2004 年 6 月 24 日 星期四 【晴】

尋晚等到一點幾，等佢做完手術打返屋企。所以我比自己訓晏 d，訓到十一點幾先起身

同家姐去行街，買左個好得意o既 Piglet 太空杯，哈哈哈哈。行兩步就拎出黎睇一睇...

去探病，之前拎得太多野去，今日拎返部分返屋企，重死人........返屋。

>>June 26, 2004 at 1:57:02 AM GMT+8

2004 年 6 月 23 日 星期三 【晴】

Miss Kam 今朝六點四十五分打電話黎"叫"醒我返何東幫手做 d 野....-_- 洗唔洗咁早呀？好彩我開住電話訓o者。好啦好啦，沖完涼就出發 (0842)

幫手計 PE 考試分，計計計，食飯。Mrs Wong 問 Miss Kam：「Tommy 個媽咪叫咩名呀？」
Miss Kam：「Tommy 個媽咪咪叫蘇太囉...」

去做 CCIV project...完。順手行下香港公園，用 d 新娘做佈景影相。

收到個緊急電話，即刻趕去律敦治急症室，再跟(白)車去東區醫院....我好徬徨呀，我其實好驚架

等到八點半，佢入手術室，明明話做兩個鐘...而家一點零五分喇，仲未出黎...我好擔心

唔知發生咩事o既人最好唔好問....我唔想講，好恐怖

>>June 24, 2004 at 5:06:47 PM GMT+8

2004 年 6 月 22 日 星期二 【晴】

作嘔....又係耳髓不平衡？

會長最鍾意測試人，不過今年唔試喇，我都知邊 d 人會記得啦。會記得o既人始終都會記得。

>>June 23, 2004 at 2:31:43 AM GMT+8

2004 年 6 月 21 日 星期一 【晴】

會長今日真係勤力喇，做左四份呀，哈哈哈哈，仲有三份係 old age 架，會長呢期好吸引老人家呀。

會長：「好肚餓呀，不過唔可以食野，係時候減肥喇。」
加菲：「你仲要減，唔係有人話你 fit 左咩？」
會長：「就黎有表演，我要以最 fit o既姿態企上台。」
加菲：「乜無得坐架？(佢好似好認真咁問，又唔似攪緊 gap 喎)」
會長：「(滴汗)其實係坐o既...」

>>June 22, 2004 at 5:11:09 PM GMT+8

2004 年 6 月 20 日 星期日 【晴】

高溫練琴...熱死人！

今日會長滿腦子奇怪念頭，嘿嘿嘿...

尋晚 CCIV 網上練習，十二題o岩得九題，睇住書都無滿分，我大受打擊，今日住第二階段，都只得十一分，唔開心呀！會長顏面何存？

媽咪好懵呀！阿妹六月五生日，家姐聽日生日，我下個月頭生日，媽咪今晚買左個蛋糕一次過慶祝晒….返到黎先發現個蛋糕上面寫住 ”Happy Father’s Day”，哈哈哈，笑死！阿媽懵然不知。

話說阿媽拎左蛋糕返黎，家姐打開睇下：「媽咪呀，個蛋糕可能係尋日架…上面寫住父親節….」
媽咪唔識英文o既，佢話：「點會架？佢仲問我要幾多支生日蠟燭喎…」
大家一片無奈….哈哈

>>June 22, 2004 at 4:31:14 AM GMT+8

2004 年 6 月 19 日 星期六 【晴】

專程出街買飛，哈哈哈，買到第五行中間，唔知係咪正中呢....會唔會太前呢

行街，由銅鑼灣行到灣仔，再由灣仔行返去銅鑼灣，行左幾間玩具店，同精品店，好想買豬仔扇呀，不過 UNY o個把好似靚 d...遲下先啦。

會長：「44423467 021111167136471677....」
Tommy：「咩黎架？」

>>June 20, 2004 at 4:36:13 PM GMT+8

2004 年 6 月 18 日 星期五 【晴】

痴線架，今日幾乎全日練琴，無間道…下晝o係 Tommy 屋企練 duet，佢想打扁我呀。

臨走時，Tommy 阿爸：「Angela你行唔行山架？」(佢之前已經問過一千次，今次係第一千零一次)
會長：「我遲 d 會試下。」
Uncle：「咁同我地一齊去丫。你無行開喎…你想行 d 咩山呀？」
會長：「哈哈哈，太平山頂。」
Uncle：「呢 d 唔算係行山喎…Tommy，有咩山o岩 Angela 行呢？」
Tommy：「鑽石山…廣場啦，哈哈哈。」
Uncle 超無奈…

自己搭地鐵去練 band，見到 C Poon，一齊等 Cystal，大舊都到左，一齊行去 MYO 個竇。今日極少人，所有 YMCA 口琴隊o既人都無到。一音有兩個，二音同 Tenor好似各有五個，Bass 有四個。MYO 代表得幾個。關 Sir 等到黑晒面：「 如果八點仲係得咁多人，今日就取消，唔好阻住人地個地方。」結果等到八點，只多左伍 Sir，都照練…原來關 Sir 等佢…

會長心想：「今日咁少人，關 Sir 塊面又咁黑，萬一吹錯咪 lai 野？」會長說：「大舊，你醒定 d 喇。」好好彩，今次所有音部都好似吹得好過上次，會長說：「咁即係話上次有黎而今次又無出現o既人吹得渣啦，哈哈哈，例如 何x x 呀…」大家都認同…哈哈哈，今日HKL sight read 第一次吹o個句都吹得好過何x x。我地又去麥當勞食宵，收銀姐姐入去通傳一聲，就開始炸薯條喇。會長見到仲有一個魚柳包，立刻推開大舊同大舊石：「係我架，我買左架喇…你地等下啦。」哈哈哈哈，我真係買到。

大家講無聊野。大舊石講開o係公司做野…Sharon問：「噫，乜你畢左業喇咩？」
會長：「到時佢退休，你又問佢『搵到野做未呀？』」

本來伍 Sir 都同我地一齊去，我買完野食唔見左佢，就問” 伍 Sir呢？”」
大家：「走左喇，佢話肥膩喎…(我地仲講佢咁瘦，無理由怕肥膩丫，講左一大輪…)」
好耐之後，C Poon問：「噫， 伍 Sir呢？」大家超無奈…C Poon幾時變成咁架？

突然有隻大飛蛾，正當大家講緊呢隻係飛蛾定蝴蝶，會長曰：「靜態時豎起對翼就係蝴蝶，攤平就係飛蛾，係小學"科學"教o既...」
Sharon：「你地知唔知蜘蛛有幾多隻眼丫.....(大家估左一輪...)，有六隻架，o係頭胸腹。」
大舊石問：「嘩，咁多，睇咩架？」
Sharon：「Discovery Channel。」
哈哈哈，蜘蛛 d 眼用黎睇Discovery Channel.....搭錯線

不得不提一件事，Sharon說：「Angela你瘦左呀，你越來越fit 喇。」

2004 年 6 月 16 日 星期三 【晴】

好野，又多一個人一齊去聽亞恆o既 recital，Kelvin。

今日又要返學喇。同 Tim 同學食晏，佢千叮萬囑叫我唔好戴 con...la_la →→→ l@_l@
係咪好 d 呀？

同Tim 同學食飯，佢食o個碟米粉好核突，好似嘔出黎咁....仲要消化過o既。

未夠鐘上堂，Tim 同學陪我坐o係 blue zone 梳化虛渡光陰，期間…
Tim 同學：「唔~唔好啦….噫，好衰架，都話唔好咯…」
佢完全漠視會長一臉無奈，深深咁沈醉o係佢o既白日夢之中。
件事係咁o既，有個男人o係我地對面o既遠處，向我地前面o既天花板影緊相，Tim 同學就一口咬定o個個男人偷影緊佢….頂，你醒未呀，我就快想死喇，係你逼成我咁架….

>>June 17, 2004 at 5:02:53 PM GMT+8

2004 年 6 月 15 日 星期二 【晴】

好野，又星期三喇，聽日又唔洗返工。

對於自己咁多日無寫日記我好鄙視自己！但係我又確實無乜野好寫....

Tim 同學好鄭重咁同我講：「你戴 con 呢....好樣衰呀！」
實在太可惡，我都唔想戴架，不過配左幾百蚊，戴左唔夠廿次呀。

同 Tommy 去 Pizza Hut 食 tea，全間店o既女職員都係大肚婆？定係唔夠制服呢？

>>June 17, 2004 at 5:02:11 PM GMT+8

2004 年 6 月 13 日 星期日 【晴】

尋晚臨訓前發生左樣好恐怖o既事...當我熄晒燈，蓋緊被o既時候，突然 feel 到有舊野跌左落額頭，我一拎起佢....會郁架！有腳架！即刻 fing 甩佢，用張被包住成個自己....咁落去都唔係辦法，好焗....我冒住生命危險爬起身開燈搵佢，仲打算消滅佢。

搵左一陣，見到佢企左o係我個枕頭度，係一隻大草蜢，有我一截食指咁長呀，好恐怖呀！我拎個電蚊拍電佢....完全無用。個電網分兩層o既，要同時掂住兩層先通電，草蜢邊會咁蠢同時掂住兩層呀.....邊個低 b 仔發明架？！

我自制武器，用膠紙包住間尺個頭，諗住癡住隻野。一件咁強而有力o既武器無用武之地，因為我一整好已經嚇走左隻草蜢。實在太有用喇，快 d 頒個發明家大獎比我！

>>June 15, 2004 at 2:04:54 AM GMT+8