2004 年 8 月 23 日 星期一 【晴】

最憎人狂打電話比我！

打黎第一次，我飛錯線去左留言信箱，已經好憤怒。打返比對方....打極都打唔通，呢個時候手提又響，我，最憎最憎最憎呢種情況！邊個再狂打比我，殺無卸！

發緊火，唔要聽到：

「咁都唔洗咁惡呀嘛」
「咁你係好惡丫嘛」
「你都係想鬧我o者」

再聽到，你死梗！

>>August 24, 2004 at 7:08:07 AM GMT+8

2004 年 8 月 22 日 星期日 【晴】

一早起身去飲茶，好飽，行左一陣，返屋企訓過。

太悶，唔記得自己做過乜。

返工，做夠十三份，hei 到爆。
好健談o既大廈保安又出現：
我比張"簽走紙"佢，佢話：「收工拿？」
呆了，(唔通返工咩哥仔)回應：「係呀。」
我竟然無話：「生存呀？」呢個唔係我黎架，一定係假扮o既。

同 Tommy 食宵，佢送我上車，阿媽咁o岩又o係車上面，佢話 Tommy "應該" 送到去門口.....dood。

>>August 23, 2004 at 4:34:17 PM GMT+8

2004 年 8 月 22 日 星期日 【晴】

今日我地決定 28 號唾棄口琴協會聚餐，自組口琴 hei 會活動，好似好好玩咁喎。

訓晏覺，返工。好開心見到 Garfield 返左黎。今日好旺，全部都係 old age。

放工，去買野整沙律.....原來所有材料屋企都有....

>>August 22, 2004 at 4:59:18 PM GMT+8

2004 年 8 月 20 日 星期五 【晴】

一起身發覺自己變左孔乙已，要用對手行路...

o係地鐵站有個年輕男子打我尖，正值我心情極差，o係佢背後大喝一句：「唔識排隊呀？」

返 City 幫手做 Mentor's Day o既 reception，第一個發市...今年 SOM 有四十五個新生，其中十個係仔。

唔該晒 Tim 同學幫我借部 notebook 攪 add/drop，不過唔知點解係上唔到網o既，你一走左又得返。

add/drop 得唔係幾好，算啦，收拾心情玩小遊戲。

去灣仔哈迪斯食大曲奇餅，好味。仲有個"海鮮唔知乜鬼脆"就非常普通。聽到一把好扮野，好作狀，好乞人憎，好 lau 打o既女仔聲，真係想用個拳頭塞住佢個口。

夜晚一返到屋企又 add/drop 下，終於砌到個時間表 "可以接受"。o岩o岩好十九個 credit，有兩日 day off，(不過星期六要上一堂)，一科 B4 level 。

>>August 22, 2004 at 4:34:33 AM GMT+8

2004 年 8 月 19 日 星期四 【晴】

好野呀，終於有得去踩單車喇。

人物：Tommy，樂樂，大舊，豬展，Arthur，會長
路程：大圍去大埔，(意圖入大尾篤，失敗)，大埔返大圍
時間：十點半到四點幾

個 break 好似唔係好得，我校到張凳好矮，等自己覺得安全 d，不過因為咁，每踩一下隻腳都屈到好高，比較辛苦。我仲係好驚架，好驚又炒車...

平時我用五六個鐘由大埔踩去大圍，踩得勁慢，幾分鐘抖一抖，都已經好"支力"...今次係我首次踩雙程，仲要踩快左咁多，我又無得抖...勁辛苦。話就話成日停，不過係佢地停低等我，我一到，好快又出發....

個個都係男仔，我追得好辛苦呀！追極都追唔到，又唔識路喎，成日要佢地停埋一邊等埋我...我已經盡晒力喇。食完 lunch 佢地話仲有咁多時間，踩埋入大尾篤，我反對架，不過佢地呃我話「可以慢慢踩，條路唔係好辛苦」，我仲係唔想架，不過無人理我，就範。

都話呃人架啦...勁上斜....我今日都唔算太"支力"，不過膝頭關節好痛，我忍。入大尾篤某段路，當我仲等緊過馬路已經唔見晒佢地，好嬲，真係想掉頭走。過到去，見到大舊一個留左o係度等我，好感動，真係想喊呀。過左兩個街口，終於見到其他人，我唔開心呀！無人理我！

連續幾分鐘踩上斜，我個膝頭關節真係頂唔順，加上我好激氣，點解我明知自己咁辛苦仲要繼續踩喎？我決定自己一個留o係原位等佢地回程，Tommy 話要一齊留低，趕佢唔走，由得佢。o係佢地遠離左之後，Tommy 先發覺自己無話比大家知我地會留o係原位等....佢又乘機做掌上壓，痴線架！隔左一陣佢地就回程，(我仲諗住可以抖耐 d 添)，我累到大家無得踩入大尾篤，我係禍水！-_-

返大圍，今次 Tommy 陪我慢踩，其他人行先，即刻"無咁"辛苦，起碼我知自己痛得滯可以停低抖抖。o係吐路港o個段路，路邊突然有張凳，即刻拎黎坐下先，o係高速公路隔離坐餐椅，好笑，影相，走lu。

今日天氣唔錯，唔太曬，仲好多時都陰天，間中頗大雨....之前好多次約踩單車都因為落雨而告吹，其實我根本唔介意冒雨踩o既。

帶 Arthur 入機舖，教壞細路，佢十四歲咋。大圍 d 機舖勁頹，我地玩 photo hunt 竟然上到榜，可想而知幾少人玩。

去沙角村大排檔食飯。豬展飲七喜飲醉左，真係得意。返屋企，對腳無喇.....

>>August 20, 2004 at 5:57:11 PM GMT+8

2004 年 8 月 17 日 星期二 【晴】

我恨左去踩單車好耐喇....星期五，一定要去！

我地位超然~

以前有 d 野以為自己係，以為自己放唔低，講左出黎，發覺自己都比自己呃左，原來我比自己想像中更高尚。一句講晒，我地位超然~

>>August 19, 2004 at 5:07:02 AM GMT+8

2004 年 8 月 14 日 星期六 【晴】

為左同 Owen Ho chat，我裝左 MSN.....
見大舊有 Video conference，又好想玩，拎返個 "玩具似的" web cam 出黎玩，都可以接受，即刻出街買 mic 同長 USB 線。支 mic $5 咋，好平！

比樂樂玩....

樂樂：「 i don't have mic ar 」
會長：only i have is ok ga la

由於佢無，我用 mic，佢用 message。

喂喂喂...
「can't listen ar 」
聽唔聽到呀？喂喂喂...
「聽唔到 」

我以為佢見無聲所以自己打 msg 過黎

(大叫)開大聲 d 啦
「開得好大聲ga la 」
聽到未呀？
「聽唔到... 」
「完全聽唔到 」
你今日唔洗溫書咩？(我諗住講到佢攪好 d setting，所以是但講 d 野)
「溫緊 」
你又話聽唔到？(我開始發覺佢玩緊我)
「係呀，聽唔到ga 」
「你而家先發現 @o@? 」
「 kakaka 」

>>August 15, 2004 at 9:20:00 AM GMT+8

2004 年 8 月 13 日 星期五 【晴】

好刺激呀，Owen send e-mail 比我呀~

返工，勁好彩，勁眼訓

返到屋企，沖涼...我條毛巾呢-_-？問媽咪...
佢話：「我 dum 左呀...咁污糟，一大撻黑色....」
我：「我尋日敷深層清潔面膜 hi 到之嘛...」
佢話：「唔係喎，好似腳印咁喎....我咪 dum 左去洗囉....」

唉，我變到好污糟.....
唔通世人已經放棄左我，將我放逐到烏米曹自治區....

>>August 13, 2004 at 5:55:27 PM GMT+8

2004 年 8 月 11 日 星期三 【晴】

本來呢幾日無乜野好寫，不過見 帶子 咁支持...我寫！

Garfield 話佢 search 到 d 網頁講水野隆元，我又睇...http://www.psmonkey.idv.tw/music/copy_text/Shen-Takamoto.htm

自閉，同電腦鋤左五十幾鋪 2...

返工...做左四份卷。
放工...有個傻仔企o係巴士站吹口琴仔(Crystal 電話o個隻)

send SMS 比大舊「有個傻仔企o係巴士站吹口琴」
佢 reply：「係 Tommy 定 ice blue?」
我話比 Tommy 知，佢回應：「我忽然覺得呢個世界放棄左我，將我放逐到 ice blue o既國度....」

>>August 12, 2004 at 5:04:34 PM GMT+8

2004 年 8 月 8 日 星期日 【晴】

今日最開心o既事....原來我地 duet 第八，好開心。

尋晚我發夢我好辛苦學左一句日文，用黎同水野隆元打招呼，點知佢聽完笑一笑，問：「點解你唔用廣東話同我講野呀？我識聽喎。」

完左亞太，好悶，今日約返o個班前幾日時時刻刻都見到o既人出黎唱 k。有樂樂，大舊，Crystal，黃志榮。
我問人問到尋晚三點都問錯人...先後問左 Tommy，肥鋒，許景。我無搵阿沈呀，因為我諗住佢要返工....話問錯人，係因為以上幾個人今晚都係有份表演架....我真係懵盛盛。

唱到失聲...扮o既，再唱...都係扮o既....唱到真係失聲至得。

去打機，photo hunt左個幾鐘。

一齊搭車去元朗劇院，我地講笑話o個度可能仲係農村地方...
「一出隧道就係一大片草園同麥田」
「周圍有牛行黎行去」
「無公路無行車線」
「d 人無著衫...」(呢 d 好似叫石器時代...)
「元朗劇院可能係茅屋」

元朗劇院-「亞洲口琴新動力」(Asian Rising Powers)音樂會。
出場次序：
The Figlistens-香港
沈雕龍-台北
何志健-馬來西亞
Harmonicube-香港
水野隆元-日本
竹內直子-日本

好精彩，除左「Classical Delights」之外，今晚最好睇。
d 場務寸到爆！

完左，搵何志健簽名，佢好 nice，佢係我見過最令人振奮o既harmonicist，佢吹o既野唔算特別難，不過我見過佢o既任何表演，d 氣氛都一流！

再搵沈雕龍，純粹為紀念。
再搵隆元，嘩，好型呀！佢英文都幾好。我行過去企o係佢右邊，沈雕龍想行開，Tommy 叫佢都影埋，比面佢咋....水野搭住我膊頭推我去佢同沈雕龍中間影，嘩~~~~好野呀。趁沈雕龍行開左，再單獨同水野影。影完相我同水野棟左o係度，我想同佢講野架，死人 ice blue 走過黎搭訕，(阻住晒，死架？！)
水野問佢：「You play tremolo harmonica? I've see your competiton...」
ice blue：「(驚喜萬分)...you see i play? you...em...睇...you play harmonica?」
頂佢....唔順，「係呀係呀，佢有睇呀。(死開啦，阻住晒！人地又唔係特登睇你。)」

(聽朝先打埋下集，好支力...0249 10-8-2004)

Concert 完左，所有表演者去尖沙咀喜來登酒店食宵夜，Tommy 叫我跟埋去，我想去見水野架，不過我又唔係表演者，好似唔係幾好咁...所以我唔肯去，之後何伯昌醫生(又稱何伯--香港口琴協會會長) 叫我去埋，咁就 "老虎蟹都制呀" ~哈哈哈

一落車就唔見左水野，我估佢一定係住呢間酒店....「佢唔會返左日本掛」
不出我所料，過多一陣佢就返黎喇，真係想踢走許景叫水野過黎坐呀。一見到佢即刻同佢揮手，佢同我點頭笑呀，好開心呀~！！！

所有食唔晒o既野都黎晒我地呢檯，因為有許景同 Tommy 坐陣。張單有一半比我地食左。

尊貴有學識o既 Kelvin 教卑微文盲o既我地日文規則...笑死

嘩，樹皮 sir 帶水野過黎同我地傾計，樹皮 sir 話我地好 young，我指住林浩懷話：「he is very old」Tommy 話：「yes，he is very old，fourty five....」爆笑.....

唔知邊個無聊人話要 "飲杯"，我同許景已經飲完九世喇，一人拎一兜茄汁扮野。

Tommy 扮講日文，何二仔 (何伯第二個仔) 笑到傻左...

水野話要返去休息，同大家握手道別，我迅速伸埋隻手出去，好野呀！同水野握手呀，好開心呀！佢同我握得最耐！哈哈哈

水野走，我地都走 lu，已經十二點五十幾分...我，Tommy，阿沈跑跑跑趕最後一班地鐵....落到去，佢地兩個上到，我就趕唔切...好彩 Tommy 撐住，擘返開道門，總算上到，不過超懦...

>>August 10, 2004 at 3:41:16 PM GMT+8