2003 年 1 月 12 日 星期日 【晴】

尋晚聽wasabi,佢咁岩又係講到死亡.佢回顧番過去一年,佢發現身邊有好多重要既人都離佢而去,今日亦都有佢欣賞既Bee Gees既Maurice離開人世,佢話呢一年真係好難過..之後佢講d野我都有同感,尋晚其實心情好低落,因為真係唔識要去俾d咩反應..好愕然,聽佢節目俾到我好多思考既空間..亦都平伏到我既心情,唔知點解wasabi帶到種平靜既感覺俾人.尋晚chat到4點零就5點先訓..
今朝又遲左起身,搞到勁趕,仲差d遲到..今日個人好患得患失咁,有好多野諗..但係又唔知諗緊d咩..
歷史堂,本來test既..不過後來唔知點解變左open book test(之前訓著左,一醒俾正正同sally戲弄\__/,之後問傑傑先知咩事,原來個test變左open book,至於係點解..直到目前為止我都仲係唔知既,希望有d有心人可以私底下話番俾我知..)..
跟住lunch去左又一城食,我地五個人(阿siu,鯉魚,阿寶,dorami,我)搭的士去.當架的士到又一城個停車場,我個腦浮起我同佢第一次見果陣,又係搭的士,又係去到果度落..百般滋味,百感交雜.
之後pe堂打波打到好熱,又唔除得件冷外套,因為我今朝趕得滯冇理到..結果短袖pe衫裏面著左件長袖既super warm..搞到成日都要著住件冷衫,打波都好唔方便-__-..
放學又同大勝行落九龍城,路程雖然唔算遠,但係都講左好多野,離開左我既果個fd啦..game啦,上網既野啦..之後去龍珠兜左個圈,但係d鋪頭唔見晒..跟住搭車番左屋企.
番到去開住部腦,但係冇用到,反而見個人好累,走左去訓,一訓訓到8點半..俾人鬧起身食飯.
食完飯之後番房醒起聽日又有test,去左溫書.溫到10點零,無啦啦阿媽入房見到又鬧,話我溫到咁夜,叫我去訓..之前又係佢欏d唔知咩人同我比,話人地溫書溫到2,3點..宜家我溫到10點幾又鬧一餐,又話夜要我訓,我真係唔知可以點囉..
之後冇咩mood溫,等佢訓陣我開番部腦整個網,一整整到差唔多12點半..見搞掂晒之後就online,邊同人chat邊打埋篇日記佢.

今日去d留言板見到句寫得幾好既野..
　　千世之緣本難收，
　　願君珍惜眼前人。
　　毋待緣去空悲切，
　　莫以悔心顧今生。

>>January 13, 2003 at 5:18:47 PM GMT+8

2003 年 1 月 11 日 星期六 【陰】

尋晚好彩有蠍陪我講電話,我都冇咁唔開心,傾到5點先訓.
今朝10點零醒左,食個早餐就番房,好努力咁欏番晒d功課出黎做,同阿爸阿媽佢地成朝淨係講左一兩句野..一路做到下晝4點零,搞掂左積落黎既中史測驗改正同埋英文既剪報,之後去左沖涼.沖完涼出黎上左陣網..搵到段幾搞笑既片,之後我個"send file病"又病發,係咁send果段片俾人.
食緊飯,阿爸阿媽又夾攻我,我都唔知做咩事..唔通連食飯都有錯?今晚心情唔多好.
之後8點零,又匿入房自閉,今日講野唔過五句..連阿妹都冇同佢講野.

番房on住line,收到個令我好震驚既消息,我上年既一位同學離開左呢個世界..我起初唔多敢信,跟住問埋其他識佢既fd,原來係真既..
雖然同佢唔算得好熟,但係我個心都好亂,好唔開心,好唔知點咁..呢次係我第一次面對熟識既人既死亡..真係唔係好識面對..成晚個心都好亂,好唔舒服咁..自己都突然有股恐懼感..
唔通人生就係咁?真係話冇左就冇左,一切都咁突如其來,就連俾心理準備俾我既時間都冇?人生真係咁短..?
突然覺得好冇安全感,死亡真係好恐怖.
諗真d,人越大,越驚身邊既人早過自己走,果種覺得一定唔會好受.俾我揀..我寧願自私d,我死先,等我唔駛咁傷心..
今日日記到此為止喇..希望一陣聽wasabi果陣會有新啟發..

好似唔見左樣野咁;患得患失..

rhino,雖然同你唔算好熟,但係都叫做左兩年既同學啦..仲記得初初識你果陣,睇你身形,覺得你係d蝦蝦霸霸既人.不過識耐左,知道你係d對fd好好既人,所以你既離開好多人都唔開心..
同埋o係我眼中,你係個好叻既人,個天咁快要你走,實在係好可惜..希望你o係另一個國度裏面玩得開開心心!

　　在臨別時候通話 並沒記錄
　　而我們的過去 沒聲息的結束
　　但唯獨 遠處那面掛鐘 可以給我紀念這秒的痛

　　並無任何幸福事 活現眼前
　　連友情的證據 亦得不到半點
　　沒留念 也欠缺舊信件 竟看不見 怎麼可再相見

>>January 12, 2003 at 2:40:17 PM GMT+8

2003 年 1 月 10 日 星期五 【晴】

尋晚同人講完電話,online on到3點幾,喉嚨勁痛,跟住去訓.
今朝11點幾先醒,起身個喉嚨都仲係好痛,今日成日都係咁..
之後去銀行幫阿爸交d唔知咩費..番到黎順便買埋午餐.之後成個下晝o係度整個網,整到3點幾開埋903邊聽邊整,又o係網上搵到唔少903d野..整到5點幾先搞掂,出廳行左轉,又見阿妹又o係度勁食野,恐怖..跟住番房online.903果陣做緊<神洲大地小儀國>,今集請左有耳非文做嘉賓.有耳非文好搞笑,佢成日將差人講左做差佬,俾小儀話佢粗俗,佢即刻補鑊咁話番句差人darling,但係過左陣之後,佢又講錯左,講左做差佬darling..激死小儀.
之後上網搵d cgi既野,跟住菌姐打左黎,同佢傾左陣..部腦就俾阿妹霸左,佢又睇佢d留言板.傾到就8點,去食飯.阿媽睇黎心情又唔係幾好,一番黎o係度話我同阿妹.食完飯俾人屈左去洗碗,洗完碗又摺埋衫,之後睇左陣電視..就10點,我番房用一直開住而唔敢用既電腦,打番今日既日記..阿媽一見我掂部電腦,已經o係度勁鬧,我講左句野駁佢,佢就仲興,越鬧越勁,搵埋以前d野一次過鬧..我好唔憤氣,之後唔出聲由得佢鬧,我有我用部腦繼續搵我搵既cgi檔案,佢一路企o係度鬧,但係佢越講越離譜..開始話我係咪冇番學走堂,又話我放學四圍去街玩,咩都屈一餐,咩都欏黎鬧,如果係走堂既話,我冇請假,學校實打左黎啦;宜家放學要補課,我先會留o係學校,佢又唔信,我聖誕冇去補課,佢就反而鬧一餐,咁我如果出去補課都可以俾佢屈話我出去玩啦,完全係佢講晒.
跟住又欏唔知阿邊個個仔同我比,我一向都好憎阿媽人比人,佢比果d我全部都唔知係邊個..又亂咁屈我..我之前已經有d眼淚滴滴下..果陣我更加係開始忍唔住,流眼水同勁喊..佢照鬧,話我咁都喊一餐..痴線架..你自己亂up野冤枉完我,仲要鬧我..
今晚係自從上年7月同佢分開果晚之後,我喊得最勁既一次,我一路喊,又諗到好多唔開心既野,一次過喊晒佢..喊到12點幾..個人好累,不過大喊左一場覺得好舒服..
睇番地下成攤水,衫褲都整濕左少少..之後洗完面抹番d眼流,番到黎on住line,睇住個list好多人online,但係我個心又唔知點咁..跟住打埋今日篇日記..

是我或你犯錯了嗎?人被半路撇下,受那風吹雨打..

>>January 11, 2003 at 5:13:47 PM GMT+8

2003 年 1 月 9 日 星期四 【晴】

尋晚on住line,12點零,阿舜叫我打機,但係我chat到1點零,先搵番佢..結果玩到3點幾,之後見未眼訓,諗住開個vos玩陣,真係諗住玩一陣..點知玩玩下,越玩越精神,唔覺唔覺,都已經5點鐘..!我即刻熄機去訓..費事第二日番學又訓到咩咁.
今朝7點醒,勁眼訓..搞掂晒d野果時居然可以坐o係梳化訓著左..一醒望下個鐘..7點43分,大鑊!我最遲都要搭7點45分班車..得2分鐘,快快脆脆衝落樓,好彩一路上d燈位都岩岩好..我一去到既燈位就轉綠燈,過最後一條馬路果陣見架巴士到左,跑過去岩岩好最後一個上車..好險.
番到去,勁眼訓..仲要頭兩堂係勁悶既英文堂,第一堂已經訓到咩咁,miss仲要問左我兩次問題,兩次都唔知佢問到邊,唉~
頭三堂訓下醒下..
小息就勁訓..訓到第四堂到左我都唔知,第四第五堂仲要係history test..開頭勁頭訓,做到想死..不過吹吹下水越吹越精神,估唔到呢兩堂咁易過..
食完lunch,d眼訓又發作..又訓一輪,醒左醒果陣仲俾人笑,問我尋晚係咪做賊黎> <..我諗做賊都唔會訓得咁安心掛,仲一定冇我咁渴睡~
之後果堂maths有test,唔知係咪我有病..今日一有test我就鬼咁精神..但係之後果兩堂中文又係就合埋雙眼安息咁.
放學之後,諗住番屋企訓番餐,大勝叫我同佢走,跟住佢又話打陣波,我亦都打左陣波,玩到4點半,又有miss黎清場..之後就番左屋企.
一番到去屋企嚇我一跳,阿妹將d食完既野周圍掉,經我點算過之後,佢呢個下晝食左既野食有:
　　杯麵2盒
　　腸仔3條
　　朱古力糖1筒
　　忌廉bun 1個
我諗仲唔止..不過佢d食量真係嚇親我..之後俾阿媽打黎既電話老屈我拖地,拖完地就on左陣line.
到左夜晚,睇左陣電視,食完飯又番左房,突然諗起html碼入面有iframe呢樣野,於是就o係度係咁試..整落日記度,初時整到怪怪地,仲好搞笑.後來去左d網睇人地d iframe點整,無意中搵到個可以顯示/隱形既iframe出黎,再link去我個網,大功告成,咁就用左我成晚喇.

>>January 10, 2003 at 3:30:25 PM GMT+8

2003 年 1 月 8 日 星期三 【晴】

尋晚4點幾醒左醒,索性打番篇日記再訓過.搞搞下5點半..之後7點又醒過,勁凍.
番到學校,差d遲到..好彩宜家學校其他form考緊試,冇執得咁嚴..唔係我就開齋啦..話晒今日都遲左成2,3分鐘..搭2打鐘果陣我仲o係果限街,之後就跑番黎.唔知係咪咁加上凍既天氣,搞到病病地,頭果堂勁頭暈,結果訓左兩堂..一醒第三堂,未試過咁癲,尋晚又唔係唔夠訓喎..
之後成日個人都勁累,上d堂都訓訓下咁,又肚痛左成日..可能係今朝跑番去,吸左好多冷空氣落肚既後遺症..好頹.
放學仲要補課,欏命..最衰既係..我只不過係唔知邊度上堂之嘛,正正同queenie又唔見左人,我又費事入去住,入錯好瘀架嘛..我o係課室外徘徊,後來miss同正正,queenie佢地同時黎,點知佢地二條友仔玩野話我想逃走,最弊係miss信晒正正同queenie佢地既靠害之說,好無奈-__-,早知一早走啦!
補完課都4點35分,之後出黎見大勝佢地岩岩打完波,欏左粒波射左陣,玩到5點左右有miss出黎清場趕人走我地先走.
番到屋企on左陣line阿舜打黎,傾左陣無聊野,勁笑左一餐.之後6點幾,個icq突然勁忙(好罕有),菌姐又打左黎傾左一輪,俾我勁笑佢,開心死~唔覺又7點幾,出去睇電視,之後食埋飯.食完飯番房個icq又勁「喔噢」..今日真係好鬼旺..
就連佢都有同我傾,原來佢同個fd有d拗撬,所以唔開心..我同佢傾左好耐..同番佢chat到咁耐我覺得好開心呀,如果日日都可以係咁,我經已好滿足..
10點零俾人鬧,之後溫左陣history.但係到左11點幾又on番line,邊icq邊打日記..今日個icq真係好旺..打字都打到手軟,仲要打埋呢篇日記..-__-.

>>January 9, 2003 at 4:08:01 PM GMT+8

2003 年 1 月 7 日 星期二 【晴】

尋晚整個網整到3點左右去訓,今朝一起身又係想死..好凍.唔知係咪凍令人失憶呢?近排打日記經常諗唔起自己今日做過d咩..
頭果堂英文,訓到死左咁..之後果兩堂延續住呢個精神..
小息,欏左份報紙黎睇..好唔公平呀!點解廣州有雪落架,咁香港呢..?呢幾日凍到我薑,咁都唔俾番少少既bonus我> <..香港同廣州都唔係差幾遠姐..
之後兩堂中史,算係玩住過..
lunch,d人去晒補課,一個人無所事事,出到操場見有人踢毽,好彩之前o係教會玩過都叫識踢下,就join埋佢地玩,越踢越見大風,跟住踢踢下入左課室對出既小通道踢,一玩就玩到完lunch.
最後果三堂又好唔清醒..連續兩日都係咁,可能係lunch d飯俾人落毒!哈哈~
放左學諗住走,阿寶又叫我打波,於是我去打波.果陣d風吹埋黎,好似穿過d衫咁,凍到想死.不過打打下波都唔覺凍.我地之後又玩樣好正既遊戲---炸板(輸左話仲要請晒全部人飲野添..果度都成8,9個人架),好過癮,兼且好搞笑..玩到4點45分左右,俾老師趕走,冇得玩..
之後一番到屋企趁個身暖唔怕凍果陣沖左個涼先,之後阿舜打黎叫我玩炸彈人,發現原來已經開始扣緊點數..果50點冇左10點..於是就計住時咁玩左1個鐘..6點玩到7點,之後我on住line冇野做,諗住溫下history,岩岩欏起本書,過左陣hety打左黎,同佢傾左陣,佢話食飯先收線,果陣8點15分.之後我出左去廳睇電視.食埋晚飯,又睇左陣電視,番到房開住903黎聽同hae,今晚個icq好平靜,後來俾阿媽鬧,搞到我10點半要扮去訓,點知又開住部腦訓著..勁無奈-__-..

>>January 8, 2003 at 9:09:01 PM GMT+8

2003 年 1 月 6 日 星期一 【晴】

尋晚見好凍,諗住o係被竇取陣暖,好無奈之下訓著左..今朝醒左見部腦未熄,好頹-__-.搞掂晒一切番學前既指定動作,就快手咁打番篇日記,用左唔駛兩個字..都算係我寫得最快既一篇日記喇.果陣我又岩岩訓醒,唔太記得尋日做過d咩(可能咩都冇做啦..)..同埋我唔想放學番學先打,今日day2,放學有補課丫嘛,我記得架~到時放學番到黎5點零6點實又累又懶,打得一定仲少.如果等到夜晚先打又唔得,一次過打兩篇對於我呢d記性唔好既人好大鑊,我驚我搞亂左,將兩日炒埋一碟,咁咪仲衰,不如朝早快快脆脆搞掂佢算..
今朝勁凍,我已經特登比尋日著多左件衫,不過都仲要比尋日震得仲勁,行步路都行到小兒麻痺咁..番到去差d遲到,開locker欏書果陣都索性成棟搬走,我本來仲諗住可以買罐熱麥精暖下架嘛..都係個司機可惡..架車滿晒都仲要停o係度夾硬上多一兩個人,個個站都係咁..又話唔行入d唔開車..痴線既,架車滿左你自己仲要俾人上車,d人迫晒o係度你又話唔開車.
唔知係咪凍得滯,我今日番學做過d咩呢..?唔記得,哈哈
淨係記得食飯果陣見凍,o係學校買杯麵食,食完努力搵報紙做讀報,今日到我..唔知係咪我睇得太投入,又dup晒頭諗緊點組織同有d咩好講,點知俾carrie話我係咪訓左..講真果陣我都幾眼訓下..
之後果三堂又遊魂..
到左班主任堂,勁緊張,讀讀下突然唔記得左,好彩之後都勉勉強強咁過得去啦..
放學果陣見個個都唔去補課,我都冇去到.番左屋企,一番到去開住903聽,on左陣line,阿舜又叫我打機,玩到6點零.之後on住line,後尾醒起Geog個張sir話要帶量角器同間尺,我淨係搵到量角器,但係搵唔到把間尺..
之後去左食飯..食完飯,睇左陣電視..番左房,又無意中俾我搵番把間尺..哈,我間房就係咁..次次我去搵一d野一定搵唔到,好似我要搵支筆會冇筆,通常o係我放棄唔搵果陣就會無啦啦俾我望到我要既野..之後又online,同埋溫左極極極極極之少既中文,跟住去左睇電視-__-.
今晚覺得好神奇,發現香港真係好細..

>>January 7, 2003 at 3:25:05 PM GMT+8

2003 年 1 月 5 日 星期日 【陰】

尋晚聽wasabi果陣,聽住首<可惜我是水瓶座>,我又整多頁網..之後見冇同人chat,阿舜又叫我玩,結果一玩玩到4點先去訓.醒左果陣覺得勁凍,尋晚都唔覺..睇下部電視,得11度..
結果今日全日我都淨係識得震,由搭車番學震到番入課室..課室真係好暖.今日上d堂都o係度勁訓..之後lunch,一出去,凍到想死..加上學校其他form考緊試,冇咩人氣,好冷清,令到個環境更加凍..食完飯諗住暖d,不過都仲係好凍,結果匿左o係課室冇出去打波..o係度溫中史,之後果堂test..中史堂,個test就嘩哈哈左..之後兩堂econ係我今日唯一較有精神聽既一堂.放番到屋企,勁訓勁訓..8點幾先醒.食埋飯,匿o係房online,不過冇咩人hi,我睇睇下d網見凍..攤住部腦匿響被竇..
居然訓著左..

>>January 6, 2003 at 11:28:25 PM GMT+8

2003 年 1 月 4 日 星期六 【晴】

尋晚玩左陣炸彈人,越玩越眼訓..3點零on番line,跟住同二佬chat左陣,講講下佢話肚餓,跟住又講講下講到聽日出去勁擦一餐.5點幾先訓.
今朝訓到10點半俾阿媽剷醒左,食埋個早餐..睇左陣電視,入房聽903既細so.到左12點,阿媽話唔煮晏喎,仲買左三條油炸鬼話係午餐..好彩一陣會同二佬出去.
就1點,打俾二佬睇下佢點,原來佢仲訓緊..之後約左2點45分o係旺地恆(我地既暗號~)等.
跟住睇左報紙,幫阿妹溫中史,佢真係好抵死..讀中史可以讀到將d人,事件,地方撈亂晒..
例句一︰我問︰大禹之後傳位俾邊個?
　　　　佢答︰周!
　　　　我話︰下?錯!係啟,佢之後建立夏朝.
例句二︰我問︰咁夏朝之後係咩朝代?
　　　　佢答：周!
　　　　我話︰錯..係商呀..夏桀俾商湯滅架嘛.
例句三︰我問：咁商朝之後係咩朝代?
　　　　佢答：唔..春秋戰國?
　　　　我話︰周呀..
佢錯太多啦,不能盡錄..
到左2點,我就出去,費事遲到..岩岩好2點45分到左,見到二佬o係度,順便俾埋隻《戀愛行星》佢.尋晚講好左睇金雞,所以一開始就去左百老匯買飛.買完飛先3點,我地睇4點25分果場..仲有成個幾鐘,唔知點捱..諗住去食野,不過行行下過左對面機鋪,落左去兜個圈,二佬話冇咩機玩..之後二佬話搵車仔麵食,我地去左女人街果邊行,兜左個圈搵唔到佢想搵果間,行行下到旺電,又上左去兜左陣..出黎見到出左新一期(vol.34)既《蠟筆小新》,二佬買左本,我冇欏袋,唔買住..後尾又行番去百老匯果頭,轉個彎無啦啦見到二佬搵緊間車仔麵鋪,叫<極之好車仔麵>,d野食一流,服務都唔差~不過貴左d.食完野都係3點40分左右,之後行左落波鞋街果頭,轉左過好景果面,經過一間vcd鋪又入去睇左陣..最後又兜番去百老匯,見都只係4點左右,於是又落左去附近間機鋪,睇二佬玩左盤,見都差唔多時間,4點15分.
入場之後去左洗手間先,番黎一坐低就即刻開始..套金雞幾搞笑,又有d慘,笑中有淚,但係佢d拍攝手法好正..講70,80年代果陣又真係帶到隻feel出黎.
睇完都6點幾,出黎好明顯凍過下晝..之後見冇野做,我同二佬就各自番左屋企.
番到去沖埋涼食埋飯,睇勁歌..整體今晚d賽果都係ok既.不過女新人個雙金好核突,我阿爸都話佢,馬浚偉有獎都好無厘頭,同埋jay唱作人三甲不入都好怪,連阿東自己欏銅獎果陣都係咁話"不可思議"..而且d主持寸d歌手寸得太盡..搞到d氣氛有時好尷尬咁.同埋覺得佢亞太區最受歡迎男女歌手係用黎分豬肉..而最受歡迎男女歌手就係頒俾今年對tvb有貢獻既(幫tvb拍野,主持,做嘉賓之類,好似玩積分咁.)..好似正正info所講:香港樂壇頒獎禮已經變質.不過都睇埋港台個十大中文歌曲先算啦..
暫時我心目中既好睇頒獎禮排名榜:
1.商台
2.TVB
3.新城

>>January 5, 2003 at 3:40:40 PM GMT+8

2003 年 1 月 3 日 星期五 【晴】

尋晚on住line,一路chat到3點幾.今日訓到10點零,醒左開住903聽,播緊叱o宅第一週既三甲.之後食埋lunch,勁眼訓不過冇訓到,同阿舜玩左陣.跟住到3點零我訓左陣,訓到5點幾,醒左on著line..之後落左街買野食.
最近條街多左好多d xx議員既宣傳poster,我今日一出大廈就兩,三個人走埋黎派傳單,張張都唔同色,話咁快我滿手紙..搞錯呀,我都係落街醫下肚姐..唔駛咁趕盡殺絕掛?-__-
之後番到屋企,阿妹霸左部機..落一落樓姐,阿妹d攝位真係勁到我對佢佩服萬分..等佢睇埋佢上網既指定動作..睇d留言板,足足等到三,四個字,先欏番部腦.
之後玩左陣vos,跟住7點零出左廳睇tvb個新人拉票既節目,都幾好睇,最搞笑係EO2扮F4囉..扮吳建豪條友超似..哈哈哈.
食完飯,番左房上網,見冇人chat,我手多多去yahoo search "903",搵到好多個講903DJs既網,有個網度,終於俾我見到阿城,阿禮,阿金既樣喇!阿金果然靚仔,似但係靚仔過洪天明.睇睇下好眼訓,9點零訓到11點左右又醒左,跟住迫自己起身打埋篇日記佢.

>>January 4, 2003 at 4:28:33 PM GMT+8