2004 年 2 月 14 日 星期六 【晴】

唔，琴晚返左深宵，今日真係好難頂，今朝六點幾先放工，跟住就梗係去左老公度訓．．．一訓已經十一點幾，跟住就起身去搵老公食lunch，食完之後就返左屋企．．．初時都仲有心機去執下房既野，因為真係太亂，但後來個人真係太累，所以都係走左去訓左陣覺，一訓就已經成七點喇，哈！跟住就食飯，睇”大隻佬”．．．不過我覺套戲好似扮晒有深度咁，講埋晒咩因果．．．不過都幾ok既．．．

琴晚深宵有個同事整親隻腳，醫生話佢骨裂左，我地都好擔心佢，因為睇見佢跛跛下咁行都幾辛苦架，而家醫生仲要佢放成兩個星期假，真係唔少野．．．希望佢早日康復啦！

>>February 16, 2004 at 5:58:50 AM GMT+8

2004 年 2 月 13 日 星期五 【晴】

HEHE~ 今日都幾開心！起身果時已經係十二點喇，老公好好，佢一早就起左身，仲去埋落街買早餐我食．．．簡直冧到要食．．．跟住下午係屋企HAIR左一陣，我就坐老公既順風車去左天水圍，點知係天水圍既然撞到我今期伴你既幾個女．．．唉！今次一定比佢地唱死喇．．．如果比大舊知道都唔知點死喇．．．不過老公話，呢D係私人生活，而且我地又冇做咩野唔見得人既事，唔洗怕．．．希望如此啦．．．我相信老公既！

到左夜晚，係我仲頭痛緊今晚食咩好時，老公叫左我入廚房，打開個雪櫃．．．嘩！個鬼馬老公佢原來今朝落街唔係只係買早餐咁簡單，仲買左好多煮西餐既材料，諗住今晚煮西餐食，食燭光晚餐．．．哈，我果一刻真係開心到死，真係又冧多一次．．．今次煮既比上次好多，終於有少少進步，都好！後來，我地仲坐底係度回顧我地過去五年裡邊係大時大節度做過咩野慶祝事項添．．．不過原來我地已經有好多唔記得左喇，後來我地都放棄左．．．不過唔緊要啦，大家有個心咪得囉，係咪？不過今晚要返深宵，而家先開始有少少後悔，不過都好既，可以有得玩下，哈！

>>February 14, 2004 at 1:32:16 PM GMT+8

2004 年 2 月 12 日 星期四 【晴】

哈，今日返下夜，時間好似好過d咁，因為太眼訓，不過好在今日都冇乜特別野要做，夜晚走去OR，都有少少收獲咁．．．都好！

跟住放工就去左老公度，今晚同老公玩左一個尋寶遊戲，要老公搵到我送比佢既禮物！哈，老公玩左個遊戲好耐，不過都比我預期為快，早過十二點前搵到．．．我本來諗住老公要十二點後先搵到，咁我即時講情人節快樂架，不過冇所謂啦！

今晚都開心，都成三點先訓．．．聽日情人節喇，都唔知有咩節目喇．．．聽日等老公安排啦

>>February 14, 2004 at 1:24:48 PM GMT+8

2004 年 2 月 11 日 星期三 【晴】

今天都幾繁忙．．．今朝一早就要入學校開組，d學生好煩．．．而且加上一組成十幾人，真係幾辛苦同麻煩．．．好在老師都有幫下手！

下午時間就好少少，因為都係hair一輪先做野，主要都係等放工，但係放工時間並唔係可以放，因為我仲要帶班仔出去旺角學髮型，帶左出去之後仲要幫老細拎野去總會交野，真係好忙．．．不過之後就約左老公，真開心！老公同左我去買手提電話．．．唔，都幾貴，其實都唔知點解自己咁捨得，雖然話有老公資助o者，都好似博左少少，買左部成三千蚊既電話！真係咁大個女第一次拎部咁貴既機出街咋！

>>February 12, 2004 at 4:59:11 PM GMT+8

2004 年 2 月 10 日 星期二 【晴】

唔，今日又要帶班仔出去學車．．．有時候真係覺得幾悶架．．．去到學車果到，同個僱主傾左一陣，點知佢講開佢地下期既通訊到想搵我地中心／我去寫一篇文章，內容關於青年就業或者對帶領學員實習的感受咁．．．講真，我從來未試過有人邀請我寫文章架，真係有少少意外．．．不過都要睇老細頭啦，佢話唔寫既就唔洗啦，係咪？

夜晚就好忙呀，因為要整聽日入學校開組既野，攪到我都冇時間打比d女添，都唔知點算．．．冇計，聽日或者星期五晚先再打啦．．．

我今日已經好努力咁處理老公份情人節禮物．．．我一定要係聽晚前做好，因為星期五已經去老公度喇，冇時間喇．．．不過，頭先同老公通電話，佢話佢星期四五六都放假，所以約左個朋友又上大陸玩．．．其實我都唔多鍾意，因為而家什麼病都咁嚴重，真係一唔小心好易中招，我都好擔心架，不過冇計，唔通唔比佢去咩？唯有為佢祈禱，希望佢平安啦！

>>February 12, 2004 at 12:28:50 AM GMT+8

2004 年 2 月 9 日 星期一 【晴】

唔，今日終於好天，可以帶班仔去耕田喇．．．其實講真，我都係咁大個女第一次去嘗試耕田咋，我自己都好有體會．．．所以話，有時候我都做worker既都會同時同埋d仔一齊學習同成長架！而家先發覺耕田並唔係一件簡單既事．．．唔，我以後會更珍惜食物架喇！

另外，今有成日都好等待住放工，因為今日約左個好姊妹（我有太多好姊妹喇！），其實亦都係以前舊公司既同事，一齊去唱k．．．其實大家講去唱k已經係由我未走果時講到今時今日先至可以成功可以約得到咋．．．所以我今次完全係極度之開心同珍惜呢！今日除左同個好姊妹一齊外，佢仲帶埋佢既男友仔，後來仲有多一個舊同事兼舊同學黎埋，最後四個人一齊玩，好開心，有傾有講又玩又唱歌．．．希望好快又可以有機會約埋一齊玩啦！

唔，琴日送左份情人節比老公，老公好似．．．唔多鍾意咁既語氣．．．我聽到都有少少唔好意思，因為好似送左一份人地唔鍾意既野比人，換轉係自己都會唔開心啦，係咪？何況果個仲係老公添．．．唉！今次又衰左喇．．．點補鑊好呢？無計，唯有出最後一著．．．．今次唔出絕招都唔得喇．．．

>>February 10, 2004 at 4:08:44 PM GMT+8

2004 年 2 月 8 日 星期日 【晴】

今日返工都唔多想做野，成日係度等放工．．．唉！因為放工可以去見老公嘛．．．哈，我今日為老公預備左一份情人節禮物，當老公返到屋企時就會見到架喇，好緊張呀！哈！希望老公會鍾意啦．．．不過．．．都係唔講喇，要神秘神秘．．．秘密！驚喜將會出現於老公既眼前，yeah~

唉！琴晚都唔知攪乜鬼，半夜三四點時無啦啦有兩個電話打黎，又冇人聽，初時真係以為有咩急事呀，點知又冇人講野，無啦啦比果兩個電話嘈醒左，後來以為唔會再有野發生啦，點知一個鐘頭後，大約四五點時，又響多兩次電話．．．頂，都唔知乜差打黎架，好煩，又係冇人講野，好嬲呀！唔知邊條媽街玩野，嘈到我後來都訓唔番，好辛苦，好激氣．．．真衰人呀！

>>February 10, 2004 at 4:10:00 PM GMT+8

2004 年 2 月 7 日 星期六 【乍雨乍晴】

今日係知友社既團拜，我梗係有出席啦．．．唔，今次係我第一次參加，其實都對佢有少少期望咁，不過我最後覺得失望．．．一來d野唔好食，二來我抽唔中獎，唔開心呀！不過講真，最緊要係能夠一班同事開心咁玩一日o者，係咪？

完左團拜之後，我一個人走左去旺角行街，哈，佑唔到咁都可以有收獲喎，真開心！跟住都返屋企喇，食一個好熱鰧鰧既火鍋餐啦．．．

>>February 9, 2004 at 4:16:35 PM GMT+8

2004 年 2 月 6 日 星期五 【乍雨乍晴】

唔 ，今日幾開心呀！因為一朝早起身就約左老公一齊食午餐，跟住老公就送左我返工．．．返到中心雖然係當值，但係都冇乜特別野做，哈！跟住捱到五點半，又約左老公食飯喇，幾開心丫．．．哈，夜晚我就去左外展，後來又係上左老公度見下佢．．．唔，今日除左見到老公開心外，仲因為可以買左幾樣高飛既物品，好開心，我買左幾個扣針，仲有一個水晶球添．．．好正架！不過都有少少肉痛架，d野夾埋都係三百幾蚊．．．不過有時候見到自己心頭好，真係好難忍手架．．．所以，希望老公唔好怪我啦．．．當然啦，如果有人願意比番少少我既，我會仲開心架．．．哈！

>>February 9, 2004 at 4:03:28 PM GMT+8

2004 年 2 月 5 日 星期四 【乍雨乍晴】

呀！今日一早起身去帶班仔行山．．．好辛苦！不過好在有老公陪我一齊早起身，哈，老公要早過我起身添呀，因為佢今日要去開會呢！唔，今日天氣已經冇琴日同前幾日咁凍，都好少少，不過都仍然幾凍下，要行山都係一件好慘既事，不過都冇辦法啦，因為真係好難book期架嘛，所以死人都去．．．不過好在個天都對我地唔錯，冇點落過大雨，係有少少微雨o者，咁都好，嘩，諗起帶上期班伴你行同一條路時，上次真係落狗屎咁，都行唔晒原定既路線，最後都係要中途折返．．．不過今次終於可以行晒喇，都好，我自己就未真正行過晒呢條路，所以自己都有得著既．．．不過行既中途，自己都好驚會氣喘架，因為都有一定程度既辛苦，好在最後都捱過左．．．

唔，行完山後，梗係好想搵老公同佢分享下啦，所以本來想搵佢食飯，點知變左做同老公同埋佢既老細同老細既老婆一齊食．．．哈，感覺好怪，有少少唔啦更咁．．．我都唔敢表露自己既本性出黎，要扮晒正經咁，都幾辛苦，不過都enjoy個過程，雖然我真係好眼訓，因為琴晚訓得果五個鐘度咋，都幾辛苦，今日仲要行山，個人真係好累下，不過都開心．．．

>>February 6, 2004 at 5:36:03 PM GMT+8