2004 年 1 月 27 日 星期二 【颳風】

今日係年初七人日.......祝各位生日快樂先~~~呵呵呵~~~

今日又係冇節目~~~
尋晚打俾鈺姐,佢原本話今日約出黎,後尾又取消左~
哈~呢幾日真係......日日話有節目結果都搞唔成呀下~~~
傾傾o下.........居然由十一點傾到零晨四點半.......
得出的結論係....原來我d性格都幾"阿媽".......唔怪得好多野我唔會反抗啦~

因為我通常都係諗人地感受多過自己........
就好似如果我想打人,我打之前就會諗 "我俾人打會痛,佢俾我打咪都會痛囉?" 咁樣~
結果就打唔落手喇~~~好多野都係咁諗,所以我選擇包容同接受~
又原來o係我生命入面好多人我都當佢仔女咁睇住,關心佢地....不論大過我定細過我的人都係~
點解我天生要註定做呢種不斷付出的角色呢.........?
有陣時我都好想俾人寵o下架....成日 take care 人,其實好累的........

有時我真係會好羡慕sa 同埋 立 佢地........
佢地明顯就係做仔女果種性格黎.....可以自我中心........可以任性~
我都想可以咁.......但我性格話我知我做唔到....我過唔到自己果關~
有好多野,佢地會著重自己的感覺,用自我行先,但我同時已經諗到對方.....
所以好多野我想任性.......但........我做唔出~我明白對方會因我任性而難過,我並不想見到~
好多時見住佢地....我都想自己可以.....哈~不過算啦,冇得勉強o既呢樣野~
唔通處女座二的人就係咁??? 咁咪即係 恆 同 祺 都係咁???呵呵呵~

咁今朝就成一點至起身......食左野,上左陣網,又諗住出去喇~
而家真係乖....日日都出去,目地都係一個--->尖咀商務
實行緊 "一日一書" 行動呀~~~真係一日去睇一本書架~~~每日睇完一本喎~~~
今日睇呢本都係林詠琛--->星星的眼睛
我就黎睇晒佢d書架喇,yeah~~~

睇完,原本心情有d抑鬱,想去海傍吹吹風,食支......雪條(呵呵~)
但因為睇完時間都唔早,要趕返屋企食飯,結果冇做到~

阿立又話約聽日去打波....都唔知係咪又係流o既......唉~
鈺姐又話聽日 Lunch 出黎食飯.....點好丫?
青 好返喇.......如果聽日有得打佢應該會出黎掛......下話?
聽日.......最想做果件事都係做唔到......算喇,唔諗喇~

Sa .............甩底王,非你莫屬~呵呵呵~

>>January 28, 2004 at 1:59:03 PM GMT+8

2004 年 1 月 26 日 星期一 【颳風】

今日係年初六.......

尋晚無無聊咁,又發起話想約出黎唱k喎~
咁當然,今朝係三個都未訓醒架~正常地係冇出丫~
咁當我訓到剛想起身果一下呢,三姑姐打電話黎喎,話中午陪佢出去~
我就係咁醒左喇~十一點幾~

咁十二點左右佢再打黎,話食完飯,而家黎喎~
但係我係仲未食架囉.......呵~咁我就要快快手咁食飯,仲要拿拿聲搞掂晒,換晒衫~
好在.....落到鑽石山都未到一點~~~佢都係早到過我丫~
原來我今日係要陪佢去志蓮淨苑幫我的祖父母同埋成班親戚祈福呀~~~
咁我地行過去.......都唔駛一個鐘就搞掂晒喇~

咁我就返屋企喇......之後......因為覺得一個人o係屋企實在係有種....
好寂寞的感覺.......好唔鍾意........好驚~
所以我決定出街.......將自己隱身o係鬧市的人群之中,可以.......冇咁孤獨?定係更顯落寞?
又出左尖咀.....今日又去左睇書~
依然係林詠琛........今次係舊書~紅鞋兒~.....果然舊書係好睇d架~~~
睇完就俾人催我返屋企喇又~~~

>>January 27, 2004 at 11:49:56 AM GMT+8

2004 年 1 月 25 日 星期日 【颳風】

年初五.........

今日唔多唔少......都幾失望~
因為原本約左四兄弟今日上黎玩架嘛.........
點知我約左 sa 十一點等,到我去到約定地點打俾佢,佢仲o係屋企囉.........=_=
聽聲似係未訓醒~咁叫佢即出啦,佢話出到黎打俾我~
點知...我返到屋企同立玩左陣icq~十二點十五分再打俾佢,佢依然係o係屋企....@__@
咁o係咁無奈的情況下我惟有宣佈今次活動取消喇......

我媽仲特登留返佢d自家製馬豆糕同紅豆糕俾人,唔俾我食......唉~
結果都係自己一個煮公仔麵搞掂.......
上網上到三點左右就撘車出尖咀......
屋企太悶喇,要出去吸下新鮮空氣,等個人冇咁down呀~
出到去,原本想食煙架喇,最後都忍住......唔可以再對唔住人喇~

之後上左商務睇書......順便買埋咭俾人~
今日睇到林詠琛有新書出呢--->戀之奇蹟
咁我梗係即睇啦......四點睇到五點半左右睇完~都ok啦~
不過我覺得已經冇佢之前的咁吸引了~真係江郎才盡???
睇完左本書就去買野,跟住就返屋企喇~

返到黎,間屋少有咁冇人喎~全部未返.......哈,唔怪得冇人搵我問我食唔食飯啦~
而家我感受到,原來屋企會日日有人問你返唔返去食飯,其實都係幾幸福的事~
最後今晚大家半打邊爐咁食完飯,沖完涼就打日記喇~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
今天回家,看見屋苑通向平台的那道樓梯中間,放了一個賀年的佈景~
白色的射燈大刺刺地射向佈景,淺色的樓梯把燈光反射至四周~
我正從黑黑的巴士站向樓梯走去,望到佈景的一剎我停住了
就像一個滿身罪孽的人看到光一樣,我下意識的避開了~
看到有人從白光中走上平台,我竟然喪失了開步的勇氣,只敢急急的從黑暗的一旁走過~
我在怕甚麼呢???怕自己配不上光嗎???
是的,畢竟我只是一個適合活在黑暗的人.......
是的.......我真的不配........不配.........

>>January 26, 2004 at 2:38:37 PM GMT+8

2004 年 1 月 24 日 星期六 【颳風】

今日係年初四.........咁就年初四喇~

今朝十一點幾自己醒左,咁無野做咪上網咁囉.......
一開電腦就多人o係度問我....."點呀,你今日又去邊度玩呀?"
雖然我呢幾日真係成日出街,但都唔駛個個都咁問架下話.......呵呵~
我都唔係日日都有地方去架~~~

不過呢~~~食完飯冇耐呢,我都係心思思想出去架~
咁呢....呵呵~我兩點幾三點果陣都係出左去架~
今日係諗住出去買 sa 份生日禮的~
但我又想去遠d, plan左兩條線....
一條係行青衣城,再返荷里活買~
一條係入將軍澳行新都城,再過九龍灣,再返荷里活買野~
結果我落樓手痕打左俾倩...佢話同我去打機,咁就度度都唔駛去,直去九龍灣喇~呵~

去到佢都未到,咁我就打住先啦.......原來一條友o係機鋪搵唔到機打都幾無奈~=_=
過左一個鐘左右佢黎左,我地又打左一陣,之後就返荷里活喇我~
因為今日要早食飯,所以要早d返屋企呀~

快快手咁過到去......哈~好在仲有貨咋~
咁我買完 sa 份禮物呢,就撘小巴返去喇.......都俾老豆催呢~

聽日約左佢地上黎我屋企......但係我屋企咩玩樂都冇架喎~呵呵~
咁你地上黎想玩咩呢.......就自己帶上黎啦~哈~

有緣的話,你們會知道我另一個新聞台的,那裡~會有另一個的我~
今天應該更高興.........哈~愛上林一峰............的歌~

天行~(定你鍾意我叫你 靚女雯 多d???)
林一峰果然係正....哈哈~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
下午五時四十五分，九龍灣地鐵站月台

很久很久，沒試過真正的看看香港的天空了。每天在街上都是匆匆的走過，不是趕著去拜年就是趕著一場又一場的節目。難得今天一個人逛街，靜靜的坐在月台上，抬頭竟然見到這個我已久未注意的美麗天空，心中實在有點感動。藍藍的天鋪滿了許多小塊的魚鱗雲，加上天邊那一抹橘紅，雖然只能在大廈之間看到一小片天，但已足夠形成這幅美麗的圖畫。

在回家的小巴上偶爾向外望，看到滿街都是一家大小，拿著大包小包的禮物在走，心忽然間很溫暖。一年之中，我想一家人擁有最多團聚時間的，都應該是新年這幾天了。看著一家人吵吵鬧鬧，感覺其實是很幸福的．．．^__^

　　　　　現在的這個你，已變成我的好妹妹，作為你的大哥，偶爾出來喝喝東西談談天，這己很足夠了～

謝謝你給我機會～

>>January 25, 2004 at 2:12:51 PM GMT+8

2004 年 1 月 23 日 星期五 【乍雨乍晴】

嗯嗯...........今日o既凍唔止係天氣...........

尋晚我三點幾至返黎,諗住今次死梗啦,實俾人鬧死喇~
又話今朝一早一定會整醒我,一定唔俾我訓~
結果我自己醒時係十二點十五分.....佢地完全冇理過我囉......
我一醒果下都嚇左一跳~之後聽出面d聲完全唔似當過我存在~
搞到我打左個突.....完全估唔到佢地會當冇事發生~
我自己o係房係咁驚.....其實都唔知自己驚乜~呵呵~
最後都係等佢地去左廚房,我就拿拿聲拎衫衝入廁所沖涼~
(個頭勁呀......尋晚冇洗,gel 住咁訓,今朝居然冇變過形,一樣係箭豬咁,幾型呀~)

出返黎果陣,阿媽同我講左兩句......我知點做架喇~
之後大家都冇提過......我梗唔出聲啦,敵不動我不動嘛~
為左令自己有野做,我就走左去打日記......呵呵~
打完又俾佢地拖我出街........去耀叔家拜年啊~
咁雖然話唔多想出,但今日我唔出唔得啦.....又話去完呢家仲要入沙田~

去到傾左一陣,打俾佢地沙田果個朋友,又話約左人食飯,咁我地就返屋企喇~
今日都係留o係屋企好d............呵呵~~~

聽日會有咩節目呢???

>>January 24, 2004 at 12:46:49 PM GMT+8

2004 年 1 月 22 日 星期四 【乍雨乍晴】

又係凍凍凍的一天~~~凍凍大年初二啊~~~

今日呢.........訓到一點幾,其實仲未醒架,不過俾阿媽夾硬整醒左~呵~
之後........上網啦,食飯啦咁........去到三點幾四點,我打俾倩問佢出唔出街~
佢居然一口應承喎.......呵呵~搵埋嘉僖啦咁梗係~
約出去的理由係睇煙花.......同佢兩個都睇左唔止一次喇....都三幾次喇~

咁出之前諗住去葵興拎返d糧先~
點知出門口果下有人黎拜年囉........結果就遲左出去喇~
咁順理成章地我就遲左大到啦~sorry呀嘉僖~
講講o下我地o係油麻地出左閘喎~咁就順路行去旺角~

倩又打黎話想唱k.........但今日唱呢........成$150 一個人,點唱呀.......
結果我同嘉僖去左 KFC 食飯.....過左一陣倩就黎喇~
黎到........哈~佢話左俾我知嘉僖拍拖喎....呵~恭喜晒~
但倩唔知做咩喊囉.....嚇得我啊......之後又冇事喎~
跟住俾佢地扯左我去影相丫..........=_=

玩到九點幾我就走喇,因為約左四兄弟出黎食糖水呀~
不過恆臨時話胃痛唔出喇喎.......保重呀~年初二就胃痛會食少好多野架~呵呵~
咁立話o係藍田過黎,我咪約佢o係鑽石山等行返過皇朝食糖水囉......
點知佢話有時遲到喎........結果係sa o係皇朝行過黎搵我地~
三條友決定唔食糖水,轉場去左荷里活廣場仙跡岩飲野~
咁又o係度傾傾傾......呵呵~一路由十點幾傾到十二點收鋪,都仲未夠喎~

結果我地決定轉場.......再行返去皇朝食糖水~哈~
但我老豆已經打左幾次電話黎催我返去......唉~
我冇理到佢呀今次.......佢扯晒火咁o係電話度不停鬧我........果時應該係一點十五分左右啦~
聽完個電話我都驚架.....想即刻返去,但sa 同立 都講得o岩o既.......
我.........都大個啦......自己有分寸架嘛........
佢地兩個同我講左好多對策......哈~
但我勁緊張囉......呵~係咁去廁所........最後都係冇即刻返去~~~

一直傾到三點糖朝收鋪..........哈~我唔想走架果陣其實.......不過唔返去都唔係辦法~
咁我硬住頭皮都係返左去丫......三點半返到~
返到去,佢地真係無鎖門囉~訓晒........
我都唔敢沖涼喇.......返房換左衫就訓喇~

年初二.........哈~似乎唔太咩呢~~~

>>January 24, 2004 at 6:47:03 AM GMT+8

2004 年 1 月 21 日 星期三 【乍雨乍晴】

恭喜發財啊~~~今日係大年初一啊~~~各位萬事如意啊~~~

話說我尋日開工開到六點,七點至走得~
走左仲要sa 陪我去新都城食早餐~
咁我九點返到屋企,原來老豆留左粥俾我囉..........呃...........仲有蘿蔔糕~

乜都冇食,返黎沖完涼呢~我又拿拿臨換衫出去拜年喇~
今日要去mama度...再去婆婆度呢.........

大家要記住,我係由尋日朝早六點半開始到而家都未訓過架~
打呢篇日記時係23 號1:46 分,足足四十三個鐘未訓過喇~
而家個人超辛苦啊.......呵~

今日四點幾去完婆婆度,阿青地打黎問我出唔出去睇花車喎~
咁我口快快咪答應左囉....哈~完全無視自己冇訓過架~
但青遲大到......搞到我地要繞路搵佢,唉~呵呵~
個巡遊.......人太多,其實我睇唔到d咩架,人影囉~
諗住睇完食巴西燒烤,但年初一無開喎~
最後我地去左食味千拉麵.......呵,想再黎第二場架,但屋企打黎,只好返去喇~

好開心 + 勁累的一天..........

>>January 22, 2004 at 5:48:41 PM GMT+8

2004 年 1 月 20 日 星期二 【乍雨乍晴】

哈~~~今日係年三十啊~~~係羊年最後一日~~~

今朝一早我就去左開工~雖然仲係未訓醒,但都係八點半到丫~
sa 今朝唔黎啊.........原來佢果日玩完之後喉嚨發炎........呃~sorry 呀~
咁佢就話今晚九點左右過黎喎.........咁朝早又得返我一個喇~

但係今日唔知係咪放假,朝早都多左好多人......
我一個人經常都要對住十幾廿個人,仲要睇五代同堂之餘睇埋d吉,都係係唔係好掂~
所以我都打左電話俾馬姬求救丫.....又打左俾sa,所以先知佢病~
不過打還打......最後都係兩點幾三點至有人返黎幫手~~~
搞到我十一點幾果陣要一條友同運貨黎果兩個人搬二十箱貨入檔~手都軟呀~

之後就輕鬆好多喇,人手多左.......我可以去返後方專心開箱~
但係都依然係少人架~今日人客多左好多呢~
四點左右嘉穎就黎左幫手...哈~佢實左太鍾意玩喇~連我部電話都搶埋去聽.......
再一直做到八點幾九點都未見sa 到,不過就見到頂頭大老細返左黎~~~
即時超認真啦個個.........呵呵呵~
死人大老細仲要我同另一個男仔幫佢搬大桃花同埋君子蘭過檔~
我地又搬左不下十次丫..............超累~但精神出奇地好~

九點幾,大老細仲粗口緊我地時,我就出左去搵sa , 順手如個靚廁~
返黎就正式開工喇~~~我負責剪果,佢地賣~
初頭話我要過對面果檔架,後尾又唔駛,俾佢搞到勁燥呀個人~
今年的生意............哈~我諗算係咁架喇掛.........
今年見到好多同學仔同埋朋友呢~~~

一直到朝早六點場館熄燈,d人流先冇咁迫.........
哈~最後sa 拎左好多野走呢,仲俾我屈埋佢陪我食早餐.........再講多次sorry呀~
之後.......下篇再講~

>>January 22, 2004 at 5:50:14 PM GMT+8

2004 年 1 月 19 日 星期一 【乍雨乍晴】

今日好凍...凍凍凍......

今朝終於試到醒完即訓的感覺~
因為.....唔知醒呀我...呵呵~原本六點應該醒,我八點至起身~
仲要坐o係度都訓著......睇黎係尋日太夜返喇,谷太盡都係唔得架~
咁今日就十點過到去........

諗住今日凍就唔會落咁多雨啦,點知估錯晒........
今次係上車之後一陣開始落大雨,一直係咁落,咁我自然又要冒雨開檔喇~~~
搞到今朝又少左人黎.......不過都有生意~
仲同時招呼左兩個外國人同埋兩個日本人tim~
好搞笑......轉右講英文,轉左講日文 + 普通話,兩邊間唔中又夾句廣東話~
我今日好三文四語啊~~~呵呵呵~~~

但係我都feel到自己唔係好得.....頭重重咁~
所以決定今日早d走.....返屋企訓~
馬姬都好好人啊...希望佢今晚做多d生意啦~~~哈哈~~~

返到黎.......上左陣網,咁五點幾就去訓喇~
超凍啊......我縮埋o係張棉被入面個身都係咁震.......
最後要加多張冷氣被o係面先訓到.......
七點幾就俾老豆抄醒食飯,佢完全唔俾機會我訓落去.......呵~

我諗我一陣沖完涼又會繼續訓架喇~~~嗯嗯........
聽朝又係八點,我一定會醒到架~
聽朝又係約埋sa一齊去啊~~~

聽日係年三十喇.......要搏晒命喇~加油加油~!!!
要為份糧而努力啊...... 呵呵呵~~~

聽日又應該冇時打日記丫........預祝大家猴年快樂,萬事如意,心想事成~!!!

>>January 20, 2004 at 1:03:19 PM GMT+8

2004 年 1 月 18 日 星期日 【颳風】

好累 + 好凍啊.........今日又落大雨喇~~~

今朝六點就醒喇,因為八點要去到維園開檔啊~
我七點半約左 sa o係北角等,但佢又係遲到囉~~~
咁我都算唔好彩丫......出門口冇雨,一行到落街就落,我仲要冇帶遮......=_=
結果我又冇帽又冇遮又 gel 左頭~又係七七咁過去~~~

去到個檔.....個頂有六泡大水彈囉......咁我又趁冇人頂走d水~~~
之後冒雨去左食早餐....十點再過返去~~~
原來尋晚係有人睇檔架囉,辛苦佢喇~
咁之後我就同sa 開檔喇~基本上都係教返sa點做丫~
但成朝都落大雨囉......我同佢都濕呀又~佢慘d,我今日帶左私家雨褸,我尋日果件俾左佢~

成個朝早都冇乜人行......小貓三四隻咁~
好在sa o係度咋,如果唔係又悶多一日架喇.......
玩o下玩o下咁又到下午三點幾,終於有同事黎喇,我地就出左去轉一圈~
下午人開始多返喇,真係好~
同埋隔離檔水仙好好人,幫我地頭頂去水,太好喇~~~

夜晚停左雨,d人食完飯終於開始多返喇~
我地就唔停手係咁賣賣賣,做返幕後喇我終於~yeah~~~花王~~~剪剪剪~~~
但真係勁累囉~同埋今朝對鞋同襪都濕晒,焗住好唔舒服~
企到後尾腳板底超痛呀.......但都去到十一點至同sa一齊走~~~

雖然好累,但好開心呢今日做得~
可能因為有人陪,可以講笑唔駛咁悶啦~哈~多謝阿sa~
無端端俾我叫出黎受罪都唔怪我~感謝~
但隻腳而家真係超痛,聽日點返八點呢???死喇.........呵呵呵~~~

我一定唔會病~!!! 我信,我可以~!!!
意志會戰勝一切架~!!!

>>January 19, 2004 at 5:38:17 PM GMT+8