2002 年 11 月 25 日 星期一 【晴】

有些人寫日記，會把開心和不開心的都寫；有的，只會寫其中一樣。今次，可算是我唯一一次，不想記下我的傷痛！

唏~~

因為昨日放了假，再加上我今日返晏，所以都有 d 驚返到公司唔知張桌面會有幾多野等住我做！好采，返到去張桌都唔係太恐怖姐！其實今日我都係無乜心機做野，明知有 d 算係 urgent 的，我都拖到明天才做，唏~ 算啦~ 長命功夫長命做呀嘛！

今晚，有個同事問起我，屋企究竟有乜事，昨天要放假一天？我略略講左 d 野俾佢知，其實，我自己都唔係好想再提，就算有時見到 d 報紙報導類似的新聞，我都唔係好想去睇.......所以，話完俾佢聽之後，我其實有 d 唔係咁開心。可能係我仍介意掛！

唔知係咪天父唔想見到我咁，所以特登安排左另一個同事，打內線同我講：外賣豆腐花到！
當時我呆了一呆，我話：下？
然後佢話：係呀~ 你出黎 counter 先啦！(因為佢係做 counter 的)
之後，佢就請我食左碗，好美味的豆腐花......

有時，我估，天父會不時睇住每個人，只不過係我地 feel 唔 feel 到佢咁解姐！
昨日，我曾在禱告中同天父講，我立志更依靠祂，並立志明年聖誕受洗！當然，我知道有 d 野唔係我想就得，都要天父批先得，所以，我都唔諗咁多，天父講點就點啦~ (雖然我有時都唔係好講佢講)

夜了，訓了，明天仲要返早！

>>November 26, 2002 at 4:44:15 PM GMT+8

2002 年 11 月 21 日 星期四 【晴】

唏~~~ 今年真係唔知發生乜事！

今晚返到屋企，啟動了ICQ 後，收到璐敏的 MESSAGE，先知原來白雪雪已經唔向到......

今早，我媽餵白雪雪飲水時，發現牠口中有一條好長的線，以為牠不自覺地吞了支針，所以便帶牠去睇獸醫......去到獸醫處，醫生話白雪雪的內臟機能其實早就盡失，估唔到佢可以捱到咁耐......醫生問媽，帶牠回家還是怎樣，媽心想，儘管回家又怎樣，若在家中 XX 的話，牠也只能在垃圾埋葬，倒不如留下來....就這樣，醫生就叫媽在外面 (COUNTER) 坐低等等，當時，白雪雪一直在我媽懷中......漸漸地，牠目光開始散；漸漸地，牠眼瞼再不張開；漸漸地，牠停止了呼吸......

哈！我真大意，回家後竟一直未發覺牠已不在，竟一直未發覺牠的用品已不在，我竟會這樣的粗心大意！！！

後天 (24/11) 就要幫舅父辦理身後事。唏~~~ 點解今年會發生咁多事呢！

>>November 23, 2002 at 8:17:19 AM GMT+8

2002 年 11 月 19 日 星期二 【晴】

昨日去完三舅父屋企，就睡唔到........

好怕半夜三更又有電話響
好怕..........好怕

今日返工，無乜心機、精神............

好 "支力" 好 "支力".............

>>November 20, 2002 at 2:32:55 PM GMT+8

2002 年 11 月 18 日 星期一 【陰】

今日，我無返工..............

昨晚半夜時份，一個神秘電話，令到我一家難以入睡..........
接近天光時份，我媽作了一個異夢，弄至難以再入眠......

今日，特地請了一天假，為怕我媽會出事，為了給她一點支持........

唏~~ 我都不想多提了！

一切盡在不言中。

三舅父.........永遠愛你~~ 保重了！

>>November 19, 2002 at 1:48:35 PM GMT+8

2002 年 11 月 17 日 星期日 【晴】

天氣真係轉凍了...我估

今日，買了兩對鞋--一對杏色的運動鞋，一對全克的鞋。我覺得都幾抵，五百五十元兩對，都算係咁！

>>November 18, 2002 at 3:41:17 PM GMT+8

2002 年 11 月 16 日 星期六 【晴】

好累喔~~~

不知怎地，自發生事以後，我無論幾晚睡，都會很早起來。

今天一早起來，便拿著一些宣傳海報到各大埔的教會，有很多教會，我也沒去過。若不是這麼一走，都不知原來大埔有那麼多教會！

>>November 17, 2002 at 3:48:59 PM GMT+8

2002 年 11 月 15 日 星期五 【雨】

今日，天氣突然轉冷，再加上有雨，我估同尋日相差有成十度！！

今日返到公司，勁少人，因為逢星期六都無乜人返，大老世更加唔會出現，所以，可以做好多自己野........我影左劇本，floor plan，上網，玩 icq......勁 free！

我愛星期六~~

>>November 16, 2002 at 2:04:09 PM GMT+8

2002 年 11 月 14 日 星期四 【陰】

就今早，我媽跟我妹提及那事，她又哭了，不是放聲大哭，我只能用"像鬼哭般"來形容！聽到我媽的喊聲，我忍不住起床，牙也未刷，面也未洗的，走到她身邊，主動的抱著她，安慰她，不時，我跟她說：想喊就大聲哭，忍著很辛苦的.....

其實，我知道無論邊個，依家都好需要有人向身邊，所以，我都主動問媽，用不用請假，她說不用，而且，我知道今日會有好多人同媽一齊，所以，我也照地意思辦，但個心總是放不下，所以，返到公司後，便把手提電話轉駁返公司。

我好耐都未試過咁今返到公司，突然間覺得間公司好靜。啟動了部電腦，見時間尚早，就上網 check 下 d 留言。當登入了寺言流露時，真係好感動！有個......在網路上結識了大概.........一年多的時間吧！我也不記得太清楚 的網友，留了一個很簡單，很簡單的留言，就在那一刻，我流下眼淚......我與她素未謀面，大家都在寫作上互相切磋，竟然那麼關心我！雖然只得數個字，但已足夠觸動我的心！惜，多謝您~~

今日lunch 我出外食，又忘了帶電話出去，返到黎見到公司部電話有 message，真係好鬼驚！好驚有 d 乜野事！！幸好是我同事的留言，真係嚇親！

我並沒有向我的同事講過，只係暗示，佢地 get 到就 get 到， get 唔到就 get 唔到，我都唔理得佢地咁多！廿三號本來有個同事結婚請飲架，點知依家發生左 d 咁既事.......所以我 send 左個 e-mail 給他，告知因我家突然發生左 d 事，所以唔方便去飲......

今晚去左大圍幫手 pack 十二月套劇 d 海報呀，單張呀咁。今次 d 海報又真係幾靚，但就令我聯想唔到同宗教有關。不過，算啦~ 天父會做野架啦~！

返到屋企，我媽就話比我知舅父廿四、廿五日就 xx，叫我向公司定請假，老實，d d 野，我一定會做的！但我阿 head 星期一又放假，最快要星期二先批到......

>>November 15, 2002 at 4:53:15 PM GMT+8

2002 年 11 月 13 日 星期三 【晴】

今日一早就起左身，真係連自己都估唔到！所以，今日可以好休閒咁去食早餐。

今日照例坐巴士返工，"三號煙館" 都睇晒！個結局......一般啦！我想知男女主角緊住係點發展多 d！

唏~~ 開始要發問卷比學生了，又要忙了！

放工返到屋企，見到桌面有張紙條，上面寫著:

三舅父自殺，我和爸到他家。
媽咪字

到了大概八時，我爸致電回來，叫我和我妹自己整野食，當我問及三舅父的情況，他默不作聲，我都心知不妙，故不再追問。

又過了大約半小時，我媽致電回來，同樣的叫我和我妹自己整野食，當我問及三舅父的情況時，她說：佢已經唔向度啦......唔好話比婆婆知......我地去到佢唔向度啦，連最後一面都見唔到呀....."之類，又問我地，舅父有無 send e-mail 給我們.......

唏~~~近排真係發生乜事呀？既有我家貓生 Cancer，跟著是我三姨的屋企發生問題，依家，就輪到我三舅父佢.......

唏~~ 真係發生乜事呀？ 我真係好驚我媽佢地頂唔住。

剛收到我身在台灣的表姐 的 icq message，原來佢地都知道了！！聽表姐講，大舅父應該過幾日就黎香港，為乜？大家心照啦！唏~~~

依家都已經零晨了，我媽佢地仲未返，唔知佢地點呢？返啦返啦！！唏~~~ 真係唔係講乜好......

..........

剛媽跟我說，原來舅父有 send e-mail 比舅母，叫佢好好保重之類，我媽的情緒真係好唔穩定......我爸依舊默默無聲......聽完我媽講之後，我開始有想喊的衝動！

唏~~~~

>>November 14, 2002 at 4:21:50 PM GMT+8

2002 年 11 月 12 日 星期二 【晴】

日記......曾幾何時，我日日都寫。現在看看舊日的日記，真慶幸自己曾記下一點點，免得現在的我把以前前發生過的忘記得一乾二淨。

前排大眾書局大減價，我把 "三號煙館" 買下，但一直放在一旁，就連自己都忘記了它的存在。前陣子行過書局，又想買它回家......
有日上班前找些讀物，好讓我可以在上班或下班的途中可以解解悶。找著找著，給我發現了 "三"，立時慶幸自己沒有買多本！

我己看到第 14 了，尚餘很少的部份，相信，明天一定能完成！為什麼會買這書？可能是 "yoshow 出品，必屬佳品" 掛！是否同個 "煙" 字有關呢？哈！

今日，睇到其中一 part 提到 "職業無分貴賤？"，提到 "同性戀" ......... 唏~~~
我不是不同意作者的睇法，老實，我絕對贊同！我只是無奈，世人的眼光而且！
"你支持同性戀嗎?" "都支持既" "若你家中其中一個成員係同性戀......." "咁又唔得喎！"
唏~~ 點解 d 人會咁架？發生在別人身上就得，發生在自己身上就唔得~~

仲有一個月的時間，套劇就做了，知道佢地依家排得如火如荼，排舞啦~ 練歌啦~ 排劇啦~ 而我......乜都未做過(除了打劇本)，真係擔心到時唔係好得！

前幾日有個演員 send icq message 給我，他說他排劇排得好開心，仲學到好多野添...... 老實，若話劇不能帶給我喜樂，我都唔會將佢傳開啦！他是第一次演劇的，最初佢勁緊張，見到佢依家排得開心，我都好開心，因為，又多一個人愛上話劇了！！因為佢同我都係基督徒，所以，我第一時間多謝天父，比 d 個機會佢去參與話劇，透過話劇傳音福！

近排睇到某個網友的日記，發覺，原來佢都好感性架！而且，知道佢有好多朋友默默地支持佢，真係好替佢開心！

>>November 13, 2002 at 3:12:54 PM GMT+8