2003 年 1 月 31 日 星期五 【晴】

新年快樂!
今朝我9點醒,起身食完早餐,就去睇一年一度既鄉里之間籃球比賽,今年我五叔扭傷腳,結果聯合隊第一場對住實力最強既二隊,就大敗20幾分.
睇完波,中午番黎食晏.之後,下晝去參觀大伯同三伯既屋,我記得上次番黎,大伯既屋岩岩起好,三伯間屋就未起既,宜家兩間都整到好靚,而且都係起附近,去行大伯度唔駛10秒,因為o係正隔離,而行去三伯度就用1分鐘左右啦.之後自己四圍行下,因為同d堂兄弟姊妹太耐冇見,大家都顯得有d生疏,我d閩南話o係香港又少講,有d溝通唔黎.後尾番左房睇帶去既書,睇到食飯.食完飯又去玩煙花,今晚玩d放小火花既煙花條,幾好玩.玩完去左大廳聽阿爸同阿叔,伯佢地講佢地細個d野,幾得意..原來阿爸細個有好多趣事架,我從來都未聽過佢講過,今晚我覺得同佢既距離好近..有種講唔出既感覺.

>>February 8, 2003 at 3:07:18 AM GMT+8

2003 年 1 月 30 日 星期四 【晴】

尋晚諗住訓,但係訓唔著,之後打俾二佬,同佢打aoc hae,一路玩到4點幾,本來諗住唔訓通頂,等陣間上車先訓個飽,不過玩aoc太傷神喇,結果就5點去訓左陣,6點又俾人叫醒左..執拾好d行李,準備出發lu..
6點半搭的士到火車站,諗住搭頭班車會少d人,的而且確係少d人,不過架火車遲遲唔肯開,等到7點10分左右先開,果陣架火車經已塞滿晒人..唔係..塞滿晒行李先岩,大家都大包細包咁搬..過關果陣幾多人下..又見到d常見既場面:有兩個人碰撞之下發生口角,好彩冇動武,唔係果度一定更加混亂不堪.
過到深圳8點零,搵車之後食埋早餐,9點半上車,正式開始今次回鄉之旅.其實果刻自己心裏面有十萬個不願意,覺得番到去會好悶,而且又要搭成8,9個鐘既車,d車空氣又唔好..一定勁辛苦,但係都黎到深圳,冇得縮沙架喇,認命啦..
10點左右開車,行左一段路,12點果陣落車食個晏,果陣預計5,6點到泉州,點知架車兜左d路,經過漫長既旅程,夜晚7點幾先到步,一路望住個天由白變黑..我番到鄉下喇..
4年喇,4年冇番黎,我對上果次番黎係中二(我個網有篇回鄉記,就係果次)..去到五叔同兩個堂哥都開左電單車黎等我地.鄉下d環境冇咩點變,我仲認得d路(奇蹟!),不過d路平坦左好多.8點左右番到去,同上次番黎一樣,一入屋阿麻就好歡喜咁走埋黎摸下我同阿妹,睇得出佢係好開心.
食完晚飯同d堂兄弟姊妹去左係天台放煙花,起初有d驚,因為爆得好勁,唔知點解我細個果陣敢玩..不過後來都點左支玩,我阿妹就一路齋睇.點完晒d煙花,望下個天,好靚呀..有好多星星,個天空就好似電影入面果d,原來鄉村既天空係咁靚架,雖然頭先星星既光芒俾煙花遮蓋左,不過煙花果d一剎那既靚,唔及得星星呢種持久既美.今晚好大風,天台好凍下,睇左陣就俾人叫走..之後見好累,都就去左訓.

>>February 8, 2003 at 2:49:19 AM GMT+8

2003 年 1 月 29 日 星期三 【晴】

尋晚7點零鐘搭車入將軍澳,冇去一排,又多左幾棟大廈,條巴士線仲越兜越遠..比起當初20分鐘去到阿婆度,宜家要用成40分鐘左右..都幾恐怖下.
就8點,當架車駛到將軍澳隧道對出既迴旋處果陣,個司機表演佢既駕駛技術,高速掟彎,產生左好強勁既離心力,搞到成車人歪埋一邊,咁都唔止..最慘係有位仁兄袋橙一甩,十幾粒橙四圍碌,佢呆左陣先尷尷尬尬咁執番d橙..好彩果陣上層冇咩人,同埋d人好好,幫佢手執..個氣氛都冇咁尷尬,執好之後見佢仲係不斷四圍望,d人又好心幫佢望下搵下,真係搵到多兩個橙..之後佢再點算過先至放心.
8點左右到左阿婆度,一入大廈俾個管理員留難,又話訪客要留資料..勁煩人,我口快快咁講左句「我新搬黎既,11樓呀!」,跟住咁岩見果陣lift門開左,就閃左入去.上到去一屋企,冇見一排既表弟,表妹撲埋黎,同佢地玩左一陣,之後食飯,食完飯就睇電視,睇到10點半去訓..訓果陣開住我帶去既收音機仔邊聽邊訓.
今朝8點45分醒左,刷牙洗臉食埋早餐,阿公就同阿婆去左覆診,之後睇左陣報紙,睇到d新聞寫大陸d旅遊車勁撞,睇到心驚膽顫,之後就同表弟表妹玩,咁又一個朝早.到左差唔多1點,阿公阿婆佢地番左黎,我食埋晏諗住走,之後另一個表弟又黎左,結果等到3點零,等佢地玩夠先走.番到屋企4點幾,一入屋見到d行李已經pack好,阿爸o係度周圍搵下有冇漏野,一問原來聽朝6點幾就出去..之後沖個涼,沖完涼就online,好似好耐冇on過咁..on左陣見冇咩人,就offline整個網,越整越起勁,每頁都加左d野,又加左好幾頁,一路整到食飯,食完飯再整到10點零,俾人吹熄機訓先停手.
聽朝一早就番大陸喇,祝我一路順風啦..
大家保重~2月7號見~

>>January 30, 2003 at 3:14:38 PM GMT+8

2003 年 1 月 28 日 星期二 【晴】

尋晚訓訓下醒左,見1點幾,迫自己起身打埋篇日記佢..不過太眼訓喇,結果尋日篇日記好短,應該係我寫日記以黎最短既一篇..弊喇,開左個壞先河,我怕我日後d日記會越黎越短..好喇,"ar"左好多字數,入正題.
今朝7點醒,冇尋日咁凍..不過因為今日著pe衫既關係,都係覺得好凍.今朝比平日早過樓搭車,早過平時番到學校..醒起今日有maths功課要交,欏左份maths出黎做.跟住之後兩堂history趕埋佢,終於o係小息前搞掂,唔駛留堂..o係history堂個break果陣,聽番sally講番尋日個tarot占卜結果..真係講得幾準,有d準到恐怖..隻牌話我冇咩信心,我記得我細個讀幼稚園果陣,係d好好勝,好自負既細路,不過唔知幾時開始,人越大,信心越冇,直到同佢一齊,我感覺到自己開始有番信心果陣,佢既離開又令到我d信心落番谷底..我宜家真係冇咩信心,我再冇勇氣鍾意人,我驚..我好驚再受傷.
今日小息同lunch勁打波,lunch之後果幾堂個人好亢奮..唔知發咩癲,勁玩..勁癲..最後堂中史,有test先靜落黎,上次派番黎個test幾高分下,搞到今次有d壓力,不過我諗今次都做得唔差既..
放學射左幾球波就番屋企,正正佢地去睇戲,我都唔得閒去,因為趕住番屋企,一陣要入將軍澳,過舅父果邊..聽日幫手湊表弟表妹(悲哀-__-..).番到去先沖個涼,跟住仲有時間剩,就整下個網,同埋打定今日篇日記,費事聽日先一次過打晒,因為聽日先打咁今日篇日記一定會短左一截,今晚如果有咩特別野聽日篇日記再補番.
我諗你地睇到呢篇日記既時候我已經唔o係屋企lu~

>>January 29, 2003 at 10:59:08 AM GMT+8

2003 年 1 月 27 日 星期一 【晴】

尋晚1點幾先眼訓去左訓,今朝7點醒,醒果陣覺得好凍..
今朝早會果陣先慘..凍到死,仲要係企咁耐..之後上既堂都係訓訓下就過..到左lunch,食完飯去左睇人打三人籃球比賽.之後果堂maths test,都識做既,不過就唔夠時間做,好慘..到班主任堂果時,sally用塔羅牌占左我同佢,不過因為miss黎左,未聽晒d結果..好緊張..唔知塔羅牌講d野係咪真係咁準既呢..?
放學果陣,見大勝,阿龜,dorami佢地打緊波,難得有場,就去打埋一份..勁好玩,d分數好緊湊,勁拉据..最後幾經辛苦先險勝到,果陣都4點45分,跟住我地就走.
番到屋企勁累勁眼訓..訓左陣,6點零醒左,打左陣vos,之後玩cm,之後睇電視睇到食完飯,我番房溫書,聽日測中史,不過溫左陣我又開左cm黎玩,期間舅父打黎,叫我聽晚過去佢地度過夜,後日幫佢地湊細路..唉~放假都仲係辛苦一輪,好慘..之後一路玩cm玩到11點幾去訓.
聽晚冇得online同二佬打機啦..

>>January 28, 2003 at 5:14:28 PM GMT+8

2003 年 1 月 26 日 星期日 【陰】

尋晚二佬send左隻aoc黎,收佢個file左都成個幾鐘(500幾mb..),1點幾先send完,果陣見icq d人走晒,二佬又話玩隻aoc,就打左俾二佬..玩玩下隻aoc,聽到d沙沙聲..一睇之下原來窗外面落住大雨..乜冬天都咁大雨既..好怪,之後仲覺得越黎越凍添..跟住同二佬慢慢咁玩隻aoc,慢速起野,而且我又洗晒腦唔太記得點玩,結果一round都玩到兩個鐘,玩到3點半左右先贏電腦..之後叫二佬申請個tripod a/c,搞左好耐..到左4點我見眼訓就去左訓先..
今朝起身隻眼仲係好痛..同時又感覺到凍番,搞到個人既移動力被減半,令我差d又遲到..今朝打埋鐘先入學校,好彩個miss仲放緊人入去姐..之後個早會吹左好耐風,好慘!
本來諗住一早番去溫econ,因為第一堂就test,結果當然溫唔到啦..唯有硬住頭皮盡量做晒佢啦.之後兩堂geog本來諗住做news cut(plan好晒^^),點知阿sir今日欏左d會考題上堂做,搞到我大失預算..結果我都係照計劃做news cut,之後問阿jay借佢本exercise黎抄..份news cut岩岩好用盡我果兩堂geog,小息覺得好眼訓就訓左陣.醒左聽到人討論緊坐位既問題,聽到佢地有拗撬.之後兩堂都聽書..
到左lunch,o係學校買左個杯麵,食完見佢地又討論個新坐位表,睇住d人好自私囉..為左自己又亂幫人編位,又呢度唔俾坐,果度唔俾坐,淨係就晒自己,咁就唔駛理其他人感受啦?我o係旁邊睇到好興,冇眼睇,唔想再理,之後番左位抄埋本geog exercise.lunch完左,我同正正講番,正正都好憫咁呻左一輪,之後我心情都唔多好.
今日又有講座,咁又冇左兩堂漫長既英文堂,不過今次個講座好無聊..
到左放學,仲要補中史,個人好累..好辛苦先捱到4點半..一番到屋企就勁訓.訓到6點幾先醒,之後開機玩cm,阿爸今晚公司又請食飯.等到阿媽番黎煮埋飯,9點半先有得食,之後番房執完書,聽住903繼續玩cm,玩到就12點先online打埋篇日記佢.

>>January 27, 2003 at 5:24:57 PM GMT+8

2003 年 1 月 25 日 星期六 【晴】

尋晚打機打到6點先訓..今朝10點零俾人叫醒左,隻右眼有d腫痛..
果然不出所料,今朝食完早餐,就俾阿媽叫我執房,執完房抹窗..之後佢冇煮晏,淨係將拜完神炸落既果d雞脾俾我同阿妹食.
下晏佢地出去,都叫有得抖下..就開機玩cm,一路玩到5點零沖涼,沖完涼阿妹又霸左部腦..激死..佢今次玩chatroom!之後我去搵news cut d新聞,佢用到6點半左右出左去睇電視,跟住我就online,一面整住個網..7點左右,見到二佬online,突然勁開心..因為成4,5日冇見佢online,今日4點零打過俾佢又冇人聽..原來佢個寬頻條街線鬆左,所以呢幾日on唔到line..同佢傾左陣,之後就去食飯.食完飯繼續整個網,跟住舊同學鰻魚打黎,先發現我冇去送個fd最後一程,冇人通知我..聽講都有廿幾個去..我冇去,果刻心情好down.
之後改好個日記d背景歌,就online同人icq,傾到10點幾,邊溫econ邊聽903邊icq,分晒心咁溫..到左11點,聽住<短期租約>打埋篇日記佢.

今日聽住903,發現今日勁聽到首<可惜我是水瓶座>,我醒起正正前幾日話過某某info用「誰人待我好 待我差 太清楚」呢句,但係用呢句果個人根本唔知邊個對佢好邊個對佢差,我都幾同意,呢句野我o係icq都見唔少人用過.
其實邊個對我地好,邊個對我地差,站o係自己既角度係好難睇到,因為我地會睇得好主觀,以為人地就晒你,就係對你好;人地逆你意,就係對你差..所謂「當局者迷」,究竟邊個真係對我地好,邊個對我地差,自己根本係最唔清楚果個.話唔定對我地最差果個,佢係一片苦心,但係我地睇唔出佢既苦心,反而d咩都就晒你,任你放縱既人,你以為佢對你好,其實係害緊自己.
o係首歌我反而鍾意前面果句,「如可笨到底 但到底 還是我」,呢句意識好正面..佢想話就算點蠢點笨,話到底果個都係我黎既..帶出左一種唔好放棄自己,唔好自暴自棄,我都有存在價值既訊息出黎,唔知大家有冇同感呢?

>>January 26, 2003 at 3:37:00 PM GMT+8

2003 年 1 月 24 日 星期五 【晴】

尋晚1點幾已經覺得好眼訓..但係都成2點幾先訓.今日勁好訓,訓到12點先醒,跟住之後落樓買光管,因為廁所個光管壞左,順便買埋飯黎食,食完換埋個壞光管,番到房阿妹霸左個機..又係睇留言板..之後我去左睇電視,睇到悶悶地番房聽903,聽到係一峰既專訪!後來阿妹讓番部機出黎,我就玩cm,一路玩到6點零,阿媽叫我落街幫佢欏野,跟住正正呢個時候打左黎問我今晚係咪去啟德,約好左7點..番到屋企,等埋阿媽番黎,6點50分先出門口,跟住見幾近,就行左過去啟德,7點05分左右到左啟德,打俾正正佢地..佢地仲未黎,仲要塞車-__-.
之後等左陣,入左大門望到carrie(其實係佢見到我先..),跟住睇人放風箏,等左一陣正正先同sally,阿fa佢地黎到.之後阿siu同津少到埋,就入左去玩,過左陣鯉魚都到埋,跟住四圍行下諗緊玩d咩好,本來諗住玩G-Force喎,但係行過左,之後去左玩個唔知叫咩既遊戲,一個代幣,都幾抵玩,fing左一輪..好過癮~之後都係周圍行,冇再玩機動遊戲,反而係咁玩攤位,換公仔..阿siu玩賽馬果度玩極都唔贏,不過後尾玩飛鏢反而俾佢發到威,贏到隻大公仔,總算一吐烏氣.之後正正又話玩G-Force,不過大家d錢都用得七七八八,冇人陪佢玩..就繼續四圍行,同影左幾張相,都10點鐘,就離開左啟德大笪地,sally,carrie同阿fa都豐收啦,捧住d公仔走.跟住話去食野,不過見都咁夜,我又唔肚餓,所以就走..諗住搵車搭番去,但係醒起星期五搭車見到張八達通扣完數係-$2.4..又冇散紙,於是行番去,反正都唔係好遠..夜晚一個人行真係好正,難得有機會,就兜路番屋,兜左去馬頭圍果邊,跟住又行上去舊機場隧道對出果條天橋,唔知點解我好鍾意果條天橋..可能因為行親果條天橋,腳底一定有唔少車高速駛過,好有氣勢,好好feel啦..夜晚仲靚,腳下一片金黃色..一路行一路吹住由海邊吹過黎既海風,真係好舒服.跟住落完橋行埋去碼頭果邊兜左個轉,好涼爽..之後返番上去,番到屋企11點左右..見阿媽咁夜仲執緊櫃,心裏面突然醒起..唉..弊喇,聽日係星期日,仲要係新年前既星期日..聽日一定有排執屋清洗間屋..

>>January 25, 2003 at 5:20:07 PM GMT+8

2003 年 1 月 23 日 星期四 【晴】

尋晚勁早訓左,今朝趁有時間打埋篇日記佢,之後就出門口,番到去又係岩岩好..早會果陣超大風勁凍,我睇住有張椅俾風吹到滑行左幾厘米..恐怖.
今日唔係咁眼訓,頭幾堂都坐o係度聽書,好難得.小息行出去課室,撞到鯉魚,同佢去左小食部,一路行一路震住..今日真係好凍..但氣溫明明唔低架..
之後兩堂地理,好悶,開始挨唔住..跟住又訓番.lunch果陣dorami同鯉魚都話唔想食野,結果去左小食部買個杯麵就算.之後出左去打波,可能餓左好耐波,今日入左好多球..之後1點左右又係三人籃球比賽,讓番個場俾佢地,今日場比賽算係激烈..可惜人地超班,阿siu果隊最後7分飲恨..
之後果三堂又好留心上堂,可以話係好難得既一日..
放學諗住打波,但係俾大勝捉走左..陪左佢行落九龍城,之後搭車番屋企.番到屋企,玩左陣cm,玩到6點零,冇玩去左online,check埋gb同埋同人icq,其間阿媽打黎話阿爸去飲,佢要加班,結果今晚個晚餐成9點半先煮好有得食.之後睇左陣電視番房..上左二佬日記,見佢幾日冇update到,呢幾日又唔見佢online..好奇怪..之後去左cmidi睇,cmidi換左新版面,都幾靚..之後update個網..最後就聽住903打埋篇日記.

>>January 25, 2003 at 3:39:42 PM GMT+8

2003 年 1 月 22 日 星期三 【晴】

尋晚2點左右去左訓,今朝6點55分左右醒,不過番到去學校又係打左鐘先入班房..今日勁眼訓,唔知點解..頭果堂訓足晒咁滯..之後econ聽左堂書,跟住我既病又發作,突然又好唔開心..冇原因既..之後果幾堂都冇出過聲,淨係o係度訓,訓完又訓,小息又訓..其間個腦不斷諗起佢..諗起好多野,伏o係張檯一路去到食晏為止.食完飯出左去睇人比賽3人籃球,今日果場比起尋日刺激左,不過都仲係幾一面倒下,後來俾正正誤會我嬲左佢地,根本唔係..係我自己d情緒問題,之前都講過,我一唔開心就唔想人理,我都唔理人,將自己封閉o係一個寧靜既世界,咁樣我會好d..如果唔係我一定發癲..大叫大笑..到時仲大鑊.跟住之後果堂又沉默過,到最後堂hist覺得唔眼訓,於是o係notes上面勁畫野,勁寫歌詞..唔知點解果陣我心裏面浮起<燕尾蝶>既歌詞,可能我真係好鍾意呢首歌啦..
放學補完課,見大勝,阿龜,dorami佢地仲打緊波,於是玩埋一份.不過玩左15分鐘..就俾阿sir清場,好無癮..因為呢兩日都俾3人籃球比賽霸左個場..雖然打得一陣波,其間又同阿龜撞埋一舊,擦損左少少隻手掌,但係都覺得個人好左好多..之後同斌哥阿杰行到油站等車..去到果陣我見有車,我追到架車時,個司機就開車,勁無奈..跟住又唔想等..於是行下行下,最後行左番屋企..雖然果陣已經好累,但係我鍾意一個人o係條街行得好快好快,俾d風吹住既感覺,好舒服..到左5點30分左右,唔經唔覺行到屋企樓下,入左7仔兜多個圈先番上樓.番到去on左陣line,之後見冇咩野做,又去左玩cm,玩到食飯.食完飯就睇電視,一路睇到10點..阿媽今晚又好躁喇,勁鬧阿妹,之後費事俾人鬧,就10點半去左訓lu.

>>January 23, 2003 at 11:28:10 PM GMT+8