Showhappy.net - Members diary

日記

日記主簡介

<< 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 >>

2003 年 10 月 12 日星期日【微冷】

LionDog出現返既唯一原因就係有野俾佢串之麻!! 唔係佢都唔會出現架啦!! 串串串..! 之前好忙麻! 而家咪寫返囉!! 你係咪日日睇先??

咁..Vannie, 其實個speaker靚唔靚呀?? 買唔買得過呀?? Mickey Mouse出既電器會唔會好易壞架?? 仲有呀, 你又串, 打錯左之麻, send左有你個頭既相俾我睇囉, 唔係send左個頭俾我囉, 得未呀?? 你明咪得囉!!! 你唔講佢地鬼覺!!! 枉我對你咁好!!!

呢個week真係好忙..都冇溫過書...黎左英國咁耐第一次喳!! 忙farewell啦, 忙basketball training啦, 忙攪society啦, 仲有lab reports.. 遲下仲有一個十分鐘, 佔成個module 20%既presentation.. 忙到今日既basketball training都miss左.. hehe 其實...係因為我四點三先俾人嘈醒左.. hee 希望下個week可以溫到書啦, 今個week既野完全唔知佢做緊咩!!!! 要做返個乖女先得架麻~~

呢排日日都俾人串九十幾次... 都係寫少d, 少d機會俾人窒.. 特別係個d有野串先留msg既人!!! 日日睇diary就係睇下我有冇講錯野!!!!!!! 超 !

>>October 13, 2003 at 8:23:15 AM GMT+8

2003 年 10 月 11 日星期六【微冷】

我

好倚賴，成日都要你地照顧我睇住我
好霸道，無論咩事你地咩都要就唒我
好無用，你地有事我咩意見都俾唔到
好麻煩，攪埋ｄ蘇州屎要你地執手尾
好死蠢，大事小事成日教極我都唔識

但係，我都知

我

好幸運，香港英國都有好好既朋友照顧我
好幸福，無論我做錯咩事你地都會原諒我
好幸運，就算點蠢都好你地都唔會放棄我
好幸福，你地會盡力保護我唔俾人傷害我
好幸運，每次跌低左都仲有機會爬返起身

可能你會覺得自己冇做過ｄ咩，以為我唔係講緊你，
不過，我知道你，你，你，你，你，你，你同埋你，
好多個無論識左幾耐，關心我既你都有睇我既日記，
所以只要你係睇緊既，我都想你留心聽住：

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
我　真　係　好　多　謝　你　咁　照　顧　我　

我　很　愛　很　愛　您

ＹｏＵ　ＭｅＡｎ　Ａ　ＬｏＴ　Ｔｏ　Ｍｅ，

ＴｈＡｎＫｓ　Ｎ　ＬｏＶｅ　ＹｏＵ　ＬｏＡｄＳ！！！　

xoxoxo
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

>>October 12, 2003 at 11:21:06 AM GMT+8

2003 年 10 月 10 日星期五【颳風】

八號同九號冇打之麻..俾人叫懶鬼都算數... 洗唔洗咁串呀?!!?!?!?! 叫人查字典..!!!!!!! *@#$&*#$%!

冇打diary係因為技術上既錯誤, 八號個日我朝早五點先返, 所以已經係九號, 而九號就更加早先返..返到黎已經係十號, 所以今日先打日記係好正常既!!! 呢D係非人為錯誤, 所唔係當輸, Vannie知到冇?

呢幾日既日子都撈到亂哂..都唔係好記得邊日打邊日.. 最記得咪就係有個白痴婆叫Vannie半夜三更打電話黎問我驚喜唔驚喜囉.. 真係勁驚啦!!!! 人地驚左幾日..驚到要開燈訓, 跟住佢就半夜三點九同我電話響...!!!!!!!!!! 人地勁醒啦香港快英國九個鐘喎..!! 冬令都係快八個鐘喳!! 何況仲未係冬令!!個傻婆仲白白痴痴一個人行街 ~windows shopping~ 朝頭早十點幾行旺角..一間鋪頭都未開.. 叫佢幫我食咖哩魚蛋又唔制.. 食燒鵝又唔制..!

今日就冇咩特別事發生, 只係個胃超痛...唔講點解, 你地口疏~~~ 第一次痛到標冷汗, 放學仲要Terence同我返屋企先得..佢仲話要call白車...好彩俾我阻止左..其實都未至於咁嚴重, 俾個胃休息幾日應該會冇野~ 我係pharmacist黎架麻!! >=) 返到hall寳寳就打俾我喇~~ 我仲提佢如果我痛死左, 佢一定要記住幫我播個首歌, 同埋我要白色百合!! no daisy(黃菊) pls !

P.S. 車車, 唔好再叫我皇帝妹, 唔係人地會以為我好霸道架!

P.P.S. 我知點解我今年更加想返屋企喇...因為有D人好恐怖...好假...雖然佢唔知我知, 不過都覺得好危險..

P.P.P.S. 肥仔居然會留msg!! ^^ 鍚哂你~

P.P.P.P.S. 今日Vannie send左個頭俾我睇喇!! 都唔係好好笑之麻!! 其實個頭剪得幾好呀!

P.P.P.P.S. 阿狗, 係咪兩隻腳, 兩隻手}瑹{先?? 你咁遲先黎.. 我知你好早就搵到阿=P啦!!! 不過見你咁好掛住我, 咁就算數啦~~~

>>October 11, 2003 at 4:30:53 AM GMT+8

2003 年 10 月 7 日星期二【乍雨乍晴】

....究竟係咩原因我d friends會變成咁架... 唔通係因為冇左我係香港照顧佢地?? 哼~ 你地知道我有幾重要未~~~ 姚緯車呀, 同你chat個個真係我黎架!!! 你係咪溫書溫到傻左呀?! 我同你足足講左54分鐘你都唔信!!!! 十個無奈.. 佢仲要我講d野証實我既身份.. 咁我就講我地幾個以前細個d野啦.. 終於都信喇! 點知跟住又send個msg黎, 仲要我講佢全名, 住邊, 有咩花名!!!!! 仲要佢.....佢....佢以為有人冒認係我..講粗口問人邊x個......我真係俾你吹脹...!!!! 我已經自爆埋我既瘀野啦!! 講哂都仲要我開埋webcam...!!!!! 平時唔見左我, 搵我個陣又唔見你搵得咁謹慎, 咁仔細!!!!!!!! 到佢終於信我, 先知原來佢唔信係因為我同佢講"我好掛住你!"... 佢話我平時會話"我好掛住你地!"喎!!!!!!!!!!!!

好~ 為左就好攪笑既阿Law, 我地而家轉Channel去馬來西亞~

今年既天氣唔知做咩咯, 好凍左, 好似一月個陣咁!! 又大風又落水!! 十月已經要帶頸巾.. 放左學又去打波, 不過唔好玩左, 可能因為下個星期三已經開始比賽, 佢train人地之前有打個team先.. 而且我唔中意個教練, 再加埋我上次聽到佢話d中國人燒煙左之後周圍吐痰, 點點點咁, 佢仲話唔知個d係中國人定香港人, 佢知我係度左, 都咁講, 擺明講俾我聽, 因為呢度d人唔知有香港人既話, 一律都group哂係中國人, Hong Kongese呢樣野都係個日佢話我係Chinese個陣我講佢聽左.. 所以我覺得大家都好似唔中意大家..

我發現我真係越來越白左, 係膚色, 唔係八婆個八!! 唔該!! Terence話佢以為我用美白左.. 我想有返少少色, 唔係又好似面青口唇白..

今日train完返黎, 好辛苦咁煮飯左, 諗住得食佢又fire alarm.. 唔得食! 要行十層樓梯落去左, 再行返上黎.. d飯凍哂左.. 呀!! 話時話, Richmond個lift仲未整返好..老闆..! 成三個禮拜! 今日又行十層上N Floor..!! 成日係度扮哂整.. 你一日整五分鐘架?! 成架lift折左再裝都得啦!!

想死左.. 馬來西亞廣東話唔易講.. 阿Law, 我咁偉大就你左, 你拜五參選sexiest man報答我啦~

P.S. 死肥仔, 唔好以為留呢個名我就唔知你係邊個!! 你張床我未返你都要換啦!!

P.P.S. Vannie, 我都線過一鑊...真係少少水都好線.. 不過打波反而好好, 一d都唔線, 我著第二對打波, 線到我d手腳調轉哂!!

P.P.P.S. 車車, 我都知阿生講D野有用呀~~ 不過佢已經放棄左我喇~ 佢轉左行去賭波喇!!!!

P.P.P.P.S. 阿Law, 我覺得咁樣人地會唔明左, 會以為我同你係度講秘密~ 如果我d friends笑我以為我打錯哂d字笑我, 你就要俾我殺左!!!

>>October 8, 2003 at 6:47:11 AM GMT+8

2003 年 10 月 6 日星期一【颱風】

今日放左學同Stefan一齊等埋Ivan就去左Stefan屋企食晚飯, 等左Ivan成廿分鐘, 不過撞到PK, 傾下計都好快過~ 去到Stefan到同阿Law, Rebecca佢地傾下計, 睇下七十八蚊一本既一周刊, 我發現用廣東話d時間真係過得快好多!! 之後阿Boyz都黎埋, Nino煲湯啦~ 好正!! Stefan炒既海鮮烏冬都好好味!!! 不過最衰都係佢地又講鬼故...!! 雖然今次唔係係我隔離講, 不過我都知道佢地係有講我而家住緊個hall...我已經專登唔諗.. 衰人阿Ken仲要走個陣特登提我!!! 係Stefan佢地到走已經係成十二點..仲要勁橫風橫雨黑蚊蚊!! 死Nino仲要突然之間係我後面搭我膞頭.. 我真係好大聲叫左出黎, 因為真係好驚好驚..又驚到流眼淚...今晚又要開燈訓........ 都係唔寫喇.. 唔好諗咁多..早d訓....

P.S. 車車, 呢度都upload唔到, 我放相個幾個website你仲有冇呀?? 日記唔寫字..用相..好難喎!!!

>>October 7, 2003 at 8:24:27 AM GMT+8

2003 年 10 月 5 日星期日【乍寒還暖】

琴晚玩到今朝五點先返, 所以而家先打, 唔可以當我冇寫架~ Vannie!!

其實琴日個篇都唔係好長者~ 有一半都係覆msg既!! 真係講我做左咩既都唔係好多~

好, 講返琴日先~ 琴日真係冇去跑步既, 呢個唔多講喇~ 你地都冇人會expect我會去做架啦~~ 不過我真係有練波架!!! 今堂練完之後都冇上一堂咁重, 我講對腳~ 暫時撬腳都唔洗用兩隻手~

練完波就去meeting啦~~ Aaron好掂, 搵到咁多人!! 我同Candy完全以為得幾個我地圍內架!! 點知total有21個!! 係Hall 門口食左好一陣風先決定到去pizza hut坐!! 因為都冇咩選擇, 呢度得Pizza Hut先坐到咁多人!!! 食完之後上左阿Wei個hall, 一個70鎊既hall, 即係一個week貴我地20鎊, 但係都冇cleaner! 好~ 我有錢剩既話都會考慮咁樣用~ 哈哈

係佢到坐左一陣就落左去Livingstone (Pub) join阿Ken,Stefan,Law同Alex, 今晚好多人, d男人上哂去除哂衫除哂內衣褲話選咩sexiest man!! d人好high啦, 不過我同fanny一眼都冇昅到, 正係捉住傳聞中既Boyz, 因為佢地外形似Boyz喳, 不過阿Mike側面激似梁漢文!!! 真係好似!! 七八分面似到爆, 未試過見到d人咁似囉, 所以成晚都覺得佢好攪笑~ 成日捉住佢研究, 攪到俾人話白x... -.-" 所以係pub到都係同阿Law講野多, 不過被Stefan踢爆左我識親馬來西亞人都同佢地講我識個男仔叫阿Law好攪笑, 所以佢琴晚有d扮cool啦!! 雖然都應承左我星期五落Livingstone跳天鵝湖~

去完pub就去左boyz既hall, 但係阿Law佢地要返去練舞所以冇join到, 得返我,fanny,pk,ivan,leo,阿偉同埋boyz~ 又係玩Truth or Dare!! 不過佢地玩dare多d, 唔係你地係咪都話個樽指中我之後係咁問我野!!! 不過琴晚既dare都唔見得好好多!!! 因為除左阿偉,fanny同pk會幫我之外, 其他都係d加害我既人!!! 唔..boyz都冇做過d咩既!!! 即係話得ivan同leo囉!! 不過都夠死!! 問埋d好難答既問題!!! 攪到我飲左2L水!!! 2Litre呀!!!! 之後仲要係咁加鐘唔俾去toilet!!!! 死Ivan, 鑊鑊都針我啦!! 我得返一個字去得, 佢又加我一粒鐘!!! 都係阿偉好人好多!!! 肯拯救我!!!

玩完Truth or Dare佢地就講鬼故!!! 你地都估到我會有咩反應啦?! 佢地仲要係講返我地身處個間房既鬼故!! 作死!! 再加埋boyz係睇到個d野架喎... 想唔信都唔得!! 所以我唯有同阿偉同fanny大大聲咁講其他野, 唔聽佢地講野啦!! 原來一心唔可以二用都有好處架喎!! 不過都係好驚!!!!! 真係好驚, 特別係走個陣, boyz送完我地出去之後, 即係跑返黎搵我地, 仲話咩開口中..連衫同電話都冇拎就去左Leo到訓!! 零下幾度落住雨都寧願著短袖喎.. 見到d咩會有d咁既反應先...?!!?!! 所以走個陣我同fanny諗住上我到執d野再去同fanny一齊訓..不過執野個陣Ivan又窒住哂!! 所以就擱置左.. 又係要開燈聽MD訓...... 好似初初黎度你地嚇我水喉同床下地個陣咁.. 次次聽完or睇完恐怖片都係咁... 不過最慘係唔夠膽去廁所..好彩講鬼故前都去過一次, 唔係個兩Litre水真係死得... 唯有等等等等等到天光先.. 我好記得我係6:36分去toilet既!! 出去條走廊又長, 仲要勁大風...d風聲好恐怖......

P.S. LionDog, 你知唔知點解d明星要攪fan club呀?? 因為佢地好難見麻! fan club就係定期現一現身慰勞下~

P.P.S. 華, 係香港既日記係唔會咁長既~ 你由我啦~ 一係你黎陪我啦!!! 唔係會悶死我架~~

P.P.P.S. 好掛住同你地一齊去行街買衫... Vannie, 我有冇話你知我地對鞋落雨好線架??

>>October 6, 2003 at 7:51:42 PM GMT+8

2003 年 10 月 4 日星期六【綿綿細雨】

女人是感情的動物,
男人是解決問題的機器.

今日睇到呢句野, 都有50%贊同~
首先同意既係 +男人-->解決問題+
好多時有問題既時候, 好自然都會搵個男仔去做,
e.g.換燈膽, 修理電器, 搬野, 頂酒, 等人, 食飯霸位, 睇戲買飛, 燒野食拎炭, 送人返屋企, 半夜落街買野, 代替女仔俾人打, 等等等等都應該係男人做既.

但係我絕對唔認同話佢地係機器囉!! 機器要人手去開關佢地先識郁, 你話郁就郁, 停就停, 完全接受哂你既order~ 話男人係機器?!!? 你幾時有聽過機器接order時會話say no? 會問點解? 會問一陣先得唔得? 會問可唔可以唔好? 會話唔係掛?!

至於話女人係感情既動物, 無錯, 我地係有感情既~ 所以我地有權係任何時候亳無原因地大笑or大喊, 無原因地咬人, 打人, 因為我地有感情, 但係我地無控制系統~~ 所以我地可以無理由任性地發脾四, 掟野~ 亦因為我地係動物唔係機器, 所以我地可以隨時隨地say no, 唔制, 隨時隨地問點解, 隨時隨地講可唔可以唔好, 同埋隨時隨地講一陣先得唔得.

希望Stefan睇完之後會明白啦~ 呢個人居然問我佢呢排縱佢女朋友Helen縱得好犀利, 咁點算好喎?! 問我? 問岩人啦!! 點算好?? 繼續縱囉!!! 居然問我點收服女朋友?!?! ╱[?! 講你知?! 你當我係男仔呀?!!

今日又大風又大雨, 阿Foong同Teo佢地今朝早八點半去Leeds喎~~ cool~~~ 希望你地安全返黎啦~ 不如我地拉大隊去Leeds讀書啦!! 星期三Ivan同Macau黎既Boyz先去完, 今日你地又去, 聽日又到Ivan同Boyz佢地又去飲茶.. 兩頭住家咁.. 係喎, 今日要叫Teo做靚仔Teo喎, 個msg寫得咁好~ 如果你寫u ask God for a nice, pretty friend and he send u Kia既話, 我再叫你超靚仔Teo, 好唔好?? 呀, 今次講野無加個左字係尾, 你睇得明先好呀!!

琴晚online on到兩點幾, 超肚餓, 於是就同埋Ivan, Teo同Aaron一齊去食野啦~ 食完都三點幾~ 我都知on diet唔應該食junk food架喇, 仲要係半夜三更食, 不過最衰都係佢地啦, 如果唔係Teo講開KFC, Ivan又肯去, Aaron又住得咁近Rajars, 咁就唔會去食啦, 係咪?

Vannie呀, 你呢排有冇行TrendyLand呀?? 我想買個對Mickey喇叭呀, 但係我上網check佢冇呀, 你下次去幫我昅一昅啦~~ 至多.. 我幫你叫佢地唔好笑你個頭, 好唔好?? 我知佢地呢個唔係格硬搵野笑喇!! hehe 仲有呀, 如果你下次去到半夜三更先返黎係因為食個碗叫做"講出黎..我驚你恨喎.. 你又冇得食"既糖水既話, 唔好話我知呀! 食d咁既糖水因住食鬼死!!!

Aaron, 你既留言都好有水準呀!!! 可以講到自己好似路人唔識得我咁!! 而且你d文彩咁好, 四字成語都出埋, 琴晚又咁支持Teo講普通話!!! 梗係要同你做好友啦!!!!

聽日朝早九點半籃球隊要跑步呀~~~ 到五點又要train... 但係呢排得零度喳喎.. 我似唔似咁勇先?! 今年真係凍左好多~ 對腳岩岩先可以唔洗用手都抬得起...你就要我倒塔咁早去跑步?!! 如果我起到身就去跑啦.. 但係.. 唔知點解我有預感聽日會唔舒服.. 不過, 五點個training我就打死都去呀! 我琴日先交左55鎊($715HKD) 會費架!!

今日Open Day, 所以我同Nina估星期一應該有lift搭, Main Campus部lift足足由第一日上堂開始到而家壞左兩個week都唔整!!! 我地琴日已經一致裁定左佢係特登留番open day整, 等人覺得佢有做野 and in case佢open day前一日又壞過!! 你話我知, 我d學費死哂去邊?!?! 日日都攪到我行十層樓梯返學...你老闆!!!

Rebecca, 我唔知你有冇睇我diary, 不過我想話你知你既好同屋主Stefan話得你可以同我比---比粗魯喎~ 呢條友仔身痕~~~

LionDog, 你係咪又要我攪fan club先同到你講野?!!!?

>>October 5, 2003 at 5:21:36 AM GMT+8

2003 年 10 月 3 日星期五【微冷】

今日唔開心.. 因為又發現唔見野.. 之前已經唔見左兩樣野.. 一隻綠色既耳環同埋條腳鍊.. 今日就唔見左條紫色既紮頭髮橡筋.. 雖然呢d全部都係cheap野, 但係都好唔開心, 因為我係俾人偷既.. 隻耳環我知係我自己整唔見, 不過條橡筋我知係俾佢偷左... 因為佢第一次見到已經粒左去話要..我唔肯, 死都要返, 佢先好唔願意咁俾返我.. 雖然我唔肯定係琴日定前日唔見, 不過佢兩日都有黎過..上次用完到而家除左佢黎過之外, 就只有Ivan同Stefan, 佢兩個男仔要黎有咩用?! 今日發現左之後真係好嬲, 我知佢不嬲見親咩都拎, 靚既,唔靚既, 中意,唔中意佢都要照拎, 廚房既野偷, 人地走廊既poster偷, 戲院既牌偷, 街邊既路牌都偷! 但係我冇諗過佢會連我個d都偷.. 如果係我係度, 你玩咁拎左去唔俾返我都已經夠衰, 因為我一早已經話左好中意,唔制, 佢仲要係我唔係度既時候拎左去, 成日話佢點同人地講我地點friend點friend, 我唔覺得囉..你可以連d咁平既野都偷左去..雖然經過上年我已經唔想再同你地呢d人做friend, 我覺得你地真係好奸, 成日講大話...唔係我屈你, 你自己都係咁講..叫我唔好信你地呢族人, 我已經有好多次唔想再同你聯絡, 你知道我一d都唔信你地呢種人, 由你個地方黎既, 你係唯一一個我仲有contact既, 其他我連住邊都冇講, 電話都delete哂, 如果唔係上年岩岩黎到個陣你咁睇我, 我一早就會連你都cut埋.. 但係我真係估唔到你會為左d咁cheap既野去連我既野都拎囉... 我發現左之後真係忍唔住send左個msg問佢有冇拎到或者收埋左.. 如果佢個時話係佢到既話, 我都可以當係惡作劇, 但係佢居然唔reply囉.. 平時我唔搵你,你都會係咁打黎.. 好, 我當你唔得閒, 咁點解你之後又係都要黎搵我?! 就算我話唔得閒你都要黎? 黎到仲提都冇提個msg.. 平時你一定一到就問我個msg講咩.. 我忍唔住問你, 你又話唔知我講咩,又話冇拎到, 又話我d野周圍劑可能自己唔知擺左去邊..之後又拉開話題.. 唔知劑左係邊?!!! 我有一個袋入起哂架!! 咁多條唔見, 整係唔見你中意個條?! 我得一間房架喳!! 廳都冇! 連d衫都冇拎出黎呀, 有咩可以周圍劑呀?!! 可唔可以唔好攪便呀?!!! 你認左佢, 話你真係好中意,忍唔住拎左, 我條氣都順d, 而家唔認之外仲要繼續扮friend?!! 你真係當我傻架?!? 咁平既野你都偷, 我其他d野仲洗剩?!! 我已經話我下年返香港買過俾你, 都仲要咁.. 真係好無安全感.. 係得身邊既人都係我好信任既人, 每次一有事就會冇哂安全感... 好想返屋企... Stefan今日話我成日都提住d朋友仔, 佢係指生生, 周周, Vannie你地, 佢話我成日都話好愛你地... 既然我咁愛你地, 你地黎接我返屋企好唔好........ 我已經決定左我唔會再俾佢地呢d族既人埋身.. 唔好話我歧視, 因為一開始我係當佢地係friends, 我係識左佢地, 知道佢地既為人之後先唔中意佢地既, 一個係咁, 兩個係咁, total六個都係咁!!!!!!!!!!!!!

>>October 4, 2003 at 3:39:10 AM GMT+8

2003 年 10 月 2 日星期四【陰晴不定】

我今日去左好多地方呀! 有Trendyland啦, Giftland啦, 百佳啦, U2啦, Wanko啦...既website呀!!!! 好掛住米奇老鼠..唔知佢近排點呢...

今日識左好多香港人啦~ 勁開心~ 首先同Ivan返學個陣撞到Candy啦, 之後再撞番去錯課室既阿Yan, 放學再見埋阿偉, (係咪好香港名呢?) 之後返hall, 去買野個陣同Ivan傾傾下又有個女仔走黎問我地係咪香港黎喎~ 佢叫Fanny呀~ 又係fresher黎架! 嗯, 我都明白既, 我上年除左去敲門之外, 仲一聽到廣東話都係會問人地係咪香港黎!! 同佢地一齊個陣真係唔同feel d架~~ 要攪Kong Soc先得!! Ivan你攪點佢啦~~~~~~~~又話要攪function喎~ 做野先得架!! 成日正係係度串!!!

識左Fanny之後, 去左搵阿Foong同Teo佢地睇下佢地今日又有冇興趣做goal keeper~~~ 哈哈哈哈~ 話事話, 衰人Teo, 我幾時有迫你咁講呀?!? 我都未話你好話俾阿Foong知我叫佢做阿瘋!!! 你唔講佢都唔會知左啦!!! (我特登用馬來西亞既口吻,加個左字架,有冇親切感呢??) 你快d同我練好d廣東話呀! 識聽有鬼用!!! 要識講麻!!! 我打死都唔會講普通話!!!!!! (我係識,不過唔講!)

原本心情都好好架, 不過又同Angus鬧交...次次講親野都係咁.. 不如唔好講啦..我唔想越攪越禍..

今朝九點做lab, 返到去又話冇得做, 因為冇左rabbit ileum... 死架..又話有experiment, 收我九千幾鎊學費, 收多人地成二千鎊, ($26000HKD) 我交咁多錢你地用哂去邊呀?!!?!?

P.S. Ivan, 我原本想打你中文名架~ 不過算啦~~ 我係Bradford到揚算喇, 費事揚埋返香港啦.

P.P.S. 著楊中衫點會有人笑呀?! 佢地鬼識睇咩!! 什麼繼I Love Hong Kong後又一攪作?!!! 你地格硬搵野黎笑之麻!!! 冇寫一日之麻!!! 洗唔洗好似訓導咁捉得咁緊呀!!!! 你唔好俾我發現你冇寫呀Vannie!!!

P.P.P.S. 已經有D想GIVE UP BASKETBALL...因為星期二TRAIN完到今日仲好支力呀...今日撬腳個陣仲要用兩隻手先抬得起隻腳...想死...

>>October 3, 2003 at 7:14:59 AM GMT+8

2003 年 9 月 30 日星期二【晴】

我都知今日唔會有好野架喇... 首先隻玻璃杯無啦啦跌落洗手盤爛左, 都未跌完喳, 書架最高個本書又跌埋落黎..又係未趕得切擰轉頭, 另外個幾本書又一次過跌哂落黎, 仲要敲落部電腦到再跌落keyboard..攪到keyboard個兩隻腳爛左... 呢d野跌哂落黎都未夠, 今日練波個陣仲要跌到瘀哂...手同腳都係, (手同腳冇跌落黎) 不過打得波就預左, 冇得講~ 今日training多左好多人, 好多都好有水準, 要爭一席位真係唔易! 仲要俾佢掟左去defence... 完全唔係我個飯.. 不過我一定要俾心機練多d, (因為入sport centre已經要成$715HKD, 再加埋件衫$195HKD) 而且我有生生做遙距教練~~~ 雖然train得都好辛苦, 不過我一定要make sure我入到正選既!! 無理由既!! 你地打左十年,我就睇中十年, 點都會學到d既!! 至少唔可以衰過d新手! 而且真係好想打..籃球令我好似返番楊中咁.. 除左因為生生佢地之外, 個陣打親ball, 寳寳,我,LionDog,Vannie同阿華都係一隊架麻, 所以我一定要攪得掂!!!!!! 應唔應該著番楊中套衫打呢? 會有衝勁d~ 今日佢問填咩名個陣, 我填左啦, KiaTsui, 個T唔會同我印細楷掛...好樣衰架喎...我已經專登用粗體寫架喇~ 本來諗住寫Kia算, 不過得三個字好似都唔好睇既.. 如果可以印中文就好喇...

今日俾人玩.. 話我同邊個邊個一對, 好彩佢地知我唔係, 只不過明知我唔想人誤會, 所以先專登整鬼我,係度屈我..(好似你地咁..) 其實都唔知咁係好定唔好.. 佢地知係屈我者, 其他人唔知麻.. 不過佢地唔講, 我又會連講清楚既機會都冇.. 唯有講得大聲d, 等其他人知道啦!! 我都話樣樣野都有好同唔好架啦..

練完波之後好down下, 好彩有Ivan陪我, 雖然佢成日串我, 不過同佢一齊真係好香港feel~ 可能因為佢係fresher, 仲未俾英國薰陶, 仲有香港既style係度, 所以同佢一齊就好似平時同你地一齊玩咁~ 雖然條友仔成日串七七!!! (呢三個字係咪好熟呢? LionDog既口頭禪2) hehe 不過就算佢俾英國薰陶左都冇問題既, 佢同我地係同一類人~ 唔通係因為我地咁多個都屬狗? 定係因為佢都係IVE人呢? 今年有咁多香港人真係好~

又係食哂蕉既一日... 希望聽日會好d啦...

P.S. 咩蠢呀?!?!!!! #$%&#$^ Summer返去個陣好多人都話我成熟左架!! 你就蠢呀!! 蠢=P!!!!
P.P.S. 生生教我既秘訣我已經列左出黎, 你地諗到就要再提我架!! 0M我架, 係咪?

1. 你可唔可以話我知點打籃球會打得好d呀?
Ans: um~~一接到個波, 唔好咁快拍佢落地住, 咁樣可以做多d 動作, 如果咁快拍落地就一定要帶波~咁就易d 比人搶到

2. 如果我要mark個個人成日走得好快...周圍走, 咁點?
Ans:有波定係冇波果時走得快?
冇個陣,不過有咩分別?
Ans:冇波周圍走咁冇辦法, 如果佢係3分線周圍就唔駛mark 咁緊啦~~就咁企係佢前面就夠啦

3. 佢跑得好快, 成日都要追住佢企佢前面,冇波周圍走係因為佢想要波....咁點?
Ans: um~咁佢咁想要波就比佢啦, 佢咁想要一定想帶波過你, 咁佢有波係手就唔好咁貼身~如果唔係一步就過左你, 但係~唔貼身就可以射波~~咁樣你put up 兩隻手~要高d, 咁阻下佢啦~~~都係唔入多

4. 仲有...罰球and遠既波我點都唔夠力射...咁點?
Ans:屈膝先, 到隻腳差唔多直, 就雙手推個波出去, 要協調~咁就可以射得遠d, 好多d 腳力~

5. 波都掂唔到?
Ans: 係呀~咁冇計啦~如果係新手, 只要唔好犯錯~射波唔好大針, 唔好成日帶波唔交波~~ 咁都ok 好好啦掂唔到波, 就多d 走位, 唔好企係度冇做野, 走位~走去d冇人既地方嘛 (去d 你覺得自己射得入既地方)

6. 打全場, 人地拎到個波attack個陣, 咁我地defence個陣又有咩秘訣呢?
Ans:睇返你自己果個位, 唔好跟波走

7. 我唔識走籃呀, 點算?
Ans:走藍射波要練多d ~冇法~

8. 射罰球大針?
Ans:慢慢射, 大把時間啦

9. 有咩鞋冇咁線, 唔會跌到瘀哂架?
Ans: 咁呀~買對~硬身d 既波鞋啦, 個底d 紋深d 啦~唔好太淺

10. 可以減肥, fit 哂你啦, 慢慢啦, 但係打藍球, 隻手會粗哂喇喎, 咁慘~~~ 不如唔好玩啦~~ 攪到傷哂咁.......... <--- 好好既advice! 不過我唔會放棄架~ (暫時)

11. 仲有呀~多d 交波比人, 咁人地就會多d 出錯啦, 你留機會就大d <---呢個係生生教我可以留低打波既秘訣

>>October 1, 2003 at 7:24:53 AM GMT+8