2004 年 4 月 10 日 星期六 【晴】

今日...........平靜~

十二點醒左,拎飛落去俾青的朋友,順便出去拎錢交電費同食飯~
個人一路上都唔太清醒....呆呆下咁......完全係會俾人打劫果d精神狀態囉~
拎完錢呢~食左d野就返去喇~仲係keep住頭痛....同埋今日多左咳~

返黎交左電費.....見到Cally,同佢傾左陣就返房喇~
本來要去開會的,但自己狀態唔多得,結果都係同德哥講唔去~sorry呀~
咁訓下又上網睇左報紙~
七點幾就同阿浩出左去食飯~

食完飯,手頭有兩張今晚林曉培演唱會飛因事俾唔到人~
結果我同佢八點半走去睇林曉培~呵呵~
勁正丫呢場.......終於都有d投入到個氣氛喇~
但山頂的觀眾實在太靜喇~太冷靜喇......搞到後尾冇咩mood........
之後十點就返房喇~~~

其實,有時我諗~我可能將太多唔直接關我事的事揹上身~
所以令得自己心情不好~~~
放開一點~當作不知道,對我或對當事人都好過點吧?
關心是應該的~但太關心就會過份了,小心令自己和別人都辛苦~

>>April 11, 2004 at 5:24:34 PM GMT+8

2004 年 4 月 9 日 星期五 【晴】

今日..........其實心情應該好好的~

朝早訓到十二點起身~~~十二點三去左金四等青拎野俾我~
拎完陪佢行去買野再過建三~
佢......哈~離家出走~俾人迫去旅行???
送左佢走就去買飽食~返到樓下撞到鈺姐~順手就o係樓下散飛~
唔駛半個鐘就散晒喇~呵呵呵~

咁之後就上左八樓同嘉露蓮姐姐同鈺姐傾左一陣就返房喇~
三點左右返到黎啦~上網睇左一陣報紙,一陣小說,咁就六點喇~
大家都o係呢段時間問好多人拎飛呢~
之後六點幾就過去體育館睇王傑喇.........

真係超正.......呵呵~
但好多觀眾似係做媒囉我覺得....上台果d~有咩理由個個都咁鎮定架?
同埋入場果陣好混亂......紅飛果d迫住坐上層..........頂~
但值回票價~睇完冇食飯就返左房喇~

返到房.........收到個長途電話,知道左一d事~~~
好突然~太突然喇~完全唔知點去接受.......
點解會咁架..........忽然間諗到好多.....諗到父母,諗到自己~
忽然間原本有d起色的心情又迅速down晒.........

點解呢幾日會知道咁多唔開心的事架........
先係自己的問題,再黎係阿心.......
之後又知首領唔開心.......跟住今日又知呢件事........
天呀.......到底發生咩事呀?三四月係咪特別易多唔開心野架...........

幾時先可以俾d開心的日子我過呀...............

>>April 10, 2004 at 4:44:21 PM GMT+8

2004 年 4 月 8 日 星期四 【晴】

今日係星期五........嗯~又係走堂的大好日子........

七點九醒過.....但諗住換得衫黎行返去都遲到,結果冇返~又訓......
九點半返 pe~~~今日阿智黎左一齊打呢~~~哈~~~
打完波返房~~~約左立同恆食飯~~~
但失敗地,我食飯時講唔到我尋日諗到的野~

食完飯陪左立去兌人民幣~~~返房途中同恆講左........
我覺得好大壓力......真的,對住你地我會好大壓力,唔知點解~
或者係因為我知道你地講的都會真心話......我怕接受呢樣野........
我仲係怕去面對我自己~所以並冇變過.......
我仲係好執著於放開呢兩個字上面~

返房上網~~~今日同小心心傾喎~~~又聽到個消息~~~
我覺得~你覺得冇問題,咁就冇問題架喇~你可以的~
硬淨~堅強~嗯~

夜晚出左去同鈺姐一齊食飯~講返小心心的事~
又傾左一陣啦~之後唔好意思地佢請左我食飯~多謝呀~
我就請返佢食雪條~再陪佢行去學活開會~
一路同小心心傾住電話返房~哈~
上唔到黎唔緊要~我返黎果陣搵你囉~

上網果陣同Beaker傾啦.........佢又提醒左我~
好多時,我都講埋d同其他人無關的事~
其實大家都未必想知,我仲要扮晒好興奮咁~
真係講得好......完全感覺到自己果d假位.........
唔係人人都對我的事有興趣的~
亦都唔係我講晒我d野出黎就代表人地會覺得我好~
呢兩句我會記住的~

朋友應該係交流,唔係單方面在說話~
而且不一定講得野多先係好~好多野,大家心裡都會明白~有默契~
總之,心入面有呢個人(或呢班人~),就夠喇~

我要的,是一種朋友的安全感~
有這樣的朋友,我會覺得很安心......可以放心把所想的講出來.......
我覺得我是不相信你們才會這樣的.....
是甚麼使我不再放信任在你們身上呢???

>>April 9, 2004 at 1:57:28 PM GMT+8

2004 年 4 月 7 日 星期三 【颳風】

完全又唔係好知自己做緊咩的一日~~~

今朝走左堂英文........哈~同房竟然返學而我都唔返~~~
十一點半醒左就換衫出去食飯喇~今日約左家姐
出去果陣撞到立佢地~
我地跟住係去左一個我都唔多知邊度的地方食飯~呵~
都係$5 一個菜~白飯任食呢~~~

食完返黎幫家姐搬左水,傾左一陣,借左兩本書走~
咁就返房喇~上唔到網呀~o係度聽歌睇書,仲有教人摺金莎花~呵呵~
四點就過體育館打波喇~book左場啊今日~
打到六點就走喇~~~返房喇~~~

今日返房同我同房有交流呢~~~呵呵呵~~~估唔到咁樣我先會講野~~~
佢又係一個局外人.......哈~又係一樣的說話......

呢期心情又唔多好~~~哈~~~我諗又係我問題喇~~~
覺得好辛苦........好唔實在........覺得自己又去返之前咁樣~~~
好唔鍾意呢種感覺.........我越想自己放開,個心反而越收又越埋........
我相信,如果我自己都感覺到,你地一定都感覺到~
又或者我真係唔值得再令你地去care......

對自己,我而家係失晒信心.....之前已經冇,而家更衰........
我唔想失去的,想緊緊握住的,偏偏會因我太用力而扼殺了生存的空間.....
我越想放開,個人反而又會特登做d野出黎話人知~結果又去返條舊路~~~
要做返最原本的我........但原本的我又係咩呢?
咁多年都俾人set左目標要咁咁咁做......原本的我其實係點諗架呢?好似冇乜印象.........

我要喚醒原本的我..........我以前係點架呢?
順住自己的意思去對人,對事~以前都得架,試過架,點解而家會咁呢?
因為環境唔同左?因為我太介意人地點睇我?
我唔敢講自己的想法因為怕你地唔鍾意?
我知道冇人可以幫到我,呢個問題只有我自己可以解決~

我要做回自己........嗯~做回自己........努力~

>>April 8, 2004 at 12:46:50 PM GMT+8

2004 年 4 月 6 日 星期二 【綿綿細雨】

唔得喇.....呢次真係唔得喇........真係病喇呢次...........

尋晚自己衰,冇書又唔早d問人借~
問題借時大家都做緊~結果過晒十二點至借到書.........
一路icq 一路msn 一路做功課..........
結果差唔多三點半至搞掂.........同房呢個時候已經睇緊波喇~

今朝又要七點起身返學.....好明顯我唔夠訓啦~
唔夠訓的後果就係病情加重........唉~
個喉嚨今朝痛到好似裂開咁,自己都 feel 到佢入面腫左..........個頭又唔清醒啦,又痛~
結果堂邏輯學聽左一半書訓左一半~
堂英語報紙閱讀直情係訓晒........唉~

中午落堂返房..........上網啦..........又上唔到icq..........
返黎前祺拎左 book 場果d紙俾我~答應左球隊班隊員聽日book 場打波,冇得走喇~
咁又冇左 $45.........不過我一早答應佢地的,咁冇得講........
一直到三點,就出去拎錢......book 左場又冇錢喇個身~
順手去食野.......食完就返黎繼續hea~

真係唔得呀今日.........返黎之後個人勁累.......
幾次o係部腦面前訓著.........終於我都頂唔順走去訓左一陣~
而家醒左就打日記喇.......
陣間落五飯食野......食完返黎沖涼,做功課........好訓喇........
唔可以再夜訓喇今日........頂唔順..........

>>April 7, 2004 at 11:37:39 AM GMT+8

2004 年 4 月 5 日 星期一 【微雨】

今日唔係好得呀..........

今朝七點幾醒諗住返學,點知一醒發覺個頭勁痛,跟住喉嚨亦一樣痛~
結果冇返到........訓到九點半醒至返英文.......
返完......個人頭重重咁.....好快就返房喇~

中午都冇出去,食左個面又睇男女字典~
諗住等兩點半到就去校醫度檢查~今日係新聞系的身體檢查日呢~
點知一坐就坐到三點幾先過去.....個人仲係暈陀陀咁~
咁抽完血,度高磅重,睇眼,照x光等之後呢,我就返房喇~
今日d天氣唔太好呢~話變就變~我落街果陣已經開始落雨
我又要冒雨咁返房喇............

返到房,個頭超痛......
可能係尋晚已經凍親.......今日發出黎喇~
又上唔到網喎今日.....個死人校網個server痴線架~
尋晚已經斷線斷到我爆晒粗,今日直情上唔到網......而家轉左proxy至上到咋~

o係部電腦面前,我竟然頭痛到"中"左o係度訓著左.........
睇黎今晚真係應該好好咁休息下至得...........

>>April 6, 2004 at 11:25:25 AM GMT+8

2004 年 4 月 4 日 星期日 【晴】

嗯~今日係一個好天氣的日子啊~~~

今朝七點半就醒左喇~當代中國唔敢唔返啊~呵呵~
八點返完就去文學院返電視廣告~
上完堂就返房喇~~~焗左個面食~~~

兩點左右我親愛的同房終於都返黎喇~呵呵~
諗住佢會去上堂,但結果係冇架~呵~
咁我就一直o係房上網 icq 同埋睇左幾集 男女字典~
五點就去左陪青過學活搵張sir~之後同佢去食飯~
又傾左少少野啦........哈~真係好多謝佢,真係對我好好~

傾完六點幾,咁就返房喇~今晚我都冇去上堂.......
一路到八點就出去拎錢,交仲未交到的班會費~
今個星期仲有50蚊~我目標係有得剩~
一個星期用 50 有得剩,咁就可以每個星期儲到 50 出黎喇~
咁我個戶口都會多返d錢可以應急用丫~
希望唔駛再問人借~~~
決定唔再問人借,如果唔夠錢就零願唔出街食都唔借錢~

我真係要學識點去理財至得
而家咁,d錢左手黎右手去,有幾多用幾多,再係咁真係唔係辦法~
都係要選擇性出街至得~我相信出得少唔代表會被遺忘的~
至少而家係咁諗~呵呵~

要用少d錢打電話~搵多d唔駛錢的通訊方法先得~呵呵~
食飯都要計返數~~~唔可以再餐餐用咁多喇......錢唔多呀......嗯~~~

有時我又會覺得,我會否太過在意自己的問題呢?
把自己的位置放得太高,忽略了身邊的人和事~
不過最緊要知道自己要甚麼就好~人本來都是自私的,不是嗎?呵呵~

>>April 5, 2004 at 4:18:18 PM GMT+8

2004 年 4 月 3 日 星期六 【晴】

無得頂啦今日.............

尋晚十二點幾出黎食燒烤,一直玩到今朝六點幾先返黎~~~
食果陣仲無端端俾隔離的人兄請左我地飲酒.....
傾左一輪先走~哈~恆同佢傾左好耐呢~~~

返黎就訓..........一直訓到一點半就醒左打日記喇~
仲未食飯呢~~~sa今日去東莞,立同恆又去睇樓~
嗯...........結果都係冇練笛呢~~~

一路上網打發時間~今日同左一個網友傾偈~呵~
一路傾到四點幾~又睇睇網咁~始終都係冇睇男女字典~
咁去到六點半左右,就出去陪青去睇師傅仔,順便食飯~
七點幾睇完,咁就同青同恆去左食飯~之後就返房喇~呵呵~
平靜的一天~~~

今晚個天空好靚啊........又冇雲,個月光又勁圓勁光~~~
好耐冇試過咁好天喇.......夜晚~
都好耐冇試過咁有心情去欣賞咁靚的夜空喇~呵呵~
而家...........值得高興~哈~

昨晚.........有d位我覺得自己又去返舊時個位........
好唔鍾意自己咁樣,睇住自己有d野,但又選擇唔講~
我覺得有時咁講出黎好似好掃興咁.........對唔住呀~
呢兩日我會搵一個機會同你地講返架~我唔會再收收埋埋唔俾人知架喇~

>>April 4, 2004 at 3:05:39 PM GMT+8

2004 年 4 月 2 日 星期五 【晴】

哈~~~正正正~~~今日出晒太陽喇~~~

今朝訓到十二點半至識醒~~~三個鬧鐘都嘈唔醒我......
約左佢地十二點九........好在仲趕得切~
恆今日真係唔知醒呢......結果係得三條友出去食飯~去左食牛丸啊~

食完飯呢~大家就去左睇樓~哈~
睇左幾間啦~~~係靚架~~~個價錢仲靚呀~~~呵呵呵~~~有一間係立的老師放租的~呵~
睇完就返房喇~~~呵呵~~~今日個太陽勁晒呢,似返d夏天喇~唔落雨真係最好~

唔知係咪尋日去得太盡.........今日兩隻小腿都好痛~
睇完樓返房之後最勁......哈~跛左咁拖地~但又唔係keep住痛喎~
係唔知行路果陣用左邊個位落地呢,隻腳就痛喇.........哈~
快快好返啊~~~我要打波、打波、打波~~~

夜晚出左去時代廣場蕉葉食飯~~~豪左一晚呢~~~
本來諗住等埋青的,但佢o係深圳塞火車......搞左一輪至買到飛呢~
結果佢都係趕唔到返黎一齊食~我地食完佢都仲係o係深圳未開車~
由時代廣場行到返宿舍,差唔多十二點時青話返到,問出唔出喎~呵~
咁我地一班人又十二點幾出去食燒烤啦.......呵呵呵~通頂喎又~~~

原來,很多事換了一種心境看,竟然會變得如此無聊......
幹嘛我那時會這樣想的?幹嘛我會有這樣的行動呢?
呵呵~~~耐人尋味..........
找機會一定和大家說說~

>>April 4, 2004 at 5:34:47 AM GMT+8

2004 年 4 月 1 日 星期四 【綿綿細雨】

今日終於都好天喇～～～

今朝七點諗住醒架，點知．．．都係九點半至醒～
執晒野出門口喇，點知出到去發現體育館又俾人用左，又要過田徑場～
過到去，今日考左實心球呢，仲練左跑～
但繼星期三拉傷左邊小腿同條腰後，今日練跑又拉傷右邊大脾～
真係全身都係傷．．．少左運動真係差晒～～～

返房換左衫就又出去喇～今日答應左青陪佢出街呢～
我地打算去行狀元坊，但要轉車，轉轉下唔知去左邊～
哈～青兩次同我出街都迷路～都係去四圍行探險咁～呵呵～
睇到一間野好似幾好食咁，下次有機會去試試先～
最後好在都搵得返巴士撘去狀元坊～

去到係咁行行行～青似乎係之前行到累喇，都冇咩心機睇～
睇左好多間都冇合心水的～我都睇左ｄ衫咁～都係冇野想買～
去到六點幾就返黎喇～

返到黎七點幾，咁青要拎野俾人，就陪佢返金四～
八點半俾野人，搞左一輪之後我地就去左食飯～仲傾左ｄ問題～
之後就返房喇～今晚又要洗衫，但又開始落雨．．．頂～

其實，你們對我在某些事情上可能是有點誤會了～
很多你們以為我是這樣想的事，其實事實可能不是你們想像中那樣的～
只靠看到的文字去想像，往往可能想錯的～說給我聽聽，或許真相其實沒甚麼的～
不希望再因為任何誤會而失去一段友誼了．．．．．．

>>April 2, 2004 at 5:39:34 PM GMT+8