2008 年 9 月 24 日 星期三 【雨】

怎樣選擇....什麼決定.....


為了未來應找一個更好?
為了責任定係要還留在她身邊?
為了這五年多要堅忍受下半生?
難道要擲銀仔決定?
大家比較是...一個是受寵壞的女仔，因為未試過和其他男
仔比較，就覺得男朋友應該係千依百順，要萬千寵愛在一
身，覺得男友一定要遷就佢，性格比較痴身，還覺得這是
應份的?大家相處左五年幾，而且有穩定既職業，如果不是性
格上有缺點基本上都係一個不錯條件的女仔。但只不過近來
妳每一次又一次咁無理的橫蠻取閙..我真係有點氣餒..

而另一個，以前因受過別人中傷，深知感情是一件很珍貴的
事，而且可能因工作的關係，性格比較獨立，真的很獨立，
同樣有穩定工作，但工作上有很多時都身處外地，咁即係唔
會成日見面，雖然識得比女友早，但有十幾年冇聯絡過，只
係大家相處近半年時間，或者相處時間短，暫時未見對方缺
點，到目前為止..在我眼中、心中.都是可以發展的對象....

究竟我要點做先係?責任 和 未來....那個才是重要?
如果真係分開...對方會做D咩出來..?但如果應承對方一起，但
最後又因一D事而又覆合，咁又會傷害到佢，到時大家關係可
能會變得很尷尬....朋友也可能做不成，怎做才好??

人真係好脆弱，只要有得比自己選擇，就會令自己無哂主見，
又會用好多藉口去選擇心中想要的，其實撫心自問，想不想同
佢一齊?其實自己心中是有答案，但又不肯承認自己的所為，其
實如果女友不是咁對我..我係唔會咁諗，但偏偏呢個時候有一個
知道可以一齊的，為什麼偏偏要咁巧合，如果她不出現，妳對我
差..我都會忍受，但就係偏偏係就個時候來考我....

我真係好辛苦....好頭痛......如果我能做得出不負責任的...就好了
。最更加令我頭痛的是...女友不知道會有可能有一個人向她
爭取.... 我點做好??

>>September 24, 2008 at 4:35:20 PM GMT+8

2008 年 9 月 23 日 星期二 【乍寒還暖】

打風的假期


打風..唉....碰正我係放假，真係丫，其實原本今天係
約了她，但佢昨天班機Cancel左，今日又Delay埋，所以
行程都打亂了，近年發覺，個個颱風都會打得成，天氣
而家真係變左，一係就好熱..一係就好大雨..一係就好凍
，都唔知點適應，亦都因為咁，自己都病左好幾次，記得
我讀書年代，呢個時候應該係好涼，最適合學校舉辦秋季
旅行，而印象中秋季旅行係好舒服好涼快的，看來似情不
再，諗諗下當年我秋季旅行都有同Irene她們一伙人一起行
自然教育徑，不知佢仲記唔記得呢..?能回味過去真係開心
又令人懷念....

和女友一齊出去，她約左她的好姊妹同行，當然啦，要買
野喎，同我去邊有癮丫，我一定叫走，但以前我唔係咁諗
，我係好鐘意同佢出街，我果陣覺得佢好節儉，買野都不
會買有牌子咁貴的，果時覺得呢D女仔真係難得，但而家..
買一個銀包都千幾蚊，買個袋又千幾二千蚊，同朋友講，佢
地叫我向好方面諗，話佢都唔係買最貴的牌子，只係名牌中
的中價貨，由她吧，女仔係鐘意靚既野既，心諗...咁都係有
道理既，有邊個女仔會唔鐘意靚丫....但只不過買化妝品都要
用差不多成千蚊，一支唔知咩既水，都要成400幾蚊，面膜又
幾百蚊，問佢使唔使咁狼呀，佢答我呢D叫『必須品』，真係
吹漲，在我心中『必須品』只係普通的衣食住行，或者男仔同
女仔的分別就係咁啦...其實真係好無奈..亦都對著她果刻真
係無言...好彩妳係有份工，如果唔係我一定破產...本身無產
的我要為佢破產喎，好陰公耶~~

還有今天村口有屋比人打劫，今日有警察上來逐家逐戶拍門查
身份證，諗返我對上一次比人查身份證係響好幾年前..在天水圍
公園水池外同朋友飲酒果陣，還記得當天係走堂的呢...，那時
候的我..機關算盡，走堂走到可以比我能夠畢到業的，諗返起都
唔知話自己醒丫..定係壞，但我覺得人生有呢D經歷..生命先會精
彩...。不知道，我會唔會將會發生一D人生轉捩點的事呢?到時真
係發生都唔知叫『精彩』定係『倒彩』喇...。希望女友真係會對
我好一點點啦...

>>September 24, 2008 at 10:19:07 AM GMT+8

2008 年 9 月 22 日 星期一 【驟雨】

精神崩潰


女友近排是提早更年期嗎...?為左一隻雞亦
都會嬲一餐，再這樣下去...我會精神崩潰呢...
難道說笑和認真也分不開嗎...?我話唔留比妳
食吧...白痴也知道是講笑啦，我點會唔留妳食
呢?估都估唔到妳會即刻黑面，同妳講野睬都
唔睬我，自問都十分低聲下氣啦，還想怎樣呀?
我低聲下氣咁多次都唔睬我，正常人也會很氣
餒吧.....更何況我還一而再..再而三..繼續下去咁
做呢...!!

近來..因為呢D事都好煩，回到家一見到妳就會諗
..今日妳又會唔會發癲呢..?估唔到相處咁耐先會有
呢D問題出來，滿以為自己感情路上也算是順利，
原本只係時間未到..問題未來，而家一見到妳就好
頭痛，更加想諗過我不如回自己家住，我諗大家見
少D會唔會好D??定係我們跟本係有問題..大家唔適
合一齊呢..?

若要我再要我咁過每一天，我真係會精神分裂，我
覺得如果妳都仲係咁下去...我應該要點做..?真係要
我選擇另一個嗎?

>>September 24, 2008 at 10:19:41 AM GMT+8

2008 年 9 月 21 日 星期日 【酷熱】

危機?


女友放大假，例牌訓到黃朝白晏先識起身，
我返工佢訓緊，我放工打比佢亦都係訓緊，
真係咁好訓麼?妳放假諗住陪下妳出去食野，
點知妳情願睇韓劇都唔出去，唉....算吧，既
然電視咁吸引妳，我都唔再叫多次，反正今
天她17:00機，我陪她食飯送佢返工當行下好
過，送到她到國泰城後自行返去，途中又比我
見到個Ck鼠既杯毯，比著以前我會毫不考慮
咁買佢下來，但今日我竟然要諗一諗，雖然最
終都買了下來比佢，但買完途中諗，點解我又
要買野比佢呢..?佢又唔係對我特別好，點解我
仲會咁做...?也許多年來我已經習慣咁遷就佢，
五年幾來一直無條件的遷就，當初諗住可以令佢
覺得開心....點知..我錯了，佢只係越來越貪心，
其實自己係咩心態呢..係還鐘意佢定係責任上要鐘
意佢呢?也許是後者吧，如果唔係..我唔會比她說了
一說就動搖喇......其實我都好怕自己有一天會改變
選擇...我感到自己的心魔真係好恐怖..正在不斷推我
去做另個的.....


Ck鼠杯毯


>>September 22, 2008 at 2:02:48 PM GMT+8

2008 年 9 月 20 日 星期六 【炎熱】

內心的說話


今日女友開始放大假，咁即係我就慘喇，
日日都會對住佢，今日早上同佢出街，
因搭車排隊事故都要發脾氣，我又錯在我
有車冇叫佢上車，就係咁..上到車就不瞅不
睬，板著臉向著我，講真..我真係不願意
逗返佢，無奈我都要向佢道歉...死哂狗咁..
其實我真是犯了一件很嚴重的錯嗎?

其實內心也很無奈，亦不甘心為什麼我要
攪成咁，我表面上在逗著妳笑，內心其實
不斷咁罵妳，我無情情又費唇舌向妳說一堆
我不願意的話，唉....女友呀...妳可唔可以對
我好一點..?現在天時..人和都好有機會移情
別戀呀，雖然我真係做不出一D傷害大家的事
，但妳每一次咁對我...我真係要點做才好?五
年幾的時間...不算短呀，我在變來迎合妳，相
反妳就越做越過分，妳可知道忍耐都有極限!!!
妳每一次都在挑戰我的忍耐和耐性....難道妳真
係想一手破壞大家建立下來的感情嗎..?也許..妳
拍拖經驗少，妳不知道冇幾多個我D性格的人，
妳要我向那一方走...可以對我好一點點嗎..?


夜晚同Irene去睇show，開頭是希望給她可以笑...可
以開心，點知...今日我都適合用，在近兩個小時...也
是我今日最開心的兩個小時，睇完同佢食左個飯，送
她回家...自己也回家，看見她有返信心和笑容，我都
放心下來，事情算是完結，沿途回家諗..女友會不會還
板住臉向我呢....?都好彩..我一開門都叫風平浪靜，大
家都好似冇事發生咁，唉...已經很安慰了.....。





>>September 23, 2008 at 3:29:57 PM GMT+8

2008 年 9 月 19 日 星期五 【微雨】

容忍極限?


家中有隻死懶鬼，唉....一句肚餓噢.....就要煮野
妳食，雖然係即食麵...10鐘內咩都會煮完，老
實講....整比妳食都唔係問題，但語氣可唔可以
唔好咁"命令"呢.....我只係叫等陣先吧，討厭的
眼神望過來，好似唔整比妳會有好嚴重後果咁...
望多兩望就話唔使妳煮，其實只係發悔氣強迫
我去就範....妳叻啦...萬試萬靈.....枉我...整完妳食
仲要幫妳先埋碗......妳對上一次煮比我食都有很
多個星期前喇，仲要係簡單到極的飯菜......。

其實我唔介意整比妳食，但我係唔鐘意妳的態度
，我也不是妳的工人吧，做工人都有錢收丫，我
冇錢收架....，真係好想好想同妳嘈一次大大大鑊
，我都好想話妳知我都有容忍限度，我在自己家
生活都冇咁折墮，我為咩要攪成咁，有時發覺我
平時忍妳係錯的....今次我再忍妳，只不過上一次
我都係咁對自己講....看來我也不是做大事的料子.....

>>September 20, 2008 at 2:04:11 PM GMT+8

2008 年 9 月 18 日 星期四 【綿綿細雨】

是凶兆嗎??


今日放假，理應係自由、開心、舒服先係，但係
都要被女友捉去做D我唔鐘意做的事，呢日咁樣
我情願返工，有時放假在家好似反而仲會唔開心
，返工...起碼可以經常見到同事，有講有笑，每轉
車大家都會揮揮手..點點頭，但在她面前真係有一種
唔知怎形容的感覺，除了呢D事外，如...一件事明明
係妳唔著都要把芧頭指向我，反要向妳道歉，一D微
不足道的事都可以將佢攪大嬲一大餐先安樂，但你問
我上次發髀氣係幾時...?我都耐都唔記得......。不認識
我女友的朋友..個個都話佢幾靚女，仲話你執到啦....，
事實上我都冇諗過會有一個樣貌娟好的女仔做我女友，
因為知自己咩質數嘛，起初話拍拖我都在腦裡閃過一絲
懷疑....佢真係鐘意我的嗎..?因為大家在外表質數上差好
遠喎，但點都好，我們都行左五年幾，時間也不短吧。
但能夠一齊咁耐係憑什麼呢...?我諗係憑我的忍耐力吧，
有時明明妳係好蠻橫，但我忍，你錯既..我又忍，由包容
到忍耐兩回事，現在要混埋一談，有時一些明明係妳錯的
小爭執妳都可以嬲一大餐，果刻真係好想同妳就咁算數吧
。直到現在暫時分手只係一個idea，這幾年裡面，有些女
性在我身體經過，我有點覺得自己當年選擇妳好似係錯的...
或者知道自己原來可以有得揀，真係以前諗都冇諗過.........
原來我都真係可以有得揀.....我估唔到我D咁既人都可以有得
揀......，但奈何已經和她一齊五年幾，怎可能一下子把它抹殺
，我又做唔出，但女友成日咁對我..我又好激氣，原來信心真
係都會動搖，我都感覺到自己對自己開始無信心....是一個危機嗎..??


十年前今日...我應該哀求到醫生比我每四個鐘比我打一支止痛針，
爽呀......。但插喉做手術攪到我喉嚨好多痰，令我成日都想咳，一
咳就整痛個傷口，真係辛苦，仲有..人開始清醒，知道會有食飯時
間，對面床的病人，成日係咁食野..攪到成間房好鬼香，亦都係我
深刻的精神折磨.....回想起當日都幾慘呀~~~

>>September 19, 2008 at 2:24:53 PM GMT+8

2008 年 9 月 17 日 星期三 【綿綿細雨】

轆之仇....???


今日好似同任何車轆都過唔去咁，返工時，D雨時大時細，
其實響訓練時，阿Sir已經講過我地知，細雨既天氣會令路
軌變得更加滑，因為軌上有少少既機油污，令架車會有滑
前既情況，如果在汽車角度上睇..叫做"跣車太"，本人都唔
係未試過咁情況，但今天真係咁耐以來第一次架列車向前
滑得咁勁，呢一下差D令我頭門都開唔到，幸運係車身月台
感應器，還在月台Scan到既範圍，如果要倒車，就真係大
件事喇。攪到我之後....快都唔敢快...驚死再黎多野.....好不容
易先捱到放工....驚魂未定呢....。收工回家，踩單車返去，咁
就諗住返去前，去超級市場買點日用家用品、食物咁，跟住
我又唔知食左咩屎..!!!我架單車尾轆爆"車太"，好彩爆"車太"
地方附近有間單車維修舖，如果唔係..路就行左一半唔上唔落
..都唔知點返去，去到Check 下睇下先知，架車個尾轆原來有一
口螺絲拮左響個轆度，所以我先至話..究竟今日發生咩事，我今
日同個轆有仇同個轆過唔去嗎...??難道我得罪左車轆之神...??

還有....今天是我手術的十週年.....十年前今日呢個時候..我應該
在病床上動也不動，因為我好記得身體插住七條喉，而且仲係
痛到我不得之了，亦都係我人生第一次可以feel到用嗎啡止痛
既快感....!!!!打完針真係好high好眼訓..最重要打完果三個鐘真係
會唔痛，但果陣我六個鐘先可以打一支，我亦都好記得我係要
典床三個鐘先可以打下一支。亦都係十年前呢日..就改寫我以後
既人生......想起來都有點感慨....。如果真係有時光機我既道路可
能唔會咁難走.....唉~~~時光機喎，天方夜譚吧!!!不怕告訴大家，
很久前我的生日願望係...多啦A夢可以由我張書檯的櫃筒跳出來，
看卡通看壞腦喇我...............!!!!!!

就係今天我說出"願望"......願望便冇法實現喇......

>>September 18, 2008 at 3:44:41 PM GMT+8

2008 年 9 月 16 日 星期二 【酷熱】

國語白痴


天未光就要返工，間中都會諗下點解自己要咁辛苦??
出村口時，見人地隔離屋仲熄住燈開住冷氣訓，唉....
成日都唉....!!!!返到去少有咁執到條碼頭線，但代價係
返去Depot，是但啦....我冇所謂，反正都會計開工時間
，除笨有精，其實久唔久一次都幾爽呀.....順理成章下
半場接手五字頭線..今次接507，真係如果架車唔係自己
自己轉Tracks，真係行錯路都唔知，哈~~~誇張點吧，點
會唔知呢，來來去去都係得幾條線，行錯路就真係抵死
喇。無驚無險捱到放工，唔係自己環頭，連接車個同事
我都唔識，哈....真係人面單薄.....。

放工雖然準時，其實自己都開快左，早左一分鐘咁大把，
其實要早一分鐘係好難既事，我都盡哂力喇。制服都冇
換..就出去機場，今次天時夾得幾好，除左係班死人西鐵
送我車尾之外，基本上程程車都係一上月台就等一分鐘
有車，去搭機鐵可能自己著住制服關係，三唔識七既職員
都會同我打招呼，機場D同事們果然有禮貌呀~~我打電話
比佢約左響抵港大堂大家樂等，響呢個時間有條唔知咩人
向我問路...唉...一睇就知...制服累事啦，條友仲要用普通話
問，心諗..你用英文問我都可以用我勉強既英文答你，國語
??我見工時冇考過我喎，正當用我勁勁勁勁爛到透既國語答
佢時，救星到..唉........佢D三文兩語果然掂，要人來救命真係
好樣衰，唉...我發誓以後一定唔會著住制服出去.....應負左果
個人，本來同佢諗住就咁響度食野就算，但正話發生D咁瘀既
事，真係覺得唔走唔得，就係咁我地出左中環食野。

在第一眼再見到她比起之前的她瘦左少少，看得出既瘦，大家
在餐室傾，仲話我估唔到你會唔換衫就咁黎，唉...阿大姐呀..!!!
你咩時間到..我咩時間放先得架..!!!!兩個著住制服的傢伙，一齊
坐住食飯有點Cross over 感覺，我都覺得幾得意.....去到仲一人叫
左一碗辣到離哂譜既麵，食到我衫都濕埋，妳又食到鬼咁輕鬆
，究竟邊個話入去食架...??食到我都真係頂唔住...要去整碗糖水降
溫....下次呢D真係咪攪我....!!等糖水期間又被問到我點解會打呢份工
作?理由很簡單吧..學歷唔係咁足夠，已同Level學歷的人比較，我
可以做到呢份工錯係咁，"細個唔讀書..大個做運輸嘛..."。妳仲好
啦，唔使錢可以週圍去，買機票只係需要正價10%價錢，一個月
返15-20日工最多，而且也是好多人夢寐以求的工作，去到邊都總
會有人注視自己，和妳同行我都留意到呢點，也難怪既..妳套衫
咁利是封，!就算唔著件外套都好特出，什麼叫鶴立雞群呀??
妳呢庭咪係囉....!!!還有我今日先知妳地唔係由離境大堂上機...
我仲成日諗我坐機總係冇見過妳地由離境大堂出入..妳地係點入
去，原來你地係有專車由停機坪果面入..明乎其實走後門...哈~~~

仲有呀...我想講.......我由始到終都懷疑妳的人格，不要老是向我
Say sorry..!!!妳跟本無必要向我講sorry吧，再是這樣說..我反而不知
怎面對妳呢，要說的，在email裡妳已經講得很清楚了，妳都唔使
再提此事喇，總之我地好朋友關係不會變架，放心..難道一個九
唔搭八向妳我前三言兩語既人，要攪到要逃避大家嗎...當初又是
妳自己講，咁難得大家隔十幾年先撞都返，很有緣麼...。細個我
成日整估妳妳都冇介意什麼，而家不會為少少事而唔開心嘛，妳
之前還講要向我報返細個讀書時候既仇...哈...妳大仇都未報喎..會
咁快放過我嗎....??點都好啦.....見妳有返笑容已經放心很多喇.....。


我果碗麵...真係好鬼死辣!!

妳果碗...妳都算厲害...食到咁辣...!

妳碗什果撈糖水..

我碗泥芋椰汁西米撈..



呢排個網都唔知仲咩，一係都入唔到再唔係就要等鬼死咁耐....唉...我開錯diary嗎....嚴重考慮用yahoo blog呀....!!!!.

>>September 17, 2008 at 11:49:32 AM GMT+8

2008 年 9 月 15 日 星期一 【酷熱】

妳覆我喇~~~~


終於都收到佢信息，亦都收到我自己張電話
費單，原來我Send 信息都用左80幾蚊，唉...
咁即係証明佢有時真係身處響外國啦，仲係
D唔近香港既地方，但算數啦，最緊要佢肯覆
我吧.....!!不過一出手都幾有難度啊，放13:30要
14:15分咁上下時間到就真係.......真係要諗諗點
去係最快??輕鐵轉西鐵轉東涌線再轉機鐵，嘩
.......點都要過一個鐘，妳今次等硬我架喇~不
過情願我遲到都唔好妳Delay呀.....

前幾天女友買左個袋，雖然今次係自己比錢，可
以話係唔關我事，但係唔係真係有需要買呢..?行
街時妳問我個袋靚唔靚，買左佢好唔好..?其實妳
想我點答呢..?答唔靚唔好，妳真係會唔買嘛...?家
已經有4個唔平既袋，但慶幸係佢唔係鐘意LV果個
Level D袋，若果唔係多多錢都唔夠妳買，只不過妳
用新袋個舊袋我都可以用，咁當係自己換新袋啦，
其實就係拾佢二手貨...唉....折墮呀...!!!

臨返屋企，比同事叫去機鋪打機，唉....雖然我間中
都會玩下，最識得玩既都係賽車Game，去到仲要
取返自己張殘到死既對戰車咭，太耐冇玩過喇，自
己部車係咩色都唔知，同班死仔玩，分明用我黎加
分，知我手車屎到爛，就屈我去玩，仲要比廿蚊出去
，下次你真係唔使再遇我喇.....好同事..!!!!!!


個袋..!!!真係係靚嗎...??唔係應該話係值得嗎??


天呀...!!!!錢唔易賺架


剛拆袋連單據..唉~~


>>September 16, 2008 at 3:37:04 PM GMT+8