2003 年 12 月 30 日 星期二 【晴】

新年快樂！唉！唔知點解，雖然親身去倒數去2004年，但係都好似冇咩感覺咁．．．尤其係12月31日果日，其實係我同老公相識五周年紀念，但係．．．我係好重視呢一日既來臨，因為對於一個女人黎講，將自己五年既青春放晒係一個男人身上，呢個時間真係話短唔短，話長唔長，但係，對我黎講，我真係好重視呢一日，大大話話五年，當中曾經經歷過好多野，有開心，有唔開心既．．．但係，點解人地好似冇乜特別反應咁？仲要咁o岩老公佢好病唔病，係正呢一日黎病，真係咩mood 都冇晒！唔同我琴日同老公講，希望有小驚喜，就係呢一樣？唔好卦？我寧願冇呢個驚喜喇，我只希望老公身體健康．．．五周年紀念，我夢寐以求既一日，竟然同埋d朋友一齊慶祝新年，而唔係我兩個人過既日子．．．什麼唔同左階段？我唔想，我仍想有屬於我兩個人既世界，因為根本呢個五周年正正係屬於我地既五周年，點解要與人分享，仲係要人地唔知道你係同佢一齊分享緊你既所謂喜悅？？

唉！唔知呀！突然有好多感受，好唔識形容，不過唔開心既多．．．可能有人表現得唔重視呢個相識五周年卦，所以心情特別Down．．．雖然，老公係病左，之但係．．．我真係覺得好悶，好冇心機，覺得唔知自己係度為乜野．．．？足足五年．．．？？其實，新既一年係咪應該開心去渡過架呢？我唔知，我真係唔敢去期望d乜野，只係而家我好concern自己既感覺，真係好難受！！點解？永遠都要我去做主導？一心買蛋糕返黎，希望同老公一齊慶祝五周年同埋新年，但係點知又咁o岩老公病左，仲係要同人地去分享”喜悅”？．．．我好唔甘心，點解？成日要我做主導，但係咁又點？結果？？？冇人欣賞，理解，明白，在意，著緊．．．真係突然間好心淡！！

平淡真的是福嗎？我成日問自己呢個問題．．．我唔知道，我只係知道，而家呢一刻，我唔只渴求平淡，我希望既係好精彩既一生！！我唔敢盼望跟住落黎果五年會點，因為我唔敢想像自己會否可以過多五年既平淡日子．．．唉！神呀，求你比d啟示我啦，讓我知道我應該點做！其實我係過份著緊，定係其實係點呢？

唉！而家個人真係好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶好悶．．．．又訓唔著，但係老公已經呼呼入睡左，一切都好寧靜，只有我自己一個人去承受痛楚！聽日，又要去應酬一班自己唔鍾意既人喇，唉，又為乜呀？為乜？？？一班我最討厭既人！偏偏要阻住我既生活，去路．．．好憎呀！點解老公永遠係朋友最先，我？都唔知係佢心目中有幾重要？排第幾？？？？同班朋友去we we wet wet佢仲開心過同我一齊，更加唔洗講什麼慶祝幾多周年啦．．．？可能係佢心目中，呢d什麼周年紀念已經唔係一回事，只係對我既一種應酬吧！但係，男人永遠唔會感受到一個女人為佢付出既一切，包括青春，思想，行為，態度．．．佢地只會覺得係老鳳，係應該，唔做係我地女人唔o岩，而唔係男人既問題？？神呀，點解世界上有呢d咁唔公平既事架？？而家係極度傷心，唔開心．．．有時真係諗，同家人一齊既生活，可能比起同佢一齊更愉快！真架，起碼我可以做番自己丫．．．

>>December 31, 2003 at 5:43:02 PM GMT+8

2003 年 12 月 27 日 星期六 【晴】

唔，今日同班天使社群去左大嶼山既大佛，其實．．．真係幾悶．．．學媽咪話，呢d地方去一兩次夠，去多幾次你都怕悶．．．真係好無聊！

不過都唔係太差既．．．起碼可以同班義工一齊傾下計，玩下嘛！

>>December 29, 2003 at 1:57:33 AM GMT+8

2003 年 12 月 26 日 星期五 【晴】

唔，今日要返工呀，心情冇乜特別，但係又唔多想做野，因為仲有holiday mood嘛！

>>December 29, 2003 at 1:55:46 AM GMT+8

2003 年 12 月 25 日 星期四 【晴】

哈，今日都冇乜特別咁過左個boxing day！起身之後，就同老公去左做元氣，跟住就搭西鐵出左荃灣行左一陣街，跟住就同老公去買左一箱紅酒．．．又幾抵幾，六支都唔洗六百蚊，仲送埋一套紅酒用具套裝，都幾靚架．．．雖然我唔多鍾意老公成日飲紅酒，因為我好怕佢有日會上左癮，變左酗酒就死喇．．．不過，難得佢又搵到一樣同我爹地特別夾既話題，我又好難叫佢地兩個男人唔傾計既，因為話晒都關乎我既終生幸福架嘛，係咪？

講真，琴日同老公嘈起，關於佢試過食雪茄既問題．．．其實我係十分十分十分之唔鍾意，我仲好憎我老公果個所謂既好兄弟，如果唔係佢，邊個教壊我老公丫，所以由始至終我都係咁憎佢，果條咁既友仔，成三十歲人，一事無成，成條大滾友，溝完一個又一個，食煙飲酒就唔在講，成日返大陸，都唔知同埋咩人一齊．．．唉！我老公識著d咁既人，你都咪話我唔擔心呀，我真係好怕教壞佢，我每次知道老公又跟果個人去玩時，我真係好驚會出事，又好擔心唔知佢又教壞老公乜野．．．唉！不過冇計，唔通要老公同佢絕交咩？冇可能既事啦，因為老公有權去選擇自己既朋友，我又有咩權力丫．．．唉！咪只有擔心擔心囉．．．

>>December 27, 2003 at 12:59:28 PM GMT+8

2003 年 12 月 24 日 星期三 【晴】

今日聖誕，訓醒果時已經成兩點幾，鬼咩，咁晚咁夜訓，差不多啦．．．今日都同樣無聊，同左幾個朋友出去旺角行下街，食下飯，傾下計咁，後來都係悶得滯，上左去個朋友屋企度，本身諗住開台，但係都冇開到，都係係度睇dvd．．．哈，睇果套”大丈夫”，好好笑喎，極度推薦好睇呀！睇完之後都已經成點幾喇，加上個朋友聽日仲要返工，咁無理由阻住人休息架，咁都要走囉！返到去屋企，老公就係咁打電腦遊戲，咁我就梗係訓覺啦，好累呀！不過好開心，因為今日老公佢送左份聖誕禮物比我，係兩件衫黎既，佢親身揀架，所以好開心，好鍾意！

>>December 26, 2003 at 6:19:16 AM GMT+8

2003 年 12 月 23 日 星期二 【晴】

唔，今日係平安夜，希望個個朋友都會平平安安咁渡過今晚啦．．．

今日一放工，就同同事一齊係中心玩聖誕party，好開心，d野又好好食喎，仲有禮物交換同抽獎添，haha~ 雖然禮物並非十分豐富，但係最緊要係開心嘛！party去到中途我就走下場喇，去左老公個朋友既屋企度燒野食，果個人住村屋既，所以可以玩得好盡興，食完野大家仲係天台睇星傾計，都幾開心架，不過就凍左少少咁啦．．．

咁就過左個平安夜喇，真係平平安安囉，一d野都冇發生，好平靜，好悶咁過左．．．

>>December 26, 2003 at 6:15:38 AM GMT+8

2003 年 12 月 21 日 星期日 【晴】

哈，今日有日假放，真係好．．．難得係可以同爹地媽咪一齊去吉吉島果邊行街，順便買埋爹地份聖誕禮物（爹地自己揀會好d既，因為唔怕會買錯野嘛！）

唔知發乜癲，今日我又咳到死，唉！可以能琴晚做冬果時係酒樓食左成大碗紅豆沙喇．．．好慘！諗住食下野，都攪到咁．．．

唔，聽日又要返工，唉！呢幾日都會係holiday mood架喇，邊有心情做野架？不過又唔係冇野做喎，真係！

仲有呀，本來諗住同幾個朋友聖誕果時上去其中一個朋友既五星級的家（碧桂園）架，點知唉，真黑仔，買唔到車飛呀，而家攪到冇得去，真係唔開心，而家都唔知聖誕去邊玩好喇．．．好冇癮，加上已經放得果兩日啦，都冇野好玩，好冇心機呀！

>>December 22, 2003 at 3:34:54 PM GMT+8

2003 年 12 月 20 日 星期六 【晴】

今日我真係走左去試搭西鐵返工，首先搭輕鐵去屯門站，然後再搭西鐵，嘩，好正，原來時間真係快少少，而且價錢又少左，因為而家輕鐵轉西鐵，輕鐵果程可以免費呀，唔，好親佢而家咁抵，我又可以慳番時間，所以決定而家都開始搭西鐵返工喇．．．

唔，今日係我自己屋企做節呀，叫埋老公，二舅舅一家黎．．．我知老公唔多鍾意二舅母架，所以其實當初叫佢黎時我都有少少唔知點好，初時諗住呃佢話二舅母唔黎，但係我知咁樣到時佢知道會仲嬲，所以最後我都係將事寊講佢知，比佢自己決定．．．後來，佢真係唔想黎呀，唉！我就同佢講，我希望佢可以黎，所以，佢最後都話黎．．．我知佢其實真係唔多鍾意，係抱住黎應酬我既心態．．．不過唔緊要啦，其實講真，有時我真係幾嬲．．．佢既親戚朋友我就要見晒，點解你唔可以見下我既親戚朋友呢？好唔公平，而且咁樣逃避亦唔係辦法，何不面對佢呢？其實，我要讚下老公佢，我知佢今日個人好累，成日做野，已經冇乜心情同心機，但偽都肯陪住我食飯，仲可以好大方得體咁應對，真係抵讚，因為佢真係好肯努力，我知佢係比個心出黎去嘗試，而唔係只希望去敷衍我，我知架，我知老公係想嘗試，希望我冇估錯啦！

>>December 21, 2003 at 4:48:22 PM GMT+8

2003 年 12 月 19 日 星期五 【晴】

今日淨係返早，所以好開心．．．好耐冇試過放早喇，呵！

跟住就好開心咁同個朋友仔係港大度映畢業相．．．雖然天氣都幾凍，不過玩得好開心！今次係我第一次去港大．．．感覺．．．好舊，冇乜特別咁，不過都幾有古典氣息既．．．

映完相之後就去左老公屋企同佢家人食冬至飯，仲同佢家姐兩隻狗係咁玩，好開心呀！後來，因今日西鐵通車嘛，所以身痕去左搭！首先係觀塘搭地鐵去美孚，跟住轉西鐵，再去屯門站，再轉輕鐵返屋企．．．唉！真係笨實呀，時間不但比起在觀塘搭巴士返去慢，仲要貴好多，真係．．．下次咪攪喇．．．不過，我計落，反而我返工搭西鐵又好似應該會快，所以我決定聽日返工時試下．．．

>>December 21, 2003 at 4:41:46 PM GMT+8

2003 年 12 月 18 日 星期四 【晴】

嘩，今日返工好似好冇心機做野咁，只係係咁易打左幾個case recording同埋close case之外，總括來講都係做埋d無聊野．．．唔知點解今日冇乜心情做野，可能老細兩日都唔係中心卦．．．

哈，今日唔知點解發神經，走去執房既衣櫃，嘩，執左好多衫唔要架，講真，舊既唔去，新既唔黎既，係咪？所以點都要執一次架喇．．．唔知啦，執果時好鬼死開心架，可能有少少傻，係咁唔要唔要．．．哈！

唔，我聽日有個朋友會映畢業相呀，呀，聽日咁鬼死凍，點映呀，真係好揀唔揀，揀埋d咁鬼死凍既日子．．．不過冇所謂啦，最緊要開心嘛！

>>December 19, 2003 at 1:58:53 PM GMT+8