2003 年 10 月 18 日 星期六 【晴】

哈~ 今日老公佢黎左屋企食飯，真開心~

今日真係大出血呀！本來都冇諗住會買數碼相機既，點知後來都因為覺得都幾抵同埋幾有用，所以都決定買左一部．．．好肉痛呀！加上琴日又去左瘋狂購物黎，所以真係好慘，好傷！嗚~

不過部相機確實幾抵既，二千零蚊，仲有十八個月免息分期，每個月都係供百零蚊，都ok丫．．．係咪？仲加$買埋張128mb既memory card，都係加一百蚊，都幾抵！所以都係諗黎諗去都覺係正！

唔，琴日好攪笑，突然冇野好做，所以好無聊咁睇番以前細個時既相，仲睇番以前寫既日記！我比左老公佢睇呀，佢好衰呀，笑我以前寫既野攪笑！咁講真，以前得果六年班，係咁上下架啦！係呀，我六年班開始有寫日記既習慣，雖然直至而家中途都有停過幾次冇寫，因為真係好忙，而且太懶喇，不過而家又有機會寫番，其實係好開心既事黎既．．．我都係第一次將我以前既日記比人地睇咋．．．講真，比老公睇我係一早預左會比佢，因為我都想佢會了解我多d，知道我以前多d既事，我好想同佢分享我既一切！



>>October 20, 2003 at 2:01:43 AM GMT+8

2003 年 10 月 17 日 星期五 【晴】

hehe~ 本來今日要入camp既，不過因為出左少少既錯誤，所以唔洗去囉．．．唔，今日返工好似唔多想做野咁，可能本來去camp架嘛，而家唔洗去，總係有少少唔集中咁囉．．．不過今日反而同左幾個client傾計黎，都幾好丫，難得有時間可以同佢地傾下計丫嘛．．．

唔，今日同個同事傾開計，講開做人真係麻煩！我地而家日日咁博命咁做野為乜呢？都係為兩餐o者．．．但係世事就係咁矛盾，偏偏我地往往係冇時間去食飯，食飯時間顛倒晒，唉！我地為求食飯醫飽自己個肚o者，點解都好似咁難咁既？真係到頭來，咁博做野又係為乜呢？真係好諷刺！唔，我對我個同事講既好有同感！人生在世，為左乜野呢？都係為左生存，生活．．．點解唔可以讓我地好充實，好精彩，好滿足咁過我地既生活呢？

另外，今日我有個好好既朋友仔，佢為左一件事而好唔開心呀！希望神會比多少少啟示佢，等佢知道自己應該點做丫，並且可以安慰佢，讓佢知道佢身邊仲有好多人支持佢架！

>>October 18, 2003 at 4:59:12 PM GMT+8

2003 年 10 月 16 日 星期四 【晴】

唉~ 今日比老細罵黎呀！好慘！不過其實又係自己做錯事既，都唔可以怪老細話我，因為都係我自己唔o岩先既．．．不過連累埋同事，我就真係唔係咁好意思喇．．．要佢同樣被罵，好過意唔去呀！

講真丫，我真係幾驚老細架，佢一發起火上黎，真係．．．好恐怖，而且佢咁位高權重，要點都得啦，隨時要你死呀，話咁易丫，係咪？不過，我估老細又未去到想我死既地步既．．．不過自從老細去完旅行放完大假返黎之後，都冇點同我講過野，咪就係今日罵左我一餐囉．．．唔，個感覺好怪．．．哈，我只係知佢一返到黎，第一眼望我就係望我個頭喇！佢睇下我個頭染番好未呀！嘩，如果仲未呀，我估死得人喇．．．不過好在，我係佢放假既時間，我都好努力做野呀，做好自己本份，交左多野document比佢呀，佢有部分仲讚我good done添！咁我都安心d，起碼知道佢仲未想我死住丫．．．

而家老細返左黎，又開始多番唔少既壓力喇．．．真係好怕，老細一係度，佢就會成日叫果個叫呢個入去見佢，又問呢又問路，都幾煩架，有時真係想做下野啦，但係都要成日被佢叫左入房，係咁傾好多野，真係幾煩架！唉！我真係由始至終，都仲未好習慣對住老細工作，真係好辛苦，好唔舒服既感覺，因為有時候，知道老細想叫人入房時，心諗真係唔好叫我個名呀！佢一叫：”呀．．．邊個，呀ｘｘｘ”時，嘩，如果唔係自己時，真係鬆左一口氣架，但係如果叫自己時，真係好驚又發生咩事比佢話喇．．．真係好驚架，我唔知點解自己會咁驚架！

唔，希望自己可以有多d信心工作啦，咁我相信比老細叫入房時就唔會驚啦！



>>October 17, 2003 at 3:35:57 PM GMT+8

2003 年 10 月 15 日 星期三 【晴】

o...放左兩日無情假之後，今日終於返番去工作之中！嘩！一返到去，真係多野跟，冇返兩日工o者，就忙到要死喇！

傳說中放左大假既老細，本來聽日先至返黎既，點知今日佢突然出現，真係神出鬼末，神憎鬼艷．．．不過老細今日一句話都冇同我講過呀，我都冇時間同佢爹呀，因為好忙，又病到wing wing下(食左藥好辛苦呀，個人係咁仿仿下咁），又趕住今日入學校開組既野喎，鬼得閒理佢肥左定靚左咩！

不過我都好擔心呀！唔知之前單野點呢？我已經好乖咁染番好個頭，呢段佢唔係度既日子都做足功課架，佢都有睇到我既野，希望佢滿意我啦，唉！不過最死就係，本來今個星期尾有個camp要去，但係唔夠參加者呀，又要比佢丙喇今次．．．呀~~~

唉！我而家成日覺得自己越來越冇記性，成日都唔記得好多野．．．唔知係老左丫，定係自己心不在焉丫，定係對一d野冇心裝在，所以就唔記得丫，定係我已經有太多野煩，所以根本冇時間去記其他野呢？唉！呢個弱點近日成日令我好麻煩呀，成日失信於人，我都好唔好意思呀！點好呀！近日d記憶力真係好差呀，有咩方法可以改善一下架？唔通真係要阿媽煲豬腦補補呀？

>>October 16, 2003 at 4:22:49 PM GMT+8

2003 年 10 月 14 日 星期二 【晴】

唔．．．今日我冇返工呀！因為我病左！唉！一轉天氣我地d有鼻敏感既人就會好慘架喇．．．日日係咁流鼻水，打噴嚏，而我本身近呢兩年，個氣管都差左好多，成日因為少少事而敏感，仲會係咁氣喘，我琴晚咪就係因為咳到氣喘，所以成晚訓唔到覺囉，簡直係個人坐左係度係咁喘，係咁咳，都冇訓過！今朝零晨時已經好唔掂喇，所以今朝早都返唔到工，即刻都去睇醫生喇，一去到睇醫生，佢都已經知道我咩事，因為近日都好多有鼻敏感既人去睇醫生，而我個醫生就好清楚我，所以佢都估到我又氣喘！哈~ 真係逃唔過佢既法眼喇．．．

今日成日都係屋企休息呀~ 不過好難得既，雖然病左，但係好耐冇咁既機會可以係屋企抖下喇，我估今日係咁耐以來訓得最多既一日喇．．．哈~

>>October 15, 2003 at 2:55:10 PM GMT+8

2003 年 10 月 13 日 星期一 【晴】

天氣開始轉涼喇，各位要小心身體喇，保重～

唉！今日雖則係放假日，但係確實唔係一日好值得開心既日子．．．我老公個麻麻，琴晚半夜因為病而去逝．．．真係好突然，我都感到個心好唔舒服，因為我都曾經去探過麻麻佢，我今年新年同七月都分別去過探佢，但係真係估唔到咁突然！唉！有時候，見到自己身邊既人離開自己，心情同感受真係唔好受，好難形容！但係諗深一層，如果好傷心咁渡過，去逝既人都唔想成日見到我地咁傷心，真係好矛盾！雖然，麻麻並唔係我自己既麻麻，但係我知每次麻麻見到我，佢都會好開心咁笑架，真係好記得佢既笑容，雖然我見到佢時佢已經係因為中風而唔能夠動同表達，但係我見到佢笑，我都好開心．．．唉！不過人總有一日會離開人世既，我日後都會有呢一日，不過最緊要就係，要不枉此生，係自己人生既一日，都要做自己喜歡做既事，愛自己所愛既人，食自己最愛吃既野，同埋嘗試自己好希望嘗試而自己又有能力嘗試既事．．．咁就真係不枉此生喇！

最後，希望神可以繼續眷顧老公同佢既家人，希望神會安慰佢地既心靈，令佢地可以快d回復心情，從投新生活！

>>October 14, 2003 at 3:21:16 PM GMT+8

2003 年 10 月 12 日 星期日 【晴】

唉！辛苦左個幾星期，終於有返日假放下，聽日終於有假放喇，yeah~

今日返工真係好忙，成日出左去做野，唉！不過冇計啦，本來今日唔洗返添，但係又有野要做，都冇法喇．．．

今晚聽到一個壞消息，老公仔個麻麻可能唔得喇，我都好擔心，因為我前幾個月都仲見過佢，唉！而家真係唔知點好！好擔心，好唔開心呀！我估老公佢都可能要聽朝早一早上去架喇．．．唉～希望佢既家人平安啦

>>October 13, 2003 at 12:43:08 PM GMT+8

2003 年 10 月 11 日 星期六 【晴】

嘩哈哈~ 今日好開心見到一個好要好既朋友仔係呢度留言比我，真係好開心呀！我都想講佢知，　我都好miss佢架，好想搵日約佢出去唱k呀．．．不過大家咁忙，都唔知幾時先至約到囉！

唔，今日同樣係一個工作天，唉！星期日工作確實好冇癮架，不過無計啦，鬼叫你間中心係一間青少年既IT咩，星期日點都要死到開門架啦．．．本來今日星期日返左工，聽日可以放番日假既，不過聽日有野要做，所以冇假放．．．真係好慘！好彩星期二有得放番！不過跟住落黎都成三個星期冇假放呀！呢D咁痛苦既日子又來臨喇！

不經不覺老細放假已經就黎放完，佢17號就返黎喇，真係過得快，冇老細既日刺確實好正，話咁快又打回原型囉，HAHA~

哈~ 有樣野好好笑架，我隻貓呀，琴晚幾洩呀，好做唔做做賊仔喎！我係日本買左包魚乾比佢，佢不知幾咁喜愛，成日叫住要食，點知咁就出事．．．琴晚呀，佢呀自己靜靜雞親我地訓晒，自己走入廚房打開個櫃，自己拎左包野出黎打開佢，係咁食呀，幾洩呀，做左賊仔波喇．．．佢唔只第一次係咁．．．佢近排又對肉鬆旦卷情有獨鍾架喎，前排我媽咪買左一盒番黎，個衰波就將盒野由台度推左落地，跟住打開左個蓋，係地下度係咁食，整到周圍都係．．．我媽咪第二朝執到死呀！不過你估都估唔到，一隻貓都可以咁得意，真係好好笑架，雖然個口係咁罵佢，不過覺得好歡喜！所以有時話，屋企有寵物，真係會更開心，更歡樂架！

>>October 12, 2003 at 3:38:50 PM GMT+8

2003 年 10 月 10 日 星期五 【乍寒還暖】

哈~ 今日完全冇工作mood，因為只係看counter，跟住下午就趕住去參加老公仔個家姐既婚禮度喇．．．今日見到人地結婚，好多新娘子都好靚，我就係咁睇人地既婚紗，哈~ 發下夢睇下自己o岩著咩類至丫嘛！唔，唔知幾時先到自己有咁既一日呢？不過我都係覺得係教堂結婚個感覺同氣氛都會正d，尤其係自己教會行婚禮就最好，因為好有歸屬感！

其實，有時都好羨慕人地，可以一雙一對咁，有另一伴陪住自己，照顧住你，好關心你咁．．．唉！真係恨唔到喇！如果有人可以成日好關心我，理我多d就好喇！

>>October 11, 2003 at 3:59:42 PM GMT+8

2003 年 10 月 9 日 星期四 【晴】

今日可謂幾麻煩既一日喇！第一，今日天氣好差呀，又涼又落雨，希望聽日天氣好d啦，因為聽日我有同事要帶班細路去行山呀，如果落雨就麻煩喇！二來，聽日老公仔個家姐結婚呀，會係香港大會堂度行禮，希望天公造美啦，如果唔係都一樣麻煩喇！哈~我仲未諗聽日著咩靚衫好呀！因為聽朝仲要返工，又唔可以太過靚呢！哈哈．．．

唉！今日我真係好險呀，差d出唔到中心門口呀！今日我又有伴你高飛上堂，咁小息果時，我班仔出左中心門口飛煙，咁同時間有幾個係朗屏”行”開既社團背景人士係度，咁點知佢地之間有眼神既來往，咁就開始左爭執喇，我好經辛苦先制止左佢地，仲比班人兇我添，我當時都好驚架，講真，我好少見呢d場面架，多數我ｄ同事都處理既，不過今次佢兇我班仔喎，我點都要幫下手，咁後來，我個仔驚比人打，所以我都要護架佢出到去廣場先至放心佢走．．．到左夜晚仲成班人落左黎中心添，由低地位到高階層既社團人員都有黎中心，我初時都好驚佢地玩寸架，因為我下午時同佢地有少少過節黎，不過好彩，後來都冇事，不過我估佢地可能社團有工作做，所以搵我地中心做集何地點．．．講真，我都好驚比人打架，又驚放工時比人boo架，因為班人真係唔係人咁品！不過好彩都未有事住，真係感恩架！

唉！有時候，我真係諗，人做社工我做社工，點解係要對住d咁煩既人？做社工就好似做大佬咁，都要兇得下先得，仲要見慣大場面，而且仲要識得同呢班人溝通，如果唔係都死得！不過諗深一層，就係呢d咁既人先至要我地去幫佢回頭是岸呀，係咪？

另外，我知道老公佢近日為家庭既事都好煩惱，希望神可以繼續眷顧佢啦，祝福佢同佢既家人啦！我都希望神都繼續眷顧我啦，令我唔會係工作中途放棄，亦都保守我既安全，好讓我繼續堅持落去，帶領我同我既client走正確既路．．．

>>October 16, 2003 at 4:23:08 PM GMT+8