2006 年 7 月 13 日 星期四 【清涼】

百事可樂福音營---第二日

今朝早7點起身，間房好凍=0="之後就洗頭換衫......
跟住落去集合好就去Canteen食中式早餐，d粥唔錯，但腸粉就麻麻。
食飽飽就去玩大腳八，密組組員經歷尋日既失敗之後，今日終於見到有合作精神。
佢到左右左右咁叫，雖然行得麻麻，但起碼係一個好開始。
到最後一次我同施予都要玩，原來自己玩既時候係好難，因為要用隻手拉起塊木，都幾倦下。
雖然最後都得唔高既分數，但已經做得好好~~

完左大腳八，就到今日既濕身活動，「流水柱」。我地抽籤抽到第一Round玩先，好緊張呀！
今次佢地識得點樣分工合作，邊個去跑去倒水，邊個去禁住d洞，我同施予都要一齊參與。
我地總共有九個人，有兩個去左跑，七個去禁。原來三十幾個洞單靠手指係唔得，仲要用埋面。
一開始都個身都冇咁濕，但係組員都唔識倒水既，都唔係倒落條柱到，倒落我個頭到既。
去到中間既時候，男組員已經要用埋面去禁，辛苦晒你地。而且因為我唔夠高，要靠Winson幫手睇下個波升到最高未。
最後好似有其他組既幫手，終於個波係柱底升到最高而且跌埋出黎，仲要係三組第一組完成，好開心呀>V<成組歡呼既時候，果刻感覺真係好好！因為佢地今次既合作好好，所以士氣大增。
我地Win左可以玩多一Rround，唔知點解雖然多左其他組既幫手，但係難玩左。
我唔理成身將會濕晒，坐係地下禁最底既洞，因為d水好剌眼，到後期已經睇唔到佢地玩成點。
雖然第二Rround三組最後一組先完成，但已經好滿意，最後呢Part有40分已經好好！
分享既時候大家都覺得好開心，因為大家肯聽組員意見之外，更肯合作。
亦欣賞施予完全唔理自己係組長，盡情投入去玩。
跟住可以番去宿舍到換衫，我同家敏行得超快，因為我地想沖涼。
沖完之後，就落番樓下集合，去Canteen食Lunch。雖然冇咩野傾，不過食得好開心。
食飽之後，到呢個Camp最倦既營地定向。

聽完點玩之後，就開始玩營地定向。
一開始搵第一包Puzzle好易，一出去個嘖水池就搵到。
但到第二包既時候，由於去錯左地方，要跑去會所到搵，用左好多時間。
而且因為組員可能太心急，唔夠細心，搵第二包用左好長時間。最後都係要牛子過黎話我地知係邊到。
我好想幫手，但唔俾......見佢地咁辛苦，唯有係個心支持。
到第三包又要跑番去宿舍既後面五人足球場，勁倦勁熱，路程超遠，最後都係靠阿滔先搵到。
我買左枝水俾佢地飲，因為實在太熱，佢地又冇帶水，驚佢地中暑。
不過驚佢地之餘，我自己已經就快中暑，頭暈暈，而且塊面超紅。
跟住原本要跑番去BBQ場地搵完第四包先再跑番去宿舍，但由於路程遠而且我地組已經係最遲果遲，所以秀程俾左提示我地搵完宿舍先，不過佢地好似即使輸都想靠自己搵晒去。
之後由於時間關係，我地冇搵到第五包，直接番左去日營中心玩Puzzle。
分享既時候，雖然最後我地係最低分果組，但佢地冇唔開心到，因為佢地Enjoy個過程。
最欣賞佢地玩Puzzle既時候，時間短但合作得好好，好快已經有個框出現。
呢個Camp所有合作既遊戲全部玩晒，我地係最低分果組，即係最後一名。
雖然佢地冇咩唔開心，不過我覺得有點難說出的感受，總係覺得因我幫手帶組帶得差而搞成咁。

由於玩營地定向出得太多汗，而且唔係咁舒服，所以自由時間番左宿舍沖涼休息左陣。
到5:45落左去男仔房briefing夜晚既福音晚會做既野，好期待學生從中有得著之餘，自己都有。
食Dinner既時候，因為仲係頭暈暈，所以冇咩胃口食野，食左少少已經唔太想食。
去到日營中心幫手預備定d物資，差唔多時間就開始。
今晚既詩歌真係好配合個主題「百事可樂」，仲俾我聽番我好耐冇聽過而且好鍾意既詩歌。
到見證分享既時候，雖然唔係全部學生都能被感動，但都有幾個有感動。
聽完見證再唱偶然遇上的驚喜時，我忍唔住喊...因為分享見證既兩個女仔互相係對方既同行者。
當我諗到我係團契冇同行者既時候，我想要但搵唔到，我就好唔開心......
到郭牧師既信息分享時，佢不但直指依家學生既問題之外，仲要時間配合得岩岩好。
到分享既時候，雖然有d既分享好行，但雞仔班超佢地都講出相信神既存在，感恩！
之後施予講左一個見證，組員有冇感動就唔多知，但我被感動了。
睇黎我都係鍾意聽見證多過聽講道，因為我好易因別人既見證而喊。
跟住用鐵線整出同神既關係， 我整左一條崎嶇既路，因為信仰既路絕不平坦。
完左呢個晚會之後，麻煩左秀程同施予幫手解答雞翼&Zoe對信仰既問題。
雖然未完全解答到，但相信已經解答到一部分，求神繼續帶領佢地尋找到想要既答案。
我亦見到其他組有女仔分享自己事既時間喊，聖靈感動左佢地，感謝神！！

之後工作人員留左係日營中心debriefing，不過我真係好倦，好想番去休息。
傾到今日活動，諗番密組既組員由第一日一盤散沙到今日既互相合作，個過程真係感恩！
真係要讚美神讓我同施予可以明白到點樣令佢地改變舊有既唔好性格，E.g唔聽人意見等。
完左debriefing後，同浩然行番宿舍既路上面，傾左頭先既晚會同埋感情上既事。
有點希望條路可以長d，因為我好Enjoy行既時候傾既野。

番到宿舍沖完涼已經勁想訓，但因為施予肚痛，所以我幫佢寫埋d鼓勵卡。
寫寫下訓著左都唔知，最後麻煩左Zoe雞翼你地幫我整理好我張床，同埋俾番個枕頭我訓。
一訓訓天光，到七點先起身。不過原來工作人員尋晚傾計傾到四點幾，有點後悔早訓左Tim。

《讓我高飛》
主 讓我心有夢想 無邊黑夜裡遠看著星河
年青光陰未保留 從來未甘奔波終一生
如果你讓我選取 寧冒險經過 不希罕安定
讓我為你使命立大志 為你棄掉所有

讓我高飛 高高的遠飛
不惜翅翼斷 不安於低地
遠飛不知的那方向 總比平庸值得
讓我高飛 造夢裡歡呼讚頌 看見你張開雙手
縱世間再沒有造夢者 仍要一生振翅

主 讓我心有夢想 無邊黑夜裡遠看著星河
從此甘心被你使用 願為你擺上求盡我一生
深願你為我選取 前行的路徑 為理想飛奔
主我為你使命立大志 讓我獻盡所有

讓我高飛 高高的遠飛
不惜翅翼斷 不安於低地
遠飛不知的那方向 總比平庸值得
讓我高飛 造夢裡歡呼讚頌 看見你張開雙手
縱世間再沒有造夢者 仍要一生振翅
或會再沒有造夢者 仍要這生振翅

>>July 16, 2006 at 12:59:34 PM GMT+8

2006 年 7 月 12 日 星期三 【清涼】

百事可樂福音營---第一日

搞左咁耐，終於可以去得呢個Camp啦！
十點半番到青彼練左一陣將會帶敬拜既詩歌，因為我真係好驚.....第一次要係咁多人面前彈。
而且我之前又冇咩時候練，搞到成日彈錯音，之後就briefing整個Camp會做既野。
到十二點就上去青彼三樓副堂幫手點名，一開始番到黎既全部都係男仔，到咁上下雞翼Zoe番黎先有女仔，呢個Camp真係男多女少。最後有七個女仔成群結隊番到黎，果一刻有點反感，因為佢地係學校俾我感覺好串。

熱身運動：
介紹完Camp主題呀~導師組長果d之後，就有破冰。
一開始玩二龍爭珠既時候，對面既人唔太積極，所以我地果邊好輕易Win左。
另一個破冰係火星撞地球，MC人狂針對咩一個星球既人，搞到佢地狂跑。
到敬拜，今日唱左色彩人生~生之盼~心靈的迥響~偶然遇上的驚喜。
我覺得彈錯好多音，我又同施予&團長夾得唔太好，d學生又唔唱，搞到呢Part好似好差.....
之後就分組去傾組名，口號同動作。我果組既人有五個男仔 & 雞翼 & Zoe，組長係施予。
開始既時候佢地又唔點出聲，雞翼佢地提出意見又俾人反對，搞到傾左好耐都傾唔到組名。
而且施予又唔點出聲，搞到好多位都好靜咁......我又唔知講咩好。最後先改到叫「密組」。
口號係：密組密組，親密冇秘密，甜蜜似蜂蜜，絕對冇沉密，不浪費一物，我地係密組。
各組分享晒之後就出發去大棠營地啦~~~

去到之後分完房，同雞翼~Zoe~家敏~詩雅~阿珊~咖哩~Miss Wong~Lily一間房，我訓上隔床。
間房都幾大下，而個廳都唔錯。最好既係Toilet有兩個，等沖涼都快d~~
放低行李之後就出發玩挑戰個人能力既活動，原本有一個係玩攀石，不過之後改左射箭。
我去左睇蜘蛛網，太難玩，所以我冇去玩到。不過好多人都失敗左，但雞翼成功，勁呀！
跟住就係蒙眼獨行，學生要蒙住眼俾我地帶去一段路，跟住自己再行番去起點。
我帶佢地行既時候，好似好驚咁，行左幾次長樓梯，行到腳都軟。
不過之後佢地行番去起點，行得唔錯，好多人都成功左。咁當然我地工作人員會係佢旁邊睇實佢唔會發生危險啦！原來女仔既認路能力好d，因為佢地好快番到去。唔知我玩會用幾耐時間呢？
彼此分享既時候，密組既成員都話要珍惜自己對眼&自己一個人既能力有限。同成組影完相就準備BBQ。
BBQ之夜第一個活動係起爐燒乳鴿，佢地意見十分分歧，又唔聽組員意見。
我同施予又唔可以幫手，好似食野唔做野咁......見佢地起爐起得好辛苦咁，心痛=0="
起爐期間不斷有斷斷續續既毛毛雨，搞到秀程佢地周圍跑，辛苦晒。
幸好神有聽我地祈禱，最後都係停左雨，而且仲好熱tim，可以繼續BBQ。
跟住最後隻乳鴿都係燒左好短時間，完全唔熟，所以計埋起爐分呢Part活動得40分。
之係分享既時候有d話內疚，因為提出錯誤方法，有d話唔夠合作。
見到雞翼好唔開心咁，原來佢覺得呢組d人冇合作精神...............
跟住就到Dinner，有燒烤包燒，不過我熱到冇胃口食，所以燒左少少野食就冇燒到。

完晒今日活動仲未休息得，因為仲要debriefing。落左去男仔房到傾，點解好似好亂咁既？
傾左自己果組既情況，我提出左雞翼既感受，希望第二日會有改善啦！
而且今日同施予合作得麻麻，唔知係唔係唔識既關係，我地兩個都冇咩點講既野............
開會開到成11:45p.m左右，跟住衝上去等沖涼，等左30分鐘到就沖到。
之後因為夜晚冇咩點食野，食左個杯麵睇左陣電視就去訓lu~~張床幾舒服，不過好驚跌落床。

今日既活動到此為止，希望聽日密組合作得可以好點吧！

>>July 15, 2006 at 2:17:06 PM GMT+8

2006 年 7 月 11 日 星期二 【清涼】

結業禮@中三學習完結

最後一日，依依不捨。
今日番到學校，竟然俾Miss呃左。原來我今日讀經不但要坐係台上，仲要坐係校長隔離。
我太緊張，搞到讀錯左幾個字，番到課室仲要狂俾天台串=0="衰人黎架！
第一次結業禮拎到獎，今次拎到個中國語文科全級第一，算唔錯架啦=v="
咁都俾我拎到...不嬲中文麻麻，今次唔洗驚俾阿爸話身為中國人中文都會，WAKAKAKAK！
跟住仲拎左個戲劇組副主席既唔知咩咩獎，今年Miss蔡又俾獎我，又俾我有副主席既A Grade，咁好人既。
好快就完左個結業禮，跟住就要最後一次上絹姐堂...................

上到課室，個個都驚驚地。
Miss讀晒邊個分咩班先，3E有23個4S1(理一)，13個4C(商)，3個4A(文)，1個4S2(理二)。大家都分到唔錯既班別，真係好啦~~
之後絹姐派野既時候，勁多老師逐個逐個入黎宣佈野，好煩。派左暑期作業啦！書單啦等等..........出年要買好多貴書T_T
最後係成績表，我同Kathy都好開心，因為大家一齊入4S1，一齊英文係Groud 6。
今年我全班 & 全級都係第五，仲拎左14個優點同埋1個小功，多得很。我覺得唔錯。感謝神~~~

派晒d野之後，Miss Wong就上左黎影相。好唔捨得.........同左幾個同學影相就散。
大家散既時候好似冇果種依依不捨既感覺，maybe 3E精神唔會因為唔同班而散掛.........
臨散之前仲同左Prefect組長影相，好多謝佢成日忍耐我唔聽佢指示 & 同我地H組既組員好玩得埋，
仲有當我同Winki上次唔開心既時候，你去安慰我地，THANKS A LOT！
希望你會考ENG PASS，可以升上中七~~多謝H組既Emily~Maggie~Winki你地成日陪我傻。

今年雖然曾經有事令我唔開心，但經歷左唔同比賽，大家都團結左。
今日正正式式要離開E班呢個字，出年不再係精英班，出年不能P.E堂自己一班上，出年不會受到老師的精英班式指責.........
希望大家出年升到唔同班既時候，努力讀書，一齊為會考準備。

「臨別要在這間愉快的班房起舞。」

3E IS THE BEST！

>>July 12, 2006 at 2:58:48 PM GMT+8

2006 年 7 月 10 日 星期一 【清涼】

成果匯演~~~GOOD SHOW

好緊張呀！今日係一年一度既成果匯演，一朝早番到學校準備定Drama既道具~衫果d野。
跟住差唔多夠鐘我同張凱峰過左去Hall預備英詩獨誦，比Drama表演更驚，因為好易背錯。
雖然最後讀得麻麻，不過都算吧！拎完個校園安全海報設計個獎之後就衝去換衫準備On Show。

On Show之前比把扇既木刺插左入手掌到，勁痛！表演之前成班人係台上講Good Show。
表演既時候雖然有d對白唔記得，跳舞跟唔到拍子，但已經好好，因為只排左一星期多d。不過觀眾覺得套劇太短.....
原來成套劇最好笑既位除左我地跳美少女戰事之外，就係話Feli係基佬果到=v="
終於忙晒lu~~遲到8月6日有戲劇馬拉松，我地做番Good Show，唔知你地會唔會黎睇呢？

多謝你地係日記到話Good Show好睇。
聽日派成績表........最後一日上課，依依不捨。

>>July 12, 2006 at 11:33:19 AM GMT+8

2006 年 7 月 9 日 星期日 【清涼】

死亡。緊張。表演

今日排戲由兩點左右直到八點，雙腳宣佈死亡。希望明天能行得走得，否則後果不堪設想。

由於今日本人身體感到不適，所以脾氣較差。
或許影響了大家排戲的心情，在此向戲劇組各演員及幕後人員致萬二分歉意。
明天表演，十分緊張。因為第一次穿著病人服+跳兩part舞。而且排練時間少，希望能演出順利。

DRAMA CLUB~~GOOD SHOW

>>July 10, 2006 at 3:04:20 PM GMT+8

2006 年 7 月 8 日 星期六 【清涼】

疼痛。酷熱。疲累

今日一朝早去左屯市既政府合署既空地排戲，只可以用兩個字黎形容今日排戲既感覺：熱+痛
去到空地好多人耍太極，俾人望住下排戲既感覺怪怪............
今日成朝只排劇入面既一Part舞，無言。只係跳到對腳好痛，右大脾仲要整親條筋，好痛T_T
之後早放左，即刻衝番屋企沖涼休息陣， 跟住倦到唔想番教會=v="

番到教會見到YUNG YUNG啦！好掛住你呀>V<
完左小組之後同二哥 & 佢朋友去買謝師宴著既衫，真係笑死我。
佢地兩個買左件同花款唔同色既衫，一個黑一個白，係到扮情侶。
同佢地行左好耐，行到腳都軟，我自己就買左條褲。

「只想你得到幸福！」

>>July 9, 2006 at 12:47:20 PM GMT+8

2006 年 7 月 6 日 星期四 【清涼】

投訴。傑出。休息

一朝早番到學校就出發去科學館，係架車到聽聽下歌先冇電........黑仔！
跟住去到就睇有關氣體既實施，好多都係科學堂睇過，有點悶。
之後自由時間同KATHY周圍玩，勁好笑........到十二點左右就準備番學校。
呢個時候我地班向阿SIR投訴點解唔可以將3E成班安排同一架車，不過最後革命失敗！
「呼呼！節哀順變吧 >v< wkakakakak！你小心我再咩咩咩你呀！」

LUNCH之後就番去學校參加畢業典禮，有點兒悶。
今年分別上兩次台拎獎，一個係李沛穎先生獎學金(傑出宗教服務獎) & 香港朗誦節季軍。
雖然個獎學金我唔多覺自己係團契做副團長好傑出，不過呢個係我人生第一個獎學金，好開心！
之後表演，最好都係Choir..........唱得唔錯。跟住完左就番屋企學琴，因為Miss唔舒服，所以比平時早左少少學完。

「感覺終於漸漸沖淡，看來要尋找一個新的了。」

>>July 7, 2006 at 3:42:30 PM GMT+8

2006 年 7 月 6 日 星期四 【清涼】

排戲排戲排戲排戲排戲排戲排戲

>>July 7, 2006 at 1:30:34 PM GMT+8

2006 年 7 月 4 日 星期二 【清涼】

感動。開會。排戲

今日學校有佈道會，真係好感動。
不論敬拜，話劇，信息分享，真係好好。比學校之前既佈道會，更加令我投入-V-"
到阿滔講跑車的故事，雖然聽過幾次，不過令我諗起好多野。
好感恩！媚今日再次決志信主，希望神領她在信仰上尋找你。
亦都感謝神！今日既佈道會令我諗左好多野，神你呢排係靈修or佈道會都俾我經歷你，THZ。

完左之後，第一次同阿余行街街。行左一陣，就去食野。
見到有個細路狂俾佢阿媽鬧，仲要用粗口鬧，真係慘............個阿媽仲要啤住我地兩個，無奈。
跟住影貼紙相，有d都影得唔靚既T_T 唔制！唯有下次就影過吧................

兩點番學校開會，都係傾番下個禮拜團契既Camp既事，好多問題好似都未解決。
之後因為要排戲，所以四點走人。排戲CUT左好多野，可能做既時候得15分鐘，希望唔會搞到套劇唔好睇啦！不過成果匯演我都幾多活動=0=首先英詩朗誦，跟住領校園安全海報設計比賽個獎，跟住戲劇組表演。唉.......唔知趕唔趕得切換衫呢？

「回覆，有點點出人意表。但我頭腦現在清醒了很多............」

>>July 5, 2006 at 12:53:26 PM GMT+8

2006 年 7 月 3 日 星期一 【清涼】

沉悶。趕功。無奈

今朝媽咪冇煮早餐，番到學校懶得買，搞到食朝個肚不斷打鼓。
今日番到學校睇專題研習優異組別示演，仲記得上年我地果組上台唱歌匯報，真係好懷念。
不過今年......得一組較為好，其餘真係悶到想訓。去到中段，個天開始行雷，搞到個Hall起哄。
完左之後， 番屋企之前去食左個早餐，好味！之後係屋企訓左陣就番學校排戲。
發生左d事，不斷發生第一次既事。排戲好倦......企到腳軟，一定要趕得切>V<

同大妹妹傾電話，無奈。講真，對我黎講，對一個14歲女仔黎講，我未做到咁快原諒到佢。

「我不想再聽，這刻我的心很痛。我不想面對，當我逃避這件事也好，其他事也好，給我一點逃避的時間好吧？」

>>July 4, 2006 at 3:19:41 PM GMT+8