2002 年 12 月 19 日 星期四 【雨】

尋晚整完個日記之後,又未想訓住..跟住搵番d之前download落黎既片,結果睇左easy-film既<神經花園>第一同第二集,睇番都覺得好好笑.跟住o係icq度見carrie好緊張咁,就send左套<神經花園>俾佢睇,等佢輕鬆下嘛.
睇到2點左右諗住訓,點知icq有人hi我,原來係個好耐冇傾過既net fd,跟住傾傾下都3點,我見勁眼訓..之後就去左訓.
可能係放假前夕啦,今日番學都冇咩番學既feel,何況今日只係得上晝要上堂,下晝係singing contest.
上左兩堂漫長又好訓英文堂,第三堂中史都係昏昏睡睡,但係一到小息個人就醒晒(真係有病..!)..不過可能係訓得多得滯懵懵地,走左去同正正講今日個人好high(呢句話真係我講既..?)..
之後兩堂history堂,先訓左一堂,哈哈.. 之後第二堂聽書同做DBQ,係咪好勤力呢?
食埋lunch,諗住打波,但係見撻地咁顯都係唔玩,齋睇.
終於夠鐘完lunch啦, 跟住就係kts一年一度既singing contest啦,因為我係第一次睇,有d期待~同埋我果班有阿正,carrie同埋希文三個人分別入到合唱同獨唱既三甲,點都要捧下場既.點知下晝落住雨,跟住singing contest分兩批去(F.1-F-4同埋F.5-F.7).我地o係課室等左一輪,本來話等到2點半,但結果等到成3點先開始,3點3先唱第一首歌,比起個程序慢左半個鐘,最後去到差唔多4點半,聽埋d人朗誦先完..
正正同carrie合唱<相愛很難>,同希文首<賭愛>,佢地都表現得唔差,而吸引眾人既目光注意既吹波先生就純粹娛樂下大家,俾大家笑下.之後中七有個把聲好似李克勤既,唱<一個人飛>真係唱得好好聽.
雖然話下星期一先知結果,但係佢之後每組都叫左個出去,係人都估到呢d人就係冠軍人馬啦.個singing contest感覺上氣氛冇英華咁好,可能因為之前果間係男校啦,同埋全部由學生責任,校長老師唔理,d人就玩得癲d,high d,d氣氛自然都好d啦.
5點半先返到屋企,一番黎就好眼訓,不過打開機打機.
食飯之後,開左個vos玩左陣,跟住用個converter轉番d歌同埋歌名,整番靚佢,自己又加左d新歌落去.整到10點幾就11點,見有d眼訓就打定篇日記擺上網先, 費事留到聽日會冇心機打啦.

>>December 20, 2002 at 3:52:19 PM GMT+8

2002 年 12 月 18 日 星期三 【晴】

今晚睇電視見到~
好聽呀~

我的驕傲(泓景臺新廣告歌) 容祖兒

Pride, in your eyes
只好盡在不言中
肩並肩 手牽手
分享人生美夢

Hold me up Hold me tight
讓我飛翔還微笑
有你讓我最驕傲
理想到此都成真

See me fly
I'm proud of fly up high
這是我的驕傲
教人感到羨慕

一齊來see me fly
I'm proud of fly up high
找到永遠幸福
擁抱永恆驕傲

>>December 19, 2002 at 4:01:03 PM GMT+8

2002 年 12 月 18 日 星期三 【晴】

尋晚溫左陣econ,跟住覺得眼訓就冇溫到,on住line hae左陣,差唔多2點去左訓.
今朝又等唔到巴士,幾驚又好次上次咁..趕時間先撞車.今次醒目左啦,見班巴士飛站走左冇再等下班,唔係實遲到,就行左去截的士,咁岩撞到個同校但係唔識既人都諗住截的士,我又見冇咩時間,於是就話一齊截架的士,而且咁可以慳番一半車錢.o係車上都係咁兒傾下計,知道佢今年讀中七..
架的士去到喇沙利道果陣勁塞車,原來蘭開夏道同窩打老道交界撞左車,又係撞車,好彩今次唔係我坐果架撞,唔係可能又歷史重演..搞到差d遲到,飛的都遲到就真係唔抵..
入到學校好明顯係岩岩打左鐘冇耐,但係仲有成堆人入緊去,我地都好彩攝得切入人堆度,之後快手開locker欏埋d書番課室,番到課室見大勝都氣來氣喘咁,原來佢又係見喇沙利道塞車,就即刻落車跑番黎.
第一堂就係econ test,本來諗住今朝番到去會有時間溫書,點知就俾巴士飛站同埋塞車搞到冇晒時間..考之前勉勉強強咁睇左睇d notes,跟住仲勉強咁做份卷,唉..出黎d成績都唔知會點..
小息之後果堂maths堂,阿sir終於改左上次個test,佢d效率都認真慢(中英文d test都係第二日就派)..
之後堂中文堂,阿sir有d notes派,就搵d volunteer幫手派野,已經搵左幾個出去,但係仲有一疊notes,我見冇人舉手,我又想郁下,就舉左手,點知行出去果陣阿sir同我講話估唔到係我-__-..咩意思喎><
Lunch成班人浩浩蕩蕩去新世紀食野,番黎果陣覺得好熱,個太陽勁猛,乜呢排d天氣咁難適應..忽冷忽熱..真係想整病我咩..
lunch之後果堂hist堂,因為miss今日有野唔得閒,冇黎上堂,結果又多左堂空堂.
最後果兩堂英文堂,o係break果陣好正,傾緊聖誕聯歡會d野,唔知點解傾傾下又講到班入面邊個同學似邊個明星,miss Lam仲講左句絕句搞到全班勁拍手掌添.
放學之後,有中史補課,o係果度昏睡同聽書之間掙扎左半個鐘,就補完課,哈哈~之後走果陣見陣間有社際排球比賽,又冇野做,就留o係度睇,睇到5點半走.
番到屋企好累,就係咁訓..
食埋飯之後,突然好勤力咁做埋份中史功課,之後見冇野做諗住打埋篇日記先,點知見到個日記簿好有問題,佢更新左server之後用唔d "css",搞到本日記簿冇左background同其他效果,我都冇咩心情整,就求求其link番個background算..唔理佢住,睇下網主會唔會改番之前咁啦..

係喎,聽日就係歌唱比賽決賽日啦,祝正正,carrie同希文成功啦~

>>December 19, 2002 at 3:36:48 PM GMT+8

2002 年 12 月 17 日 星期二 【晴】

尋晚好眼訓,聽聽下<嘩嘩嘩打到黎>訓著左..一醒已經凌晨4:42..見部腦未熄,個人又有d清醒,就打埋尋日篇日記佢先.打到5點半,見冇野做又未夠鐘,再去訓過.
今朝行番學途中,撞到阿jay,同佢一齊行番學校.番到學校,居然俾人截停左,我覺得好莫明奇妙,最奇妙係門口個prefect問我個鐵校章o係邊,我果陣心諗:"你唔係掛..咁大粒鐵校章掛o係心口你咁都睇唔到?"我諗住搵俾佢睇下示威下,點知我一望落去..咦?個鐵校章呢..今次大鑊喇,好地地戴o係心口都會唔見得既(唔通尋日打波果陣整跌左都唔知?)..呢云真係「秀才遇著兵,有理說不清」喇,個prefect唔理我解釋,好衰咁彈左句「你有就走得,冇就留低名」,聽完果句真係勁無奈,恨不得除左件冷衫俾佢算..唉,最後就留左名做記錄啦.
一朝就搞d咁既野,搞到心情曳晒,今日做咩都冇埋幹勁(不嬲都冇..今日仲衰多兩錢)..唔太記得朝早上過d咩堂.
Lunch果陣,打左場波,諗住溫中史,last果堂test,但係完全入唔到腦..可能仲係俾今朝件事打擊到..唉唉唉唉唉!
之後兩堂econ,淨係記得正正,sally同carrie又玩到勁笑一餐,我就溫溫下中史,溫到訓左-__-.結果最後堂中史個test真係..哈..哈..哈..
班主任堂今日到小飛達讀報,但係d報紙事先俾斌哥收起晒,諗住玩佢,點知咁就玩出火喇,班主任miss Lam話如果聽日都係冇晒d報紙就全班罰留堂..
放學番到屋企就on住line整網頁,阿siu又問我點美化日記簿,就教左佢整.食埋飯之後,繼續整埋個網佢,加左4頁,更新左d link,好有進步呀.
跟住打埋呢篇日記都10點幾,諗住擺埋篇日記上網之後溫埋econ訓,點知頭先又上唔到日記個網,搞到11點幾先擺到篇日記..

今日都算黑仔喇..

testing..咦?日記多左edit既功能喎

>>December 18, 2002 at 3:50:17 PM GMT+8

2002 年 12 月 16 日 星期一 【晴】

尋晚又教人整左日記簿d野,之後我諗住搵番隻vos黎玩,上去佢個網度,發現自從十月底就冇再update過,搞到冇新歌玩..之後我就o係果個網link左去vos韓國既官方網頁,左click右click俾我搵到個converter,個converter可以轉midi轉造vos既格式,即係唔駛再等個網update我都可以自己整新歌啦,正呀~研究左半鐘,摸熟左舊野點用,就即刻轉左幾首歌仔黎彈下..玩下玩下經已兩點,見眼訓..跟住就去左訓.
第二朝番到學校勁眼訓,唔知點解..明明都算訓得幾充足,都仲係好眼訓.
Geog堂個test又係做到想死,勁作野,落左堂之後係小息,受害人即場昏迷..
之後果兩堂中史我都唔記得做過d咩..
跟住食完lunch又打左陣波,打左鐘之後,本來係漫長既英文堂,但係唔知點解有個講座,勁開心,唔駛上英文堂喎.點知果個咩「職業健康講座」係勁悶既..全場訓晒咁滯,好鬼壯觀..我?當然都訓左陣啦..
搞到之後果兩堂中文同history都勁眼訓,history堂果陣都係挨唔住..訓左,o係訓果陣,隱隱約約聽到附近既正正,sally,carrie唔知講d咩笑到好開心,不過我都係照訓..
放左學原本要補課,跟住收到消息話今日唔駛補,勁開心.就去左打波,就係咁,一路打波打到5點學校響鐘先走.同大勝,阿佬,NY佢地走,NY仲請左我飲野,雖然只係$3,但係都有d唔好意思添..
番到屋企5點半,即刻開左903同埋online,因為應承左正正會聽<叱吒樂壇遊樂場>,今日d題目唔太難,可惜正正打唔通啦又.
之後就睇下人地d網頁,個帶銀公主@遊樂場整得好靚,d文字又令人睇得舒服..好正.睇完就繼續努力整自己個網頁.
食完飯之後,醒起聽日測中史,但係冇帶書番屋企..-__-
後黎眼訓得滯..聽聽下<嘩嘩嘩打到黎>訓著左..

>>December 17, 2002 at 9:26:52 PM GMT+8

2002 年 12 月 15 日 星期日 【晴】

尋晚icq度有兩個去外國讀書既net fd都番左黎香港,同佢地chat到1點幾,差d打亂我既背書計劃..唔覺唔覺,原來距離聖誕節唔夠10日..
今日第一堂就係默書,我差d唔記得晒尋晚背d野..好彩勉勉強強都背得晒,不過有冇默錯就唔肯定lu..
第三堂去左影班相,咁就冇左堂Geog堂,去到操場,見到張sir欏住部相機,原來由佢黎影相,之後排埋d椅,我地企好晒之後,張sir先話背光,跟住又要落晒黎,等d校工搬過晒d椅,跟住我地又再企過上去.搬左新位之後,咁岩搞到影相既張sir冇咩位企,因為隔離係d儲物櫃.影相之前,張sir叫我地要笑,不過我地都係冇咩笑容,但係當張sir影相果陣,彎低身,由於唔夠位既關係(俾個儲物櫃頂住),佢將個身扭到s形咁,嘩~呢個誘人既姿勢勁爆笑,我地班男仔(特別係斌哥~)笑到痴晒線,最抵死係張sir見我地笑得咁開心都唔知咩事,仲笑笑口陪笑,好滿意、好開心咁影埋張相佢.我諗,呢張班相裏面每一個人都一定笑得好燦爛^^.之後換左另一到又影左幾張,就番班房等小息lu.聽張sir講星期五就有相睇啦~
之後兩堂漫長既英文堂,去左MMLC上,都叫冇咁悶,但係做listening又做到我好眼訓..
lunch果陣打左陣波,今日手風順呀,入左唔少波~
最後果兩堂econ堂,同正正傾傾下,唔知講到d咩,正正話左句「理科班d人都傻既」..o係呢個時候,坐前面既sally偷偷咁睇緊雜誌,之後佢又o係櫃桶欏左d野出黎食,點知佢居然欏左本雜誌黎遮住佢食野(sally平時食野時會用教科書黎遮,可能今次順手得滯,哈哈..),仲俾阿sir見到..跟住正正見到就勁笑佢,又話「原來文科d人都唔好得去邊」,又笑左一陣.
今日放學原來仲要上oral,但係我記得上次聽到miss話係放假前last一次,唉~算數,反正係第一組做,miss亦都快快脆脆咁搞掂,4:15pm就走得.之後諗住打波,但係見得兩,三個人o係球場,所以都係番左屋企.
今日好熱呀,所以番到屋企即刻沖左個涼,之後就開機繼續整網.一路整到一路聽住少爺占,整到7點左右.
食過晚飯後,阿妹霸左部機話做功課,睇住佢整張postcard,覺得好好笑.
之後阿媽叫人洗碗,今晚應該輪到阿妹洗架嘛,佢又唔認,尋晚係阿媽洗佢當係佢洗..阿媽又聽佢講喎,結果搞到我都俾人鬧囉..唉..冇好帶挈..到最後佢咪又係要乖乖去洗..

p.s.是日金句：「理科班d人都傻既，原來文科d人都唔好得去邊。」(by正正)

>>December 16, 2002 at 3:03:37 PM GMT+8

2002 年 12 月 15 日 星期日 【晴】

呢度係我屋企附近既一條天橋..
我諗呢度夜晚唔會一片漆黑啦..

即時更新既2號幹線-機場隧道九龍城入口


>>December 16, 2002 at 3:02:56 PM GMT+8

2002 年 12 月 14 日 星期六 【晴】

尋晚打埋篇日記,之後整個網d野,加左幾隻新midi,整到2點幾先一次過擺晒d野上網.
今朝10點幾俾阿爸叫醒左,佢地兩公婆真係..!咁鍾意阻住人地訓架..難得唔駛番學,可以訓晏d,佢地個個星期日實會吵醒我架喎..食埋早餐,冇野做..睇左陣球迷世界同埋NBA地帶,就番左房,又開機搞搞個網頁.我份人就係咁架啦,一係唔整,一係就擺晒副心機落去整,所以呢幾日為左個網都幾廢寢忘餐下.同樣道理..一係唔愛,一愛一個人我又係會擺晒d心血落去..結果梗係傷啦..今日我又諗起佢.
下畫食完飯之後,整網整到如火如荼之際,阿爸買左電池盒同盞燈番黎,諗住整廚房盞壞燈,佢搞極都搞唔掂.跟住叫左我去幫手,又係呢句..當我裝修師傅咩-__-"
搞到我迫住放低個網,搞左好耐,又拆又砌,個電池盒又崩左,佢又落去換個新電池盒,點知番到黎個新電池盒又唔岩位,最後我用舊電池盒個架駁埋新電池盒,終於俾我搞掂左..果陣真係眼有淚光T.T~
整左差唔多成個鐘,番到黎冇咩mood整.望下部腦,熄左..係喎!頭先駁電線果陣阿爸熄左總掣..我部攤住既電腦就咁枉死,好彩我臨離開部腦有save到d data o者,唔係就大鑊啦..
整到5點零,去左沖涼,沖完涼個人都精神d,仲醒起自己未做作文..諗住食埋飯先作,跟住就睇埋我睇緊既<我的野蠻女友>小說,睇左兩章.
食完飯,on住line作文,我發現好似好耐冇on過line,至少呢兩日online埋唔夠3個鐘.on住line真係分心d,作左好耐都作唔到,所以熄mon黎作..間中開黎check下message,果然有效好多.
10點零作完文,見聽日又要背默,但係今晚又做鐵達尼喎,點揀好呢?結果都係去左睇電視先..邊有人寧願揀本書都唔揀電視架~至少我唔係先啦.之後,邊打日記邊睇住titanic邊icq,至於背書..?等我擺埋篇日記,睇埋電視先算啦~

>>December 15, 2002 at 3:42:44 PM GMT+8

2002 年 12 月 14 日 星期六 【晴】

即時更新既維港景色~


>>December 15, 2002 at 9:26:15 AM GMT+8

2002 年 12 月 13 日 星期五 【陰】

尋晚好早訓左,今朝10點零俾電話嘈醒,原來係二佬打黎.因為之前約左今日去唱k,佢又知我一定唔知醒,所以打黎叫醒我,之後約好左11:30 o係尖沙咀地鐵站恆生銀行等.到左11:00,我出門口,落到去o係架小巴呆坐左2,3個字..終於都坐到半架車,個司機先肯開車.o係車上,我記起二佬頭先話過今日去科學館附近果間唱,點知跟住架車到科學館果陣有人嗌落..我又白白痴痴咁落左車,明明約好左去尖沙咀地鐵站架嘛..已經遲到架啦,我急急腳行過去,最後遲左3個字..11:45先到..俾二佬話><
之後我見o係尖咀地鐵站,近寶勒巷.上次去energy唔夠歌唱,所以今次諗住去新歌快又多既neway.而寶勒巷又有neway,我就同二佬去左寶勒巷間neway.去到12:00都未到,有k lunch唱,我印象中係第一次同二佬成功o係neway唱到k lunch時段.之後一路hae,唱埋happy hour,hae到6點半先走..唱左勁多歌,仲發現juno首<有人>俾我地唱唱下會變左<劃火柴>XD,仲要岩音先抵死.跟住又發現cookies d MV除左首之外,其他幾首歌d mv都係差唔多(我地特登睇晒,發現d mv都係成班人郁郁下,d舞又差唔多,跟住逐個人彈英文名介紹).同埋估唔到有森美小儀歌劇團d歌唱(唱左<乞丐王子>同<如果我先死>),勁意外呀,我搵左好耐架喇>O<.neway真係好多歌,d新歌仲勁新,不過呢度個廣告好煩,要等佢播晒先播歌,特別係有個廣告又煩又長.
唱完k同二佬由尖咀行到去旺角,諗住搵下有冇地方買game,搵唔到,就番左屋企.
番到屋企,都未換衫,阿媽又話廚房燈壞左,叫我去睇睇,當我裝修師傅咩-__-".搞唔掂,食埋晚飯番左房,開住903冇野聽,跟住聽到電視好似有野睇,原來做緊<歡樂滿東華>,跟住就成晚坐左o係度睇電視.
到左11點左右,又番左房,因為做<森美移動>啦,而電視又開始睇到悶.邊聽住903邊打日記..今日到此為止~

>>December 14, 2002 at 6:36:14 PM GMT+8