2003 年 12 月 17 日 星期三 【晴】

唔，琴晚晨早走左上床訓，不過後來半夜都係咳醒左，最後成晚都係冇訓．．．所以今朝一早都要去睇番個醫生．．．冇計！唉，而家好慘，食藥食得太多喇，而家個人食到口都寡埋，仲躁到嘴角起水泡，即係什麼過濾性細菌感染喎．．．醫生只係比左少少藥膏我揸咋，希望快d冇事啦，因為超級樣衰呀！

嘩，今晚帶左班伴你出去學髮型，佢地今日學做colour，有個女幫手做左model，勁正，染左個紫色頭．．．我極鍾意，如果中心唔係唔比人染髮，我晨早整左喇．．．哈，真係好想整呀，不過冇計啦．．．

>>December 18, 2003 at 3:21:00 PM GMT+8

2003 年 12 月 15 日 星期一 【微冷】

唔，呢排既天氣真係好難頂，遲d星期六又好似話得果10度喎，嘩，死人咩！唉！

今日好開心呀，約左個好姊妹出黎食飯．．．我地食飯時傾計傾左好多野，傾得好開心添．．．我地仲相約聖誕後再出黎食飯或者去玩，因為．．．哈，我要介紹一個正仔比我個好姊妹囉．．．我知，什麼唔做媒人三代好丫嘛．．．不過，我真係覺得佢地有機會架喎，大家都有相當既條件既，而且大家都有興趣見下對方既，咁咪當識個朋友囉！係咪？而攪笑在，今次係我同老公一齊聯手做呢個媒人，我負責女既，佢負責男既，哈，真係好玩喇！

唔，我個好姊妹佢近排有好多野要考慮同安排呀，佢都幾煩，希望神可以比d啟示佢啦，讓佢可以快些解決心中既困擾．．．

>>December 17, 2003 at 11:51:57 AM GMT+8

2003 年 12 月 14 日 星期日 【晴】

今日放工之後，上左去老公屋企煮飯比佢食．．．哈，好耐冇整過野比佢食喇．．．雖然唔係咩好好食既野，又唔係什麼好好食既明菜，但係只要老公講聲好食，我就好滿足架喇．．．

雖然後來都好夜先走，攪到好夜訓，不過我覺都值得既．．．

>>December 16, 2003 at 5:29:20 AM GMT+8

2003 年 12 月 13 日 星期六 【晴】

琴晚返完深宵，都冇點訓過，而家超級眼訓．．．好累．．．

不過下午同vivian去左shopping，都幾開心，因為買聖誕禮物比人係一件好開心既事嘛．．．我最鍾意送野比人架喇．．．哈！

>>December 16, 2003 at 5:27:39 AM GMT+8

2003 年 12 月 12 日 星期五 【晴】

哈，今日同老公周圍去搵一隻佢搵左好耐既軍艦模型．．．唉！真係行到腳都軟埋呀！行左好多個地方，本來都已經好失望，因為完全冇任何既回音．．．點知就係係呢個東方188，終於比我地搵到佢．．．唉！不過真係衰，搵到佢又點丫，成百幾蚊咁貴，比起原本既價錢貴幾倍呀，對我黎講都幾貴，而且我唔會買．．．因為我覺唔值！不過老公就覺好值，因為佢實在太過喜歡軍艦喇．．．都係既，每個人都會有自己既心頭好，正如如果係高飛既野，我都會希望可以擁有佢啦！明白既．．．所以老公最後都買左佢，好開心咁返屋企喇．．．

跟住返屋企之前又約左個朋友食飯，呢，果個新搬屋果個朋友呢，我地又再次上佢新居，再仔細睇間屋．．．好正！真係一定~U死女呀，我都迷死，間屋咁正，裝飾就又好，係人都想訓晒落去囉．．．如果我第二日都可以同老公一齊擁有一間自己既屋就好喇，可以自己鍾意點整都得丫嘛，係咪？好想好想呀！唔知有冇可能發生呢？

唉，不過今晚好凍呀，又要返深宵，真係十萬個不願意呀！唔想出隊，咁凍．．．不過好在有個同事會渣車出去，都可以避下凍既．．．希望唔好又凍死，跟住快手收工，可以快手返屋企！

>>December 13, 2003 at 4:02:43 PM GMT+8

2003 年 12 月 11 日 星期四 【晴】

唔，今日一返中心就比老細罵，罵足十五分鐘呀！唉！真係好無癮．．．為乜？咪就係為左上次去camp既事囉．．．唉！真係好激氣．．．點解偏偏選中我喎？係我黑仔，定係我本身真係咁差？成日一d唔好既事偏偏會發生係我身上．．．

講真，我自問已經盡左力，好努力咁去做到最好，但係點解成日都頭頭碰著黑呢？唔係話果個老師投訴，就話果個老師話乜野咁．．．好煩呀！學校既老師大晒咩？學校大晒咩？老細大晒咩？係，佢地係大晒，因為我只係一個卒仔，有咩好講丫．．．人地一隻手指卒都卒死你啦，係咪？

唉！我而家好矛盾，成日係度諗，我真係咁差？我已經做左兩年野喇，點解好似成日都係咁，點解成日都好似遇著好多問題．．．我成日問主，點解要我經歷咁多既人和事，點解．．．？我知主係有佢既旨意係度，但係我真係唔明．．．好辛苦，好辛苦．．．我好想喊，但係我唔可以係我家人面前喊，因為我唔想佢地知道我工作有幾多壓力，因為我仲要保住份工，因為我仲要養我既家人，我唔可以冇左份工，我唔可以＄＄＄，唉！好辛苦呀！好．．．辛苦！！

神呀！求你讓我可以經歷好一些吧！我真係感到好大壓力，好似成日覺得身邊既人比自己好，比自己做得好，比自己過得好咁．．．唉！點解我會咁樣諗架？我明白人比人，比死人，又知什麼一山還有一山高．．．但係．．．唔知呀！

>>December 12, 2003 at 4:45:11 PM GMT+8

2003 年 12 月 10 日 星期三 【晴】

唔，今日返工都幾充實架，不過可能因為之前請左兩日假，即係等如放左兩日假，所以有少少懶散左，不過我都做左好多野架，又要做d.o，又要夜晚帶班仔出去學髮型喎，都幾辛苦架，不過後來等班仔放學後都成九點半，橫掂又係旺角，自己咪一條友行下街囉，本身都有少少目標想買野，但係最尾都係買唔到．．．希望下星期再帶班仔出去旺角上堂時，再行多一次，可以買到自己既目標物品啦．．．

>>December 11, 2003 at 5:36:46 PM GMT+8

2003 年 12 月 9 日 星期二 【晴】

今日又請左病假．．．唉，連續兩日請左假，真係唔知講咩好囉！老細佢又冇講乜野，不過我真係病左返唔到工嘛，你嘈都冇用啦，係咪？

今日本來諗住係屋企乖乖地咁既，點知老公仔又後來夜晚叫左我出去食飯，咁難得有咁既機會，我梗係出去啦．．．點知一出去就死得，我琴晚一共去左四個地方，包括荃灣，葵芳，太子，旺角，就係為左幫老公搵一部佢想儲齊好耐既模型軍艦喇．．．都係自己衰囉，係佢生日果時送左一隻比佢，就係咁就挑起左佢條癮，要儲齊佢囉．．．不過講真都值既，一來係老公鍾意，二來部模型又好靚既．．．

>>December 11, 2003 at 5:34:04 PM GMT+8

2003 年 12 月 8 日 星期一 【晴】

今日最終都請左病假冇返工，但係其實我又有返工，因為我下午要入學校做野，咁我冇理由要同事幫我跟架嘛，而且係最後一節喇，自己點都捱埋佢啦，所以下午都返左中心入左學校做埋最後一節小組．．．不過都好既，好頭好尾嘛！

今朝返工之前真開心，老公佢本來琴晚話黎我度睇我架，佢擔心我病成點喎，本來我都叫佢唔好黎，因為一來太夜喇，二來我又病左，要休息既，佢黎度都係睇住我訓，佢冇野好做既，但係佢最後都話要黎，不過後來佢都打黎話唔黎喇，我都無所謂，因為我都覺唔需要喇，因為我大個女喇，要學懂照顧自己架嘛，我要老公知道，我唔需要依賴佢，我唔想佢覺得我好煩，好纏身，要佢成日照顧我，因為我知佢鍾意我獨立，唔鍾意我成日纏住佢．．．唉！不過講真，有邊個女人唔鍾意人鍚架，之但係老公佢偏偏就係唔識得關心人同鍚人．．．其實有時我都覺幾唔開心．．．不過算啦，兩個人一齊，總係要互相遷就同體諒既，係咪？不過老公佢今日好好呀，特登一朝早打黎約我去食lunch，因為佢知自己衰，同朋友去玩都唔理我，佢想彌補過錯o者．．．講真，我唔知點解，果日大家嘈完之後，今日大家見面好似好生疏咁，好似總係有d野隔住隔住咁．．．唉！我真係好擔心，唔知呀！！！

>>December 9, 2003 at 3:33:24 PM GMT+8

2003 年 12 月 7 日 星期日 【晴】

今日放假，本來諗住約埋媽咪一齊出街行下街，買下野咁，點知一朝早起身極度唔舒服，係咁咳，又氣喘復發，好辛苦，但係我都堅持要同媽咪出去旺角，點知．．．就係咁就出事喇！我係旺角度係咁喘氣，可能果度人流太多，空氣太差，攪到我極度辛苦，後來都頂唔順，要拿拿聲番黎屋企去睇醫生．．．唉！我真係冇用，我真係唔想成世都牽住呢個病呀！我當時真係好驚架，感覺就好似就黎死咁，我真係喊左出黎，我唔想死，我係咁祈禱，希望神可以讓我好番，唔好咁辛苦．．．我知道我身邊既家人同老公都好擔心我，但係．．．我自己都唔想架！我都好擔心自己既情況，但係咁又點呢？我唔想成為佢地既負荷，我唔想老公因為我成日病，成日身體唔好而嫌棄我！雖然我知佢口講架係唔會，但我知終有日佢係會嫌棄我！講真，有個健康既唔通唔要，要個病人咩？

唔，我真係要好好咁條理好身體，神呀！請你給予我力量，讓我有決心幫助自己！

>>December 9, 2003 at 3:24:01 PM GMT+8