2008 年 7 月 6 日 星期日 【乍寒還暖】

空運禮物盒


放假天，又落雨，好死鬼討厭呢D天氣，一陣還要
出約去食飯，D假期好像比妳算起來咁，機關算盡...
但算吧，看在那盒子份上，一陣冒雨出來都要吧..!!
鬼叫呢件事只有妳才可以幫到我..點敢開罪於妳丫..

出左門口搭E34巴士出去，司機是職業車手嘛??開得
鬼打咁快，原本要75分鐘左右的時間......竟然可以縮
短到65分鐘已經到達機場….真係誇張!!往往都係咁，
我唔趕時間的時候，總會坐到快車，到我趕時間的時候
，就一定冇車兼碰到『慢駛麼王』….。早到啦，佢又未
Cleck out,我唯有去出境大堂商店小街行下逛下度下磨時
間，當中比我發現到樣野，出境大堂商店小街其中有一間
麵包鋪賣的菠蘿包係$5.5，但隔左兩隔的那張檯賣菠蘿油..
又係賣$5.5…..難到牛油真係咁唔值錢嗎..?定還是佢地攪錯
了價錢牌呢?有點兒耐人尋味…..下次我會再去睇過確定一
下個價格…..做個精明消費者嘛..!

終於接到佢電話了，當然第一時間要睇我叫佢幫我買既盒
啦，不用多說..收貨了….，其實明知香港都有得買，但衰
在佢長期都無貨返，都唔知係唔係有心玩我敷衍我的，受
夠了，我不想再走來走去問有冇了。而家收到她的速遞，
了件事，一天都光哂…!!!哈哈…。請妳食飯都應該的既….
一如以往本色真係對我不客氣…去機場間元氣食，又食左
二百幾蚊，但真係估都估唔到妳會比返半錢我，哈哈……，
唉..妳向我玩野嘛?明知我不會收啦…況且係我話請妳當係
幫我買野既心意嘛，其實大家咁耐同學又係朋友….唔好計
得咁足啦~~，係咪先，妳總有機會請返我食既..放十萬個
心啦妳..

仲有下次醒少少記得帶把縮骨遮呀妳，邊有女仔咁架，
縮骨遮都一把旁身，上次已經係咁啦，今次又係咁，
我遮得妳又遮唔到我，到遮到我同妳，妳D行李又濕哂
，最後攪到大家都係濕身好似今日咁幾狼狽呢!!

**特登打呢篇比妳睇架Irene，其實真係要唔該妳幫我買到**

>>July 7, 2008 at 2:10:43 PM GMT+8

2008 年 7 月 5 日 星期六 【綿綿細雨】

執書架~


今日放工回天水圍執屋，在書架除左執到書出
來...還跌了一張一百三十蚊出來，見到有錢跌
喎..飛身撲去執走佢啦，但係拿上手一看，看上
去好似公仔紙咁，好熟面口，其實望真D...錢係
真的，只係我已經見不慣，因為係舊款式的紙幣....
諗諗下...當年我一定好慘吧，130蚊唔知放左去邊，
到今時今日先重見天日，其實自己細個陣係唔係
唔見左呢D錢...?不記得了，但肯定係..而家一130蚊
絕對係買唔到咩，但當年中學果陣100蚊已經係我7
日零用錢，時代不同了......!!

呢130蚊...其實冇咩利用價值，有點陌生係個款式，
所以我決定唔用佢，收左入我相簿中...收藏收藏....!!!

說前去...今日返工，在洪水橋站，見到一個好熟面口
的女人追我車.....，在途中我諗極都諗唔到係邊度係見
過佢，最終佢身體話比我知，因為佢在屯門醫院站下
車，同一時間亦令我記起，佢係早幾年我在住醫院裡
7樓其中一病房的一個姑娘，雖然唔記得佢咩名，但佢
個樣我還記得起...哈哈....但..睇黎佢已經唔記得有我這
個人吧......

>>July 6, 2008 at 1:40:49 PM GMT+8

2008 年 7 月 4 日 星期五 【酷熱】

無理取鬧


今日有個正一死八婆，激到我滾過火屎，真係丫
八婆見得多呀，咁趴街的八婆真係第一次見呀....!!
個八婆上我車已經拖住兩件大大件既行李，其實
我真係可以趕妳落車，但呢D野，我都會隻眼開
隻眼閉，比得妳上車，當然係妳自己扶穩D行李啦，
你自己雞手鴨腳之餘，仲要阻到其他乘客，已經
係妳自己錯，估唔到妳個八婆拍我門話我停車停得
急，話我整跌妳D野，又話我害妳打爛D乜乜物物，
講到鬼死咁大聲，講哂粗口，慌死冇人知咁，妳真
係以為我會怕妳嗎?又唔知自己聲大夾冇準，但好彩
，呢個世界有天理，妳慘得過我有乘客幫我噴返你呀....
妳都真犯眾憎喇，架車咁迫，妳仲塞咁多野入我車，
唔比其他人插妳就奇啦...!!我雖然由頭到尾都比妳鬧，
比妳『媽』我....，但妳唔好以為妳好威，我唔出聲只
係保護自己費自比妳捉痛腳，事實上..幾十個人罵妳..我
跟本唔使出聲....你個死八婆，阻我一分幾鐘....攪到我趕
頭趕命趕時間，雖然係咁，但我一路駕車就一路聽到其
他人係咁起勢鬧妳，直到妳比人鬧到趕落車咁滯，呢轉
車雖然趕，但係呢轉亦都係咁耐以來最爽的一轉.......

又一次証明..乘客眼睛係雪亮的，只要做好自己，自然會
有人幫你，真係好多謝果幾個咁好火既阿伯阿叔.....!!都係
果句啦...如果妳個八婆唔滿意咪投訴我囉....我會怕妳咩?!


正話講起朋友.....真係好幸運識到雪梅姨啊~~~突然好想找
她添...其實可唔可以請返妳食一餐飯呀...?我不是仲係當時
妳識我果個細路仔呀.....而家..我有能力請妳架....希望今次
約妳..我做主啦~~~決定呢幾天內找她...yes!!!!!

>>July 5, 2008 at 2:25:16 PM GMT+8

2008 年 7 月 3 日 星期四 【酷熱】

少有既晚飯約會


今日朝早阿影唔知吹咩風...打比我，嘩.....
我地都有一排冇見喇，差D唔認得妳，完全
未見過妳著成咁。仲以為認錯人。
原來轉左工，哈哈....做會計?!!妳呢D頭腦..真係
做得黎...我口未講..好似知我講咩...已經比佢『
啤左啤』...很厲的眼神啊!!!!約定放工食飯，出左
尖沙咀就妳放工啦....過左美麗華商場食日本野
....呵呵..原來都唔平呀，我都有點兒就住食，
不過..好彩妳唔大食，如果唔係我就傷喇。

講真....由做兼職便利店識妳到而家，真係第一次
見妳呢個LOOK......咪幾好囉...斯斯文文...算係咁啦
在車站 忍唔住影左好個LOOK....唉~~~比返妳喇...
自己Save返佢啦....記住下一次請我食野呀...今次
食左我咁多.....好似前世欠妳咁...唉~




講真....睇唔慣!


>>July 4, 2008 at 2:48:29 PM GMT+8

2008 年 7 月 2 日 星期三 【酷熱】

First Aid 考試....


今天算是順利考完試吧，雖然抽中吹BB，
但都算OK啦...Step冇錯，包紮就考我包手
包頭，雖然包得未算係最好，但點都唔會
令到我肥掛，基本上都好有信心...

今日做雞..真係好得閒，響depot左度右度，
沖下涼、入下沙..勾下車又一天，返工放
lunch陣見到冇咩阿sir時...用自己部機出來
影左幾張相，哈哈....!!!

嘩....我都唔話得啦....對你個表弟......!
到時比email比我啦...阿yan

為了說明一點...相片是列車在DEPOT完全靜止不動且冇動力情況下影，
絕對冇做出莽顧其他人的行為...














>>July 13, 2008 at 6:58:32 PM GMT+8

2008 年 7 月 1 日 星期二 【晴】

『筆』.....歸來了


之前唔見左支NDS筆，今日我個妹竟然找到有得買，
而且仲買埋比我....真係醒目，算是失而復得吧!!今次
我一定會好好咁看守住佢，唔會再比佢跌...

臨放工都要落一陣過雲雨，真係頂個天氣唔順，走時
見到大哥成呢D老行專，一齊傾開計，之後去飲左杯野
，響餐廳佢過左我幾招，希望用得著同埋改善到我問題
啦，問到佢做左咁耐，可以升做教車師傅，點解唔升，
答案竟然係壓力大責任又大，我心想，咁即係都同而家
一樣吧...難道而家返工時壓力同責任不大嗎...?不過點都
好...都叫做塞錢入我袋..識多好多野.....我會記住點應變...
臨埸發揮.....哈哈...掂呀!!!!

明天放工要到St john考first aid，睇黎今晚都要準備一下，
裝備下自己...，其實包紮很有信心..係吹人有一點兒緊張，
抽中吹成人都好D，如果抽中係吹BB公仔...咁就麻煩一點
喇....不過而家諗來都多餘...明天先擔心抽中咩吧....諗極都
唔明點解考左就唔係一世就合格!!!硬係要幾年要續牌，仲
要我比錢考......點解...點解..!!!!!

多啦A夢NDS筆


>>July 2, 2008 at 12:17:11 PM GMT+8

2008 年 6 月 30 日 星期一 【酷熱】

睇女仔..哈哈


今日真係曬到飛起，熱到跟本唔想出街，但
今日女友放假，好歹都要陪下佢吧!!!!!所以放
工就陪女友去機場找一間店舖諗住買吊錶，
點知都係找唔到，離港大堂同來港大堂都係
冇，最後都係放棄左去找，變左走去同佢
一齊在機埸小街行...之後去左機埸間大家樂
食飯，到左夜晚先走，其實行程真係好悶，
但唯獨有一樣好睇的，就係同佢一齊評評那
個果個空姐的身材相貌...評頭論足...多多意見....
哈哈...能夠取正牌睇女仔.....今天都算係咁啦.......

夜晚搭機埸巴士出元朗，同佢睇鞋，最後都買
了一對 比佢，但我就『屈』佢請我食返甜品，唉
....宰極佢都係二十幾蚊....始終都蝕比佢....但算吧...
大家今日都開心既......

雖然藍天白雲..但烈日當空







機場外景






>>July 1, 2008 at 4:08:25 PM GMT+8

2008 年 6 月 29 日 星期日 【微雨】

妹‧生日


今日放工，便回天水圍，今日係6月30日，即係我
妹生日，已經一早準備好生日禮物給她，其實送禮
物，最開心都係睇佢收禮物的一刻的表情，今年送
左個手袋比佢，個八婆妹果然係開心到暈，之後，
請佢出去食飯，果真對找不客氣，食左我幾百蚊.....!
很刷得..!!如果阿媽都去食野的話，一定唔會比你咁食...

心情輕鬆了一點，可能已經完成左攪手任務關係吧，
之前成日要打電話呢個又打比果個，仲要返工返早，
講真..真係忙到不得了，而家總算鬆了一口氣，完成
左一件事，可以鬆口氣了。

今日女友返晏，換句話即係晚上10點前只會得我在家
，果然得到寧靜，只不過正話望望張檯，原來佢漏左
鎖匙在家，咁即係一陣一定一定要我出去接她，諗深
點..都不知道是不是刻意的..!!!偏偏今日先唔記得帶......
真係無佢辦法呀!!!!

>>June 30, 2008 at 12:58:02 PM GMT+8

2008 年 6 月 28 日 星期六 【暴雨】

舊生會聚會


今日係舊生會聚會，場面好熱鬧，我都覺得今次活動攪得好成功，大家見返大家
都好開心，一到場…個個響度認人，你認我..我認你..哈哈，真係好得意，大家都
食左傾左好耐…大家主要都係想知大家而家做緊咩工作，結婚未、拍拖未，阿班
主任明顯咁老左…哈~~~歲月不留人呀…，不過…真係見到佢好開心，其實已經
唔記得佢個老師嚴肅的樣子了，大家影了很多合照，最失敗是我啦…相機竟然唔
記得入記憶咭….攪到我冇得影相..有點可惜..!!不過我深信一定會有下一次.機會的
，在進餐傾談中，大家議定兩年攪一次聚會，咁大家都話冇所謂，而且大家仲選
埋下一次攪手係邊個..哈哈….要辛苦你們三個人了!!!講起工作，大家都有一份穩定
的工作，當中竟然有人同我工作一樣…!!不過我們不會碰頭吧，你響地鐵果邊…點
都撞唔到啦，但大家比比人工…我有點不爽啊呀….!!當中最受人追問係irene吧……
個個對妳工作都好好奇….巴閉喇。但據我知道有個做左導遊….果個仲正啦…成日
有得去唔同地方玩。而當中亦有兩個已經結左婚，有一個已經有個一歲囡添，真
係快手，見到佢個囡張相….相中個囡囡真係好可愛….，做人阿媽真係人都唔同D
，真係有個阿媽款..!!!基本上，大家的臉孔我有大部份都認得，但有D真係好似唔
識咁，要講返好多野先勾起回憶…之後….『哦….記得..認得你了』，我個人記
憶中覺得大家都好似冇咩點變樣，係女同學變得多D，大既係靚左吧~~哈哈。
仲有....不可不提係今日大家在母校前影左幅相啦....真係好得意好有感覺...!!!!

傾下傾下先知原來好多同學都係住元朗屯門天水圍，只係有十幾個住九龍香港
區，笑言話可能我返工陣碰見好多次，只係大家唔記得大家….經過今次，我相
信返工時，有人拍我窗的機會又大左….比人嚇既機會又高左，哈~~真係受不了。
臨完場時大家都問大家聯絡電話，其實我都希望大家可以聯絡到，今次能夠咁
順利找回咁多同學，真係要感謝大家努力『搭上搭』咁Call人，如果唔係..我諗
唔可以咁快找到大家…..到了聚會尾聲，大家都各有各批行….有D原來有駕車
來，嘩….做有車階級呀.，真係有米..!!!果D人早又唔出聲，比我知坐轉順風車
都好嘛…!!!.但點都好，今日整體上大家都係好開心的…..期望快D有下次啦~~

>>June 29, 2008 at 4:20:40 PM GMT+8

2008 年 6 月 27 日 星期五 【颱風】

討厭的下雨天


最討厭就係落雨天，尤其係返工果陣，真係會好燥...呢D天氣硬係會見到好多人
亂衝出馬路，或者佢地想唔比雨弄髒自己吧，所以佢地一定會同我鬥快過馬路，
其實佢地深知呢D情況，我地一定會讓佢地行，難道我要撞向佢地嘛..?所以佢地
會覺得好老定，不過呢D情況，當然我都會比佢行，因為我控制唔到佢地，但係我
係會絕對『反擊』...即係『砵』佢地，雖知道列車個『響鞍』係好好好鬼死大聲，
如在列車旁聽到的話，一定會嚇到成個人都彈起....。

放工時，天氣好左一點，咁就出去買左D野啦，其實都係全部買比女友的，我去
左元朗千色店..上面間三聯書局買左本醫學辭典比佢，知道佢早排話醫院寫D醫學
名詞唔知點解，我覺得呢本可以幫到佢，就咁...我就買左喇..盛惠198蚊..就咁冇左
兩舊水，但算吧...如果係有用的再貴D我都會買。之後我又諗起佢話千色店果陣見
到條CK鼠電話繩，咁我又順手買埋，又冇左40幾蚊，其實我都唔知幾多錢，因為
我價錢都冇問就買左，100蚊找50幾蚊..係咁上下價錢掛..!!我一心諗住買完野就鬆人
，點知一出千色店，眼前係滂沱大雨...Oh my god.......!!!我就係咁整到自己濕哂，縱使
我有遮..!!去等巴士，阿婆又打我尖....唉..我無言又無奈，如果妳後生20年..我一定唔會
放過妳..!!上到巴士諗...本來可以全身而退...唔使濕身的，就係因為我為佢買野，攪到
我成隻『落湯雞』咁.......真係『整你個計』丫.........

回到家，我早佢少少返到，返來見到佢都係難逃一濕，佢自己梳洗完又叫倦又叫餓....
咁即係明示要我服侍呢個大小姐啦...我放工又要買野，仲要濕身，又要煮麵...唉!!
返到屋企都仲要做...我遲早向好攞人工架喇...妳瞧著看丫....

Ck鼠電話繩


醫學辭典


>>July 1, 2008 at 4:06:49 PM GMT+8