2008 年 9 月 4 日 星期四 【綿綿細雨】

書緣


放工...去左書局諗住睇下書，點知又唔知
點解自己又會買左書，其實呢本書係一個
朋友介紹我看，呢本書有幾集，從圖書館
借左一本，其餘幾本都唔知點解找極都冇
，真係自己次次都唔夠人手快嗎??不過我
知係有得預訂書的，只不過..有時睇書都要
睇下同佢有冇緣啦，自己夾硬去訂書...比我
感覺唔係幾好，所以...由始到終，我只從政
府圖書館內借到一本......

今日我去書店睇書...又比我見到呢本書的另一
集，當然呢本係我未從圖書館內借到的，咁
我拿上手看，書有點缺憾，有少少暇痴....但
另我感興趣係...本書頭一頁有作者的親筆簽名...
雖然我不知是真是假...但從筆順睇，又唔似係
冒的......，但點都好，感覺同呢本書好有緣咁，
明知本書看一次就完，自己都願意比58蚊去買...
唔~~~~~那是咩心態呢??明知有得借唔使錢都走
去買.....哈哈.....但算吧，事實上書係好吸引我去
睇....也是值得的....

最後我從書中見到作者email......正話send左 email
比佢希望她會回我吧~~




>>September 5, 2008 at 5:50:18 PM GMT+8

2008 年 9 月 3 日 星期三 【晴】

付出??


本來今日諗住係同阿俊食飯，但係今日
取消左，點解??原來佢要陪女友..!!!估唔
到佢都要為左女友，都要犧牲同我呢一
個識左咁耐既朋友既聚會，但我明白既
，有時唔係話重色輕友，而係唔想開罪
女友，因為女友一發脾氣果陣，真係會
有排逗，到時仲煩.....所以都係無謂自尋
煩惱，始終都要放女友在第一位.....!!!!

記得個show有咁講的，佢話女人佢地會好
多時發夢，D夢呢仲要好逼真，有依士曼
色彩，杜比既音響，而且仲會有氣味嗅到
，真係勁..!!!佢話女人一半既夢係會夢見你
對佢唔好，另一半仲死..佢會夢見你對佢好
好，所以當大家嘈交時，女友就會話..我情
願返去發夢呀，因為夢果陣會對佢好好嘛，
咁男人就會講，可能你夢見係我對你唔好呢
，女人就會話，你而家已經對我唔好啦，咁
男人又死死氣咁講，咁我而家對你好D喇..好
唔好呀??女人又會發悔氣話，都唔夠夢裡頭
咁好...!!!!

唉........果然女人係要"(乙水)"既.....所以我亦都
無怪我既朋友放我飛機，因為我知佢都唔想，
或者咁講啦，如果男人真係鐘意自己女友的話，
所有事都可以推埋一邊....

雖然自問都唔係一個稱職的男友，但我都算係
可以合格吧...!!!起碼....我唔會為左朋友而冷落佢..
為左佢..我都冇同以前D朋友聯絡太多，咁做男人
都算是對妳付出吧...!!

>>September 4, 2008 at 1:36:50 PM GMT+8

2008 年 9 月 2 日 星期二 【炎熱】

完美的女人???


今日一打開門，就睇到一個看似完美
無暇既『多啦A夢托盤』，但睇真D當
然係舊果個啦，只係佢用AA膠補返個
缺口吧，但咁即係點呀??當無事發生..?
但點都好啦，佢肯補鑊已然係好難得了。
我也沒有妄想她會比錢去旅行，在她人
生的字典中......去旅行比錢呢家野?佢比
既咩????我比架嘛..!!!!!!!


今日睇左個Show，講緊既咩係完美既老婆
、同女友，佢話一個完美既老婆、女人，
應該響老公、男人，有權有錢有勢的時候，
自己無端端..唔知點解..無情情...咁死左，正
所謂『升官發達死老婆』，如果呢個女人識
得咁做，咁佢就係一個完美既女人喇，但
我咁講似乎好殘忍吧....!!!! 你都傻既..!!等我話
你知咩叫做真正既殘忍啦....真正既殘忍係
『升官發達陪老婆..』男人發左達係要來返
屋企陪老婆睇大長今既咩???男人發左達係要來
捉大長今返來陪我架嘛....!!!!哈哈...咁講法好貶
低女人喎..!!!但係我係男人嘛..!!!哈哈.....

以上說話係出自個show....唔係我作...不過我覺得
幾講中男人既point....，其實還有很多很多理論，
但太多了，無可能一次過寫出來呢...

明天約了阿俊食飯，佢係我一個小學同學，不知
不覺，大家認識左17幾年，拿起小學的紀念冊，
睇返佢寫的句子，再睇下佢小學張學生相片，真係
有趣，佢令我想起以前細個一齊去..扭閃咭、打任
天堂(紅白機年代)、一齊砌四驅車(當年好興架)，一
齊為了捱義氣，我夾硬上堂傾計而陪佢一齊比人罰
企(講來真係欠我一個人情呀)，好多好多小時候的
回憶，今日再見到他，那份稚氣已經消失，而且
現在的樣子仲幾帥呢....!!!正呀~~~!!!

明天同佢食飯，同女友講話會遲回，點知我未開聲，
已經比佢捷足先登，佢話我明天會同同事、朋友出
街睇BB兼行街，會好遲返....!!!我話我都係，咁睇下邊
個會最遲返吧....!!但我睇死一定係佢，我相信冇10點佢
都唔會蒲頭....，佢生活而家真係多采多姿，真係無得頂...!!!

>>September 3, 2008 at 3:41:14 PM GMT+8

2008 年 9 月 1 日 星期一 【微雨】

妳精??我仲精...今餐係妳請


返到屋企，女友擺了一個不知怎麼形容
的表情，總之就不是好事吧大概...!!!點都
好都要扮若無其事的態度問『仲咩事』呀??
扮哂"可愛雞籮柚"咁.....想講咩就講啦..!!!
她說..不准嬲呀??!!!心想.....難道妳做錯一D
天大的錯事....?你做錯事，條件要我唔嬲...
點講都唔通喎...心想，但係...女人天生係有
咁既蠻不講理的權利嘛..!!!但點都好，有哂
心理準備，佢講的事可能還會嚇我一驚.....

好...放馬過來啦...講....!!!

但她冇講任何野，就回頭走，佢係走去拿
一件野比我睇，原來，佢跌爛左我個"多啦
A夢托盤"，那個由空運到港..人地送比我的
禮物...!!!!!

我問點解會咁架，佢話唔小心，唉.....唔爛都
爛左啦，我可以點丫，原來攪咁多野，只係
想講...我跌爛你D野。無法啦，我又唔嬲得，
咁我同佢講，既然你跌爛我D野，即係欠左我
D野啦，我又唔嬲得，但我話我有個方法，既
解決到問題..而大家又會開心....但未講呢件事
前，你要應承左先..!!我話既然我講得係大家都
會開心，當然係好事啦，妳應承無死錯人架喇....
最後佢應承左....哈哈

個解決方法係，我地一齊飛去日本旅行，咁又
可以買返個托盤，又可以一齊玩，一舉兩得，
我去Check團，但係『妳比錢』....呵呵....

今次妳仲唔死，等妳打爛我D野丫喇....哈哈
無論如何妳都欠我一程"東瀛遊"
我問妳死未.....
哈哈哈.............................

唉....就咁比佢跌爛左




>>September 2, 2008 at 3:44:25 PM GMT+8

2008 年 8 月 31 日 星期日 【酷熱】

精人出口..笨人都係出口


有個朋友曾經問我，你有冇試過坐巴士壞車呢?
我話當然有啦....唔單止壞車、爆"車太"、輕微碰撞、
車上大罵戰、壞冷氣都試過，而返工第一天，
自己獨立返工，已經有阿婆心臟病發，你話我
係唔係好黑呢...?係超級cooler.....，今日搭車又比
我碰到D事喇又......

搭巴士坐上層時，我隔離果張椅既乘客，因為不滿
後面個乘客用腳膝蓋『頂』下『頂』前面張椅，佢
就回頭罵佢，咁對方都認死狗咁道歉，但佢唔罷休
，仲係咁罵，終於講錯說話自己都唔知，而比人罵
返轉頭，最後還要輪到佢認死狗咁連忙道歉，過程
真係精彩。對方衰在自己話『信唔信我落車郁你丫
喇...』，就係呢句，比對方食住上，對方一句我好
驚，要報警話比人恐嚇，仲要有人肯做證，呢條友
仔真係由聲大夾惡變到聲都唔敢聲....真係好抵死，
呢程$13.6真係抵到爛......最後條友仔瘀到驚到下一站
就落車......哈哈，我諗全車人睇到佢咁都會好心涼....

本來好好地拿過彩便算，呢D人得勢不饒人，弄巧成
拙，好明顯佢係一個無腦既人，有恃無恐的態度最終
得到自己認死狗下車的下場，下次望佢小心講野吧....
看佢個款都係一個粗人，爛衫爛世再著住對黑色布鞋
的他，一身地盤Look的他...算他倒楣，遇正個食腦的人....

今日去醫院看過她，精神很好，睇進度明天可出院了，
下次行街唔好又整D咁既野過我喇.....。

我都說過我係好黑架啦.....同朋友出街都要出到入醫院的
，實例証明..我都冇野好講....




>>September 1, 2008 at 1:52:12 PM GMT+8

2008 年 8 月 30 日 星期六 【清涼】

陪入院....


隔了天先寫..!!無法吧，有些要事要做..
所以差天多整天都不在家，目的係探
病，基本上要在緊急手術前陪伴，話
哂她第一次要在醫院過夜，一個人紿
終都會怕的吧....但政府醫院呢D有探
病時間，也好幸運地遇上D好既姑娘，
可以通融一下..隻眼開隻眼閉咁，比我
們可以留下床邊陪住她.....有人陪她的
情緒都安定下來......。

毫無先兆下，我女友同我同佢一齊行行
下街，其實在食飯見佢臉色明顯地變左
，但問她就話冇事，她估大概自己是肚
子痛吧，但痛左好耐，只見她越痛越勁
，痛到要挨響地下牆壁，還明顯地知道
痛的地方開始移位..痛楚向下腹加劇，今
次見到佢係已經出汗..痛到閉上眼，繼而
喊了出來，我和女友也開始估到應該不是
肚痛咁簡單了，但在街上...正考慮打999
叫車定係的士時，就有部的士在附近行過，
但馬路係禁區，佢會停車嗎?不理了..用
盡全身截住部車，最後都有停下，再回頭
望下佢，已經痛到唔識行，最終都要抱上車
，好彩佢輕....如果唔係都抱唔起........。司機
見到咁都好識做，好快到醫院，同佢分流左
係第二緊急﹐但醫生都初步睇下...只給了支
止痛針比佢，的確好快見她平伏一點下來
，起碼都不會喊，問得到佢情況同感覺，我
和女友只有陪著躺在床的她，本來大家開開
心心咁行街，最後竟然去左醫院.....!!

可能打左針吧，可以暫時見她睡下來，我們
都不敢嘈醒佢，唯有同女友你眼望我眼咁等
下去，過了兩固鐘先有醫生睇，初步認為
係急性盲腸炎...!!!唔怪得會痛到佢喊啦....原來係
咁，醫生CHECK左好多野，証實無估錯，和
她上病房，可能藥效開始過，開始見佢又痛
過，但時間未打得針，而且一陣仲要做手術
，只有安撫佢....『做完手術會好點』

問到佢要通知家人好唔好，但佢竟然果唔好，
我真係有點想自把自為.通知佢家人，但最後
我都冇，在床上又見到佢痛到 喊....其實係唔係
真係咁痛呢..?攪左幾個鐘...見埋麻醉醫生，解釋
完，另一件事又發生，就係開始緊張喇佢，
怕做手術，其實只係一個小手術，一個鐘內會
做完，但我們點向佢解釋，佢都係怕得很.......SET
好全部野..OK準備推去做，，我們都不能跟下
去，我們只有應承會等佢出來....

真的好快..半個鐘多少少已完成，但麻醉藥未過
，佢都係比唔到咩反應，過了一陣，醒左，見佢
冇事，我們都安心，這時才打比佢家人來，女友
明天返早，自己返左去先，而我諗住等到佢家人來
先走，好快，佢家人就到，我還差點比佢家人誤會
我是她男友，但經過解釋後...我終於可以放心返去
，出到外面已經天黑，又搭的士返去，本來好地
地一齊出街，結果會變成咁，真係估都估唔到....

人..不是先知，不能知道下一分鐘會點，在腦中
消化一下件事，結論係..好好的過每一分秒，因
為我都不知道下一分鐘..我會變成點....‧做人真
係煩，但我地好不容易先做到人，所以做人都係
樂觀一點好....

>>September 1, 2008 at 4:12:17 AM GMT+8

2008 年 8 月 29 日 星期五 【酷熱】

Marvellous..『假期到數1天』




而家時下的有部分學生，真係同我地當年
果D比真係差到無話可說，暑假尾聲喇，
而家先一班人響老麥『抄』暑期功課，
成個暑假都唔知做咩..以前我一有暑期
作業就會拿拿淋做哂佢，做完先會去玩
，雖然做得"那西"D但都叫做親力親為丫
，邊會好似佢咁，眾目睽睽咁抄，比人見
到會有獎嗎?!!!!唉~~~我都係睇死佢日日
出去玩多架喇。不過o靚妹...放心啦妳，
妳將會有大把時間比妳玩，因為妳都就
快唔使讀書喇....。還有，女仔人家點會
爛口得咁緊要架，句句說話都要關照人
地個伯母....，使唔使咁歹毒呀..?你比我
感覺係..『妳想話比人知妳D粗口好勁..!!』

但..我話妳知啦，你返幼稚園啦，粗口有
邊個唔識講，間中一兩句的確可以消消心
中的不滿，但妳每一個都有形容詞，真係
不知所謂，之後仲要響袋度找盒煙仔，話
出去打邊爐，仲要學人食『幼維珍』嘩真
係識貨...真係要向妳拍手掌了，好野..拍拍拍
，妳真係可以畢業做個"死爛泥妹"了.......。坐
妳隔離食野都覺得影衰我自己呀，我怕了妳....
我走去第二度食.....!!!唔阻住妳發達....

少年人心態真係覺得講多D粗口比人聽到會
威D架咩?我細個果陣都有講，但都冇咁爛口
啊...。講粗口都有原則嘛..仲咩要問候埋人地
阿媽呢...?呢幾條靚妹仔真係.....有咩字可以容
容你地呢?真係想不到呢我...!!! 真係諗唔到點形
容，我只覺得佢地真係好Marvellous...。唔通呢間
學校有一科係修"粗口科"??好Marvellous....希望
呢D事只係佢人生的一個段落，而唔係人生中
的一篇文章..故事的章節，如果是的話，她一定
完蛋了....。但講時講，那個爛妹胚子也不錯啊...!!
原來樣貌行為同內心收養真係脫勾的....

講返自己，今日我差D做左賊，事情係今日我去
入Octopus時，手同時也拿著未比錢的"飲品"仲要
係幾大支下架，我竟然增值完唔記得比手上飲品
錢就走左，行左十幾步，諗下先發覺..好似自己冇
比支飲品錢，諗了諗..好似真係冇比錢，又要我返
去問個售貨員，頭先我有冇比錢呀??
以上問題我都想知點解我手有支咁大既飲品，佢都
唔發覺而比我走..你話係幾咁Marvellous呢....

冇呀.你只係入八達通乍...
我話我未比錢呀...是嗎?(指住支飲品)
佢笑著咁哈哈...話咁都得...哈哈...唔好意思....
我o都返9個半比佢...比左錢先走(比左錢..安樂了...呼~~~)
其實真係好彩佢冇發現，如果佢發現..我就係偷野喇......
到時真係百辭莫辯，水洗唔清....而家想起，可以
及時比返錢，真係好好彩呢...!!!!我下次都要小心一點
留心一點...當心一點....尊心一點....醒目一點...呀
，誤會就係往往咁樣發生，到時真係死得冤枉呀....

想想下又諗諗下...今天真係非常非常之『Marvellous』
又咁快放完假...點解放假的日子會過得咁快??..真係
非常之『Marvellous』呀

>>August 30, 2008 at 5:05:33 PM GMT+8

2008 年 8 月 28 日 星期四 【酷熱】

火中燒.....『假期到數2天』


今日好似事事都唔係好順利咁，仲要發生令我
咁討厭的事，我更好的心情...更好的EQ..自問
已經很高的，都會令人氣憤，我由這一分鐘開始
，我不會再做同一件事情，正確點說..我係唔會
比佢再響我面前發生，只可向你說...『今次是
最後了』...

從真心向你說多句...『你..好..野』

>>August 29, 2008 at 7:33:17 PM GMT+8

2008 年 8 月 28 日 星期四 【晴】

輪流轉...世界不停的轉..『假期到數3天』


趁放假，佢地又暑假，難得有一日陪細表弟表妹，
同佢地出左去行街，買點玩意比佢地，倆個真係
痴身痴到...，或者我阿姨，即係佢阿媽唔會咩都
帶佢玩..帶佢食吧，見到我都一定要買汽水雪榚，
哈哈....越睇佢地就發覺越似以前既自己，小朋友真
係抵擋唔住零食同埋麥當勞的誘惑，只要同佢地去，
去到任佢地叫，佢地就會開心到跳跳跳...，問佢地
媽咪唔會帶你地去咩﹖佢地答我很少囉....!!!心想..不
是吧..，以前你阿媽咩都會買比我玩同食，我阿媽
唔買，佢會買比我架喎，可能做左人阿媽，對自己
仔女真係會嚴厲點，怪不得兩隻小鬼，乖到冇人有，
阿姨教仔...果然有一手呀...!!勁......!!

輪流轉啦，而家我做左當年我阿姨的角色，表弟妹做
我小時候的角色，其實我都好鐘意同佢地出去玩，太
天真活潑了，捉住佢地過馬路的感覺好奇妙，細個只
有比人拖著走，而家掉返轉，佢地想食咩，會即刻應
承佢地，好多事都會滿足佢地，見到佢到玩得咁開心
，就會知道以前自己都係咁既心態，比一個人痛錫的
感覺係幾好，以前自己都感受過，替他們瞞著媽咪食
雪榚呢招.....當年阿姨都有用在我身，今時今日，我都
照樣咁做，有大人照住自己偷食雪榚的感覺..真係既興
奮又開心...哈~~~~~諗起以前都真係好開心呀~~~~~

唔知...第日......當我有小朋友的時候，佢地會唔會又咁同
我D小朋友咁做呢??哈哈.......真的好想知道.......

>>August 28, 2008 at 5:46:39 PM GMT+8

2008 年 8 月 26 日 星期二 【酷熱】

『驚』喜小禮物 ..『假期到數4天』



一早起身就出左去陪個妹打機，太耐無返去娘家
喇，個妹對住兩老真係無咩話題，昨天打比我問
我會唔會返去，咁是但啦，反正我又放假，女友
又返早，放工又話要去APM陪同事，睇來夜夜都
唔返來喇，咁唯有各自各精彩啦....!!

返到去真係冇癮，打咩遊戲都輸比個妹，唉~~~我
當日仲要教佢點打，而家要佢手下留情，唉...真係
似咩樣丫...，陪佢玩左幾個鐘，就同佢出去食飯，
想起Irene都放假，好似係G Day咁話....，打比佢約埋
一齊三個人食飯..，很熱鬧呀，兩個女的雞啄唔斷，
食完野，《多謝Irene啦，請我地食》，諗下去邊好，
開頭大家都唔知去邊，諗住好耐，終於個衰妹話去
Mega Box行街，搭左車去到行左冇耐，個死八婆又有
電話仲講話有人約，行行下比佢放左一大隻飛機，
早講啦，如果咁快有約，我地唔使去咁遠行啦，但
既然出到來，唯有行啦，行下先知撞正係『多啦A夢
展覽』..呵呵，比個衰妹知道一定激死佢，無法啦...
多啦A夢同我有緣D，去到有好多公仔大模型，同好多
多啦A夢報板等等，同Irene係咁影相，仲買左好多..多啦A夢
既精品，一買..買左我400幾蚊，其實係不知不覺咁用
左咁多錢，仲要比佢話我發花癲....，我唔想架，鬼叫
我鐘意咩!!之後唔知咩時候一句彈過來，『我響日本買
仲平啦』.....我當堂冇哂mood，唉~~~~~使唔使呀，我好
日都唔會咁買野，癲一次唔過份吧....!!!!

我發花癲....買完後，平靜下來先陪佢行下其他地方，
但我真係冇心機行，事關我一袋二袋，好唔方便，突然
比個見到間Sanrio，又咁巧合比我見到有掛錶買，女友
話想要好耐喇，找極都冇，今日有喇，入去買左270幾
蚊，售貨員話入做會員會平D，咁我入啦，咁入完會後
有份小禮物，幾得意，包得幾靚，但唔知咩來，唔理啦
要左先算。之後， 我地去左一間類似美食廣場的地方，
大家食叫左個拉麵，我地一路食，一路拆正話份小禮物，
Oh..shut..撞鬼佢丫，份小禮物完全係For 女仔用的吧，禮物
內有一包紙巾...一隻滑鼠.....仲.......竟然有一塊M巾送...!!!!
開頭我都唔知咩來，響佢面前拆先知，差D比佢響口噴
D麵出來向我度.(因為響佢食麵面前拆嘛)，好彩隔離檯
係冇人食飯，如果唔係我一定比其他人笑死.....，個死
婆仲不停咁笑笑笑.....唉....我下次去Sanrio時一定要問清
楚係咩先收呀.....!!!

全程食飯時間就係咁比佢笑，上到車都仲要講仲要笑，
咩我隻手拿住M巾個樣會好好笑既咩..?!死八婆....下次
咪叫我陪妳出去機場呀...!!!!!我睇死妳而家都仲係一路睇
一路笑緊啦....!!!! 哼......『妳 好 野...。』


晚飯~~拉麵


多啦A夢咕o臣


多啦A夢擺設




多啦A夢展覽





送比女友既掛針錶


>>August 27, 2008 at 5:56:42 PM GMT+8