2008 年 8 月 5 日 星期二 【驟雨】

八號風球高掛天


又打風喇，近年香港既風通常都打得成，但
打得成又如何，咪又係要開工..!!其實呢D天氣
返工都幾空虛寂寞，因為有同事會改更表，而
做細呢通常都要『義不容辭』..，其實咁返工都
有點好處，人工會高D、班次又疏，手口腳夠快
，真係可以去便利店整個杯麵，跟手去個小解還
有時間呢..。

中學會考收生，都話明打風，今日都仲見到有人
冒雨出去，唉.....何苦呢..?我地就話要開工冇得講
，但你有得回家大覺訓呀。雖然話係打風，有D大
人都仲會帶小朋友出街，心想...嫌自己唔夠辛苦嗎
?每個人都是的，一上到車，好似入左避難所咁，
今日有個小朋友在駕駛室外大叫...『咁大風、火車
會唔會吹走架?』多麼天真的問題啊，我心想，我們
架車未載客已經有30多噸重，是雙層巴士重量兩倍多
，巴士都唔翻車，我們係安全到極點啦.....哈哈~~。
今日真係好舒服，日日係咁..打風都唔錯呀，很少可
有自己可以數得出的班次，真係爽死了。

放工都仲係打8號風，女友都係要返工，本來諗住可以
出下街自己，但天氣咁，可以話冇咩可能，唯有響屋企
執屋啦，執呀執呀....比我執到以前在社區中心做的課託
資料，是我學生的每月評估同埋成績同埋獎勵記錄，的
確，有些學生我連樣子都想不起，我只會記得兩類人，
一係最乖巧的、另一係最惡教的，睇返以前都覺得自己
都叫有心機寫每月評估，記得當年寫每月評估簡直係折
磨，因為學生個個月都係咁，跟本冇野可以好寫，可以
話慘過作一萬字的論文，諗起都怕怕呢。再望下獎勵記錄
，原來我還欠人禮物呢!!不知他們記唔記得既呢...?眾所周
知，而家時下小朋友不易欺騙呢....。唔單止執到呢D，我
仲執到D完全未開咭既信用咭，唉...一日都係貪心啦，貪D
小禮物，同埋D現金券，講真...用得著只有兩張，其他，剪
爛佢也冇相干吧.....手起較剪落...咭散人安樂..呵~~。只係留
返一張『活口』，只因佢係HELLO KITTY夜光版VISA....你有
留底既價值..哈哈....

執左成2個幾鐘，終於都攪掂，一身汗....都係去淋下身吧....
就咁又一天了，是否很浪費嗎..?


未開的Hello Kitty Visa~~


>>August 6, 2008 at 9:35:14 AM GMT+8

2008 年 8 月 4 日 星期一 【暴雨】

伴遊動漫展


今日放假，一早約了阿芯去灣仔動漫節行，佢買左幾
個公仔、幾本漫畫書，而我...咩都冇買響呢一轉，可能
時間早，唔算多人，比較好行，沿途見到好多cosplay...
，阿芯話，真係好靚，自己都想玩埋一份兒，哈哈，我
話有朋友響度玩呢D喎，問佢去唔去睇....佢又話唔好，妳
究竟邊句係真呀?真係拿不到妳辦法了，同阿芯行左唔係
好耐，佢要返工了，陪佢出去食點野，順便送佢返工，上
半埸完了。

下午場，約左Irene，先約佢響九龍站等，然後先同佢入去
會埸，看她的樣子好似對漫畫冇什麼興趣，還是睇的多，
時間越晏，人越多，我同佢都迫到有點唔想行，我還被人
群迫慘到出哂大汗，越多人總覺得越熱，紙巾都用左兩包
，我真係頂唔住，買了把多啦A夢手扇，但衫始終都濕哂，
很無奈呢，話過去到會埸會找小伊...問Irene去唔去睇，佢話
有野想自己買，咁大家就約好時間到大門等..到時，之前打了
3次電話小伊都冇人接，最後都收到Call了，Cosplay的打扮，
蠻美麗可愛呢~~，買了點東西，一份比自己、一份比女友、
另一份比小伊，仲送了一個好大好大的紙袋呢....講真..我冇
可能拿到出去，小伊喜歡，給妳最適合了~~。同佢行左一陣
子，沿途很多人要同佢影相，哈哈cosplay的確係動漫的焦點，
的確好受人歡迎，咁講真...又真係幾靚既~~。差不多時候，她
同我都要走了，出到去Irene已經等緊我，她給了一袋野比我，
原來係件衫，佢話見我大汗到咁，換左佢吧.....!!!多謝妳啊~~
，同佢一齊走，大家諗去邊度食野，其實連去邊也不清楚，
她提議搭船過九龍，都好吧，我們一齊出到紅磡，行左一陣
再出尖東，去左食飯，之後再去食甜品，多謝Irene請客呀~~

回程..我提議坐港鐵...快丫嘛~~佢話唔想，想搭巴士，話有
得舒服D訓，果然沿途一直都係訓，睇來佢真係好倦好累，
個頭不斷撞向玻璃窗，聽到呯..呯...呯....真係聽到都痛，真
係冇她辦法喇....唯有同佢調位，等佢可以挨住好訓一點吧，
送到佢屋企，入到去，一打開門，佢放工全部"架餐"放哂
響度，原來先知她今日係趕出來的，唔怪得佢真係咁累啦，
真係有點過意不去，其實我應該早想到她放工應該係好倦，
係應該休息..而唔係出去。真的很開心，諗住今年應該食自
己一個人去，還可以找到朋友伴行，太感動了~~

今日發現一點事情，真係唔明.....由元朗去香港全程21.4，諗
住懶得就懶啦，響轉西隧轉車站等961直去會展，諗住呢程轉
車係免費，原來係錯的，佢仲要收我13個幾....整佢個計丫!!!!!!!
即係由元朗出會展我用左30幾蚊車錢，頂丫，轉車站都要收
咁貴，咁你個轉車站究竟有咩用....是用來騙錢的嗎??返錦田
等架車等左我27分鐘，在我等之前已經有人等緊，咁即係話
時間一定唔止27分鐘，上到車睇你時間表13-15分鐘一班..!!!司機
大哥，果15分鐘你去左玩嗎...?令我火起係，我一落車唔使6分鐘
後面來多班相同路線的巴士，玩野嗎...?今次我記低哂全部資料
車牌、車長名、時間、方向地點，連6分鐘後的巴士車牌我都記
下，我睇你公司有咩解釋..!!!!離哂譜...做司機，班次時間都唔識
控制，我一定會投訴，而家諗起都火滾呢....!!!

動漫節2008~~

今日動漫節買的~~

回程..灣仔碼頭往紅磡碼頭途中~~



到達紅磡碼頭泊船中~~

我和Irene點的甜品~~



>>August 5, 2008 at 2:32:28 PM GMT+8

2008 年 8 月 3 日 星期日 【清涼】

意外..意料之外


天氣熱爆，不知是否連動物也頂不住，受不了，
動物也會自尋短見嗎..?我當然在說笑啦~~怎會呢..
動物也會珍惜自己生命吧...。其實今日發生了致
命意外....
時間﹕11:23 - 11:25左右
人物﹕我、一隻雀仔...應該是麻雀仔
地點﹕鍾屋村站與泥圍站之間
事件﹕麻雀在低飛中，迎頭撞向我車頭擋風玻璃...

其實都唔明點解?動物唔係有本能看到有車沖來嗎?
也許牠只需飛高一米或者遲兩秒飛來，便可以避免
慘劇，以時速50km多的速度，講真..必死無疑，事實
上撞的一刻已經聽到"啪"一聲，冇可能生還....。唉~~
做了兇手犯誤殺呢...罪過罪過....。呢D情況屢見不鮮，
我曾經見過隻貓比車切開兩斷，那次..我在佢屍體前
停下來，諗緊應該照去定係落車清理....那是我還是新
人呢，Call上Occ...答覆係照去啦...一陣找人清........!!!!其
實那次知道自己要再車多佢一次...心中很唔安樂好唔知
點咁...畢竟牠已經死了還要輾多佢一次....可能不止一次
，後車陸續有來...唉..只有寄望牠來世可以好好地渡過
新生命....現在諗返起都有點心寒....有罪惡感呢.....。希
望呢D事唔好再發生我身上，本人也熱愛小動物呢.....!!!

漫畫展呀.....其實真係好想去...但D時間真係..唉~~~~
她們都有時間...只係欠我，打哂鑼叫人陪我去，倒頭
來自己時間唔就....，朋友們....我會盡力夾時間的。要
妳們就時間....真係唔好意思呢....最多請食飯補數啦....

今日返工收到風昨晚有同事炒車，唉....那個同事..我唔
多識佢， 是誰對錯呢?我幫自己人啦，講真....出面D車
真係亂來，成日以為我們一定會讓佢，往往都趕燈尾，
507、610呢兩條線...少D心血都會嚇死，我覺得我地係
唔會沖燈的，因為我認識的同事都好安全既開得，快
得來又安全...呢樣野真係有排都學唔到，有時坐上大師傅
的車先知自己技術係幾咁"屎"......點都好啦...希望果位
同事無事啦~~意外意外..意料之外，好難避免的，如果
唔係自己錯失...一定會無事~~~。引以為鑑，自己都要留
心D....打醒十二分精神先至得喇~~~。

>>August 4, 2008 at 8:43:06 AM GMT+8

2008 年 8 月 2 日 星期六 【酷熱】

怨..自己


放假日......阿媽拉埋老豆仲同埋佢個friend去旅行
，留底佢地對孖女比我湊，唉.....嘈到頭都暈，
比部wii佢地玩，兩個都爭餐飽.....小朋友果然係
小朋友，難道我同我妹以前也是這個樣子嗎...?
比人見到真係難看....睇來我以前都出不少醜喇!!!

明天又要返早，呢期總係返咁鬼死早，晏極都係
返9點幾，返都唔係問題，最怕係佢下次一下子又
編我返夜...咁我就完蛋喇，怎樣適應呢突然...!!!還
未有人得閒去漫畫展，時間就唔到，一係你返工我
放假或者放工，一係我返工你放假或得閒，怎說也
好，一班人去氣氛會好一點嘛，得兩個人去..自己
又唔係好想，看看情形吧，如果真係到最後都係得
兩個人..咁就先算啦~

回到家先發覺自己唔記得還書，三本呀!!!比錢都不是
問題..，問題係自己已經放左本書響袋，三本咁重，
居然自己都唔記得，有冇攪自己錯...?!而家好啦....又
要再抽都次喇，很重的啊....。唉...自討苦吃..可以怨誰..!!!!!

>>August 3, 2008 at 3:23:21 PM GMT+8

2008 年 8 月 1 日 星期五 【酷熱】

別給我工作打分


今日下午約左妙熹食lunch，大家一見到面，
打左個招呼，大家便坐在一起好好地響用
那大約一個小時的lunch time...，老實說，
本身食野速度算快的我，相比現在..還要
更神速，冒住胃痛的危險都要咁做，為的
..只是話緊那半小時的閉目養神時間，開初
都會因為咁而胃痛....但日子不知是否已經
接受了我，現在似乎習慣了。咁當然我這
個食飯樣子也嚇壞身邊那人啦...!!你問我點
解食得咁快..我只有一句說話解釋.『職業病』

佢眼見我碟生炒骨飯已食完，佢碟星洲米
仲有半碟剩，而這時我又唔好意思向佢說
話，開講有話食不言寢不語嘛..。但她仍主
動向我講野，咁我都要回答吧....!!!

問到我最近如何?還可以啦....問我做到份工
幾耐....都年幾喇~!!講到工作....好像每個人都
低估了我們工作的辛苦度.....還把工作看得好
優惠呢!!包括佢在內，每個人都講你們都是坐
住響度、又唔使點開聲講野、又唔使睇客面色
、又唔使比錢搭車、路線又少、每一轉車都有
休息時間，而且碰上非繁忙時間小休時間會更
加長、如果係做其他司機的朋友還會講，有路
軌行死一條車線、路面有優先權等等..好多好多
優點.......把這工作打得很高分!!!

雖然以上的確某些係事實，但大家有冇諗過每
一行也有苦處呢?

的確現在鐵路行衡全港九新界離島，有免費車坐
的確係一個好大的好處，但公司也不會死錯人的
，前九鐵的路線和前地鐵的路線是分開的，即係
都會分開收錢，你也妄想有一票走天涯呢!!工作上
...我們都要出聲，碰正繁忙時間，唔叫出聲D人係唔
識做野...例如行入D車廂、阻你車門呢D仲死，真係
唔嘈咪都唔得....我們不是轉轉都有得準時小休，撞
正燈位唔順、乘客阻門等等..仲會攪到你分分鐘小便
也上不了，路線短..車站密又係一件痛苦的事，當你
走足足一整天循環線，你一定會有想嘔的感覺....東南
西北左右上下也分不開，工作上有好多好多苦處呢...!!!

曾經有人問我，今天她也問我，份工會否做長下去，
不能答你會否長吧，是自己喜歡工作嗎..?對鐵路迷係
吧...但我唔係。咁會放棄嗎...?答你暫時唔會呀。咁
會有轉工可能嗎..?如果找到工而自己又喜歡，當然會
啦，但看情況機會現在唔大吧，學歷問題.市道問題..
同埋..我成日都同人講，以我學歷有呢份人工...我真係
已經好滿足，我相信冇幾多人鐘意自己工作，但為了
糊口有些事情是不能說不的....。

但其實每個人都睇別人工作好也是正常吧，曾幾何時
我也對空務員抱住羨慕的態度，可以週遊各國係幾咁
幸福，但當我碰上那人先知...是一份上至可化身為急
救員.....下至做洗馬桶都要做之後..我先知道那工作一
點都不好..所以我也很佩服我個朋友..還可以撐下去的
所以...大家都唔好再為其他人工作打分數了..

>>August 2, 2008 at 10:53:52 AM GMT+8

2008 年 7 月 31 日 星期四 【晴】

醒了唔敢再訓~~


最怕就係呢D時間，返工前一個鐘起左身訓唔返....
但又有想"恰"的感覺，得返一個鐘，訓唔訓好呢?
又係老樣子，臨返工前買特濃咖啡飲啦...唉~~~真
係麻鬼煩....!!而家凌晨3點，仲有半個鐘磨時間，唯
有響呢度打晨咁早既diary啦....都唔係第一次了~~

望望日誌個瀏覽人數，原來每日都有20-30次出入記
錄，其實有幾多個會真係用心去睇丫，唔好話人地，
就連自己都懶得去睇之前發生咩事.....人懶怕麻煩果
然係冇藥醫的。我已經係一個版啦.......懶到出哂汁果
庭添仲係。見有時間Check埋個Email，她Send左
Email比我，我先知原來佢今日係要返工，仲要係即
日來回，早機半夜凌晨先返果隻，聽落都好辛苦哩，
睇到妳介紹左本書比我，講真丫...我真係已經心思思
好想睇喇，所以我諗我由明天開始會走哂元朗、屯門
咁多書店，直至找到果本書為止。還有..多謝妳給我的
相片，收到了.....見妳在工作上笑得咁靚...是真心的笑
還是職業上的笑容呢..?希望妳真係可以開心樂觀點吧......。
唉.....打到呢度都係用左10分鐘.....返早就係有呢個唔好
處，就係起左身唔敢再訓，但好處係會有下午放工的
時間比自己用。但可惜想去漫畫展暫時未找到人陪我去
...其實有邊個得閒又有興趣又同時想同我這個悶旦行的
話就打比我或留言或Email..總之就刮我啦...

呼~~~~~~~時間尚早.....紮個馬先返工..諗起都爽呀~~~

--------------------------------------------------------------------------------
買到書了~~ 星期五 (晚) 【炎熱】


返工時，巧合碰上前車係新手，果然咩都做到好足，每個站
都停一段標準時間，車速也是限制之下，果然做得好好，
比人好有專業感覺，一字記之曰..『慢』...。你可知我在
你之後呀...我可不想遲到呀...!!!!!!

回家途中...中途去了商務書店買果本書，同本書幾有緣呀，
一眼便看到放左咩位置，立即買左佢啦..56蚊!!..打開銀包先
知自己冇現金...唯有去百佳買野提錢啦，最後都買到了，在
返去途中一路行一路睇，真係唔捨得放下....，誰知睇睇下有
人做街邊問卷調查，算吧...反正等緊車，陪妳做問卷調查啦，
點知做到車來都未做完，害我又要等多一班車，回到家女友
知我買了本書...便二話不說搶著看了...唉~~~~十分無奈....，不過
佢睇書睇得好快既據我所估....咁就由她吧~~~




>>August 1, 2008 at 3:08:45 PM GMT+8

2008 年 7 月 30 日 星期三 【綿綿細雨】

同細妹買衫~


今日放工約了細妹出去，因為佢要出去準備過幾天見工，
孤寒既阿媽永遠都係偏心我多一點，到現在都係，個
妹要買野咩?自己出半錢啦....若果我買呢...阿媽就全
數出錢....，小時候永遠覺得呢種感覺好好的，但我同
妹漸漸成為成人後，我便覺得對個妹好唔公平，所以
好多時我都會買野比佢，資助佢等等，今次....佢要出去
見工，見工當然要著好一點啦，比人留下整齊的印象是
見工基本要求同常識，當然..我妹都唔係第一次見工，但
由於自己又唔捨得用錢，阿媽又唔多幫佢下...佢之前買
果套suit真係鬼cheap.....連對鞋都係100蚊樓下貨，見到佢
刮哂腳真係辛苦，所以同佢出左去正正經經買一套好的
，其實預了3000蚊出來，因為我諗好一套的suit只係件外套
都要成1000蚊，其他襯衣我估都唔會平，況且我冇諗過要
同佢慳....

去左試身室，試了好幾套，終於選擇到，一套suit(兩件白色
恤衫、一條裙、一件外套褸、另加一條褲黑色西褲、一對鞋)，
比預計中便宜，折扣埋都只係2700蚊有找...希望今次佢見工
順利啦~~其實由細到大，除了幼稚園至小五前...我死都不認佢
叻過我外，之後我冇得不認同，永遠佢讀書都會頭10名之內，
唔好話讀書，甚至係打遊戲機，佢都會叻過我，但好奇怪，
在她心中....佢總覺得自己永遠都係排第二......點解我會咁講...?
只因前幾天同佢玩wii遊戲機的火影忍者的格鬥game..係佢自己講
的....，我玩遊戲用果個人物其實真係幾"狗"...因為可以屈機屈死
佢，但唔知幾時佢開始操另一個人物，仲勁過我個，我由之前
好輕鬆可以贏佢變左而家要好認真好小心仲要好鬼"狗"先勉強
打得贏佢，由於玩wii係用體力，所以大家都快手軟，休息之際
，我﹕同佢講妳好勁呀玩得..開始唔夠妳玩了，
妹﹕你都好勁哩..打得我好辛苦呀都...
我﹕我呢個遊戲玩得耐過你，計落我係有jetso點應該，而妳
響咁短時間可以打得咁勁，妳都係犀利D....
妹﹕點會呢....我做咩在好前永遠都係排第二啦....!!!
我記得好耐之前，我仲係讀書時，因為我考試冇咩信心，發悔氣
講，我點夠個妹叻呀..!!!!!佢次次都考得咁好....好唔順氣咁講....，之
後..我好記得我個妹係咁講﹕『你考過第一，我最叻果次都係第二，
所以你讀書叻過我....』而於最近有一次，我不小心睇到佢MSN同人
講有關電腦問題，佢MSN咁打『連我阿哥都唔得整唔到，你冇可能
會整到囉』大約係咁呢句.......。

所以我知在我妹心中，佢覺得我永遠都係叻過佢，某程度上會
找我做目標... ，試過我問佢想第時做咩工，佢竟然話係駕西鐵!!!!!
我真係比佢嚇親，邊有女仔會志願做呢D工架?自己咁辛苦讀完大
學，去做呢D工?我話有冇諗過教書、或者係很女孩子志願都想的
工作..好似警察、護士、空姐、等等，佢答我完全冇諗過，同埋一
定唔會做，做護士永遠都係對住屎、尿、血、濃、啖...等等，是
一份極度污槽的工作，咁教書呢?佢又話..我而家幫人補習已經見
識過而家D細路...咁難教咁勞氣...所以都係唔會諗，咁警察呢?可以
做報案室丫..有得坐喎，佢又話分分鐘連命都冇，咁空姐呢?我都唔識
笑...點做到，仲要我服侍D客...人工得萬幾蚊，更加冇可能....!!!咁我
又問佢咩令你想駕西鐵，佢話因為唔使駕駛..電腦自動操作，舒服
..而且人工又係萬幾蚊，加多句...入到去可以食住你嘛...!!!!!意思係高級
過我吧..我諗~~唉....我妹真係奇怪呢....如果比阿媽知道佢咁諗..我諗家
變都有知.....

但點都好啦，一生人我得一佢一個妹，對佢好也是做阿哥理所當然的
責任吧，人地問..你地小時候唔會唔打交??我答佢，你話呢?我手上的
疤痕都是同佢打交拜佢所賜的，但我們兩個已經係成人時，我好肯定
同人講..我同個妹係好friend囉....其實而家自己有個比自己叻既細妹，其
實某程度上自己係感到自豪的....。但點都好啦....而家眼前，係希望佢
今次見工會順利啦，雖然知呢份工係佢唔多鐘意，但二十歲女，點都
要騎牛找馬喇.......。
~~不過睇唔到出喎，個妹釘著起suit來都幾好睇架喎~~哈哈....


收到jeff喜帖....一方面替佢開心..另一方便為自己傷心...無情情又冇500蚊
，總係覺得呢D係洗得不明不白，只不過呢D機會我相信陸續有來，有機
會我都要炸返佢地至得....，山水有相逢呀~~哈~

>>July 31, 2008 at 11:21:33 AM GMT+8

2008 年 7 月 29 日 星期二 【酷熱】

終於到我了


今日好黑，返工咁耐終於發生了小事故了，都是繁忙時間
累事，而且不知今天仲咩，平日呢D時間通常都係開孖仔，
今日我竟然只係開D-Car，轉轉都滿瀉，衍生了一個問題，
就係關門更加有難度，其實乘客一般都好醒水，當聽到關
門警告，都好縮埋一舊，等門關緊先會用對車門做牆壁咁靠
著，找它借力企響車廂。 但...今次輪到我了，雖然呢D事係通
常都會發生，可以話做車長的必經階段，但呢D小意外，誰
也不想見到，在我Tran果陣，;阿sir要我地比對門夾手，來feel
下果種感覺，真係好鬼痛，門仲會因為用氣壓做動力關係，
會越夾越實，今天我車有個男中學生，就係因為人太迫，再加
上追車門，一個唔好彩，佢夾中手指尾，可能手指尾唔會
令門出現大空隙，駕駛室係唔會發覺，直到開左車離月台5米
左右，先有人大叫，我知道後立即開門，當然要問佢有冇事
啦，好在佢話冇事，仲話係佢自己唔小心，呼~~~~既然佢
咁講，我亦見佢隻手又冇事，佢又唔追究，但我都問佢使唔使
叫白車..?當然他講話唔使啦....我見佢唔再追究又向我講唔好意
思.....其實是我唔好意思就真吧!!!!攪左分幾鐘，要開車了，沿途
我好留意佢，不停在每站都留意佢有沒有落車，因為我真係
想佢下車前再問多佢一次有冇事，最終我都等到佢下車，在
車頭問多佢一次，見佢笑住答冇事，我才安樂點放心點....
就係咁...整天攪到我關門好緊張....壓力好大~~。其實情序上
我係錯的，發生事故其實要報log，但我冇咁做，事實上好多
同事都係自己見冇事便算，理由呼之欲出啦....。慶幸今次好彩
，只係用門夾了人，而唔係門邊空隙夾到人，如果真係門邊空
隙夾到人真係可大可小.....唉~~~唯有下次再留心一點，又或者多
口叫咪"請小心車門"啦~

放工了，今日應承等佢機，不過今日不是由機場直接返去，而係
要陪佢去埋CATHAY CITY放底D野先走，今次真係多得佢miss在，我
才有機會陪佢入去，CATHAY CITY真係好大，好似迷宮咁，而且仲
好靚..比人有好pro的feel，在counter比佢登記我資料，取過visitor pass
，先可以陪佢入去，果刻好有第一次去八鄉車廠感覺，同樣都係
迷宮咁，D門對對一樣....總而言之果刻感覺好新鮮好好奇好奇妙，
見到CATHAY CITY個水牌，原來有模擬飛機駕駛倉，有運動室、有
泳池....好似一間學校咁，咁當然啦，這裡跟本係培訓中心，我留左
20MINS左右便同佢一齊走了，在車上她比左D手信比我同女友，還
有在萬尺高空的雲彩相片，真係好靚，我諗唔係有佢，我跟本冇機
會睇到呢D，其實還有睇左好多相，但印象深刻的真係呢張~~~Thank
You妳的帶來的東西~~。之後下車和她一起食飯，食到6點幾就走，
送佢回家時，女友打比我又話要遲返，要同朋友行街幫野，仲同我
講係同男同事行喎!!哈哈.....其實妳同男定女行街都係咁放心架啦，我
一D都唔會擔心，跟住我又同佢講，我都係同女仔一齊喎，之不過，
佢一估就知邊個，女人對呢D果然心水清呀....!!到7點幾女友都仲未返，
打比佢原來仲行緊，仲話叫我食自己.....呀丫....今次你好野呀!!!哈哈

訪客証~~

上空的雲彩~~


>>July 30, 2008 at 12:17:58 PM GMT+8

2008 年 7 月 28 日 星期一 【晴】

休息日~


今日一早就收到掛號信，原來隻CD送到黎..
終於有得聽，仲係急不及待果隻，睇返隻碟
先知，原來以前一個SIDE得20幾分鐘咁短，但
細個就覺得呢餅帶好長，好似有排聽咁....或者
人個SIZE大左..睇D野會變得緲少呢..?

下午約左D同事去書展，見到D人好似搬個圖書館
返去咁，真係誇張，你話D書平咩??我又唔覺得平
好多，其實都有諗過買少少書，但真係一本都睇唔
中，可能我個人冇咩書卷味吧...!!臨走同埋佢地食埋
飯先走，諗住響灣仔食...點知鬼咁多人，大家都決定
返自己地頭食.....大家諗住一心食好少少，點知都係
返去食快餐...唉.....放假同返工..做D事都好似冇咩分別....
今日我真係似放假咩...?!!點解唔覺既...?

>>July 29, 2008 at 3:13:48 PM GMT+8

2008 年 7 月 27 日 星期日 【酷熱】

終於病了~


近排天氣真係奇怪，可以瞬間風雲變色，就
係咁樣，自己作病了，有點感冒，係咁流鼻
水，少少聲沙..，可能自己一冷一熱關係吧，
在車上就開大個冷氣，放小休時一走出車又
即刻熱哂..轉頭又再入冷氣車廂中，呢個一出
一入:一冷一熱的動作持續了好幾天，看來自己
都終於中招了，其實都算係咁喇，咁多日後先
病，有D同事已經響之前病到九彩，工都返唔到
，不過公司有醫療津貼，睇醫生取埋藥都係有限錢...
算係咁啦公司~。而家食左兩劑藥..已經比之前好
得多了..。

我地條村..要選村長，包租婆比D表格我地填，唉
...其實自己條村個村長..我住咁耐都冇見過冇聽過
，遲D話投票喎....究竟係咩一回事呢?!

有同事叫我去書展...唉~~天氣咁，本身想去都冇心情
，但同事叫到，一班人..唔去又好似唔埋堆咁，所以
最後都應承了，佢地問我諗住買咩書..?下....?我跟本
冇諗過要買書，我都係去陪跑吧，況且好窮啊~~!!點知
仲比佢頂返轉頭，今日已經出糧啦，點會冇錢!!!!果刻
我先知...係喎...出左糧喇喎，哈哈.....。自己一定係熱
到傻燒壞腦了，連出糧日都唔記得...問你死未...!!!

>>July 28, 2008 at 1:29:57 PM GMT+8