2003 年 7 月 5 日 星期六 【晴】

今日，好早起了床，等埋爸起床，就出發

佢上到我新屋，無乜出聲，問了我幾條問題，就走。
之後，我同佢一齊食早餐，除了叫早餐時出過聲，就無講過野.......

食過早餐，我就返教會。之後，就同阿樂 & beedo 到明皇食日本野，之後，我地經過嘉頓，一人買了一支冰棒食，之後，就各散。

>>July 13, 2003 at 2:24:38 AM GMT+8

2003 年 7 月 4 日 星期五 【晴】

今日，返到公司，又無乜手機做野！唏~~ 逢星期六都係咁~~

放工後，就坐 182 去灣仔排戲。臨落車時，遇到劇中其中一位演員。

我地一齊落車，跟住去麥記買野食，跟住就去 May 教會了。

祈過禱就開始排劇了！隻舞又改了舞步了！不過，易得多，可能是因為無那麼多重復，不會混淆吧！

排完劇，我就跟他們一齊去食東西，過程中，Apple 同成益勁攪笑，你"嫉"我，我"嫉"你......我好耐都無咁同人玩過了！記得讀書時，我通常都咁樣同 d 熟的朋友 "嫉"來也 "嫉" 去......自出來社會做野後，少了~~就算有，都唔會去到咁盡......

成完野，嘩！成十一點多十二點！！好彩仲有巴士，否則真係唔知點算！

番到屋企，都作十二點多一點了！

>>July 13, 2003 at 2:23:17 AM GMT+8

2003 年 7 月 3 日 星期四 【晴】

哈！近排成日在街上遇到明星！

今日，又比我遇到鍾景輝--King Sir！我同佢打對面咁行，佢望我，我望佢....
哈！佢高我小小，都幾大隻架！

hehe

>>July 13, 2003 at 2:22:30 AM GMT+8

2003 年 7 月 1 日 星期二 【晴】

睡了一段長時間，起床時仍很睏~~

今晚返學，放工後都公司附近一間茶餐廳食晚飯。

我見到........音樂小豆牙的主持--哈利哥哥呀！！！！

佢同一班人一齊，又因我的位置離他不遠，所以，有時都聽到佢地講乜......
我估，佢地係講同魔術有關的事......

>>July 13, 2003 at 2:21:54 AM GMT+8

2003 年 6 月 30 日 星期一 【晴】

我地玩到兩點多，有大部份人都唔玩，去訓睡。最後，只剩番我，阿詩，七叔，同埋阿欽四人。我地玩 “鋤大 d”，仲講邊個輸左邊左出去買糖水。點知七叔勁賴皮，死都唔出，最後，大概三時多吧，我們一行四人，由營地行向匡湖居的7仔，食消夜。其實我地無乜人知道7仔的正確位置及實際離個 camp sate 有幾遠，只係阿詩記得好似好近，所以我地就膽粗粗的，行去。

我地沿著馬路邊一直行，行過左好幾個巴士站，都不見。心諗，點知好呢？進又唔係，退又唔抵。行呀行，行呀行，問過 d 未訓的村民後，我地四人終於行到 7仔了！！

入到 7 仔，都唔知買乜食好，雪榚嗎？又怕肥！零食嗎？又怕熱氣……最後，我地揀左 d 點心，各人買了些飲品，七叔買左個公仔麵，付款後，就開餐了！
我好耐都無食過 7 仔的叮叮野食，可能加上有 d 肚餓，所以食落特別好食，正！

食完，我地再買 d 零食，就坐的士返營地。真係估唔到，坐車勁快，真係話咁快就到。

返到營地無幾耐，又就開始光了~ 之後……

(唔係好記得 & 悶，所以唔寫住)

食過早餐，玩在兩鋪 uno，就執野走人。有大部份就出灣仔遊行，而我和阿樂本打算走人，最後卻在荷理活廣場睇 千機變。

唔知係咪因為我成晚無訓，再加上戲院黑漆漆，所以，覺得套戲勁悶 & 勁眼訓。幾經辛苦頂到完場，就坐巴士返屋企。上到巴士，當然唔少得我的例牌活動—訓覺啦！到站時，我都唔係好想落車，唔係因為架車太舒服，係因為我勁眼訓，想訓耐 d。

返到屋企，爸 & 媽 都已經由大陸返黎。我實在太累了，我用盡我的意志，把弄髒的衣服，放進洗衣機，洗個澡，然後，用盡我的意志力，食了一頓晚飯。餐晚飯很豐富的，有蒸扇貝，肉排，還有自到爸爸家中食飯後便愛上的肉蟹！若我不是那麼睏的話，我一定會把蟹子食清光！食過飯，就上床倒頭睡去……


>>July 5, 2003 at 7:03:08 AM GMT+8

2003 年 6 月 29 日 星期日 【晴】

不知是否因為昨晚睡得不好，所以，今早起床不久，頭就開始痛。
昨晚，閱了風信子給我的悄悄話後，我更覺無人明白我的想法，亦無人會支持我所作的決定……悲從中來，想找個人傾訴一下。時已半夜，致電給爸爸—電話未能接通；致電給哥哥 – 請留底口信。唏~~ 我還可以找誰？幸好，致電給 Suki，她還未睡。我講無兩句，便哭成淚人，在差不多一個小時的電話傾訴中，我講不夠十句說話。不過，在 Suki 的 “安慰” 下，心，舒服了，也可能是因為哭得出來，懶理它。上床後，仍不能好好睡一覺。

今天，很早便起床，因為，今天約了中電的師傅來較電。一早起床，梳洗，出門。雖然約了中電 九時半至十一時，但都知他們無咁早到，所以，在新屋附近食早餐，吃完後再到附近報紙檔買了一份報紙，大概九時四十分才到達新屋。

都知中電師傳唔會咁準時，所以，慢慢把那份報紙由頭睇到尾，睇完又睇。十一點十五分，個師傳未到，不等了！下午要返工，若再等的話，恐怕會遲到，所以，我就回家了。番到屋企之後，就 call 中電，點知原來佢地漏左我張單，所以無黎到，仲問我依家黎睇好唔好。我梗係話唔好啦~ 一來，我又唔知佢地幾時黎，二來，我又唔知佢地會攪幾耐，三來，我下午要返工。所以，我就再約過個時間啦~ 希望佢地下次唔好又漏單啦。

返到公司，混混愕愕的，都唔知自己做乜。今日放半天假，晚上入 Camp。

哈！我一向約人有早無遲，點知今次最遲果個係我！本來約六時半在彩虹地鐵站等，點知我放工上車時已六時廿分了，過到去，差不多七點！！人齊，起行。本以為個車站就在地鐵站口，點知因為修路，個站搬左好遠，我地行呀行，行呀行，終於行到去個車站。我睇小巴人龍咁長，所以，就排巴士。不過，架巴士都等好耐，按黎老師的計算，我們足足等了半個小時巴士呀！！

入到西貢，第一件事當然係醫肚啦！啟康叔叔一早羅定檯等我地。入到海霸，除了睇到啟康叔叔外，仲見到阿欽。我特登坐近啟康叔叔那邊。老實，我對阿欽都係有點介心。其實當我知道阿欽都入 Camp 時，我真係有諗過唔去架！不過，我係負責人，唔到又唔得。大概八時半左右，營地的負責人，Bill，call 我，佢地因為見我地咁夜都未羅營，以為我地會唔租。哈！我同佢講，我地其實已入到西貢，食埋晚飯先入去…… 我估，我地都係有史而來，最夜入 camp 的一次。

最初話唔入 Camp 的佩瑜，經阿詩的遊說後，都入 Camp，而且，佢仲比我地早入到 Camp 添~~

可能因為今次無 program 的關係，入到營地，各人霸番自己張床，之後，就唔知做乜好，各人都呆呆的坐在自己的床上。過了一段長時間，終於有人去洗澡……不記得過了多久，我們把三張有轆的床推到房中間，加上床墊及床單，就開始在上面玩 UNO，撲克。玩了一會，男孩們又加入，過程中有不少笑料，如……玩UNO 見到 DRAW 4 等如要羅自己四顏色的紙牌出來、又當你下家 LAST CARD 之後，你要 “有大頂大”。哈哈！真係笑死~~

......

>>July 5, 2003 at 4:42:14 AM GMT+8

2003 年 6 月 26 日 星期四 【晴】

回顧一下之前所發生的事......

十六號那星期，主要是忙於上班派發教材給 hkaat 的學生。又因為咁，我星期五改了番夜班，為的，也是派發 hkaat 教材。

十六日的早餐時間，我跟媽說，我才算搬出來......他沒反對，但，他在廚房弄菜時哭了......若真的不想的話，就說，為什麼要這樣！

十八日 (三) 本來要上堂，點知阿 sir 病了，所以停課。本打算回家食飯，點知醒起今日有得排戲，所以，就去左排戲。

十九日(四)回覆業主，決定租下那單位。放工後，到了大埔中心，食爸的牛一飯。

廿一日(六)晚，團契聚會中，黎老師勇敢地向我們分享，他在工作上遇到的不快事。之後，David 邀請我為他祈禱。無問題，其實，我都想為他的事而祈禱。

廿二日(日)，時大時無的雨，真討厭！完了崇拜，便立即趕出灣仔，給了 cd 導演，便到Art Centre 睇六月雪。六月雪比沉淪好睇好多！一個小時就可睇完審娥冤，好！睇完戲，就到 may 教會排戲。上到去，原來佢地排緊舞。哈！好釆 d 舞步唔係太復雜，我好快就跟到。排排下，阿樂就到。希望他沒有怪我為了排戲無理佢啦~
因為有個演員要早走，所以，我地排到八時多就散。我與樂一同乘船再轉車番家。

廿三及廿四日，爭取坐車番工的時間，努力地背歌詞。

不記得是廿五還是廿六日，ac 跟我說，他打算走，大概是八月尾九月吧！唏~~ 點算！！若 pk 過黎的話，我就真係 pk 啦！

廿六日(四)晚，跟爸說我打算搬，他問了很多，口中並無反對，但，表情怪怪的......

廿七日(五)，上午跟 sm 去開了一個 pps 會議。pps 對我組來說，真係弊多於利，不用也罷！
不知是否生理影響，今日成日都想哭......
晚上約了哥哥取新居鑰匙。

>>June 28, 2003 at 4:57:02 AM GMT+8

2003 年 6 月 26 日 星期四 【雨】

唏~~~ 決定了獨個兒搬出來，嘗試過一個自力更身的生活，但......

父母並沒反對，但他們的表情，給我感到他們萬個不願......我真的寧願他們極力反對，好讓我可以打消這念頭！現在塵埃落定，回頭也難......唏~~~

為何不讓我試試看？有時我唔想睇死自己，我想試試自己的實力，但......一點支持都找不著！別說在朋友中，甚至連在家中，也找不著！哈！究竟想我點？二十有多，除了煮方便麵外，什麼都不會。老實，我真的想學學燒飯，煮菜，但一日在家，一日都學不會。

今晚，接過鑰匙，明天起，便到那邊打掃掃一番。

這個決定，是對，還是錯？

不搬，又會比搬出之後的生活好嗎？

留著，又有用嗎？

>>June 28, 2003 at 4:31:46 AM GMT+8

2003 年 6 月 14 日 星期六 【陰】

今日訓到十點幾，本打算返教會，點知，途中接到 suki 的電話，話想搵我陪佢到 mk 報名。我見橫豎返到教會都遲，不如出旺角好過，所以就出左旺角。

出到去，真係比 mk counter 同事激死！suki 想報一個 cef 普通話課程，章程都無寫明要 in 左先報得！橫豎我地都出左黎，不如收左份 form 先囉，但 counter 同事死都唔肯！唔肯都算，我都費事同佢嘈。之後，suki 都覺得佢好似唔係好願做咁！哈！連 suki 都覺得佢咁，更何況其實街客呢？哈！ d 個同事真係........pro！哈！

之後，因為我要趕入大埔睇屋，所以，同 suki 匆匆食過野，就返入大埔了。

間屋，正正在教會對面，長方形的屋，都ok，不過，因為業主 cut 左電，所以，若我想租的話，要自己去攪番。其實我都無所謂。個業主好好人，五百多呎，收我千六一個月(不連差向等雜費)，有好多傢俬電器都比我用，如床啦~ 洗衣機，雪櫃，微波爐等。我覺得都 ok 架！不過，我都未同屋企人講，不過，我估我都會租......因為個業主廿四號走，所以，我要在廿四號前覆佢......

>>June 20, 2003 at 2:12:51 AM GMT+8

2003 年 6 月 13 日 星期五 【晴】

今日下午，去麥高利睇7a班話劇--沉淪。套劇......我只可以話，我閤左兩次，佢地用的手法，我唔係好接受到，有裝置，有抽象......不過三個演員做得好好！全套劇最晶彩的部份，可算是演後座談會了！有一間中學的 miss，帶左班學生黎睇 (其實，我覺得套劇都幾二級半架)，之後，佢就捉 d 學生講野，又攪錯其他劇社的劇作當係 7a 班的，勁攪笑！

之後，就到尖咀睇第二場。免費的！！！仲要係尖沙咀文化中心劇場！！！！點解會有免費飛？哈！因為其中一個教導遊的導師有玩話劇，所以，佢特別送飛比我地 team 人，所以，我就有免費飛啦~~~ 套劇主題係：師奶，演員都唔野少！除了那導師--Brenda 外，仲有苗金鳳等藝人。佢地真係做得好好呀！上半場 85分鐘，我覺得好似過左半個鐘咁，下半場，差不多一個鐘，所以，睇完之後，都差唔多十一點！講番套劇，最後一幕，係講個師奶比 d 好姐妹搶晒 d 印花，勁傷心......唔知點解，我突然諗起我阿媽......諗起去年十一月的事......

>>June 20, 2003 at 1:56:05 AM GMT+8