2003 年 12 月 6 日 星期六 【晴】

今日終於去完camp返黎．．．唉！好煩，真係發生左事，仲係好煩果隻，今次有排跟，學校方面一定又嘈，但係d老師跟本就係廢，眼白香睇住發生事，都可以唔理之餘，仲係度唔理學生既感受，係咁罵佢地．．．跟本唔佩學人做老師．．．好激氣呀我！越來越憎d老師，又要顧全自己既面子，又要擺款，又要話比你聽佢好似有做野咁，又要話你知佢好似好專業咁．．．唉！收皮啦，我地呢班社工，默默耕耘時，你地又去左邊丫．．．

仲有，今日好唔開心，其實都唔知應該開心定唔開心．．．頭先同老公嘈交黎，係好勁果隻，原來大家係心目中已經壓抑左好多對對方唔滿意既事．．．唉！大家一次過爆發出黎，係咁講對方既不是．．．不過，大家分享完之後，雖然中途大家都曾經想過大家係咪再應該係埋一齊，但係最後，我都可以講一句，我仲係好愛佢，我好唔捨得呢一段既感情，我知老公佢同樣都仲係好愛我，所以．．．我知我應該點做，我地同樣地仲希望同對方有將來架，所以我地唔會放棄，我地要好好珍惜，要做到最好．．．

>>December 8, 2003 at 3:35:44 AM GMT+8

2003 年 12 月 4 日 星期四 【晴】

哈，聽日就要入camp喇，都冇乜時間去執野，因為太忙喇，有好多野都未做，都唔知點死．．．琴晚老公又開通宵整電腦喇，真係為佢辛苦，d電腦又係衰架，人就發明左佢，點知人又會比佢玩番轉頭．．．唉，諷刺呀！唔，聽日要入camp，確實有少少壓力，因為我知道學校方面好煩，對我地諸多要求既，又會插插插．．．唉！真係要小心努力呀！將一切交托比神啦．．．

>>December 8, 2003 at 3:29:06 AM GMT+8

2003 年 12 月 3 日 星期三 【晴】

唔，琴晚好叻，冇點咳同喘氣喇，證明個醫生既藥係ok啦！都好，起碼唔洗去camp都咁辛苦，有藥頂頂先．．．

今日係中心好忙於預備星期六日去camp既工作呀！仲要brief埋d YA同事幫手，又要理班伴你既仔，好煩！我d proposal仲未攪呀，仲有成千上萬既case recording未做添，8號要交stat.喇，點死？過兩日又要去camp，點死．．．唉，突然諗起，真係仲有好多野未做同未跟，點好呀！天呀！想死呀！點解一下又可以一d冇野好做，一下又可以忙到飛起架？

唔，中心既新同事終於係琴日返左工喇，佢係全中心最年輕既社工呀，唉！比較下我顯得老左添，haha~ 呢個同事都幾得意同nice，雖然幾年輕，但係都可以傾得埋．．．今日佢竟然向我請教有關做OR既秘訣，講真，我自己都好唔掂呀，我都好擔心自己，今日本來夜晚諗住出OR既，後來都因中心唔夠人冇出喇，我真係好驚中心唔會同我續約，就係因為我係外展工作度做得唔好．．．不過講真，我其他方面做得好努力架，尤其而家既僱主網絡果度，我好希望可以承著個勢，建立自己既地位，希望如此啦．．．

哈，今日其實應該開心，因為係我爹地同媽咪既結婚周年紀念呀，我本來都唔記得架，係老公仔今日突然提起今日係四號，我先記得．．．不過我都冇時間去買任何野，都唔知如何同佢地慶祝，不過最好笑既係，連我媽咪自己都唔記得左佢自己係結婚周年紀念．．．哈，咁仲好，唔洗顯得我冇心嘛！

>>December 4, 2003 at 3:40:53 PM GMT+8

2003 年 12 月 2 日 星期二 【陰晴不定】

唉！近日真係好忙，一時就忙於外出去同d僱主去deal合作，成日都出出入入咁，真係幾辛苦！不過，有機會可以跟呢個僱主網絡既project，我真係有少少壓力之餘，都希望從中自己可以學多d野，可以有一番作為，起碼係中心度都仲可以拎番些少地位同埋權力先丫，我會好努力去做到最好架，因為真係一家大細都靠晒佢架喇，我希望可以有好成績啦．．．另方面又好忙住跟好多伴你高飛既野，班仔真係比佢地激死我，好煩，唔係唔返學，就話比人打，好煩．．．呀，諗起仲有成三個proposal未寫添呀．．．死未！點算好呀！點解有咁多野做架？講真，而家真係有少少有氣冇訂抖既感覺，真係得閒死，唔竹得閒病呀！我連睇醫生既時間都冇．．．不過，今晚終於提起心肝去睇醫生．．．

醫生話我有可能會由普通既氣管敏感變成輕微哮喘．．．我好擔心呀，我家人都好擔心我既情況．．．唔，我知道我既一切都係由神去安排，如果神係要我去經歷呢d野，我知道係有佢既旨意係度．．．雖然有時候神所安排既野，並非係我所願，但係，我都願意承受！

唉！冇既，有時候我覺得做人最緊要係問心無愧同埋覺得開心快樂！所以我係一d及時行樂既人黎，我明白要好好去感受同享受我既生活，先至可以達到以上既目標．．．努力呀，annie！我知我可以overcome一切架！

今日有時間可以親機陪下老公仔，真係好開心，因為近日大家都好忙呀，我又成日出出入入去見僱主咁，佢又衝緊proposal喎，大家都好似打仗咁．．．唉，好在大家都仲可以抽到少少時間見下面咁，好在琴日去左佢度，咁樣大家又可以多少少見面既機會喇！

老公，我好掛住你呀！計計下，又唔知幾時先可以再見到你囉，我今日個星期尾又要入camp喇，都唔知點解有咁多camp去架，成日要外出工作，真係．．．好慘！

>>December 4, 2003 at 3:29:05 PM GMT+8

2003 年 12 月 1 日 星期一 【晴】

唉！琴晚又氣喘喇，好辛苦，好慘！近日老公佢冇乜點理過我，佢都好忙，而且．．．唉！人地要理佢個阿媽都唔得閒理我啦，係咪？唔係話咩同d老人家爭仔，唔係話要去呷咩醋，只係有時候，我真係好擔心，第日真係結左婚後，老公佢慘o者，手心係肉，手掌又係肉，婆媳斗紛呢d野，係永遠不變，係天理循環黎，所以我完全相信係會發生，有咩事起黎，咪只會令個做仔既難做．．．唉！坦白講，我知我會好難同人地阿媽融洽同相處，根本大家來自不同既背景，不同既家庭，點可以相處呢？大家思想又唔同，而且我直到而家為止，仍然唔能夠接受到佢阿媽，果一件事．．．真係令我冇法忘掉，而且係一個在我心目中永不磨滅既事．．．我真係接受唔到，我知我係永遠接受唔到．．．

所以，我自己而家好矛盾，兩個人一齊，唔係真係只係兩個人既事，係兩個家庭既結合，雙方同時要接受對方既家庭背景．．．但係我好擔心，好多人話，叫我諗清楚，一個咁複雜既家庭背景，係咪適合我再同佢一齊．．．唔，我唔知，我都好矛盾！

>>December 2, 2003 at 1:42:33 PM GMT+8

2003 年 11 月 30 日 星期日 【晴】

今日我又病到七彩喇，自從果日出完深宵，吹左一輪風之後，就咁就病左．．．唉！但係今個星期真係好多野做，唔可以瘺之餘，仲冇時間去睇醫生添，好慘呀！

今日朝早一早開會，嘩，十分之眼訓．．．中途仲講開中心未來幾年會面對極大既經濟問題，最worst可能要去到扣人工或者減人手既情況．．．唉！真係好矛盾，而家整個社會都會似為左錢而煩惱，整個社會氣氛都好差，經濟真係好困擾所有既人，冇錢就冇飯開，冇飯開就死得人啦，唉！好悲哀！

>>December 2, 2003 at 1:28:04 PM GMT+8

2003 年 11 月 29 日 星期六 【微冷】

唔，返完深宵，個人真係好似散左咁，好辛苦，仲有少少作病咁，可能琴晚太凍，凍親喇．．．唉！本來今朝7點返到屋企，希望可以大覺訓，好好咁休息下啦，點知一訓，我隻貓就係咁叫我，係咁要話食野，我當時根本連行既力都冇，所以冇理佢，點知佢就係咁嘈住我，我都訓唔到．．．好，終於捱到一段時間，我屋企人起左身餵佢喇，我先有得訓！但係去到12點幾時，我屋企人又係度睇vcd喎，部電視又開到鬼死咁大聲．．．唉！又係冇得好訓．．．後來捱到兩點幾，都係起左身，到而家五點幾．．．唉！最死係聽日仲要返工，而且要一早開會，加上下午要出去見僱主，個樣咁殘，點見人呢？唉！

>>November 30, 2003 at 9:50:09 AM GMT+8

2003 年 11 月 28 日 星期五 【晴】

哈，而家其實係11月30日喇，因為我琴晚要返深宵喎，所以而家零晨五點幾仲係中心度呀！其實返深宵都幾辛苦，尤其今日d天氣鬼咁死凍，簡直凍到我傻左咁，好辛苦，d風吹到個頭好痛好痛．．．唉！好痛苦！

而家加上係最眼訓既時間，好辛苦，仲有成兩粒鐘要捱，幾時先可以走人呢？不過無計，今日係天使社群週年大會，如果我唔係返深宵，我根本冇時間可以去到呢個聚會架，所以無法，都要返喇．．．唉！

>>November 29, 2003 at 9:13:54 PM GMT+8

2003 年 11 月 27 日 星期四 【晴】

聽日就係我地天使社群既週年大會既大日子，今日老公佢好努力咁去整理一切既野，但係好景不常，點知老公係整證書時出現左問題，佢大發雷霆呀，我當時其實都好驚，不過我叫自己先要冷靜，然後再勸佢冷靜，要不然事情便唔可以順利完成喇．．．好在，後來都可以成功完成左份事工，如果唔係就大鑊飯喇．．．

>>November 29, 2003 at 5:01:20 AM GMT+8

2003 年 11 月 26 日 星期三 【晴】

今日成日都好忙，因為下午走左出去G2000公司見個僱主，同佢傾合作既事！唔，跟住手尾就多囉，老細要我今晚之內將所有野做好晒比佢，真係好急，做到我丫．．．

跟住放工時，諗住特登去撞下個男友啦，工作得咁辛苦，見下佢都值，因為會開心d，點知佢同我講佢今晚要係中心開通宵，我梗係擔心佢啦，所以諗住去探下佢，請佢食下野，鼓勵下佢．．．點知，去到，佢竟然發我脾氣．．．唔，我明佢都係工作太多，做到好唔開心先至咁架o者，我會原諒佢！

>>November 28, 2003 at 3:56:28 AM GMT+8