2003 年 3 月 21 日 星期五 【晴】

今日，雖然唔洗返工，不過，我都返左學校一陣.........

今日，同爸媽飲完茶，就出發到 BU 報名，途中，不停的 "刨書"，因為，星期四就要交功課了！
我本來打算 EMP 四科，點知，佢地話唔接受 Attn Cert，所以，我唯有申請三科豁免。交完 form，就坐車返學校，還咁其中一本書。

唔知做乜，一入圖書館就響 "警佈"！還完書，走是都係咁！奇怪，我身上應該無 bar code d 野架？攪乜呢？

本打算直接返教會，但時間尚早，所以，到公司附近的 "歡迎"，買了幾件 sushi，就坐車返屋企。

返到屋企，邊食 sushi，邊諗下下期先 take 邊科........

大概六時多，又起程返教會..........

今日，好少人返，計埋我都係得三個團友加一個導師。本來以為可以早 d 完，點知，都攪到成九時半！執埋野，都接近十點。

我，黎老師 & DaVi 就出左食八蚊大雞粥。
d 雞粥真係好抵食，八蚊大大碗！
因為佢地未食飯，所以，除了一人一碗雞粥外，仲叫左兩個小菜
埋單每人都係廿零蚊，好抵

>>March 24, 2003 at 4:30:55 PM GMT+8

2003 年 3 月 20 日 星期四 【晴】

今日，勁早起身，無他的，因為要八時零五分前返到學校。
下車時，都就快夠鐘，所以，箭步的行返公司。
返到去，第一時間去日校小食部買早餐食。

今次個 camp，一 d 劇烈運動都無，全程呆坐，
不過，我反而幾 enjoy。
我 enjoy，唔係因為今次無劇烈運動
我 enjoy，係因為知道好多關於學校的事
不論是過去的
或是未來的

由其是知道新校舍會有 Studio Theaer，勁開心！！

>>March 24, 2003 at 4:03:46 PM GMT+8

2003 年 3 月 19 日 星期三 【晴】

好凍呀~~~ 都三月天啦~ 都唔知點解仲咁凍！

今日放左工，就去培正返學。
今日係第三堂，意即下堂要交功課，死啦~ 我一 d 都未寫，點算？

今堂幾好，因為有 game 玩。
阿 sir 打左一份 reference book list，因為培正無得影印，所以，唯有抄。一睇個 book list，第一本書就係我睇緊那本！勁興奮！因為，我無借錯書！！

落堂之後，我第一時間走，因為，明天學校退修營，要八時零五分返到學校，意即我要七時多出門口......好早呀~~ 平時，我訓到八時多才起床，明天，要早一小時呀！！

>>March 23, 2003 at 4:36:02 AM GMT+8

2003 年 3 月 18 日 星期二 【晴】

今晚，約了妹妹到大埔睇床。
入到去，第一時間梗係醫肚先啦~ 我勁肚餓！
好耐無食過車麵，好味，又抵，hk$18.00，大大碗，而且仲食到好飽！

之後，我地就行去睇床....
若果唔係那公司無訂造及唔可以改款，我估我地都訂左了！
又因為咁，我地又行去第二間睇。
入到去，都唔係咁 o岩 心水，問過價，就走


>>March 23, 2003 at 4:29:09 AM GMT+8

2003 年 3 月 17 日 星期一 【晴】

今日返夜，本來諗住今晚可以做 d 24-25/3 開課的東西，點知，Anthony 突然同我講，話我今晚要監補考！老實，我真係唔係咁願，不過，佢叫到，算啦~

原定開考時間七時開始，考三個鐘。我差唔多七點去到課室，set 好晒 d 野，之後就坐在老師桌的位置，等學生來。等呀等，等呀等，過了十五分鐘，都未見學生黎，心諗，會唔會係自己攪錯課室呢？於時，我打電話去 counter，叫佢幫我 check check。無攪錯，但仍未有學生，所以，我打算等多十五分鐘，再唔見人就走，點知，等到大概七時廿五分，就有一個學生入黎補考....唏~~ 咁即係要監到十時啦~ 因為係佢自己遲到，所以，我同佢講，補考由七時開始，考到十點。同佢講完，比左問題及答題簿之後，佢就自己搵個位坐，開始補考。

監考，係一樣幾悶的事情，因為，在考試時間裡，乜都唔做得，除了發 "外"。不過，我通常都會帶定 d 廢紙去，寫下野，由其是寫 hv 的稿。今次，都唔例外，而且，hv就快截稿，再唔寫，有可能斷稿！邊寫稿，邊監考，一心二用。寫到悶，就起來，行下。

有另外兩個學生，差不多八時才到，當然，我都唔會理佢地咁多，全部十時收卷，無人情講。

多了兩個學生，就要更加小心，因為，有可能會出貓，巡課室的次數都多了，留意下佢地有無放書在抽屜，有無傾計之類。巡完，寫下稿。今期，無乜靈感，所以，好快就寫完，由頭到尾睇過好幾次，睇下有無要修改......

遲到的那兩位學生，其中一個睇佢光是望著份題目，就知佢唔係好識，所以，佢好快就交卷。而另外一個，我估佢都識識地，因為，佢都有答下問題，不過，佢隔左一陣，都交卷走人。課室內，又剩下我和一個學生。

差不多十時，個學生才交卷。

番到 office，都收得工了！執好 d 野，拉咭走人！

返到屋企，第一時間打好那 hv稿，post 埋上工作坊。

>>March 23, 2003 at 4:23:28 AM GMT+8

2003 年 3 月 16 日 星期日 【晴】

今晚，要幫毅進的老師手監考，因為，那班有成四十六人，一個老師，又點可以睇晒呢？而且，之前試過其中一班毅進的同學，帶左本考試答題簿返屋企，之後就打番電話比我地學校，話當時無交到，想交番。你話，佢地係咪好離譜！考完試唔交卷，仲要帶返屋企，可能抄完，先交番比學校！

我七時四十五分上到班房，佢地已經開始考緊。入到去，無乜野做，行行企企。好彩佢地 d 桌無抽屜，否則，又要傷神去睇下佢地抽屜有無 "貓紙"。曾經試過一次監補考，有個學生好離譜，把本書打開放在抽屜裡，明目張膽把書放在大腿及抽屜中，出貓！

不停的行行企企，九時四十五分，終於收卷了！老師收答題簿，我收問題紙。d 學生都幾過份，叫左停筆都繼續寫，我叫都唔好寫，佢都唔理！收好晒，點齊數，就返去 office。返到 office 都差唔多收工，執好野之後，放工！

>>March 23, 2003 at 3:45:57 AM GMT+8

2003 年 3 月 15 日 星期六 【晴】

<<下集>>

今日，訓到好晏先起身，無返教會，起身無耐，就開始出發去東涌，因為，今日會去我同事--William，又名博士的新居。

好耐無去過東涌，唔知點解，在途中，想起爸爸！可能是因為之前出入屯門，都經過附近吧！
見到青馬大橋，想起他
見到飛機，想起他
見到機場，想起他......
哈！真係問你死未！

入到東涌，嘩！同以前真係好唔同！見到東薈城，真係好想去行下，真係要搵人坐十三蚊車入去先得！！

博師屋企唔得好大，ok 啦~ 不過，我無諗過佢屋企會用紅木傢俬，佢張電腦桌，好正，紅木，好中國 feel~~

佢預備左都幾多食物，又煮蟹粥，又有草莓布丁，又有糯米"池"，再加埋 Vivien 整左 咖哩牛腩，咖哩魚旦，雞翼.........真係好多，好正，好好食~~~ ^_^

食下，坐下，傾下，就四點多五點！之後，William 成家送我地坐車...................

佢老婆好好人架~~~~

>>March 19, 2003 at 3:38:09 PM GMT+8

2003 年 3 月 15 日 星期六 【晴】

<<上集>>

昨晚，本來團契分組，是去參加某個教會的褔音活動，點知，一個搵唔到，一個話一段時間都唔會出現，一個話太累所以唔會出現，就係咁，就會得番我和導師兩個，所以，我打個電話比佢，問佢點。點知，佢都話因為教會有 d 野攪緊，所以未必可以出到黎~~ 唏~~就係咁，就唯有 cancel...........返屋企做功課。

因為 bu 那課程，用功課來代替考試，而且仲要佔七十個巴仙！唔做，又點得呢？但，我毫無頭緒，點算！！在學校借左 d 書，但，又無乜心機睇，唏~~ 不過，我都會交功課的！

今朝起床，一照鏡.......嘩！隻眼好腫呀！無他的，媽爸昨夜又........唏~~ 點解我會先寫媽，後寫爸？因為，又是媽先發動的！更正確的，她又在半夜發動戰事！有時，我都覺得佢幾自私，半夜三更攪成晒全家，最慘的都是爸，半夜三更比媽攪醒，之後又比媽迫埋牆，第二日又要一早起身返工........................媽開完戰，可以在第二日來一個午睡，叉電，但，佢有無諗過我地，第二日要返工，半夜開戰，會令到各人的身心都受到傷？

就昨晚，我在他倆開戰時，起來，坐在床上，一路留心聽著他們的說話，有多次我都想，走過去，叫他們別再嘈，出廳，一齊傾掂佢。但，我無，因為，我唔知咁做會唔會有反效果，所以，我只是坐在床上，飲泣......

以前，媽怪爸無反應，現在，爸作回應時，媽又怪他聲量太大...............爸的上海之旅，見佢無乜點提，都知道唔係咁好，但媽卻窮追猛打的問，語中帶 "你有去不三不四"，試問，你叫爸點答，爸答無，佢又唔信，我真係唔係好知佢想點！

講下講下，媽竟出手打爸！！！
哈！不知誰人曾向爸講過，叫佢唔好 "旭" 佢............
爸，終於忍唔住，哭了！我咁大個女，從來未見/聽過阿爸喊得咁厲害！佢喊住咁問：我究竟做錯左 d 乜野？我唔知我做錯左 d 乜野？..........我好鍾意 d 個屋企！我好愛 d 個屋企！我好愛 d 間屋每一個人！.................. 爸喊得好"西"利，停唔到，唔知係咪因為佢 d 鼻水倒流入喉嚨，所以，間中聽到佢咳..............之後，佢喊住咁走出房，行左出廁所喊...媽又跟埋出去.........................老實，我真係好驚媽又對爸講乜！佢地倆個在廳/露台，我都好驚，唔知佢地會做 d 乜。突然，我想起了風信子提過，怕爸會跟舅父一樣......老實，我依家真係擔心，我真係好唔想屋企任何一個人有事！！！

幸好，我睡在上格床，可以在高空 "監視" 住佢地的情況..............
他倆一直無言..............爸媽 calm down 期間，爸飲了很多水，但，他的咳不停，相信，氣管又有事.....媽，一直站在露台，曾 "wu" 低身，相信是喊........
之後，過了一段很長的時間，爸洗了個臉，行入廳，喝完了一杯水，再走出露台，拿了一條毛巾，幫媽抹臉....媽 "服" 在爸的懷中...他倆相擁....再走入睡房.............
當爸幫媽抹臉的時候，甚至他倆相擁，我好都感動，我估唔到爸會幫媽抹臉，我估唔到佢地會攬得咁實！

之後，我都無咁快訓得著，因為，我唔知佢地會點.......

>>March 16, 2003 at 4:14:57 PM GMT+8

2003 年 3 月 13 日 星期四 【晴】

好睏~~~~

昨天(13/3,四) 上完課後，到附近的茶餐廳食了點東西，就坐巴士回家。返到家的時間，跟平常當夜班的時間一樣，梳洗後，看了一陣電視，都已零晨了。

今天 (14/3, 五)，其實，我真的有點累，但因為已約好妹去看傢俬，所以，唯有定硬上。因為我有一張 "下一站天后" 的買一送一電影優惠券，所以，我提議看完傢俬之後去看。到過實惠睇床，之後就去左附近食日本野，跟住，再行多一陣，見時間都差唔多九點多，返屋企，又好似早左 d，行埋宜家，就睇唔到戲，去睇戲，就行唔到宜家。最終，我地決定去戲院睇 "下一站天后"。

我地去左金聲睇。好耐都無去過 d 舊式大戲院了，今次入到去，真係有 d 興奮。其實可以一大班人，坐向戲院裡睇一套電影，真係唔錯！
套戲，幾好睇，而且都有 d 地方好感人，真係唔錯！
睇完戲，嘩！成十一點多！！
之後，就坐火車返屋企。

>>March 15, 2003 at 3:06:15 AM GMT+8

2003 年 3 月 11 日 星期二 【晴】

星期一，躲了一天懶，因為，病倒了，去看了醫生，向公司請了一天假。食了藥，食過午餐，倒頭大睡。一睡就睡到六時多，起床，梳洗，洗澡，食晚餐，睡覺。十時起床，食藥，再睡，這就是我星期一的活動時間表。哈！

星期二，要返工了！返到公司，pick 了部份廿四至廿五號開課的物資，預備定需用的簽收紙及有關人名.....................

今日，返到公司，上上網，預備定愚人節派的證書 & 聽講證，製作定部份分班名單.................

就係咁，就過左三日。

>>March 12, 2003 at 1:52:32 PM GMT+8