2004 年 6 月 1 日 星期二 【晴】

嘩，有野睇

2004 年 5 月 30 日 星期日 【晴】

今日…..悶到拎返
d 舊書出黎睇….有個
web site 喎，改睇。好o岩我睇o既web
site    

http://www.wanhoi.com/servlet/template

睇到返工，嘩！份卷變到咁長o既…..傻架？做左三份，今日完全無得偷懶，good
day！有個香港麥小姐，超好人！會長已經出左名好人架啦，佢好過我一萬倍。我好衷心多謝佢：「唔該晒你呀，唔好意思呀，阻左你咁多時間，(29分鐘)
」，佢仲話：「唔好咁講。不過份卷真係好難答…」佢完全無留難過我，仲非常合作，實在太好人喇！佢令我成晚都好開心。

好肚餓，去買野食
lu~ 嘩，好多野食呀

耶和婷：「為食的人有福了，我實在的告訴你，我買的零食足夠養活一千人。」

嘩，得返二十分鐘乍….

2004 年 5 月 29 日 星期六 【晴】

今日訓到一點先起身，真係墮落！

下晝無線又如常咁播埋晒 d 爛片─辣椒教室。上次都係o係無線睇架，睇完之後搵過好多間舖都搵唔到，今日又有得睇，好野，Mark Lui 好型呀！

雷頒德如常好型咁散發住佢o既才氣，殺死人。套戲一 d 都唔好睇，好睇在有雷頒德，戲入面有幾首雷頒德唱o既歌，無出 sound track，所以我想搵 VCD。

今日係會長大掃除日，我丟左好多野，一 d 以前死都唔肯丟o既野，今日都清左部分。拖地，整豆漿.....

沖涼，特登整到自己好熱，為左沖凍水涼。

原來亞恆都會去 MYO 個北京個 tour 架，唔通佢係 MYO member....？
佢唔同我講佢個 recital o既時間，係咪唔想我去呢，咁我係咪應該扮唔知呀？

買左一大包泡菜，好野好野，一食就停唔到。

我正式宣佈，妳唔再係我好朋友！一個出賣我o既人，我絕不原諒。

嘩，兩寸 x 一寸大飛蛾，嚇死人，叫家姐起身捉左佢。家姐好英呀，用膠袋套住隻手就捉左隻野。好犀利呀。我一見到隻野已經嚇到傻左，o係書檯一跳就跳左上床，極速用張被包住晒自己，再向家姐求救。我好滿意自己閃得咁快。第時要定期演習下。

>>May 30, 2004 at 4:26:03 PM GMT+8

2004 年 5 月 28 日 星期五 【晴】

好開心呀！今朝一早起身，本來係想 check e-banking 架，但係又突然諗起不如睇下 CCIV 有無位先啦，嘩有五六個位...我 add 到我o既 second choice，立刻打電話叫醒 Tim 同學 add，佢電腦 start up 好慢，add 唔到，不過好快之後，佢就 add 到喇，全靠我叫左你起身乍~哈哈哈哈，好野，大家都有 CCIV 讀

今日孤單咁去練 band….入 lift，弊，我唔知幾多樓，我記得有個四字，試下十四樓先，唔係喎。落十二樓又睇下，又錯，好恐怖呀，周圍都無人o既，我驚呀，落返大堂打比 Tommy 問….無人聽。
護衛可能o係閉路電視見到晒，佢問：「小姐，你去幾多樓呀？」
會長：「(傻笑)，我唔記得左呀。」
護衛：「咁你去邊個單位呀？」
會長：「唔知呀。」
護衛：「咁做乜野架？」
會長：「樂團黎架。」
護衛：「哦，四樓呀，四零六，出 lift 轉右再轉左呀…」
會長：「唔該晒唔該晒。(你洗唔洗咁詳細呀？笑我咁話啦？)」，《Sunrise Rhapsody》，頂！心理變態架？數拍子數到精神錯亂….兩三個 bar 就轉拍子….rest十六個 bar…一二三四，二二三四，三二三四..…..…十五二三四…停？咩話？就到喇喎，唔理呀，照吹

關 sir 指到青筋暴現…..我吹到心灰意冷…..

去麥記食宵，今次多人過上次。d 員工已經有晒心理準備，從容不迫….上次大叫o既收銀姐姐今次話：「死喇…..炸薯條先….」
會長：「不如我地唔好叫薯條囉…..哈哈哈。今次幾好丫，睇黎佢地開始適應我地喇」
Crystal：「不過可惜丫，當佢地適應左，我地下星期又唔黎食野喇….」
因為中學o既隊員開始準備考試，我地唔夾 MYO 兩個星期，哈哈哈哈

Seating plan 出左喇，我坐73號位，靠台邊第二行，同….Hamker 坐……林先生你玩野呀？唔得呀！編過呀，我要同莊庭浩或者大舊坐。
陳子恆說：「算啦Hamker 係好人黎架。」
會長：「我知，不過我唔係呢。」
哈哈哈，我坐 bass 2 第一行最邊o個個。
Tommy：「the one sitting at the outermost seat is the best player in that row，it's a RULE in the orchestra，大前題：前 d 勁 d，次前題：出面 d 勁 d。this is also for hong kong's reputation，
people better see your beautiful face instead of hamker's...」
好笑，不過開心。我知林先生唔係因為以上o既原因而有咁o既安排，不過唔緊要啦，我最鍾意坐邊位，因為觀眾見到我，我見唔到佢地，無咁緊張。

>>May 29, 2004 at 5:02:49 PM GMT+8

2004 年 5 月 27 日 星期四 【晴】

今日見識到 Tommy 部新相機，二千幾蚊o既閃光燈好好玩呀，好似扭計骰咁，可以拎黎拎去。

去食韓燒，食食食，飽 lu。仲趕得切去睇《明日之後》，好睇。劇情緊湊，又無《受難曲》咁大壓逼感。每次睇災難片都係o個句，如果我遇到同樣情況，我未必會逃生，我好驚前路茫茫o既感覺。《明日之後》片中有一幕係選擇留o係圖書館定向南方逃生…. Tommy話：「如果當時你同我一齊，我就一定留o係圖書館，因為你實會話：『哎呀，我好”支力”呀，唔行呀，無力喇…..』，你一定會係咁。」係呀，我係架….

去維園睇「愛心熊」，我見到遠處有舊大黑雲….
Tommy：「o個度一定係落緊大雨。」
會長：「我唔覺有喎，我從來都無試過見到附近落雨，但自己上空無落雨架…好想見下。」
隔左一陣大黑雲已經去到我地頭頂….
會長：「我都話o個度頭先無落雨架啦…..不過而家呢度開始有少少雨，(雖然只係雨粉，我都開左遮)」
又隔左一陣，Tommy：「你聽下，雨聲呀！」
會長：「廢話，我頭先都話落緊雨架啦。」
Tommy：「唔係呀，雨聲呀，好嘈呀！」
我地一齊拎轉面，一齊大叫：「嘩！好大雨呀！走呀…..」當時我見到十幾米以外落緊超大雨，好 surprise！d 雨好快咁向我地移近，我地就衝向十幾步以外o既臨時帳篷，我地一踏入帳篷，幾乎同時d 雨就去到我地頭頂，好刺激呀！好好玩。當我地好乾爽咁講緊我地跑得快過 d 雲，其他遊人就陸續濕住咁衝埋黎。

繼上次零晨一點幾o係塘福沙灘同潮漲鬥快跑埋岸，今次又係好難忘o既經歷。

自己返屋企，太八掛，見到人地o係馬路踩單車跌左落地，一路望一路行，結果我就跣親，不過未跌低，我都係想睇下佢有無事o者….

返屋企即刻沖涼，乾淨返晒。敷 mask，一走出廳，大門竟然開住仲有一堆人sell緊有線電視，比人見到晒…..可惡

>>May 28, 2004 at 4:25:15 PM GMT+8

2004 年 5 月 26 日 星期三 【晴】

去補牙，一去到，家姐好灰，佢o岩o岩無故比 Tutor 鬧完，又遇到個無禮貌o既姑娘，佢話自己今日好黑，會長安慰說：「你約到我已經好好彩啦....(趁佢個 Tutor 未到，我就開解下佢)，我尋晚發左個低能夢，我夢見我地得罪左 d 黑社會大佬，比人追殺。於是我同家姐逃亡到美國，去到一條起碼有八十五度o既斜路，今次無誇張架。路旁有好多人體殘肢，有人話：『上次有個人碌左落去，散開左四份呀。』.....d 黑社會人又追到附近，我地去到一堆雞仔度扮雞仔，就避過左佢地o既耳目喇，當時我地真係雞仔黎架，我當時仲諗點解我地可以扮到咁細隻....」家姐笑返喇。

補補補.....個頭好痛，今次補門牙，個口可以細 d，我補到訓著左，淺睡而已。拆個架之後發現面上有一條好深，好明顯o既縐紋，因為落左麻醉藥？定因為擘大口近兩個鐘？好可惡，家姐話：「只怪你 d 皮膚唔好啦。」佢最後都 pass 左，全靠我乍~

去練 band，我想吹細琴。C Poon 想吹 bass。
C Poon：「關 Sir，我想吹 bass。」
關 Sir：「....(望去第二度).....」
Crystal：「關 Sir，肥仔可能會返黎吹 bass 喎。」
會長：「(好大聲咁講)，嘩，咁 bass 咪好多人？好似太多喎.....」
關 Sir：「um......咁就由 gela 幫手吹 tennor 啦....」
會長：「(唔係掛)，我無 tennor 琴喎...」
關 Sir：「咁不如幫手吹 second 啦。」
會長：「(成功！)，好呀好呀...」
關 Sir：「不過都係用tennor 琴喎，(佢個樣好奸呀！)」
會長：「唔緊要，完全無問題...」

Super 64 X，哈哈哈哈

下次唔洗拎咁大個琴返去，好野！
噫？Arthur 小朋友都o係度。

Tommy：「做咩o係份譜度寫晒名咁呀？咩意思呀下？」
會長：「私有化囉，咩呀？」
大笑....
Personalization.....Angelaization....

Deut 隊名：Famous flower and Owner

>>May 27, 2004 at 3:53:27 PM GMT+8

2004 年 5 月 25 日 星期二 【晴】

今日一早起身去大家樂食早餐，好眼訓。最衰都係 Tommy 啦，佢累我遲左返 band。想死呀？ 有morning call都遲到。好彩只係遲左兩分鐘，仲早過關 Sir好多。

難得我咁乖帶個 clear folder 載譜，個個都話我個folder反光，要買過，真係 discouraging呀！好，我今晚就整份La La 無敵譜！

成日練分部，太無聊，用「寶貼」整左個助理指揮 ─ Mr Soft。我記得我上年都練過呢幾隻歌，但今年硬係吹唔到，原來我之前吹 Second 架，做咩要我吹 Bass 喎，成日要帶住個咁重o既琴，好辛苦家嘛！不過算啦，我鍾意咁多人一齊吹 Bass。

可惡，無人話過比我知有邊幾場 concert，你話以我o既性格，會唔會去睇丫？廢話！訂左飛先問我同唔同你去，你話以我o既性格，會唔會去丫？

返屋企訓晏覺。自從兩日前我阿媽下令唔準開電腦超過一點，我日日十二點左右就訓，仲對打機提唔起興趣，真係慳返唔少時間。點解今次會長咁順攤咁聽話呢？因為覺得一點係好合理o既時間，仲有就係我乖。

今日食會長最愛o既菲律賓芒果乾，好好味呀，真係滿足！而家聽到屋外有BB仔喊聲，好干擾！不過我好想同佢玩，聽佢把聲，我直覺佢係好得意o既。

返工，好悶呀！放工，好野呀！

今日就咁完左喇。

聽日要取消剝牙，因為家姐要考試，但搵唔到 patient，嗚嗚嗚，會長受難曲….

>>May 26, 2004 at 4:29:28 PM GMT+8

2004 年 5 月 25 日 星期二 【晴】

對於樂樂o係 kchb.net的言論：-
對何東口琴隊的練習安排表示遺憾

實在忍無可忍, 不吐不快
請其他admins 唔好del post,
好讓其他members 參考

一, 練習時間有欠組織
經常話OT 就OT, 事先毫無通知,
話黎就黎, 更甚者假期都要練習,
少少私人時間都冇, OT 冇話唔得,
但係o係12-13 小時前才通知就有少許不近人情
又為何之前沒有人即時通知我們?
亦是我們不滿之處, 實有不被尊重的感覺

二, 何東口琴隊部份隊員練習態度散漫
這是我最看不過眼, 當我坐在何東音樂室練band,
其他鄰近何東同學經常發夢, 關sir 叫極都照發夢
他們(某些人)連入左都唔知, 咁樣點叫我提起勁去練習

三, 無名"英雄"
我們花這麼多時間去投入練習,
一星期練足3 日, 放學連功課都未完成就飛去練band
我們沒有任何報酬, 連交通費都冇, 亦得不到別人的掌聲
我們完全是自願, 挨義氣,
我們不需要任何報酬, 只需要少少尊重
少少選擇權利而已

會長有以下回應：
我好欣賞樂樂敢企出黎表達不滿，我非常同意關 Sir 同 Miss Kam 完全無理過你地就快要考試，練習時間的確太多。
Tue：1800-2030
Thu：1800-2030
Sat：0900-1500，1930-2130
上星期六去麥當勞食野，豬展感慨地說：「我地練習時間就快變左麥當勞營業時間。」

至於大家o既練習態度…..我諗係寵出黎o既，講都無謂。

最後，樂樂，我都知你就快考試，要成日黎何東練野好辛苦，但作為隊長，你又逼住要黎，咁啦，我代表何東口琴隊請你食飯 ^_^ 丫，你唔好嬲啦~

>>May 25, 2004 at 4:20:34 PM GMT+8

2004 年 5 月 23 日 星期日 【晴】

今日有《新受難曲》上演，會長係主角….話說今日會長比牙醫陳 book 左，千里迢迢去 PP 比佢練補牙。會長一向好鍾意睇牙o既，我對牙醫有情意結架。

我今日終於知點解家姐咁難約 patient，佢地d 牙科助理 ─ 又稱姑娘，好暴力架。我未試過補牙補到咁痛苦架，個姑娘完全唔當我係有生命架！明明係佢殘暴，攪到我成口血，又屈我 d 牙肉發炎。後來家姐親自同我整，就完全唔痛喇。家姐幫我打麻醉針又完全唔痛，家姐係神聖架！我未試過打麻醉針咁舒適架。

City 個牙醫流架，佢明明話我無蛀牙，而家家姐發現我隻two-six同 one-six，即upper first molar，表面無事，原來已經蛀得好深，好在未穿 pulp。原來我 d 牙命途好坎坷架，首先，我有「梁氏小臼齒」，已經好不幸唔，係個個有架。其次，我 d 牙紋好深，易蛀牙。即係話我成日要睇牙醫並唔係因為我污糟。

家姐幫我搽左 d 牙紋防蛀劑，佢話通常只幫小朋友搽架乍。家姐話我 d 牙好大隻，姑娘笑我：「係囉，你 d 牙好肥，哈哈哈。」服務態度，哼！星期四又要去多次喇…..-_-

痛左咁耐，去麥當勞彌補下我心靈所受o既創傷。

>>May 25, 2004 at 4:17:58 PM GMT+8

2004 年 5 月 22 日 星期六 【晴】

今日睇返以前寫o既日記，原來我考 AL 之前唔係我記憶中咁懶架。反正得閒，我決定同 d 想了解我o既人分享下會長o既過去。

今日無返牛浸，係呀，我係懶，我認。如果個心唔o係o個度，個人去到都無用。
今日自己睇左《史力加 I》，《忘不了》。我已經想睇《忘不了》好耐好耐喇，完全無失望，兩個字，好睇！隻歌又好聽，比起睇《星願》用少左眼淚，不過《忘不了》更真實，更好睇。個小朋友，樂樂，真係超好戲。仲好得意添

《史力加 I》OK 啦，我家姐之前極力推介我先睇乍。

我已經領悟到 starcather 有咩用，同埋點維生喇，我真係叻

>>May 23, 2004 at 6:19:16 PM GMT+8