2004 年 3 月 4 日 星期四 【微冷】

尋晚上左sa度上網~~~一上就直情o係佢度訓埋~~~
因為 jovi 都落左黎借我個位訓呢~呵呵呵~
但係,繼尋晚我走左堂晚選--->非處方用藥與家庭用藥 之後~
我今朝係又走左堂八點的--->報紙編輯 ,九點半至醒~落返去換衫就返 PE 喇~~~

今日上 PE ........都唔太出汗,因為都冇乜點打過波,呵呵~
上完,返房換衫就出去食飯喇~~~今日齊晒八個呢~~~
去左蘭州拉麵食啊~~~一路傾一路食,去到點幾先走~~~
跟住陪青去出電話卡........姨媽就走先,因為要去睇醫生呢~~~保重啊~~~

出完卡,青、sa、立、我、恆就過左體育館問野,但等左勁耐都冇人理......
立要出去買書,恆要返房打大佬,咁就走先~我地三個等左一陣都走喇~
因為我地發現份計劃書要打過呢~所以就去左青間房打喇~

期間呢~青 接到msg出左去,返黎先發現部電話放左o係宿管度冇拎喎~
佢再返落去一睇.......部機已經唔見左喇~唉~打去亦已經關機~
好在佢剛出左張卡.........天意?
結果我地打完份野就去左學生活動中心搵老師,傾左一陣~
傾到六點左右就陪青出去cut卡~途中仲見到阿褀同阿妹~呵~
搞掂晒就搵埋恆出去食飯~~~

恆今日打波又整傷腳呢~~~小心d呀你~~~呵呵~~~
食完飯大家一齊陪佢去睇師傅仔~之後就返黎喇~
今日d時間好似早左好多咁呢~呵呵~返黎都係十點左右~~~
洗完衫去左鈺姐度~佢買左S.H.E的東西俾我啊~多謝~呵呵~

原來我有好多衫要洗......搞到我要開兩機..........他x的~
打俾細佬......連續幾日喇~~~唔係訓左冇人聽就係十一點幾都仲未返屋企~
而家d中學生咁多夜街出架........又叫我打俾你,你估我好多錢打長途電話呀?

不過,今日都好開心~有一個好好的組合出現左~~~

每個人都有自己不同的速度,有的快,有的慢~
我知道你永遠都走在前面,永遠比別人走快不止一步~
但,我依然會配合著你,與你並肩~
無論你走得多快多慢~也都一樣~

不是嗎?

>>March 5, 2004 at 5:13:43 PM GMT+8

2004 年 3 月 3 日 星期三 【微冷】

哈哈~~~今日有排波打呀~~~好開心呀~~~

今朝,當尋晚有份飲夜茶果四個仲訓緊時~我又七點起身返學喇~呵呵~
今日係返果一個小鳳仙miss的英文堂........唔走得架,唉~
上完佢堂我到夜晚七點至有堂......咁梗係返去訓啦~
返到去,結果又上左陣網至訓~期間青send msg黎約食飯~咁十二點三就出去~

今日試左間食美式熱狗的.......哈~個飽........凍o既~
食完就返房換衫~去打波呢~呵呵呵~~~
我、立、南、青四個四點左右過到華師~打左一陣,青遇到d唔太愉快的事~
之後我地轉場打啦~~~居然俾地撞到教練喎~呵呵~
打到七點左右,教練請左我地o係華師食飯呢~~~
食完佢就去上堂,我地就返黎喇~

返黎沖完涼.......打左俾老豆.......要問佢拎考試費呢.......
唉~俾佢係咁哦..........我都知應該做野賺錢留返自己用~
但唔過都過左去喇~我最多都係下次返黎做架o者~~~
咁同佢傾完我就又出去.......兄弟宵夜團~呵~

今日好快走呢~~~十一點半就返黎喇~~~

每個人都是獨立的個體
我不應該把自己的佔有慾加在別人身上吧?是嗎?

>>March 4, 2004 at 5:16:24 PM GMT+8

2004 年 3 月 3 日 星期三 【乍雨乍晴】

哇勁呀~呵呵呵~我o岩o岩返到宿舍咋~~~
而家係2004年3月4日零晨2點18分~

尋晚21:30 約左佢地出黎食宵夜~~~
諗唔到去邊,結果去左東駿飲夜茶~~~
一路食一路傾.......呵呵~~~唔經唔覺就兩點~~~

返黎終於記左今個學期第一次夜歸~~~
哈~~~但今晚好開心呢~~~

>>March 3, 2004 at 6:20:01 PM GMT+8

2004 年 3 月 2 日 星期二 【乍雨乍晴】

今日天氣持續........好很凍呀~~~呵呵呵~~~

尋晚終於早左訓.......點幾就訓左喇~~~今朝當然又係七點醒啦~~~
日日返八點的無奈同悲哀完全俾我體會到喇~哈~
今朝返呢堂睇落好似好難咁...--->邏輯學

事實上..........呢科都真係好難丫~
個阿sir好變態啊,係唔係都話扣分,仲要又編坐位表.........=_=
又當我地係小學生啊???真是他x的~~~呵呵呵~~~
但呢科真係聽少d都唔得~~~我訓左五分鐘之嘛~~~跟住就聽唔明喇~~~
好在兆南兄o係隔離叫醒我咋~~~

上完堂,跟住原本有科--->英文報紙閱讀
唔駛返喎今日~咁咪返去上網囉~一路上到十二點三食飯~~~今日有我、sa、南、祺、姨媽
南帶左我地去個幾平的地方食飯~超勁啦我今日~呵呵~
姨媽又係咁撩交打~哈~句句頂心頂肺啊~串到爆~終於開竅識串人喇~呵呵呵~
食完飯去左銀行入錢~玩左部存款機,哈~南就走先返去上堂喇~

去完銀行,我地四個去左睇cd......但姨媽唔舒服,就走先~
睇左一陣,搵唔到我要的cd,咁我去買左隻S.H.E o既vcd之後呢,就同sa返黎喇~
返黎冇野做~又睇碟hea~~~同房訓左囉.....頭先同我講,原來佢完全唔知我返左黎
剛睇完英文成績~~~哈~~~合格喎~~~yeah~~~
sa ,你真係勁.......我服你~唔返學都咁高分~哈~

肯衝,就有機會得到想要的~
唔衝,就冇機會架喇~
我而家係唔敢衝,定一話係知道唔衝比較好,又一話係我覺得未到衝的時機呢?
唔衝,究竟係因為我太冷靜,定一話我怕自己受傷呢?
我最愛的,原來由始至終都係......我自己?

天行~
唔知你會唔會黎呢度,但我今日睇完你日記寫d野,我好有同感~
我諗我會o係我新聞台寫返篇野講架喇~
唔好咁悲觀,開心d啦~

>>March 3, 2004 at 12:19:50 PM GMT+8

2004 年 3 月 1 日 星期一 【乍雨乍晴】

星期二.........good~

尋晚同房出左去冇返黎訓,咁我咪玩icq玩到兩點幾三點訓囉
今朝又係七點起身~~~八點上堂--->社會學概論
行去上堂時遇到聰~佢話sa 今朝至返~哈~
呢科我原本估幾好上架~~~但勁多人,好嘈........同埋原來唔夠位俾人選囉~~~
我地必修果班都有好多人選唔到,反而勁多選修的讀左........都唔知搞咩~
最後我都係頂唔住........訓左一陣~但呢堂有講過哲學架~
所以我一定會好俾心機架下堂~會早d去坐前d~

咁我上完八點堂就去上英文,今次就真係勁訓喇~~~訓到d牙整損左個咀........
哈~之後啊~~~今日中午同家姐一齊食飯啊~~~佢請客啊~呵呵~多謝家姐~
都傾左d問題~又吹左陣水咁啦~知左d事~呵呵~
之後就返宿舍hea喇~~~上網、睇書,最主要都係搞返掂選科果度~~~

一路hea到七點......諗住出去食飯,但因人太少而改左食宵夜~
sa 落左黎上網,又係搞選科,我就趁機沖涼洗衫~
之後佢返左上去,我就繼續上網~九點幾我地就出去喇~

一出去......遇正落雨喎~嘩鬼死咁凍囉~
結果大家諗住去仁順,但太遠而告吹........最後去左飲夜茶~
哈~~~今晚氣氛都唔錯o既~~~
飲完茶,十一點左右就返黎喇~~~

關心則亂~
看透了別人的問題,自己的卻還是沒法解決~
相同的情況出現在自己身上,為甚麼就不懂怎麼做呢?

Beaker~
天氣又凍返喇~你要小心身體呀~
唔好病呀~你知我幾掛住你架啦~呵呵呵~
唔好再成日發呆喇~要提起精神呀~支持你~

細佬同tor tor 都係~
小心身體啊~呢期我都好似唔夠衫著咁~呵~個人勁凍~
細佬啊~聽晚我會打返黎搵你問答案架喇~呵呵~
而家日日都要非繁忙時間至login到入黎,搞到我晚晚都鬼咁夜至訓~
真係唔得掂呀~~~呵呵呵~~~又凍又眼訓仲要打日記~~~

>>March 2, 2004 at 4:54:47 PM GMT+8

2004 年 2 月 29 日 星期日 【晴】

咁又到左三月喇~~~話咁快上左黎已經年半喇~~~

今日係呢個學期第一日返學的大日子~個個都勁早起身呢~~~
尋晚玩到三點訓........今朝七點十五分醒~搞掂晒就七點半,叫我同房起身~
八點未到就到左課室喇~今日第一堂係唔走得堂o既--->當代中國
阿miss.......講野都幾串,可能我唔夠訓啦,上堂又想訓喇~~~

上完當代中國就去左上第二科--->電視廣告
呢科好似幾好玩咁~但好多野讀囉........又要讀返廣告學同電視節目制作~一科兼三科~
呢科我奇蹟地冇訓喎~但好多人走呢~
食完飯返黎係電視廣告實習~我地要拍廣告同短片黎交功課呢~~~好開心啊~~~
今日仲試左 d 拍攝工具tim~勁過癮啊~

返黎前去左交錢包月,實在唔想再上唔到icq呀..........
之後返黎上網......sa 落左黎睇成績,跟住就出去食飯喇~
食完飯........唔知邊個講開,一時興起就話去打保齡球喇~仲call埋剛仔同祺出黎打tim~
恆打左鋪133........sa 係最低分果個,要請佢呢........
之後行返黎........sa 仲有下場呢~真忙~呵呵~

返黎沖完涼~終於上到我幾日都開唔到的 icq 喇~呵呵~
Juli 今晚又出左去唔返黎訓,好在我仲有 icq 玩咋~~~
打左電話俾楊露~死仔今日終於都聽電話喇~~~呵呵~~~勁開心啦~~~
知道左d 都唔知點回應至好o既野啦~~~呵呵~~~

不過今日有段時間心情唔太好~
笑,有時原來都可以掩飾我o既失落同埋唔開心架~

我,要學習不要去設定自己應該是對方最重要的人
能夠在你身邊,默默看著你,已經很幸福了~

>>March 1, 2004 at 5:34:44 PM GMT+8

2004 年 2 月 28 日 星期六 【晴】

2004-02-29

尋晚玩上網玩到5點至返返去自己房訓啊~
今日......朝早十點就醒左喇~驚住冇得交電費啊~~~
拿拿聲落去交左電費呢~返黎又唔想再訓喇~~~
再上左一陣網呢~青 send msg 黎問我出唔出去食飯~
咁我見無咩做就同左佢出去喇~~~

出到去天河城~原來佢去"中森明菜"食飯呢~~~
哈~睇落去好似好貴咁,原來都唔係話太貴咋喎~
青買埋個壽司船俾佢哥,埋單都係$100~
食完就行去東站搵青哥~跟住順便去左機場~

送完佢哥到機場呢,我地就順手撘車去左省站~
架車......呵呵~好地道,真係好多大陸人同大陸味~
去到省站,好多人好迫呢~為免危險,我地去左地鐵站撘地車返天河城~

返返黎天河城,我地去左行書城~~~六點半左右就返學校喇~
因為約左首領同patt佢地食飯呢~咁工聯果個飯局就冇得去喇~
青要自己返房食~sorry呀~陪你唔到~下次丫~^+++^~

跟住去左黑天鵝度食飯~哈~今日有我、ii、首領、patt、粟米同阿孝呢~~~
食完就返房喇~今晚終於都可以o係自己果位上網喇~~~yeah~~~
仲有熱水沖涼~太開心喇~~~

死細佬楊露~~~
尋晚打俾你,十一點幾都未返屋企,又想俾我鬧呀?
雖然我知你睇唔到~但都係要鬧架喇~
俾次唔好要你媽咁擔心你好唔好?
尋晚打去你屋企,你媽把聲好無奈呀~識做少少啦你~

>>February 29, 2004 at 5:19:32 PM GMT+8

2004 年 2 月 27 日 星期五 【晴】

各位早晨~而家係2月29日零晨1:10分~~~
我係o係一個極辛苦的情況下打呢篇日記的~~~因為我宿舍停左電~~~!!!
我而家係借左 sa 個位黎打日記架~~~而成個建陽係停左一陣電架~~~
我間房得返 2 度電........今日返黎又過左交電費時間~真係唔知點算~

今朝十點起身~最後檢查完之後呢,十一點爸媽就同我一齊出門口喇~~~
出到去遲左少少啊~~~搞到青要等我,真係唔好意思呢~
跟住我地以極速咁食左d野~就去撘車喇~~~
返到黎.........都係3:15...(計落車果個時間),某人想黎接人但失敗左~

返到去房.......哇......勁喇~~~間房入面就冇乜事~
但個露台d塵真係厚到呀.......得人驚呀~~~
我唔覺意踩左出去,覺得有少少唔妥喎,咪行返入黎囉~點知見到......點解我個腳印咁白o既?
跟住掃左一大堆泥塵出黎.......唉~又冇滴露,只係用漂白水拖左一次地咋~
之後執野.....我都唔知自己果陣點解可以執到咁多野入去囉......
一路執到六點,爭少少至執完,但打俾青~約左六點九出黎食飯~

咁我準時出到去啦~點知唔見人喎~
原來係大家都搵唔到祺~~~剛仔就出左黎先~~~跟住青都出黎喇~~~
傾左一陣,決定去星語餐廳食飯~~~後尾至知祺冇帶電話出左去食飯囉~
食飯果陣仲見到有個唔知咩節目o係度錄影~~~個女主持~都ok o既,但一睇會知係大陸囉~
食完就過左好又多買日用品喇~~~買左百幾蚊呢.......
青都買左唔少野,仲有張摺椅~~~好在有剛仔幫手咋~

返黎經過ok~行左一陣,飲左野,又走去買左張電話卡,咁就返黎喇~
先送左青返去,再返房~終於見到我親愛的同房喇~呵呵~
兩個人都怕間房俾人cut電,所以乜都唔敢開~~~
咁我沖完涼就上左 sa 房喇~宜返左黎呢...借位上網呀~呵呵~多謝~
今日又冇熱水.......焗住二月沖凍水涼......爽爆啦..........

聽日你地就返黎喇.......太好喇.......有埋熱水就仲好......
記得交電費........嗯嗯~~~

>>February 28, 2004 at 5:40:16 PM GMT+8

2004 年 2 月 27 日 星期五 【晴】

各位朋友~
我走喇~今日返上去廣州讀書喇~
一陣間就出門口喇~或者今晚會上網,又或者唔會~

呢個假期...........真係開心~
下一次.......會點呢?呵呵呵~

tor tor 、Beaker、兩個細佬~
我會繼續掛住你地架喇~~~
Beaker我今晚會打俾你架~我講過一定做~~~
俾心機呀大家~~~

各位我冇寫出黎的朋友~
再見喇~下次返黎搵你地喇~~~

byebye~^+++^~

>>February 28, 2004 at 2:58:44 AM GMT+8

2004 年 2 月 26 日 星期四 【晴】

今日係我呢個假期o係香港的最後一日喇~~~
聽日我就會返去宿舍喇~~~約左青一齊返呢~

尋晚又聽歌睇網到三點幾至收機~
仲忽然間好有靈感地作左一段似歌詞但又唔唱得的文字~
係我的心聲啊~~~有機會你地會見到的~~~

今朝.......唔記得左邊個打電話黎嘈醒我,哈~
之後......一路上網,傾電話.......原來今日恆已經返左去喇~
同青傾左一陣~tor tor 又打黎傾喎~~~
立又send msg 黎問今晚食唔食糖水~~~

結果今日全日留左o係屋企~~~
但仲未約到青聽日幾點出黎啊~~~
今晚sa 又話得返三個人,所以唔出去,糖水之會就冇左喇~
好似好多野都未搞掂,又好似好多野都搞掂晒咁~
都唔知自己咩心情.......呵呵~~~
總之就係唔想返去住啦~哈~不過假期總會有完的一日,如果唔係就唔係假期啦~係咪?

祝自己一路順風~

>>February 27, 2004 at 12:33:46 PM GMT+8