
LAB有70幾人，又化驗師又醫生又有姑娘，一
定熱鬧得很啦，也解釋到佢而家點解有咁多訂
去，是好事吧..?!以前的確我們相處日子太頻密
，攪到有陣事總會有些少時候有小吵鬧......現
在這樣反而大家好像好了一點，大家可以有今
日發生的事做話題，有得笑，比以前更好，但
家也會約法三章，說明電話要互相聯絡，向對
方交帶.....等等，不經不覺大家都5年幾了，坦白
說真係有點悶，但睇得出大家都會遷就大家，和
她一齊，從心說...算係咁吧..，雖知道唔係個個
女仔都會放心比自己男友出去同女仔約會嘛....
諗諗下自己都算是幸運吧~~

>>August 14, 2008 at 2:54:57 PM GMT+8

2008 年 8 月 12 日 星期二 【酷熱】

講不出聲~~~


今日同細妹、契妹、契細佬出街食飯(其實我
點解會有個契媽呢?到而家都唔知點解，但算
吧)，都是放工後的事了，比我見到D事，就
係響紅綠行人交通燈，見有差佬守住，如果大
家醒水都會識"守規舉 "綠燈先過，但總係有
D人會以身犯險，當佢係透明...照過，最後果
個人當然比人捉啦，估計個中招男人都有60
幾歲，其實唔知咩心態，持老賣老嗎..?搏人
會因你年紀大而放過你嗎...?我衰格講聲..抵
你死啦..不是嗎?明知會比人捉都照去喎...。

有時搭車又係咁，排隊又則則博打尖，明明條
人龍百幾人，一個唔該扮傻就插入黎，有陣時
真係好無奈...難道我要一手拖你落車，叫你再排
隊嗎...?在我地西北區真係有好多呢D人，通常我
遇到呢D無賴我都會啞忍，但心中恨不得要一手
用力拖你落黎.....有試過返緊工時，D阿伯用層出
不窮的手法阻你開車.....佢地可以用雨遮、拐杖放
在門中間，等你對門夾住佢，令你關唔到門開唔
到車，你叫咪咩....佢當聽唔到，我們都只有硬等..

人老左應該值得尊敬吧，事實上你們做左咁耐"人"
，人生經驗應該很好才是吧......!怎會做出呢D事..
為老不尊呢...?但講到尾，若我再遇著呢D咁既長者
的話，我都會由他，要我當眾喝罵他人.....我又做唔
出，亦都冇咁好氣...如果你們遇到呢D情況，你又會
怎樣做...怎去處理呢...?

>>August 13, 2008 at 5:15:40 PM GMT+8

2008 年 8 月 11 日 星期一 【晴】

所謂的放假日...


一早起身..眼都未睜大，就比女友講電話嘈醒，
聽佢語氣都頗為激動，原來是為了佢細妹入讀
學校問題， 父母睇法....總係想自己仔女可以有
咁多書讀咁多讀..學無止境....，但對仔女來說，
我諗佢地會以興趣行先，所以小芳選擇讀IVE，
不過我覺得，既然CEE有14分，奇怪點解佢唔讀
中六中七呢...?後來先知..原來14分既佢都找唔到
學校，唔係掛..係真唔係呀..?!但事情都發展到這
樣，或者讀IVE也許是一個不錯的選擇，最重要係
佢本質讀書自覺而且比較聰穎，要佢好成績畢業
我對佢都有信心.....可惜...佢父母唔係咁睇，強迫
要佢重讀.....可憐既佢喊住打電話比我地問點算，
當然我們會支持佢睇IVE啦，畢竟已經盡力找學校，
只係運動場唔好，14分都冇得讀，而我地都深信
她能力一定可以讀好IVE吧.....這時問佢現在情況如
何，原來IVE今日11點前會截止申請，女友都諗住幫
手，但因為一陣要返工，無時間陪佢找，我唯有打去
問問有冇得留住個位啦..好好彩....佢地都肯..但條件
係今日一定要入5000蚊基本學費用，小芳問佢阿媽...
一口便把她拒絕，唉.....心想，妳今天好彩我放假呢..
我立即出門口飛的去大欖轉車站，等巴士出沙田，
再打的去沙田IVE..全程用左35分鐘....已經趕到我氣咳
，點知沙田IVE同青衣IVE一樣..都係迷宮，找到我喘氣
先找到個人問...問又問..又再問...唉...真係問左唔知幾
多次，終於知點做，呢個時候小芳先趕到來，同佢攪
入學申請啦...點知原來唔收支票...要入數..要比入數紙
佢.....天呀..!!!!!!我真係好想問你學校有冇銀行呀...!!!無計
唯有又懇求佢拖多一陣，我飛的再出去入數，仲要去
D冷門銀行...."東亞"喎...真係比佢考起，好彩的士大哥
知邊度有，不過冷門銀行都有好處， 就係唔使點排隊
，小貓兩三隻..好快就到我，拿拿淋入5000蚊，終於
有張入數紙喇....又飛的返去，又用左20分鐘....自問已經
用超人既速度....盡哂能力，都好好彩，不枉此行，最後
都比我順利同佢攪好.....唉~~~~無命....。之後同小芳食
野，再送佢返屋企搭車途中，佢老豆打比佢叫佢唔好讀
..唔係掛..!!!!錢都交左喎..!!!唯有教佢"作反"啦....叫佢唔好理
佢地，自己想讀就去讀.......梗係啦...5000蚊喎...想我白比咩
。之後向女友報告行動情況，告知佢屋企會反對佢讀，不
過佢話佢會攪掂佢屋企果邊，我呢邊Well done....心諗..
梗係啦...飛的都飛左我成舊水...仲要東張西跑...仲要我比
5000蚊出來...唉...你試下話唔Well done呀...我可要翻枱兼翻
臉呀....。攪左半天終於我果Part 就OK 了，餘下係女友點講
掂佢阿爸阿媽.....不過佢咁惡死.....相信會冇問題.....。

晚上....女友回自己家"講數"，我就食自己，打比Irene佢巧合
又G Day....同佢出來食飯，食食下女友打來話...今次有D麻煩
要回家住一天，我睇來可能係"家變"吧.....，不理了，反正
我做的已經做好，繼續同佢食飯傾計，難得今日唔使陪女
友，可以同佢食夜一點，我地最後食下又傾下...講下又食下
，不覺又成夜晚點幾鐘，Irene明天下午要出trip，我明天亦
要補時間返幾個鐘，送佢返去屋企後......自己先回家...又係
打的.......今日紅綠的都搭過哂.﹐搭的士多過坐巴士，計計
下今日都用左好多錢....唉仲話儲錢喎....唔清袋都偷笑喇...(搖搖頭)

最後都收到女友電話，佢話講掂了，我意料中事丫
，妳咁蠻橫點會有對手呢.....係咪先..!!!

>>August 12, 2008 at 6:59:09 PM GMT+8

2008 年 8 月 10 日 星期日 【乍寒還暖】

煩得要命~~~


開始了，終於都奧運會喇，D項目簡直深入
民心，令到每個小朋友都夢想成為出色的
運動員，所以響任何時候都好比心機練習，
只要有碌鋼柱的地方，就可以做任何花
式動作向人...尤其係向女仔前表演一番....
就『車』取材，就立即找列車上的扶手橫桿，
做出高低降動作，仲做得全程投入，不亦
樂乎。其他同事我不知道會唔會出聲叫咪，
我不知道，但我係絕對絕對會出聲，我仲會
指明咁叫咪『某位某車門既乘客，請唔好在
車廂中做危險動作，以免影響他人，請你合
作』，我係講請你合作..而唔係多謝合作，我
係絕對會令你在車廂中無地自容，令你響咁
多人面前瘀爆的.......今日已經有兩個學生..相
信響佢心中留下一個『美好回憶』了。其實，
我都不想的，但如果出了事，是誰負責呢..?
所以...下次坐車要留心唔好做危險動作喇......

放左工..同小悠出去又一城，其實好耐都冇找
過小悠了，同佢去行..諗住陪佢買生日禮物，
可知道又一城D野出名『貴』....行左咁耐.最
後得個『吉』....其實我們傾計仲多過行，又
唔可以怪她吧，唉~~~人地下年結婚了.....總覺
得有D事好像越來越近，一直唔想諗呢D野的我
，都要問下佢..打聽下佢....究竟攪結婚有幾麻煩
，見佢下年先結...而家已經開始忙著準備，這時
又望下自己，好似咩都冇做過咁，心中狐疑自己
有冇能力，心中答覆自己....『冇信心』，或者我
一直很怕做呢D事，但學佢咁話..一生人一次，怎
可以馬虎了事呢.....。眼底看著人努力籌備，自己
就好似咩都冇準備，人地問我..我只係話儲錢呀..
邊有咁多錢喎....過多幾年先啦....到底我是否敷衍
自己呢.....?自己也不敢向自己回答....

4年一次奧運.....上一次奧運舉行的時候，冇記錯係第
一次同佢去旅行，第一次用盡自己副身家...盡地一鋪
玩左先算，結果開心完後....之後幾個月要節衣縮食呢..
那時好似是剛剛做社區中心那份工..而佢又做沖印冇
耐的時候，估不到今次奧運舉行的時候已經同佢一齊
住了，真係果陣時都估也估不到呢....大家仲轉埋工
，咩都變哂..，唔知到四年後下一次奧運舉行的時候，
我們會點呢....?唉..不想了﹐今日唔知聽日事，到時先
算喇.....

又係那樣子了.....咩都唔想諗...往往覺得船到橋頭自然
直....但你可知道..而家D船係打橫埋岸的呢...!!!!





>>August 11, 2008 at 6:24:13 PM GMT+8

2008 年 8 月 9 日 星期六 【酷熱】

是對..是錯.....?


返左工，睇個Time Table，上天今天也對我不薄，
不是我討厭的Run Number，所以完全冇覺得眼訓
，但發覺一件事自己因為趕時間，又唔記得入水
攪到我冇水飲，又唔留意電話冇電，攪到自己熄
機，要我比無謂錢去7-11叉電同買礦泉水飲，真係
昨天贏的..今天唔都唔夠比咁滯，更糟糕係返返下
工先知自己唔記得取書去圖書館還書，真係丫，我簡
直係昨天入錢落袋，今日比返哂人地，果然....用賭
博贏回來的錢係咁"唔實在"...係"過眼雲煙"...係"曾經
擁有".......唉...都係正正經經找錢先比較好呢....

晚上...有家人又阻車門...都唔明點解，難到真係咁
趕時間嗎...?我眼見個女人拖住約5個仔女，老豆負
責頂住對門，我估大概佢地係大陸下來旅遊吧.見佢
一袋二袋咁，怎麼說都好...始終唔識用售票機，佢
頂左足足差不多1分鐘....叫咪都叫到冇氣了，其他人
都看不過眼，叫佢地等下一班，誰知佢仲惡過你，不
斷話好快啦..得啦...等多陣啦..大大聲講，語氣仲好老
馮人地一定要等佢咁，最後都上到車，真係謝天謝地
了....但結果又出現左一埸車上大罵戰...大陸人vs香港人
...唉......真係唔係歧視上面中國人，但你地咁態度咁自
私的行為...真係幫唔落，再一次証明自私係無國界的......

>>August 10, 2008 at 3:17:34 PM GMT+8

2008 年 8 月 8 日 星期五 【酷熱】

玩通宵~~


好耐都未試過咁癲了，坦白說冇諗過會玩通
頂，還要打夠32圈麻雀....天呀?!...儘管贏錢都
冇用，因為打到自己都唔知自己做咩，心中
只係識搭牌...打牌....洗牌....食糊，雖然打32圈
都冇人食D咩奇牌，最可惡係我比人截左兩次
糊，仲要比同一個人截我兩次，更可惡係3番
截我8番同6番牌.....真係氣得臉都紅了~~

打牌中途大家一班人叫左個外賣Pizza Hut，6個
人分，3男4女都竟然食唔哂，不知是否大家都
響度扮細食呢..?我自問無架..我出盡全力食架...
嘩...要夾錢架....點解要扮哂細食呀....

大家打到天光先收手，日光日白大家出去飲早
茶，跟住大家食完就返工、返屋企，而我都盡
快回家小訓先，費時一陣返工唔夠精神呢...到訓
醒..雖然只係4個鐘唔夠，但都有足夠精神我開工，
返下午時間....真係有D唔習慣.....

>>August 10, 2008 at 3:08:14 PM GMT+8

2008 年 8 月 7 日 星期四 【暴雨】

病....就瓜柴了


又作病了，似乎就快會有大傷風來臨
，鼻都比紙巾抹到紅哂，開工唔帶多
包紙巾可不行了，還要帶多個膠袋響
開工時放雲吞呢....!!!

話就話睇左醫生，但食左藥都好似唔多
見好咁，係見左黃綠醫生還是病毒作出
抗藥性呢..?如果再咁下去，我跟住落黎
一定係會發燒架喇，可恨的是，冇人理我，
想妳問候半句，妳都話很小事啊，還叫我
不要傳染比妳，是妳現在的職業病嗎?還驚
死會死咁，成日洗手，算是怎樣啊?真係無
奈，比身邊的人當做嚴重帶菌者看待.........
這刻我突然諗起當日食飯，佢向我講的經歷，
佢話在異地工作作病可真可憐，一個人在陌
生的地方不懂睇醫生、不懂溝通，還要自己
照顧自己，開初..我都只係個『聽』字，原
諒我有諗過妳把它誇張化，我而家相信妳真
係會喊....，我體會到真係冇人理的感覺係如
何...。知道妳係打風stand by duty，出trip工作的
妳也要小心身體啊...!!

唉..而家起手打呢日的diary都很辛苦，腦同手都
很慢，我覺得今日打字真係好有難度，經常打錯
字。明天我還要陪佢地癲，返工放工已經冇左半條
人命，而家仲要咁....可以話係死左大半，明天我會
變成點...?真係不敢想像了，而家只有希望食多兩劑
藥飲多幾杯水，期盼明天有比而家好一點的狀態啦
......而家諗諗下，自己好似冇人理咁，都幾折墮啊...

>>August 8, 2008 at 5:14:41 PM GMT+8

2008 年 8 月 6 日 星期三 【暴雨】

自己找來的『麻煩』..


都是自己野的麻煩吧!!!!早前響元朗等等下巴士
比個女仔來做問卷調查，比左個聯絡電話佢，
就咁就中招了...!!!!今日返返下工，全神貫注望
住條路開車，突然個屁股.振下振下咁..段估!不
是架車轆到沙石吧...!!無錯...原來係電話振機，
基於安全守則，我係冇理會佢，由得佢振...但
佢實在太有耐性了，也許我冇耐性吧..，於埋站
開門時間睇睇係邊條『茂李』，來電顯示得個
號碼，但又唔知佢係邊個....算吧，但今次學精了
，我將部電放入個手提包度，由佢振個夠，果然
不負眾望，有七個未接來電，加埋之前果兩個，
總共九個，不愧係有心人呀....好毅力...!!!!!!放lLunch
去大家樂整左個焗豬扒飯，我都未据到扒，第十個
電話就來了，接了，佢先介紹自己，問我記唔記得
佢，心想...妳再煩我..化灰都認得妳呀....，我問佢打
咁多次電話有咩事，佢就話叫我上去取D資料，唉..
天仙局嗎..?我可不是笨旦呢..心想，於是同佢耍太
極，我今個星期完全唔得閒，下星期唔知，下星期
先算啦.!!!佢又話我可以就你架喎，我話真係唔得閒
哩......再加多句.其實妳而家阻住我食飯呀....我得一
個鐘，好寶貴架，最後..佢都肯收線，唉...比佢阻一
阻.我冇左成10分幾鐘，真係麻鬼煩。

到放工冇耐又有電話....唔係嘛..心諗..!!!又來呀?望下
部機，哦.唔係...原來係阿慧打來，講都唔信，佢居
然會約腳去打牌，星期六得唔得閒，反問佢，妳同
我女友friend D喎，應該係問佢啦，跟住同我講話已經
問左，頂丫..咁妳打來有咩意思呢...?妳地幾個好姊妹
一向都大哂架啦，多鬼餘......，不過去下都好既，佢地
幾個姊妹既『男友班』又可以出來比較下邊個今次慘D，
數數她們幾多宗罪事關佢地幾姊妹都係同一品種、同出
一徹.......”霸道兼惡攪』。我們都可以稱得上是男人之苦啊~

>>August 7, 2008 at 1:41:12 PM GMT+8