2003 年 11 月 25 日 星期二 【晴】

今日約左個好朋友仔出黎食飯，真係開心．．．我地分享左好多自己既近況，同埋講左好多我地工作上既不愉快同壓力．．．唉！我地呢一行，確實令人煩悶，點解每一日返工都好似打仗咁呢？每日返去都要擔驚受怕咁，好怕會有事發生，無時無刻都係度stand by定 ，要處理大大小小既事情．．．

唔，有時候，真係諗番，究竟自己為乜，究竟自己係度做緊乜野？好矛盾．．．人地睇落你好似好誇張咁：嘩，洗唔洗呀，唔見左個女仔，唔洗通宵達旦咁走出去搵番佢嘛，報警咪得囉，人地阿媽都未理啦，你做乜理佢o者？．．．呢個正正係我地既工作．．．

有時好多人都會誤會我地既工作，以為我地日日同d靚仔傾計，以為我地帶d靚仔去camp就係玩，仲可以問：你玩得開唔開心呀？好唔好玩呀？咁．．．有時都幾嬲，因為我根本唔係去玩，我係做野！

不過算啦，我覺唔洗理人點睇，最緊要係自己點睇自己既工作就得喇．．．

>>November 28, 2003 at 3:53:14 AM GMT+8

2003 年 11 月 23 日 星期日 【晴】

哈~ 今日終於係老公既生日喇．．．真開心！我琴晚整左好耐，終於完成左我今年整比佢既生日蛋糕！真係好比心機去整架，因為初時都失敗左，後來先成功，所以特別珍惜！

今日本來諗住等老公放工後，同佢去黃金海岸食大餐，然後兩人浪步沙灘，跟住先拎個蛋糕出黎，等佢驚喜下．．．點知．．．老公今次竟然想多d人同佢慶祝喎，所以最後去左我屋企食飯，跟住成家人同佢一齊吹candles，切蛋糕咁囉．．．不過都好開心既，中途我地都有踩左架單車落去屯門碼頭海皮果度拍下拖架，不過後來因為我架死人單車車tie唔夠氣，所以好無癮囉．．．不過算啦，最緊要係老公佢開心！

希望佢鍾意今年既生日啦．．．祝佢永遠開心快樂！

>>November 25, 2003 at 5:13:19 AM GMT+8

2003 年 11 月 22 日 星期六 【晴】

哈！聽日係老公仔既生日呀！我先幾日終於送左幾份禮物比佢，佢都好鍾意d禮物，都好滿意添．．．好在佢鍾意，因為我之前都好頭痛，都唔知送咩比佢好，但係好在我平日夠細心同留意佢，咁先知道佢近日需要d咩野咋．．．唉！做人老婆真係甚艱難架！

聽日係老公生日，我梗係要好好準備聽日同佢慶祝啦，我好在撞正放例假，咁就可以預備一下喇．．．當然會有驚喜啦，係咩野？唔講啦，到時佢未知囉！hehe~唔，好期待聽日既來臨呀！希望老公佢會鍾意我為佢安排既小驚喜啦！

>>November 23, 2003 at 2:50:02 PM GMT+8

2003 年 11 月 21 日 星期五 【晴】

今日去左幫個朋友手搬屋，嘩，簡直死人，我地一行七個人，都搬到死死下．．．不過好在後來都好成功！我個朋友既中搬入佢既高尚住宅，真係有＄．．．不過個新居真係好正，落地玻璃既無敵大view，雖然對住條馬路，但係市區黎講都唔錯喇，起碼都係自己一手一腳建立既自己屋企丫．．．

唔，唔知我幾時先可以有自己既dream house呢？講真，供樓喎，少野咩？係揹足大半世，成廿五年既債黎架，冇咁上下既穩定環境，真係都唔到我去諗呢d野！唉！

>>November 23, 2003 at 6:41:25 AM GMT+8

2003 年 11 月 16 日 星期日 【晴】

哈! 今日同d同事去食lunch時，傾開一個好好笑既問題．．．就係關於近日叱吒一時既南生圍鱷魚事件喇．．．

其實呢件事除左成為香港人既熱門話題外，亦成為了我中心一班仔仔女女既熱門遊覽地點！由於佢地住元朗區，所以去南生圍係好方便既事，以我所知，有好多人已經自己去過果度睇鱷魚喇！不過好笑，我有一個仔有次自己一心去睇鱷魚，但係最後卻盪失左路，真係．．．攪笑！

講真丫，果條捉鱷魚既茂利，捉黎捉去都攪唔掂，又話自己幾咁叻捉鱷魚？哈，我話佢係叻，捉果時梗係成個湖有成幾百條捉，所以咪易捉囉，而家得一條咪難捉囉！之但係其實，佢黎香港我相信佢係另有目的．．．就係想黎香港自由行喇，順便shop埋，唔洗得登黎，加上每日佢都有＄收既，簡直係浪費香港政府資源呀！

另外，有個噩耗，我中心將會於04年1月1日開始，會減人工喇．．．好慘！各位，到時記住要睇住小妹呀！好窮困呢！

>>November 19, 2003 at 2:18:36 AM GMT+8

2003 年 11 月 14 日 星期五 【晴】

唔，各位，小妹好耐冇寫過日記喇，今日再寫番真係確實有少少慚愧喇！

唉！呢幾日好辛苦呀！因為先兩日帶左班伴你仔去左行山同訓練營，嘩！我咁大個女都未試過行一個山個傾斜度有起碼有成五六十度既山架，嘩，一路落山時，真係好辛苦，隻腳不斷係度震，好痛，好攰！仲有，班死仔簡直係生番，攪攪震，我成晚都冇訓度呀，就係要睇住呢班仔！唉！真係年紀大左喇，冇以前咁好魄力囉，而家去行完個山，帶完個camp之後，成個人好似散晒咁，又周身骨痛，最痛係對腳，酸軟到爆，行都行唔郁，尤其落留梯就一定死得！唉！仲有，唔訓一晚，個人殘到嚇死人，真係阿媽都唔認得呀！

不過冇計啦，我呢一行，尤其做青年服務既，少不免都有呢類型既活動架喇！不過其實自己都好享受呢類既活動既，有時候可以同大自然融為一體，真係好開心架！

今晚返工好冇mood做野呀！一來老細唔係度，二來真係唔多想做野，所以都係度諗緊d無聊野囉！好煩惱呀，因為老公仔就生日喇，又唔知點同佢慶祝好，又唔知買咩比佢好，好想比驚喜佢，不過又唔知點好，好頭痛呀！唉！仲有兩個星期佢生日喇，點好呢？好煩～

>>November 15, 2003 at 2:36:42 PM GMT+8

2003 年 10 月 22 日 星期三 【晴】

唔，今朝同老公仔傾完我而家既壓力，真係好唔開心，我喊左好耐，但係．．．唉！老公佢叫我既然咁樣，不如轉工，佢鼓勵我，話我並唔係咁差，只係有時遇著一d唔適合自己既野o者，而唔係我既問題．．．其實，我真係唔甘心！我就係一d死唔肯放棄既人，一日冇結果，唔知誰勝誰負，或者唔係要我衰到貼地既話，我都一日唔肯認輸．．．唔知呢d叫倔強，定係死撐喇，總知我只知道，我好唔甘心，我仲想比機會自己去試試，去闖闖，唔想咁快下結論，話自己唔得，以唔適合為藉口．．．其實，講真，每份新工，裡頭總有一d你從來未接觸過既事同物，如果下下都話因為唔適合而中途放棄既話，我會好唔甘心，同埋死心囉！係，我承認我係思考方面可能唔係太叻，可能有時候觸角都比較慢，但係我相信時間可以改變一切，我相信總有一日會成功，是乎你肯唔肯放時間去比自己去嘗試，比機會自己去失敗直至成功！唉！話雖如此，有時候人就係要同時間不斷競賽，老細要既係成效，效率，睇stat.，而唔係睇你比左幾多心機，幾多精神去做，佢只係要睇個結果，你做成點，仲要快靚正添．．．唉！唔知呀！而家好混亂，唔知點好，你叫我轉工咩，我又好唔甘心，你話份工既性質唔o岩我咩，我又覺得又唔係咁嚴重．．．總知就係，我而家唔想放棄，仲想比機會自己去試，唔想咁輕易轉工住，因為我對於呢份工仍有一絲既期望係度，而且我又好enjoy同cleint一齊，真係唔捨得放棄佢地架！

唉！好煩呀！神呀，你比d啟示我啦，我應該點好呀？真係好大壓力．．．其實同老公傾完之後，我而家諗既野仲多左，仲多左顧慮，壓力仍然存在．．．唉！好辛苦呀，真係有d想去死，唔係講笑，真係死得出！好灰．．．．好心淡．．．天呀！

>>October 23, 2003 at 4:22:20 PM GMT+8

2003 年 10 月 21 日 星期二 【晴】

今日咳到要死呀，琴晚真係差d阿媽會文我去急診室，只係我死都唔想去！我當時係咁喊，真係好驚，我不斷係度氣喘，好似死去活來咁，真係好似就黎死咁，好驚呀！我唔想死住．．．

唉！好唔開心呀! 我老細簡直唔係人黎架...今日收到佢send比我既一個msg, 話因為12月唔夠人手, 所以唔會批我al....我而家根本都未遞假紙, 都仲未有任何風聲出左去話我會諗住放假, 佢就一早咁樣封殺我? 痴線架, 人黎架...神又係佢, 鬼又係佢啦, 又話我地contract staff係上半年要拎at least 11日al, 而家我都唔夠數, 咁即係玩野o者, 我下半年點有時間可以放得晒剩下d假呀? 好似仲有成16日al未放呀! 我地contract staff係唔可以儲假架嘛, 如果放唔晒又唔會補水喎, 咁即係罷明大晒o者, 我唔理呀, 佢12月唔比我放, 我下半年點都會拎番...我唔理喇...有病架... 而家蝕到暈啦, total我都係拎左6日al咋, 又唔借拎得多, 做乜唔比我放喎, 其他人又唔係contract staff, 有得儲假既, 又放人地...咁即係罷明偏私o者, 咩老細黎架, 咁樣點可以得民心呀? 痴線! 咁多人可以cut假, 係要cut我? 我又唔係放得密, 大把人仲密啦...點解係要開我刀? 我得罪左佢咩?

唉！我近日工作好大壓力呀, 成日好怕又做錯事, 好怕又會好似上半年咁, 毫無進步...好驚呀! 我真係要諗下可以點喇...唔可以再衰喇, 不過真係個人好tense, 攪到自己又舊病復發, 成日氣管唔好, 唉! 你估我自己唔擔心自己咩, 但係又可以點丫, 又有邊個可以同我分享到丫...講真, 係工作之中, 雖然大家都冇正面既競爭, 但係確實係明爭暗鬥緊, 一句講晒, 互相利用囉, 有幾多個真係對你真係真心架? 真係拎個心出黎同你交往丫? 唉! 有時候都幾心淡, 好似呢個世界好似咁灰咁既? 想活得精彩咩, 過程總係有所阻礙, 真係無完美呢個字可言....??? 工作又將會每個人一生中好重要且不可放棄既一個原素, 但係人往往會係工作之中有好多感受同經歷, 點解? 唔明白! 可能好多人都會認為: 唔係丫, 人可以係工作中得到好多滿足感, 或者成就感, 係一生中不可缺少既一環....係, 我同意, 但係如果工作得不愉快, 咁有幾多滿足感, 成就感又如何? 值咩?

唉! 或許我真係諗得太多, 諗過火左...或者我而家呢一刻, 反而要為自己而諗諗...要好努力咁, 令自己打穩陣腳先, 改善自己既問題...不過, 我真係好驚, 好擔心自己會做唔到, 或者會做得唔好...有好多人同我講, 唔好比自己咁大壓力, 唔好咁高要求, 但係有時候, 唔係自己迫自己, 而係人地對你既要求唔低, 不斷去壓迫你, 而唔係你自己攪到自已咁...唉! 冇架, 老細就係大晒啦, 一句no, 乜野都唔成事啦, 講乜丫, 或者終有一日如果自己做到老細時, 可能就會明白...

冇既, 而家訴完苦之後, 咁又點呢? 或者有多少少人會了解我多d, 又或者可能有人會同情一下我, 點解會有個咁既老細, 咁又點呢? 唔洗做咩? 劈砲唔撈呀? 可以咩? 坦白講, 工作為乜呀? 為兩餐o者! 有幾多人真係希望可以從工作中得滿足感? 尤其係香港人, 現實就係要生活, 除左自己, 仲要養屋企人, 咩住周人債, 唔知幾時先還清...! 但係, 真係好諷刺! 其實為有啖飯食o者, 點解反而成日就做野做到食無定時, 甚至冇時間食飯呢? 真係極度諷刺...!!! 有時候, 真係諗, 為乜呢? 係中心, 地位冇, 經驗冇, 學歷冇, 權力冇...咁可以點呀? 為有啖飯食o者, 都唔得...真係可以點呀? 人生仲可以有咩精彩可言? 好灰....



>>October 22, 2003 at 1:30:25 PM GMT+8

2003 年 10 月 20 日 星期一 【晴】

嘩！好辛苦呀！我琴晚又咳喇，今日係咁咳唔停咁，後來食lunch時都去左睇醫生，點知條牟利醫生成個阿伯咁，仲手震震，口震震咁，真係驚左佢．．．佢d咁既藥呀，食極都唔好架，食左等如冇食，食左都係咁．．．真衰！仲係唔平架喎，成百六蚊．．．西菁街果邊果間靚仔醫生就唔同喇，又平，個醫生又靚仔，d藥又幾好．．．唉，如果唔係唔夠時間，我走左過去啦！

而家攪到係咁咳，仲喘氣添，好辛苦呀！真係好驚第二日變成哮喘就死．．．

>>October 22, 2003 at 2:40:44 AM GMT+8

2003 年 10 月 19 日 星期日 【晴】

今日同樣係工作又工作，所以都係冇咩特別啦．．．日日做到無停手！

>>October 22, 2003 at 2:36:47 AM GMT+8