2004 年 1 月 22 日 星期四 【乍雨乍晴】

哈，今日都算係一日忙碌日．．．一朝早起身就去左表哥屋企拜年．．．因為二舅舅佢下午要返工呀，所以我地要趕去同佢食飯囉．．．跟住就順手去埋隔離既陳太屋企喇．．．d大人係度講埋晒我地細路冇興趣聽同講既事．．．唉！算啦，我地都係為左豆封利是仔o者，呢d咁既場面一定唔少得架喇！跟住之後又趕住走人，入番去屯門去舅婆屋企拜年．．．嘩，d天氣好似發瘟咁，突然凍到痴左線，我仲要著左條好靚既裙，雖然真係好凍，但係為了靚靚，命都可以唔要呀！不過好在好快可以捱過左．．．之後表哥同二舅母就黎左我地屋企拜年．．．終於可以返到屋企，暖番少少咁啦，起碼唔洗再凍到要死咁丫．．．跟住既日子同時間都好過d，我地唱下k，玩下廿一點（我做莊呀，都贏左少少呀，好似係我贏晒佢地喎！哈）都幾開心丫．．．

唔，明天仲有人黎我度拜年呀，係阿哥呀！唉！真係好忙．．．不過係咁既，如果唔係點係新年丫．．．不過都好，聽日可以豆阿哥封利是，yeah！因為今日收入麻麻喇，應該話差呀！聽日要繼續努力啦．．．．

至於同老公．．．唔，今日打過電話比佢，佢好似心情都幾好．．．梗係啦，佢今日同朋友一齊丫嘛，心情一定好，同我？哈，可能難少少，一定冇果刻咁開心，呢個完全係自己既感覺！當感覺到老公真係重視朋友多過自己時．．．唔，個心好up，好唔開心，覺得自己同佢既朋友永遠都會鬥唔過，我知自己真係冇可能贏，永遠都係輸家．．．就係因為我知佢就係咁，我識佢到而家都係咁．．．咁我可以點呀？唉！算啦，根本係一個永遠改變唔到既事實，可能連結左婚都改變唔到既事實．．．唔知點解自己而家個人好動搖，好矛盾，唔知點好．．．我有多少重要？哈，我知我唔應該再問呢d咁既問題，因為我知男人永遠都最怕呢d問題，咩”你愛我幾多？””你重視佢定我？”咁．．．冇用架，有用咩，佢講左出口，可能都係大話，咁自己會好過d咩？明知係扼緊自己，我寧願唔想知．．．

唔，突然間想起何韻詩一首歌：沙，內裡既一段歌詞．．．

＊即使身價像細沙　都想得你留神嗎
　都想可以成為　北風吹過
　獨一的一顆　吹進你　眼內細沙
　即使講到喉嚨沙　得不到你同情嗎
　你話我又從未踏足高處　怎會跌下
　小痛放到最大嗎　就算假　就算誇
　願你偶爾也問句泥沙　今天好嗎 ＊

>>January 23, 2004 at 2:50:06 PM GMT+8

2004 年 1 月 21 日 星期三 【晴】

嘩，今日係年初一，俊呢度同大家拜個年先，希望大家心想事成，笑口常開啦．．．恭喜恭喜．．．

呀！今日我真係好豐收呀，共有成五百幾蚊利是．．．哈！最正係連童軍獎卷都賣咁左少少，起碼唔洗自己食咁多張丫，係咪．．．

今日一早去左兩個地方拜年，氣氛同感覺都唔同．．．一個係老人家屋企，一個係老公屋企．．．哈，係老公屋企，我第一次同佢加拿大既婆婆傾電話咋，真係好緊張，好驚呀．．．不過好在自己都應付得到．．．

唔，唔知點解，成日覺同老公既關係好似有時好有時壞咁，乍暖還寒咁．．．我去到佢屋企時，大家都好好，我坐住係佢大肶上打麻雀，食飯時都可以，但係走果時搭車，大家就好似冇講過咩咁．．．我都係覺老公同朋友多野講多過我，鍾意同朋友一齊多過我．．．佢一見到朋友就可以好似開籠雀咁，有講有笑．．．對住我？就一時時啦，有時真係好開心架，有講有笑，咩都講一餐，好野衰野都講．．．但係有時就一粒聲都唔出．．．真係好得人驚架！我唔知點解會咁？唔通大家見多左，冇話題？如果第二日結左婚咁點呀？日日見住咪仲死？我好擔心．．．？？

>>January 23, 2004 at 2:37:46 PM GMT+8

2004 年 1 月 20 日 星期二 【乍雨乍晴】

今日年三十晚，梗係同家人食團年飯啦，十分之開心架．．．雖然今日要返工，不過都係返一節，都好快過左．．．唔，跟住食完飯，夜晚出去左本來想行花市，點知等左好耐都入唔到去，所以最後都放棄左，所以好早，兩三點已經返左屋企．．．唉，頭先返到黎打比老公，又同老公嘈交喇．．．我知道老公佢仲係嬲我，而且近日我地成日都為小事而嘈交．．．唉！真係好唔開心，而且有少少擔心添．．．唔通相士講得o岩，我今年馬年真係戀愛方面僧出現問題？真係好驚．．．我向來都唔係太信呢d野架，不過而家好擔心呀！好怕會真係講中左．．．

唔，其實嘈交嘈得多真係唔係好事，希望大家都可以控制到自己情緒，同埋可以好好咁大家坐低傾傾啦．．．不過我地大家都協議左大家要過一個開心既新年，過左新年先再傾傾．．．唔，希望大家會可以好好咁傾，唔會出事啦．．．我真係好擔心，我唔想大家都唔開心，又唔想我地之間會出現紅燈呀！唉！神呀，希望你可以讓我地解決之間既問題，並可以好好咁化解問題，可以好番啦．．．

>>January 23, 2004 at 2:31:35 PM GMT+8

2004 年 1 月 19 日 星期一 【乍雨乍晴】

今日只係返下午一節，確實真係冇咩心機做野，成日傻傻下咁渡過．．．不過都好，起碼最後終於攪掂左同同事去澳門既事，而家終於有得去喇．．．開心．．．不過比人寸左一餐真係唔開心喇，好唔憤氣呀！我地決定以後唔再去果間用花做公司名既旅行社．．．我地決定係網度唱衰佢．．．

老公佢嬲左我兩日，到今日都未肯彩我．．．我都好唔開心呀！希望佢可以原諒我啦．．．

>>January 23, 2004 at 2:27:22 PM GMT+8

2004 年 1 月 18 日 星期日 【乍雨乍晴】

嘩，今日終於去完個退修營返黎喇．．．真係好辛苦，簡直係痛苦，由朝傾到晚，呀！死人呀！玩遊戲時又整到條腰瘀左，好痛呀！好慘！不過慘極都唔夠個同事慘，比老細屈佢請晒成十幾個同事食宵夜．．．不過個同事又唔抵幫既，鬼叫佢比人揸到痛腳咩．．．

哈，今日一出營，幾個去澳門既同事就去左沙田新城市度報名，好開心呀！我地而家共有六人去，我地買左兩個套裝，加多兩張來回船飛，諗住屈蛇啦，咁又可以平多少少喇，真係好開心，真係未出發先興奮呀！不過我仲未同老公講我確實左會去既事．．．好驚會比佢罵我呀！因為今日去完camp之後，我去左朋友家食飯傾計，真係好開心，因為大家好耐冇見，有好多講唔完既話題．．．但係老公嬲我，嬲我一個女仔咁夜都唔返屋企，要佢擔心我．．．我其實都好過意唔去架，希望佢原諒我啦．．．我知佢一定架，因為佢係好錫我既，我知既．．．hehe

>>January 19, 2004 at 5:43:14 PM GMT+8

2004 年 1 月 16 日 星期五 【晴】

唔，今日都算幾好既一天，一來天氣晴朗，心情特別好，二來今日只係返一節（雖然無啦啦老細臨時叫左我去坐counter，不過都過得幾快．．．

下午放工後就走左去搵老公食飯，食完飯就返左屋企訓覺，因為食左藥好眼訓呀！點知一醒果時已經係四點喇，我地都趕到死出去觀塘，因為今日要返老公屋企做節呀！今日做節好豐富，有好正既佛跳牆盤菜食，都幾正架．．．諗起都想食添！跟住番左屋企，幫老公手大掃除呀，嘩，做食人，成間屋好似狗竇咁，抹到我死死下，而家先至黎坐低抖抖，打下日記咁．．．

唔，聽朝好慘，要一早六點幾起身，因為聽日同後日要去中心既退修營，八黠咩要係沙田等呀，所以咪咁早囉．．．不過而家成十二點幾都仲未訓，聽日一定死梗，好驚恰眼訓呀！唉！又係一個好悶，好多野傾既營．．．天呀！悶食人喇．．．所以我都帶定好多零食去呀！哈！

>>January 17, 2004 at 4:49:28 PM GMT+8

2004 年 1 月 15 日 星期四 【雨】

今日真係好鬼死忙呀！因為今日下午幫班伴你做模擬面試，唉！好辛苦，我已經咳到要死，仲要講咁多野，而且仲要不斷寫番d feedback比佢地喎，好累．．．．跟住夜晚就都好忙，因為要開番晒d case，仲要入stat，唉！好累，攪到冇得出OR．．．

頭先睇番個朋友既網上日記，唔，知道佢近日成日唔開心，好擔心件事，成日都冇黎精神做野，身體仲開始有唔妥．．．我真係好擔心佢．．．希望神可以令件事快D完結，並且讓他們可以安全渡過啦！

>>January 17, 2004 at 4:39:05 AM GMT+8

2004 年 1 月 14 日 星期三 【晴】

今日好慘！我又氣喘喇，真係好辛苦，我好怕會有一日死左．．．唉！我知我身邊既人其實都好擔心我，尤其我既媽咪．．．我真係有d過意唔去架！而老公？佢？哼，一句講出口既關心都唔會有！不過，佢都係鍾意用行動搭救．．．哈！不過都好慘！我媽咪將老公第一份送比我既生日禮物，高飛頭咕臣掉左呀，好傷心，因為對我黎講真係好有紀念價值架！我同老公講左，佢話唔緊要，第二時買過比我．．．講真，有新禮物又點？已經唔同左個意義喇，唉，唔開心呀！但係媽咪又好堅持一定要掉，所以都冇計！後來我仲發現左唔見左幾個大既高飛公仔添．．．原來係媽咪佢將佢地放左落個gip度呀！媽咪話太阻位，而且又多塵，唔想我因為咁成日氣喘．．．我知媽咪對我好既，不過我真係好唔捨得佢地，唔可以成日見到佢地呀！唉！

唔，今日成日都好胃痛，唔知做乜事．．．我一向都好少咁樣胃痛發，真係唔明點解？老公同媽咪話可能我個人太緊張，有壓力，所以就係咁．．．我都唔知！其實近日係咪真係太大壓力同埋太多野要做呢？其實咪又係差不多做咁多野，唉！只係近日跟伴你，煩少少o者 ．．．

唉！今日都唔得閒call下個好姊妹，唔知佢件事點呢？其實我都好擔心！眼見佢個人好擔心，落晒形咁，咪話唔心痛佢呀！希望神可以快d讓件事有處理好既一日啦，同埋唔好再要佢再受苦啦！因為我真係好心痛！

呀！琴日講開可能同同事新年去澳門玩．．．而家可能攪唔成，因為有其中一個女同事話可能唔去，但係又係佢當初攪起先．．．今次佢一定比人打死，哈！不過我都好期望可以去架，因為真係冇幾何可以同班同事兼朋友一齊去玩，我真係好想有咁既一日！希望去得成啦！

>>January 15, 2004 at 4:56:57 PM GMT+8

2004 年 1 月 13 日 星期二 【晴】

嘩，今日好開心，一來只係返一節開伴你，另外，就係今日同同事傾開新年想大家約埋一齊去澳門．．．哈，好開心呀！終於可以同班好朋友一齊去外地玩．．．yeah~ 其實，今次係我第一次飛開老公，同自己既朋友出去外邊玩．．．其實都幾開心興奮架．．．加上老公唔係度，可以玩得放d嘛．．．去玩，去食，去賭．．．諗起都開心！

不過，今晚收到個朋友既電話，聽到一個好不幸既消息．．．我知我個好姊妹佢好擔心，個人都落晒形喇．．．我都好擔心佢既精神同情緒狀況呀！我都唔知點安慰佢好，因為佢真係放左好大壓力係自己身上，仲好責怪自己添．．．唉！希望件事會快d冇事就好喇，亦希望神可以幫助佢地，唔好再折磨佢地啦，比番d好日子佢地啦．．．唉！希望神可以保守佢地啦．．．阿們！

>>January 14, 2004 at 4:17:36 PM GMT+8

2004 年 1 月 12 日 星期一 【晴】

今日真係忙，朝早都係預備下午既野，但係下午就忙到死．．．又要開會，又要開伴你．．．仲要比伴你激死．．．班死仔好似食錯藥咁，講真，你話唔識，但係肯學既，我都會好細心去教佢地．．．．之但係．．．喂，比d反應黎好喎！我最怕就係反應都冇，我好似傻仔咁對牛彈琴咁，好死．．．不過好在話完之後，都有番少少野，如果唔係我會死囉！

>>January 14, 2004 at 4:09:46 PM GMT+8