2003 年 2 月 9 日 星期日 【晴】

尋晚又同二佬玩aoc玩到3點幾,終於認清自己應該用邊個族..
今朝7點左右醒,唉~又要番學喇..放假放到個人又懶晒..今日又好mum先番到去,入到課房覺得怪怪地咁,個個人個樣都好似唔同左..我諗係有好多人剪左頭髮掛?
今日都冇咩心機上堂,淨係記得中文堂聽楊sir講佢美國之遊既激氣&搞笑野.之後地理,數學堂都係做下d習作..之後同正正講起cookies首<最後一塊>,跟住就成日都聽到佢哼住~哈哈.
小息之後果兩堂漫長既英文堂作文,今日冇咩靈感,結果決定求求其其寫左篇普通到普通既文交左就算..之後lunch去又一村買飯,等飯果陣dorami,阿siu,鯉魚同我入7仔諗住買甜筒食,點知搞錯左d野,搞到勁"lor"..結果食雪條算..
食完lunch留o係課室作埋篇文佢,作完文諗住出去打波,一行到球場..見到miss過黎清場..因為就打鐘,真係好掃興..
放學又係上oral,搞到冇得打波,上完出到黎都4點45分..d人走晒,就番左屋企.
番到屋企,樓下又勁嘈..原來尋日d候選人番黎謝票,又嘈一餐..連輸既候選人都黎謝埋一份..真係吹脹,不過呢d可能係d手段黎架啦,留個好印象俾人丫嘛可以!
夜晚睇電視,跟住食飯,跟住又睇電視..搞到本來諗住今日做既功課又拋諸腦後喇..睇黎都係星期四,五先做啦.
10點零開903聽,好耐冇聽過<嘩嘩嘩>喇,仲係咁好笑~之後11點左右online,跟住見個icq好清靜,就打左今日篇日記先算喇.

點解今日突然又諗住佢既..

>>February 10, 2003 at 3:53:48 PM GMT+8

2003 年 2 月 9 日 星期日 【晴】

今晚wasabi播過既一首正歌..
唉..思緒又開始凌亂喇..

告訴我 陳綺貞

作詞：陳綺貞
作曲：陳綺貞
編曲：林暐哲/陳綺貞

看沉默的電話 它什麼都不說
看電視的畫面 它無聲的閃動
看街上的行人 跟我擦肩而過
整個世界太冷漠 我沒有力氣再往前走

看你緊閉的嘴唇 它什麼都不說
看你飄忽的眼神 它無情的閃躲
看你和我的回憶 跟我擦肩而過
你的改變太冷漠 我沒有勇氣大聲地說

告訴我 你不是真的離開我
你也不願這樣的夜裡 把難過留給我
告訴我 你不是真的離開我
你是要懲罰我的愛讓你失去自由
告訴我

看沉默的電話 它什麼都不說
看電視的畫面 它無聲的閃動
看街上的行人 跟我擦肩而過
整個世界太冷漠 我沒有力氣再往前走

看你緊閉的嘴唇 它什麼都不說
看你飄忽的眼神 它無情的閃躲
看你和我的回憶 跟我擦肩而過
你的改變太冷漠 我沒有勇氣大聲地說

告訴我 你不是真的離開我
你也不願這樣的夜裡 把難過留給我
告訴我 你不是真的離開我
你是要懲罰我的愛讓你失去自由
告訴我

告訴我 你不是真的離開我
你也不願這樣的夜裡 把難過留給我
告訴我 你不是真的離開我
你是要懲罰我的愛讓你失去自由
告訴我..

>>February 9, 2003 at 5:28:07 PM GMT+8

2003 年 2 月 8 日 星期六 【晴】

尋晚同二佬打機,勁玩aoc,玩到佢驚..2點果陣停左陣,之後二佬沖完涼食埋野3點又再玩過,一路玩到4點半先訓.今朝10點半左右醒左,聽到外面有d嘈,食埋早餐之後教阿妹做功課.食埋晏,睇新聞先醒起,係喎,今日係海心區投票選議員,怪唔得窗外咁墟憾,咁嘈啦.下晝入將軍澳拜年,坐左陣,同表弟妹玩左陣,之後又同佢地打機,估唔到佢地年紀少少(一個8歲,一個5歲..),功力竟然如此深厚..今日坐到5點零就走,如果係平時通常會食埋飯,不過因為阿媽今晚煲定左湯,所以咁早走..番到黎5點45分,樓下d拉票既人同d宣傳品好阻訂..塞滿條街,想行已經好難架啦,仲要一路行,d人左右企成一排,沿路伸手遞d傳單俾你,一路咁行,感覺有d似d總統訪問其他國家,岩岩落機果陣,d人夾道歡迎,爭住伸手同你握咁.而佢地d宣傳手法亦都層出不窮,傳單,宣傳聲帶,遊街車..咩都有..
夜晚,成晚都有著炒埋一碟而變得嘈炒既宣傳聲帶做背景音樂..食完飯,諗住睇電視都睇到有畫冇聲咁滯..之後索性番房on住line搵歌,一路icq..

>>February 9, 2003 at 4:17:38 PM GMT+8

2003 年 2 月 7 日 星期五 【雨】

尋晚訓訓下,1點零俾人叫醒食飯..搞錯..半夜食咩飯呀..我寧願訓好過..最衰格係唔俾人留o係架車..落一落車個人又醒晒-__-.之後一路半醒半訓咁,5點零到左廣東,我聽到呢幾日黎既第一首廣東歌--《終身美麗》,過左陣,6點10分左右,我聽到donald把聲!原來已經到左深圳,6點半左右到深圳關,今朝唔算多人過關,好快就過晒兩關,不過d行李就重到死,又落住毛毛雨..仲重過去果陣.因為阿媽搏命o係大陸帶野過黎..自己又唔搬,我見阿爸拖得咁辛苦,我就幫佢抽左兩袋,加埋我"咩"住果袋,重到死死下..
之後8點零到左紅磡火車站,搭的士番屋企.阿媽又慳皮喇,將d行李塞晒落座位,佢話擺去後面要每件加五蚊喎..搞到好難坐,好彩我揀左坐車頭姐..
番到屋企9點正,信箱有一大堆信.一番黎阿妹霸左部機睇佢既留言板..我都冇佢咁好氣,我執埋d野,沖個涼,出到黎岩岩好欏番部腦,就開始打番呢個禮拜既日記,搞左成朝,打到1點先搞掂晒..之後就食晏.
食完晏一路上網,整下個網,又download左唔少midi落黎,轉造vos玩..之後又改日記個背景音樂..到左5點零,同個未傾過但又o係個list既net fd傾計,講左好多野,食完晚飯又傾..個心舒服左唔少.難得有個好傾net fd同我傾下心事,個天都算對我唔錯啦..希望新一年可以過得開心d..
其實我幾鍾意同net fd講心事,幾好架..你唔識佢,佢又唔識你喎,講左俾佢知就好似講左俾個朋友知,但係佢又唔會講俾人聽..
網上並唔係咁黑暗姐,都可以識到真心既朋友架..

今日收到一首幾有意思既詩：
緣緣份份，情情愛愛。
來時難拒，去時難留。
悲喜交替，對錯難分。

>>February 8, 2003 at 1:36:17 PM GMT+8

2003 年 2 月 6 日 星期四 【晴】

最後一日喇..
今朝8點幾就醒,比起平日早,食完早餐..聽阿爺講左好多野,種感覺好溫暖.之後堂哥叫我去洛陽,我都唔去喇..都係留o係屋企好d,好鍾意鄉下呢度,俾到我一種已經遺失左既家庭既感覺.之後同五叔打羽毛球,又同堂弟妹佢地玩,傾計講笑..5點零去學校打波,踩單車,好快又天黑..個感覺好似就死要離開個世界咁,好難受..時間一分一秒咁過,食完晚飯,同堂兄弟姊妹捉波子棋,又同堂弟妹約定(約定d咩?唔話你知=P)..
9點半,終於要走喇,大廳聚滿晒d親戚,好人齊..出門口,我不自覺回望佢地一眼,視線漸漸有d模糊,我唔敢再望..
之後阿爺阿麻送左我地一段路,我地就搭車到泉州既客運車站.10點半左右,架車開走..今次既回鄉之旅都完lu..
聽日就番到久違既香港喇.

>>February 8, 2003 at 4:53:56 AM GMT+8

2003 年 2 月 5 日 星期三 【晴】

話咁快就2月6號,聽晚就走.開始有d唔捨得既感覺,其實鄉下既生活都幾好,每日都簡簡單單,過得開心又健康,番黎呢幾日,日日都早睡早起,三餐食齊,空氣又好,又冇咩對住d幅射機器(冇電腦,電視又講埋d令人半懂既普通話..冇心機睇),又日日四圍走..
今朝9點幾醒,食完早餐又同堂弟妹玩左一輪,食完午餐又玩一輪.今晚頓晚餐好豐富,食到好飽,肥死我都似.之後又係同堂弟妹玩,冇計啦..今晚可以算係最後一晚,因為聽日一定好忙..
今日好開心..好開心..真係好開心..
好耐未玩過咁癲架喇..不過越玩得開心,就越唔捨得..
唔通世上所有既野,都係要o係最美好果刻完結?
今晚訓唔著,呢幾日既一幕幕係咁o係腦海閃過..個心好反覆.同岩岩黎果日既十萬個唔願意有好大對比.心裏面已經諗定下次再黎既時間表,不過到時到候,d堂弟妹大過晒,仲會唔會咁好玩呢?我都唔知lu,唔敢去奢望.

>>February 8, 2003 at 4:41:09 AM GMT+8

2003 年 2 月 4 日 星期二 【陰】

今日9點半醒,起身俾人催食早餐,一食完就俾人捉左落泉州.
今日一家人同五叔同佢既仔女一齊去泉州玩,後來五嬸同二堂姐都黎埋.我地先去左泉州東湖公園玩,四圍行左陣,之後去動物園睇,睇完之後,經過一個檔攤又晝左幾幅名字畫,用我地個名黎畫野,個藝術家好掂,畫得好快又好靚,我、阿妹、兩個堂妹都畫左張,之後又去左玩機動遊戲,呢度d機動遊戲,比起香港果d完全係小兒科.玩完之後就到泉州市四圍行.
,後來見到間麥當勞就成班人入左去食晏,呢度既麥當勞賣既包少過香港,d價錢就同香港差唔遠,一個加大既套餐要19蚊.
食完之後又去左市場到逛左陣,後來搭公共汽車番屋企果陣,阿媽就話去剪頭髮,結果成家俾佢屈左去,唉~佢太貪便宜啦..平都唔可以迫人剪頭髮架嘛!好彩我叫佢修一修就得,但係阿媽好明顯好唔滿意..猛話我個頭冇剪過咁滯,其實經已剪左好多..係佢貪心想我剪短d等我可以等耐d先再剪頭髮之嘛,我先唔俾佢奸計得逞呀!
番到屋企就食到晚飯,食完又同堂弟妹玩捉迷藏玩到10點零先去訓.

>>February 8, 2003 at 4:23:21 AM GMT+8

2003 年 2 月 3 日 星期一 【雨】

今日又係9點醒,食完早餐,又同堂弟妹玩,同佢地開始熟絡,堂弟妹都好可愛,特別係二堂妹,傻得可愛.之後俾阿媽捉左出去,同埋阿爸,五叔,兩個堂哥去拜神,講真我唔太想去.座廟o係山頂,搭電單車上到一半一唔到,要行上去,行到死死下,d山路好崎嶇,五叔話之前岩岩落過場大雨,條路沖到爛晒..
幾經辛苦行到上山頂,座廟岩岩重建緊,搞到我都冇咩心機參觀,四圍好多棚架.後來同堂哥爬上最高果舊石睇風景,見到鄉下附近既全景,四周一片綠,夾雜住一d金黃,望落去好靚,不過座山真係好高,望落去都有d驚.最搞笑係突然有陣大風吹埋黎,嚇到二堂哥叫左聲出黎,因為差d吹到佢失平衡.
之後等阿媽燒埋d香,拜完神,就坐電單車由另一條路落去,條山路又窄又斜,幾過癮,我聽到阿媽嗌話不如落車行安全d,我o係度偷笑,因為五叔同兩個堂哥佢地開得好慢,時速得10幾公里,根本可以話同行既速度差唔多,根本唔危險.反而之後條屋企條路驚險d,二堂哥開得好快,迎面黎既冷風刮到塊面幾痛,耳邊不時有「嗖..嗖..」既風聲,汽車經過既聲音.
平安咁番到屋企之後,先食午餐,食完又同堂弟妹玩,阿妹d閩南話講得唔好,又笑左餐..好快又一個下晝.
6點零食晚飯,今日年初四,鄉下習俗會請d同學黎食飯.兩個堂哥都請左d同學黎,大伯,三伯間屋都好熱鬧,之後我地去左三伯間屋睇vcd,睇到10點零先番去.
鄉下夜晚好黑,因為冇咩燈光,冇街燈,真係伸手難見五指,但係阿麻同堂弟妹佢地竟然可以行得好快,好利害,反觀我同阿妹,用埋電筒都行得步步為營,真係羞家..

>>February 8, 2003 at 4:04:47 AM GMT+8

2003 年 2 月 2 日 星期日 【晴】

今日訓到好晏,10點半先醒,食埋個早餐,無聊四圍行,今日仲有場籃球比賽,二隊對五隊,不過我冇去睇,因為太遲醒喇.食完晏,同堂弟妹捉棋玩下,好快又一個下晝,大陸d時間好似過得好快咁,成日都一坐下就天黑,好得人驚.食完晚飯,上二樓,見到阿妹同堂弟妹玩捉迷藏,我見冇野做又玩一份,哈哈,呢個細個果陣既玩意,都唔知幾耐冇玩,玩番又幾過癮喎..成晚都o係一陣陣既歡笑聲中渡過.之後玩到好熱(果日10度左右,可以見得我地玩到幾激烈..),去左沖涼,沖完涼勁凍,番到房見到有部hi-fi,突然好掛住903,呢個時候應該做緊《嘩嘩嘩!打到黎》,我明知呢度收唔到903,不過都唔知點解,插左插頭,四圍鈕台黎聽,俾我搵到個台齋播歌既,播d歌又幾正,所以聽左陣,之後都眼訓就去左訓.

>>February 8, 2003 at 3:35:17 AM GMT+8

2003 年 2 月 1 日 星期六 【晴】

今朝又係9點醒,唔知點解o係鄉下識得自己咁早醒,o係香港我實訓到11,12點先識醒.
今朝又有另一場籃球比賽,聯合隊對五隊,呢場年年都幾矚目,因為大家實力差唔多.我食完早餐就走左去學校睇,經過一輪大戰,近幾年聯合隊贏既局面被打破,聯合隊今年打得好差,又冇左我五叔,結果今日呢場輸9分,都算幾多下.場波一開始經已分晒勝負,五隊一路領先,完全冇壓力,後尾換晒d後備出黎都維持到戰果.
之後同堂哥去左洛陽市既市場逛左陣,1點幾番到屋食晏.下晝大堂哥去舊同學聚會,二堂哥就成日失蹤(聽阿爺阿麻講佢好似溝緊女,哈~),我就番房溫下書,唔覺唔覺訓著左,一醒都食得晚飯lu,食完晚飯二堂哥又出現(神出鬼沒-__-"),佢唔知邊到搵左盒象棋,我就同佢捉起棋黎,嘩~數埋數埋,我都好耐冇捉象棋,欏起d棋都覺得有d生疏.

>>February 8, 2003 at 3:23:51 AM GMT+8