2002 年 12 月 31 日 星期二 【晴】

新年了！！！

本想寫返廿六至三十一號 d 日記，但已經忘記得七七八八，所以，唔再個別寫了，寫大概算了！

廿六號，都可算驚險，因為那日排劇 call 10:00，當我訓醒，望下個鐘......依！十點多！！唔係呀化！！立刻第一時間起身梳洗，定神後，再望鐘，原來係九點多！都好 d，但心想，無論我點趕，都趕不及10:00 到大圍排戲，所以，我 call Apple，話我會遲到，大概10:30 吧！
我以為我遲啦！估唔到仲有人遲過我，連個導演都記錯時間，以為排14:00！哈！等下等下，等到差不多十一點幾十二點先開始排戲。第一次排，都算順利，因為劇本新鮮熱辣，所以大家都要 ling 左劇本，不過，廿九號就要 onshow 了，希望背得切啦！

廿七號，排戲 call 14:00。我 d 對白都係記得唔熟，仲有兩日就要對住三百多人演，點算？

廿八號排戲 call 10:00，真係怕起唔到身，好彩，都起到！排完戲，18:30 就要返教會開會，鬼叫我今年做團契職員咩！好彩！我今次係做文書+財政，順便可以練下 d 文筆，hehe。今晚團契週會係 "回顧"，在 david 領導下，各人都作了不少的分享，分享過去一年的事......都唔錯喎！

廿九號，演出了！！返完崇拜，食埋飯，就去沙田集合，一齊入烏溪沙。講到烏溪沙青年營，我好耐無去過了！我記得，果陣入去，要坐船入去架，依架，坐車就可以直達門口，而且，經過裝修後，仲靚過之前好多添~~
演出都算順利，你知啦~ 一個類似中學禮堂的 hall，再加上三百多人，在無咪的情況下，聲線都夠，真係...... 都算係咁啦！雖然係台上，唔係好 feel 到 Light in 同 Light out，但演出順利！感謝主。

三十號.....好似無乜特別野發生，好似係掛！呀！唔係呀~~ 今日同 Joyce 睇無間道呀！唔知係咪之前睇過 (不過 Joyce 唔知)，所以今次特別留意 林家棟，原來，佢真係黑底架！！

三十一號，同媽飲完茶，就落沙田同 Joyce 睇戲，今次，係睇金雞。原來，金雞都幾好睇架！都幾勵志。夜晚食完飯，就返教會，因為有除夕感恩會嘛！順便比只碟魚旦。大概到22:30 我同魚旦就提早離開，在回家的途中，經過麥記，見到 d 軟雪糕好正，我同佢都忍唔住買左個 $2 新地筒食，好正！

一月一號，無乜特別野做。向屋企行行企企，番睇 "新札師姐"，之後就打週會表，把團友的資料入 Access，並 set 埋通訊錄的位，至於會議記錄，因為無乜心機打，所以，到依家都係打到一半，問你死未！哈！

唔寫了，要專心睇叱吒。

>>January 1, 2003 at 3:03:46 PM GMT+8

2002 年 12 月 24 日 星期二 【晴】

yeah~~ 我終擺脫了 "禮券" 的握運了！！之前，同 d 舊同事聚餐 及 公司聚餐，我都好不幸地抽到 "$50禮券" (零食物語 & Wastson)。 今日教會聚餐，我終於抽到唔係禮券的聖誕禮物了！！！ yeah~~~ 今次 d 份禮物，係一個招財貓的錢罌，好得意架~~~~！！

回心一想，可能天父知道我之前勁唔開心，所以特登安排黎 d 禮物比我，"乙水" 我開心，知道我唔想再要禮券，又知我鐘意貓，所以特登送隻貓貓 (錢罌) 比我~ 好開心呀~ 多謝天父！

因為要趕及四時出到銅鑼灣，所以教會聚餐食到一半，就要走了！

四時多同妹及表妹，在銅鑼灣 ua 睇 "貓之報恩"。套戲......一般啦~ 唔知係咪之前宮奇俊 d 動畫比較有深度，今次佢 d 徒弟做到咁淺白，有 d......怪怪咁。
睇完劇，表妹趕下場，我同璐敏就行銅鑼灣。

我倆本打算唱 k 的，但行下行下，我地就無去唱 k，變左行街。行銅鑼灣，不外乎都係行下 times，崇光呀咁。今晚才發覺，我同妹的 taste 都唔係好同了！佢鍾意睇衫，我就鍾意行下 d 公仔鋪，估唔到在不知不覺間，我倆鍾意 既野，會變得咁唔同！

行到七點幾八點，我地開始諗去邊到食野......最終我地去食日本野，都幾抵架！兩個人，叫一個 $188 的 set，再加一個無乜酒味的清酒煮蜆，埋單都係二百多，真係抵食！之後，我地行左入一間 cd鋪。睇下睇下，發覺有 d 大陸正版 cd & vcd 勁平，就以憶蓮為例，3cd，有滾石最後一只碟的歌 加 維珍 頭兩只碟的歌，都係賣 hk$35，勁抵！除了買了憶蓮外，我仲買了周杰倫 的 vcd，係台灣演唱會黎架！買 hk$20，超抵！而璐敏就買左 幾米的 cd。

之後，我仲買了 "傾城之戀" 的 dvd。

唔知係咪耐無著高跟鞋的關係，回程時隻腳開始頂唔順，之前傷左果隻腳仲痛到痲痺添~~
唏~ 明天排戲，真係要著返波鞋先得了！

>>December 26, 2002 at 5:31:00 PM GMT+8

2002 年 12 月 23 日 星期一 【晴】

今天起了床，無所事事，睇下 d vcd......"愛回家" 勁正！！睇到尾段，好感到！！ "Iris" 都好好睇！但我估唔到 Kite 會全裸 咁演出！不過都唔出奇呀~ 因為佢之後所拍的電影都好似多數都係 iii 的.....

今晚，都算經典了！因為媽 & 爸返了大陸，所以屋企只係得我同妹。又因我和妹都唔係好識煮野食，所以今晚我地決定叫薄餅食。我地大概七點四十分落單，個服務員話大概要 1.5 小時才送到(平時只需三十分鐘)，本諗住，算啦~ 我地都唔係咁肚餓，個半鐘就個半鐘啦！

點知，等呀等，等呀等~~~~ 等到九點幾都未送黎，我同妹都想取消個 order之際，個電話就響啦~ 原來係薄餅公司打電話黎，話無晒餐湯，問我地會唔會轉可樂代替。我細妹即刻話：Cancal 左佢啦~！但我覺得，若果佢地已經整好晒，依家話唔要，好似好衰咁，所以，我問個服務員：d 野整晒未？......大概幾時送到？......知道佢地已經整晒，咁就算啦~ 其實佢地都好慘，若果我依家話唔要，佢地一定會好慘，所以，最終我地換左兩鑵可樂。

話咁快，佢地就送到黎......其實佢地都遲左，不過算啦~ 大時大節！......我好急趕咁食完野，就趕去旺角。

唔知係咪璐敏講左部份劇情我知，所以，我有 d 唔係好明 "無間道" 講乜，不過，黃秋生做得勁好！影帝即係影帝！
今晚，除左阿哥同阿嫂之外，仲有阿哥個 friend，阿 wing 同佢個女朋友，同埋一個，終於可以睇到佢盧山真面目的人，占士！之前聽占士把聲，以為佢好高，點知........唏~~ 仲矮過爸爸！問你死未！不過，我覺得佢個型同爸爸有 d 似，當然，爸爸帥好多啦~ 同埋，佢太矮了！若佢高 d 的話，我都可能會考慮一下！

睇完戲之後，各有各走。當我睇完戲之後(大概零晨十二時多)，一走出戲院外，我就即刻打電話比爸爸了！估唔到，佢今日竟然咁早訓，我打電話比佢時，佢已經訓左，又因佢聖誕無假放，同佢講完聖誕快樂，閒聊左一陣，就掛線了！爸爸就好啦~ 可以過一個白色聖誕！我都好想呀~ 不過，一諗到佢果邊的氣溫低至零下，就即刻怕怕了~~ 都係等遲 d 先過去~

明天教會有聖誕崇拜 & 聚餐，唔知會唔會抽到禮物呢？

>>December 26, 2002 at 4:50:31 PM GMT+8

2002 年 12 月 22 日 星期日 【晴】

放假了~~~~~ yeah~~~~

昨天第一次排戲，其實都唔算係排，因為昨天才接過劇本......
今次個劇本，好深！想帶出的信息，都好深！！
今次我係做幕前，哈！終於比我等到了~~~~~
仲要係做天使！！

排劇的時間不多，加埋都唔夠廿四小時，就要做比人睇，真係好怕會預備得唔好，做衰天父個"朵"~~

今日開始放假了！放到六號先返工！！本打算去北京架，不過前陣子屋企發生左 d 事，所以打消了這念頭，不過，無所為啦~ 廿九號有話劇做，都算係一件好事！

雖然唔去旅行，但都破了財！因為十六號那日，我遺失了一張剩餘二百多三百元的八達通，及公司職員證......唏~~~ 就係咁，我就無啦啦唔見左三百幾蚊！有時黑起上黎，真係避都避到！去 7 仔扭蛋，竟然食左我10蚊！！！真慘！！！

>>December 23, 2002 at 8:55:34 AM GMT+8

2002 年 12 月 15 日 星期日 【晴】

終於黎到最後一場的日子了，之前幾場，我都無乜感覺，可能係因為我做幕後吧！
今晚，我突然緊張起來，好彩，好快就平伏過來。
今晚，觀眾比我地預期好，反應，都好好。
不知是否因為最後一場的關係，各人都出盡全力，做到最好。演員們，放了，幕後們，把握一分一秒，以最快的速度轉景。一切順利。
完 show 了，謝過幕，開始有點唔係好想走的感覺。

我的
show 後憂鬱症
又發作了

見到 d 師傅三兩下手腳，就將個景拆散晒，真係有 d 唔捨得！

完 show 後，我真係唔想走，幫佢地搬野上車，傾下計，攪下攪下，成十一時多才在尖咀走。本來諗住行海旁，但得我自己一個，再加上夜深，最終都才消了這個念頭，沿海旁，向廣東道方向，一直行......望向香港那邊，聖誕燈色已亮起了，海旁滿是一對對的情侶，仍是單身的我，更覺孤清。

一 show 未完，一 show 又起。
廿九號我又有 show 了，今次仲係幕前添！勁開心！！

星期三慶功，唔知會有幾多人到呢？

>>December 17, 2002 at 3:52:02 AM GMT+8

2002 年 12 月 13 日 星期五 【晴】

為了套話劇，前陣子日日捱更抵夜，晚晚三時多四時才睡。今日，終於來到 on show 的日子，感謝天父！雖然午場的觀眾並不多，但演員的表現，幕後精英的通力合作，令到演出十分成功！晚場就更加不用說！觀眾多了，接近 full house，各位的表演仍保持水準，一切順利，多謝天父的保守！！

今晚檢討會時很開心，一來 good show，二來因為香港電台睇到我地的宣傳單張，覺得我地套劇好 fit 香港時下的青年人，所以，明天會有工作人員來睇及拍攝，還會替四個男角做訪問，廿六號仲出街添~ 好開心呀~~~

前陣子的辛苦，都是值得的！！

>>December 14, 2002 at 4:59:05 PM GMT+8

2002 年 12 月 6 日 星期五 【晴】

前幾日放工返屋企，在大堂聽到 d 師奶話：你話呀~ 你睇下你睇下，幅 "長" 都好似就黎出水咁，依家好似春天咁，你話呀~~ 香港無冬天架啦~~

事實，近日的天氣真係好似春天，好濕。天文台話明天起會凍到十多度，真係醫生好生意~

好累，近日晚晚都成十二點多一點才回到家，好累！日頭返工真係理唔到話劇 d 野，再加上公司開始好忙，根本無時間偷雞做話劇 d 野。我依家 mark 位只係 mark 到第五場，全套劇有成十二場咁多，下星期六就 onshow 了，真係唔知點算！

我仲有個大牌未整，希望可以趕及十一號前起貨！

今晚唔知點解，個頭又開始痛......

今次套劇， d 飛賣得唔理想，五場加埋，只係賣左五百多張飛，點算？

>>December 7, 2002 at 4:25:54 PM GMT+8

2002 年 12 月 1 日 星期日 【陰】

今日，又自己放了自己一天假......

今早，去了看跌打，經醫師睇過，佢話係傷左條根，最好盡量唔好行咁多.....
心想，幸好是傷左條根，我幾怕係自己捽到自己條腳脫了骹！

捽完，"夫"了藥，隻腳大了一個碼。思前想後，返唔返工好.....
最終都係 "聽醫師話"，唔好行咁多，唔返工！

決定之後，打電話返公司請假，跟住就開始整 d 道具......

>>December 3, 2002 at 2:58:41 AM GMT+8

2002 年 11 月 30 日 星期六 【晴】

我炆呀~~
今晚跟完戲，勁炆！！！

d 演員好似唔係好知佢地自己在那個出入口 in out，又唔係好知自己有乜道具及要唔要帶走。我去同 SM 講，佢又話：係囉！所以我咪要你地整個 LIST 出黎，睇下要點搬 D 景呀，有 D 乜 PROPS 要清囉！我知道有乜要做啦，咪叫其他人幫手囉！
唏~ 真係比佢激死，其實，知道有 D 乜要演員自己帶走，同 D 演員講返咪得囉！

唏~~~

上星期五，著左對新鞋，唔知係咪因為對鞋太硬，夾得對腳好痛，特別係右腳。其實星期六果日，當隻腳踏地時都痛，不過諗住過多幾日就無事，所以無乜點理佢，行路時就住就住。點知，今日仲未得，仲痛，而且間唔中有 D 麻，隻腳指公仲屈唔到，我諗，明天都係去睇睇跌打好 D 啦~

唏~~ 今晚仲要趕分"轉場表"，明早仲要整道具，勁忙！

>>December 2, 2002 at 3:35:19 AM GMT+8

2002 年 11 月 27 日 星期三 【雨】

今日，天氣涼了不少，再加上毛毛細雨，更涼。

今日，穿著去年聖誕節爸爸送的外套，很暖。

今日，Anthony 沒精打彩的返到公司，整日忙過不停，真替他辛苦。不善詞令的我，真的不知如何安慰他，唯有盡量不煩他。回想起自己也曾好像他一樣，終日忙過不停，旁人真的幫不了什麼。今年聖誕節將會放長假，希望放假後不會有太多堆積如山的工作等著我。

今晚，到了藝穗會睇一套福音劇<讓生命飛翔>，知道這套劇裡有很多台前幕後都是第一次踏台板的，但表現一點也不遜色！值得一讚！

>>November 28, 2002 at 4:26:42 PM GMT+8