2004 年 2 月 4 日 星期三 【乍雨乍晴】

唔，今朝一早返工，因為要入學校，所以要早少少出門口，仲要返中心拎埋物資先可以出門口．．．嘩，今朝又凍，又落雨，真係想死．．．好辛苦呀！

不過唔緊要啦，今晚可以見到老公，特別開心．．．我地夜晚去左市中心度食扒，今日加上係中國情人節，其實我都唔記得左，係一個同事講起我先知咋，哈！不過都好開心，跟住同老公行左陣街．．．不過，聽日要去行山．．．唉！咁死凍，都唔知點好，真係有點兒唔想去呀！不過冇計，要帶班仔去，死都要頂埋佢啦，係咪？呀！琴日約左個好耐冇見既舊同事係下星期去食飯唱k，好開心，因為好耐冇見佢喇．．．唔知佢而家變成點呢？

>>February 6, 2004 at 5:36:22 PM GMT+8

2004 年 2 月 2 日 星期一 【乍雨乍晴】

唔，今日係我同老公既拍拖五周年紀念．．．今朝一早老公特登起身就係打個電話比我，同我講五周年快樂．．．嘩，果下梗係甜到入心啦，簡直開心到想喊架！不過當然冇啦，因為咁開心，應該係笑至真啦，係咪？老公佢真係有我心，晨早就打電話比人，攪到人地成日個心都囉囉亂咁，成日都掛住佢呀！不過唔掛佢掛邊個丫，係咪？

雖然今日大家都要返工，冇特別咁去慶祝，不過星期日果日咪已經預早慶祝左啦，唔洗啦，係咪？做野緊要丫嘛！所以今日我明知老公要開會，我放工時都唔敢打比佢呀，驚阻住佢丫嘛！係咪好乖呢？

哈，我今日突然諗起，係喎，下星期六就係情人節，我好似仲未準備過送咩禮物比老公呀！真係死得喇．．．我仲同老公講，我果日會出深宵呀！哈，我估我呢個決定真係激死老公喇！果日老公話佢應該可能會有安排．．．唔知係咩喇，我就唔會去諗，因為果晚都仲要返工嘛！冇心情諗喇．．．不過返深宵都好玩既，因為果晚有活動攪，應該會幾好玩架！都唔錯丫．．．

唔，死啦，仲未諗到送咩比老公做情人節禮物好，好頭痛呀！！唉！好似樣樣都送過，樣樣都做過咁，都唔知點好，又想有d心思，又想多d創意．．．唉，倏人老婆甚艱難喇！

呀，聽日老公同朋友上琛圳呀，其實我都好擔心架，一來又話什麼禽流感咁，真係幾驚架，有時你知啦，男仔又冇咁小心同細心既，所以都好擔心佢．．．不過冇計啦，老公又放假，唔通唔比佢去玩咩？我放假時都會約朋友仔去玩啦．．．好似頭先咁，係icq度先至約左個好耐冇見既舊同事去唱k喇．．．哈，好期待呀！

>>February 3, 2004 at 4:32:28 PM GMT+8

2004 年 2 月 1 日 星期日 【晴】

唔，今日雖然放假，但係都幾無聊！不過都好既，抖下囉！一朝早，其實都唔一朝早，都成十一點幾喇．．．比個妹叫醒左幫佢手映相交功課．．．不過算啦，為人為到底嘛！跟住就成朝等媽咪番黎，一齊落去食lunch．．．我食左好多野呀，可能太肚餓喇，哈，足足食左一碗烏冬加一件油多，再加埋一杯可力．．．哈，好勁！今次肥死．．．

唔，今日成日都鼻敏感，好鬼死辛苦，係咁流鼻水，好辛苦．．．我最怕就係鼻敏感發作喇，好鬼死麻煩！

哈，琴晚去左msn度d/l左一個新既version，佢有得用咪同v-cam既function，好正，琴晚同老公玩左成晚，用咪傾計，仲一齊玩遊戲添，最後成三點幾先訓．．．頭先又係玩完黎，好開心呀！好鍾意呢個功能，因為可以同老公傾計外，仲可以一齊玩，唔洗拎住個電話咁麻煩嘛！我仲打算買埋個v-cam，可以成日見到老公添．．．好期待呀！

>>February 2, 2004 at 3:21:58 PM GMT+8

2004 年 1 月 31 日 星期六 【晴】

hehe~ 今日好開心．．．因為我冇返到工囉．．．哈，可以休息一下外，仲可以去幫天使社群手做探訪添，所以真係開心！不過，今日最開心並非咁簡單，而係．．．哈，今日同老公一齊慶祝我地既拍拖五周年．．．我地係屋企食燭光晚餐囉！當然係我煮啦，係牛扒餐啦．．．飲住紅酒，食住牛扒，聽住音樂，係柔和既燈光下碰杯．．．真係好浪漫！我咁大個女都係第一次咋，真係好正，好有feel！哈！都好，之前相識五周年都冇慶祝到，今次可以當補數外，亦慶祝埋拍拖五周年．．．好開心呀！我覺最開心莫過於此喇！希望日後同老公仲可以有好多個五周年去慶祝啦！

>>February 1, 2004 at 4:39:00 PM GMT+8

2004 年 1 月 30 日 星期五 【晴】

唔，今日已經係一月既最後一日喇．．．哈，其實並冇咩野特別！今日返工好冇動力，可能老細唔係中心啦，所以往往做野都係慢人半拍，而且唔多願意做野咁．．．直至捱到夜晚，終於可以走人，跟住就約埋老公一齊係朗屏站度返屋企．．．

都係屋企舒服，鍾意點都得，不過都好夜先訓．．．聽日天使社群會去探訪老人院，所以有好多野都要準備，我梗係都要幫手啦，因為我已經係因為要返工而冇得去喇，如果仲唔做番少少野，好怕比人打！唉！講起真傷心，聽日又要返工，好無癮，今日無啦啦比老細調左返下夜，聽日又要返．．．唉！唔開心呀！如果唔係今日可以同班義工一齊做探訪，我諗一定會好開心架！

>>February 1, 2004 at 3:01:22 AM GMT+8

2004 年 1 月 29 日 星期四 【晴】

今日可以話係放假後一日正式返工既一日．．．唔，今日真係唔多想返工，一來因為放假放到心都散晒，二來真係好累，琴日夜訓呀，去完街黎嘛．．．哈，所以比老公罵我囉，掛住去玩，唔故自己身體．．．唔．．．

今日一朝早起身呀，去左攪埋之前係新華訂去澳門既尾數．．．嘩，大拿拿二千蚊架，死人都要快d去拎番啦，跟住就入埋去銀行添啦．．．哈！好在，條數可以又有番進脤下，如果唔係好慘！跟住就梗係去搵老公啦．．．真係飛到去呀，因為太掛住佢喇，仲帶埋我買比佢既澳門手信添．．．佢好鍾意呀，真好！

>>January 30, 2004 at 4:15:18 PM GMT+8

2004 年 1 月 28 日 星期三 【晴】

今日約左個朋友仔，好姊妹出去旺角行街食飯．．．好開心，因為大家好耐冇見喇，我都順便比埋澳門既手信佢，如果唔係都唔知幾時比佢囉．．．今日同個好姊妹傾左好多野，尤其講到佢既愛情問題．．．唔，其實我都好明白佢而家既心情．．．我都唔知點講好喇，總知希望佢可以有情人終成眷屬啦．．．

今日我都有shop左d衫，不過因為之前新年前都買左好多野，所以都唔敢再買喇，如果唔係比人殺死喇．．．阿媽一定唔會放過我，因為而家成間房都已經係我既野，我估遲早阿媽會趕我走架喇，哈！

唔，計計下，已經成四日冇見過老公喇．．．好掛住佢呀！好想見到佢．．．所以一於聽朝約左見見先．．．好野！

>>January 30, 2004 at 4:03:33 PM GMT+8

2004 年 1 月 27 日 星期二 【晴】

唔，今日已經係最後一日假喇．．．真係唔多想返工，不過今日我地都好爭取玩既時間，同同事佢地都仲有下場．．．今日大家約左去唱K，跟住上左IRENE屋企睇澳門既相．．．嘩，好開心呀！irene屋企都幾好，地方都幾寬闊，間格都唔錯，其實都未至於唔方便！其實真係有得諗下租呢邊既屋．．．哈！

今日搭車走時，見到以前南豐紗廠舊址而家起左一個新樓盤，諗諗下，如果買果度，第二日返工都唔係唔方便o者，真係有得諗．．．

>>January 29, 2004 at 3:53:25 AM GMT+8

2004 年 1 月 26 日 星期一 【晴】

哈，今日終於係澳門玩完返黎喇．．．真係好開心呀！可以同成班朋友仔一齊去玩喎，梗開心架．．．我地不斷係咁食，食完又係食．．．好多野食，食左好多之前去澳門都未食過既野，例如，木糠布甸啦，黑椒燒鴨啦，葡達啦，南乳炸雞翼啦，馳名既雙皮奶啦咁．．．總知好多好好味既野食啦．．．好肥，好飽，好正囉！

其實呢個旅程真係冇點參觀過地方，只係去到邊就行到邊，完全冇乜計劃，有野就食，有野玩得玩，有野買就買咁．．．好hair咁盲 過左兩日．．．不過都好既，起碼係真係既relax丫嘛！同埋我最enjoy既係可以同成班朋友一齊去玩，好開心，不斷傾計，講左好多野，好多得意野，亦分享左好多好多．．．真係好珍惜！加上今次個旅程可以識多兩個朋友仔，一個係阿君，一個係shauna，真係開心呀！而且最後都可以買到好多手信，唔只食架，仲有玩架！仲要過程中有講有笑，好多笑野出左黎．．．例如：我囉，出發果日唔知醒，佢地仲以為我講笑，其實係真架．．．攪到我要自己再買飛，飛到咁過去！又好似我夜晚發開口夢，係咁講媽咪救命咁，攪到irene冇覺好訓！仲有，阿豪同dino訓覺打鼻寒咁啦．．．真係好樣衰．．．

不過呢兩日我都好掛住屋企同老公架，我都有買野比佢地，我有經細心地去選擇先買架，包佢地鍾意呢！唔，好想快d見到佢呢！

>>January 27, 2004 at 4:41:57 PM GMT+8

2004 年 1 月 23 日 星期五 【晴】

唔，今日都係一日幾冇乜野做既一日．．．今日阿哥夜晚黎拜年，所以下午果段時間同左屋企人一齊去飲茶．．．點知係飲茶前，我突然氣喘發作．．．唉！好慘！後來去左睇醫生囉，仲要睇開果個仲未開門，咁都要搵住一個開左門既睇住先啦．．．後來，食左藥之後都好似冇乜效咁．．．好慘！一路頂到夜晚食多次藥先至好左少少．．．

阿哥今日帶埋佢女友黎拜年．．．其實大家都冇乜野好講，都幾悶．．．我都係後來上下網，瑁下icq咁，咁就過左一晚喇．．．不過聽到阿哥佢又失業喇，都有少少擔心佢，而且都係佢既女友擔心，哈！要跟一個咁既人，真係幾慘！又成日轉工失業，一d都唔穩定，根本一d安全感都冇，又成日傻更更咁，唉！何時先可以成大器架？我都係鍾意d有上進心，積極工作既人，哈，好似我老公咁，就係咁既人．．．我最鍾意佢就係咁既原因囉！

>>January 25, 2004 at 9:24:43 AM GMT+8