2004 年 6 月 11 日 星期五 【晴】

新 mon，同一型號。

>>June 12, 2004 at 4:08:45 AM GMT+8

2004 年 6 月 10 日 星期四 【晴】

睇左 "Piglet's Big Movie"，好好睇呀，豬仔超得意呀，哈哈哈哈，我要再睇！

去維園同愛心熊影相，本來話逐隻影，影影下兩隻影，又影影下就五隻、十隻咁影。Tommy：「不如我上中央圖書館影落黎，一次過影晒啦。」

>>June 12, 2004 at 4:18:37 AM GMT+8

2004 年 6 月 9 日 星期三 【晴】

返醫院拆線，而家所有姑娘都叫我做婷婷，當我o係度等緊佢叫名，竟然聽到「婷婷請入二號房」。以前 reception 個姑娘都唔係咁叫我架，今日佢聽到蘇醫生個姑娘咁叫我，佢又有樣學樣....真係放肆，哈哈哈哈。走........，一落到樓下姑娘打電話黎，上次個手術要返去覆診.....要即刻上返去照 X-ray，再約時間。十二月再 call 我....

去家姐介紹 o既 生記 買煎釀三寶，超抵，兩蚊三件，大小適中，一啖一件，哈哈哈。買左十五件，走人。出銅鑼灣食野...

食飽去隔離o既藥材舖買酸梅湯料，比錢....點解我銀包無散紙架？發現頭先買煎釀三寶o個時唔記得找錢喇.....我比左一百蚊，聽到佢話：「找九十....要唔要豉油呀？」咁我拎左煎釀三寶就走人.....死喇，買左一百蚊煎釀三寶呀。

Tommy 叫我返去拎....o係西環呀，萬一搭車返到去佢又唔比返我，咪連車費都蝕埋？！同埋我覺香港已經唔係剩返太多好人，所以想唔返去。但係Tommy慫恿下，咁我就返去喇。

返到去行一條超斜斜路，索晒氣，去到 生記 一開口，o個個小姐就話：「哦，一百蚊呀~？」隨即數返比我，實在太感動喇，原來西環仲有好人。

食糖水，黑店！

返到屋企，沖涼時...點解上面隻智慧齒o既遺址咁奇怪o既？lam下，發現原來上面未拆線...蘇醫生真係懵喇，哈哈哈哈哈哈哈哈哈~向家姐求救，佢懶訓，話過兩日先幫我拆。

>>June 11, 2004 at 6:17:17 AM GMT+8

2004 年 6 月 7 日 星期一 【晴】

返學，上 CCIV，我o個組得到會長o既庇佑，抽到可以做「茶事」o既 present，有三組爭住做呢個架。

我一路都擔心緊星期四要上 CCIV 去唔到醫院拆線，但係我又一路都唔願打電話去改期。不過改都無用啦，蘇醫生星期四先得閒，我逢星期四都要上 CCIV .....但係今日知道左原來今個星期四係唔洗上架，我仲要未打電話去改期，原來我擔心o既野，已經安排得好恰當，實在太奇妙喇。感謝神。

>>June 8, 2004 at 4:59:40 PM GMT+8

2004 年 6 月 6 日 星期日 【晴】

我傷日又爆左！

食晝，十二點九開電視，無線宣傳易某某桑拿廣告，有個扮客o既演員讚緊間桑拿點好點好......呢個人好面善，咁似大舊o既？係喇，一定係大舊假扮架，哈哈哈哈。唔好以為戴個假髮我就唔認得你喎，你逃唔過我雙法眼o既。識大舊o既人快 d 睇，一齊拆穿佢o既真面目。大舊就唔洗睇喇，你自己做過乜野，你心知肚明。哈哈哈哈哈哈，(人有相似，講笑乍)。

今日講野仲係痛，好唔想返工，但係又無人同我食晚飯，唔返工都無意思啦。訓晏覺，五點九起身煮米粉食。嘩，好趕呀....Tim 同學打黎講無聊野 ，收線，食食食，出門口，入到 lift 先知無帶八達通，又無散銀，仲有一分鐘架車就走喇.....逼住折返，落到去架車真係走左喎。行落天后搭地鐵，行得咁快，"支力"死人！仲早過平時返到公司。

第一個受訪者，好人o既九龍程先生(old age)，好好人。佢做左五分鐘，問：「小姐呀，做咁耐有無獎品架？」
會長以為佢想收線，暗叫不妙。「無獎品架，不過你比左意見，d 服務改善左，最終你都會得益啦。」
程先生：「得益o既係搵你地做野o個間公司o者。」
會長：「d 服務係提供比你家嘛。你反正都比左錢，梗係想有 d 好 d o既服務啦.....」
程先生滿意地笑了，會長捏一把冷汗。大概問左三十分鐘，完成，佢最後話：「問咁耐，如果係律師就同你計時間收錢喇，哈哈哈。」「係呀係呀，所以咪唔該晒你囉，哈哈哈，拜拜」

遇到佢令我今晚成晚都好開心。

>>June 8, 2004 at 4:14:23 AM GMT+8

2004 年 6 月 5 日 星期六 【晴】

抽筋，痛醒左，起身。食晏，玩。

ICQ 突然有人叫我.....呢個名，好似好耐都無閃過.....嘩，好開心呀，係亞恆呀。好耐好耐無同佢 icq過，上次係大概一年前....

原來佢個 recital 得 700-800 個位乍，我六月二十號要早 d 去 Tomlee 排隊喇。而家有大舊，許景，豬展，樂樂同我一齊去。Tommy 無得去，好失望。時不利兮騅不逝....
原來完左仲有簽名會架，好好笑，哈哈哈哈。等我著靚 d 搵亞恆影相先。

夜晚屋企門口轉角火燭，有兩張被棄置o既床褥比人惡意點著左。當有人大叫「火燭呀」，我仲施施然咁打緊機，一 d 都唔驚，因為 d 人只係叫，無走，即係碎料啦。

出去親身視察下先，都幾大火喎。咁o岩今日咸水管維修，我屋企就有一桶滿滿o既水 o係度，拎比亞爸撲火先。管理員都到喇，我又返房打機，亞爸繼續湊熱鬧。都噴左成十分鐘先熄晒。我發現隔離屋個女原來.....唔係我印象中咁靚架

可能只係偏見o者，佢係何東 d 師妹黎o既，(我畢業後先知)，不過佢經常違反校服儀容守則，所以我鄙視佢。職業病......有時早堂返學會撞見佢，睇落幾靚架....頭先見到佢就...「日抖美如花，夜晚母夜叉」，哈哈哈哈。

>>June 6, 2004 at 4:24:06 PM GMT+8

2004 年 6 月 4 日 星期五 【晴】

尋晚為左食宵，又因為太為食，傷口爆左，超痛！痛左成晚，食止痛藥，完全無用，再食....總算訓得著。

又流血又流血，幾時先止血呀？好煩呀！我要好全面咁刷牙！

整豆漿。…..準備出門口前，叫家姐幫我買六合彩，戶口無錢，佢用繳費鈴，要比一蚊服務費。
家姐：「快 d 比返一蚊我呀！」
會長：「一蚊都同我計？豆漿五蚊杯！」哈哈哈
臨出門口：「如果有日我唔o係度，你地就成個星期，成個月，好耐好耐都無豆漿飲，真係慘喇，哈哈哈哈」

去旺角行街，超多人。
Tommy：「呢度真係一個地獄，咁多人都有o既。」
會長：「地獄又點止咁少人呀？

唔知點解每次做完口腔手術都特別為食架，我今日食左好多野，用條利「咀嚼」。

今次唔夾 MYO，去 King’s College 練 band，佢地開 band 前打籃球，大舊撞爆左左眼角，好彩佢無乜事。原來佢之前又撞爆過右眼角…..佢對眼遲 d 越爆越大，哈哈哈哈，眼角去到耳仔，哈哈，好好笑，一笑又痛，樂極生悲。嘩，昇爺都有黎呀。佢係我認識o既 KCHB 裡面最靚仔架。

出灣仔麥當勞食宵，散。

暫時有大舊、許景霖同我去亞恆o既 recital。

>>June 5, 2004 at 4:40:37 PM GMT+8

2004 年 6 月 3 日 星期四 【晴】

如你已屆再次捐血的時間，敬請伸出援手前來捐血，因為最近醫院對A型血需求較多，希望你及你身邊的A型血朋友莫再猶豫，快來捐血。我們需要你們的支持以維持足夠A型血液供應以供救治病人之用。

六月十四,世界捐血者日，快 d 去！o岩晒，六月十四剛好到期可以捐血，一定係為我而設架，我又點可以唔去呢？

好悶呀，早知陪 Tim 同學買鞋啦

去中大聽Darren o既 clarinet recital，由到達中大講起。去後台搵 The Figlistens 「哈哈哈」。
會長：「Tommy，你呢條呔唔好睇，換過啦。」Tommy 換呔中….
蜥蝪：「你換咩呔呀而家？」
Tommy：「佢話唔好睇，叫我換喎。」
蜥蝪：「我話唔準換….你聽邊個講？」
Tommy：「我梗係聽佢講啦，(繼續換)」
大家：「嘩，嗌交呀……拆檔喇，(The Figlistens)要解散喇…..哈哈哈哈」

Darren 果然好勁！超好聽！我幾鍾意 Messiaen o既 Quartet for the End of Time-I ) Liturgy of Crystal

十個人去火炭食宵，我食得好辛苦….訐景霖叫左支啤酒，並說：「我終於可以飲酒喇。」會長見佢咁斟酒，敢肯定佢唔識飲！豬展(Gi Gi) 無飲，聞左一下。我唔敢飲，怕傷口痛。大舊及Tommy 各一杯。

訐景霖一定係飲醉左，夾所有野都跌，食緊o個舊都跌埋出黎….哈哈哈
走人，訐景霖帶頭行，我地笑佢會帶左我地返中大，(經已退宿)。

我見大舊一個人行，叫 Tommy 撩佢講下野。
Tommy：「你有無醉？」
大舊：「我無呀我無呀。」
步伐搖擺不定o既豬展大叫：「你講大話！」大家大笑，豬展聞一下就醉左。

C Poon 話今日套衫好曳，隨即做左個” 好曳”o既動作，(試想像蕭芳芳年代 d 人跳舞時手部o既經典動作)

會長大笑：「C Poon Poon」哈哈哈哈

嘩一二點幾，好彩仲有車返屋企。今日偷雞開電腦開到一點半，哈哈哈

>>June 4, 2004 at 5:25:19 PM GMT+8

2004 年 6 月 2 日 星期三 【晴】

剝牙前的最後牛午餐，食多 d 食多 d，去 lu....

剝牙，打左四針，痛死人。做乜今次要用鎚仔o既？好恐怖。la_la

我止唔到血呀

激死人，明明約左我在先，而家竟然放我飛機？！我好不滿！

可惡，連 Chris 都唔去….無理由 Tim 同學肯同我孤男寡女咁去啦，又告吹，激死人！

>>June 3, 2004 at 4:19:05 PM GMT+8

2004 年 6 月 1 日 星期二 【晴】

好野好野，大進步！GPA 進步左 0.19 分。我本來目標係進步 0.02 架。MIS A呀A呀A呀，開心到傻左。仍然未有一科跌穿 B。都話左密集式考試對我有利架啦。會長，你好叻呀。

Chris 同學就勁啦.....Tim 同學仲勁.....Tim 同學：「我覺得個成績唔係話咁好...」去死啦！

考得好o既人記住，你地係因為得到我o既庇護先考得咁好乍.....考得唔好o既朋友仔都唔好灰心，有賭未為輸。

星期五去踩單車，今次連天文台都話好天，走唔甩啦。

我條毛巾已經爛左好耐，我又唔願去搵條新o既.....直至今日，我使出苦肉計....我去洗頭，滴住水咁大叫叫家姐拎條新毛巾比我......得逞。家姐真係好。

都話成績好招人妒忌架啦，Tim 同學而家開始攻擊我.....

>>June 2, 2004 at 8:33:19 AM GMT+8